Matrimonial sites: ವೈವಾಹಿಕ ವಂಚನೆ ತಡೆಗೆ ಬೇಕೊಂದು ʻವಿವಾಹ ನೋಂದಣಿʼ ವೆಬ್‌ಸೈಟ್‌; ಸರ್ಕಾರದ ಮುಂದಿದೆ ಜನಾಗ್ರಹ

paragraph

ವಿವಾಹ ಎಂದರೇನು? ಹಲವು ವ್ಯಾಖ್ಯಾನ ಸಿಗಬಹುದು ಮತ್ತು ಅನೇಕರು ಅನೇಕ ವಿಚಾರಗಳನ್ನು ಅವರ ಅನುಭವದ ಅಳತೆಯಲ್ಲಿ ಹೇಳಬಹುದು. ಸರಳವಾಗಿ ಹೇಳುವುದಾದರೆ ವಿವಾಹ ಎಂಬುದು ʻಉತ್ತಮ ಸಮಾಜಕ್ಕೆ ಅಗತ್ಯವಾದ ಬದುಕಿಗೆ ಇರುವಂತಹ ಒಂದು ನೈತಿಕ ಚೌಕಟ್ಟುʼ ಎಂದು ಹೇಳಲು ಅಡ್ಡಿ ಇಲ್ಲ. ಕೆಲವರಿಗೆ ಇದು ಸಾಂಪ್ರದಾಯಿಕ ಬದ್ಧತೆ. ಅನೇಕರಿಗೆ ಇದು ಜೀವನ ಬಂಧ ಅಂದರೆ ಕೊನೆಗಾಲದ ತನಕ ಒಟ್ಟಿಗೆ ಸತಿಪತಿಯಾಗಿ ಜೀವನ ಸಾಗಿಸುವ ಜೀವನ ಬಂಧ.

ವಿವಾಹ ಬಂಧ ಏರ್ಪಡುವುದು ಹೇಗೆ? - ಈಗ ಕೆಲವು ವರ್ಷಗಳ ಹಿಂದೆ ʻಮದುವೆ ಬ್ರೋಕರ್‌ʼಗಳ ಜಮಾನಾ ಇತ್ತು. ಅದಕ್ಕೂ ಮೊದಲು ವಧು ಅನ್ವೇಷಣೆ, ವರಾನ್ವೇಷಣೆಗೆ ಅದರದ್ದೇ ಆದ ಸಾಂಪ್ರದಾಯಿಕ ಮಾರ್ಗಗಳಿದ್ದವು. ಈಗ ಕೆಲವು ವರ್ಷಗಳಿಂದ ಆನ್‌ಲೈನ್‌ ಮ್ಯಾಚ್‌ಮೇಕರ್‌ ಮಾರುಕಟ್ಟೆ ಹೆಚ್ಚು ಜನಪ್ರಿಯವಾಗಿವೆ.

ಪ್ರಸ್ತುತ, ಭಾರತದ ಆನ್‌ಲೈನ್‌ ಮ್ಯಾಚ್‌ಮೇಕಿಂಗ್‌ ಮಾರುಕಟ್ಟೆ ಮೌಲ್ಯ ಕಳೆದ ವರ್ಷ 800 ಕೋಟಿ ರೂಪಾಯಿ ಅಂದಾಜಿಸಲಾಗಿತ್ತು. ಈ ಮಾರುಕಟ್ಟೆಯಲ್ಲಿ ಶೇಕಡ 70 ಮ್ಯಾಟ್ರಿಮೊನಿಯಲ್‌ ವೆಬ್‌ಸೈಟ್‌ಗಳಿದ್ದರೆ, ಶೇಕಡ 30 ಡೇಟಿಂಗ್‌ ಪ್ಲಾಟ್‌ಫಾರ್ಮ್‌ಗಳಿವೆ. ಕೋವಿಡ್‌ ಸಂಕಷ್ಟಕ್ಕೆ ಮೊದಲು ಇದು ಅರ್ಧಕ್ಕರ್ಧ ಇತ್ತು ಎಂಬುದನ್ನು HTಕನ್ನಡದ ಸೋದರ ತಾಣ ದ ಮಿಂಟ್‌ ವರದಿ ಹೇಳಿದೆ.

ಮ್ಯಾಚ್‌ಮೇಕಿಂಗ್‌ ಮಾರುಕಟ್ಟೆಯ ಮೇಲ್ನೋಟದ ಸಮಸ್ಯೆಗಳು

<ul><li>ವಧು-ವರರ ಪ್ರೊಫೈಲ್‌ ದೃಢೀಕರಣ ವ್ಯವಸ್ಥೆ ಇಲ್ಲ.</li><li>ಕೌಟುಂಬಿಕ ಹಿನ್ನೆಲೆ ಚೆಕ್‌ ಮಾಡುವುದು ಕಷ್ಟ.</li><li>ಉದ್ಯೋಗ, ವೇತನ, ಆಸ್ತಿ-ಪಾಸ್ತಿ ವಿಚಾರದಲ್ಲಿ ಸ್ಪಷ್ಟತೆ ಇರುವುದಿಲ್ಲ</li><li>ಕ್ರಿಮಿನಲ್‌ಗಳು ವಂಚನೆ ಎಸಗಲು ಪ್ರಯತ್ನಿಸುತ್ತಿರುತ್ತಾರೆ</li><li>ವಿವಾಹಿತರು ವಿಚ್ಛೇದನ ಪಡೆಯದೆ ಮರುಮದುವೆಗೆ ಪ್ರಯತ್ನಿಸುತ್ತಾರೆ.</li></ul>ಈ ಎಲ್ಲ ವಿಷಯಗಳನ್ನು ಗಮನಿಸಿಕೊಂಡು ಸುರಧೇನುಪುರದ ಮಲ್ಲಿಕಾರ್ಜುನ ಎಂಬುವವರು ಪ್ರತಿಪಾದಿಸಿದ್ದು ಹೀಗೆ -

ವಿವಾಹ ವಿಚ್ಛೇದನಗಳು ಇತ್ತೀಚಿನ ದಿನಗಳಲ್ಲಿ ಹೆಚ್ಚಾಗುತ್ತಿವೆ. ಇದಕ್ಕೆ,‘1000 ಸುಳ್ಳು ಹೇಳಿ ಒಂದು ಮದುವೆ ಮಾಡು’ ಎಂಬ ಒಂದೇ ಸಾಲಿನ ನೀತಿಗೆ , ಮದುವೆಯ ಬ್ರೋಕರುಗಳು ಅಂಟಿಕೊಂಡಿರುವುದೇ ಕಾರಣ. ಸಾಮಾನ್ಯ ಉದ್ಯೋಗದ ಗಂಡುಗಳಿಗೆ ಹೆಣ್ಣು ಕೊಡಲು ಹೆಣ್ಣಿನ ಪಾಲಕರು ಸುತರಾಂ ಒಪ್ಪುವುದಿಲ್ಲ. ಶಿಕ್ಷಣದಲ್ಲಿ ಗಂಡುಮಕ್ಕಳಿಗಿಂತ ಹೆಣ್ಣುಮಕ್ಕಳೇ ಮುಂದೆ ಇದ್ದಾರೆ. ಕೆಲವು ಗಂಡುಮಕ್ಕಳು ದುಶ್ಚಟಗಳ ದಾಸರು. ಇಂತಹ ಗಂಡಿಗೆ ಹೆಣ್ಣು ಹೊಂದಿಸುವುದೇ ಸವಾಲು. ದುಡ್ಡು ಕೊಡುವಂಥವರೂ ಇವರೇ ಆದ್ದರಿಂದ ಇಂತಹ ನ್ಯೂನತೆಗಳನ್ನು ಬಳಸಿಕೊಂಡು ಮದುವೆ ದಲ್ಲಾಳಿಗಳು ಸುಳ್ಳುಗಳನ್ನು ವೈಭವೀಕರಿಸಿ ಮದುವೆ ಮಾಡಿಸಿಬಿಡುತ್ತಾರೆ. ಅದಕ್ಕೆ ಪೂರಕವಾಗಿ ಜಾತಕ, ಗಣಕೂಟ, ಅಷ್ಟೇ ಏಕೆ ಹೆಸರನ್ನೇ ಬದಲಿಸುವ ಸಲಹೆ ಕೊಡುವಂಥ ಧನದಾಹಿ ಪುರೋಹಿತರು, ಜ್ಯೋತಿಷಿಗಳೂ ಇದ್ದಾರೆ. ಅವರೆಲ್ಲ ಈ ದಲ್ಲಾಳಿಗಳ ಮರ್ಜಿಯಲ್ಲಿರುತ್ತಾರೆ. ಈ ರೀತಿ ಹಸೆಮಣೆ ಏರಿದವರ ದಾಂಪತ್ಯ ಕೊನೆತನಕ ಇರುವುದಿಲ್ಲ. ಒಂದೋ ಎರಡೋ ಕೆಲವೊಮ್ಮೆ ಒಂದೇ ದಿನಕ್ಕೆ ಮುರಿದು ಹೋಗಿರುವಂತಹ ಉದಾಹರಣೆಗಳಿವೆ. ಇಂತಹ ಪ್ರಕರಣದಲ್ಲಿ ಕೌಟುಂಬಿಕ ಸಂಧಾನಗಳು ಯಶಸ್ವಿಯಾಗುವುದಿಲ್ಲ. ಆದ್ದರಿಂದ ಮದುವೆ ಎಷ್ಟೇ ವಿಜೃಂಭಣೆಯಿಂದ ಮಾಡಿದರೂ, ಮದುವೆ ನೋಂದಣಿ ಮಾಡಿಸುವುದು ಕಡ್ಡಾಯ ಆಗಬೇಕು. ಇದಕ್ಕಾಗಿ ಒಂದು ವಿವಾಹ ನೋಂದಣಿ ವೆಬ್‌ಸೈಟ್‌ ಅನ್ನು ಸರ್ಕಾರವೇ ಪರಿಚಯಿಸಬೇಕು.

<h2>ವಿವಾಹ ನೋಂದಣಿ ವೆಬ್‌ಸೈಟ್‌</h2>ಸರ್ಕಾರ ಪರಿಚಯಿಸಬೇಕಾದ ವಿವಾಹ ನೋಂದಣಿ ವೆಬ್‌ಸೈಟ್‌ನಲ್ಲಿ ಇದುವರೆಗೆ ಆದ ವಿವಾಹ, ಮುಂದಿನ 15 ದಿನಗಳಲ್ಲಿ ಆಗಲಿರುವ ಮದುವೆ, ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿದವರು, ಏನು ಕಾರಣ? ಕೌಟುಂಬಿಕ ಹಿನ್ನೆಲೆ ಮುಂತಾದ ಎಲ್ಲ ವಿವರಗಳೂ ಇರಲಿ. ಆಧಾರ್‌ ಸಂಖ್ಯೆ ಕೂಡಾ ಇರಲಿ. ಮದುವೆಗೆ ಮುಂಚಿತವಾಗಿ ವಿವಾಹ ನೋಂದಣಿ ಮಾಡುವಾಗ ವ್ಯಕ್ತಿಗೆ ಸಂಬಂಧಿಸಿದ ಎಲ್ಲ ವಿವರಗಳೂ ಒಂದೆಡೆ ಸಿಗುತ್ತದೆ. ಬೇರೆ ಮದುವೆ ಆಗಿದ್ದರೆ, ವಂಚನೆಗೆ ಒಳಗಾಗುವುದು ತಪ್ಪುತ್ತದೆ. ಬಾಲ್ಯ ವಿವಾಹ, ವಿಶೇಷ ವಿವಾಹದ ಹೆಸರಲ್ಲಿ ನಡೆಯುವ ವಂಚನೆ ಎಲ್ಲವೂ ತಪ್ಪುತ್ತದೆ. ನೋಂದಣಿ ಆಗದ ವಿವಾಹಕ್ಕೆ ಕಾನೂನಿನ ಮಾನ್ಯತೆ ಸಿಗದಿರಲಿ. ನೋಂದಣಿ ಮಾಡಿಸಿಕೊಂಡು ಸರಳ ವಿವಾಹ ಮಾಡಿಕೊಳ್ಳುವವರಿಗೆ ಸರ್ಕಾರ ಪ್ರೋತ್ಸಾಹಧನ ನೀಡಲಿ. ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ, ಸಚಿವಾಲಯಗಳು ಈ ಬಗ್ಗೆ ಗಮನಹರಿಸಬೇಕಾದ ಅವಶ್ಯಕತೆ ಇದೆ.

ಮೈಸೂರಿನ ಮಾಲತಿ ಎಬಿ ಅವರು ಕೂಡ ಇದಕ್ಕೆ ಪೂರಕ ಅಭಿಪ್ರಾಯವನ್ನೇ ವಾಚಕರ ವಾಣಿಯಲ್ಲಿ ವ್ಯಕ್ತಪಡಿಸಿದ್ದಾರೆ. ವಿವಾಹ ನೋಂದಣಿ ವೆಬ್‌ಸೈಟ್‌ಗೆ ಸಂಬಂಧಿಸಿ ಅವರ ಪ್ರತಿಪಾದನೆ ಹೀಗಿದೆ -

ವಿವಾಹ ಮಾಹಿತಿಯುಳ್ಳ ಸಮಗ್ರ ಜಾಲತಾಣದ ಅಗತ್ಯವಿರುವ ಕುರಿತು ಮಲ್ಲಿಕಾರ್ಜುನ ಅವರ ಆಗ್ರಹ ಸೂಕ್ತವಾಗಿದೆ. ಹಲವಾರು ಮುರಿದ ದಾಂಪತ್ಯ ಸಂಬಂಧಗಳಿಗೆ ಮಾಹಿತಿ ಕೊರತೆಯೇ ಕಾರಣ. ವಧು–ವರರ ಕುರಿತಾದ ಮಾಹಿತಿಯು ಪಾಲಕರಿಗೆ ಸಮಾಧಾನ ತರುವಂತೆ ಇರಬೇಕು. ಹಾಗಿಲ್ಲದೇ ಇದ್ದಾಗ, ಸದ್ಯದ ಅಸಹಜ ಹೊಂದಾಣಿಕೆ, ಮಾನಸಿಕ ಅಶಾಂತಿ, ದಾಂಪತ್ಯ ಕಲಹ, ವಿಚ್ಛೇದನ ಮುಂತಾದವುಗಳು ಘಟಿಸುತ್ತವೆ. ಹಣವೇ ಎಲ್ಲ ಎನ್ನುವ ಕಾಲಘಟ್ಟದಲ್ಲಿ ಗುಣ ಗೌಣವಾಗಿ ತಲೆತಗ್ಗಿಸುವ ಪರಿಸ್ಥಿತಿಯೇ ಹೆಚ್ಚು. ಆದ್ದರಿಂದ ಸಂಬಂಧ ಬೆಳೆಸುವಾಗ ಅಗತ್ಯ ಬೇಕಾದ ಎಲ್ಲ ಮಾಹಿತಿಯೂ ಸರ್ಕಾರದ ವೆಬ್‌ಸೈಟ್‌ನಲ್ಲೇ ಸಿಗುವಂತಾದರೆ ಚೆನ್ನ.

ಕೊನೆಯ ಮಾತು- ಸಮಾಜದಲ್ಲಿರುವ ಅನೇಕ ವೈವಾಹಿಕ ಸಮಸ್ಯೆಗಳನ್ನು ಆರಂಭದಲ್ಲೇ ಚಿವುಟಿ ಹಾಕುವುದಕ್ಕೆ ವಿವಾಹ ನೋಂದಣಿ ಕಡ್ಡಾಯ ಒಂದು ಮಾರ್ಗ. ಲವ್‌ ಜಿಹಾದ್‌, ಬಾಲ್ಯ ವಿವಾಹ, ಹಲವು ಮದುವೆ ಆಗುವುದು ಮುಂತಾದ ವಂಚನೆಯ ಜಾಲಕ್ಕೆ ಯುವತಿಯರು, ಮಹಿಳೆಯರು, ಬಾಲಕಿಯರು ಬೀಳದಂತೆ ತಡೆಯಲು ಇದು ಒಂದು ಪರಿಹಾರೋಪಾಯವೂ ಹೌದು.

ಕೇಂದ್ರ ಮಹಿಳಾ ಮಕ್ಕಳ ಅಭಿವೃದ್ಧಿ ಸಚಿವಾಲಯ ಮತ್ತು ರಾಜ್ಯದ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಅಗತ್ಯವಾಗಿ ವಿವಾಹ ನೋಂದಣಿ ವೆಬ್‌ಸೈಟ್‌ ಚಾಲ್ತಿಗೆ ತರುವ ಕಡೆಗೆ ಗಮನಹರಿಸುವುದು ಒಳಿತು. ಡಿಜಿಟಲ್‌ ಇಂಡಿಯಾ ಚಾಲ್ಲಿಯಲ್ಲಿರುವ ಕಾರಣ, ಭವ್ಯ ಭಾರತದ ಭವಿಷ್ಯಕ್ಕಾಗಿ, . ವೈಯಕ್ತಿಕ ಡೇಟಾ ಸೋರಿಕೆ ತಡೆಗೆ ಮುಂಜಾಗ್ರತಾ ಕ್ರಮ ತೆಗೆದುಕೊಂಡು ಏಕೀಕೃತ ವಿವಾಹ ನೋಂದಣಿ ವೆಬ್‌ಸೈಟ್‌ ರೂಪಿಸುವುದು ಉತ್ತಮ. ಇದು ಜಗತ್ತಿಗೊಂದು ಮಾದರಿಯಾದೀತು.

Karnataka Elections: ಬಿಜೆಪಿ ಬಿಟ್ಟು ಜೆಡಿಎಸ್‌ಗೆ ಮರಳಿದ ಮಾಜಿ ಶಾಸಕ ಮಲ್ಲಿಕಾರ್ಜುನ ಖೂಬಾ

<ul><li>ಇದೀಗ ಮಾಜಿ ಶಾಸಕ ಮಲ್ಲಿಕಾರ್ಜುನ ಖೂಬಾ ಮತ್ತೆ ಜೆಡಿಎಸ್‌ಗೆ ಮರಳಿದ್ದಾರೆ. ಮಲ್ಲಿಕಾರ್ಜುನ ಖೂಬಾ ಅವರು ಇಂದು ಮಾಜಿ ಮುಖ್ಯಮಂತ್ರಿಗಳಾದ ಹೆಚ್.ಡಿ.ಕುಮಾರಸ್ವಾಮಿ ಅವರ ಸಮಕ್ಷಮದಲ್ಲಿ ಮರಳಿ ಜೆಡಿಎಸ್ ಪಕ್ಷಕ್ಕೆ ಸೇರ್ಪಡೆಯಾಗಿದ್ದಾರೆ.</li></ul>

CM Basavaraj Bommai: ವರುಣಾದಲ್ಲಿ ನಾವು ಖಂಡಿತವಾಗಿ ಪ್ರಬಲವಾದ ಪೈಪೋಟಿ ನೀಡ್ತೇವೆ: ಸಿಎಂ ಬೊಮ್ಮಾಯಿ

ವರುಣಾದಲ್ಲಿ ವಿಜಯೇಂದ್ರ ಸ್ಪರ್ಧೆ ಮಾಡಬೇಕು ಎಂದು ಜನರ ಅಭಿಪ್ರಾಯವಿದೆ. ಅಂತಿಮವಾಗಿ ಎಲ್ಲಿ‌ ನಿಲ್ಲಬೇಕು ಎಂಬುದನ್ನ ಯಡಿಯೂರಪ್ಪ ತೀರ್ಮಾನ ತೆಗೆದುಕೊಳ್ಳಲಿದ್ದಾರೆ ಎಂದು ಸಿಎಂ ಬೊಮ್ಮಾಯಿ ಸ್ಪಷ್ಟಪಡಿಸಿದ್ದಾರೆ.

Election News: ಮತದಾರರಿಗೆ ಗಿಫ್ಟ್ ನೀಡಿ ಆಮಿಷ ಆರೋಪ; ಕಾಂಗ್ರೆಸ್ ಹಿರಿಯ ಶಾಸಕ ಶಾಮನೂರು ಶಿವಶಂಕರಪ್ಪ, ಪುತ್ರನ ವಿರುದ್ಧ ಎಫ್ಐಆರ್

ಚುನಾವಣಾ ಆಯೋಗ ನೀತಿ ಸಂಹಿತೆ ಜಾರಿಗೊಳಿಸಿದ ಮರುದಿನವೇ ದಾವಣಗೆರೆ ಕಾಂಗ್ರೆಸ್ ಶಾಸಕ ಡಾ.ಶಾಮನೂರು ಶಿವಶಂಕರಪ್ಪ ಮತ್ತವರ ಪುತ್ರ ಎಸ್.ಎಸ್ ಮಲ್ಲಿಕಾರ್ಜುನ್ ಮತದಾರರಿಗೆ ಹಂಚಲು ಮುಂದಾದ ಗಿಫ್ಟ್ ಗಳನ್ನ ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ.

Congress on Milk Shortage: 'ದಹಿ'ಗಾಗಿ ಪರಿತಪಿಸುವ ಬಿಜೆಪಿ ಹೈನುಗಾರರನ್ನು ದೈನೇಸಿ ಸ್ಥಿತಿಗೆ ದೂಡಿದೆ: ಕಾಂಗ್ರೆಸ್‌ ಕಿಡಿ!

