ಬೆಂಗಳೂರಿನ ಈ ಬಡಾವಣೆಗಳ ನೀರಿನ ಬವಣೆ ನೀಗುತ್ತಲೇ ಇಲ್ಲ; ಭಾರೀ ಮಳೆ ಸುರಿದು ಜಲಾಶಯಗಳು ತುಂಬಿದರೇನು ಟ್ಯಾಂಕರ್‌ ನೀರೇ ಗತಿ

ಬೆಂಗಳೂರು: ಈ ಬಾರಿಯ ಬೇಸಿಗೆ ಬೆಂಗಳೂರು ಜನರಿಗೆ ಪರೀಕ್ಷೆಯಂತೆಯೇ ಇತ್ತು. ಏಕೆಂದರೆ ಕಳೆದ ವರ್ಷ ಮಳೆ ಕಡಿಮೆಯಾಗಿ ಜಲಾಶಯಗಳು ತುಂಬಲೇ ಇಲ್ಲ. ಇದರ ಪರಿಣಾಮ ಬೆಂಗಳೂರು ಜನರಿಗೂ ಆಗಿತ್ತು. ಕುಡಿಯುವ ನೀರಿಗೆ ಬೆಂಗಳೂರಿನ ಬಹುತೇಕ ಬಡಾವಣೆಗಳು ಪರದಾಡಿದ್ದು, ಇದಕ್ಕೆ ಬೆಂಗಳೂರು ಜಲ ಮಂಡಳಿ ನಿತ್ಯಹಾಕಿದ ಶ್ರಮ ಇನ್ನೂ ನಮ್ಮ ಕಣ್ಣ ಮುಂದೆಯೇ ಇದೆ. ಈ ಬಾರಿ ಪರಿಸ್ಥಿತಿ ಹಾಗಿಲ್ಲ. ಭಾರೀ ಮಳೆಯಾಗಿ ಸತತ ಎರಡು ತಿಂಗಳಿನಿಂದ ಜಲಾಶಯಗಳು ತುಂಬಿವೆ. ನೀರಿನ ಸರಬರಾಜು ಕೂಡ ಎಲ್ಲೆಡೆ ಆಗುತ್ತಿದೆ. ಹೀಗಿದ್ದರೂ ಬೆಂಗಳೂರು ಮಹಾನಗರದ ಕೆಲವು ಬಡಾವಣೆಗಳಿಗೆ ಈಗಲೂ ನೀರು ಸರಬರಾಜು ವ್ಯವಸ್ಥೆ ಸರಿಯಾಗಿಲ್ಲ.ಟ್ಯಾಂಕರ್‌ ನೀರು ಪಡೆಯಲು ಮಾಸಿಕ 25,000 ರೂ. ಗಳನ್ನ ಖರ್ಚು ಮಾಡುವ ಸನ್ನಿವೇಶವೂ ಇದೆ.

ಬೆಂಗಳೂರಿನ ಮಹದೇವಪುರದ ನಿವಾಸಿಗಳು ನೀರಿನ ಕೊರತೆಯನ್ನು ಎದುರಿಸುತ್ತಿದ್ದು, ತಿಂಗಳಿಗೆ 25,000 ರೂ.ಗಳವರೆಗೆ ಖರ್ಚು ಮಾಡುವ ದುಬಾರಿ ಖಾಸಗಿ ಟ್ಯಾಂಕರ್ ಗಳಗೆ ಮೊರೆ ಹೋಗುವ ಸಂದರ್ಭ ತಪ್ಪಿಯೇ ಇಲ್ಲ.

ಇದನ್ನೂ ಓದಿರಿ: ಕರ್ನಾಟಕ ಬಜೆಟ್‌ ಅಧಿವೇಶನ; ಬೆಂಗಳೂರು ನಗರದ ಕುಡಿಯುವ ನೀರು ಸಮಸ್ಯೆ ಕುರಿತು ಉಪಮುಖ್ಯಮಂತ್ರಿ ಡಿಕೆ ಶಿವಕುಮಾರ್‌ ಸ್ಪಷ್ಟೀಕರಣ ಹೀಗಿತ್ತು

