Sreeleela Remuneration: ಪುಷ್ಪ 2 ಚಿತ್ರದ ಐಟಂ ಡಾನ್ಸ್‌ನಲ್ಲಿ ಹೆಜ್ಜೆ ಹಾಕಲು ಶ್ರೀಲೀಲಾ ಪಡೆದ ಸಂಭಾವನೆ ಎಷ್ಟು ಕೋಟಿ?
Nov 11, 2024 09:36 PM IST
Share
ಪುಷ್ಪ 2 ಚಿತ್ರದ ಐಟಂ ಡಾನ್ಸ್‌ನಲ್ಲಿ ಹೆಜ್ಜೆ ಹಾಕಲು ಶ್ರೀಲೀಲಾ ಪಡೆದ ಸಂಭಾವನೆ ಎಷ್ಟು ಕೋಟಿ?
ಬಹುನಿರೀಕ್ಷಿತ ಪುಷ್ಪ 2 ದಿ ರೈಸ್ ಸಿನಿಮಾ ಬಿಡುಗಡೆಗೆ ಹೆಚ್ಚು ದಿನ ಉಳಿದಿಲ್ಲ. ಈ ನಡುವೆ ಫುಲ್‌ ಜೋಶ್‌ನಲ್ಲಿ ಪ್ರಚಾರ ಕೆಲಸದಲ್ಲಿ ಬಿಜಿಯಾಗಿರುವ ಸಿನಿಮಾತಂಡ, ಈಚೆಗಷ್ಟೇ ಚಿತ್ರದ ಐಟಂ ಡಾನ್ಸ್‌ನಲ್ಲಿ ಶ್ರೀಲೀಲಾ ಹೆಜ್ಜೆ ಹಾಕಿದ್ದಾರೆ ಎಂದು ಹೇಳಿ, ಫಸ್ಟ್‌ ಲುಕ್‌ ಬಿಡುಗಡೆ ಮಾಡಿತ್ತು. ಈಗ ಇದೇ ಹಾಡಿಗೆ ಶ್ರೀಲೀಲಾ ಪಡೆದ ಸಂಭಾವನೆ ವಿಚಾರವೂ ಮುನ್ನೆಲೆಗೆ ಬಂದಿದೆ.
Pushpa 2 Sreeleela Item Dance: ಅಲ್ಲು ಅರ್ಜುನ್ ಅಭಿನಯದ ಪುಷ್ಪ 2 ಸಿನಿಮಾ ಒಂದಿಲ್ಲೊಂದು ಕಾರಣಕ್ಕೆ ಸುದ್ದಿಯಲ್ಲಿದೆ. ಬಿಡುಗಡೆ ದಿನಾಂಕ ಘೋಷಣೆ ಆದಾಗಿನಿಂದ, ಈ ಸಿನಿಮಾ ಮೇಲಿನ ನಿರೀಕ್ಷೆ ದ್ವಿಗುಣಗೊಂಡಿದೆ. ಹೀಗಿರುವಾಗಲೇ ಇದೇ ನವೆಂಬರ್‌ 17ಕ್ಕೆ ಇದೇ ಚಿತ್ರದ ಟ್ರೇಲರ್‌ ಸಹ ಬಿಡುಗಡೆ ಆಗಲಿದೆ. ಅದಕ್ಕೂ ಮೊದಲು ಈ ಸಿನಿಮಾದಲ್ಲಿನ ಐಟಂ ಡಾನ್ಸ್‌ನಲ್ಲಿ ಯಾರಿರಲಿದ್ದಾರೆ ಎಂಬ ವಿಚಾರವೂ ಹೆಚ್ಚು ಚರ್ಚೆ ಹುಟ್ಟುಹಾಕಿತ್ತು. ಅದಕ್ಕೆ ಉತ್ತರವೆಂಬಂತೆ ಶ್ರೀಲೀಲಾ ಫಸ್ಟ್‌ ಲುಕ್‌ ಬಿಡುಗಡೆ ಮಾಡಿ ಸರ್ಪ್ರೈಸ್‌ ನೀಡಿತ್ತು ಪುಷ್ಪ ಸಿನಿಮಾ ತಂಡ.
ನಟಿ ಶ್ರೀಲೀಲಾಗೆ ಇತ್ತೀಚಿನ ಕೆಲ ವರ್ಷಗಳಿಂದ ದೊಡ್ಡ ಹಿಟ್ ಸಿಕ್ಕಿಲ್ಲ. ನಟಿಸಿದ ಸಿನಿಮಾಗಳೆಲ್ಲವೂ ಪ್ಲಾಪ್‌ ಪಟ್ಟಿ ಸೇರಿವೆ. ಈ ವರ್ಷದ ಆರಂಭದಲ್ಲಿ ಮಹೇಶ್‌ ಬಾಬು ಜತೆಗೆ ಗುಂಟೂರು ಖಾರಂ ಸಿನಿಮಾದಲ್ಲಿ ನಾಯಕಿಯಾಗಿದ್ದ ಶ್ರೀಲೀಲಾಗೆ ಆ ಸಿನಿಮಾ ಕೈ ಹಿಡಿಯಲಿಲ್ಲ. ಅದಕ್ಕೂ ಮೊದಲಿನ ಎಕ್ಸ್ಟ್ರಾಡಿನರಿ ಮ್ಯಾನ್‌, ಶದಿಕೇಶವ, ಭಗವಂತ ಕೇಸರಿ, ಸ್ಕಂದ ಸಿನಿಮಾಗಳೂ ನಿರೀಕ್ಷಿತ ಪ್ರಮಾಣದಲ್ಲಿ ಯಶಸ್ಸು ಗಳಿಸಲಿಲ್ಲ. ಈಗ ಸದ್ದಿಲ್ಲದೆ, ಪುಷ್ಪ 2 ಚಿತ್ರದ ಐಟಂ ಹಾಡಿನಲ್ಲಿ ಹೆಜ್ಜೆ ಹಾಕಿದ್ದಾರೆ.
