ನವೆಂಬರ್‌ 22ಕ್ಕೆ ಜೀಬ್ರಾ ಸಿನಿಮಾ ರಿಲೀಸ್; ಮಂತ್ರಾಲಯಕ್ಕೆ ಭೇಟಿ ಕೊಟ್ಟು ರಾಯರ ದರ್ಶನ ಪಡೆದ ಡಾಲಿ ಧನಂಜಯ್
Nov 09, 2024 09:20 AM IST
Share
ಮಂತ್ರಾಲಯಕ್ಕೆ ಭೇಟಿ ನೀಡಿ ರಾಯರ ದರ್ಶನ ಪಡೆದ ಡಾಲಿ ಧನಂಜಯ್
ನವೆಂಬರ್‌ 1 ರಂದು ಮದುವೆ ಅನೌನ್ಸ್‌ ಮಾಡಿದ್ದ ನಟ ಡಾಲಿ ಧನಂಜಯ್ ಇಂದು (ಶನಿವಾರ) ಮಂತ್ರಾಲಯಕ್ಕೆ ಭೇಟಿ ನೀಡಿ ರಾಯರ ದರ್ಶನ ಪಡೆದಿದ್ದಾರೆ. ನವೆಂಬರ್‌ 22 ರಂದು ಧನಂಜಯ್ ಅಭಿನಯದ ಜೀಬ್ರಾ ಸಿನಿಮಾ ಕನ್ನಡ-ತೆಲುಗು ಎರಡೂ ಭಾಷೆಗಳಲ್ಲಿ ರಿಲೀಸ್ ಆಗುತ್ತಿದೆ.
ನವೆಂಬರ್‌ 1 ರಂದು ನಟ ಡಾಲಿ ಧನಂಜಯ್, ತಾವು ಮದುವೆ ಆಗುತ್ತಿರುವುದಾಗಿ ಘೋಷಿಸಿದ್ದರು. ಯಾವುದೇ ಸುಳಿವು ನೀಡದೆ ಮದುವೆ ಸುದ್ದಿ ಕೊಟ್ಟಿದ್ದೂ ಅಲ್ಲದೆ, ತಾವು ಮದುವೆ ಆಗುತ್ತಿರುವ ಹುಡುಗಿಯನ್ನು ಪರಿಚಯಿಸಿದ್ದರು. ಇಂದು ಧನಂಜಯ್ ಮಂತ್ರಾಲಯಕ್ಕೆ ತೆರಳಿ ರಾಯರ ದರ್ಶನ ಪಡೆದಿದ್ದಾರೆ.
ಶನಿವಾರ ಬೆಳಗಿನ ಜಾವ ರಾಯರ ದರ್ಶನ ಪಡೆದ ಡಾಲಿ
ಶುಕ್ರವಾರವೇ ಮಂತ್ರಾಲಯಕ್ಕೆ ತೆರಳಿದ್ದ ಡಾಲಿ ಧನಂಜಯ್ ಶನಿವಾರ ಬೆಳಗಿನ ಜಾವ ರಾಯರ ಮಠಕ್ಕೆ ತೆರಳಿ ಗುರು ರಾಘವೇಂದ್ರರ ದರ್ಶನ ಪಡೆದರು. ಬಿಳಿ ಬಣ್ಣದ ಪಂಚೆ, ಷರ್ಟ್‌, ಶಲ್ಯ ಧರಿಸಿ ಧನಂಜಯ್ ದೇವಸ್ಥಾನಕ್ಕೆ ತೆರಳಿದ್ದರು. ಧನಂಜಯ್ ಅವರನ್ನು ನೋಡಿ ತೆಲುಗು, ಕನ್ನಡ ಅಭಿಮಾನಿಗಳು ಅವರ ಜೊತೆ ಮಾತನಾಡಲು, ಫೋಟೋ ತೆಗೆಸಿಕೊಳ್ಳಲು ಮುಗಿ ಬಿದ್ದರು. ವಿಶೇಷ ಪೂಜೆ ಬಳಿಕ ಧನಂಜಯ್, ತಮ್ಮ ಬಳಿ ಫೋಟೋ ಕೇಳಿದವರಿಗೆ ತಾಳ್ಮೆಯಿಂದಲೇ , ನಗುತ್ತಾ ನಿಂತು ಫೋಟೋಗೆ ಪೋಸ್‌ ಕೊಟ್ಟರು. ಡಾಲಿ ಅವರನ್ನು ಆವರಿಸಿದ್ದ ಜನರನ್ನು ಚದುರಿಸಲು ಪೊಲೀಸರು ಪ್ರಯತ್ನಿಸಿದರು. ನಂತರ ಅವರನ್ನು ಸುರಕ್ಷಿತವಾಗಿ ಅವರ ಕಾರಿನವರೆಗೂ ಬಿಟ್ಟು ಬಂದರು.