ತಿಂಗಳಿನಿಂದ ಬೆಂಗಳೂರಿನ ಮಹದೇವಪುರದ ಕಾಮಧೇನು ಬಡಾವಣೆಯ ನಿವಾಸಿಗಳು ತೀವ್ರ ನೀರಿನ ಕೊರತೆಯನ್ನು ಎದುರಿಸುತ್ತಿದ್ದು, ತಮ್ಮ ದೈನಂದಿನ ಅಗತ್ಯಗಳನ್ನು ಪೂರೈಸಲು ದುಬಾರಿ ಖಾಸಗಿ ನೀರಿನ ಟ್ಯಾಂಕರ್ ಗಳನ್ನು ಅವಲಂಬಿಸಿದ್ದಾರೆ. ಬೆಂಗಳೂರು ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿಯಿಂದ (ಬಿಡಬ್ಲ್ಯೂಎಸ್ಎಸ್ಬಿ) ವಿಶ್ವಾಸಾರ್ಹ ನೀರು ಸರಬರಾಜು ಇಲ್ಲದ ಕಾರಣ, ಕುಟುಂಬಗಳು ತಿಂಗಳಿಗೆ 10,000 ರಿಂದ 25,000 ರೂ.ಗಳವರೆಗೆ ನೀರಿಗಾಗಿ ಖರ್ಚು ಮಾಡಬೇಕಾಗುತ್ತದೆ, ಇದು ಟ್ಯಾಂಕರ್ ವಿತರಣೆಗಾಗಿ ತೀವ್ರ ಸ್ಪರ್ಧೆಗೆ ಕಾರಣವಾಗಿದೆ ಎಂದು ಟೈಮ್ಸ್ ಆಫ್ ಇಂಡಿಯಾ ವರದಿ ಮಾಡಿದೆ.

ಬೆಂಗಳೂರು ನಿವಾಸಿಯೊಬ್ಬರು ಹೇಳುವಂತೆ, ಅನಿಯಮಿತ ನೀರಿನ ಪೂರೈಕೆಯಿಂದಾಗಿ ತಮ್ಮ ಕುಟುಂಬ ಸವಾಲುಗಳನ್ನು ಎದುರಿಸುತ್ತಿದೆ. ಮಕ್ಕಳು ಅಥವಾ ವಯಸ್ಸಾದವರನ್ನು ಹೊಂದಿರುವ ಮನೆಗಳು ಅನಿಶ್ಚಿತ ಮತ್ತು ಅಸಮಂಜಸ ನೀರು ಸರಬರಾಜಿನ ನಡುವೆ ವಿವಿಧ ಸಮಸ್ಯೆಗಳನ್ನು ಎದುರಿಸುತ್ತವೆ, ಟ್ಯಾಂಕರ್ ಗಳನ್ನು ಅವಲಂಬಿಸುವುದನ್ನು ಬಿಟ್ಟು ಬೇರೆ ಆಯ್ಕೆಯಿಲ್ಲ. ಹೆಚ್ಚಿನ ಬೇಡಿಕೆ ಮತ್ತು ನಿರ್ಬಂಧಿತ ಸಂಪನ್ಮೂಲಗಳಿಂದಾಗಿ, ಟ್ಯಾಂಕರ್‌ಗಳು ಈಗ 5,000 ಲೀಟರ್ ಗೆ 1,500 ರಿಂದ 4,000 ರೂ.ಗಳವರೆಗೆ ಹಣ ಪಡೆಯುತ್ತಿವೆ. ಆಗಾಗ್ಗೆ ಮಧ್ಯರಾತ್ರಿ 1 ಗಂಟೆಯವರೆಗೆ ವಿತರಣೆ ಮಾಡುತ್ತವೆ, ಇದು ಮತ್ತಷ್ಟು ತೊಂದರೆಗಳನ್ನು ಸೃಷ್ಟಿಸುತ್ತದೆ.ಈ ವೆಚ್ಚಗಳಿಂದ ದೊಡ್ಡ ಕುಟುಂಬಗಳು ಇನ್ನೂ ಹೆಚ್ಚು ಹಾನಿಗೊಳಗಾಗುತ್ತವೆ ಎಂದು ವಿವರಿಸುತ್ತಾರೆ.

ಇದನ್ನೂ ಓದಿರಿ: Bengaluru City: ಬೆಂಗಳೂರಿನ ಬಹುತೇಕ ಬಡಾವಣೆಗಳಲ್ಲಿ ಇಂದು ಕಾವೇರಿ ನೀರು ಸ್ಥಗಿತ; ಯಾಕೆ, ಎಲ್ಲಿಲ್ಲಿ ನೀರು ವ್ಯತ್ಯಯ, ಇಲ್ಲಿದೆ ಮಾಹಿತಿ

