ಭಾರತೀಯ ಸೇನೆ ಬಗ್ಗೆ ಹಗುರವಾಗಿ ಮಾತನಾಡಿ, ಕಟು ಟೀಕೆಗೆ ಗುರಿಯಾದ ಸಾಯಿ ಪಲ್ಲವಿ! ವೈರಲ್‌ ವಿಡಿಯೋದಲ್ಲಿ ಅಂಥದ್ದೇನಿದೆ?

Sai Pallavi on Indian Army: ಸದ್ಯ ಬಹುಬೇಡಿಕೆಯ ನಟಿಯರಲ್ಲಿ ಸೌತ್‌ನ ಸ್ಟಾರ್‌ ನಟಿ ಸಾಯಿ ಪಲ್ಲವಿ ಕೂಡ ಸ್ಥಾನ ಪಡೆದಿದ್ದಾರೆ. ಇನ್ನೇನು ಇದೇ ಮಾಸಾಂತ್ಯಕ್ಕೆ ಬಹುನಿರೀಕ್ಷಿತ ಭಾರತೀಯ ಸೇನೆಯ ಸೈನಿಕನ ಹಿನ್ನೆಲೆಯ ಅಮರನ್‌ ಸಿನಿಮಾ ಪ್ಯಾನ್‌ ಇಂಡಿಯಾ ಮಟ್ಟದಲ್ಲಿ ತೆರೆಗೆ ಬರಲಿದೆ. ಇಷ್ಟೆಲ್ಲದರ ನಡುವೆ ಇದೀಗ ಇದೇ ಸಾಯಿ ಪಲ್ಲವಿ ಭಾರತೀಯ ಸೇನೆ ಬಗ್ಗೆ ಹಗುರವಾಗಿ ಮಾತನಾಡಿದ ವಿಡಿಯೋ ಸೋಷಿಯಲ್‌ ಮೀಡಿಯಾದಲ್ಲಿ ಬಿರುಗಾಳಿಯನ್ನೇ ಎಬ್ಬಿಸಿವೆ. ಕಟು ಟೀಕೆಗಳು ಬಿರುಸು ಬಾಣಗಳಂತೆ ಅವರೆಡೆಗೆ ಆಗಮಿಸುತ್ತಿವೆ. ಅಷ್ಟಕ್ಕೂ ಸಾಯಿ ಪಲ್ಲವಿ ಹೇಳಿದ್ದೇನು?

ಸಾಯಿ ಪಲ್ಲವಿ ಹೇಳಿದ್ದೇನು?

ಮಾತನಾಡುವ ಭರದಲ್ಲಿ, ಭಾರತೀಯ ಸೇನೆ ಮತ್ತು ಪಾಕಿಸ್ತಾನದ ಸೇನೆಯನ್ನು ಸಾಯಿ ಪಲ್ಲವಿ ಹೋಲಿಕೆ ಮಾಡಿದ್ದಾರೆ. ಹಾಗೇ ಹೋಲಿಕೆ ಮಾಡಿದ್ದೇ ಇದೀಗ, ಟ್ರೋಲ್‌ಗೆ ಕಾರಣವಾಗಿದೆ. ಅಷ್ಟಕ್ಕೂ ಸಾಯಿ ಪಲ್ಲವಿ ಹೇಳಿದ್ದೇನೆಂದರೆ, "ಪಾಕಿಸ್ತಾನದ ಸೇನೆಗೆ ಭಾರತೀಯ ಸೇನೆ ಭಯೋತ್ಪಾದಕರಂತೆ ಕಾಣುತ್ತದೆ. ನಮಗೆ ಪಾಕಿಸ್ತಾನ ಸೇನೆ ಟೆರರಿಸ್ಟ್‌ ಥರ ಕಾಣುತ್ತಾರೆ. ಅದು ನಮ್ಮ ನಮ್ಮ ದೃಷ್ಟಿಕೋನ. ಅವರು ತಮ್ಮವರ ರಕ್ಷಣೆಯಲ್ಲಿದ್ದಾರೆ. ನಮ್ಮ ಸೈನಿಕರು ನಮ್ಮವರ ರಕ್ಷಣೆಗೆ ನಿಂತಿದ್ದಾರೆ" ಎಂಬ ಮಾತನ್ನು ಅವರು ಹೇಳಿದ್ದಾರೆ. ಈ ಮಾತಿಗೆ ಈಗ ಟೀಕೆಗಳ ಸುರಿಮಳೆಯೇ ಹರಿದು ಬರುತ್ತಿದೆ. ವಿವಾದಕ್ಕೂ ಕಾರಣವಾಗಿದೆ. ಅಷ್ಟಕ್ಕೂ ಇನ್ನೊಂದು ವಿಚಾರ ಏನೆಂದರೆ, ಈ ವಿಡಿಯೋ ನಿನ್ನೆ, ಮೊನ್ನೆಯದಲ್ಲ. ಬದಲಿಗೆ ಎರಡು ವರ್ಷ ಹಳೆಯದು!

