ವೀಕ್ಷಕರ ಆಸೆಗೆ ತಣ್ಣಿರೆರಚಿದ ಕೃಷ್ಣಂ ಪ್ರಣಯ ಸಖಿ; ಒಟಿಟಿಯಿಂದ ಗಣೇಶ್‌ ಸಿನಿಮಾ ದೂರ ದೂರ! ಹೀಗಿದೆ ಕಾರಣ

Krishnam Pranaya sakhi OTT: ಕೃಷ್ಣಂ ಪ್ರಣಯ ಸಖಿ ಸಿನಿಮಾ ಬಿಡುಗಡೆ ಆಗಿ ಇನ್ನೇನು ನೂರು ದಿನಗಳು ಕಳೆಯಲಿದೆ. ಈ ನಡುವೆ ಇದೇ ಸಿನಿಮಾ, ಇನ್ನೇನು ಒಟಿಟಿಗೆ ಆಗಮಿಸಲಿದೆ ಎಂದು ಕಾದಿದ್ದೇ ಬಂತೇ ವಿನಃ, ಈ ವರೆಗೂ ಯಾವುದೇ ಅಪ್‌ಡೇಟ್‌ ಸಿಕ್ಕಿಲ್ಲ. ಇತ್ತ ಚಿತ್ರಮಂದಿರದಲ್ಲಿ ಈ ಸಿನಿಮಾ ಇಂದಿಗೂ ಓಟ ಆರಂಭಿಸಿದೆ. ರಾಜ್ಯದ ಒಂದಷ್ಟು ಕಡೆಗಳಲ್ಲಿ ಪ್ರದರ್ಶನ ಕಾಣುತ್ತಿದೆ ಈ ಸಿನಿಮಾ. ಅರ್ಜುನ್‌ ಜನ್ಯ ಸಂಗೀತದ ಮೋಡಿ ಮತ್ತು ಫ್ಯಾಮಿಲಿ ಕಥೆ ನೋಡುಗರಿಗೆ ಇಷ್ಟವಾಗಿತ್ತು. ಈ ನಡುವೆ ಚಿತ್ರಮಂದಿರದ ಬಳಿಕ ಒಟಿಟಿಯಲ್ಲಿ ಸಿನಿಮಾ ನೋಡಬೇಕೆಂದು ಕಾದು ಕುಳಿತವರಿಗೇನು ಕಮ್ಮಿಯಿಲ್ಲ. ಈಗ ಅವರೆಲ್ಲರಿಗೂ ನಿರಾಸೆಯ ಸುದ್ದಿಯೊಂದು ಕೇಳಿಬಂದಿದೆ.

ಆಗಸ್ಟ್‌ 15ರಂದು ತೆರೆಗೆ ಬಂದಿದ್ದ ಕೃಷ್ಣಂ ಪ್ರಣಯ ಸಖಿ ಸಿನಿಮಾ, ಪ್ರೇಕ್ಷಕರಿಂದ ಪಾಸಿಟಿವ್‌ ಪ್ರತಿಕ್ರಿಯೆ ಪಡೆದುಕೊಂಡಿತ್ತು. ಫ್ಯಾಮಿಲಿ ಆಡಿಯೆನ್ಸ್‌ ಮನಗೆದ್ದು, ಬಾಕ್ಸ್‌ ಆಫೀಸ್‌ನಲ್ಲೂ ಮೋಡಿ ಮಾಡಿತ್ತು ಈ ಸಿನಿಮಾ. ಈ ನಡುವೆ ಕೃಷ್ಣಂ ಪ್ರಣಯ ಸಖಿ 100 ದಿನಗಳತ್ತ ದಾಪುಗಾಲಿಟ್ಟಿದ್ದು, ಗೋಲ್ಡನ್‌ ಸ್ಟಾರ್‌ ಗಣೇಶ್‌ಗೂ ಈ ಸಿನಿಮಾ ದೊಡ್ಡ ಹಿಟ್‌ ನೀಡಿದೆ. ಈ ಹಿಂದಿನ ಕೆಲ ಸಿನಿಮಾಗಳಿಗೆ ಹೋಲಿಸಿದರೆ, ಶತದಿನೋತ್ಸವ ಕಾಣದೆ ಹಲವು ವರ್ಷಗಳೇ ಆಗಿದ್ದವು. ಈಗ ದೊಡ್ಡ ಗೆಲುವಿನ ಜತೆಗೆ ಆಗಮಿಸಿದ್ದಾರೆ. ನಿರ್ದೇಶಕ ಶ್ರೀನಿವಾಸ್‌ ರಾಜು ಸಹ ಗೆಲುವಿನ ಹಳಿಗೆ ಮರಳಿದ್ದಾರೆ.

