Sunil Kanugolu: ತೆಲಂಗಾಣ ಚುನಾವಣೆ ಗೆಲ್ಲಲು ಕಾಂಗ್ರೆಸ್‌ಗೆ 6 ಗ್ಯಾರೆಂಟಿ ಆಸರೆ, ಸುನಿಲ್ ಕನುಗೋಲು ‘ಚಾಣಕ್ಯ ತಂತ್ರ’

paragraph

ಕರ್ನಾಟಕದಲ್ಲಿ ಕಾಂಗ್ರೆಸ್ ಪಕ್ಷವನ್ನು ಅಧಿಕಾರ ಗದ್ದುಗೆಯಲ್ಲಿ ಕೂರಿಸಿದ ಚುನಾವಣಾ ತಂತ್ರಗಾರ ಸುನಿಲ್ ಕನುಗೋಲು ತೆಲಂಗಾಣ ಚುನಾವಣೆಯಲ್ಲೂ ತಮ್ಮ ತಂತ್ರಗಾರಿಕೆಯ ಚಮತ್ಕಾರ ನೋಡಲು ಪ್ರಯತ್ನಿಸುತ್ತಿದ್ದಾರೆ. ತೆಲಂಗಾಣದಲ್ಲಿ ನಾಳೆ (ನ.30) ಮತದಾನ ನಡೆಯುತ್ತಿದ್ದು, ಕರ್ನಾಟಕ ಮಾದರಿಯಲ್ಲೆ ಮತದಾರರಿಗೆ ಕಾಂಗ್ರೆಸ್ ಪಕ್ಷ ನೀಡಿದ 5 ಗ್ಯಾರೆಂಟಿ ಹೇಗೆ ಕೆಲಸ ಮಾಡಲಿದೆ ಎಂಬುದರ ನಿರ್ಣಯ ಮತಪೆಟ್ಟಿಗೆಯಲ್ಲಿ ಭದ್ರವಾಗಲಿದೆ.

<h2>ತೆಲಂಗಾಣದಲ್ಲಿ 6 ಗ್ಯಾರೆಂಟಿಯ ಅಭಯಹಸ್ತ </h2>1. ಕರ್ನಾಟಕ ಮಾದರಿ ತಂತ್ರಗಾರಿಕೆ - ಸುನಿಲ್ ಕನುಗೋಲು ಮತ್ತು ಅವರ ತಂಡ ಕರ್ನಾಟಕದ 5 ಗ್ಯಾರೆಂಟಿ ಮಾದರಿಯಲ್ಲೇ 6 ಗ್ಯಾರೆಂಟಿಗಳನ್ನು ತೆಲಂಗಾಣದಲ್ಲೂ ಕಾಂಗ್ರೆಸ್‌ ಪ್ರಚಾರ ಅಭಿಯಾನಕ್ಕೆ ಬಳಸಲು ಸಲಹೆ ನೀಡಿದೆ. 6 ಗ್ಯಾರೆಂಟಿಗಳು ಎಂದರೆ ಅಭಯ ಹಸ್ತ ಎಂದೇ ಕಾಂಗ್ರೆಸ್ ಬಿಂಬಿಸಿದ್ದು, ತೆಲಂಗಾಣದಲ್ಲಿ ಇದು ಯಾವ ರೀತಿ ಪವಾಡ ಮಾಡಲಿದೆ ಎಂಬ ಕುತೂಹಲ ಕೆರಳಿಸಿದೆ.

