ಮಹಾನಟಿ ರಿಯಾಲಿಟಿ ಶೋನಲ್ಲಿ ಗೆದ್ದವರು ಪಡೆದ ಬಹುಮಾನದ ಮೊತ್ತ ಎಷ್ಟು? ಲಕ್ಷಾಧಿಪತಿಗಳಾದ ಪ್ರಿಯಾಂಕ, ಧನ್ಯಶ್ರೀ, ಆರಾಧನಾ, ಶ್ವೇತಾ ಭಟ್‌

ಬೆಂಗಳೂರು: ಝೀ ಕನ್ನಡ ವಾಹಿನಿ ಈ ವರ್ಷ ಮಹಾನಟಿ ಎಂಬ ಹೊಸತನದ ರಿಯಾಲಿಟಿ ಶೋವನ್ನು ಕನ್ನಡ ಕಿರುತೆರೆಗೆ ಪರಿಚಯಿಸಿತ್ತು. ಕಳೆದ ಮೂರುವರೆ ತಿಂಗಳಿನಿಂದ ಪ್ರಸಾರವಾಗುತ್ತಿದ್ದ ಈ ಶೋ ಗ್ರ್ಯಾಂಡ್‌ ಫಿನಾಲೆಯನ್ನೂ ಮುಗಿಸಿ ತನ್ನ ಆಟವನ್ನು ಮುಗಿಸಿದೆ. ಗೆದ್ದವರು ಪ್ರಶಸ್ತಿ ಕಿರೀಟ, ನಗದು ಬಹುಮಾನವನ್ನು ಪಡೆದು ಸಂಭ್ರಮದಿಂದ ಮನೆಗೆ ಹಿಂತುರುಗಿದ್ದಾರೆ. ಇದೇ ಸಮಯದಲ್ಲಿ ಗೆಲುವು ಪಡೆಯಲಾಗದೆ ಇದ್ದರೂ ಪ್ರೇಕ್ಷಕರ ಮನವನ್ನು ಗೆದ್ದ ಹಲವು ಮಹಾನಟಿಯರು ಮುಂದಿನ ದಿನಗಳಲ್ಲಿ ತಮಗೆ ನಟನಾ ಅವಕಾಶ ದೊರಕುವ ನಿರೀಕ್ಷೆಯಲ್ಲಿದ್ದಾರೆ.

ಗೆಲುವಿನ ಕಿರೀಟ ಯಾರಿಗೆ?: ಈಗಾಗಲೇ ಹಿಂದೂಸ್ತಾನ್‌ ಟೈಮ್ಸ್‌ ಕನ್ನಡ ವರದಿ ಮಾಡಿರುವಂತೆ ಮೈಸೂರಿನ ಪ್ರಿಯಾಂಕ ಮಹಾನಟಿ ಸೀಸನ್‌ 1ರ ವಿಜೇತೆಯಾಗಿ ಹೊರಹೊಮ್ಮಿದ್ದಾರೆ. ತರೀಕೆರೆಯ ಧನ್ಯಶ್ರೀ ರನ್ನರ್‌ ಅಪ್‌ ಆಗಿದ್ದಾರೆ. ಮೂರನೇ ಸ್ಥಾನವನ್ನು ಚಿತ್ರದುರ್ಗದ ಗಗನ ಪಡೆದಿದ್ದಾರೆ. ನಾಲ್ಕು ಮತ್ತು ಐದನೇ ಸ್ಥಾನವನ್ನು ಕ್ರಮವಾಗಿ ಆರಾಧನಾ ಭಟ್‌ ಮತ್ತು ಶ್ವೇತಾ ಭಟ್‌ ಪಡೆದಿದ್ದಾರೆ.

