Guruprasad Death: ಮೊದಲ ಹೆಂಡತಿಗೆ ವಿಚ್ಛೇದನ, ಎರಡನೇ ಹೆಂಡತಿ ಈಗ ಗರ್ಭಿಣಿ, ಶೂಲವಾಯ್ತಾ ಸಾಲ?; ಇದು ಗುರುಪ್ರಸಾದ್‌ ಕಥೆ ವ್ಯಥೆ

Guruprasad Death: ಮಠ, ಎದ್ದೇಳು ಮಂಜುನಾಥ್‌, ಡೈರೆಕ್ಟರ್ಸ್‌ ಸ್ಪೇಷಲ್‌ ಸೇರಿ ಇತ್ತೀಚಿನ ರಂಗನಾಯಕ ಸಿನಿಮಾ ಸೇರಿ ಹಲವು ಚಿತ್ರಗಳನ್ನು ನಿರ್ದೇಶಿಸಿದ್ದ ಗುರುಪ್ರಸಾದ್‌ ಈಗ ನೆನಪು ಮಾತ್ರ. ಭಿನ್ನ ವಿಭಿನ್ನ ಸಿನಿಮಾಗಳನ್ನು ನೀಡಿದ್ದ ಗುರುಪ್ರಸಾದ್‌ ಸಿನಿಮಾ ನಿರ್ದೇಶನ ಮಾತ್ರವಲ್ಲ, ನಟನೆಯಲ್ಲಿಯೂ ಗುರುತಿಸಿಕೊಂಡವರು. ಹಲವು ಸಿನಿಮಾಗಳಲ್ಲಿ ಅತಿಥಿ ಪಾತ್ರಗಳಲ್ಲಿಯೂ ನಟಿಸಿದವರು. ಜತೆಗೆ ನಿರ್ದೇಶನದ ಜತೆಗೆ ಹಲವು ಸಿನಿಮಾಗಳಿಗೆ ಬರವಣಿಗೆಯಲ್ಲಿಯೂ ತೊಡಗಿಸಿಕೊಂಡಿದ್ದರು. ಆದರೆ ಈಗ ಅದೇ ನಿರ್ದೇಶಕ ಯಾವುದೂ ಮುನ್ಸೂಚನೆ ನೀಡದೇ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಬೆಂಗಳೂರು ಉತ್ತರ ತಾಲೂಕಿನ ಮಾದನಾಯಕನಹಳ್ಳಿಯ ಅಪಾರ್ಟ್‌ಮೆಂಟ್‌ನಲ್ಲಿ ನೇಣು ಬಿಗಿದ ಸ್ಥಿತಿಯಲ್ಲಿ ಗುರುಪ್ರಸಾದ್‌ ಅವರ ಶವ ಪತ್ತೆಯಾಗಿದೆ. ಕಳೆದ ನಾಲ್ಕೈದು ದಿನಗಳಿಂದ ಸಾರ್ವಜನಿಕ ಸಂಪರ್ಕದಲ್ಲಿ ಗುರುಪ್ರಸಾದ್‌ ಕಂಡಿರಲಿಲ್ಲ. ಈ ನಡುವೆ ಅಪಾರ್ಟ್‌ಮೆಂಟ್‌ ಬಳಿಕ ಕೆಟ್ಟ ವಾಸನೆ ಬರಲಾರಂಭಿಸಿತ್ತು. ಗುರುಪ್ರಸಾದ್ ಮನೆಯಲ್ಲಿಯೇ ವಾಸನೆ ಬರುತ್ತಿರುವುದರಿಂದ ಇದನ್ನ ಅರಿತ ಅಲ್ಲಿನ ನಿವಾಸಿಗಳು, ಪೊಲೀಸ್‌ ಗಮನಕ್ಕೂ ತಂದಿದ್ದರು. ಬಳಿಕ ಪೊಲೀಸ್‌ ತಂಡ ಆಗಮಿಸಿ ನೋಡಿದಾಗ, ಆತ್ಮಹತ್ಯೆ ಅಧಿಕೃತವಾಗಿತ್ತು.

ಇದನ್ನೂ ಓದಿ: ಹೇಗಿತ್ತು ನೋಡಿ ಡೈರೆಕ್ಟರ್ ಗುರುಪ್ರಸಾದ್ ಜೀವನ; ಇಷ್ಟೆಲ್ಲ ಇದ್ದೂ ಆತ್ಮಹತ್ಯೆ ಮಾಡಿಕೊಂಡಿದ್ಯಾಕೆ?