2. ಆಡಳಿತ ವಿರೋಧಿ ಅಲೆಯ ಸೃಷ್ಟಿ - ತೆಲಂಗಾಣ ರಾಜ್ಯ ರಚನೆಯಾದ ಅಂದಿನಿಂದ ಅಂದರೆ 2014ರಿಂದ ಕೆ.ಚಂದ್ರ ಶೇಖರ ರಾವ್ ಅವರೇ ಮುಖ್ಯಮಂತ್ರಿಯಾಗಿದ್ದು, ಅವರ ಪಕ್ಷ ಆಡಳಿತದಲ್ಲಿದೆ. ಆದರೆ ಇದೇ ಮೊದಲ ಸಲ ಆಡಳಿತ ವಿರೋಧಿ ಅಲೆ ನಿರ್ಮಾಣವಾಗಿದ್ದು, ಅದರ ಪ್ರಯೋಜನ ಪಡೆಯಲು ಕಾಂಗ್ರೆಸ್ ಕೂಡ ಮುಂದಾಗಿದೆ. ಕರ್ನಾಟಕದ ಗೆಲುವು ಇದಕ್ಕೆ ಉತ್ತೇಜನ ನೀಡಿದೆ.

3. ಕಾಂಗ್ರೆಸ್ ಸಿದ್ಧಾಂತ ಮತ್ತು ರಾಜಕೀಯ ತಂತ್ರಗಾರಿಕೆ - ಚುನಾವಣಾ ತಂತ್ರಗಾರಿಕೆಯಲ್ಲಿ ಸುನಿಲ್ ಕನಗೋಲು ಅವರಿಗೆ ಇರುವ ಪರಿಣತಿಯನ್ನು ಕಾಂಗ್ರೆಸ್ ಪೂರ್ಣ ಪ್ರಮಾಣದಲ್ಲಿ ಬಳಸುತ್ತಿದೆ. ಹೀಗಾಗಿ ಪಕ್ಷದ ಅತಿಮುಖ್ಯ ಸಭೆ ಮತ್ತು ಅಭ್ಯರ್ಥಿಗಳ ಆಯ್ಕೆ ಸಂದರ್ಭದಲ್ಲೂ ಸುನಿಲ್ ಅಲ್ಲಿ ಹಾಜರಿದ್ದರು.

4. ಐದು ಸದಸ್ಯರ ಚುರುಕು ತಂಡ - ಸುನಿಲ್ ಕನಗೋಲು ಅವರ ತಂಡದಲ್ಲಿರುವುದು ಐವರು. ಈ 5 ಸದಸ್ಯರು ಚುನಾವಣೆಗೆ ಸಂಬಂಧಿಸಿದ ಪ್ರಮುಖ ಕೆಲಸಗಳನ್ನು ನಿರ್ವಹಿಸುತ್ತಿದ್ದಾರೆ. ವಿಶೇಷವಾಗಿ ಆಯಾ ರಾಜ್ಯದ ರಾಜಕೀಯ, ಭೌಗೋಳಿಕ, ಸಾಮಾಜಿಕ ವಿಷಯಗಳನ್ನು ಕಲೆಹಾಕಿ ಅವುಗಳನ್ನು ಬಳಸಿಕೊಂಡು ರಾಜಕೀಯ ಅವಕಾಶಗಳನ್ನು ಸೃಷ್ಟಿಸಿ ಚುನಾವಣೆ ಗೆಲ್ಲುವುದಕ್ಕೆ ಯೋಜನೆ ರೂಪಿಸುವುದರಲ್ಲಿ ಈ ತಂಡ ಸೈ ಎನಿಸಿಕೊಂಡಿದೆ. ಕಾಂಗ್ರೆಸ್ ಪಕ್ಷದ ಪ್ರಣಾಳಿಕೆಯ ಬಹುಭಾಗ ಈ ತಂಡದ ಕೊಡುಗೆ.

5. ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಅವರ ಅತ್ಯಂತ ಜನಪ್ರಿಯವಾದ ಭಾರತ ಜೋಡೋ ಯಾತ್ರೆಯಲ್ಲಿ ಇವರು ಕೆಲಸ ಮಾಡಿದ್ದಾರೆ. ಸಿದ್ದರಾಮಯ್ಯ ಮತ್ತು ಡಿಕೆ ಶಿವಕುಮಾರ್ ಮೈತ್ರಿಗೆ ಕಾರಣವೂ ಇದೇ ಸುನಿಲ್. ಈ ಎಲ್ಲ ಕಾರಣಕ್ಕೆ ತೆಲಂಗಾಣದಲ್ಲೂ ಪಕ್ಷವನ್ನು ಮತ್ತೆ ತಳಮಟ್ಟದಿಂದ ಸಂಘಟಿಸಲು ಕಾಂಗ್ರೆಸ್ ಸುನಿಲ್ ಮೊರೆ ಹೋಗಿದೆ.

