Interval Kannada Movie: ಗಣಪತಿ ಹಬ್ಬಕ್ಕೆ ಚಂದನ್‌ ಶೆಟ್ಟಿ ಕಂಠದಲ್ಲಿ ಬಂತು ಇಂಟರ್‌ವಲ್‌ ಚಿತ್ರದ ಹಾಡು

Interval Movie Song: ಇತ್ತೀಚೆಗೆ ಫಸ್ಟ್ ಲುಕ್ ಪೋಸ್ಟರ್ ಬಿಡುಗಡೆ ಮೂಲಕ ಪ್ರೇಕ್ಷಕರನ್ನು ಸೆಳೆದಿದ್ದ ಚಿತ್ರ ಇಂಟರ್ ವಲ್. ಹೊಸ ನಿರ್ದೇಶಕ ಭರತ್ ವರ್ಷ ಈ ಸಿನಿಮಾ ನಿರ್ದೇಶನ ಮಾಡಿದ್ದಾರೆ. ಯುವ ಪೀಳಿಗೆಯನ್ನೇ ಗಮನದಲ್ಲಿಟ್ಟುಕೊಂಡು ಈ ಸಿನಿಮಾ ಮಾಡಿದ್ದಾರೆ ನಿರ್ದೇಶಕರು. ಇದೀಗ ಇದೇ ಇಂಟರ್‌ವಲ್‌ ಸಿನಿಮಾದ ಮೊದಲ ಹಾಡು ಆನಂದ್ ಆಡಿಯೋ ಮೂಲಕ ಗಣೇಶ ಹಬ್ಬದ ಪ್ರಯುಕ್ತ ಬಿಡುಗಡೆ ಆಗಿದೆ. ಈ ಹಾಡಿಗೆ ನೋಡುಗರಿಂದ ಪಾಸಿಟಿವ್‌ ರೆಸ್ಪಾನ್ಸ್‌ ಸಿಕ್ಕಿದೆ.

ಗಣೇಶ ಹಬ್ಬದ ಈ ಸಂದರ್ಭದಲ್ಲಿ ಬಿಡುಗಡೆ ಆಗಿರುವ ಹಾಡಿನಲ್ಲಿಯೂ ಗಣೇಶನ ನಾಮಸ್ಮರಣೆ ಮಾಡಲಾಗಿದೆ. ಅಂದರೆ, ಈ ಹಾಡು ವಿಘ್ನ ನಿವಾರಕನಿಗೆ ಸಂಬಂಧಿಸಿದ್ದು. ಗಣೇಶನ ಜತೆ ಯುವ ಸಮುದಾಯಕ್ಕಿರುವ ಅವಿನಾಭಾವ ಬಂಧವನ್ನು, ಈ ಹಾಡಿನ ಮೂಲಕ ಕಟ್ಟಿಕೊಟ್ಟಿದೆ ಚಿತ್ರತಂಡ. ಗಣೇಶನ ಸುತ್ತ ಸೃಷ್ಟಿಯಾಗಿರುವ ಪ್ರಸಿದ್ಧ ಹಾಡುಗಳ ಸಾಲಿನಲ್ಲಿ ಈ ಹಾಡೂ ಸೇರ್ಪಡೆಗೊಳ್ಳಲಿದೆ ಎಂಬ ಭರವಸೆ ಚಿತ್ರತಂಡದ್ದು. ಅಂದಹಾಗೆ, ಭರತವರ್ಷ್ ಪಿಕ್ಚರ್ಸ್ ಬ್ಯಾನರಿನಡಿಯಲ್ಲಿ ಈ ಸಿನಿಮಾ ಮೂಡಿಬಂದಿದೆ.

ಇದನ್ನೂ ಓದಿ: ಕಾರ್ತಿಕ್‌ ಮಹೇಶ್‌ ನಡೆಸಿಕೊಡುವ Suvarna Celebrity League ಶೋನಲ್ಲಿ ಭಾಗವಹಿಸುವ ಸ್ಪರ್ಧಿಗಳು ಯಾರ್ಯಾರು?