ನೆಲಮಂಗಲದ ಆಸ್ಪತ್ರೆಯಲ್ಲಿ ಪೋಸ್ಟ್‌ ಮಾರ್ಟಮ್‌

ಮಾದಕನಾಯಕನಹಳ್ಳಿ ಠಾಣೆ ವ್ಯಾಪ್ತಿಯಲ್ಲಿ ಈ ಪ್ರಕರಣ ದಾಖಲಾಗಿದೆ. ಸ್ಥಳಕ್ಕೆ ಆಗಮಿಸಿದ ಪೊಲೀಸರು, ನಿರ್ದೇಶಕ ಗುರುಪ್ರಸಾದ್‌ ಅವರ ಶವವನ್ನು ನೆಲಮಂಗಲದ ಸರ್ಕಾರಿ ಆಸ್ಪತ್ರೆಗೆ ಸಾಗಿಸುವ ಪ್ರಕ್ರಿಯೆಯಲ್ಲಿ ತೊಡಗಿಸಿಕೊಂಡಿದ್ದಾರೆ. ಅಲ್ಲಿ ಮೃತ ದೇಹದ ಪೋಸ್ಟ್‌ ಮಾರ್ಟಮ್‌ ನಡೆಯಲಿದೆ. ಮನೆಯಲ್ಲಿಯೂ ಏನಾದ್ರೂ ಡೆತ್‌ ನೋಟ್‌ ಸಿಗಬಹುದಾ ಎಂದು ಪೊಲೀಸ್‌ ಇಲಾಖೆ ಶೋಧ ನಡೆಸಿದ್ದಾರೆ.

ಸಾಲವೇ ಶೂಲವಾಯ್ತಾ?

ನಟ, ನಿರ್ದೇಶಕ ಗುರುಪ್ರಸಾದ್‌ ಸಿನಿಮಾ ವಿಚಾರವಾಗಿ ಸಾಕಷ್ಟು ಸಾಲ ಮಾಡಿಕೊಂಡಿದ್ದಾರೆ ಎಂಬ ಮಾತೂ ಹೇಳಿಬರುತ್ತಿದೆ. ಇದರ ನಡುವೆ ಅವರಿಗೆ ಯಾವುದೇ ಆರ್ಥಿಕ ಸಮಸ್ಯೆಗಳು ಇರಲಿಲ್ಲ ಎಂದೂ ಕೆಲವರು ಹೇಳುತ್ತಿದ್ದಾರೆ. ಅತಿಯಾಗಿ ಸಾಲ ಮಾಡಿಕೊಂಡಿದ್ದರಿಂದಲೇ ಗುರುಪ್ರಸಾದ್‌ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂಬುದಕ್ಕೆ ಸಾಕ್ಷ್ಯವೂ ಸಿಕ್ಕಿದೆ. ಚೆಕ್‌ ಬೌನ್ಸ್‌ ಪ್ರಕರಣದಲ್ಲಿಯೂ ಗುರುಪ್ರಸಾದ್‌ ಅವರ ವಿರುದ್ಧ ಜಯನಗರ ಠಾಣೆಯಲ್ಲಿ ಕೇಸ್‌ ದಾಖಲಾಗಿತ್ತು. ಶ್ರೀನಿವಾಸ್‌ ಗೌಡ ಎಂಬುವವರಿಗೆ 25ನ ಲಕ್ಷ ಹಣ ನೀಡಬೇಕಿತ್ತು. ಅಕ್ಟೋಬರ್‌ 26ಕ್ಕೆ ಕೋರ್ಟ್‌ಗೂ ವಿಚಾರಣೆಗೆ ಹಾಜರಾಗಬೇಕಿತ್ತು. ಈ ನಡುವೆ ಸಾಲಗಾರರ ಕಾಟಕ್ಕೂ ಎರಡ್ಮೂರು ಮನೆಗಳನ್ನೂ ಬದಲಿಸಿದ್ದರು ಗುರುಪ್ರಸಾದ್.‌

ಇದನ್ನೂ ಓದಿ: ‘ಹೆಸರು ಹೇಳಿದ್ರೆ ಕಾಂಟ್ರವರ್ಸಿ ಆಗುತ್ತೆ, ಅಂಥವರ ಸಹವಾಸಕ್ಕೆ ಬಿದ್ದು ಗುರುಪ್ರಸಾದ್ ಹಾಳಾದ’;‌ ಜಗ್ಗೇಶ್‌ ಪ್ರತಿಕ್ರಿಯೆ