ಇದನ್ನೂ ಓದಿ: ಮತ್ತೆ ನಾನೇ ಕಿಂಗ್‌ ಎಂದು ತೋರಿಸಿದ ಪುಟ್ಟಕ್ಕನ ಮಕ್ಕಳು; ಟಿಆರ್‌ಪಿ ಲೆಕ್ಕಾಚಾರದಲ್ಲಿ ಬಿಗ್‌ಬಾಸ್‌ಗೆ ಸಿಕ್ಕಿದ್ದೇನು?‌

ಸದ್ಯಕ್ಕೆ ಒಟಿಟಿ ಸುದ್ದಿಯಿಲ್ಲ..

ಸಹಜವಾಗಿ ಒಂದು ಸಿನಿಮಾ ಚಿತ್ರಮಂದಿರದಲ್ಲಿ ಬಿಡುಗಡೆಯಾದ 30ರಿಂದ 40 ದಿನಗಳ ಬಳಿಕ ಒಟಿಟಿ ಅಂಗಳಕ್ಕೆ ಬರಬೇಕು. ಆದರೆ, ಕೃಷ್ಣ ಪ್ರಣಯ ಸಖಿ ಸಿನಿಮಾ ವಿಚಾರದಲ್ಲಿ ಮಾತ್ರ ಅದು ಸಾಧ್ಯವಾಗಲಿಲ್ಲ. ಮಹಾನವಮಿಗೆ ಒಟಿಟಿ ಪ್ರವೇಶಿಸಲಿದೆ, ದೀಪಾವಳಿಗೆ ಬರಲಿದೆ ಎಂದೇ ಸುದ್ದಿ ಓಡಾಡಿತೇ ಹೊರತು, ಈ ವರೆಗೂ ಅಧಿಕೃತವಾಗಿ ಘೋಷಣೆ ಆಗಲಿಲ್ಲ. ಈಗ ಇತ್ತೀಚೆಗಷ್ಟೇ ಇದೇ ಸಿನಿಮಾ ಸನ್‌ ನೆಕ್ಸ್ಟ್‌ ಒಟಿಟಿಯಲ್ಲಿ ಸ್ಟ್ರೀಮಿಂಗ್‌ ಆರಂಭಿಸಲಿದೆ ಎಂದು ಹೇಳಲಾಗಿತ್ತಾದರೂ, ಆ ಬಗ್ಗೆಯೂ ಅಧಿಕೃತ ಘೋಷಣೆ ಹೊರಬೀಳಲಿಲ್ಲ. ಈ ನಡುವೆ ಇದೇ ಸಿನಿಮಾದಿಂದ ಮತ್ತೊಂದು ಬ್ರೇಕಿಂಗ್‌ ಸುದ್ದಿ ಹೊರಬಿದ್ದಿದೆ. ಈ ಸಿನಿಮಾವನ್ನು ಒಟಿಟಿಯಲ್ಲಿ ನೋಡಲೇಬೇಕು ಎಂದಾದರೆ, ಇನ್ನೂ ಒಂದು ಅಥವಾ ಎರಡು ತಿಂಗಳು ಕಾಯಲೇಬೇಕು ಎಂದೇ ಹೇಳಲಾಗುತ್ತಿದೆ.

ಇದನ್ನೂ ಓದಿ: ಯಾಕ್‌ ಶಿವಣ್ಣ ಹಿಂಗ್‌ ಮಾಡಿದ್ರಿ? ‘ಭೈರತಿ ರಣಗಲ್’ ಅಬ್ಬರದ ನಡುವೆ ಮಂಕಾಯ್ತು ಚಿತ್ರಕಥೆ!