Milk Shortage

ರಾಜ್ಯದಲ್ಲಿ ಹಾಲು ಮತ್ತು ಹಾಲಿನ ಉತ್ಪನ್ನಗಳ ಅಭಾವಕ್ಕೆ ತೀವ್ರ ಆಕ್ರೋಶ ಹೊರಹಾಕಿರುವ ಪ್ರತಿಪಕ್ಷ ಕಾಂಗ್ರೆಸ್‌, ಆಡಳಿತಾರೂಢ ಬಿಜೆಪಿ ವಿರುದಧ ಮುಗಿಬಿದ್ದಿದೆ. ಈ ಕುರಿತು ಸರಣಿ ಟ್ವೀಟ್‌ ಮಾಡಿರುವ ಕಾಂಗ್ರೆಸ್‌, ಹೈನುಗಾರರ ಬದುಕನ್ನು ಬಿಜೆಪಿ ಆಡಳಿತ ಸರ್ವನಾಶ ಮಾಡುತ್ತಿದೆ ಎಂದು ಗುಡುಗಿದೆ. ಈ ಕುರಿತು ಹೆಚ್ಚಿನ ಮಾಹಿತಿ ಇಲ್ಲಿದೆ..

Matrimonial sites: ವಿವಾಹ ಸಂಬಂಧ ಏರ್ಪಡಿಸುವ ಮ್ಯಾಟಿಮೊನಿ ಕೇಂದ್ರಗಳು, ವೆಬ್‌ಸೈಟ್‌ಗಳು ಸಾಕಷ್ಟಿವೆ. ಇಲ್ಲಾಗುವ ವಂಚನೆಗಳ ವಿಚಾರ ಪದೇಪದೆ ಸುದ್ದಿ ಆಗುತ್ತಲೇ ಇದೆ. ವಿವಾಹ ಸಂಬಂಧ ಎಂಬುದು ಬದುಕಿನಲ್ಲಿ ಮಹತ್ವದ ಘಟ್ಟ. ಇಲ್ಲಿ ಮುಚ್ಚುಮರೆ ಇರಬಾರದು ಎಂಬುದು ಹೊಸ ತಲೆಮಾರಿನ ನಿಲುವು. ಆದ್ದರಿಂದ “ವಿವಾಹ ನೋಂದಣಿ ವೆಬ್‌ಸೈಟ್‌” ಬೇಕೆಂಬುದು ಅತಿ ಬೇಡಿಕೆಯ ಜನಾಗ್ರಹ.

Pepsi has a new logo: ಹದಿನೈದು ವರ್ಷದ ಬಳಿಕ ಬದಲಾಗುತ್ತಿದೆ ಪೆಪ್ಸಿ ಲೋಗೋ; ಸೋಷಿಯಲ್‌ ಮೀಡಿಯಾದಲ್ಲಿ ಲೋಗೋ ಟ್ರೆಂಡ್‌

ಸಾಫ್ಟ್‌ ಡ್ರಿಂಕ್‌ ಮಾರುಕಟ್ಟೆಯಲ್ಲಿರುವ ಜನಪ್ರಿಯ ಪೇಯ ಪೆಪ್ಸಿ ತನ್ನ ಲಾಂಛನವನ್ನು ಬದಲಾಯಿಸಲು ಮುಂದಾಗಿದೆ. 125ನೇ ವರ್ಷಾಚರಣೆಗೆ ಅಣಿಯಾಗುತ್ತಿರುವ ಪೆಪ್ಸಿ ಉತ್ತರ ಅಮೆರಿಕದಲ್ಲಿ ಹೊಸ ಲೋಗೋವನ್ನು ಪರಿಚಯಿಸಿದೆ. ಪ್ರಪಂಚದಾದ್ಯಂತ ಈ ಲೋಗೋ 2024ರ ವೇಳೆಗೆ ಚಾಲ್ತಿಗೆ ಬರಲಿದೆ ಎಂದು ಕಂಪನಿಯ ಹೇಳಿಕೆ ತಿಳಿಸಿದ್ದಾಗಿ ಅಮೆರಿಕದ ಮಾಧ್ಯಮಗಳು ವರದಿ ಮಾಡಿವೆ.

ಪೆಪ್ಸಿ ಲೋಗೋ ಹೇಗಿದೆ ನೆನಪಿದೆಯೇ ಎಂದು ಯಾರಾದರೂ ಕೇಳಿದರೆ, ನೀವು ಏನು ಬರೆಯಬಲ್ಲಿರಿ. ಒಂದು ವೃತ್ತ. ಅದರಲ್ಲಿ ಕೆಂಪು ಬಿಳಿ ಮತ್ತು ನೀಲಿ ಬಣ್ಣದ ಅಡ್ಡಪಟ್ಟಿ. ಬಹುಶಃ ಪೆಪ್ಸಿ ಎಂಬ ಪದವನ್ನು ಸೇರಿಸಬಹುದು.

ಪೆಪ್ಸಿ ಕಂಪನಿ ಇಂತಹ ಕಸರತ್ತುಗಳನ್ನು ಮಾಡುತ್ತಿರುತ್ತದೆ. ಬಹುತೇಕ ಗ್ರಾಹಕರು ಲೋಗೋ ನಡುವೆ ಪೆಪ್ಸಿ ಪದವನ್ನು ಬರೆದೇ ಬರೆಯುತ್ತಾರೆ. ಆದರೆ ಈಗ ಇರುವ ಲೋಗೋ ಹಾಗಿಲ್ಲ. ಲಾಂಛನದ ಹೊರಗಿದೆ ಬ್ರ್ಯಾಂಡ್‌ನ ಹೆಸರು. ಜನಮಾನಸದಲ್ಲಿರುವಂತೆಯೇ ಹೊಸ ಲೋಗೋದಲ್ಲಿ ಮಧ್ಯಭಾಗದಲ್ಲಿ ಪೆಪ್ಸಿ ಪದ ಸೇರಿಕೊಂಡಿದೆ. ಇದು ಶೀಘ್ರವೇ ಪೆಪ್ಸಿ ಟಿನ್‌ಗಳಲ್ಲಿ ರಾರಾಜಿಸಲಿದೆ ಎಂದು ಕಂಪನಿ ಹೇಳಿಕೆ ತಿಳಿಸಿದೆ.

ಪೆಪ್ಸಿ ಕಂಪನಿ ಶುರುವಾಗಿದ್ದು 1898ರಲ್ಲಿ. ಅಂದಿನಿಂದ ಇಂದುವರೆಗೆ ಬ್ರ್ಯಾಂಡ್‌ ತನ್ನ ಲೋಗೋವನ್ನು ಹಲವು ಬಾರಿ ಬದಲಾಯಿಸಿದೆ, ಪರಿಷ್ಕರಿಸಿದೆ. ಈಗ ಇರುವಂತಹ ಲಾಂಛನ 2008ರಲ್ಲಿ ಪರಿಚಯಿಸಿದ್ಧಾಗಿದೆ. 15 ವರ್ಷಗಳ ಬಳಿಕ ಮತ್ತೆ ಲಾಂಛನ ಪರಿಷ್ಕರಣೆ ಮಾಡಿದೆ ಕಂಪನಿ.

ಪೆಪ್ಸಿಯ ಮುಖ್ಯ ಮಾರ್ಕೆಟಿಂಗ್ ಅಧಿಕಾರಿ ಟಾಡ್ ಕಪ್ಲಾನ್ ಅವರು ತಮ್ಮ ಟ್ವಿಟರ್ ಹ್ಯಾಂಡಲ್‌ನಲ್ಲಿ ಹೊಸ ಲೋಗೋವನ್ನು ಶೇರ್‌ ಮಾಡಿಕೊಂಡಿದ್ದಾರೆ. ಅದರಲ್ಲಿ ಅವರು "ಪೆಪ್ಸಿಯ ಹೊಸ ಯುಗಕ್ಕೆ ಸುಸ್ವಾಗತ! ನಮ್ಮ ಹೊಸ ಪೆಪ್ಸಿ ಲೋಗೋ ಮತ್ತು ವಿಷುವಲ್‌ ಐಡೆಂಟಿಟಿಯನ್ನು ಶೇರ್‌ ಮಾಡಿಕೊಳ್ಳಲು ನಾನು ಹೆಮ್ಮೆಪಡುತ್ತೇನೆ. ಅಮೆರಿಕದಲ್ಲಿ ಈ ಅವಧಿಯಲ್ಲೇ ಪರಿಚಯಿಸಲಾಗುತ್ತದೆ" ಎಂದು ಹೇಳಿಕೊಂಡಿದ್ದಾರೆ.

<blockquote class="twitter-tweet">🚨 Welcome to a new era of Pepsi!🚨 Couldn’t be more proud to share our new Pepsi logo and visual identity that we will be rolling out in the US this fall! <a href="https://t.co/OC80a6PyDd">pic.twitter.com/OC80a6PyDd</a>&mdash; Todd Kaplan (@T_Kap) <a href="https://twitter.com/T_Kap/status/1640757586449367044?ref_src=twsrc%5Etfw">March 28, 2023</a></blockquote> <script async src="https://platform.twitter.com/widgets.js" charset="utf-8"></script>

ಪೆಪ್ಸಿಯ ಹೊಸ ನೋಟವು ಉತ್ತರ ಅಮೆರಿಕಾದ ಮಾರುಕಟ್ಟೆಯಲ್ಲಿ ಈ ಶರತ್ಕಾಲದಲ್ಲಿ ಲಭ್ಯವಿರುತ್ತದೆ. 2024 ರ ವೇಳೆಗೆ ವಿಶ್ವದಾದ್ಯಂತ ಲಭ್ಯವಾಗಲಿದೆ ಎಂದು ಕಂಪನಿ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.

ಇದರ ನಡುವೆ, ಹೊಸ ಲೋಗೋಕ್ಕೆ ಸಂಬಂಧಿಸಿದ ವಿಡಿಯೋವನ್ನು ಟಾಡ್‌ ಕಪ್ಲಾನ್‌ ಶೇರ್‌ ಮಾಡಿದ್ದಾರೆ.

<blockquote class="twitter-tweet">Allow us to reintroduce ourselves… 👀<a href="https://twitter.com/hashtag/Pepsi?src=hash&amp;ref_src=twsrc%5Etfw">#Pepsi</a> <a href="https://twitter.com/hashtag/PepsiProud?src=hash&amp;ref_src=twsrc%5Etfw">#PepsiProud</a> <a href="https://twitter.com/hashtag/Design?src=hash&amp;ref_src=twsrc%5Etfw">#Design</a> <a href="https://t.co/zWXHlfEHiu">pic.twitter.com/zWXHlfEHiu</a>&mdash; Todd Kaplan (@T_Kap) <a href="https://twitter.com/T_Kap/status/1640818438531579906?ref_src=twsrc%5Etfw">March 28, 2023</a></blockquote> <script async src="https://platform.twitter.com/widgets.js" charset="utf-8"></script>

ಈ ಹೊಸ ಲೋಗೋದ ಮಧ್ಯಭಾಗದಲ್ಲಿ ಪೆಪ್ಸಿ ಪದ ಬಳಸಲಾಗಿದೆ. ಇದು 1990 ರ ಲೋಗೋದಂತೆ ಕಾಣುತ್ತಿದೆ. ಇದು ಜನರ ಮನಸ್ಸಿನಲ್ಲಿ ಅಂಟಿಕೊಂಡಿದೆ ಎಂದು ತೋರುತ್ತದೆ. ಆದ್ದರಿಂದ, ಅಸ್ತಿತ್ವದಲ್ಲಿರುವ ವಿನ್ಯಾಸಕ್ಕೆ ಕನಿಷ್ಠ ವಿಧಾನವನ್ನು ತೆಗೆದುಹಾಕುವ ಮೂಲಕ, ಪೆಪ್ಸಿ ಅದನ್ನು ಬಲವಾದ, ದಪ್ಪ ಮತ್ತು ಆತ್ಮವಿಶ್ವಾಸವನ್ನು ಇರಿಸಿಕೊಳ್ಳಲು ನಿರ್ಧರಿಸಿತು. ಅದೇ ರೀತಿ, ಪೆಪ್ಸಿಕೋದ ಮುಖ್ಯ ವಿನ್ಯಾಸ ಅಧಿಕಾರಿ ಮೌರೊ ಪೊರ್ಸಿನಿ "ನಾವು ಅಂತಹ ಒಳನೋಟವನ್ನು ನಿರ್ಲಕ್ಷಿಸಲಾಗಲಿಲ್ಲ... ಅದನ್ನು ತಿರಸ್ಕರಿಸುವ ಬದಲು ನಾವು ಅದನ್ನು ಸ್ವೀಕರಿಸಲು ನಿರ್ಧರಿಸಿದ್ದೇವೆ" ಎಂದು ಹೇಳಿದ್ದಾಗಿ ಸಿಎನ್‌ಎನ್‌ ವರದಿ ಹೇಳಿದೆ.

ಗಮನಿಸಬಹುದಾದ ಸುದ್ದಿಗಳು

ಪ್ಯಾನ್‌ - ಆಧಾರ್‌ ಜೋಡಣೆ ಅವಧಿ 3 ತಿಂಗಳು ವಿಸ್ತರಣೆ; ಜೂ.30 ಈಗ ಹೊಸ ಡೆಡ್‌ಲೈನ್‌

PAN-Aadhaar linking: ಕಾಯಿದೆಯ ಪ್ರಕಾರ 2023ರ ಏಪ್ರಿಲ್‌ 1 ರಿಂದ ಕೆಲವು ಪರಿಣಾಮಗಳನ್ನು ಎದುರಿಸಬೇಕಾಗುತ್ತದೆ ಎಂದು ಹೇಳಲಾಗಿತ್ತು. ಆದರೆ, ಈಗ ಈ ಗಡುವನ್ನು ಅಂದರೆ ಪ್ಯಾನ್ ಮತ್ತು ಆಧಾರ್ ಅನ್ನು ಲಿಂಕ್ ಮಾಡುವ ಉದ್ದೇಶದ ದಿನಾಂಕವನ್ನು ಜೂನ್ 30ರವರೆಗೆ ವಿಸ್ತರಿಸಲಾಗಿದೆ ಎಂದು ಹಣಕಾಸು ಸಚಿವಾಲಯದ ಹೇಳಿಕೆ ತಿಳಿಸಿದೆ. <a class="manualbacklink" target="_blank" href="https://kannada.hindustantimes.com/nation-and-world/panaadhaar-linking-deadline-extended-to-june-30-details-here-181679997659617.html" rel="dofollow">ವಿವರ ಓದಿಗೆ ಇಲ್ಲಿ ಕ್ಲಿಕ್‌ ಮಾಡಿ</a>

Eating idli: "ಇಡ್ಲಿಗಿಂತ ರುಚಿ ಬೇರೆ ಇಲ್ಲ...", ಆರ್ಡರ್‌ನಲ್ಲೇ ದಾಖಲೆ ಮಾಡಿದ ಇಡ್ಲಿಪ್ರಿಯ, ಮಸಾಲೆದೋಸೆ ಬಳಿಕ ಇಡ್ಲಿಯೇ ಜನಪ್ರಿಯ

ತಟ್ಟೆ ಇಡ್ಲಿ, ರವಾ ಇಡ್ಲಿ, ಮಿನಿ ಇಡ್ಲಿ ಸೇರಿದಂತೆ ಬಗೆಬಗೆಯ ಇಡ್ಲಿಯನ್ನು ಪ್ರತಿನಿತ್ಯ ಇಡ್ಲಿಪ್ರಿಯರು ಆನ್‌ಲೈನ್‌ನಲ್ಲಿ ಆರ್ಡರ್‌ ಮಾಡುತ್ತಿದ್ದು, ಇಡ್ಲಿ ಆರ್ಡರ್‌ ಮಾಡುವುದರಲ್ಲಿ ಇಡ್ಲಿಪ್ರಿಯರೊಬ್ಬರು ಹೊಸ ದಾಖಲೆ ಮಾಡಿದ್ದಾರೆ.

Bihar Youtuber Case: ವಲಸಿಗರ ಮೇಲೆ ಹಲ್ಲೆ ವಿಡಿಯೋ, ಬಿಹಾರದ ಯೂಟ್ಯೂಬರ್‌ನನ್ನು ತಮಿಳುನಾಡು ಪೊಲೀಸರ ಕೈಗೆ ಒಪ್ಪಿಸಿದ ಕೋರ್ಟ್‌

ತಮಿಳುನಾಡಿನಲ್ಲಿ ವಲಸಿಗರ ಮೇಲೆ ಹಲ್ಲೆ ನಡೆಯುತ್ತಿದೆ ಎಂದು ಫೇಕ್‌ ವಿಡಿಯೋ ಪ್ರಕಟಿಸಿದ ಆರೋಪದ ಮೇರೆಗೆ ಬಿಹಾರದ ಯೂಟ್ಯೂಬರ್‌ನನ್ನು ಮೂರು ದಿನಗಳ ಕಾಲ ತಮಿಳುನಾಡು ಪೊಲೀಸರ ಕಸ್ಟಡಿಗೆ ಮಧುರೈ ಕೋರ್ಟ್‌ ಒಪ್ಪಿಸಿದೆ.

New York Police: ಡೊನಾಲ್ಡ್‌ ಟ್ರಂಪ್‌ ಬಂಧನ ಸಾಧ್ಯತೆ: ಹೈ ಅಲರ್ಟ್‌ ಮೋಡ್‌ಗೆ ಜಾರಿದ ನ್ಯೂಯಾರ್ಕ್‌ ಪೊಲೀಸ್‌!

New York Police

ಟ್ರಂಪ್‌ ಅವರು ಮುಂಬರುವ ಲೋವರ್ ಮ್ಯಾನ್‌ಹ್ಯಾಟನ್‌ನ ಕ್ರಿಮಿನಲ್ ಕೋರ್ಟ್‌ ಕಟ್ಟಡದಲ್ಲಿ, ನ್ಯಾಯಾಧೀಶರ ಮುಂದೆ ಶರಣಾಗುವ ಸಾಧ್ಯತೆ ದಟ್ಟವಾಗಿದೆ. ಈ ಹಿನ್ನೆಲೆಯಲ್ಲಿ ನ್ಯಾಯಾಲಯ ಒಂದು ವೇಳೆ ಆದೇಶ ನೀಡಿದರೆ, ಟ್ರಂಪ್‌ ಅವರನ್ನು ಬಂಧಿಸಲು ನ್ಯೂಯಾರ್ಕ್‌ ಪೊಲೀಸ್‌ ಇಲಾಖೆ ಸಜ್ಜಾಗಿದೆ. ಟ್ರಂಪ್‌ ವಿಚಾರಣೆ ಹಿನ್ನೆಲೆಯಲ್ಲಿ ನ್ಯೂಯಾರ್ಕ್‌ ಪೊಲೀಸ್‌ ಹೈ ಅಲರ್ಟ್‌ಗೆ ಜಾರಿದೆ.

Stormy Daniels: ದೋಷಾರೋಪಣೆಗೆ ಗುರಿಯಾದ ಟ್ರಂಪ್‌: ನೀಲಿತಾರೆ ಸ್ಟಾರ್ಮಿ ಡೇನಿಯಲ್ಸ್ ನೀಡಿದ ಮೊದಲ ಪ್ರತಿಕ್ರಿಯೆ ಇದು..

Stormy Daniels

ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ವಿರುದ್ಧ ದೋಷಾರೋಪಣೆ ಪಟ್ಟಿ ಸಲ್ಲಿಸಲಾಗಿದ್ದು, ಈ ಕುರಿತು ನೀಲಿತಾರೆ ಸ್ಟಾರ್ಮಿ ಡೇನಿಯಲ್ಸ್ ಪ್ರತಿಕ್ರಿಯೆ ನೀಡಿದ್ದಾರೆ. ವಿಚಾರಣೆಯುದ್ದಕ್ಕೂ ತಮ್ಮನ್ನು ಬೆಂಬಲಿಸಿದ ಪ್ರತಿಯೊಬ್ಬರಿಗೂ ಧನ್ಯವಾದ ಅರ್ಪಿಸುವುದಾಗಿ ಸ್ಟಾರ್ಮಿ ಡೇನಿಯಲ್ಸ್ ತಿಳಿಸಿದ್ದಾರೆ. ಈ ಕುರಿತು ಇಲ್ಲಿದೆ ಮಾಹಿತಿ..

Pepsi has a new logo: ಪೆಪ್ಸಿ ಉತ್ತರ ಅಮೆರಿಕದಲ್ಲಿ ಹೊಸ ಲೋಗೋವನ್ನು ಪರಿಚಯಿಸಿದೆ. ಪ್ರಪಂಚದಾದ್ಯಂತ ಈ ಲೋಗೋ 2024ರ ವೇಳೆಗೆ ಚಾಲ್ತಿಗೆ ಬರಲಿದೆ ಎಂದು ಕಂಪನಿಯ ಹೇಳಿಕೆ ತಿಳಿಸಿದ್ದಾಗಿ ಅಮೆರಿಕದ ಮಾಧ್ಯಮಗಳು ವರದಿ ಮಾಡಿವೆ.