ಚಂದನ್‌ ಶೆಟ್ಟಿ ಧ್ವನಿ

ಇಂಟರ್ ವಲ್ ಚಿತ್ರದ ಈ ಹಾಡಿಗೆ ಚಂದನ್ ಶೆಟ್ಟಿ ಧ್ವನಿ ನೀಡಿದರೆ, ವಿಜಯ್ ಈಶ್ವರ್ ಸಾಹಿತ್ಯ ಬರೆದಿದ್ದಾರೆ. ವಿಕಾಸ್ ವಸಿಷ್ಠ ಸಂಗೀತ ನೀಡಿದ್ದಾರೆ. ಗಣ ಗಣ ಗಣಪತಿ ಫಂಕ್ಷನ್ ಹಲೋ ಎವ್ರಿಬಡಿ ಸ್ವಲ್ಪ ಅಟೆನ್ಷನ್.. ಎಂದು ಶುರುವಾಗುವ ಈ ಹಾಡು, ಬಹುತೇಕರ ಬದುಕಿನ ಗತವೈಭವವನ್ನು ತೆರೆದಿಡಲಿದೆ. ಇದರೊಂದಿಗೆ ಸಿನಿಮಾದ ಒಂದಷ್ಟು ಪಾತ್ರಗಳೂ ಕೂಡಾ ಈ ಹಾಡಿನ ಮೂಲಕ ಪರಿಚಯವಾಗಿವೆ. ಇಂಜಿನಿಯರಿಂಗ್ ಮುಗಿಸಿಕೊಂಡು, ಕೆಲಸ ಅರಸಿ ಹೊರಡುವ ಯುವಕರ ಗುಂಪೊಂದರ ಹೋರಾಟದ ಕಥನವನ್ನು ಈ ಚಿತ್ರ ಒಳಗೊಂಡಿದೆ.

ನಾಯಕನಾಗಿ ಸೀರಿಯಲ್‌ ನಟ ಶಶಿರಾಜ್‌

ಈ ಚಿತ್ರಕ್ಕೆ ಕಥೆ ಚಿತ್ರಕಥೆ ಮತ್ತು ಸಂಭಾಷಣೆಯ ಜವಾಬ್ದಾರಿಯನ್ನು ಸುಖಿ ಬರೆದಿದ್ದಾರೆ. ಬೆಂಗಳೂರು, ಶಿವಮೊಗ್ಗ ಸುತ್ತಮುತ್ತ ಈ ಚಿತ್ರದ ಚಿತ್ರೀಕರಣ ನಡೆದಿದೆ. ಪೋಸ್ಟ್ ಪ್ರೊಡಕ್ಷನ್ ಕೆಲಸ ಕಾರ್ಯಗಳೂ ಮುಗಿದಿವೆ. ಈಗಾಗಲೇ ಅನೇಕ ಸೀರಿಯಲ್ಲುಗಳಲ್ಲಿ ನಟಿಸಿ, ತಮ್ಮದೇ ವಿಶಿಷ್ಟ ಮ್ಯಾನರಿಸಂ ಮತ್ತು ನಟನಾ ಶೈಲಿಯಿಂದ ಗಮನ ಸೆಳೆದಿರುವವರು ಶಶಿರಾಜ್ (ಬಾಲಾ), ಇಂಟರ್ ವಲ್ ಮೂಲಕ ನಾಯಕನಾಗಿ ಎಂಟ್ರಿ ಕೊಡುತ್ತಿದ್ದಾರೆ.

ಇದನ್ನೂ ಓದಿ: ಶ್ರೀಮುರಳಿ ಅಭಿನಯದ ಬಘೀರ ರಿಲೀಸ್‌ ದಿನಾಂಕ ಅನೌನ್ಸ್;‌ ಅಕ್ಟೋಬರ್‌ನಲ್ಲಿ ತೆರೆ ಕಾಣ್ತಿದೆ ಪ್ರಶಾಂತ್‌ ನೀಲ್‌ ಕಥೆ ಬರೆದಿರುವ ಸಿನಿಮಾ

ಇನ್ನುಳಿದಂತೆ ರಂಗಭೂಮಿ ಕಲಾವಿದ ಪ್ರಜ್ವಲ್ ಗೌಡ, ಸುಖಿ ಮತ್ತು ರಂಗನಾಥ್ ಶಿವಮೊಗ್ಗ ಮುಂತಾದವರು ಪ್ರಮುಖ ಪಾತ್ರಗಳಿಗೆ ಜೀವ ತುಂಬಿದ್ದಾರೆ. ರಾಜ್ ಕಾಂತ್ ಛಾಯಾಗ್ರಹಣ, ಪ್ರಮೋದ್ ಮರವಂತೆ ಮತ್ತು ಸುಖಿ ಸಾಹಿತ್ಯ ಹಾಗೂ ಶಶಿಧರ್ ಸಂಕಲನ ಈ ಚಿತ್ರಕ್ಕಿದೆ. ಶೀಘ್ರದಲ್ಲಿ ಈ ಚಿತ್ರದ ಬಿಡುಗಡೆ ದಿನಾಂಕವನ್ನೂ ಚಿತ್ರತಂಡ ಘೋಷಣೆ ಮಾಡಲಿದೆ.