ಇದನ್ನೂ ಓದಿ: ಸೂತಕದ ಮನೆಯಂತಾದ ಧಾರಾವಾಹಿಗಳು! ಶೀಘ್ರದಲ್ಲಿ ಪುಟ್ಟಕ್ಕನ ಮಕ್ಕಳು ಸೀರಿಯಲ್‌ ಅಂತ್ಯ? ಸಿಕ್ತು ಬಹುದೊಡ್ಡ ಸುಳಿವು

ಎರಡು ವರ್ಷದ ಹಳೇ ವಿಡಿಯೋ

2022ರಲ್ಲಿ ವಿರಾಟ ಪಾರವಂ ಸಿನಿಮಾದ ಬಿಡುಗಡೆ ಸಂದರ್ಭದಲ್ಲಿ ಸಾಯಿ ಪಲ್ಲವಿ ಸಂದರ್ಶನವೊಂದರಲ್ಲಿ ನೀಡಿದ ಹೇಳಿಕೆ ಇದಾಗಿದೆ. ಪಾಕಿಸ್ತಾನದ ಜನರಿಗೆ ಭಾರತೀಯ ಸೇನೆ ಭಯೋತ್ಪಾದಕ ಸಂಘಟನೆ ಇದ್ದಂತೆ ಎಂದು ವಿಡಿಯೋದಲ್ಲಿ ಹೇಳಿದ್ದು, ಭಾರತೀಯರನ್ನು ಕೆರಳಿಸಿದೆ. ಅಷ್ಟಕ್ಕೂ ಆ ವಿಡಿಯೋದಲ್ಲಿ ಸಾಯಿ ಪಲ್ಲವಿ ಆ ಕ್ಷಣದ ದೃಷ್ಟಿಕೋನದ ಬಗ್ಗೆ ಹೇಳಿಕೊಂಡಿದ್ದಾರೆ. ಆ ದೃಷ್ಟಿಕೋನಕ್ಕೆ ಇದೀಗ ವಿವಾದದ ಲೇಪನ ಮಾಡಿ ಟ್ರೋಲ್‌ ಮಾಡಲಾಗುತ್ತಿದೆ.

ನಟಿಯ ಈ ವಿಡಿಯೋಕ್ಕೆ ಸೋಷಿಯಲ್‌ ಮೀಡಿಯಾದಲ್ಲಿ ಬಗೆಬಗೆ ಕಾಮೆಂಟ್‌ಗಳು ಸಂದಾಯವಾಗುತ್ತಿವೆ. "ಸಾಯಿ ಪಲ್ಲವಿ ಅವರು ಬಾಲಿವುಡ್‌ನ ರಾಮಾಯಣ ಚಿತ್ರದಲ್ಲಿ ಸೀತೆಯ ಪಾತ್ರವನ್ನು ನಿರ್ವಹಿಸಲಿದ್ದಾರೆ. ಅವರ ದೃಷ್ಟಿಯಲ್ಲಿ ಭಾರತೀಯ ಸೇನೆ ಮತ್ತು ಪಾಕಿಸ್ತಾನ ಸೇನೆ ಒಂದೇ ಇರಬಹುದು" ಎಂದು ಬಳಕೆದಾರರೊಬ್ಬರು ಕಾಮೆಂಟ್‌ ಮಾಡಿದ್ದಾರೆ.