ಇನ್ನೊಬ್ಬ ನಿವಾಸಿ ತನ್ನ ಕುಟುಂಬವು ತಿಂಗಳಿಗೆ 35,000 ರೂ.ಗಳವರೆಗೆ ನೀರಿಗಾಗಿ ಖರ್ಚು ಮಾಡುತ್ತದೆ ಎಂದು ಬಹಿರಂಗಪಡಿಸಿದರು. ಬಿಡಬ್ಲ್ಯೂಎಸ್ಎಸ್ಬಿಗೆ ಪದೇ ಪದೇ ದೂರು ನೀಡಿದರೂ, ತಕ್ಷಣದ ಪರಿಹಾರವನ್ನು ನೀಡಲಾಗಿಲ್ಲ. ಪಿಂಚಣಿ ಮತ್ತು ಉಳಿತಾಯದ ಮೇಲೆ ವಾಸಿಸುವ ಹಿರಿಯ ನಿವಾಸಿಗಳ ಮೇಲೆ ವಿಶೇಷವಾಗಿ ಇದು ಭಾರೀ ಪರಿಣಾಮ ಬೀರುತ್ತಿದೆ. ಟ್ಯಾಂಕರ್ ಗಳ ಮೇಲಿನ ಅವಲಂಬನೆ ತಮ್ಮ ಉಳಿತಾಯವನ್ನು ಬರಿದು ಮಾಡುತ್ತಿದೆ ಎಂದು ದೂರುತ್ತಾರೆ.

ಸ್ಥಳೀಯ ಟ್ಯಾಂಕರ್ ಮಾಲೀಕ ವೆಂಕಟೇಶ್ವರ್ ಅವರು ಈ ಪ್ರದೇಶದ ನೀರಿನ ಹೆಚ್ಚಿನ ಬೇಡಿಕೆಯನ್ನು ಪೂರೈಸಲು ನಾವೂ ಕಷ್ಟಪಡುತ್ತಿದ್ದೇವೆ. ದೂರದಿಂದ ನೀರು ತಂದು ಕೊಡಬೇಕು. ಜನ ದುಡ್ಡು ಹೆಚ್ಚಾಯಿತು ಎಂದು ಗೊಣಗುತ್ತಾರೆ. ನಾವೂ ಎಲ್ಲಾ ಖರ್ಚುಗಳನ್ನು ನೋಡಬೇಕಲ್ಲವೇ ಎಂದು ಪ್ರಶ್ನಿಸುತ್ತಾರೆ.

ಇದನ್ನೂ ಓದಿರಿ: ಬೆಂಗಳೂರು: ಕಟ್ಟಡದ ಮೇಲೆ ಬೀಳುವ ಮಳೆ ನೀರು ನೇರವಾಗಿ ಒಳಚರಂಡಿಗೆ ಸೇರುತ್ತಿದೆಯಾ ಚೆಕ್ ಮಾಡಿಕೊಳ್ಳಿ, ದಂಡ ವಿಧಿಸಲಿದೆ ಜಲಮಂಡಳಿ

ಬೆಂಗಳೂರು ಜಲಮಂಡಳಿ ಅಧ್ಯಕ್ಷ ರಾಮ್ ಪ್ರಸಾತ್ ಮನೋಹರ್ ಅವರು, ಕಾವೇರಿ 5 ನೇ ಹಂತದ ಯೋಜನೆ ಜಾರಿಯಾಗಲು ವಿಳಂಬವಾಗಿದೆ. ಇದರಿಂದ ಕೆಲವು ಬಡಾವಣೆಗಳಲ್ಲಿ ನೀರಿನ ಸಮಸ್ಯೆಯಿದೆ ಇದೆ. ಯೋಜನೆ ವಿಳಂಬವೇ ಕೊರತೆಗೆ ಕಾರಣ ಎಂದು ಸರ್ಕಾರಕ್ಕೆ ಸಲ್ಲಿಸಿರುವ ವರದಿಯಲ್ಲಿ ಉಲ್ಲೇಖಿಸಿದ್ದಾರೆ.

ದೂರು ಬರುತ್ತಿರುವ ಬಡಾವಣೆಗಳಿಗೆ ತೆರಳಿ ಅಲ್ಲಿನ ಜನರಿಗೆ ಮನವರಿಕೆಯನ್ನೂ ರಾಮಪ್ರಸಾತ್‌ ಮಾಡಿಕೊಟ್ಟಿದ್ದಾರೆ. ಕಾವೇರಿ ಐದನೇ ಹಂತದ ಯೋಜನೆಯಿಂದ ನೀರು ಕೆಲವೇ ವಾರಗಳಲ್ಲಿ ಈ ಪ್ರದೇಶವನ್ನು ತಲುಪುತ್ತದೆ ಎಂದು ಅವರು ನಿವಾಸಿಗಳಿಗೆ ಭರವಸೆ ನೀಡಿದ್ದಾರೆ.