ಅಲ್ಲು ಅರ್ಜುನ್‌ ಪುಷ್ಪ 2 ಚಿತ್ರದ ಸ್ಪೆಷಲ್‌ ಹಾಡಿನಲ್ಲಿ ಶ್ರೀಲೀಲಾ; ಸಮಂತಾ ರೀತಿ ಮ್ಯಾಜಿಕ್‌ ಮಾಡ್ತಾರಾ ಕಿಸ್‌ ಬ್ಯೂಟಿ?
Nov 02, 2024 03:19 PM IST
Share
ಅಲ್ಲು ಅರ್ಜುನ್‌ ಪುಷ್ಪ 2 ಚಿತ್ರದ ಸ್ಪೆಷಲ್‌ ಹಾಡಿನಲ್ಲಿ ಶ್ರೀಲೀಲಾ ಡ್ಯಾನ್ಸ್‌ ಮಾಡಲಿದ್ದಾರೆ ಎಂಬ ಹೊಸ ಅಪ್‌ಡೇಟ್‌ ಸೋಷಿಯಲ್‌ ಮೀಡಿಯಾದಲ್ಲಿ ಚರ್ಚೆಯಾಗುತ್ತಿದೆ.
ಸುಕುಮಾರ್‌ ನಿರ್ದೇಶನದಲ್ಲಿ ಅಲ್ಲುಅರ್ಜುನ್‌ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ಪುಷ್ಪ 2 ಚಿತ್ರದಿಂದ ಹೊಸ ಅಪ್‌ಡೇಟ್‌ ಹೊರ ಬಿದ್ದಿದೆ. ಚಿತ್ರದಲ್ಲಿ ಸ್ಟೈಲಿಷ್‌ ಸ್ಟಾರ್‌ ಜೊತೆ ಕಿಸ್‌ ಬ್ಯೂಟಿ ಶ್ರೀಲೀಲಾ ಸ್ಪೆಷಲ್‌ ಹಾಡಿನಲ್ಲಿ ಇರಲಿದ್ದಾರಂತೆ. ಹಾಗಾದ್ರೆ ಸಮಂತಾ ರೀತಿ ಶ್ರೀಲೀಲಾ ಮ್ಯಾಜಿಕ್‌ ಮಾಡ್ತಾರಾ ಎಂಬ ಕುತೂಹಲ ಸಿನಿಪ್ರಿಯರಿಗೆ ಕಾಡುತ್ತಿದೆ.
ಅಲ್ಲು ಅರ್ಜುನ್‌ ಪುಷ್ಪ 2 ಸಿನಿಮಾ ರಿಲೀಸ್‌ಗೆ ಅಭಿಮಾನಿಗಳು ಎದುರು ನೋಡುತ್ತಿದ್ದಾರೆ. ಡಿಸೆಂಬರ್‌ನಲ್ಲಿ ಸಿನಿಮಾ ರಿಲೀಸ್‌ ಆಗಲಿದ್ದು ಚಿತ್ರತಂಡ ಕೆಲವೇ ದಿನಗಳಲ್ಲಿ ಪ್ರಮೋಷನ್‌ ಕೆಲಸಗಳನ್ನು ಅರಂಭಿಸಲಿದೆ. ಚಿತ್ರದಲ್ಲಿ ಭಾಗ 1ರಲ್ಲಿ ಇದ್ದ ಕಲಾವಿದರು ಮುಂದುವರೆದಿದ್ದು ಹೊಸ ನಟ/ನಟಿಯರು ಕೂಡಾ ಸೇರ್ಪಡೆಗೊಂಡಿದ್ದಾರೆ. ಈಗಾಗಲೇ ಚಿತ್ರದ ಪೋಸ್ಟರ್‌ಗಳು, ಹಾಡುಗಳು ವೈರಲ್‌ ಆಗಿವೆ.