ನವೆಂಬರ್‌ 22ಕ್ಕೆ ಜೀಬ್ರಾ ರಿಲೀಸ್
ಮುಂದಿನ ವಾರ ಧನಂಜಯ್ ಅಭಿನಯದ ಜೀಬ್ರಾ ಸಿನಿಮಾ ರಿಲೀಸ್ ಆಗುತ್ತಿದ್ದು ಬಹುಶಃ ಇದೇ ಕಾರಣಕ್ಕೆ ಧನಂಜಯ್ ಮಂತ್ರಾಲಯಕ್ಕೆ ಭೇಟಿ ನೀಡಿದ್ದಾರೆ ಎನ್ನಲಾಗುತ್ತಿದೆ. ಧನಂಜಯ್‌ಗೆ ಆಂಧ್ರ , ತೆಲಂಗಾಣದಲ್ಲಿ ಕೂಡಾ ಹೆಚ್ಚಿನ ಅಭಿಮಾನಿಗಳಿದ್ದಾರೆ. 2018 ರಲ್ಲಿ ತೆಲುಗು-ಕನ್ನಡ ಎರಡೂ ಭಾಷೆಗಳಲ್ಲಿ ಬಿಡುಗಡೆಯಾದ ಭೈರವ ಗೀತಾ ಚಿತ್ರದಲ್ಲಿ ಡಾಲಿ ನಾಯಕನಾಗಿ ನಟಿಸಿದ್ದರು. ಚಿತ್ರಕ್ಕೆ ರಾಮ್‌ ಗೋಪಾಲ್‌ ವರ್ಮಾ ಬಂಡವಾಳ ಹೂಡಿ , ಕಥೆ ಕೂಡಾ ಬರೆದಿದ್ದರು. ಆಗಿನಿಂದ ಧನಂಜಯ್ ತೆಲುಗು ಅಭಿಮಾನಿಗಳಿಗೆ ಪರಿಚಯ, ಇದಾದ ನಂತರ ಅಲ್ಲು ಅರ್ಜುನ್‌ ಅಭಿನಯದ ಪುಷ್ಪ ಚಿತ್ರದಲ್ಲಿ ಧನಂಜಯ್ ಜಾಲಿ ರೆಡ್ಡಿ ಪಾತ್ರದಲ್ಲಿ ನಟಿಸಿದ್ದರು. ಮನು ಚರಿತ್ರ, ಪುಷ್ಪ 2, ಜೀಬ್ರಾ ತೆಲುಗು ಸಿನಿಮಾಗಳ ಮೂಲಕ ಡಾಲಿ ತೆಲುಗು ಜನರಿಗೆ ಬಹಳ ಹತ್ತಿರವಾಗಿದ್ದಾರೆ. ಹೀಗಾಗಿ ಅಲ್ಲೂ ಕೂಡಾ ಡಾಲಿಗೆ ಹೆಚ್ಚಿನ ಅಭಿಮಾನಿಗಳಿದ್ದಾರೆ.
ಕನ್ನಡ-ತೆಲುಗು ಭಾಷೆಗಳಲ್ಲಿ ತಯಾರಾಗುತ್ತಿರುವ ಧನಂಜಯ್ ಅಭಿನಯದ 26ನೇ ಸಿನಿಮಾ
ಜೀಬ್ರಾ ಚಿತ್ರವನ್ನು ಪದ್ಮಜಾ ಫಿಲ್ಮ್ಸ್‌ ಪ್ರೈವೇಟ್ ಲಿಮಿಟೆಡ್ ಮತ್ತು ಓಲ್ಡ್ ಟೌನ್ ಪಿಕ್ಚರ್ಸ್ ಬ್ಯಾನರ್‌ ಅಡಿಯಲ್ಲಿ ಎಸ್‌ಎನ್ ರೆಡ್ಡಿ, ಎಸ್ ಪದ್ಮಜಾ, ಬಾಲ ಸುಂದರಂ ಮತ್ತು ದಿನೇಶ್ ಸುಂದರಂ ನಿರ್ಮಾಣ ಮಾಡಿದ್ದಾರೆ. ಕ್ರೈಂ ಮತ್ತು ಥ್ರಿಲ್ಲರ್ ಕಂಟೆಂಟ್ ಇರುವ ಸಿನಿಮಾ ಇದ್ದಾಗಿದ್ದು ಚಿತ್ರಕ್ಕೆ ಈಶ್ವರ್ ಕಾರ್ತಿಕ್ ಆಕ್ಷನ್‌ ಕಟ್‌ ಹೇಳುತ್ತಿದ್ದಾರೆ. ಜೀಬ್ರಾ, ಡಾಲಿ ಧನಂಜಯ್ ನಟಿಸಲಿರುವ 26ನೇ ಸಿನಿಮಾ. ತೆಲುಗು ನಟ ಸತ್ಯದೇವ್ ಅವರಿಗೂ ಇದು 26ನೇ ಸಿನಿಮಾ ಎಂಬುದು ವಿಶೇಷ. ಈ ಸಿನಿಮಾಗಳ ಜೊತೆಗೆ ಪುಷ್ಪ 2, ಉತ್ತರಕಾಂಡ, ಅಣ್ಣ ಫ್ರಮ್‌ ಮೆಕ್ಸಿಕೋ, ನಾಡಪ್ರಭು ಕೆಂಪೇಗೌಡ ಸಿನಿಮಾದಲ್ಲಿ ಡಾಲಿ ನಟಿಸುತ್ತಿದ್ದಾರೆ. ನವೆಂಬರ್‌ 1, ಕನ್ನಡ ರಾಜ್ಯೋತ್ಸವದಂದು ಧನಂಜಯ್ ಮದುವೆ ಆಗುತ್ತಿರುವ ಸಿಹಿ ಸುದ್ದಿಯನ್ನು ರಾಜ್ಯದ ಜನತೆಯೊಂದಿಗೆ ಹಂಚಿಕೊಂಡಿದ್ದರು. ಮುಂದಿನ ವರ್ಷ ಫೆಬ್ರವರಿಯಲ್ಲಿ ಧನಂಜಯ್ ಡಾಕ್ಟರ್‌ ಧನ್ಯತಾ ಅವರನ್ನು ಕೈ ಹಿಡಿಯಲಿದ್ದಾರೆ.