<h2>ಸುನಿಲ್ ಕನುಗೋಲು ಯಾರು, ಎಲ್ಲಿಯವರು </h2>ಸುನೀಲ್ ಕನುಗೋಲು ಅವರು ಮೂಲತಃ ಕರ್ನಾಟಕದ ಬಳ್ಳಾರಿಯವರು. ಹುಟ್ಟಿದ್ದು ಬೆಳೆದದ್ದು ಎಲ್ಲ ಚೆನ್ನೈನಲ್ಲಿ. ಅಮೆರಿಕದಲ್ಲಿ ಉನ್ನತ ಶಿಕ್ಷಣ ಪಡೆದ ಸುನಿಲ್ ಕನುಗೋಲು ಬಳಿಕ ಜಾಗತಿಕ ನಿರ್ವಹಣಾ ಸಲಹಾ ಸಂಸ್ಥೆ ಮೆಕ್ಕಿನ್ಸೆಯಲ್ಲಿ ಉದ್ಯೋಗಿಯಾಗಿದ್ದರು.

ಅಮೆರಿಕದಿಂದ ಭಾರತಕ್ಕೆ ಹಿಂದಿರುಗಿದ ಬಳಿಕ ಗುಜರಾತ್‌ನಲ್ಲಿ ರಾಜಕೀಯ ತಂತ್ರಗಾರಿಕೆ ಕೆಲಸಗಳಲ್ಲಿ ಭಾಗಿಯಾದರು. ಅವರು ಹಿರಿಯ ಚುನಾವಣಾ ತಂತ್ರಗಾರ ಪ್ರಶಾಂತ್ ಕಿಶೋರ್ ಅವರ ತಂಡದಲ್ಲಿ ಈ ಹಿಂದೆ ಕೆಲಸ ಮಾಡಿ ಅನುಭವ ಪಡೆದವರು. ಅಸೋಸಿಯೇಷನ್ ಆಫ್ ಬಿಲಿಯನ್ ಮೈಂಡ್ಸ್‌ ಅನ್ನು ಮುನ್ನಡೆಸಿದರು.

ತೆಲಂಗಾಣ ಚುನಾವಣೆಯಲ್ಲಿ ತಂತ್ರಗಾರಿಕೆ ಅಳವಡಿಸುವ ಮೊದಲು ಅವರು ಕರ್ನಾಟಕ ವಿಧಾನಸಭೆ ಚುನಾವಣೆಯಲ್ಲಿ ಕೆಲವು ಕ್ಷೇತ್ರಗಳನ್ನು ಹೊರತುಪಡಿಸಿ ಕಾಂಗ್ರೆಸ್ ಅಭ್ಯರ್ಥಿಗಳ ಆಯ್ಕೆ, ಪ್ರಚಾರಕ್ಕೆ ಸಂಬಂಧಿಸಿದಂತೆ ಯೋಜನೆಗಳನ್ನು ರೂಪಿಸಿದ್ದರು. ಕಾಂಗ್ರೆಸ್ ಪಕ್ಷದ ಅಭೂತಪೂರ್ವ ಗೆಲುವಿನ ಹಿಂದೆ ಇವರ ತಂತ್ರಗಾರಿಕೆ ಬಹಳ ಕೆಲಸ ಮಾಡಿದೆ.