ಅಲ್ಲು ಅರ್ಜುನ್‌ ಜೊತೆಗೆ ಶ್ರೀಲೀಲಾ ಸ್ಟೆಪ್ಸ್‌
ಪುಷ್ಪ ಚಿತ್ರದಲ್ಲಿ ಸಮಂತಾ ಹೆಜ್ಜೆ ಹಾಕಿದ್ದ ಊ ಅಂಟಾವ, ಮಾವ ಊಹು ಅಂಟಾವ ಮಾವ ಸಖತ್‌ ಹಿಟ್‌ ಆಗಿತ್ತು. ಜನರು ಈ ಹಾಡಿಗೆ ಎದ್ದೂ ಬಿದ್ದು ರೀಲ್ಸ್‌ ಮಾಡಿದ್ದರು. ಇದೇ ರೀತಿ ಭಾಗ 2 ರಲ್ಲೂ ಹಾಡು ಇರಲಿದೆಯಾ? ಒಂದು ವೇಳೆ ಇದ್ದರೆ ಆ ಹಾಡಿಗೆ ಯಾವ ಹಿರೋಯಿನ್‌ ಸೊಂಟ ಬಳುಕಿಸಬಹುದು ಎಂಬ ಪ್ರಶ್ನೆ, ಚರ್ಚೆಯಾಗುತ್ತಿತ್ತು. ಇದೀಗ ಈ ಕುತೂಹಲಕ್ಕೆ ಫುಲ್‌ ಸ್ಟಾಪ್‌ ಬಿದ್ದಿದೆ. ಕಿಸ್‌ ಹುಡುಗಿ ಶ್ರೀಲೀಲಾ ಪುಷ್ಪ 2 ರಲ್ಲಿ ಅಲ್ಲು ಅರ್ಜುನ್‌ ಜೊತೆ ವಿಶೇಷ ಹಾಡೊಂದಕ್ಕೆ ಡ್ಯಾನ್ಸ್‌ ಮಾಡಲಿದ್ದಾರೆ ಎಂಬ ಹೊಸ ಅಪ್‌ಡೇಟ್‌ ದೊರೆತಿದೆ. ಸದ್ಯಕ್ಕೆ ವಿಚಾರ ಸಿನಿಮಾ ಇಂಡಸ್ಟ್ರಿಯಲ್ಲಿ ಹಾಟ್‌ ಟಾಪಿಕ್‌ ಆಗಿ ಬದಲಾಗಿದೆ.
ಸಮಂತಾ ರೀತಿ ಮ್ಯಾಜಿಕ್‌ ಮಾಡ್ತಾರಾ ಶ್ರೀಲೀಲಾ?
ಶ್ರೀಲೀಲಾ ಈಗಾಗಲೇ ತೆಲುಗಿನಲ್ಲಿ ಒಳ್ಳೆ ಹೆಸರು ಸಂಪಾದಿಸಿದ್ದಾರೆ. ದೊಡ್ಡ ಸ್ಟಾರ್‌ ನಟರೊಂದಿಗೆ ನಟಿಸಿದ್ದಾರೆ. ಅವರ ಕ್ಯೂಟ್‌ನೆಸ್‌, ಡ್ಯಾನ್ಸ್‌ ಎಲ್ಲವೂ ತೆಲುಗು ಪ್ರೇಕ್ಷಕರಿಗೆ ಬಹಳ ಇಷ್ಟವಾಗಿದೆ. ಈಗ ಪುಷ್ಪ 2 ಚಿತ್ರದಲ್ಲಿ ಶ್ರೀಲೀಲಾ ಡ್ಯಾನ್ಸ್‌ ಮಾಡಿದ್ದಾರೆ ಎಂಬ ಸುದ್ದಿ ಹೈಪ್‌ ಕ್ರಿಯೇಟ್‌ ಮಾಡಿದೆ. ಹಾಗಾದರೆ ಮೊದಲ ಭಾಗದಲ್ಲಿ ಸಮಂತಾ ಮಾಡಿದ್ದ ಮಾಜಿಕನ್ನು ಶ್ರೀಲೀಲಾ ಮಾಡ್ತಾರಾ ಅನ್ನೋ ಹೊಸ ಚರ್ಚೆ ಶುರುವಾಗಿದೆ. ಚಿತ್ರವನ್ನು ಸುಕುಮಾರ್‌ ನಿರ್ದೇಶನ ಮಾಡುತ್ತಿದ್ದು ಅವರ ಸಿನಿಮಾಗಳಲ್ಲಿ ಐಟಮ್‌ ಸಾಂಗ್‌ಗಳು ಬಹಳ ವಿಭಿನ್ನವಾಗಿರುತ್ತದೆ. ಆರ್ಯ ಸಿನಿಮಾದಲ್ಲಿ ಆ ಅಂಟೆ ಅಮಲಾಪುರಂ, ರಿಂಗಾ ರಿಂಗಾ, ಜಿಗಲ್‌ ರಾಣಿ, ಡಿಯಾಲೋ ಡಿಯೋಲೋನಂಥ ಹಾಡುಗಳು ಹಿಟ್‌ ಆಗಿದ್ದು ಈಗ ಪುಷ್ಪ 2ರಲ್ಲಿ ಹೊಸ ಹಾಡು ಹೇಗಿರಲಿದೆ ಎಂದು ನೋಡಲು ಅಲ್ಲು ಅರ್ಜುನ್‌ ಅಭಿಮಾನಿಗಳು ಕಾಯುತ್ತಿದ್ದಾರೆ.
ಡಿಸೆಂಬರ್‌ 5 ರಂದು ರಿಲೀಸ್‌ ಆಗಲಿರುವ ಪುಷ್ಪ 2
ಪುಷ್ಪ 2 ಸಿನಿಮಾ ಇದೇ ಡಿಸೆಂಬರ್‌ 5ರಂದು ಆರು ಭಾಷೆಗಳಲ್ಲಿ ರಿಲೀಸ್‌ ಆಗುತ್ತಿದೆ. ಭಾರತದಲ್ಲಿ6500 ಸ್ಕ್ರೀನ್‌, ವಿದೇಶಗಳಲ್ಲಿ 5000 ಸ್ಕ್ರೀನ್‌ ಸೇರಿ ವಿಶ್ವಾದ್ಯಂತ ಒಟ್ಟು 11,500 ಸ್ಕ್ರೀನ್‌ಗಳಲ್ಲಿ ನೋಡಲು ವ್ಯವಸ್ಥೆ ಆಗಿದೆ. ಈ ಮೂಲಕ ಭಾರತೀಯ ಸಿನಿಮಾಗಳಲ್ಲಿ ಪುಷ್ಪ 2 ದೊಡ್ಡ ರಿಲೀಸ್‌ ರೆಕಾರ್ಡ್‌ ಸೃಷ್ಟಿ ಮಾಡಲು ಸಜ್ಜಾಗಿದೆ.
ಪುಷ್ಪ 2 ಚಿತ್ರವನ್ನು ಮೈತ್ರಿ ಮೂವಿ ಮೇಕರ್ಸ್‌ ಹಾಗೂ ಸುಕುಮಾರ್‌ ರೈಟಿಂಗ್ಸ್‌ ಬ್ಯಾನರ್‌ ಅಡಿ ಸುಕುಮಾರ್‌ ಕಥೆ ಬರೆದು ನಿರ್ದೇಶನ ಮಾಡಿದ್ದಾರೆ. ಚಿತ್ರದ ಹಾಡುಗಳಿಗೆ ದೇವಿ ಶ್ರೀ ಪ್ರಸಾದ್‌ ಸಂಗೀತ ನೀಡಿದ್ದಾರೆ. ಚಿತ್ರದಲ್ಲಿ ಅಲ್ಲು ಅರ್ಜುನ್‌, ರಶ್ಮಿಕಾ ಮಂದಣ್ಣ, ಫಹಾದ್‌ ಫಾಸಿಲ್‌, ಡಾಲಿ ಧನಂಜಯ್‌, ಪ್ರಕಾಶ್‌ ರಾಜ್‌, ಸುನಿಲ್‌, ಅನಸೂಯ ಹಾಗೂ ಇನ್ನಿತರರು ನಟಿಸಿದ್ದಾರೆ.