BJP banks on Modi hava: ಅಧಿಕಾರ ಗದ್ದುಗೆ ಏರಲು ಮೋದಿ ಹವಾ ನೆಚ್ಚಿಕೊಳ್ಳುತ್ತಾ ಬಿಜೆಪಿ; ಸೋಷಿಯಲ್‌ ಇಂಜಿನಿಯರಿಂಗ್‌ ಮಾಡೆಲ್‌ ಪ್ರಯೋಗ

ಕರ್ನಾಟಕ ವಿಧಾನಸಭಾ ಚುನಾವಣೆ ಘೋಷಣೆ ಆಗಿದ್ದು, ಮೇ 10ರಂದು ಮತದಾನ ನಡೆಯಲಿದೆ. ಜೆಡಿಎಸ್‌, ಕಾಂಗ್ರೆಸ್‌ ಪಕ್ಷಗಳು ಈಗಾಗಲೇ ಅಭ್ಯರ್ಥಿಗಳ ಮೊದಲ ಪಟ್ಟಿ ಬಿಡುಗಡೆ ಮಾಡಿವೆ. ಬಿಜೆಪಿಯಲ್ಲಿ ಇನ್ನೂ ಅಭ್ಯರ್ಥಿಗಳ ವಿಚಾರ ಅಂತಿಮವಾಗಿಲ್ಲ. ಇಂತಹ ಸನ್ನಿವೇಶದಲ್ಲಿ ಮತದಾರರ ಮನವೊಲಿಸಲು ಬಿಜೆಪಿ ನಾಯಕರು ಈಗಾಗಲೇ ಯಾತ್ರೆಗಳನ್ನು ಕೈಗೊಂಡಿರುವುದು ವೇದ್ಯ ವಿಚಾರ. ಅವೆಲ್ಲ ಏನೇ ಇದ್ದರೂ ಚುನಾವಣೆ ಘೋಷಣೆ ಆದ ನಂತರದ ಈ ಕಾಲಘಟ್ಟ ಅತ್ಯಂತ ನಿರ್ಣಾಯಕ.

ಅಧಿಕಾರ ಗದ್ದುಗೆಯನ್ನು ಮತ್ತೆ ಖಾತರಿಪಡಿಸುವಂತಹ ಜನಾದೇಶ ಪಡೆಯಲು ಬಿಜೆಪಿಯ ರಣತಂತ್ರವೇನು?

ಹೀಗೊಂದು ಪ್ರಶ್ನೆಯನ್ನು ಪಕ್ಷದ ಪ್ರಮುಖರ ಮುಂದಿಟ್ಟರೆ ಅವರು ಹೇಳುವುದಿಷ್ಟು. ಬೊಮ್ಮಾಯಿ ಸರ್ಕಾರ ಒಂದಷ್ಟು ಕಲ್ಯಾಣ ಯೋಜನೆ, ಅಭಿವೃದ್ಧಿ ಕಾರ್ಯಕ್ರಮಗಳನ್ನು ಜಾರಿಗೊಳಿಸಿದೆ. ಕೇಂದ್ರ ಸರ್ಕಾರದ ಮಹತ್ವಾಕಾಂಕ್ಷೆಯ ಕಾರ್ಯಕ್ರಮಗಳೂ ರಾಜ್ಯದಲ್ಲಿ ಯಶಸ್ವಿಯಾಗಿ ಜಾರಿಯಾಗಿದೆ. ಇದರ ಜತೆಗೆ ಪ್ರಧಾನಿ ನರೇಂದ್ರ ಮೋದಿ ಅವರ ಜನಪ್ರಿಯತೆ ಇನ್ನೂ ಉಳಿದುಕೊಂಡಿರುವ ಕಾರಣ ಅದು ಕೆಲಸ ಮಾಡಲಿದೆ ಎಂಬ ಉತ್ತರ ಬರುತ್ತದೆ.

ತಳಮಟ್ಟದಲ್ಲಿ ಪಕ್ಷದ ಟಿಕೆಟ್‌ಗಾಗಿ ಓಡಾಡುತ್ತಿರುವ ಒಂದಿಬ್ಬರನ್ನು ಬಿಜೆಪಿ ಗೆಲುವಿನ ವಿಚಾರವಾಗಿ HTಕನ್ನಡ ಮಾತನಾಡಿಸಿದೆ. ಹೆಸರು ಉಲ್ಲೇಖಿಸುವುದಿಲ್ಲ ಎಂದು ಹೇಳಿದ್ದಕ್ಕಾಗಿ ಅವರು ಫ್ರಾಂಕ್‌ ಆಗಿ ಹೇಳಿದ್ದು ಇಷ್ಟು -

ಸರ್ಕಾರ ರಚನೆ ಆಗಬೇಕು ಎಂದು ಕಾಂಗ್ರೆಸ್‌, ಜೆಡಿಎಸ್‌ನಿಂದ ಬಂದವರಿಗೆ ಹೆಚ್ಚಿನ ಪ್ರಾಮುಖ್ಯತೆ ನೀಡಲಾಯಿತು. ಸಚಿವ ಸಂಪುಟದಲ್ಲೂ ಅಷ್ಟೆ. ಇದು ಒಳಬೇಗುದಿಗೆ ಕಾರಣವಾಗಿದೆ. ಇನ್ನು, ಮೀಸಲಾತಿ ಮತ್ತು ಉಪವರ್ಗೀಕರಣವನ್ನು ಚುನಾವಣೆಗೆ ಸಮೀಪದಲ್ಲಿ ಪರಿಷ್ಕರಿಸಿದ್ದು ಬಹುಶಃ ಹಿನ್ನೆಡೆ ಆದೀತು. ಅಧಿಕಾರದ ಆಸೆಯಿಂದ ಸರ್ಕಾರ ರಚನೆಯ ಉದ್ದೇಶದಿಂದ ಪಕ್ಷ ಸೇರಿದವರು ಈ ಚುನಾವಣೆಯಲ್ಲಿ ಪಕ್ಷದ ಟಿಕೆಟ್‌ ಸಿಗದೇ ಇದ್ದರೆ ಅವರು ಬೇರೆ ಪಕ್ಷಗಳಿಗೆ ಹೋಗುವುದು ಖಚಿತ. ಹೀಗಾದರೆ ಅಂತಹ ಕ್ಷೇತ್ರದಲ್ಲಿ ಪಕ್ಷ ಗೆಲ್ಲಲಾರದು. ಅಲ್ಲಿ ವ್ಯಕ್ತಿಗತ ವರ್ಚಸ್ಸು ಗೆಲುವಿಗೆ ಕಾರಣ ಎಂಬುದನ್ನು ಮರೆಯುವಂತೆ ಇಲ್ಲ.

ಆದರೆ ಬಿಜೆಪಿ ಹಿಂದಿನಂತೆ ಇಲ್ಲ. ಪಕ್ಷದ ಗೆಲುವಿಗಾಗಿ ಅಧಿಕಾರ ಉಳಿಸಿಕೊಳ್ಳುವುದಕ್ಕೆ ಮತದಾರರನ್ನು ತನ್ನೆಡೆಗೆ ಸೆಳೆದುಕೊಳ್ಳಲು ಹೆಚ್ಚಿನ ಪ್ರಯತ್ನ ಮಾಡುತ್ತಲೇ ಇದೆ. ಸೋಷಿಯಲ್‌ ಇಂಜಿನಿಯರಿಂಗ್‌ ಮಾದರಿಯನ್ನು ಬಿಜೆಪಿ ಪರೀಕ್ಷೆ ಮಾಡಿದ್ದು, 117 ಕ್ಷೇತ್ರಗಳಲ್ಲಿ ಇದು ಪರಿಣಾಮಕಾರಿಯಾಗಿ ಕೆಲಸ ಮಾಡಲಾರಂಭಿಸಿದೆ. ಇದು ಯಶಸ್ವಿಯಾದರೆ 224 ಕ್ಷೇತ್ರಗಳ ಪೈಕಿ ಕನಿಷ್ಠ 117 ಕ್ಷೇತ್ರಗಳಲ್ಲಿ ಬಿಜೆಪಿ ಗೆಲುವು ದಾಖಲಿಸಲಿದೆ ಎಂದು ಈ ವಿದ್ಯಮಾನದಲ್ಲಿ ಭಾಗಿಯಾದ ಪಕ್ಷದ ಹಿರಿಯೊಬ್ಬರು ತಿಳಿಸಿದ್ದಾಗಿ HT ಕನ್ನಡದ ಮಾತೃಸಂಸ್ಥೆ ಹಿಂದುಸ್ತಾನ್‌ ಟೈಮ್ಸ್‌ ವರದಿ ಮಾಡಿದೆ.

ಹೆಚ್ಚಿನ ಜಾತಿಗಳನ್ನು ಜಾತಿ ಆಧಾರಿತ ಮೀಸಲಾತಿಯ ವ್ಯಾಪ್ತಿಗೆ ತರುವ ನಿರ್ಧಾರ ಮತ್ತು ವಿವಿಧ ಜಾತಿಗಳಿಗೆ ಕೋಟಾಗಳನ್ನು ಹೆಚ್ಚಿಸುವ ನಿರ್ಧಾರವು ಪಕ್ಷಕ್ಕೆ ಲಾಭವನ್ನು ತರುತ್ತದೆ. ಮತದಾರರ ಪಟ್ಟಿಯಲ್ಲಿ ಎಸ್‌ಸಿ ಮತ್ತು ಎಸ್‌ಟಿ ಮತದಾರರ ಪಾಲು ಶೇಕಡ 24.5 ಇದೆ. ಒಬಿಸಿ, ಲಿಂಗಾಯತ, ಒಕ್ಕಲಿಗರ ಪ್ರಮಾಣ ಶೇಕಡ OBC ಗಳು ಲಿಂಗಾಯತರು ಮತ್ತು ವೊಕ್ಕಲಿಗರು ಕ್ರಮವಾಗಿ 14% ಮತ್ತು 11% ಇದ್ದಾರೆ. ಮುಸ್ಲಿಮರ ಪಾಲು ಶೇಕಡ 16 ಎಂದು ಅವರು ವಿವರಿಸಿದ್ದಾಗಿ ವರದಿ ಹೇಳಿದೆ.

“ಇದಕ್ಕೂ ಮುನ್ನ, ಮೀಸಲಾತಿಯ ಪ್ರಯೋಜನಗಳು ಹೆಚ್ಚು ಬಲವಿರುವ ಜಾತಿಗಳಿಗೆ ಸೀಮಿತವಾಗಿತ್ತು, ಸಣ್ಣ ಗುಂಪುಗಳು ಇದರಿಂದ ವಂಚಿತವಾಗಿದ್ದವು. ಬಿಹಾರದಂತಹ ರಾಜ್ಯಗಳಲ್ಲಿ ಸರ್ಕಾರಗಳು ಈ ಉಪ-ಗುಂಪುಗಳಾದ ಮಹಾ ದಲಿತರು, ಅತಿ ಪಿಚ್ಡಾ (ಅತ್ಯಂತ ಹಿಂದುಳಿದ ವರ್ಗಗಳು) ಗಾಗಿ ಯೋಜನೆಗಳನ್ನು ಜಾರಿಗೆ ತಂದವು.

ಕಳೆದ ವಾರ, ಕರ್ನಾಟಕ ಸರ್ಕಾರವು ಲಿಂಗಾಯತರು ಮತ್ತು ಒಕ್ಕಲಿಗರಿಗೆ ಹೆಚ್ಚುವರಿ 2% (ಪ್ರತಿ) ಮೀಸಲಾತಿಯನ್ನು ಘೋಷಿಸುವ ಮೂಲಕ ಆ ಪ್ರಯತ್ನವನ್ನೂ ನಡೆಸಿತು. ಎರಡು ಜಾತಿಗಳನ್ನು ರಾಜ್ಯದ ಒಬಿಸಿ ಪಟ್ಟಿಯಲ್ಲಿ ಸೇರಿಸಲಾಗಿದೆ.

ಸರ್ಕಾರವು ಮುಸ್ಲಿಮರ ಕೋಟಾ ರದ್ದುಗೊಳಿಸಿದರೆ (ಆರ್ಥಿಕ ದುರ್ಬಲ ವರ್ಗಗಳ 10% ಕೋಟಾದಲ್ಲಿ ಅವರಿಗೆ ಮೀಸಲಾತಿ ಇದೆ ಎಂದು ಹೇಳುತ್ತದೆ). ಇದನ್ನು ಎಸ್‌ಟಿ ಗಳಿಗೆ 3% ರಿಂದ 7% ಕ್ಕೆ ಮತ್ತು ಎಸ್‌ಸಿಗಳಿಗೆ 15% ರಿಂದ 17% ಕ್ಕೆ ಹೆಚ್ಚಿಸಿತು. ಇದು "ದೊಡ್ಡ ಪರಿಣಾಮ" ಉಂಟುಮಾಡಲಿದೆ ಎಂಬ ಅಭಿಪ್ರಾಯವನ್ನು ಸೋಷಿಯಲ್‌ ಇಂಜಿನಿಯರಿಂಗ್‌ ಮಾದರಿಯಲ್ಲಿ ಕೆಲಸ ಮಾಡಿದ ನಾಯಕರು ಹೇಳಿದ್ದಾರೆ.

ಸೋಷಿಯಲ್ ಇಂಜಿನಿಯರಿಂಗ್ ಸೂತ್ರವು, ಬಿಜೆಪಿಗೆ ರಾಜ್ಯದಲ್ಲಿ 16% ಮುಸ್ಲಿಂ ಮತಗಳನ್ನು ಎಣಿಸುವ ಕಾಂಗ್ರೆಸ್‌ ವಿರುದ್ಧ ಮೇಲುಗೈ ನೀಡಲಿದೆ ಎಂದು ಈ ವ್ಯಕ್ತಿ ಹೇಳಿದರು.

“ಕಾಂಗ್ರೆಸ್, ಅಧಿಕಾರದಲ್ಲಿದ್ದಾಗ, ಅಸ್ತಿತ್ವದಲ್ಲಿರುವ ಪಟ್ಟಿಗೆ ಹೊಸ ಜಾತಿಗಳನ್ನು ಸೇರಿಸಲಿಲ್ಲ ಅಥವಾ ಒಟ್ಟಾರೆ ಶೇಕಡಾವಾರು ಮೀಸಲಾತಿ ಹೆಚ್ಚಿಸಲಿಲ್ಲ ... ಆದರೆ, ಅಸಾಂವಿಧಾನಿಕ ರೀತಿಯಲ್ಲಿ ಅವರು ಮುಸ್ಲಿಮರಿಗೆ 4% ಮೀಸಲಾತಿ ಮೀಸಲಿಟ್ಟರು” ಎಂದು ಅವರು ವಿವರಿಸಿದ್ದಾರೆ.

ಅದೇ ರೀತಿ, "ಮಾಜಿ ಸಿಎಂ ಮತ್ತು ಹಾಲಿ ಸಿಎಂ ಇಬ್ಬರೂ ಸೇರಿ ದೊಡ್ಡ ಜನಾದೇಶದೊಂದಿಗೆ ಪಕ್ಷದ ಗೆಲುವನ್ನು ಖಚಿತಪಡಿಸುತ್ತಾರೆ. ಪ್ರಧಾನಿ ನರೇಂದ್ರ ಮೋದಿಯವರ ಆಡಳಿತ ಮಾದರಿಯಲ್ಲಿ ಜನರು ಇಟ್ಟಿರುವ ನಂಬಿಕೆಯೇ ಪಕ್ಷದ ಗೆಲುವಿಗೆ ದೊಡ್ಡ ಶಕ್ತಿಯಾಗಿದೆ. ಆದ್ದರಿಂದ ನಾಯಕತ್ವದ ವಿಷಯದಲ್ಲಿ ಪಕ್ಷವು ಸವಾಲು ಎದುರಿಸುವ ಪ್ರಶ್ನೆಯೇ ಇಲ್ಲ" ಎಂದು ಅವರು ವಿಶ್ವಾಸ ವಕ್ತಪಡಿಸಿದ್ದಾಗಿ ವರದಿ ಹೇಳಿದೆ.

BJP banks on Modi hava: ಕರ್ನಾಟಕದಲ್ಲಿ ಚುನಾವಣೆ ಘೋಷಣೆ ಆಗಿದೆ. ಆಡಳಿತ ಚುಕ್ಕಾಣಿ ಉಳಿಸಿಕೊಳ್ಳುವುದಕ್ಕೆ ಆಡಳಿತಾರೂಢ ಬಿಜೆಪಿ ಈ ಸಲ ಯಾವುದನ್ನು ನೆಚ್ಚಿಕೊ‍ಳ್ಳಲಿದೆ? ಮೋದಿ ಹವಾ, ಕೇಂದ್ರ ಮತ್ತು ರಾಜ್ಯ ಸರ್ಕಾರದ ಅಭಿವೃದ‍್ಧಿ ಕಾರ್ಯಕ್ರಮಗಳು, ಮಹತ್ವಾಕಾಂಕ್ಷಿ ಯೋಜನೆಗಳು? ಇಲ್ಲಿದೆ ಒಂದು ಕಿರುನೋಟ.

JD(S) X- factor in Karnataka: ʻಮುಂದಿನ ಮುಖ್ಯಮಂತ್ರಿ  ನಾನೇʼ - ಎಚ್‌.ಡಿ.ಕುಮಾರಸ್ವಾಮಿ; ಈ ಕಾನ್ಫಿಡೆನ್ಸ್‌ ಮತ್ತು ರಾಜಕೀಯ ಲೆಕ್ಕ

ಕರ್ನಾಟಕ ವಿಧಾನಸಭೆ ಚುನಾವಣೆ ಘೋಷಣೆ ಆಗಿದೆ. ಆದರೆ ವರ್ಷಕ್ಕೂ ಮೊದಲೇ ಅಂದರೆ ಚುನಾವಣಾ ವರ್ಷದಲ್ಲಿ ರಾಜ್ಯದ ಉದ್ದಗಲಕ್ಕೂ ಪ್ರವಾಸ ಮಾಡಿದ್ದ ಮಾಜಿ ಮುಖ್ಯಮಂತ್ರಿ ಎಚ್‌.ಡಿ.ಕುಮಾರಸ್ವಾಮಿ ಅವಕಾಶ ಸಿಕ್ಕಲ್ಲೆಲ್ಲ, ʻಮುಂದಿನ ಮುಖ್ಯಮಂತ್ರಿ ನಾನೇʼ ಎಂಬುದನ್ನು ಒತ್ತಿ ಒತ್ತಿ ಹೇಳುತ್ತ ಬಂದಿದ್ದಾರೆ.

ಅವರ ಮಾತಿನಲ್ಲಿರುವ ಕಾನ್ಫಿಡೆನ್ಸ್‌ ಗಮನಿಸಿ. ಕಳೆದ ಮೂರು ಚುನಾವಣೆಗಳ ಫಲಿತಾಂಶವನ್ನೂ ನೋಡಿ. ಜೆಡಿಎಸ್‌ಗೆ ಸಿಕ್ಕಿದ ಜನಾದೇಶದ ಫಲವೇ ಕುಮಾರಸ್ವಾಮಿಯವರ ಆತ್ಮವಿಶ್ವಾಸಕ್ಕೆ ಬುನಾದಿ ಎಂಬುದನ್ನು ಅಲ್ಲಗಳೆಯುವಂತಿಲ್ಲ.

<h2>ಕಳೆದ ಚುನಾವಣೆಯಲ್ಲಿ ಜೆಡಿಎಸ್‌ ಸಾಧನೆ</h2>ಕಳೆದ ಅಂದರೆ 2018ರ ಚುನಾವಣಾ ಫಲಿತಾಂಶವನ್ನು ಅವಲೋಕಿಸೋಣ.

ರಾಜ್ಯ ವಿಧಾನಸಭೆಯ 224 ಸ್ಥಾನಗಳ ಪೈಕಿ ಬಿಜೆಪಿಗೆ ಗರಿಷ್ಠ 104 ಸ್ಥಾನ ಸಿಕ್ಕರೆ, ಕಾಂಗ್ರೆಸ್‌ ಪಕ್ಷಕ್ಕೆ 80 ಮತ್ತು ಜೆಡಿಎಸ್‌ಗೆ 37. ಅತಂತ್ರ ಜನಾದೇಶ ಬಂದ ಕಾರಣ, ಅತಿದೊಡ್ಡ ಪಕ್ಷವಾದರೂ ಬಿಜೆಪಿಗೆ ಸರ್ಕಾರ ರಚನೆ ಅಸಾಧ್ಯವಾಗಿತ್ತು. ಆರು ದಿನಗಳ ಮಟ್ಟಿಗೆ ಬಿಜೆಪಿ ಸರ್ಕಾರ ಬಿ.ಎಸ್.ಯಡಿಯೂರಪ್ಪ ನೇತೃತ್ವದಲ್ಲಿ ರಚನೆ ಆಗಿತ್ತು. ಬಿಜೆಪಿ ಜತೆಗೆ ಜೆಡಿಎಸ್‌ ಕೈ ಜೋಡಿಸಬಹುದು ಎಂಬ ನಿರೀಕ್ಷೆ ಇತ್ತಾದರೂ, ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡರ ಲೆಕ್ಕಾಚಾರ ಬೇರೆಯೇ ಇತ್ತು.

ಎಚ್‌.ಡಿ.ಕುಮಾರಸ್ವಾಮಿ ನೇತೃತ್ವದಲ್ಲಿ ಕಾಂಗ್ರೆಸ್‌ ಬೆಂಬಲದೊಂದಿಗೆ ಸರ್ಕಾರ ರಚನೆ ಆಯಿತು. ಒಂದು ವರ್ಷ 64 ದಿನ ಸರ್ಕಾರ (23.05. 2018 ರಿಂದ 26.07.2019) ನಡೆಯಿತು. ಕಾಂಗ್ರೆಸ್ ಮತ್ತು ಜೆಡಿಎಸ್‌ನ 15 ಶಾಸಕರು ರಾಜೀನಾಮೆ ನೀಡಿದರು. ಮತ್ತೊಂದು ಮಹತ್ವದ ಉಪಚುನಾವಣೆ ಎದುರಾಯಿತು. ನಂತರ ಪೂರ್ಣ ಬಹುಮತದೊಂದಿಗೆ ಬಿಜೆಪಿ ಸರ್ಕಾರ ರಚನೆ ಆಯಿತು.

ಇದಕ್ಕೂ ಮುನ್ನ ಕುಮಾರಸ್ವಾಮಿ ಸಿಎಂ ಆಗಿದ್ದು 12ನೇ ವಿಧಾನಸಭೆಯ ಅವಧಿಯಲ್ಲಿ ಅಂದರೆ 2006ರ ಫೆ.3ರಿಂದ 2007ರ ಅ.8ರ ತನಕ ಒಟ್ಟು ಒಂದು ವರ್ಷ 253 ದಿನ. 2004ರ ಚುನಾವಣೆಯಲ್ಲಿ ಅತಂತ್ರ ಜನಾದೇಶ ಬಂದಿತ್ತು. ಆಗ ಬಿಜೆಪಿ 79 ಸ್ಥಾನ ಗೆದ್ದು ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿತ್ತು. ಆದರೆ ಸರ್ಕಾರ ರಚನೆ ಸಾಧ್ಯವಿರಲಿಲ್ಲ. ಕಾಂಗ್ರೆಸ್‌ ಪಕ್ಷಕ್ಕೆ 65 ಸ್ಥಾನ ಸಿಕ್ಕರೆ, ಜೆಡಿಎಸ್‌ಗೆ 58 ಸ್ಥಾನ ಸಿಕ್ಕಿತ್ತು. ಇದು ಜೆಡಿಎಸ್‌ನ ಇದುವರೆಗಿನ ಬೆಸ್ಟ್‌ ಸಾಧನೆ. ಬಿಜೆಪಿಯನ್ನು ಅಧಿಕಾರದಿಂದ ದೂರ ಇಡಲು ಕಾಂಗ್ರೆಸ್‌ ಜತೆಗೆ ಜೆಡಿಎಸ್‌ ಕೈ ಜೋಡಿಸಿತು. ಧರಂ ಸಿಂಗ್‌ ಮುಖ್ಯಮಂತ್ರಿಯಾಗಿ ಒಂದು ವರ್ಷ 251 ದಿನ ಆಡಳಿತ ನೀಡಿದರು. ಮೈತ್ರಿಯಲ್ಲಿ ಬಿರುಕು ಕಂಡು ಧರಂ ಸಿಂಗ್‌ ಸರ್ಕಾರ ಪತನವಾಯಿತು. ಕುಮಾರಸ್ವಾಮಿ - ಬಿಎಸ್‌ ಯಡಿಯೂರಪ್ಪ ನಡುವೆ ಮುಖ್ಯಮಂತ್ರಿಗಾದಿಗೆ 20-20 ತಿಂಗಳ ಅವಧಿಯ ಒಪ್ಪಂದ ಏರ್ಪಟ್ಟಿತ್ತು. 20 ತಿಂಗಳಾಗುತ್ತಿದ್ದಂತೆ ಮೈತ್ರಿಯಲ್ಲಿ ಒಡಕು ಮೂಡಿತು. ಬಿಎಸ್‌ವೈ 7 ದಿನದ ಸಿಎಂ ಆಗಿ ಸರ್ಕಾರ ಪತನಗೊಂಡಿತು. ರಾಷ್ಟ್ರಪತಿ ಆಡಳಿತ ಜಾರಿಗೆ ಬಂತು.

ಈ ಎರಡು ಸಂದರ್ಭ ಬಿಟ್ಟರೆ ಜೆಡಿಎಸ್‌ ಎಂದಿಗೂ ನಿರ್ಣಾಯಕ ಪಾತ್ರವಹಿಸಿಲ್ಲ.

<h2>ದೇವೇಗೌಡರು ಮುಖ್ಯಮಂತ್ರಿ ಆಗಿದ್ದ ಕಾಲ ಒಂದಿತ್ತು..</h2>ಆಗಿನ್ನೂ ಜೆಡಿಎಸ್‌ ಮತ್ತು ಜೆಡಿಯು ಇರಲಿಲ್ಲ; ಜೆಡಿ ಅರ್ಥಾತ್‌ ಜನತಾ ದಳ ಅಷ್ಟೇ ಇತ್ತು. 1994ರ ಕಾಲಘಟ್ಟ ಅದು. ಜನತಾ ದಳಕ್ಕೆ 115. ಕಾಂಗ್ರೆಸ್‌ಗೆ 34, ಬಿಜೆಪಿಗೆ 40 ಸೀಟುಗಳು ಲಭ್ಯವಾಗಿದ್ದವು. ದೇವೇಗೌಡರು ಮುಖ್ಯಮಂತ್ರಿ ಆಗಿದ್ದರು. ಅದು 10ನೇ ವಿಧಾನಸಭೆ ಆಗಿತ್ತು. ಒಂದು ವರ್ಷ 172 ದಿನ ದೇವೇಗೌಡರು ಮುಖ್ಯಮಂತ್ರಿ ಆಗಿದ್ದರೆ, ಉಳಿದ ಅವಧಿ ಜೆ.ಎಚ್.ಪಟೇಲರ ನೇತೃತ್ವದಲ್ಲಿ ನಡೆಯಿತು.

ರಾಜ್ಯದ 11ನೇ ವಿಧಾನಸಭೆಗೆ 1999ರಲ್ಲಿ ನಡೆದ ಚುನಾವಣೆಯಲ್ಲಿ ಜೆಡಿಯು ಮತ್ತು ಜೆಡಿಎಸ್‌ ಕಾಣಿಸಿಕೊಂಡವು. ಜೆಡಿಯು 18, ಜೆಡಿಎಸ್‌ 10 ಸ್ಥಾನಗಳನ್ನು ಗೆದ್ದುಕೊಂಡಿದ್ದವು. 2004ರಲ್ಲಿ ಜೆಡಿಎಸ್‌ ಇದುವರೆಗಿನ ಗರಿಷ್ಠ ಸಾಧನೆ 58 ಸ್ಥಾನ ಗೆದ್ದರೆ, ಜೆಡಿಯು 5 ಸ್ಥಾನಕ್ಕೆ ಇಳಿಯಿತು. ಇದಾಗಿ ಜೆಡಿಯು ಕಣ್ಮರೆ ಆಗಿದೆ. ಜೆಡಿಎಸ್‌ ತನ್ನ ಅಸ್ತಿತ್ವವನ್ನು 30-40ರ ಆಸುಪಾಸಿನಲ್ಲಿ ಮುಂದುವರಿಸಿದೆ.

<h2>ಇಬ್ಬರ ಜಗಳದಲ್ಲಿ ಮೂರನೇಯವನಿಗೆ ಲಾಭ</h2>ಪ್ರಸ್ತುತ ರಾಜಕೀಯ ವಿದ್ಯಮಾನಗಳನ್ನು ಗಮನಿಸಿದರೆ ಕಾಂಗ್ರೆಸ್‌ನಲ್ಲಿ ಬಣಗಳಿರುವುದು ಸುಸ್ಪಷ್ಟ. ಸಿದ್ದರಾಮಯ್ಯ ಮತ್ತು ಡಿಕೆ ಶಿವಕುಮಾರ್‌ ನಡುವಿನ ಒಳಜಗಳ, ಶಕ್ತಿ ಪ್ರದರ್ಶನಗಳು ಆಗಾಗ ಕಾಣಿಸುತ್ತಿರುವುದರಿಂದ ಅದರ ಲಾಭ ಪಡೆಯಬೇಕು ಎಂಬುದು ಕುಮಾರಸ್ವಾಮಿ ಲೆಕ್ಕಾಚಾರ.

ಇದೇ ರೀತಿ ಬಿಜೆಪಿಯಲ್ಲೂ ಅಷ್ಟೆ, ರಾಜ್ಯದಲ್ಲಿ ಅದು ಮೊದಲ ಬಾರಿ ಅಧಿಕಾರ ಹಿಡಿದ ವಿಧಾನವೇ ಸದಾ ಟೀಕೆಗೆ ಒಳಗಾಗಿರುವಂಥದ್ದು. ಬಿ ಎಸ್‌ ಯಡಿಯೂರಪ್ಪ ಮುಖ್ಯಮಂತ್ರಿ ಆಗಿದ್ದಾಗ ಗೋಚರಿಸದೇ ಇದ್ದ ಮೂಲ ಬಿಜೆಪಿಗರು ಮತ್ತು ವಲಸಿಗರ ತಿಕ್ಕಾಟ ಪದೇಪದೆ ಗೋಚರಿಸಿದೆ. ಸಚಿವ ಸಂಪುಟದಲ್ಲಿದ್ದ ಸಚಿವರ ಪೈಕಿ ಅರ್ಧಕ್ಕಿಂತ ಹೆಚ್ಚು ಜನ ಸರ್ಕಾರ ರಚನೆಗಾಗಿ ಪಕ್ಷಾಂತರ ಮಾಡಿ ಗೆದ್ದುಬಂದವರು! ಸಹಜವಾಗಿಯೇ ಅಸಮಾಧಾನ ಹೊಗೆಯಾಡುತ್ತಿರುವ ಕಾರಣ, ಅದರ ಲಾಭವೂ ಸಿಗಬಹುದು ಎಂಬ ವಿಶ್ವಾಸದಲ್ಲಿದ್ದಾರೆ ಕುಮಾರಸ್ವಾಮಿ.

<h2>ಹಳೇ ಮೈಸೂರು ಭಾಗದಿಂದ ಹೊರಕ್ಕೆ ದೃಷ್ಟಿ</h2>ಹಳೇಮೈಸೂರು ಭಾಗದಲ್ಲಿ ಜೆಡಿಎಸ್‌ ಬೇರು ಬಹಳ ಗಟ್ಟಿಯಾಗಿದೆ. ಇನ್ನು ಉಳಿದ ಜಿಲ್ಲೆಗಳಿಗೆ ವಿಶೇಷವಾಗಿ ಕಲ್ಯಾಣ ಕರ್ನಾಟಕದ ಕಡೆಗೆ ಗಮನಹರಿಸಬೇಕು ಎಂಬ ರಣತಂತ್ರದೊಂದಿಗೆ ಕುಮಾರಸ್ವಾಮಿ ಕಳೆದ ಒಂದು ವರ್ಷಕ್ಕೂ ಹೆಚ್ಚು ಸಮಯದಿಂದ ಪಕ್ಷ ಸಂಘಟನೆಗೆ ಕೆಲಸ ಮಾಡಿದ್ದಾರೆ.

ಪಂಚ ರತ್ನ ಯೋಜನೆ ಘೋಷಿಸಿದ್ದಾರೆ. ಹಂತ ಹಂತವಾಗಿ ರಾಜ್ಯದ ಬಹುಭಾಗಗಳಲ್ಲಿ ಪಂಚರತ್ನ ರಥಯಾತ್ರೆ ನಡೆಸಿದ ಅವರು, ಹೋದಲ್ಲೆಲ್ಲ ʻಮುಂದಿನ ಮುಖ್ಯಮಂತ್ರಿ ನಾನೇʼ ಎಂಬ ವಿಶ್ವಾಸದ ನುಡಿಗಳನ್ನು ಆಡುತ್ತ ಮತದಾರರಲ್ಲಿ ಭರವಸೆ ಹುಟ್ಟಿಸುವ ಪ್ರಯತ್ನ ಮಾಡಿದ್ದಾರೆ.

ಬಿಜೆಪಿಗೆ ಪರ್ಯಾಯ ಪಕ್ಷದಂತಿದ್ದ ಕಾಂಗ್ರೆಸ್‌ ಬಲಗುಂದುತ್ತಿದೆ. ರಾಷ್ಟ್ರಮಟ್ಟದಲ್ಲಿ ಅದರ ಸಾಧನೆಯನ್ನು ಮನಗಂಡಿರುವ ಜೆಡಿಎಸ್‌ ನಾಯಕರು, ರಾಷ್ಟ್ರ ರಾಜಕಾರಣಕ್ಕೆ ನೆರವಾಗುವಂತೆ ಪ್ರಾದೇಶಿಕ ಪಕ್ಷಗಳ ನಾಯಕರ ಜತೆಗಿನ ಮೈತ್ರಿ ಬಲಪಡಿಸುವ ಕಡೆಗೆ ಗಮನಹರಿಸಿದ್ದಾರೆ. ಇವೆಲ್ಲವೂ ಈ ಸಲದ ಚುನಾವಣೆಯಲ್ಲಿ ಯಾವ ಫಲವನ್ನು ನೀಡುವುದು ಎಂಬ ಕುತೂಹಲವನ್ನು ಸೃಷ್ಟಿಸಿದ್ದಾರೆ.

JD(S) X- factor in Karnataka: ಮಾಜಿ ಸಿಎಂ ಎಚ್‌ಡಿ ಕುಮಾರಸ್ವಾಮಿ ಅವರ ಮಾತಿನಲ್ಲಿರುವ ಕಾನ್ಫಿಡೆನ್ಸ್‌ ಗಮನಿಸಿ. ಕಳೆದ ಮೂರು ಚುನಾವಣೆಗಳ ಫಲಿತಾಂಶವನ್ನೂ ನೋಡಿ. ಜೆಡಿಎಸ್‌ಗೆ ಸಿಕ್ಕಿದ ಜನಾದೇಶದ ಫಲವೇ ಕುಮಾರಸ್ವಾಮಿಯವರ ಆತ್ಮವಿಶ್ವಾಸಕ್ಕೆ ಬುನಾದಿ ಎಂಬುದನ್ನು ಅಲ್ಲಗಳೆಯುವಂತಿಲ್ಲ. ಇಲ್ಲಿದೆ ಆ ರಾಜಕೀಯ ಲೆಕ್ಕಾಚಾರ.

Ram Navami 2023 Wishes: ಶ್ರೀರಾಮ ನವಮಿಯ ಶುಭಾಶಯಗಳು, ವಾಟ್ಸ್‌ಆಪ್‌ ಸ್ಟೇಟಸ್‌, ಕೋಟ್ಸ್‌ ಇತ್ಯಾದಿ

Happy Ram Navami 2023 best wishes Wishes Images Quotes Status Messages and Photos to share with family and friends

Ram Navami 2023 Wishes: ಇಂದು ಶ್ರೀರಾಮ ನವಮಿ. ಪ್ರೀತಪಾತ್ರರು ಮತ್ತು ಸ್ನೇಹಿತರು, ಹಿತೈಷಿಗಳೊಂದಿಗೆ ಶೇರ್‌ ಮಾಡಲು ವಿಶಸ್‌ ಮತ್ತು ವಾಟ್ಸ್‌ಆಪ್‌ ಸ್ಟೇಟಸ್‌ಗಾಗಿ ಇಮೇಜ್‌, ಕೋಟ್ಸ್‌ ಅನ್ನು ಹುಡುಕುತ್ತಿರುವಿರಾ? ಇಲ್ಲಿವೆ ಕೆಲವು, ಡೌನ್‌ಲೋಡ್‌ ಮಾಡಿ ಶೇರ್‌ ಮಾಡಿ.

Modi vs Gandhi: ಕರ್ನಾಟಕ ಚುನಾವಣೆ 2023; ಮೋದಿ ಹವಾ vs ಗಾಂಧಿ ಹವಾ- ಯಾವುದಿರಬಹುದು ಮತದಾರರ ಮನತಣಿಸುವ ಹವಾ...

ಕರ್ನಾಟಕ ವಿಧಾನ ಸಭೆಗೆ ಮತ್ತೊಂದಾವೃತ್ತಿ ಚುನಾವಣೆ ಎದುರಾಗಿದೆ. ಮುಂದಿನ ವರ್ಷ ಲೋಕಸಭೆ ಚುನಾವಣೆಯೂ ಇದೆ. ಬಿಜೆಪಿ ಪಾಲಿಗೆ ಕರ್ನಾಟಕ ಇನ್ನೂ ಗುಜರಾತ್‌ ಮಾದರಿಯಲ್ಲಿ ಗಟ್ಟಿ ನೆಲೆಯಾಗಿ ಮಾರ್ಪಾಡಾಗಿಲ್ಲ. ಇಲ್ಲಿನ ರಾಜಕೀಯ ಲೆಕ್ಕಾಚಾರಗಳೇ ಬೇರೆ. ಗುಜರಾತಿನಂತೆ ಕರ್ನಾಟಕವು ಕಾಂಗ್ರೆಸ್‌ ಮತ್ತು ಬಿಜೆಪಿ ಎರಡೇ ಪಕ್ಷದ ಆಡುಂಬೊಲವಲ್ಲ. ಇಲ್ಲಿ ಮೂರನೇ ಪಕ್ಷಕ್ಕೂ ಅಂದರೆ ಜೆಡಿಎಸ್‌ಗೂ ರಾಜಕೀಯದ ಆಟ ಆಡಲು ಅವಕಾಶ ನೀಡಿದ್ದಾರೆ ಕನ್ನಡಿಗರು. ಎರಡು ರಾಷ್ಟ್ರೀಯ ಪಕ್ಷಗಳ ನಡುವೆ, ಪ್ರಾದೇಶಿಕ ಪಕ್ಷವಾಗಿ ಜೆಡಿಎಸ್‌ ಇಲ್ಲಿ ಪ್ರಭಾವಿ.

ರಾಜ್ಯ ರಾಜಕೀಯ ಚಟುವಟಿಕೆಗಳನ್ನು ಗಮನಿಸುವುದಾದರೆ, ಕಳೆದ ಒಂದು ವರ್ಷದ ಅವಧಿ ಚುನಾವಣಾ ವರ್ಷವಾಗಿಯೇ ಪರಿಗಣಿಸಲ್ಪಟ್ಟಿತ್ತು. ಕಾಂಗ್ರೆಸ್‌, ಬಿಜೆಪಿ, ಜೆಡಿಎಸ್‌ಗಳ ರಾಜಕೀಯ ಚಟುವಟಿಕೆಗಳೂ ಅದೇ ರೀತಿ ಇದ್ದವು. ಈ ಪೈಕಿ ಮೂರೂ ಪಕ್ಷಗಳ ಯಾತ್ರಾ ಪರ್ವ ಗಮನಾರ್ಹ.

ಕಾಂಗ್ರೆಸ್‌ ಪಕ್ಷದ ಭಾರತ್‌ ಜೋಡೋ ಯಾತ್ರೆ ಅಥವಾ ಭಾರತ್‌ ಐಕ್ಯತಾ ಯಾತ್ರೆ ಕರ್ನಾಟಕದಲ್ಲಿ ಭಾರಿ ಸದ್ದುಮಾಡಿತ್ತು. ರಾಹುಲ್‌ ಗಾಂಧಿ ನೇತೃತ್ವದಲ್ಲಿ ಕನ್ಯಾಕುಮಾರಿಯಿಂದ ಶುರುವಾದ ಯಾತ್ರೆ ಕಾಶ್ಮೀರದ ತನಕ ಸಾಗುವ ದಾರಿ ಮಧ್ಯೆ ಕರ್ನಾಟಕದಲ್ಲಿ 24 ದಿನ 500 ಕಿ.ಮೀ. ದೂರ ಕ್ರಮಿಸಿತ್ತು. ಕಾಂಗ್ರೆಸ್‌ ಪಕ್ಷದ ಮಟ್ಟಿಗೆ ಆಯಕಟ್ಟಿನ ಜಿಲ್ಲೆಗಳು ಎನಿಸಿದ ಭಾಗಗಳಲ್ಲಿ ರಾಹುಲ್‌ ಗಾಂಧಿ ನೇತೃತ್ವದಲ್ಲಿ ಪಾದಯಾತ್ರೆ ಸಂಚರಿಸಿತ್ತು.

ದೇಶದ ಬಹುತೇಕ ರಾಜ್ಯಗಳಲ್ಲಿ ರಾಜಕೀಯ ಅಧಿಕಾರ ಕಳೆದುಕೊಂಡಿರುವ ಕಾಂಗ್ರೆಸ್‌ ಈಗ ಕರ್ನಾಟಕದಲ್ಲಿ ಅಧಿಕಾರ ಸ್ಥಾಪಿಸುವ ಭರವಸೆಯಲ್ಲಿದೆ. ಇದಕ್ಕೆ ರಾಹುಲ್‌ ಗಾಂಧಿಯವರ ಭಾರತ್‌ ಐಕ್ಯತಾ ಯಾತ್ರೆ ಬಲ ತುಂಬಿದೆ ಎಂಬ ವಿಶ್ವಾಸದಲ್ಲಿದ್ದಾರೆ ಕಾಂಗ್ರೆಸ್‌ ನಾಯಕರು ಮತ್ತು ಕಾರ್ಯಕರ್ತರು.