ಉತ್ತರ ಪ್ರದೇಶದಲ್ಲಿ ಬಿಜೆಪಿ ಪರವಾಗಿಯೂ ಕೆಲಸ ಮಾಡಿರುವ ಇವರು 2017ರಲ್ಲಿ ಸಿಎಂ ಯೋಗಿ ಆದಿತ್ಯನಾಥ ಅವರ ಭರ್ಜರಿ ಗೆಲುವಿನ ಪ್ರಮುಖ ಪಾತ್ರ ವಹಿಸಿದ್ದರು. ಅದೇ ರೀತಿ 2019ರ ಲೋಕಸಭೆ ಚುನಾವಣೆಯಲ್ಲಿ ತಮಿಳುನಾಡಿನಲ್ಲಿ ಎಂಕೆ ಸ್ಟಾಲಿನ್‌ ಜತೆಗೆ ಕೆಲಸ ಮಾಡಿದ್ದು, ನಮ್ಮಕ್ಕು ನಾಮೇ (ನಮಗೆ ನಾವೇ) ಪ್ರಚಾರ ಅಭಿಯಾನ ನಡೆಸಿಕೊಟ್ಟರು. ಪರಿಣಾಮ ಡಿಎಂಕೆ ಮೈತ್ರಿಕೂಟ 39 ಲೋಕಸಭಾ ಸ್ಥಾನಗಳಲ್ಲಿ 38 ಗೆದ್ದುಕೊಂಡಿತು.

Explainer:ಛತ್ತೀಸಗಢದಲ್ಲಿ ಅಧಿಕಾರದ ಗದ್ದುಗೆ ಯಾರಿಗೆ ಸಿಗಬಹುದು: ಇಲ್ಲಿದೆ ವಿವರ

<ul><li>Chhattisgarh assembly Elections ದಟ್ಟಾರಣ್ಯದಿಂದ ಕೂಡಿರುವ ಗ್ರಾಮೀಣ ಪ್ರದೇಶವನ್ನೇ ಹೆಚ್ಚು ಹೊಂದಿರುವ ಛತ್ತೀಸಗಢ(Chhattisgarh) ವಿಧಾನಸಭೆ ಚುನಾವಣೆಯ ಹಿನ್ನೆಲೆ. ರಾಜಕೀಯ ಚಟುವಟಿಕೆ ಮತ್ತಿತರರ ವಿವರ ಇಲ್ಲಿದೆ.</li></ul>

Explainer: ರಾಜಸ್ಥಾನದಲ್ಲಿ ಮತ್ತೆ ಅಧಿಕಾರ ಬದಲಿಸುವರೇ ಮತದಾರ : ಹೀಗಿದೆ ಚುನಾವಣೆ ಚಿತ್ರಣ

<ul><li>Rajasthan Assembly elections &nbsp;ರಾಜಸ್ಥಾನದಲ್ಲಿ ವಿಧಾನಸಭೆ ಚುನಾವಣೆ ಮುಗಿದಿದೆ. ಇನ್ನು ಫಲಿತಾಂಶಕ್ಕೆ ಕಾಯುವ ಸಮಯ. ಹೇಗಿದೆ ಅಲ್ಲಿನ ಕಣ ಚಿತ್ರಣ…</li></ul>

Telangana Poll Strategists: ತೆಲಂಗಾಣ ಚುನಾವಣೆ ರಾಜಕಾರಣಿಗಳಿಗಷ್ಟೇ ಅಲ್ಲ, 20ಕ್ಕೂ ಹೆಚ್ಚು ಚುನಾವಣಾ ತಂತ್ರಗಾರರಿಗೂ ಸವಾಲು

ತೆಲಂಗಾಣ ಚುನಾವಣೆ ಹಲವರಿಗೆ ಪ್ರತಿಷ್ಠೆಯ ವಿಚಾರ. ಇಲ್ಲಿ ಸೋಲು ಗೆಲುವಿನ ಲೆಕ್ಕಾಚಾರ ರಾಜಕಾರಣಿಗಳಿಗಷ್ಟೇ ಅಲ್ಲ, ರಾಜಕೀಯ ಸಲಹೆಗಾರರು, ಚುನಾವಣಾ ತಂತ್ರಗಾರರಿಗೂ ಅಷ್ಟೇ ಮುಖ್ಯ.&nbsp;