ಇದನ್ನೂ ಓದಿ: ಅಮ್ಮನನ್ನೂ ಮೀರಿಸ್ತಾರೆ ‘ರಾಮ ಶಾಮ ಭಾಮ’ ಖ್ಯಾತಿಯ ನಟಿ ಊರ್ವಶಿಯ ಸುಪುತ್ರಿ; ಶೀಘ್ರದಲ್ಲಿ ಬಣ್ಣದ ಲೋಕಕ್ಕೆ ತೇಜಲಕ್ಷ್ಮೀ

ಸಾಯಿ ಪಲ್ಲವಿಗೆ ಸವಾಲ್‌ ಹಾಕಿದ ನೆಟ್ಟಿಗ

ಯುವ ಉದ್ಯಮಿ ದಿವ್ಯಾ ಗಂಡೋತ್ರಾ ಟಂಡನ್, ಸಾಯಿ ಪಲ್ಲವಿ ವೀಡಿಯೊವನ್ನು ಟ್ವಿಟರ್‌ನಲ್ಲಿ ಹಂಚಿಕೊಂಡಿದ್ದಾರೆ, “ನಾನು ನೋಡಿದ ಖಟ್ಟರ್‌ಪಂಥಿಯಲ್ಲಿ ಇವರೂ ಒಬ್ಬರು. ಭಾರತೀಯ ಸೇನೆ ಇರುವುದು ನಮ್ಮ ದೇಶವನ್ನು ರಕ್ಷಿಸುವುದಕ್ಕಾಗಿಯೇ ಹೊರತು, ಗಡಿಯಾಚೆಗಿನ ಅಮಾಯಕ ಜನರಿಗೆ ತೊಂದರೆ ಕೊಡಲು ಅಲ್ಲ. ಈ ಬಗ್ಗೆ ಸಾಯಿ ಪಲ್ಲವಿಗೆ ತಿಳಿವಳಿಕೆ ಇಲ್ಲ. ಸಾಯಿ ಪಲ್ಲವಿ ನಿಮಗೆ ಧೈರ್ಯವಿದ್ದರೆ ಇದಕ್ಕೆ ಉತ್ತರಿಸಿ: ಭಾರತೀಯ ಸೇನೆಯಿಂದಾಗಿ ಪಾಕಿಸ್ತಾನದಲ್ಲಿ ನಡೆದ ಭಯೋತ್ಪಾದಕ ದಾಳಿಯಲ್ಲಿ ಅಮಾಯಕರು ಸಾವನ್ನಪ್ಪಿದ ಉದಾಹರಣೆಯಾದರೂ ಹೇಳಬಲ್ಲಿರಾ? ನಮ್ಮ ಸೈನಿಕರು ಮತ್ತು ನಾಗರಿಕರನ್ನು ಕೊಲ್ಲಲು ಪಾಕಿಸ್ತಾನವು ಶಸ್ತ್ರಸಜ್ಜಿತ ಭಯೋತ್ಪಾದಕರನ್ನು ಕಳುಹಿಸಿದ ಉದಾಹರಣೆಗಳ ಪಟ್ಟಿ ನನ್ನ ಬಳಿ ಇದೆ" ಎಂದಿದ್ದಾರೆ.

ಸಾಯಿ ಪಲ್ಲವಿ ಮಾತನಾಡಿದ್ದ ಈ ಹಿಂದಿನ ವಿಡಿಯೋ