ನನ್ನವಳ ಪ್ರತಿ ನಗುವ ಸೆರೆ ಹಿಡಿದು; ಭಾವೀ ಪತ್ನಿ ಡಾ ಧನ್ಯತಾ ಬಗ್ಗೆ ಕವಿತೆ ಬರೆದ ಡಾಲಿ ಧನಂಜಯ್‌
ತಾವು ಮದುವೆ ಆಗುತ್ತಿರುವ ಸಿಹಿ ಸುದ್ದಿ ಹಂಚಿಕೊಂಡ ನಂತರ ನಟ ಡಾಲಿ ಧನಂಜಯ್‌ ತಮ್ಮ ಭಾವೀ ಪತ್ನಿ ಡಾ ಧನ್ಯತಾ ಬಗ್ಗೆ ಕವಿತೆ ಕೂಡಾ ಬರೆದಿದ್ದಾರೆ. ಮುಂದಿನ ವರ್ಷ ಫೆಬ್ರವರಿ 16ರಂದು ಮೈಸೂರಿನಲ್ಲಿ ಈ ಜೋಡಿಯ ಮದುವೆ ನಡೆಯಲಿದೆ ಎನ್ನಲಾಗುತ್ತಿದೆ.
ಕನ್ನಡ ರಾಜ್ಯೋತ್ಸವದ ವಿಶೇಷ ದಿನದಂದು ಸ್ಯಾಂಡಲ್ವುಡ್ ನಟ ಧನಂಜಯ್‌, ತಾವು ಮದುವೆ ಆಗುತ್ತಿರುವ ಸಿಹಿ ಸುದ್ದಿಯನ್ನು ಅಭಿಮಾನಿಗಳೊಂದಿಗೆ ಹಂಚಿಕೊಂಡಿದ್ದರು. ಜೊತೆಗೆ ವಿಶೇಷ ಫೋಟೋಶೂಟ್‌ ಮಾಡಿಸಿ ತಾವು ಕೈ ಹಿಡಿಯುತ್ತಿರುವ ಚೆಲುವೆ ಹಾಗೂ ಅವರ ಹೆಸರನ್ನು ಬಹಿರಂಗಪಡಿಸಿದ್ದರು. ಇದಾದ ನಂತರ ಧನಂಜಯ್‌, ತಮ್ಮ ಭಾವಿ ಪತ್ನಿಯ ಮೇಲೆ ಕವಿತೆಯೊಂದನ್ನು ಬರೆದು ಅದನ್ನೂ ತಮ್ಮ ಸೋಷಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ.
ರಾಜ್ಯೋತ್ಸವದ ಪ್ರಯುಕ್ತ ನಂದು ಒಂದು ಕವಿತೆ
ನನ್ನವಳ ಪ್ರತಿ ನಗುವ ಸೆರೆಹಿಡಿದು
ಹೂಮಾಲೆಯಂತೆ ಪೋಣಿಸಿದಾಗ
ಆದವು ನದಿ ಸಾಗರ!
ನನ್ನವಳ ಪ್ರತಿ ನಗುವ ಸೆರೆಹಿಡಿದು
ಆಗಸದ ತುಂಬೆಲ್ಲಾ ತೂರಿದಾಗ
ಆದವು ಚಂದ್ರ ನಕ್ಷತ್ರ!
ನನ್ನವಳ ಪ್ರತಿ ನಗುವ ಸೆರೆಹಿಡಿದು
ಬಣ್ಣದಲದ್ದಿ ಕುಂಚದಿ ಗೀಚಲು
ಆದವು ಬೆಡಗು ಬಿನ್ನಾಣ!
ನನ್ನವಳ ಪ್ರತಿ ನಗುವ ಸೆರೆಹಿಡಿದು
ಎದೆ ಎದೆಯಲಿ ಬಿತ್ತಿ ಬೆಳೆಯಲು
ಆದರು ರತಿ ಮನ್ಮಥರು!
ಡಾಲಿ ಕವಿತೆಯನ್ನು ಅಭಿಮಾನಿಗಳು ಮೆಚ್ಚಿದ್ದಾರೆ. ಮುದ್ದಾದ ಜೋಡಿಗೆ ಒಳ್ಳೆಯದಾಗಲಿ, ಡಾಲಿ ಅಣ್ಣಂಗೆ ಪ್ರೀತಿ ಜ್ವರ ಹಿಡಿಸಿದ ಡಾಕ್ಟರ್, ಇಂಗ್ಲಿಷ್‌ನಲ್ಲಿ ಬಡವ ಕನ್ನಡದಲ್ಲಿ ಶ್ರೀಮಂತ ಧನು ಅಣ್ಣನಿಗೆ ಅಭಿನಂದನೆಗಳು, ಅವಳು ದೀಪಾ ನೀನು ಹಾವಳಿ ಇಬ್ರು ಸೇರಿದ್ರೆ ದೀಪಾವಳಿ ಎಂದೆಲ್ಲಾ ಅಭಿಮಾನಿಗಳು ಕಾಮೆಂಟ್‌ ಮಾಡುತ್ತಿದ್ದಾರೆ.