Rat Mining: ಉತ್ತರಕಾಶಿ ಕಾರ್ಮಿಕರ ರಕ್ಷಣೆಗೆ ನಿಷೇಧಿತ ಇಲಿ ಬಿಲ ಗಣಿಗಾರಿಕೆ ಮತ್ತು ಇತರೆ ವಿಧಾನಗಳ ಬಳಕೆ, ಏನಿದು ಇಲಿ ಗಣಿಗಾರಿಕೆ

ಉತ್ತರಕಾಶಿ ಸುರಂಗ ಕುಸಿತಕ್ಕೆ ಸಿಲುಕಿ ಹದಿನೇಳು ದಿನಗಳಿಂದ ಸುರಂಗದೊಳಗೆ ಇದ್ದ ಕಾರ್ಮಿಕರನ್ನು ಮಂಗಳವಾರ (ನ.28) ರಕ್ಷಿಸಲಾಗಿದೆ. ಈ ರಕ್ಷಣಾ ಕಾರ್ಯಾಚರಣೆಯಲ್ಲಿ ಕೊನೆಯ ಹಂತದಲ್ಲಿ ನೆರವಿಗೆ ಬಂದ ಇಲಿ ಬಿಲ ಗಣಿಗಾರಿಕೆ ವಿಧಾನದ ಕುರಿತು ಮಾಹಿತಿ ಇಲ್ಲಿದೆ.&nbsp;

ಕರ್ನಾಟಕದಲ್ಲಿ ಕಾಂಗ್ರೆಸ್ ಪಕ್ಷದಕ್ಕೆ ಮತದಾರ ಆಡಳಿತ ಚುಕ್ಕಾಣಿ ನೀಡುವಂತೆ ಮಾಡಿದ ಚುನಾವಣಾ ತಂತ್ರಗಾರ ಸುನಿಲ್ ಕನುಗೋಲು ತೆಲಂಗಾಣ ಚುನಾವಣೆಯಲ್ಲೂ ತಮ್ಮ ತಂತ್ರಗಾರಿಕೆಯ ಚಮತ್ಕಾರ ನೋಡಲು ಪ್ರಯತ್ನಿಸುತ್ತಿದ್ದಾರೆ. ಅಲ್ಲೂ 5 ಗ್ಯಾರೆಂಟಿಯನ್ನೇ ಕಾಂಗ್ರೆಸ್‌ಗೆ ಗೆಲುವಿನ ಆಸರೆಯನ್ನಾಗಿ ಹಿಡಿಯಲು ಸಲಹೆ ನೀಡಿದ್ದು, ಫಲಿತಾಂಶಕ್ಕಾಗಿ ಎದುರು ನೋಡುತ್ತಿದ್ದಾರೆ.&nbsp;

Kannada Pustaka Habba: ಪುಸ್ತಕ ಪ್ರಿಯರ ಮನ ಗೆದ್ದ ರಾಷ್ಟ್ರೋತ್ಥಾನ ಸಾಹಿತ್ಯದ 3ನೇ ಕನ್ನಡ ಪುಸ್ತಕ ಹಬ್ಬ, ಡಿ.3ಕ್ಕೆ ಸಮಾರೋಪ

