Salaar day 6 Collection: ಸಲಾರ್‌ ಗಳಿಕೆ ಇಳಿಮುಖ, ಆರು ದಿನದಲ್ಲಿ 290 ಕೋಟಿ ಕಲೆಕ್ಷನ್‌, ಪ್ರಭಾಸ್‌ ಸಿನಿಮಾದ ಬಾಕ್ಸ್‌ ಆಫೀಸ್‌ ವರದಿ
Dec 28, 2023 07:20 AM IST
Share
ಪ್ರಭಾಸ್‌ ನಟನೆಯ ಸಲಾರ್‌ ಸಿನಿಮಾದ ಬಾಕ್ಸ್‌ ಆಫೀಸ್‌ ವರದಿ
- Salaar box office collection day 6: ಪ್ರಭಾಸ್‌, ಪೃಥ್ವಿರಾಜ್‌ ಸುಕುಮಾರನ್‌, ಶೃತಿ ಹಾಸನ್‌ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ಸಲಾರ್‌ ಸಿನಿಮಾವು ಬಿಡುಗಡೆಯಾದ ಬಳಿಕ ಆರನೇ ದಿನವೂ ಹಲವು ಕೋಟಿ ಗಳಿಕೆ ಮಾಡಿದೆ. ಕಳೆದ ಆರು ದಿನಗಳಲ್ಲಿ ಭಾರತದಲ್ಲಿ 290.16 ಕೋಟಿ ರೂಪಾಯಿ ಆದಾಯ ಗಳಿಸಿದೆ.
ಬೆಂಗಳೂರು: ಪ್ರಶಾಂತ್‌ ನೀಲ್‌ ನಿರ್ದೇಶನದ, ಪ್ರಭಾಸ್‌ ನಟನೆಯ ಸಲಾರ್‌ ಪಾರ್ಟ್‌ 1: ಕೇಸ್‌ಫೈರ್‌ ಸಿನಿಮಾವು ಕಳೆದ ಶುಕ್ರವಾರ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿದ್ದು, ಬಾಕ್ಸ್‌ ಆಫೀಸ್‌ನಲ್ಲಿ ಉತ್ತಮ ಗಳಿಕೆ ಮಾಡುತ್ತಿದೆ. ಪ್ರಭಾಸ್‌ ಜತೆ ಪ್ರಮುಖ ಪಾತ್ರದಲ್ಲಿ ಪೃಥ್ವಿರಾಜ್‌ ಸುಕುಮಾರನ್‌ ಮತ್ತು ಶೃತಿ ಹಾಸನ್‌ ನಟಿಸಿದ್ದು, ಮೊದಲ ವೀಕೆಂಡ್‌ನಲ್ಲಿ ಉತ್ತಮ ಆದಾಯ ಗಳಿಸಿತ್ತು. ಇದೀಗ ವಾರದ ನಡುವಿನ ದಿನಗಳಲ್ಲಿಯೂ ಉತ್ತಮ ಗಳಿಕೆ ಮಾಡುತ್ತಿದೆ. ಈ ವಾರಾಂತ್ಯದಲ್ಲೂ ಸಾಕಷ್ಟು ಆದಾಯ ತನ್ನದಾಗಿಸಿಕೊಳ್ಳುವ ಸೂಚನೆಯಿದೆ. ಸಚ್‌ನಿಲ್ಕ್‌.ಕಾಂ ಬಾಕ್ಸ್‌ ಆಫೀಸ್‌ ವರದಿ ಪ್ರಕಾರ ಕಳೆದ ಆರು ದಿನಗಳಲ್ಲಿ ಸಲಾರ್‌ ಸಿನಿಮಾವು 290.16 ಕೋಟಿ ರೂಪಾಯಿ ಗಳಿಕೆ ಮಾಡಿದೆ. ಮುಂದಿನ ದಿನಗಳಲ್ಲಿ ಇನ್ನೂ ನೂರಾರು ಕೋಟಿ ಗಳಿಸುವ ನಿರೀಕ್ಷೆಯಲ್ಲಿ ಚಿತ್ರತಂಡವಿದೆ.
ಸಲಾರ್‌ ಬಾಕ್ಸ್‌ ಆಫೀಸ್‌ ಕಲೆಕ್ಷನ್‌
ಕಳೆದ ಆರು ದಿನಗಳಲ್ಲಿ ಬಾಕ್ಸ್‌ ಆಫೀಸ್‌ನಲ್ಲಿ ಸುಮಾರು 290.16 ಕೋಟಿ ರೂಪಾಯಿ ಆದಾಯ ಗಳಿಸಿರುವ ಸಲಾರ್‌ನ ನಿನ್ನೆಯ ( 6ನೇ ದಿನದ) ಆದಾಯ ತುಸು ಕಡಿಮೆ ಎಂದೇ ಹೇಳಬೇಕು. ವಾರದ ನಡುವಿನ ದಿನವಾಗಿರುವುದರಿಂದ ಮತ್ತು ಸಾಕಷ್ಟು ಜನರು ಟೂರ್‌, ಟ್ರಿಪ್‌ ಎಂದೆಲ್ಲ ಬ್ಯುಸಿಯಾಗಿರುವುದು ಗಳಿಕೆ ಕಡಿಮೆಯಾಗಲು ಕಾರಣ ಎನ್ನಲಾಗಿದೆ. ಆರಂಭಿಕ ಅಂದಾಜಿನ ಪ್ರಕಾರ ನಿನ್ನೆ ಭಾರತದಲ್ಲಿ ಸಲಾರ್‌ ಸಿನಿಮಾವು 9.86 ಕೋಟಿ ಆದಾಯ ಗಳಿಸಿದೆ ಎಂದು ಸಚ್‌ನಿಲ್ಕ್‌.ಕಾಂನ ಬಾಕ್ಸ್‌ ಆಫೀಸ್‌ ವರದಿ ತಿಳಿಸಿದೆ. ಇದು ಮುಂಗಡ ಟಿಕೆಟ್‌ ಬುಕ್ಕಿಂಗ್‌ ಆಧಾರದಲ್ಲಿ ಲೆಕ್ಕ ಹಾಕಲಾದ ಮೊತ್ತವಾಗಿದೆ.