ನಿರ್ದೇಶಕ ಸುಕುಮಾರ್ ತಮ್ಮ ಚೊಚ್ಚಲ ಚಿತ್ರದಿಂದಲೂ ಐಟಂ ಸಾಂಗ್ ಮೇಲೆ ಅತಿಯಾದ ಸೆಂಟಿಮೆಂಟ್‌ ಹೊಂದಿದ್ದಾರೆ. ಪುಷ್ಪ: ದಿ ರೈಸ್ ಚಿತ್ರದ ಹೂಂ ಅಂಟಾವಾ ಮಾವ.. ಹಾಡಿಗೆ ಸಮಂತಾ ಅವರನ್ನು ಕರೆತಂದಿದ್ದರು. ಈಗ ಪಾರ್ಟ್‌ 2 ಚಿತ್ರದ ಹಾಡಿಗೆ ಶ್ರೀಲೀಲಾ ಅವರನ್ನು ಐಟಂ ಡಾನ್ಸರ್‌ ಆಗಿ ಕರೆತಂದಿದ್ದಾರೆ. ಈ ಒಂದು ಹಾಡಿಗೆ ಕೋಟಿ ಕೋಟಿ ಸಂಭಾವನೆಯನ್ನೂ ಶ್ರೀಲೀಲಾ ಪಡೆದಿದ್ದಾರೆ ಎಂಬ ಟಾಕ್‌ ಟಾಲಿವುಡ್ ಅಂಗಳದಲ್ಲಿದೆ.
ಅಂದಹಾಗೆ ಈ ಮೊದಲು 'ಪುಷ್ಪ 2' ಚಿತ್ರದ ಐಟಂ ಹಾಡಿಗೆ ಆರಂಭದಲ್ಲಿ ಅನೇಕ ನಾಯಕಿಯರ ಹೆಸರುಗಳು ಕೇಳಿಬಂದವು. ಸಮಂತಾ ಮತ್ತು ಶ್ರದ್ಧಾ ಕಪೂರ್ ಅವರಲ್ಲದೆ, ಟಾಲಿವುಡ್ ಮತ್ತು ಬಾಲಿವುಡ್‌ನ ಟಾಪ್‌ ನಾಯಕಿಯರ ಹೆಸರುಗಳು ಮುನ್ನೆಲೆಗೆ ಬಂದಿದ್ದವು. ಆದರೆ ಕೊನೆಯಲ್ಲಿ ಶ್ರೀಲೀಲಾ ಆಯ್ಕೆ ಅಂತಿಮವಾಗಿತ್ತು.
ಡ್ಯಾನ್ಸಿಂಗ್ ಕ್ವೀನ್ ಎಂದೇ ಶ್ರೀಲೀಲಾ ಟಾಲಿವುಡ್‌ನಲ್ಲಿ ಫೇಮಸ್‌. ಶ್ರೀಲೀಲಾ ನಟನೆಯ ಜತೆಗೆ ಒಳ್ಳೆಯ ನೃತ್ಯಗಾರ್ತಿಯೂ ಹೌದು. ಈಗಾಗಲೇ ತಮ್ಮ ನೃತ್ಯದಿಂದ ಅನೇಕ ಹಾಡುಗಳನ್ನು ಸೂಪರ್ ಹಿಟ್ ಮಾಡಿದ್ದಾರೆ ಈ ಕನ್ನಡದ ಬೆಡಗಿ. ಅಂತಹ ಶ್ರೀಲೀಲಾಗೆ ಈಗ ಐಟಂ ಸಾಂಗ್ ಸಿಕ್ಕರೆ ಹೇಗಿರಬಹುದು? ಸದ್ಯ ಹಾಡಿನ ಫಸ್ಟ್‌ ಲುಕ್‌ ಮೂಲಕ ಗಮನ ಸೆಳೆದ ಈ ನಟಿ, ಅದ್ಯಾವ ರೀತಿ ಸೊಂಟ ಬಳುಕಿಸಿದ್ದಾರೆ ಎಂಬುದನ್ನು ನೋಡಲು ಇನ್ನಷ್ಟು ದಿನ ಕಾಯಲೇಬೇಕು. ಶ್ರೀಲೀಲಾ ಅವರು ಪ್ರತಿ ಚಿತ್ರಕ್ಕೆ 1ಕೋಟಿ ಸಂಭಾವನೆ ಪಡೆಯುತ್ತಾರೆ. ಈಗ ಐಟಂ ಹಾಡಿಗೆ ಒಂದೂವರೆ ಕೋಟಿ ಸಂಭಾವನೆ ಪಡೆದಿದ್ದಾರೆ ಎಂದು ಹೇಳಲಾಗುತ್ತಿದೆ.