ಕನ್ನಡ, ಕರ್ನಾಟಕ ಭಾವ ಜಾಗೃತವಾಗುವ ಸಮಯವೇ ಕರ್ನಾಟಕ ರಾಜ್ಯೋತ್ಸವದ ಸಂದರ್ಭ. ಈ ಹಬ್ಬ ಒಂದು ತಿಂಗಳ ಕಾಲ ನಡೆಯುತ್ತಿರುತ್ತದೆ. ಹೀಗಾಗಿ ಅಲ್ಲಲ್ಲಿ ಸಾಹಿತ್ಯೋತ್ಸವ, ಕನ್ನಡ ಪುಸ್ತಕ ಪ್ರದರ್ಶನ ಮತ್ತು ಮಾರಾಟ, ಉಪನ್ಯಾಸಗಳು ಆಯೋಜನೆಯಾಗುತ್ತವೆ. ಇಂತಹ ಕಾರ್ಯಕ್ರಮಗಳ ನಡುವೆ ಗಮನಸೆಳೆಯುತ್ತಿರುವುದು ರಾಷ್ಟ್ರೋತ್ಥಾನ ಸಾಹಿತ್ಯದ ಕನ್ನಡ ಪುಸ್ತಕ ಹಬ್ಬ.

ಕೋವಿಡ್ ಸಂಕಷ್ಟದ ಅವಧಿಯಲ್ಲಿ ಶುರುವಾದದ್ದು ಈ ಪುಸ್ತಕ ಹಬ್ಬ. ಈ ವರ್ಷ ಮೂರನೇ ಆವೃತ್ತಿಯ ಕನ್ನಡ ಪುಸ್ತಕ ಹಬ್ಬ ನಡೆಯುತ್ತಿದೆ. ಬೆಂಗಳೂರು ಚಾಮರಾಜಪೇಟೆಯಲ್ಲಿರುವ ರಾಷ್ಟ್ರೋತ್ಥಾನದ ಕೇಶವ ಶಿಲ್ಪ ಸಭಾಂಗಣದಲ್ಲಿ ದೊಡ್ಡದೊಂದು ಪುಸ್ತಕ ಲೋಕ ತೆರೆದುಕೊಂಡಿದೆ. ನವೆಂಬರ್ 1ರಿಂದ ಶುರುವಾಗಿರುವ ಈ ಕನ್ನಡ ಪುಸ್ತಕ ಹಬ್ಬ ಈಗ ಕೊನೆಯ ವಾರಕ್ಕೆ ಕಾಲಿರಿಸಿದೆ. ಡಿಸೆಂಬರ್ 3ಕ್ಕೆ ಈ ಹಬ್ಬ ಸಂಪನ್ನಗೊಳ್ಳಲಿದೆ.

<h2>ಕನ್ನಡ ಪುಸ್ತಕ ಹಬ್ಬಕ್ಕೆ ಪುಸ್ತಕ ಪ್ರಿಯರಿಂದ ಉತ್ತಮ ಸ್ಪಂದನೆ</h2>ಪುಸ್ತಕಗಳ ಮಾರಾಟದ ದೃಷ್ಟಿಯಿಂದಲೂ ಓದುಗರಿಂದ ಉತ್ತಮ ಸ್ಪಂದನೆ ದೊರೆತಿದೆ. ರಾಷ್ಟ್ರೋತ್ಥಾನ ಸಾಹಿತ್ಯದ ಪ್ರಕಟನೆಗಳಲ್ಲದೆ ಡಿವಿಜಿ, ಎಸ್. ಎಲ್. ಭೈರಪ್ಪ, ಶಿವರಾಮ ಕಾರಂತ, ಕುವೆಂಪು, ಪೂರ್ಣಚಂದ್ರ ತೇಜಸ್ವಿ, ಅನಕೃ, ದೇವುಡು, ತರಾಸು, ಕೆ. ಎನ್. ಗಣೇಶಯ್ಯ, ಜೋಗಿ, ವಸುಧೇಂದ್ರ, ಕೆ. ಎಸ್. ನಾರಾಯಣಾಚಾರ್ಯ, ಸುಧಾ ಮೂರ್ತಿ ಸೇರಿದಂತೆ ಹಲವರು ಪ್ರಸಿದ್ಧ ಲೇಖಕರ ಪುಸ್ತಕಗಳು ಹೆಚ್ಚಿನ ಪ್ರಮಾಣದಲ್ಲಿ ಮಾರಾಟವಾಗುತ್ತಿವೆ. ರಾಷ್ಟ್ರೋತ್ಥಾನ ಸಾಹಿತ್ಯದ ಪುಸ್ತಕಗಳಲ್ಲದೆ, ಬೇರೆ ಬೇರೆ ಪ್ರಕಾಶಕರ - ಲೇಖಕರ ಪುಸ್ತಕಗಳಿಗೂ ವಿಶೇಷ ರಿಯಾಯಿತಿ ನೀಡುತ್ತಿರುವುದಕ್ಕೆ ಓದುಗರು ಸಂತಸ ವ್ಯಕ್ತಪಡಿಸುತ್ತಿದ್ದಾರೆ. ಕೆಲವರಂತೂ, 'ಮೂಲ ಪ್ರಕಾಶಕರೂ ನೀಡದ ರಿಯಾಯಿತಿ ನೀಡುತ್ತಿದ್ದೀರಿ' ಎಂದು ಹೇಳಿರುವುದಾಗಿ ಸಂಘಟಕರು ತಿಳಿಸಿದ್ದಾರೆ.