ಕಾಂಗ್ರೆಸ್‌ ನಾಯಕರು ಫೋಕಸ್‌ ಮಾಡಿದ ಅಂಶಗಳಿವು

<ol><li>40% ಸರ್ಕಾರ - ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ನೇತೃತ್ವದ ಸರ್ಕಾರ ಕಮಿಷನ್‌ ಸರ್ಕಾರ ಎಂದು ಟೀಕಿಸಿರುವ ಕಾಂಗ್ರೆಸ್‌ ನಾಯಕರು, ಭ್ರಷ್ಟಾಚಾರವನ್ನು ಹೈಲೈಟ್‌ ಮಾಡಲು ಪ್ರಯತ್ನಿಸಿದ್ದಾರೆ. </li><li>ಲಂಚಗುಳಿತನ, ಭ್ರಷ್ಟಾಚಾರ - ಮಾಡಾಳ್‌ ಪ್ರಕರಣ ಸೇರಿ ಇನ್ನಿತರೆ ವಿಚಾರಗಳನ್ನು ಗಮನಿಸಿದ್ದಾರೆ. </li><li>ಲೈಂಗಿಕ ಹಗರಣ ಸೇರಿ, ಕಳಪೆ ಕಾಮಗಾರಿಗಳ ವಿಚಾರ, ವರ್ಗಾವಣೆಯಲ್ಲಿ ಆಗಿರುವ ಲೋಪಗಳನ್ನು ಎತ್ತಿ ತೋರಿಸುತ್ತಿದ್ದಾರೆ. </li><li>ಪಕ್ಷಾಂತರಿಗಳಿಗೆ ಪಾಠ ಕಲಿಸಿ- ಕಾಂಗ್ರೆಸ್‌ ಪಕ್ಷ ಬಿಟ್ಟು ಬಿಜೆಪಿ ಸೇರಿದವರಿಗೆ ಪಾಠ ಕಲಿಸಬೇಕು ಎಂದೂ ಮತದಾರರಲ್ಲಿ ಕೇಳಿದ್ದೂ ಆಗಿದೆ.</li><li>ಕಾಂಗ್ರೆಸ್‌ ಗ್ಯಾರೆಂಟಿ ಕಾರ್ಡ್‌ ವಿತರಿಸಿದ್ದು, ವಿದ್ಯುತ್‌ ಉಚಿತ, ಯುವನಿಧಿ ಇತ್ಯಾದಿ ಘೋಷಿಸಿದೆ.</li></ol><a class="manualbacklink" target="_blank" href="https://kannada.hindustantimes.com/karnataka/jds-pancharatna-yatre-explained-what-is-the-pancharatna-yojana-of-jds-when-and-where-does-the-pancharatna-rath-yatra-start-181666756960002.html" rel="dofollow">ಜೆಡಿಎಸ್‌ನ ಪಂಚರತ್ನ ರಥಯಾತ್ರೆ</a>

ಹೆಚ್ಚಿನ ಸೀಟು ಕಾಂಗ್ರೆಸ್‌ ಪಕ್ಷಕ್ಕಾದರೂ ಬರಲಿ, ಬಿಜೆಪಿಗಾದರೂ ಬರಲಿ, ಕನಿಷ್ಠ 40 ಸೀಟು ಗೆದ್ದರೆ ಮುಖ್ಯಮಂತ್ರಿ ಆಗಬಹುದು ಎಂಬ ಕನಸು ಕಾಣುತ್ತಿದ್ದಾರೆ ಕುಮಾರಸ್ವಾಮಿ. ಅತಂತ್ರ ಫಲಿತಾಂಶವನ್ನು ಮೊದಲೇ ಊಹಿಸಿಕೊಂಡಿರುವ ಕುಮಾರಸ್ವಾಮಿ, ಈ ಸಲ ಮುಖ್ಯಮಂತ್ರಿ ನಾನೇ ಎಂದೂ ಹೇಳಿಕೊಂಡ ಉದಾಹರಣೆಗಳಿವೆ.

ಹಳೇಮೈಸೂರು, ಬೆಂಗಳೂರು ಗ್ರಾಮಾಂತರ, ರಾಮನಗರ ಕಡೆಗೆ ಹೆಚ್ಚಿನ ಗಮನಕೊಟ್ಟಿರುವ ಜೆಡಿಎಸ್‌ ನಾಯಕರು, ಪಂಚರತ್ನ ರಥ ಯಾತ್ರೆಯನ್ನು ಆಯೋಜಿಸಿ ಜನಮನ ಗೆಲ್ಲುವ ಪ್ರಯತ್ನ ಮಾಡಿದ್ದಾರೆ. ಜೆಡಿಎಸ್‌ ನಾಯಕರು ಫೋಕಸ್‌ ಮಾಡಿದ ಪಾಯಿಂಟ್ಸ್‌ ಇವು

<ol><li>ಎರಡು ರಾಜಕೀಯ ಪಕ್ಷಗಳ ನಡುವೆ, ಕರ್ನಾಟಕದ ಹಿತ ಕಾಪಾಡಬೇಕಾದರೆ ಪ್ರಾದೇಶಿಕ ಪಕ್ಷವೇ ಆಗಬೇಕು. ನವೆಂಬರ್‌ ಒಂದರಂದು ಕನ್ನಡ ಬಾವುಟ ಮನೆ ಮನೆಯಲ್ಲಿ ಹಾರಾಡಿಸಬೇಕು ಎಂದು ಕನ್ನಡ ಅಸ್ಮಿತೆ ಜಾಗೃತಿಗೊಳಿಸುವ ಕೆಲಸ ಮಾಡಿದ್ದು. </li><li>ಪಂಚರತ್ನ ಯೋಜನೆಗಳನ್ನು 1. ಶಿಕ್ಷಣವೇ ಆಧುನಿಕ ಶಕ್ತಿ, 2. ಆರೋಗ್ಯವೇ ಸಂಪತ್ತು, 3. ರೈತ ಚೈತನ್ಯ, 4. ಯುವನವ ಮಾರ್ಗ ಮತ್ತು ಮಹಿಳಾ ಸಬಲೀಕರಣ, 5. ವಸತಿಯ ಆಸರೆ ಘೋಷಣೆ ಮಾಡಿದೆ. ಇದರ ಪ್ರಚಾರಕ್ಕೆ ಎರಡು ಹಂತಗಳ ಪಂಚರತ್ನ ರಥಯಾತ್ರೆ. </li><li>ಕಮಿಷನ್‌ ಸರ್ಕಾರ ಎಂದು ಬೊಮ್ಮಾಯಿ ಸರ್ಕಾರ ಟಾರ್ಗೆಟ್‌ ಮಾಡಿ ಪ್ರಚಾರ. </li><li>ಕಾರ್ಯಕರ್ತರ ಜತೆಗೆ ನೇರ ಸಂಪರ್ಕಕ್ಕೆ ಕುಮಾರಸ್ವಾಮಿ ಅವರಿಂದ ಫೋನ್‌‌ ಇನ್‌ ಕಾರ್ಯಕ್ರಮ, ಪಂಚರತ್ನ ಯಾತ್ರೆಯ ಕೊನೆಯಲ್ಲಿ ದೇವೇಗೌಡರ ಉಪಸ್ಥಿತಿ. </li></ol>ಬಿಜೆಪಿ <a class="manualbacklink" target="_blank" href="https://kannada.hindustantimes.com/karnataka/bommai-bsy-tour-from-today-bommai-bsy-karnataka-tour-to-strengthen-the-organization-begins-today-first-convention-at-raichur-181665450009161.html" rel="dofollow">ಜನಸಂಕಲ್ಪ</a>, <a class="manualbacklink" target="_blank" href="https://kannada.hindustantimes.com/karnataka/vijay-sankapla-yatre-bjp-set-to-launch-mega-yatra-cover-8-000-km-as-campaign-heat-picks-up-in-karnataka-181677584318970.html" rel="dofollow">ವಿಜಯ ಸಂಕಲ್ಪ</a> ಯಾತ್ರೆ

ಆಡಳಿತಾರೂಢ ಬಿಜೆಪಿ, ಅಧಿಕಾರ ಉಳಿಸಿಕೊಳ್ಳಬೇಕು ಎಂದು ಮೊದಲ ಸುತ್ತಿನಲ್ಲಿ ಜನಸಂಕಲ್ಪ ಯಾತ್ರೆ ನಡೆಸಿತು. ಅದಾಗಿ ಪ್ರಗತಿ ರಥಗಳನ್ನು ನಾಡಿನ ಎಲ್ಲ ಕ್ಷೇತ್ರಗಳಿಗೂ ಕಳುಹಿಸಿತು. ಬಳಿಕ ವಿಜಯ ಸಂಕಲ್ಪ ಯಾತ್ರೆ ನಡೆಸಿದೆ.

ಪ್ರಧಾನ ಮಂತ್ರಿ ನರೇಂದ್ರ ಮೋದಿ, ಅಮಿತ್‌ ಷಾ, ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಜೆ.ಪಿ.ನಡ್ಡಾ ಆದಿಯಾಗಿ ಪ್ರಮುಖರೆಲ್ಲ ಕರ್ನಾಟಕಕ್ಕೆ ಪದೇಪದೆ ಬಂದು ಹೋಗಿದ್ದಾರೆ. ಚುನಾವಣೆ ಘೋಷಣೆ ಆಗಿರುವ ಕಾರಣ ಇನ್ನು ಪ್ರಚಾರಕ್ಕೆ ವೇಗ, ತೀವ್ರತೆ ಸಿಗಲಿದೆ.

ಬಿಜೆಪಿ ಫೋಕಸ್‌ ಮಾಡಿದ ಅಂಶಗಳು

<ol><li>ಕಾಂಗ್ರೆಸ್‌ ಮತ್ತು ಜೆಡಿಎಸ್‌ ಮಾಡಿದ ಕಮಿಷನ್‌ ಆರೋಪಗಳನ್ನು ಜಾಣತನದಿಂದ ನಿರಾಕರಿಸುತ್ತ ಬಂದ ಬಸವರಾಜ ಬೊಮ್ಮಾಯಿ ಸರ್ಕಾರ, ವಿವಿಧ ಕಾಮಗಾರಿಗಳನ್ನು ಕೈಗೆತ್ತಿಕೊಂಡು, ಯೋಜನೆಗಳನ್ನು ಪ್ರಕಟಿಸುತ್ತ ಸಕ್ರಿಯವಾಗಿ ಮುನ್ನಡೆದಿತ್ತು. </li><li>ಮಾಡಾಳ್‌ ಪ್ರಕರಣದಲ್ಲಿ ಇರಿಸುಮುರಿಸು ಎದುರಿಸಿದರೂ, ತಪ್ಪಿತಸ್ಥರು ಯಾರೇ ಇದ್ದರೂ ಅವರ ವಿರುದ್ಧ ಕಾನೂನು ಕ್ರಮ ಜರುಗಲಿದೆ ಎಂದು ಮುಖ್ಯಮಂತ್ರಿ ಬೊಮ್ಮಾಯಿ ಹೇಳಿದರು. ಇನ್ನೊಂದೆಡೆ, ಬಿಜೆಪಿಯ ಆಂತರಿಕ ವಲಯದಲ್ಲಿ ಮಾಡಾಳ್‌ ಹೊರಗಿನಿಂದ ಅಂದರೆ ಕಾಂಗ್ರೆಸ್‌ನಿಂದ ಬಂದವರು ಎಂಬ ಮಾತು ತಳಮಟ್ಟದಲ್ಲಿ ಗಮನಸೆಳದಿತ್ತು. </li><li>ಪಂಚಮಸಾಲಿ ಮೀಸಲಾತಿ ಹೋರಾಟ ತೀವ್ರಗೊಂಡಿತ್ತಾದರೂ, ಚುನಾವಣೆ ಘೋಷಣೆಗೆ ಮುನ್ನ ಅದನ್ನೂ ಮುಖ್ಯಮಂತ್ರಿ ಬೊಮ್ಮಾಯಿ ತಣಿಸಿದರು. ಮೀಸಲಾತಿ ವಿಚಾರದಲ್ಲಿ ಸರ್ಕಾರ ತೆಗೆದುಕೊಂಡ ಕ್ರಮ ಸಂಚಲನ ಮೂಡಿಸಿದ್ದು, ಶಿವಮೊಗ್ಗದಲ್ಲಿ, ಬಿಎಸ್‌ವೈ ಮನೆ ಮೇಲೆ ಕಲ್ಲುತೂರಾಟ ಮತ್ತು ಪ್ರತಿಭಟನೆಗೆ ಕಾರಣವಾಗಿದೆ. ಮೀಸಲಾತಿಗೆ ಸರ್ಕಾರ ತೆಗೆದುಕೊಂಡ ಕ್ರಮವನ್ನು ಮಾಸ್ಟರ್‌ ಸ್ಟ್ರೋಕ್‌ ಎಂದು ಬಣ್ಣಿಸಲಾಗುತ್ತಿದ್ದು, ಅದರ ಫಲಿತಾಂಶ ಏನಾಗಬಹುದು ಎಂಬ ಕುತೂಹಲ ಇದ್ದೇ ಇದೆ. </li><li>ರಾಜ್ಯ ಸರ್ಕಾರದ ಅಭಿವೃದ್ಧಿ ಯೋಜನೆಗಳು, ಕೇಂದ್ರ ಸರ್ಕಾರದ ಮಹತ್ವಾಕಾಂಕ್ಷೆಯ ಯೋಜನೆಗಳು ಮುಂತಾದವುಗಳನ್ನು ಮುಂದಿಟ್ಟುಕೊಂಡು ಮತದಾರರಿಗೆ ಅವುಗಳನ್ನು ಮನದಟ್ಟು ಮಾಡುವ ಕ್ರಮಕ್ಕೆ ಬಿಜೆಪಿ ಮುಂದಾಗಿದೆ. </li><li>ಕಾಂಗ್ರೆಸ್‌, ಜೆಡಿಎಸ್‌ಗಳು ಈಗಾಗಲೇ ಒಂದು ಹಂತದ ಅಭ್ಯರ್ಥಿಗಳ ಪಟ್ಟಿ ಬಿಡುಗಡೆ ಮಾಡಿವೆ. ಬಿಜೆಪಿ ಇನ್ನೂ ಅಭ್ಯರ್ಥಿಗಳನ್ನು ಅಂತಿಮಗೊಳಿಸಿಲ್ಲ. ಆ ಕಸರತ್ತಿನ ಸಂದರ್ಭದಲ್ಲಿ ಬಿಜೆಪಿ ಬಿಟ್ಟು ಹೋಗುವ ನಾಯಕರು, ಶಾಸಕರು ಅನೇಕರು ಇರಬಹುದು ಎಂದು ಹೇಳಲಾಗುತ್ತಿದೆ. <a class="manualbacklink" target="_blank" href="https://kannada.hindustantimes.com/karnataka/bommai-s-cabinet-expansion-why-basvaraja-bommai-s-cabinet-expansion-never-happened-181680008227844.html" rel="dofollow">ಸಚಿವ ಸಂಪುಟ ವಿಸ್ತರಣೆ ಮಾಡದೇ ಇದ್ದ ಕ್ರಮ</a>ವೂ ಈಗ ಚರ್ಚೆಗೆ ಒಳಗಾಗಿದೆ. </li></ol><h2>ಮೋದಿ ವರ್ಸಸ್‌ ಗಾಂಧಿ </h2>ರಾಜ್ಯದಲ್ಲಿ 2019ರ ಲೋಕಸಭೆ ಚುನಾವಣೆಯ ಪ್ರಚಾರ ಸಂದರ್ಭದಲ್ಲಿ ಕಾಂಗ್ರೆಸ್‌ ನಾಯಕ ರಾಹುಲ್‌ ಗಾಂಧಿ ಕರ್ನಾಟಕದ ಕೋಲಾರದಲ್ಲಿ ಭಾಷಣ ಮಾಡುತ್ತ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರನ್ನು ಲೇವಡಿ ಮಾಡುತ್ತ ʻಎಲ್ಲ ಕಳ್ಳರಿಗೂ ಮೋದಿ ಸರ್‌ನೇಮ್‌ ಯಾಕೆ ಬಂತು?ʼ ಎಂದು ಹೇಳಿದ್ದರು. ಅದೇ ಕಾರಣಕ್ಕೆ ಈಗ ಕರ್ನಾಟಕ ಚುನಾವಣೆಗೆ ಮೊದಲು ಅವರು ಸಂಸದ ಸ್ಥಾನವನ್ನು ಕಳೆದುಕೊಂಡಿದ್ದಾರೆ. ಅವರು ಮತ್ತೆ ಕೋಲಾರದಲ್ಲಿ ಏ.5ರಂದು ಮತ್ತೆ ಪ್ರಚಾರ ಭಾಷಣ ಮಾಡಲಿದ್ದಾರೆ. ರಾಹುಲ್‌ ಗಾಂಧಿಗೂ ಕರ್ನಾಟಕ ಚುನಾವಣೆ ಬಹಳ ಮುಖ್ಯವಾದ್ದು. ಇವರ ಮಾತುಗಳು ಫಲಿತಾಂಶದ ಮೇಲೆ ಅಂದರೆ ಜನಾದೇಶದ ಮೇಲೆ ಏನು ಪರಿಣಾಮ ಬೀರಬಹುದು ಎಂಬ ಕುತೂಹಲವಿದೆ.

ಪ್ರಧಾನಿ ನರೇಂದ್ರ ಮೋದಿ ಅವರು ಕರ್ನಾಟಕಕ್ಕೆ ಈಗಾಗಲೇ ಈವರ್ಷ ಐದಾರು ಬಾರಿ ಬಂದು ಹೋಗಿದ್ದಾರೆ. ಅವರಿಗೆ ಕರ್ನಾಟಕ ಚುನಾವಣೆ ಬಹಳ ಮು‍ಖ್ಯವಾದುದು. ಕಾಂಗ್ರೆಸ್‌ ಪಕ್ಷದ ವಂಶಾಡಳಿತ, ಗಾಂಧಿ-ನೆಹರು ಕುಟುಂಬ ಕೇಂದ್ರಿತವಾಗಿ ಪಕ್ಷದ ಕಾರ್ಯಾಚರಣೆಗಳನ್ನು ಸದಾ ಟೀಕಿಸುತ್ತಿರುವವರು ಪ್ರಧಾನಿ ನರೇಂದ್ರ ಮೋದಿ. ಅವರ ಮಾತುಗಳಿಂದ ಮತದಾರರು ಎಷ್ಟು ಪ್ರಭಾವಿತರಾಗುವರು. ಬಿಜೆಪಿ ಅಧಿಕಾರ ಉಳಿಸಿಕೊಳ್ಳುವುದೇ ಎಂಬುದು ಈಗಿರುವ ಕುತೂಹಲ.

Modi vs Gandhi: ಕರ್ನಾಟಕ ಚುನಾವಣೆ ಮೇ 10ಕ್ಕೆ ನಿಗದಿಯಾಗಿದೆ. ಮುಂದಿನ ವರ್ಷ ಲೋಕಸಭೆ ಚುನಾವಣೆ ಇದೆ. 2014ರಲ್ಲಿ ಶುರುವಾದ ಮೋದಿ ಹವಾ 2018ರ ರಾಜ್ಯ ವಿಧಾನಸಭಾ ಚುನಾವಣೆಯಲ್ಲಿ ಕೊಂಚ ಪ್ರಭಾವ ಬೀರಿತ್ತು. ಆದರೆ, ಈ ಸಲವೂ ಅದು ಮುಂದುವರಿಯುವುದೇ? ರಾಹುಲ್‌ ಗಾಂಧಿ ಅವರ ಭಾರತ್‌ ಐಕ್ಯತಾ ಯಾತ್ರೆಯ ಫಲ ಏನಿರಬಹುದು? ಒಂದು ಒಳನೋಟ ಇಲ್ಲಿದೆ.

Importance of Karnataka polls: ಕರ್ನಾಟಕ ವಿಧಾನಸಭಾ ಚುನಾವಣೆ ಯಾಕಿಷ್ಟು ಮಹತ್ವ- ಗಮನಿಸಬೇಕಾದ ನಾಲ್ಕು ಅಂಶಗಳು

ಬಹುನಿರೀಕ್ಷಿತ <a class="manualbacklink" target="_blank" href="https://kannada.hindustantimes.com/nation-and-world/election-commission-announces-dates-for-karnataka-assembly-elections-today-181680069201746.html" rel="dofollow">ಕರ್ನಾಟಕ ಚುನಾವಣೆ </a>ಮೇ 10 ರಂದು ನಡೆಯಲಿದ್ದು, ಮೇ 13ರಂದು ಫಲಿತಾಂಶವೂ ಪ್ರಕಟವಾಗಲಿದೆ. ರಾಜ್ಯದ 224 ವಿಧಾನಸಭಾ ಕ್ಷೇತ್ರಗಳಿಗೆ ನಡೆಯುತ್ತಿರುವ ಈ ಚುನಾವಣೆ ಬಹಳ ಮಹತ್ವ ಪಡೆದುಕೊಂಡಿದೆ. ಮುಂದಿನ ವರ್ಷ ನಡೆಯಲಿರುವ ಲೋಕಸಭಾ ಚುನಾವಣೆ ಒಂದೆಡೆಯಾದರೆ, ಅಸ್ತಿತ್ವ ಉಳಿಸಿಕೊಳ್ಳಲು ಕಾಂಗ್ರೆಸ್‌ಗೆ ಈ ಚುನಾವಣೆ ಪ್ರಮುಖ. ಜೆಡಿಎಸ್‌ಗೆ ಕೂಡ ಇದು ಅಸ್ತಿತ್ವದ ಪ್ರಶ್ನೆಯಾದರೆ, ಬಿಜೆಪಿಗೆ ದಕ್ಷಿಣ ಭಾರತದಲ್ಲಿ ನೆಲೆಗಟ್ಟಿಮಾಡಿಕೊಳ್ಳಲು ಈ ಚುನಾವಣೆ ಬಹಳ ಮುಖ್ಯವಾದುದು.