ಈ ಮಹಾನಟಿಯರು ಕಿರುಚಿತ್ರಗಳಲ್ಲಿ ನಟಿಸಿ ಎಲ್ಲರ ಗಮನ ಸೆಳೆದಿದ್ದಾರೆ. ಜಯತೀರ್ಥ ನಿರ್ದೇಶನದ ಅನುರಾಗ ಕಿರುಚಿತ್ರದಲ್ಲಿ ಪ್ರಿಯಾಂಕ ಅಭಿನಯಿಸಿದ್ದರು. ಮಂಸೋರೆ ನಿರ್ದೇಶನದ ಸ್ತ್ರೀ ಕಿರುಚಿತ್ರದಲ್ಲಿ ಕಾರವಾರದ ಶ್ವೇತಾ ಭಟ್‌ ನಟಿಸಿದ್ದಾರೆ. ಹರಿ ಸಂತೊಷ್‌ ನಿರ್ದೇಶನದ ಪಂಚಮಿ ಶಾರ್ಟ್‌ ಮೂವಿಯಲ್ಲಿ ಧನ್ಯಶ್ರೀ ಅಭಿನಯಿಸಿದ್ದಾರೆ. ಶಶಾಂಕ್‌ ನಿರ್ದೇಶನದ ಮಾಯದ ಮಳೆಯಲ್ಲಿ ಆರಾಧನಾ ಭಟ್‌ ನಟಿಸಿದ್ದಾರೆ ಪನ್ನಗಾಭರಣ ನಿರ್ದೇಶನದ ಕಿರುಚಿತ್ರದಲ್ಲಿ ಗಗನ ನಟಿಸಿದ್ದಾರೆ.

ಗೆದ್ದವರು ಪಡೆದ ಬಹುಮಾನದ ಮೊತ್ತ ಎಷ್ಟು?

ಮಹಾನಟಿ ಪ್ರಿಯಾಂಕ ಅವರಿಗೆ 15 ಲಕ್ಷ ಮೌಲ್ಯದ ಚಿನ್ನದ ಕಿರೀಟ ದೊರಕಿದೆ. ಈ ಮೂಲಕ ಇವರು 15 ಲಕ್ಷ ರೂಪಾಯಿಯ ಚಿನ್ನದ ಕಿರೀಟದ ಒಡತಿಯಾಗಿದ್ದಾರೆ. ಎರಡನೇ ಸ್ಥಾನ ಪಡೆದ ಧನ್ಯಶ್ರೀಗೆ 10 ಲಕ್ಷ ರೂಪಾಯಿ ಬಹುಮಾನ ದೊರಕಿದೆ. ಈ ಮೂಲಕ ಇವರಿಬ್ಬರು ಮಿಲಿಯನೇರ್‌ಗಳಾಗಿದ್ದಾರೆ. ಇದೇ ರೀತಿ ಮೂರನೇ ಸ್ಥಾನ ಪಡೆದ ಗಗನ, ನಾಲ್ಕನೇ ಸ್ಥಾನಪಡೆದ ಆರಾಧನಾ ಭಟ್‌ ಮತ್ತು ಐದನೇ ಸ್ಥಾನ ಪಡೆದ ಶ್ವೇತಾ ಭಟ್‌ಗೆ ತಲಾ 1 ಲಕ್ಷ ರೂಪಾಯಿಯ ನಗದು ಬಹುಮಾನ ದೊರಕಿದೆ. ಈ ಮೂಲಕ ಇವರು ಲಕ್ಷಾಧಿಪತಿಗಳಾಗಿದ್ದಾರೆ.

ಚಂದನವನಕ್ಕೆ ಹೊಸ ನಟಿಯರನ್ನು ಪರಿಚಯಿಸುವ ಪ್ರಯತ್ನವಾಗಿ ಝಿಕನ್ನಡವು ಮಹಾನಟಿ ಎಂಬ ಹೊಸ ರಿಯಾಲಿಟಿ ಶೋ ಆರಂಭಿಸಿತ್ತು. ಕಾಟೇರ ನಿರ್ದೇಶಕ ತರುಣ್‌ ಸುಧೀರ್‌, ರಮೇಶ್‌ ಅರವಿಂದ್‌, ನಿಶ್ವಿಕಾ ನಾಯ್ಡು, ಪ್ರೇಮಾ ಜಡ್ಜ್‌ಗಳಾಗಿ ಹೊಸ ನಟಿಯರ ನಟನಾ ಪ್ರತಿಭೆಗೆ ಪ್ರೋತ್ಸಾಹ ನೀಡಿದ್ದರು.