ಟಿಕೆಟ್‌ ದರ ಇಳಿಕೆ
ಆರಂಭಿಕ ದಿನಗಳಿಗೆ ಹೋಲಿಸಿದರೆ ಇದೀಗ ಹೊಂಬಾಳೆ ಫಿಲ್ಮ್ಸ್‌ ಸಲಾರ್‌ ಸಿನಿಮಾದ ಟಿಕೆಟ್‌ ದರ ತಗ್ಗಿಸಿದೆ. ಅಂದರೆ, ಪ್ರಮುಖ ಮಲ್ಟಿಫ್ಲೆಕ್ಸ್‌ ಸರಣಿಗಳಲ್ಲಿ ಟಿಕೆಟ್‌ ದರ ಕಡಿಮೆಯಾಗಿದೆ. ಇದರಿಂದ ಸಿನಿಮಾ ವೀಕ್ಷಕರ ಸಂಖ್ಯೆ ಹೆಚ್ಚಿದ್ದರೂ ಆದಾಯ ಮೊದಲಿನಂತೆ ಇರದು. ಸಿನಿಮಾ ಮಂದಿರಕ್ಕೆ ಹೆಚ್ಚಿನ ಸಂಖ್ಯೆಯಲ್ಲಿ ಪ್ರೇಕ್ಷಕರನ್ನು ಕರೆತರುವ ಉದ್ದೇಶದಿಂದ ಟಿಕೆಟ್‌ ದರ ತಗ್ಗಿಸಲಾಗಿದೆ.
ಜಾಗತಿಕವಾಗಿ ಸಲಾರ್‌ ಗಳಿಕೆ
ಭಾರತ ಸೇರಿದಂತೆ ಜಾಗತಿಕವಾಗಿ ಸಲಾರ್‌ ಗಳಿಕೆ 428.9 ಕೋಟಿಗೆ ತಲುಪಿದೆ. ಶಾರೂಖ್‌ ಖಾನ್‌ ನಟನೆಯ ಡಂಕಿ ಚಿತ್ರದ ಜತೆಗೆ ಸಲಾರ್‌ ಸಿನಿಮಾವನ್ನು ಬಿಡುಗಡೆ ಮಾಡಲಾಗಿದೆ. ಡಂಕಿಗೆ ಹೋಲಿಸಿದರೆ ಸಲಾರ್‌ ಗಳಿಕೆ ಉತ್ತಮವಾಗಿಯೇ ಇದೆ. ಸದ್ಯ ಸಲಾರ್‌ ಸಿನಿಮಾವು ರಜನಿಕಾಂತ್‌ ನಟನೆಯ ಜೈಲರ್‌ ಸಿನಿಮಾದ ಗಳಿಕೆಯನ್ನು ಹಿಂದಿಕ್ಕಲು ಪ್ರಯತ್ನಿಸುತ್ತಿದೆ. ಜೈಲರ್‌ ಸಿನಿಮಾವು ವಿಶ್ವಾದ್ಯಾಂತ 600 ಕೋಟಿ ರೂಪಾಯಿ ಗಳಿಕೆ ಮಾಡಿದೆ.
ಸಲಾರ್‌ ಪಾರ್ಟ್‌ 1 ಕೇಸ್‌ಫೈರ್‌ ಸಿನಿಮಾವು ಕಳೆದ ಶುಕ್ರವಾರ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿತ್ತು. ತೆಲುಗು ನಟ ಪ್ರಭಾಸ್‌ ಮತ್ತು ಮಲಯಾಳಂ ನಟ ಪೃಥ್ವಿರಾಜ್‌ ಸುಕುಮಾರನ್‌ ಈ ಸಿನಿಮಾದ ಪ್ರಮುಖ ಪಾತ್ರಗಳಲ್ಲಿ ನಟಿಸಿಸದ್ದಾರೆ. ಶೃತಿ ಹಾಸನ್‌, ಜಗಪತಿ ಬಾಬು, ಈಶ್ವರಿ ರಾವ್‌ ಮತ್ತು ಶ್ರೀಯಾ ರೆಡ್ಡಿ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಈ ಸಿನಿಮಾ ಕನ್ನಡ, ತೆಲುಗು, ತಮಿಳು ಸೇರಿದಂತೆ ಬಹುಭಾಷೆಗಳಲ್ಲಿ ಬಿಡುಗಡೆಯಾಗಿದೆ. ಕೆಜಿಎಫ್‌ ಮೂಲಕ ಜನಪ್ರಿಯತೆ ಪಡೆದಿರುವ ಕರ್ನಾಟಕದ ಪ್ರಶಾಂತ್‌ ನೀಲ್‌ ಈ ಸಿನಿಮಾ ನಿರ್ದೇಶನ ಮಾಡಿದ್ದಾರೆ. ಈ ಸಿನಿಮಾ ಖಾನ್ಸರ್‌ ಎಂಬ ಕಾಲ್ಪನಿಕ ಊರಿನಲ್ಲಿ ಅಧಿಕಾರಕ್ಕೆ ನಡೆಯುವ ಹೋರಾಟ, ಇಬ್ಬರು ಆತ್ಮೀಯ ಸ್ನೇಹಿತರ ಒಡನಾಟದ ಕಥೆ ಹೇಳುತ್ತದೆ.