ಈ ಬಾರಿ, ಆಡಳಿತಾರೂಢ ಭಾರತೀಯ ಜನತಾ ಪಕ್ಷ (ಬಿಜೆಪಿ) ಮತ್ತು ಕಾಂಗ್ರೆಸ್ ನಡುವೆ ನಿಕಟ ಸ್ಪರ್ಧೆಯಿದ್ದು, ಜನತಾ ದಳ-ಜಾತ್ಯತೀತ (ಜೆಡಿ-ಎಸ್) ಸಂಭಾವ್ಯ ಕಿಂಗ್ ಮೇಕರ್ ಪಾತ್ರವನ್ನು ನಿರ್ವಹಿಸುವ ನಿರೀಕ್ಷೆ ಎಲ್ಲೆಡೆ ವ್ಯಕ್ತವಾಗುತ್ತಿದೆ.

ಕರ್ನಾಟಕ ವಿಧಾನಸಭಾ ಚುನಾವಣೆ ಈ ಸಲ, ರಾಜಕೀಯ ಸ್ಥಿರತೆ, ಆರ್ಥಿಕವಾಗಿ ಪ್ರಮುಖ ರಾಜ್ಯಗಳಲ್ಲಿ ಒಂದಾದ ಟಿಪ್ಪು ಸುಲ್ತಾನ್ ಮತ್ತು ಹಿಂದುತ್ವ ಸಿದ್ಧಾಂತ ಕಾರಣ ಗಮನಸೆಳೆದಿದೆ. ಅದಲ್ಲದೆ, ಇನ್ನೂ ಹಲವಾರು ಸೂಕ್ಷ್ಮ ಒಳಸುಳಿಗಳನ್ನೂ ಮುಂದಿನ ದಿನಗಳಲ್ಲಿ ಗಮನಿಸಬಹುದಾಗಿದೆ.

<h2><a class="manualbacklink" target="_blank" href="https://kannada.hindustantimes.com/karnataka/karnataka-poll-2023-spotted-poll-code-violation-here-s-how-to-report-it-in-cvigil-app-181680068975623.html" rel="dofollow">ಕರ್ನಾಟಕ ಅಸೆಂಬ್ಲಿ ಚುನಾವಣೆ</a> - ಯಾಕಿಷ್ಟು ಮಹತ್ವ?</h2>1) ಲೋಕಸಭೆ ಚುನಾವಣೆ 2024ರ ಮೇಲೆ ಕರ್ನಾಟಕ ಚುನಾವಣೆಯ ಪರಿಣಾಮ: ಮುಖ್ಯಮಂತ್ರಿ <a class="manualbacklink" target="_blank" href="https://kannada.hindustantimes.com/karnataka/party-and-the-government-ready-for-assembly-elections-says-cm-basavaraj-bommai-181680067557562.html" rel="dofollow">ಬಸವರಾಜ ಬೊಮ್ಮಾಯಿ</a> ನೇತೃತ್ವದಲ್ಲಿ ಕರ್ನಾಟಕದಲ್ಲಿ ಆಡಳಿತ ನಡೆಸುತ್ತಿರುವ ಬಿಜೆಪಿ 224 ಸದಸ್ಯ ಬಲದ ವಿಧಾನಸಭೆಯಲ್ಲಿ 119 ಶಾಸಕರನ್ನು ಹೊಂದಿದೆ. 2008 ರಲ್ಲಿ ಕೇಸರಿ ಪಕ್ಷವು ಇಲ್ಲಿ ಅಧಿಕಾರವನ್ನು ಗಳಿಸಿತು. ಪಕ್ಷದ ಗೆಲುವಿನ ರೂವಾರಿ ಬಿಎಸ್ ಯಡಿಯೂರಪ್ಪ ಆಗಿದ್ದು, ಅವರಿಗೆ ಈ ಎಲ್ಲ ಗೌರವ ಇಂದಿಗೂ ಸಿಗುತ್ತಿದೆ. ಅವರು ಕರ್ನಾಟಕದಲ್ಲಿ ಇನ್ನು ಕೂಡಾ ಪಕ್ಷದ ಪ್ರಭಾವಿ ನಾಯಕರಾಗಿ ಮುಂದುವರಿದಿದ್ದಾರೆ. ಅವರು ಈ ಸಲ ಚುನಾವಣೆಗೆ ಸ್ಪರ್ಧಿಸುತ್ತಿಲ್ಲ. ಚುನಾವಣಾ ರಾಜಕೀಯದಿಂದ ನಿವೃತ್ತರಾಗಿದ್ದು, ಪುತ್ರನನ್ನು ಕಣಕ್ಕೆ ಇಳಿಸುವ ಆಲೋಚನೆಯಲ್ಲಿದ್ದಾರೆ.

ರಾಜ್ಯದಲ್ಲಿ 2013ರಲ್ಲಿ ಜೆಡಿಎಸ್‌ 40 ಸ್ಥಾನ ಗೆದ್ದುಕೊಂಡಿತ್ತು. ಕಾಂಗ್ರೆಸ್‌ಗೆ 122 ಸ್ಥಾನಗಳ ಸ್ಪಷ್ಟ ಜನಾದೇಶ ಸಿಕ್ಕಿತ್ತು. ಬಿಜೆಪಿ ಕೂಡ 40 ಸ್ಥಾನ ಗೆದ್ದುಕೊಂಡಿತ್ತು. ಸಿದ್ದರಾಮಯ್ಯ ಮುಖ್ಯಮಂತ್ರಿಯಾಗಿದ್ದರು. ಇದಾಗಿ, 2018ರಲ್ಲಿ ಜನಾದೇಶ ಅತಂತ್ರವಾಗಿತ್ತು. ಯಾವ ಪಕ್ಷಕ್ಕೂ ಬಹುಮತ ಇಲ್ಲದ ಕಾರಣ ನೇರ ಸರ್ಕಾರ ರಚನೆ ಅಸಾಧ್ಯವಾಗಿತ್ತು. ಬಿಜೆಪಿ 104 ಸ್ಥಾನ ಇತ್ತಾದರೂ, ಸರಳ ಬಹುಮತಕ್ಕೆ 9 ಕೊರತೆ ಇತ್ತು. ಇದೇ ವೇಳೆ, 37 ಸ್ಥಾನ ಗೆದ್ದ ಜೆಡಿಎಸ್‌ ಮತ್ತು 80 ಸದಸ್ಯ ಬಲದ ಕಾಂಗ್ರೆಸ್‌ ಜತೆಗೂಡಿ ಜೆಡಿಎಸ್‌ ನೇತೃತ್ವದ ಸರ್ಕಾರ ರಚನೆ ಆಯಿತು. ಕುಮಾರಸ್ವಾಮಿ ಮುಖ್ಯಮಂತ್ರಿಯಾದರು.

ಬಿಜೆಪಿ ಏಕೈಕ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿತು. ಆದರೆ ಸರ್ಕಾರ ರಚಿಸಲು ವಿಫಲವಾಯಿತು. ಒಂದು ವರ್ಷದೊಳಗೆ ಅಂದರೆ 2019 ರಲ್ಲಿ ಕಾಂಗ್ರೆಸ್ ಮತ್ತು ಜೆಡಿಎಸ್‌ನ 15 ಶಾಸಕರು ರಾಜೀನಾಮೆ ನೀಡಿದರು. ಮತ್ತೊಂದು ಮಹತ್ವದ ಉಪಚುನಾವಣೆ ಎದುರಾಯಿತು. ಉಪಚುನಾವಣೆಯಲ್ಲಿ ಬಿಜೆಪಿ ಟಿಕೆಟ್‌ ಪಡೆದು ಗೆದ್ದ ಶಾಸಕರು ಬಿಜೆಪಿಗೆ 12 ಸ್ಥಾನ ಬಲ ತುಂಬಿದರು. ಪರಿಣಾಮ, 116 ಶಾಸಕರ ಬೆಂಬಲದೊಂದಿಗೆ ಬಿಎಸ್ ವೈ ಮುಖ್ಯಮಂತ್ರಿಯಾದರು. ಈ ಹಿನ್ನೆಲೆಯಲ್ಲಿ ಗಮನಿಸುವುದಾದರೆ, ರಾಜ್ಯದ ರಾಜಕೀಯ ಲೋಕಸಭೆ ಚುನಾವಣೆ ಮೇಲೂ ಪರಿಣಾಮ ಬೀರುವಂಥದ್ದೇ ಆಗಿದೆ.

2) ಭಾರತದ ಜಿಡಿಪಿಗೆ ಕರ್ನಾಟಕದ ಕೊಡುಗೆ:

ಭಾರತದ ಅರ್ಥ ವ್ಯವಸ್ಥೆಗೆ ಹೆಚ್ಚಿನ ಕೊಡುಗೆ ನೀಡುವ ಪ್ರಮುಖ ರಾಜ್ಯಗಳ ಪೈಕಿ ಕರ್ನಾಟಕವೂ ಒಂದು ಎಂದು ಪರಿಗಣಿಸಲ್ಪಟ್ಟಿದೆ. ಏಕೆಂದರೆ ಇದು ದೇಶದ ಜಿಡಿಪಿಗೆ ಶೇಕಡ 8 ರಷ್ಟು ಕೊಡುಗೆ ನೀಡುತ್ತದೆ.

ಇದು ಜೈವಿಕ ತಂತ್ರಜ್ಞಾನ, ಏರೋಸ್ಪೇಸ್, ​​ಮಾಹಿತಿ ತಂತ್ರಜ್ಞಾನ (IT) ಮತ್ತು ರಕ್ಷಣೆಯಂತಹ ಹಲವಾರು ಪ್ರಮುಖ ಕ್ಷೇತ್ರಗಳಲ್ಲೂ ತನ್ನ ಕೊಡುಗೆಯನ್ನು ಕೊಡುತ್ತಿದೆ.

ರಸ್ತೆ ಅಭಿವೃದ್ಧಿ ಸೇರಿ ಪ್ರಮುಖ ಮೂಲಸೌಕರ್ಯ ಅಭಿವೃದ್ಧಿ ಯೋಜನೆಗಳನ್ನು ಕೈಗೊಳ್ಳುತ್ತಿರುವುದರಿಂದ ಕರ್ನಾಟಕವು ನಿರ್ಮಾಣ ಉದ್ಯಮಕ್ಕೆ ದೊಡ್ಡ ವ್ಯಾಪಾರ ಅವಕಾಶಗಳನ್ನು ಒದಗಿಸುತ್ತದೆ ಎಂದು ಸಿಎಂ ಬಸವರಾಜ ಬೊಮ್ಮಾಯಿ ಹೇಳುತ್ತಲೇ ಇದ್ದಾರೆ.

ಹುಬ್ಬಳ್ಳಿ, ಧಾರವಾಡ, ಮೈಸೂರು, ಮಂಗಳೂರು, ಮಧ್ಯ ಕರ್ನಾಟಕದ ಆರು ಹೊಸ ಹೈಟೆಕ್ ಸಿಟಿಗಳು ಮತ್ತು ಬೆಂಗಳೂರು ಬಳಿ ಆರು ತಿಂಗಳೊಳಗೆ ನಿರ್ಮಿಸಲಾಗುವುದು ಎಂದು ಅವರು ಘೋಷಿಸಿದ್ದಾರೆ.

3) ಟಿಪ್ಪು ಸುಲ್ತಾನ್‌ ಮತ್ತು ಹಿಂದುತ್ವ ಪ್ರತಿಪಾದನೆ: ಕರ್ನಾಟಕದ ವಿಧಾನಸಭಾ ಚುನಾವಣೆಗಳು ಧರ್ಮಗಳ ಮೇಲಿನ ಧ್ರುವೀಕರಣದ ಪ್ರಚಾರದ ಫಲಿತಾಂಶವನ್ನು ಪ್ರತಿಬಿಂಬಿಸುತ್ತವೆ. ಇದರಲ್ಲಿ ಹಿಜಾಬ್‌ನಲ್ಲಿ ಮುಸ್ಲಿಮರನ್ನು ಗುರಿಯಾಗಿಸುವುದು, ಬಲವಂತದ ಮತಾಂತರ ಆರೋಪ, ಕ್ರಿಶ್ಚಿಯನ್ನರ ಮೇಲಿನ ದಾಳಿಗಳು ಮತ್ತು 18 ನೇ ಶತಮಾನದ ಮೈಸೂರು ದೊರೆ ಟಿಪ್ಪು ಸುಲ್ತಾನ್ ಮತ್ತು ಹಿಂದುತ್ವ ಸಿದ್ಧಾಂತವಾದಿ ವಿಡಿ ಸಾವರ್ಕರ್ ಅವರ ಮೇಲಿನ ಚರ್ಚೆಗಳು ಮತ ಧ್ರುವೀಕರಣದ ಮೇಲೆ ಪರಿಣಾಮ ಬೀರುವಂಥವು.

ಕರ್ನಾಟಕದ ಯಾದಗಿರಿ ಜಿಲ್ಲೆಯಲ್ಲಿ ಕಳೆದ ತಿಂಗಳು, ಟಿಪ್ಪು ಸುಲ್ತಾನ್ ವೃತ್ತಕ್ಕೆ ವೀರ್ ಸಾವರ್ಕರ್ ಹೆಸರನ್ನು ಮರುನಾಮಕರಣ ಮಾಡುವ ಕುರಿತುಉದ್ವಿಗ್ನತೆ ಉಂಟಾಗಿತ್ತು. ಈ ವೃತ್ತಕ್ಕೆ ಅನಧಿಕೃತವಾಗಿ ಟಿಪ್ಪು ಸುಲ್ತಾನ್ ಹೆಸರನ್ನು ಇಡಲಾಗಿದೆ ಎಂದು ಆರೋಪಿಸಿ 'ಸಾವರ್ಕರ್ ಸರ್ಕಲ್' ಎಂದು ಹೆಸರಿಸಬೇಕೆಂದು ಕೆಲವು ಬಲಪಂಥೀಯ ಸಂಘಟನೆಗಳು ಒತ್ತಾಯಿಸಿದ್ದವು.

ಈ ಘಟನೆಗೂ ಮುನ್ನ, ಟಿಪ್ಪು ಬೆಂಬಲಿಗರು 2010ರಲ್ಲಿ ಅನಧಿಕೃತವಾಗಿ ಟಿಪ್ಪು ಸುಲ್ತಾನ್ ಹೆಸರನ್ನು ವೃತ್ತಕ್ಕೆ ಅನಧಿಕೃತವಾಗಿ ಇಟ್ಟಿದ್ದಾರೆ ಎಂದು ಹಿಂದು ಪರ ಸಂಘಟನೆ ಶಿವಾಜಿ ಮಹಾರಾಜ್ ಸಂಘಟನೆ ಆರೋಪಿಸಿತ್ತು. ಅಲ್ಲದೆ, ವೀರ್ ಸಾವರ್ಕರ್ ಅವರ ಹೆಸರನ್ನು ಮರುನಾಮಕರಣ ಮಾಡುವಂತೆ ಒತ್ತಾಯಿಸಿತ್ತು.

4) ಕರ್ನಾಟಕದಲ್ಲಿ ಕಾಂಗ್ರೆಸ್ ಸಾಧನೆ: ಕರ್ನಾಟಕ ರಾಜಕೀಯದಲ್ಲಿ ಕಾಂಗ್ರೆಸ್ ಪ್ರಮುಖ ಪಾತ್ರ ವಹಿಸಿದೆ. ರಾಜ್ಯದಲ್ಲಿ ಮೊದಲ ಬಾರಿಗೆ 1952ರಲ್ಲಿ ಚುನಾವಣೆ ನಡೆದಾಗ, ಕಾಂಗ್ರೆಸ್‌ ಪಕ್ಷ ಅಧಿಕಾರ ಚುಕ್ಕಾಣಿ ಹಿಡಿಯಿತು. ಅಲ್ಲಿಂದೀಚೆಗೆ ಹಲವು ಬಾರಿ ಕಾಂಗ್ರೆಸ್‌ ಆಡಳಿತ ನಡೆಸಿದೆ.

ರಾಜ್ಯ ವಿಧಾನ ಸಭೆಯ 2008ರ ಚುನಾವಣೆಯಲ್ಲಿ 224 ಅಸೆಂಬ್ಲಿ ಸ್ಥಾನಗಳಲ್ಲಿ ಕೇವಲ 80 ಸ್ಥಾನಗಳನ್ನು ಗೆದ್ದು , ಕಾಂಗ್ರೆಸ್‌ ಪಕ್ಷವು ದೊಡ್ಡ ಸೋಲನ್ನು ಅನುಭವಿಸಿತು. ಆದರೆ 2013ರಲ್ಲಿ ಮತ್ತೆ ಪುಟಿದೆದ್ದು 122 ಸ್ಥಾನಗಳಲ್ಲಿ ಬಹುಮತ ಗಳಿಸಿತು. ಹಿಂದಿನ ಚುನಾವಣೆಯಲ್ಲಿ, ಅದು 80 ಸ್ಥಾನಗಳನ್ನು ಗೆದ್ದು ಜೆಡಿಎಸ್‌ ಜತೆಗೂಡಿ ಸರ್ಕಾರ ರಚಿಸಿತ್ತು. ಪ್ರಸ್ತುತ ರಾಜ್ಯದಲ್ಲಿ ಪ್ರಮುಖ ವಿರೋಧ ಪಕ್ಷ ಕಾಂಗ್ರೆಸ್‌ ಎಂಬುದು ನಿರ್ವಿವಾದಿತ ವಿಚಾರ.

ಮುಂಬರುವ ಕರ್ನಾಟಕ ವಿಧಾನಸಭಾ ಚುನಾವಣೆಗೆ ಕಾಂಗ್ರೆಸ್ ತನ್ನ ಅಭ್ಯರ್ಥಿಗಳ ಮೊದಲ ಪಟ್ಟಿಯನ್ನು ಬಿಡುಗಡೆ ಮಾಡಿದೆ. ಇದರಲ್ಲಿ ಮಾಜಿ ಸಿಎಂ ಸಿದ್ದರಾಮಯ್ಯ ಮತ್ತು ಪಕ್ಷದ ರಾಜ್ಯಾಧ್ಯಕ್ಷ ಡಿಕೆ ಶಿವಕುಮಾರ್ ಹೆಸರುಗಳಿವೆ. ಸಿದ್ದರಾಮಯ್ಯ ಅವರು ವರುಣಾ ಕ್ಷೇತ್ರದಿಂದ ಮತ್ತು ಶಿವಕುಮಾರ್ ಕನಕಪುರದಿಂದ ಸ್ಪರ್ಧಿಸಲಿದ್ದಾರೆ. ಈಗ ಮತ್ತೊಮ್ಮೆ ಅಧಿಕಾರ ಚುಕ್ಕಾಣಿ ಹಿಡಿಯುವ ಭರವಸೆಯೊಂದಿಗೆ ಕಾಂಗ್ರೆಸ್‌ ನಾಯಕರು ಚುನಾವಣೆ ಎದುರಿಸಲು ಸಜ್ಜಾಗಿದ್ದಾರೆ.

Importance of Karnataka polls: ಈ ಚುನಾವಣೆ ಬಹಳ ಮಹತ್ವ ಪಡೆದುಕೊಂಡಿದೆ. ಮುಂದಿನ ವರ್ಷ ನಡೆಯಲಿರುವ ಲೋಕಸಭಾ ಚುನಾವಣೆ ಒಂದೆಡೆಯಾದರೆ, ಅಸ್ತಿತ್ವ ಉಳಿಸಿಕೊಳ್ಳಲು ಕಾಂಗ್ರೆಸ್‌ಗೆ ಈ ಚುನಾವಣೆ ಪ್ರಮುಖ. ಜೆಡಿಎಸ್‌ಗೆ ಕೂಡ ಇದು ಅಸ್ತಿತ್ವದ ಪ್ರಶ್ನೆಯಾದರೆ, ಬಿಜೆಪಿಗೆ ದಕ್ಷಿಣ ಭಾರತದಲ್ಲಿ ನೆಲೆಗಟ್ಟಿಮಾಡಿಕೊಳ್ಳಲು ಈ ಚುನಾವಣೆ ಬಹಳ ಮುಖ್ಯವಾದುದು.

Karnataka Poll 2023: ನೀತಿ ಸಂಹಿತೆ ಉಲ್ಲಂಘನೆ ಕಾಣಿಸ್ತಾ? ಸಿವಿಜಿಲ್‌ ಆಪ್‌ನಲ್ಲಿ ರಿಪೋರ್ಟ್‌ ಮಾಡಿ- ಜಾಗೃತ ಮತದಾರರಾಗಿ!

ಕರ್ನಾಟಕದಲ್ಲಿ ವಿಧಾನಸಭೆ ಚುನಾವಣೆ ಘೋಷಣೆ ಆಗಿದ್ದು, ಮೇ 10ಕ್ಕೆ ಮುಹೂರ್ತ ಫಿಕ್ಸ್‌ ಆಗಿದೆ. ಮೇ 13 ರಂದು ಫಲಿತಾಂಶ ಪ್ರಕಟವಾಗಲಿದೆ.