ಟಿವಿಗೆ ಬಂದ ಬಳಿಕ ಒಟಿಟಿಗೆ

ಹೌದು, ಕೃಷ್ಣಂ ಪ್ರಣಯ ಸಖಿ ಸಿನಿಮಾದ ಡಿಜಿಟಲ್‌ ಮತ್ತು ಸ್ಯಾಟಲೈಟ್‌ ಹಕ್ಕನ್ನು ಸನ್‌ನೆಕ್ಸ್ಟ್‌ ಕಂಪನಿ ದೊಡ್ಡ ಮೊತ್ತಕ್ಕೆ ಪಡೆದುಕೊಂಡಿದೆ. ಆ ಕಾರಣಕ್ಕಾಗಿ, ಮೊದಲಿಗೆ ಉದಯ ಟಿವಿಯಲ್ಲಿ ವರ್ಲ್ಡ್‌ ಟೆಲಿವಿಷನ್‌ ಪ್ರೀಮಿಯರ್‌ ಆದ ಬಳಿಕವೇ ಈ ಸಿನಿಮಾ ಒಟಿಟಿಗೆ ಆಗಮಿಸಲಿದೆ. ಇನ್ನು ಈ ರೀತಿಯ ದೊಡ್ಡ ಸಿನಿಮಾಗಳನ್ನು ಅಷ್ಟು ಸುಲಭಕ್ಕೆ ಟಿವಿಯಲ್ಲಿ ಹಾಕುವುದಿಲ್ಲ ಸನ್‌ ನೆಕ್ಸ್ಟ್‌. ಹಬ್ಬ ಹರಿದಿನದಂದೇ ಈ ಸಿನಿಮಾ ಉದಯ ಟಿವಿಯಲ್ಲಿ ಪ್ರಸಾರ ಕಾಣಲಿದೆ. ಹಾಗಾಗಿ ಸದ್ಯಕ್ಕೆ ಕ್ರಿಸ್‌ಮಸ್‌ ಅಥವಾ ಸಂಕ್ರಾಂತಿಗೆ ಟಿವಿಗೆ ಬರುವ ಸಾಧ್ಯತೆ ಇದೆ.

ಇದನ್ನೂ ಓದಿ: ಕೆಲಸ ಗೊತ್ತಿದೆ, ಕೊಡುವವರು ಸಿಗುತ್ತಿಲ್ಲ; ಟಗರು ಪಲ್ಯ, ಮರ್ಫಿ ಸಿನಿಮಾಗಳ ಮೂಲಕ ಮೊದಲ ಪ್ರಯತ್ನದಲ್ಲೇ ಗಮನ ಸೆಳೆದು ಮರೆಯಾದ ನಿರ್ದೇಶಕರು

ಬಹುತಾರಾಗಣದ ಸಿನಿಮಾ

ಕೃಷ್ಣಂ ಪ್ರಣಯ ಸಖಿ ಚಿತ್ರಕ್ಕೆ ಅರ್ಜುನ್‌ ಜನ್ಯ ಅವರ ಸಂಗೀತವಿದೆ. ವೆಂಕಟ್‌ ರಾಮ್‌ ಪ್ರಸಾದ್‌ ಛಾಯಾಗ್ರಹಣ, ಕೆ.ಎಂ. ಪ್ರಕಾಶ್‌ ಸಂಕಲನ, ವಿಜ್‌ ಈಶ್ವರ್‌ ಸಂಭಾಷಣೆ, ಮೋಹನ್‌ ಬಿ ಕೆರೆ ಅವರ ಕಲಾ ನಿರ್ದೇಶನ ಈ ಚಿತ್ರಕ್ಕಿದೆ. ಪ್ರಶಾಂತ್ ಜಿ ರುದ್ರಪ್ಪ ನಿರ್ಮಾಣದ ಕೃಷ್ಣಂ ಪ್ರಣಯ ಸಖಿ ಸಿನಿಮಾವನ್ನು ಶ್ರೀನಿವಾಸರಾಜು ನಿರ್ದೇಶನ ಮಾಡಿದ್ದಾರೆ. ಈ ಚಿತ್ರದಲ್ಲಿ ಗಣೇಶ್ ಜೋಡಿಯಾಗಿ ಮಾಳವಿಕಾ ನಾಯರ್ ಹಾಗೂ ಶರಣ್ಯ ಶೆಟ್ಟಿ ನಟಿಸಿದ್ದಾರೆ. ಇನ್ನುಳಿದಂತೆ ಶಶಿಕುಮಾರ್, ರಂಗಾಯಣ ರಘು, ಸಾಧು ಕೋಕಿಲ, ಅವಿನಾಶ್, ಶ್ರುತಿ ಸೇರಿ ದೊಡ್ಡ ತಾರಾಗಣವಿದೆ.