<h2>ಪುಸ್ತಕ ಪ್ರಪಂಚಕ್ಕೆ ಭೇಟಿ ನೀಡಿದ 10,000ಕ್ಕೂ ಹೆಚ್ಚು ಶಾಲಾ ವಿದ್ಯಾರ್ಥಿಗಳು</h2>ಈ ಸಲದ ಕನ್ನಡ ಪುಸ್ತಕ ಹಬ್ಬಕ್ಕೆ 10,000ಕ್ಕೂ ಹೆಚ್ಚು ಶಾಲಾ ವಿದ್ಯಾರ್ಥಿಗಳು ಭೇಟಿ ನೀಡಿರುವುದು ವಿಶೇಷ. ವಿಶಾಲ ಪುಸ್ತಕ ಪ್ರಪಂಚದೊಳಗೆ ಕಾಲಿಟ್ಟ ಅವರು ಪ್ರತಿ ವಿಭಾಗಕ್ಕೂ ಭೇಟಿ ನೀಡಿ ಪುಸ್ತಕಗಳನ್ನು ಗಮನಿಸಿದರು. ಮಕ್ಕಳ ವಿಭಾಗದಲ್ಲಿದ್ದ ಪುಸ್ತಕಗಳನ್ನು ಕೈಗೆತ್ತಿಕೊಂಡು ತಮಗೆ ಬೇಕಾದ ಪುಸ್ತಕಗಳನ್ನು ಆಯ್ಕೆ ಮಾಡಿ ಖರೀದಿಸಿದರಲ್ಲದೆ, ಅಲ್ಲೇ ಇದ್ದ ಸೆಲ್ಫಿ ಕಾರ್ನರ್‌ನಲ್ಲಿ ಸೆಲ್ಫಿ ತಗೊಂಡು ಸಂಭ್ರಮ ಪಟ್ಟರು.

Bengaluru News Kannada Pustaka Habba 2023 by Rashtrotthana Sahitya 33 days book exhibition will end on Dec 3 UKS

ಕಾಮಿಕ್‌ ಸರಣಿ, ಚಿತ್ರಕಥೆ ಪುಸ್ತಕಗಳಿಂದ ಹಿಡಿದು ಎಲ್ಲ ರೀತಿಯ ಮಕ್ಕಳ ಪುಸ್ತಕಗಳು ಒಂದೇ ಕಡೆ ಪ್ರದರ್ಶನ ಮತ್ತು ಮಾರಾಟಕ್ಕೆ ಇಟ್ಟಿರುವುದು ಖುಷಿಕೊಟ್ಟಿದೆ. ಎಲ್ಲದಕ್ಕೂ ಮಿಗಿಲಾಗಿ ಭಾರತದ ಪುರಾಣ ಪುರುಷರನ್ನು ಪರಿಚಯಿಸುವ ಭಾರತ-ಭಾರತಿ ಪುಸ್ತಕ ಸಂಪದ ಗಮನಸೆಳೆಯಿತು ಎಂದು 9ನೇ ತರಗತಿ ವಿದ್ಯಾರ್ಥಿ ಅಚಿಂತ್ಯ ಹೇಳಿದರು.