ಭಾರತದ ಮುಖ್ಯ ಚುನಾವಣಾ ಆಯುಕ್ತ ರಾಜೀವ್‌ ಕುಮಾರ್‌ ಅವರು ಇಂದು ಚುನಾವಣಾ ದಿನಾಂಕ ಘೋಷಿಸಿದರು. ಈ ಸಂದರ್ಭದಲ್ಲಿ ಮಾದರಿ ನೀತಿ ಸಂಹಿತೆ ಕೂಡ ಇಂದೇ ಜಾರಿಯಾಗಿದೆ ಎಂದು ಹೇಳಿದರು. ಇದಲ್ಲದೆ, ಮತದಾರರಿಗೆ ಆಮಿಷ ಒಡ್ಡುವ ವಿಚಾರ ಪ್ರಸ್ತಾಪಿಸಿದ ಅವರು ನೀತಿ ಸಂಹಿತೆ ಜಾರಿಗೆ ಮೊದಲೇ ಕರ್ನಾಟಕದಲ್ಲಿ ಅದನ್ನು ತಡೆಯುವ ಕೆಲಸ ಶುರುವಾಗಿದೆ. ಈಗಾಗಲೇ ಕೋಟ್ಯಂತರ ರೂಪಾಯಿ ಬೆಲೆ ಬಾಳುವ ಕುಕ್ಕರ್‌, ಸೀರೆ ಮುಂತಾದ ವಸ್ತುಗಳನ್ನು ವಶಪಡಿಸಿ ಅದನ್ನು ಹಂಚಲು ತಗೆದುಕೊಂಡು ಹೋದವರ ವಿರುದ್ಧ ಕ್ರಿಮಿನಲ್‌ ಕೇಸ್‌ ದಾಖಲಿಸಲಾಗಿದೆ.

ಈಶಾನ್ಯ ರಾಜ್ಯಗಳ ಚುನಾವಣೆಯ ವಿದ್ಯಮಾನವನ್ನು ಪ್ರಸ್ತಾಪಿಸಿದ ರಾಜೀವ್‌ ಕುಮಾರ್‌, ಅಲ್ಲಿನ ಗ್ರಾಮಗಳಲ್ಲಿ ಜನರೇ ಎಚ್ಚೆತ್ತುಕೊಂಡು ಆಮಿಷ ಒಡ್ಡುವವರನ್ನು ಹಿಡಿದು ಪೊಲೀಸರಿಗೆ ಒಪ್ಪಿಸುತ್ತಿದ್ದರು. ಆ ಮಟ್ಟಿಗೆ ಅವರು ಜಾಗೃತರಾಗಿದ್ದರು. ಇಂತಹ ಜಾಗೃತಿ ಕರ್ನಾಟಕದಲ್ಲೂ ಇರುವುದು ಗಮನಕ್ಕೆ ಬಂದಿದೆ.

ಇದನ್ನೂ ಓದಿ| <a class="manualbacklink" target="_blank" href="https://kannada.hindustantimes.com/karnataka/what-is-model-code-of-conduct-12-rules-you-must-know-check-this-explainer-karnataka-election-2023-181680066707158.html" rel="dofollow">Model Code of Conduct: ಇಂದಿನಿಂದ ಮಾದರಿ ನೀತಿ ಸಂಹಿತೆ ಜಾರಿ; ಏನಿದು- ಇಲ್ಲಿದೆ ಪ್ರಮುಖ ಅಂಶಗಳ ಕಡೆಗೊಂದು ನೋಟ</a>

ಕಳೆದ ವರ್ಷ ಮತದಾರರ ಬಳಕೆಗಾಗಿ ಸಿ ವಿಜಿಲ್‌ ಅಪ್ಲಿಕೇಶನ್‌ (cVIGIL) ಅನ್ನು ಪರಿಚಯಿಸಲಾಗಿದೆ. ಸಿವಿಜಿಲ್‌ ಅಂದರೆ ಸಿಟಿಜನ್ಸ್‌ ವಿಜಿಲೆನ್ಸ್‌ ಎಂದು ಅರ್ಥ. ಅದರ ಬಳಕೆಯನ್ನು ಮತದಾರರು ಮಾಡುತ್ತಿದ್ದಾರೆ. ಕರ್ನಾಟಕದಲ್ಲಿ ಈಗಾಗಲೇ ಈ ಆಪ್‌ ಬಗ್ಗೆ ಜಾಗೃತಿ ಇದೆ. ಬಳಸುತ್ತಿದ್ದಾರೆ ಕೂಡ. ಇದು ಇನ್ನಷ್ಟು ಹೆಚ್ಚಾಗಬೇಕು. ಮುಕ್ತ, ನ್ಯಾಯಯುತ ಮತದಾನ ಪ್ರಕ್ರಿಯೆಯನ್ನು ನಾವು ಖಾತರಿಪಡಿಸಬೇಕು. ಮರುಮತದಾನ ಇಲ್ಲದ, ಹಿಂಸಾಚಾರ ಇಲ್ಲದ ಚುನಾವಣೆ ನಡೆಯಬೇಕು ಎಂದು ಹೇಳಿದರು.

ಕರ್ನಾಟಕದಲ್ಲಿ ಸಿ ವಿಜಿಲ್‌ ಆಪ್‌ ಹೆಚ್ಚು ಅಗತ್ಯವಾಗಿದ್ದು, ಇಲ್ಲಿ ಹಣದ ಪ್ರಭಾವ ಹೆಚ್ಚು . ಚುನಾವಣೆಗೂ ಮೊದಲೇ ಮತದಾರರಿಗೆ ಆಮಿಷ ಒಡ್ಡುವ ಕೆಲಸವನ್ನು ಹಾಲಿ ಶಾಸಕರು ಮತ್ತು ಕಳೆದ ಚುನಾವಣೆಯಲ್ಲಿ ಸೋತವರು ಶುರುಮಾಡಿಕೊಂಡಿದ್ದರು. ಮತದಾರರಿಗೆ ಕುಕ್ಕರ್‌, ಸೀರೆ, ಹಾಟ್‌ಬಾಕ್ಸ್‌ ಮುಂತಾದ ಉಡುಗೊರೆ ನೀಡುವ ಕೆಲಸ ಪ್ರಗತಿಯಲ್ಲಿತ್ತು. ಆದರೆ, ಇದಕ್ಕೆ ಕಳೆದ ಕೆಲವು ವಾರಗಳ ಹಿಂದೆ ಪೊಲೀಸರು ಬ್ರೇಕ್‌ ಹಾಕಲಾರಂಭಿಸಿದ್ದರು ಎಂಬ ವಿಚಾರವನ್ನು ಅವರು ಉಲ್ಲೇಖಿಸಿದರು.

<h2>ಸಿವಿಜಿಲ್‌ ಆಪ್‌ ಬಳಸುವುದು ಹೇಗೆ?</h2>ಸಿವಿಜಿಲ್‌ ಆಪ್‌ ಬಳಸುವುದಕ್ಕೆ ನೀವು ಅನಾಮಧೇಯವಾಗಿ ಅಥವಾ ನಿಮ್ಮ ಮೊಬೈಲ್ ಸಂಖ್ಯೆಯ ಮೂಲಕ ಲಾಗಿನ್ ಆಗಬಹುದು. ಆದಾಗ್ಯೂ, ನೀವು ಅನಾಮಧೇಯ ಬಳಕೆದಾರರಂತೆ ದೂರು ಸಲ್ಲಿಸಿದರೆ, ನೀವು ನಿಮ್ಮ ದೂರಿನ ಅಪ್ಡೇಟ್‌ ಪಡೆಯುವುದು ಸಾಧ್ಯವಾಗುವುದಿಲ್ಲ. ಒಮ್ಮೆ ಲಾಗ್ ಇನ್ ಮಾಡಿದ ನಂತರ, ನೀವು ಫೋಟೋವನ್ನು ಕ್ಲಿಕ್ ಮಾಡಬಹುದು ಅಥವಾ ವೀಡಿಯೊವನ್ನು ರೆಕಾರ್ಡ್ ಮಾಡಬಹುದು (2 ನಿಮಿಷಗಳವರೆಗೆ) ಮತ್ತು ಭೌಗೋಳಿಕ ಮಾಹಿತಿ ವ್ಯವಸ್ಥೆಯಿಂದ ಸ್ವಯಂಚಾಲಿತ ಸ್ಥಳ ಮ್ಯಾಪಿಂಗ್ ಜತೆಗೆ ಅದನ್ನು ಡಿಜಿಟಲ್ ಪುರಾವೆಯಾಗಿ ಸಲ್ಲಿಸಬಹುದಾಗಿದೆ.

ಇದನ್ನೂ ಓದಿ| <a class="manualbacklink" target="_blank" href="https://kannada.hindustantimes.com/nation-and-world/election-commission-announces-dates-for-karnataka-assembly-elections-today-181680069201746.html" rel="dofollow">Karnataka Election Date: ಮೇ 10ರಂದು ಕರ್ನಾಟಕ ವಿಧಾನಸಭೆ ಚುನಾವಣೆ, 13ಕ್ಕೆ ಫಲಿತಾಂಶ</a>

ಈ ರೀತಿ, ದೂರನ್ನು ಯಶಸ್ವಿಯಾಗಿ ಸಲ್ಲಿಸಿದ ನಂತರ, ನಿಮ್ಮ ಮೊಬೈಲ್‌ನಲ್ಲಿ ಅಪ್ಡೇಟ್‌ ಟ್ರ್ಯಾಕ್ ಮಾಡಲು ಮತ್ತು ವಿವರ ಸ್ವೀಕರಿಸಲು ನೀವು ನಿಮ್ಮ ದೂರಿಗೆ ಸಂಬಂಧಿಸಿದ ಪ್ರತ್ಯೇಕ ಐಡಿಯನ್ನು ಸ್ವೀಕರಿಸುತ್ತೀರಿ. ಇದರಲ್ಲಿ ನೀವು ಬಹು ಘಟನೆಗಳನ್ನು ವರದಿ ಮಾಡಬಹುದು. ಅವೆಲ್ಲದಕ್ಕೂ ಅಂದರೆ ಪ್ರತಿ ದೂರಿಗೆ, ನೀವು ಪ್ರತ್ಯೇಕ ಟ್ರ್ಯಾಕಿಂಗ್ ಐಡಿಯನ್ನು ಪಡೆಯುತ್ತೀರಿ.

ಮುಖ್ಯ ಚುನಾವಣಾ ಆಯುಕ್ತರು ಹೇಳಿದ ಪ್ರಕಾರ, ಇಂತಹ ದೂರುಗಳಿಗೆ ಆಯೋಗವು 100 ನಿಮಿಷದ ಒಳಗೆ ಪ್ರತಿಸ್ಪಂದಿಸುತ್ತದೆ.

ಸಿವಿಜಿಲ್‌ ಆಪ್‌ ಬಗ್ಗೆ ಹಿಂದಿನ ಆಯುಕ್ತರು ನೀಡಿದ ಮಾಹಿತಿಯ ವಿಡಿಯೋ ಇಲ್ಲಿದೆ. ಇದನ್ನು ಬಳಸುವುದು ಹೇಗೆ ಎಂಬ ನಿರೂಪಣೆಯೂ ಇಲ್ಲಿದೆ.

ಇವಿಜಿಲ್‌ ಅಪ್ಲಿಕೇಶನ್‌ ಬಳಸುವುದಕ್ಕೆ ಇರುವಂತಹ ಯೂಸರ್‌ ಮ್ಯಾನುವಲ್‌ ಕೂಡ ಇಲ್ಲಿದೆ.

document

Karnataka Poll 2023: ಕಳೆದ ವರ್ಷ ಮತದಾರರ ಬಳಕೆಗಾಗಿ ಸಿ ವಿಜಿಲ್‌ ಅಪ್ಲಿಕೇಶನ್‌ (cVIGIL) ಅನ್ನು ಪರಿಚಯಿಸಲಾಗಿದೆ. ಸಿವಿಜಿಲ್‌ ಅಂದರೆ ಸಿಟಿಜನ್ಸ್‌ ವಿಜಿಲೆನ್ಸ್‌ ಎಂದು ಅರ್ಥ. ಅದರ ಬಳಕೆಯನ್ನು ಮತದಾರರು ಮಾಡುತ್ತಿದ್ದಾರೆ. ಕರ್ನಾಟಕದಲ್ಲಿ ಈಗಾಗಲೇ ಈ ಆಪ್‌ ಬಗ್ಗೆ ಜಾಗೃತಿ ಇದೆ. ಬಳಸುತ್ತಿದ್ದಾರೆ ಕೂಡ.

Model Code of Conduct: ಇಂದಿನಿಂದ ಮಾದರಿ ನೀತಿ ಸಂಹಿತೆ ಜಾರಿ; ಏನಿದು- ಇಲ್ಲಿದೆ ಪ್ರಮುಖ ಅಂಶಗಳ ಕಡೆಗೊಂದು ನೋಟ

ಭಾರತದ ಚುನಾವಣಾ ಆಯೋಗ ಇಂದು ಕರ್ನಾಟಕ ವಿಧಾನಸಭೆ ಚುನಾವಣೆ 2023ರ ದಿನಾಂಕವನ್ನು ಪ್ರಕಟಿಸಿದೆ. ಕರ್ನಾಟಕದಲ್ಲಿ ಚುನಾವಣೆ ಮೇ 10ರಂದು ಒಂದೇ ಹಂತದಲ್ಲಿ ನಡೆಯಲಿದೆ. ಮೇ 13ರಂದು ಫಲಿತಾಂಶ ಪ್ರಕಟವಾಗಲಿದೆ.

ಚುನಾವಣಾ ದಿನಾಂಕಗಳ ಘೋಷಣೆಯೊಂದಿಗೆ, ಮಾದರಿ ನೀತಿ ಸಂಹಿತೆ ಜಾರಿಗೆ ಬಂದಿದೆ. ಅರ್ಥಾತ್‌ ರಾಜಕೀಯ ನಾಯಕರು, ರಾಜಕೀಯ ಪಕ್ಷಗಳು ಮತ್ತು ಚುನಾವಣಾ ಪ್ರಕ್ರಿಯೆಗೆ ಸಂಬಂಧಿಸಿದ ಎಲ್ಲರೂ ಈ ಸಂಹಿತೆಗೆ ಚುನಾವಣಾ ಪ್ರಕ್ರಿಯೆ ಮುಗಿಯುವ ತನಕ ಬದ್ಧರಾಗಿರಬೇಕಾದ್ದು ಅವಶ್ಯ. ಹಾಗಾದರೆ ದೇಶದಲ್ಲಿ ಚುನಾವಣೆ ಸಂದರ್ಭದಲ್ಲಿ ಪ್ರಸ್ತಾಪಿಸುವ ಈ ಮಾದರಿ ನೀತಿ ಸಂಹಿತೆ ಯಾವುದು?

ಸರಳವಾಗಿ ಹೇಳುವುದಾದರೆ, ಇದು ಮುಕ್ತ ಮತ್ತು ನ್ಯಾಯಸಮ್ಮತವಾದ ಚುನಾವಣಾ ಪ್ರಕ್ರಿಯೆಯನ್ನು ಖಚಿತಪಡಿಸಿಕೊಳ್ಳಲು ಚುನಾವಣಾ ಆಯೋಗವು ಸೂಚಿಸಿದ ನಿಯಮಗಳಾಗಿವೆ. ಈ ಚುನಾವಣಾ ನೀತಿ ಸಂಹಿತೆಯ ಯಾವುದೇ ನಿಯಮ ಉಲ್ಲಂಘನೆ ಆದರೂ ಶಿಕ್ಷೆ ಇದೆ. ಅದನ್ನು ವಿಶ್ವದ ಅತಿದೊಡ್ಡ ಪ್ರಜಾಪ್ರಭುತ್ವ ರಾಷ್ಟ್ರವಾದ ಭಾರತದ ಮತದಾನ ವ್ಯವಸ್ಥೆಯನ್ನು ನಿರ್ವಹಿಸುವ ಕೇಂದ್ರ ಚುನಾವಣಾ ಆಯೋಗ ಜಾರಿ ಮಾಡುತ್ತದೆ.

ಮಾದರಿ ನೀತಿ ಸಂಹಿತೆ ಭಾರತದ ಚುನಾವಣಾ ಆಯೋಗದ ವೆಬ್‌ಸೈಟ್‌ನಲ್ಲಿ ಪ್ರತಿಯೊಬ್ಬರೂ ಅನುಸರಿಸಬೇಕಾದ <a rel="nofollow" href="https://eci.gov.in/mcc/" target="_blank" class="manualbacklink">ನಿಯಮಗಳ ದೀರ್ಘ ಪಟ್ಟಿ</a> ಪ್ರಕಟವಾಗಿದೆ. ಚುನಾವಣಾ ಸಮಿತಿಯು ಸುಗಮ ಮತ್ತು ನ್ಯಾಯಯುತ ಮತದಾರರ ಪ್ರಕ್ರಿಯೆಯನ್ನು ಹೇಗೆ ಖಾತ್ರಿಪಡಿಸುತ್ತದೆ ಎಂಬುದರ ಕುರಿತು ಸ್ಪಷ್ಟವಾದ ತಿಳಿವಳಿಕೆಯನ್ನು ನೀಡುವ ಹತ್ತು ಪ್ರಮುಖ ಮಾನದಂಡಗಳ ವಿವರ ಇಲ್ಲಿದೆ.

1. ಯಾವುದೇ ಪಕ್ಷ ಅಥವಾ ಅಭ್ಯರ್ಥಿಯು ಅಸ್ತಿತ್ವದಲ್ಲಿರುವ ಭಿನ್ನಾಭಿಪ್ರಾಯಗಳನ್ನು ಉಲ್ಬಣಗೊಳಿಸುವಂತಹ ಅಥವಾ ಪರಸ್ಪರ ದ್ವೇಷವನ್ನು ಉಂಟುಮಾಡುವ ಅಥವಾ ವಿವಿಧ ಜಾತಿಗಳು ಮತ್ತು ಸಮುದಾಯಗಳ ನಡುವೆ, ಧಾರ್ಮಿಕ ಅಥವಾ ಭಾಷಿಕ ನಡುವೆ ಉದ್ವಿಗ್ನತೆಯನ್ನು ಉಂಟುಮಾಡುವ ಯಾವುದೇ ಚಟುವಟಿಕೆಯನ್ನು ಕೈಗೊಳ್ಳಬಾರದು.

2. ರಾಜಕೀಯ ಪಕ್ಷಗಳು ಮತ್ತು ಅವರ ಅಭ್ಯರ್ಥಿಗಳು ತಮ್ಮ ಪ್ರತಿಸ್ಪರ್ಧಿಗಳ ಟೀಕೆಗಳನ್ನು ರಾಜಕೀಯ, ಕಾರ್ಯಕ್ರಮ, ಹಿಂದಿನ ದಾಖಲೆ ಮತ್ತು ಕೆಲಸಗಳಿಗೆ ಸೀಮಿತಗೊಳಿಸಬೇಕು. ಯಾವುದೇ ಅಭ್ಯರ್ಥಿ ಅಥವಾ ರಾಜಕೀಯ ಪಕ್ಷವು ವೈಯಕ್ತಿಕ ಟೀಕೆಗಳನ್ನು ಅಥವಾ ನಾಯಕರು ಅಥವಾ ಕಾರ್ಯಕರ್ತರ ಸಾರ್ವಜನಿಕ ಚಟುವಟಿಕೆಗಳಿಗೆ ಸಂಬಂಧಿಸದ ಯಾವುದೇ ಹೇಳಿಕೆಗಳಿಗೆ ಅನುಮತಿ ಇಲ್ಲ.

3. ರಾಜಕೀಯ ಪಕ್ಷಗಳು ಮತ್ತು ಅಭ್ಯರ್ಥಿಗಳು ಅಥವಾ ಇತರ ನಾಯಕರು ಜಾತಿ ಅಥವಾ ಕೋಮುವಾದದ ಆಧಾರದ ಮೇಲೆ ಮತ ಕೇಳುವುದನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ. ಧಾರ್ಮಿಕ ಕ್ಷೇತ್ರಗಳನ್ನು ಚುನಾವಣಾ ಪ್ರಚಾರದ ವೇದಿಕೆಯಾಗಿ ಬಳಸಿಕೊಳ್ಳಬಾರದು.

4. ಎಲ್ಲ ಪಕ್ಷಗಳು ಮತ್ತು ಅಭ್ಯರ್ಥಿಗಳು ಮತದಾರರಿಗೆ ಲಂಚ ನೀಡುವುದು, ಮತದಾರರಿಗೆ ಬೆದರಿಕೆ ಹಾಕುವುದು, ಮತದಾರರ ಸೋಗು ಹಾಕುವುದು, ಮತಗಟ್ಟೆಗಳ 100 ಮೀಟರ್ ವ್ಯಾಪ್ತಿಯಲ್ಲಿ ಪ್ರಚಾರ ನಡೆಸುವುದು, ಮತದಾನಕ್ಕೆ 48 ಗಂಟೆಗಳ ಮುಂಚಿತವಾಗಿ ನಿಗದಿತ ಅವಧಿಯಲ್ಲಿ ಸಾರ್ವಜನಿಕ ಸಭೆಗಳನ್ನು ನಡೆಸುವುದು ಮುಂತಾದ ಭ್ರಷ್ಟ ಪದ್ಧತಿಗಳನ್ನು ತಪ್ಪಿಸಬೇಕು ಎಂದು ಚುನಾವಣಾ ಆಯೋಗ ಸ್ಪಷ್ಟಪಡಿಸಿದೆ.

5. ವ್ಯಕ್ತಿಗಳ ಅಭಿಪ್ರಾಯಗಳು ಅಥವಾ ಚಟುವಟಿಕೆಗಳ ವಿರುದ್ಧ ಪ್ರತಿಭಟಿಸುವ ಮೂಲಕ ಅವರ ಮನೆಗಳ ಮುಂದೆ ಪ್ರದರ್ಶನಗಳು ಅಥವಾ ಪಿಕೆಟಿಂಗ್ ಅನ್ನು ಚುನಾವಣಾ ಸಮಿತಿಯು ನಿಷೇಧಿಸುತ್ತದೆ.