ಮೊದಲ ಪತ್ನಿಗೆ ವಿಚ್ಛೇದನ, ಎರಡನೇ ಮದುವೆ

ಗುರುಪ್ರಸಾದ್‌ ಈ ಹಿಂದೆಯೇ ಮೊದಲ ಪತ್ನಿಗೆ ಮನಸ್ಥಾಪದ ಕಾರಣದಿಂದ ವಿಚ್ಚೇದನ ನೀಡಿದ್ದರು. ಮೊದಲ ಹೆಂಡತಿಗೆ ಓರ್ವ ಮಗಳಿದ್ದಾಳೆ. ಬಳಿಕ ಎರಡನೇ ಮದುವೆ ಆಗಿದ್ದರು ಗುರುಪ್ರಸಾದ್‌. ಈ ಎರಡನೇ ಪತ್ನಿ ಈಗ ಗರ್ಭಿಣಿ ಎಂದೂ ಹೇಳಲಾಗುತ್ತಿದೆ.

ಸಾಲು ಸಾಲು ಸಿನಿಮಾ ಸೋಲು

ಗುರುಪ್ರಸಾದ್‌ ಒಳ್ಳೆಯ ನಿರ್ದೇಶಕ. ಒಂದಷ್ಟು ಹಿಟ್‌ ಸಿನಿಮಾಗಳನ್ನು ನೀಡಿದ್ದಾರೆ. ಆದರೆ, ಇತ್ತೀಚಿನ ದಿನಗಳಲ್ಲಿ ಇದೇ ನಿರ್ದೇಶಕ ಗುರುಪ್ರಸಾದ್‌ ಅವರಿಂದ ಒಂದೇ ಒಂದು ಹಿಟ್‌ ಸಿಕ್ಕಿಲ್ಲ. ವಿಖ್ಯಾತ್‌ ನಿರ್ಮಾಣದ ರಂಗನಾಯಕ ಸಿನಿಮಾದಲ್ಲಿ ಜಗ್ಗೇಶ್‌ ಕಾಂಬಿನೇಷನ್‌ ಜತೆಗೆ ಮತ್ತೆ ಒಂದಾದರೂ, ಆ ಸಿನಿಮಾ ಬಾಕ್ಸ್‌ ಆಫೀಸ್‌ನಲ್ಲಿ ಹೀನಾಯ ಸೋಲನುಭವಿಸಿತು.

ಇದನ್ನೂ ಓದಿ: ಮಠ ಸಿನಿಮಾ ಖ್ಯಾತಿಯ ಡೈರೆಕ್ಟರ್ ಗುರುಪ್ರಸಾದ್ ಆತ್ಮಹತ್ಯೆ ಶಂಕೆ; ನೇಣು ಬಿಗಿದ ಸ್ಥಿತಿಯಲ್ಲಿ ಮೃತದೇಹ ಪತ್ತೆ

ಗಮನಿಸಿ: ಖಿನ್ನತೆ, ಆತ್ಮಹತ್ಯೆಯ ಆಲೋಚನೆಗಳು ಬಾಧಿಸುತ್ತಿದ್ದರೆ ನಿಮ್ಮ ಗೆಳತಿ / ಗೆಳೆಯರೊಂದಿಗೆ, ಹೆತ್ತವರೊಂದಿಗೆ, ಸಂಬಂಧಿಕರು, ಆಪ್ತರೊಂದಿಗೆ ಮುಕ್ತವಾಗಿ ಮಾತನಾಡಿ. ಪೊಲೀಸರ, ಆಪ್ತಸಮಾಲೋಚಕರ, ವೈದ್ಯರ ನೆರವು ಪಡೆಯಿರಿ. ಕರ್ನಾಟಕದಲ್ಲಿ ಆರೋಗ್ಯ ಸಹಾಯವಾಣಿ 104, ವೃದ್ಧರ ಸಹಾಯವಾಣಿ 1090, ಮಕ್ಕಳ ಸಹಾಯವಾಣಿ 1098 ಮತ್ತು ಸ-ಮುದ್ರ ಸಹಾಯವಾಣಿ 98803 96331 ಮೂಲಕ ಟೆಲಿ ಕೌನ್ಸೆಲಿಂಗ್ ನೆರವು ಪಡೆದುಕೊಳ್ಳಿ. ಕೊನೇ ನಿರ್ಧಾರಕ್ಕೆ ಮೊದಲು ನಿಮ್ಮವರ ಬಗ್ಗೆ ಒಂದು ಕ್ಷಣ ಯೋಚಿಸಿ.