ಮುಂದಿನ ವರ್ಷ ಫೆಬ್ರವರಿಯಲ್ಲಿ ಮದುವೆ
ಧನಂಜಯ್‌ ಹಾಗೂ ಚಿತ್ರದುರ್ಗದ ಧನ್ಯತಾ ಕೆಲವು ವರ್ಷಗಳಿಂದ ಸ್ನೇಹಿತರಾಗಿದ್ದವರು ಇತ್ತೀಚೆಗೆ ಪ್ರೀತಿಯ ಬಲೆಯಲ್ಲಿ ಬಿದ್ದಿದ್ದಾರೆ. ಮನೆಯವರ ಒಪ್ಪಿಗೆ ಪಡೆದು ಹಿರಿಯರ ಸಮ್ಮುಖದಲ್ಲಿ ಈ ಜೋಡಿ ಹಸೆಮಣೆ ಏರುತ್ತಿದ್ದಾರೆ. ಮುಂದಿನ ವರ್ಷ ಫೆಬ್ರವರಿ 16ರಂದು ಮೈಸೂರಿನಲ್ಲಿ ಈ ಜೋಡಿಯ ಮದುವೆ ನಡೆಯಲಿದೆ. ಈ ಮೂಲಕ ಧನಂಜಯ್‌ ಹಾಗೂ ಅಮೃತಾ ಅಯ್ಯಂಗಾರ್‌ ಬಗ್ಗೆ ಇದ್ದ ಗಾಸಿಪ್‌ಗೆ ತೆರೆ ಬಿದ್ದಿದೆ. ಈ ಜೋಡಿ 2-3 ಸಿನಿಮಾಗಳಲ್ಲಿ ಜೊತೆಯಾಗಿ ನಟಿಸಿದ್ದರು. ಇದೇ ಕಾರಣಕ್ಕೆ ಇವರಿಬ್ಬರೂ ಲವ್‌ನಲ್ಲಿದ್ದಾರೆ, ಶೀಘ್ರದಲ್ಲೇ ಮದುವೆ ಆಗುತ್ತಿದ್ದಾರೆ ಎಂದೇ ಎಲ್ಲರೂ ತಿಳಿದಿದ್ದರು.
ಅಷ್ಟೇ ಅಲ್ಲದೆ ಗೋಲ್ಡನ್‌ ಸ್ಟಾರ್‌ ಗಣೇಶ್‌ ನಡೆಸಿಕೊಡುತ್ತಿದ್ದ ರಿಯಾಲಿಟಿ ಶೋನಲ್ಲಿ ಒಬ್ಬರಿಗೊಬ್ಬರು ಪ್ರಪೋಸ್‌ ಮಾಡುವಂತೆ ದೃಶ್ಯ ಚಿತ್ರೀಕರೀಸಲಾಗಿತ್ತು. ರೋಸ್‌ ಹಿಡಿದಿದ್ದ ಧನಂಜಯ್‌ ‘‘ಮಂಡಿಯೂರಿ ಬೇಡುವೆನು, ಹೃದಯ ಕಾಲಡಿ ಇಡುವೆನು, ತೆಗೆದು ಬಚ್ಚಿಟ್ಕೋ ಕೋ, ಇಲ್ಲ ತುಳಿದು ಕಾಲು ತೊಳೆದುಕೋ, ಬೇಡ ಈ ಮೌನ, ಮಾಡು ತೀರ್ಮಾನ’’ ಎಂದು ಅಮೃತಾ ಅಯ್ಯಂಗಾರ್‌ ಮುಂದೆ ಮಂಡಿ ಊರಿ ಪ್ರಪೋಸ್‌ ಮಾಡಿದ್ದರು. ಅಮೃತಾ ಡಾಲಿ ಕೊಟ್ಟ ಹೂವನ್ನು ಪಡೆದು ಒಂದು ಹಾಡು ಹೇಳಿದ್ದರು. ಈ ಎಪಿಸೋಡ್‌ ಪ್ರಸಾರವಾಗುತ್ತಿದ್ದಂತೆ ಖಂಡಿತ ಇವರ ಮದುವೆ ಫಿಕ್ಸ್‌ ಎಂದು ಎಲ್ಲರೂ ತಿಳಿದಿದ್ದರು. ಆದರೆ ಈಗ ಅದು ಸುಳ್ಳಾಗಿದೆ.
ಧನಂಜಯ್‌ ಸಿನಿಮಾಗಳ ವಿಚಾರಕ್ಕೆ ಬರುವುದಾದರೆ, ಜೀಬ್ರಾ, ಪುಷ್ಪ 2, ಉತ್ತರಾಕಾಂಡ, ಅಣ್ಣ ಫ್ರಮ್‌ ಮೆಕ್ಸಿಕೋ, ನಾಡಪ್ರಭು ಕೆಂಪೇಗೌಡ ಸಿನಿಮಾಗಳಲ್ಲಿ ಧನಂಜಯ್‌ ಬ್ಯುಸಿ ಇದ್ದಾರೆ.