6. ಯಾವುದೇ ವ್ಯಕ್ತಿಯ ಜಮೀನು, ಕಟ್ಟಡವನ್ನು ಅನುಮತಿಯಿಲ್ಲದೆ ಧ್ವಜಗಳು, ಬ್ಯಾನರ್‌ಗಳು, ಸೂಚನೆಗಳು ಮತ್ತು ಘೋಷಣೆಗಳನ್ನು ಬರೆಯಲು ಬಳಸಲು ಯಾವುದೇ ರಾಜಕೀಯ ಪಕ್ಷಗಳು ಅಥವಾ ಅಭ್ಯರ್ಥಿಗಳು ಮತ್ತು ಅವರ ಅನುಯಾಯಿಗಳಿಗೆ ಅನುಮತಿ ಇರುವುದಿಲ್ಲ.

7. ರಾಜಕೀಯ ಪಕ್ಷ ಅಥವಾ ಅಭ್ಯರ್ಥಿಯು ಯಾವುದೇ ಉದ್ದೇಶಿತ ಸಭೆಯ ಸ್ಥಳ ಮತ್ತು ಸಮಯವನ್ನು ಭದ್ರತಾ ವ್ಯವಸ್ಥೆಗಳನ್ನು ಹಾಕಲು ಸಾಕಷ್ಟು ಮುಂಚಿತವಾಗಿ ಸ್ಥಳೀಯ ಪೊಲೀಸ್ ಅಧಿಕಾರಿಗಳಿಗೆ ತಿಳಿಸಬೇಕು. ಧ್ವನಿವರ್ಧಕಗಳು ಅಥವಾ ಸ್ಥಳೀಯ ಪ್ರಾಧಿಕಾರವು ಸೂಚಿಸಿದಂತೆ ಯಾವುದೇ ಸೌಲಭ್ಯಕ್ಕಾಗಿ ಸರಿಯಾದ ಅನುಮತಿಯನ್ನು ಪಡೆಯಬೇಕು.

8. ಸಂಘಟಿತ ಮೆರವಣಿಗೆಯ ಬಗ್ಗೆ ಸ್ಥಳೀಯ ಪೊಲೀಸ್ ಅಧಿಕಾರಿಗಳಿಗೆ ಸಮರ್ಪಕವಾಗಿ ಮುಂಚಿತವಾಗಿಯೇ ಸೂಚನೆಯನ್ನು ನೀಡಬೇಕು. ಚುನಾವಣಾ ಆಯೋಗದ ಮಾದರಿ ನೀತಿ ಸಂಹಿತೆ ಅಂತಹ ಪ್ರಚಾರದ ಸಮಯದಲ್ಲಿ ನೆನಪಿನಲ್ಲಿಟ್ಟುಕೊಳ್ಳಬೇಕಾದ ನಿಯಮಗಳನ್ನು ರೂಪಿಸಿದೆ. ಸಂಚಾರಕ್ಕೆ ಯಾವುದೇ ಅಡಚಣೆಯಾಗದಂತೆ ಸಂಘಟಕರು ಮುಂಚಿತವಾಗಿಯೇ ಕ್ರಮಕೈಗೊಳ್ಳಬೇಕು. ರಾಜಕೀಯ ಪಕ್ಷಗಳು ಅಥವಾ ಅಭ್ಯರ್ಥಿಗಳು ಗರಿಷ್ಠ ಪ್ರಮಾಣದಲ್ಲಿಇಂತಹ ಮೆರವಣಿಗೆಗಳ ಮೇಲೆ ಹಿಡಿತ ಸಾಧಿಸಬೇಕು. ಮೆರವಣಿಗೆಗಳಲ್ಲಿ ದುರುಪಯೋಗವಾಗಬಲ್ಲ ಪ್ಲಕಾರ್ಡ್‌ ಅಥವಾ ಬರೆಹಗಳನ್ನು ಪ್ರದರ್ಶಿಸಲು ಅಥವಾ ವಿರೋಧ ಪಕ್ಷದ ಮತ್ತು ಅದರ ನಾಯಕರ ಪ್ರತಿಕೃತಿ ಒಯ್ಯುವುದಕ್ಕೆ ಅನುಮತಿ ಇಲ್ಲ.

9. ಮತದಾನದ ದಿನ, ಎಲ್ಲ ರಾಜಕೀಯ ಪಕ್ಷಗಳು ಮತ್ತು ಅಭ್ಯರ್ಥಿಗಳು ಶಾಂತಿಯುತ ಮತ್ತು ಕ್ರಮಬದ್ಧವಾದ ಮತದಾನವನ್ನು ಖಚಿತಪಡಿಸಿಕೊಳ್ಳಲು ಚುನಾವಣಾ ಕರ್ತವ್ಯದಲ್ಲಿರುವ ಅಧಿಕಾರಿಗಳಿಗೆ ಸಹಕರಿಸಬೇಕು. ಅವರು ಮತದಾನದ ದಿನದಂದು ಮತ್ತು ಅದಕ್ಕೂ ಮುನ್ನ 48 ಗಂಟೆಗಳ ಅವಧಿಯಲ್ಲಿ ಮದ್ಯವನ್ನು ನೀಡುವುದನ್ನು ಅಥವಾ ವಿತರಿಸುವುದನ್ನು ತಡೆಯಬೇಕು.

10. ಮತದಾರರನ್ನು ಹೊರತುಪಡಿಸಿ, ಭಾರತದ ಚುನಾವಣಾ ಆಯೋಗದಿಂದ ಮಾನ್ಯವಾದ ಪಾಸ್ ಇಲ್ಲದ ಯಾರಿಗೂ ಮತಗಟ್ಟೆಗಳನ್ನು ಪ್ರವೇಶಿಸಲು ಅನುಮತಿಸಲಾಗುವುದಿಲ್ಲ.

11. ಕೇಂದ್ರ ಅಥವಾ ರಾಜ್ಯಗಳ ಆಡಳಿತ ಪಕ್ಷವು ಚುನಾವಣಾ ಪ್ರಚಾರದ ಉದ್ದೇಶಗಳಿಗಾಗಿ ಅಧಿಕೃತ ಅಥವಾ ಅಧಿಕಾರ ಸ್ಥಾನವನ್ನು ಬಳಸುವುದನ್ನು ಸೂಚಿಸುವ ಅಭ್ಯಾಸಗಳಲ್ಲಿ ತೊಡಗುವುದಿಲ್ಲ ಎಂದು ಖಚಿತಪಡಿಸಿಕೊಳ್ಳಬೇಕು. ಮಂತ್ರಿಗಳು ತಮ್ಮ ಅಧಿಕೃತ ಭೇಟಿಯನ್ನು ಚುನಾವಣಾ ಪ್ರಚಾರಗಳೊಂದಿಗೆ ಸಂಯೋಜಿಸಬಾರದು ಮತ್ತು ಪ್ರಚಾರಕ್ಕಾಗಿ ಅಧಿಕೃತ ಯಂತ್ರಗಳನ್ನು ಅಥವಾ ಸಿಬ್ಬಂದಿಯನ್ನು ಬಳಸಬಾರದು.

12. ಚುನಾವಣೆಗೆ ಸಂಬಂಧಿಸಿ ಮೈದಾನಗಳು, ಹೆಲಿಪ್ಯಾಡ್‌ಗಳಂತಹ ಸಾರ್ವಜನಿಕ ಸ್ಥಳಗಳು ಆಡಳಿತ ಪಕ್ಷದ ಏಕಸ್ವಾಮ್ಯಕ್ಕೆ ಒಳಗಾಗಬಾರದು. ಇತರ ಪಕ್ಷಗಳು ಮತ್ತು ಅಭ್ಯರ್ಥಿಗಳು ಅಂತಹ ಸ್ಥಳಗಳು ಮತ್ತು ಸೌಲಭ್ಯಗಳನ್ನು ಆಡಳಿತ ಪಕ್ಷವು ಬಳಸುವ ಅದೇ ಷರತ್ತುಗಳು ಮತ್ತು ನಿಯಮಗಳ ಮೇಲೆ ಬಳಸಲು ಅನುಮತಿಸಬೇಕು.

Model Code of Conduct: ಕರ್ನಾಟಕ ವಿಧಾನಸಭೆ ಚುನಾವಣೆಗೆ ದಿನಾಂಕ ಫಿಕ್ಸ್‌ ಆಯಿತು. ಮಾದರಿ ನೀತಿ ಸಂಹಿತೆ (Model Code of Conduct) ಯೂ ಜಾರಿಗೆ ಬಂತು. ಏನಿದು ಮಾದರಿ ನೀತಿ ಸಂಹಿತೆ, ಇಲ್ಲಿದೆ 12 ಅಂಶಗಳ ವಿವರ.

Karnataka Polls 2023: ಚುನಾವಣೆ ಘೋಷಣೆಗೆ ಮುನ್ನ ಪ್ರಜಾಧ್ವನಿ ಯಾತ್ರೆಯಲ್ಲಿ ಜನರೆಡೆಗೆ 500 ರೂಪಾಯಿ ನೋಟುಗಳನ್ನೆಸೆದ ಡಿಕೆಶಿ- ವಿಡಿಯೋ ಔಟ್‌

ಕರ್ನಾಟಕ ವಿಧಾನಸಭೆ ಚುನಾವಣೆ ಘೋಷಣೆಗೆ ಮೊದಲು, ಕರ್ನಾಟಕ ಪ್ರದೇಶ ಕಾಂಗ್ರೆಸ್‌ ಅಧ್ಯಕ್ಷ ಡಿ.ಕೆ.ಶಿವಕುಮಾರ್‌ ಅವರು ಪ್ರಜಾಧ್ವನಿ ಯಾತ್ರೆ ಸಂದರ್ಭದಲ್ಲಿ 500 ರೂಪಾಯಿ ನೋಟುಗಳನ್ನು ಎಸೆದ ದೃಶ್ಯವಿರುವ ವಿಡಿಯೋ ಬಹಿರಂಗವಾಗಿದೆ.

ಎಎನ್‌ಐ ಸುದ್ದಿ ಸಂಸ್ಥೆ ಈ ವಿಡಿಯೋವನ್ನು ಟ್ವೀಟ್‌ ಮಾಡಿದೆ. ಮಂಡ್ಯ ಜಿಲ್ಲೆ ಶ್ರೀರಂಗಪಟ್ಟಣದಲ್ಲಿ ʻಪ್ರಜಾಧ್ವನಿ ಯಾತ್ರೆʼ ಆಯೋಜನೆ ಆಗಿದ್ದ ವೇಳೆ ಬೇವಿನಹಳ್ಳಿ ಸಮೀಪ ಈ ಘಟನೆ ನಡೆದಿದೆ. ಪ್ರಜಾಧ್ವನಿ ಬಸ್‌ನ ಸಮೀಪ ಬಂದ ಕಲಾವಿದರ ಕಡೆಗೆ 500 ರೂಪಾಯಿಯ ಕೆಲವು ನೋಟುಗಳನ್ನು ಎಸೆದ ದೃಶ್ಯ ವಿಡಿಯೋದಲ್ಲಿ ದಾಖಲಾಗಿದೆ.

<blockquote class="twitter-tweet"><a href="https://twitter.com/hashtag/WATCH?src=hash&amp;ref_src=twsrc%5Etfw">#WATCH</a> | Karnataka Congress Chief DK Shivakumar was seen throwing ₹500 currency notes on the artists near Bevinahalli in Mandya district during the ‘Praja Dhwani Yatra’ organized by Congress in Srirangapatna. (28.03) <a href="https://t.co/aF2Lf0pksi">pic.twitter.com/aF2Lf0pksi</a>&mdash; ANI (@ANI) <a href="https://twitter.com/ANI/status/1640903912227045376?ref_src=twsrc%5Etfw">March 29, 2023</a></blockquote> <script async src="https://platform.twitter.com/widgets.js" charset="utf-8"></script>

ಶಾಸಕರ ಖರೀದಿ ಪ್ರಯತ್ನವನ್ನು ಕಾಂಗ್ರೆಸ್‌ ಮಾಡುತ್ತಿದೆ ಎಂದು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಮಂಗಳವಾರ ಆರೋಪಿಸಿದ ಬೆನ್ನಿಗೆ, ಡಿಕೆಶಿ ಅವರ ಈ ವಿಡಿಯೋ ಸಂಚಲನ ಮೂಡಿಸಿದೆ.

ಕಾಂಗ್ರೆಸ್‌ ಪಕ್ಷ ಈಗಾಗಲೇ 124 ಕ್ಷೇತ್ರಗಳ ಅಭ್ಯರ್ಥಿಗಳನ್ನು ಅಂತಿಮಗೊಳಿಸಿ ಪಟ್ಟಿಯನ್ನು ಬಿಡುಗಡೆ ಮಾಡಿದೆ. ಇನ್ನೂ 100 ಕ್ಷೇತ್ರಗಳ ಅಭ್ಯರ್ಥಿಗಳ ಆಯ್ಕೆ ಇನ್ನೂ ಅಂತಿಮವಾಗಿಲ್ಲ.

ಗಮನಿಸಬಹುದಾದ ಸುದ್ದಿಗಳು

ಪಕ್ಷ ಒಪ್ಪಿದ್ರೆ 2 ಕ್ಷೇತ್ರಗಳಲ್ಲಿ ಸ್ಪರ್ಧಿಸುತ್ತೇನೆಂದ ಸಿದ್ದರಾಮಯ್ಯ; ವರುಣಾ ಜೊತೆಗೆ ಕೋಲಾರ ಅಥವಾ ಬಾದಾಮಿ?

ವಿಪಕ್ಷ ನಾಯಕ ಸಿದ್ದರಾಮಯ್ಯ ಅವರು ವರುಣಾ ಕ್ಷೇತ್ರದಲ್ಲಿ ಸ್ಪರ್ಧಿಸುವುದು ಪಕ್ಕಾ ಆಗಿದೆ. ಇದರ ಜೊತೆಗೆ ಪಕ್ಷ ಒಪ್ಪಿದರೆ ಮತ್ತೊಂದು ಕ್ಷೇತ್ರದಲ್ಲಿ ಕಣಕ್ಕಿಳಿಯಲು ಬಯಸುತ್ತಿರುವುದಾಗಿ ಹೇಳಿದ್ದಾರೆ. ಆ ಕ್ಷೇತ್ರ ಯಾವುದೆಂದು ತಿಳಿಸಿದ್ದಾರೆ. <a class="manualbacklink" target="_blank" href="https://kannada.hindustantimes.com/karnataka/karnataka-assembly-election-siddaramaiah-says-he-wants-to-contest-from-2-constituencies-181679796043841.html" rel="dofollow">ವಿವರ ಓದಿಗೆ ಇಲ್ಲಿ ಕ್ಲಿಕ್‌ ಮಾಡಿ</a>

ವಿಧಾನಸಭೆ ಚುನಾವಣೆ: ಕಾಂಗ್ರೆಸ್ ಅಭ್ಯರ್ಥಿಗಳ ಮೊದಲ ಪಟ್ಟಿ ಬಿಡುಗಡೆ; ಮಾಜಿ ಸಿಎಂ ಸಿದ್ದರಾಮಯ್ಯ ಕ್ಷೇತ್ರವೂ ಫಿಕ್ಸ್

ವಿಧಾನಸಭೆ ಚುನಾವಣೆಗೆ ಕಾಂಗ್ರೆಸ್ ಅಭ್ಯರ್ಥಿಗಳ ಮೊದಲ ಪಟ್ಟಿ ಬಿಡುಗಡೆಯಾಗಿದ್ದು, ವಿಪಕ್ಷ ನಾಯಕ ಸಿದ್ದರಾಮಯ್ಯ ಸ್ಪರ್ಧಿಸುವ ಕ್ಷೇತ್ರವೂ ಘೋಷಣೆಯಾಗಿದೆ. 124 ಕ್ಷೇತ್ರಗಳಿಗೆ ಘೋಷಿಸಿರುವ ಅಭ್ಯರ್ಥಿಗಳ ಪಟ್ಟಿಯಲ್ಲಿ ಕ್ಷೇತ್ರ ಹುಡುಕಾಟದಲ್ಲಿದ್ದ ಮಾಜಿ ಸಿಎಂ ಸಿದ್ದರಾಮಯ್ಯ ಅವರ ಸ್ಪರ್ಧೆಯ ಕಣವೂ ಫಿಕ್ಸ್ ಆಗಿದೆ. ಕೆಪಿಸಿಸಿ ಅಧ್ಯಕ್ಷ ಡಿಕೆ ಶಿವಕುಮಾರ್ ಕನಕಪುರದಿಂದ ಸ್ಪರ್ಧಿಸಿದರೆ, ವಿಪಕ್ಷ ನಾಯಕ ಸಿದ್ದರಾಮಯ್ಯ ವರುಣಾ ವಿಧಾನಸಭಾ ಕೇತ್ರದಿಂದ ಕಣಕ್ಕಿಳಿಯಲಿದ್ದಾರೆ. <a class="manualbacklink" target="_blank" href="https://kannada.hindustantimes.com/karnataka/assembly-election-2023-congress-announces-the-first-list-of-124-candidates-for-karnataka-assembly-elections-181679712151008.html" rel="dofollow">ವಿವರ ಓದಿಗೆ ಇಲ್ಲಿ ಕ್ಲಿಕ್‌ ಮಾಡಿ</a>

ತಂದೆ-ಮಗ, 6 ಮಂದಿ ಮಹಿಳೆಯರು, 8 ಮುಸ್ಲಿಂರಿಗೆ ಟಿಕೆಟ್ ಸೇರಿ ಕಾಂಗ್ರೆಸ್ ಅಭ್ಯರ್ಥಿಗಳ ಮೊದಲ ಪಟ್ಟಿ ವಿಶೇಷತೆಗಳಿವು

ರಾಜ್ಯ ವಿಧಾನಸಭೆ ಚುನಾವಣೆಗೆ ಕಾಂಗ್ರೆಸ್ ಅಭ್ಯರ್ಥಿಗಳ ಮೊದಲ ಪಟ್ಟಿಯನ್ನು ನಿನ್ನೆ (ಮಾರ್ಚ್ 25) ಬಿಡುಗಡೆ ಮಾಡಿದ್ದು, ಹಲವು ವಿಶೇಷತೆಗಳಿಂದ ಕೂಡಿದೆ. ಅಳೆದು ತೂಗಿ ಅಖೈರುಗೊಳಿಸಿರುವ ಈ ಲಿಸ್ಟ್ ನಲ್ಲಿ 8 ಮಂದಿ ಮುಸ್ಲಿಂರು, 6 ಮಂದಿ ಮಹಿಳೆಯರಿಗೆ ಟಿಕೆಟ್ ಘೋಷಿಸಲಾಗಿದೆ. ಅಪ್ಪ-ಮಗ, ಅಪ್ಪ-ಮಗಳಿಗೂ ಮಣೆ ಹಾಕಲಾಗಿದೆ. ಇದರಲ್ಲಿ ಪಕ್ಷಾಂತರಿಗಳೂ ಇದ್ದಾರೆ. <a class="manualbacklink" target="_blank" href="https://kannada.hindustantimes.com/karnataka/karnataka-assembly-election-congress-1st-list-of-candidates-has-6-women-and-8-muslims-181679791679340.html" rel="dofollow">ಪೂರ್ಣ ವರದಿಗೆ ಇಲ್ಲಿ ಕ್ಲಿಕ್‌ ಮಾಡಿ</a>

ಚುನಾವಣೆ ಎದುರಾಗಿದೆ; ಬೊಮ್ಮಾಯಿ ಸಂಪುಟ ವಿಸ್ತರಣೆ ಆಗಲೇ ಇಲ್ಲ...

Bommai's cabinet expansion Explainer: ಕಳೆದ ಒಂದೂವರೆ ವರ್ಷದ ಅವಧಿಯಲ್ಲಿ ಬೊಮ್ಮಾಯಿ ಸಚಿವ ಸಂಪುಟ ವಿಸ್ತರಣೆಗೆ ಸಂಬಂಧಿಸಿದ ಸುದ್ದಿ ಅನೇಕ ಬಾರಿ ಪ್ರಕಟವಾಗಿದೆ. ಆಕಾಂಕ್ಷಿಗಳಲ್ಲಿ ನಿರೀಕ್ಷೆ ಹುಟ್ಟಿಸುತ್ತ ಸಾಗಿದ, ಬೊಮ್ಮಾಯಿ ಸಚಿವ ಸಂಪುಟ ವಿಸ್ತರಣೆ ಎಂಬ ʻಮಹತ್ಕಾರ್ಯʼ ಈಡೇರಲೇ ಇಲ್ಲ. <a class="manualbacklink" target="_blank" href="https://kannada.hindustantimes.com/karnataka/bommai-s-cabinet-expansion-why-basvaraja-bommai-s-cabinet-expansion-never-happened-181680008227844.html" rel="dofollow">ಪೂರ್ಣ ವರದಿಗೆ ಇಲ್ಲಿ ಕ್ಲಿಕ್‌ ಮಾಡಿ</a>

Karnataka Polls 2023: ಕರ್ನಾಟಕ ವಿಧಾನಸಭೆ ಚುನಾವಣೆಗೆ ವೇದಿಕೆ ಸಿದ್ಧವಾಗಿದೆ. ವಿಧಾನಸಭೆ ಚುನಾವಣೆ ಘೋಷಣೆಗೆ ಮೊದಲು ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್‌ ಅವರು ಜನರೆಡೆಗೆ 500 ರೂಪಾಯಿ ನೋಟುಗಳನ್ನು ಎಸೆದ ವಿಡಿಯೋ ಬಹಿರಂಗವಾಗಿದೆ.

Umesh Kumar S