ಮಕ್ಕಳ ಸಾಹಿತ್ಯಕ್ಕೆ ಸಂಬಂಧಿಸಿ ದೊಡ್ಡ ಪ್ರಮಾಣದಲ್ಲಿ ಪುಸ್ತಕಗಳಿವೆ. ‘ಭಾರತ-ಭಾರತಿ ಪುಸ್ತಕ ಸಂಪದ’ದ ಎಂಟುನೂರಕ್ಕೂ ಹೆಚ್ಚು ಪುಸ್ತಕಗಳಲ್ಲದೆ, ಬೇರೆ ಬೇರೆ ಪ್ರಕಾಶಕರ ನೂರಾರು ವೈವಿಧ್ಯಮಯ ಪುಸ್ತಕಗಳನ್ನು ಪ್ರದರ್ಶಿಸಲಾಗಿದೆ. ಅಲ್ಲಿಯ ವೈವಿಧ್ಯವನ್ನು ಕಂಡು ಮಕ್ಕಳೂ ಸಂಭ್ರಮಿಸುತ್ತಿದ್ದಾರೆ ಎಂದು ಪ್ರಕಾಶಕರು ತಿಳಿಸಿದರು.

<h2>ಕನ್ನಡ ಪುಸ್ತಕ ಹಬ್ಬ 2023ರ ಪ್ರಮುಖಾಂಶ</h2>1. 33 ದಿನಗಳ ಪುಸ್ತಕ ಪ್ರದರ್ಶನ ಮತ್ತು ಮಾರಾಟ, ಶೇ. 50ರವರೆಗೂ ವಿಶೇಷ ರಿಯಾಯಿತಿ.

2. ರಾಷ್ಟ್ರೋತ್ಥಾನ ಸಾಹಿತ್ಯದ ಪ್ರಕಟನೆಗಳಲ್ಲದೆ, ಕನ್ನಡದ ಬಹುತೇಕ ಎಲ್ಲ ಪ್ರಕಾಶಕರ ಸದಭಿರುಚಿಯ ಸಾಹಿತ್ಯಗಳ ಪ್ರದರ್ಶನ ಮತ್ತು ಮಾರಾಟ.

3. ಕನ್ನಡದ ಹಿಂದಿನ ತಲೆಮಾರಿನ, ಹಿರಿಯ ತಲೆಮಾರಿನ ಲೇಖಕರ ಪುಸ್ತಕಗಳ ಜತೆಗೆ ಹೊಸಬರ ಪುಸ್ತಕಗಳ ಪ್ರದರ್ಶನ

4. ಪುಸ್ತಕ ಹಬ್ಬದಲ್ಲಿ 2 ಪುಸ್ತಕ ಬಿಡುಗಡೆ, 5 ಸಂವಾದಗಳು, 12 ವಿಶೇಷ ಉಪನ್ಯಾಸ, 16 ಸಾಂಸ್ಕೃತಿಕ ಕಾರ್ಯಕ್ರಮ

5. ಪುಸ್ತಕ ಹಬ್ಬದ ನಿಮಿತ್ತ ಎರಡು ಸ್ಪರ್ಧೆ, ಪುಸ್ತಕ ಹಬ್ಬಕ್ಕೆ ಭೇಟಿ ನೀಡಿದವರಿಗಾಗಿ ‘ಲಕ್ಕಿ ಡ್ರಾ’ ಪುಸ್ತಕ ಬಹುಮಾನ, ಸಮಾರೋಪದಲ್ಲಿ ಆಯ್ದ ಶಾಲೆಗಳಿಗೆ ಪುಸ್ತಕ ವಿತರಣೆ.

<h2>ಕನ್ನಡ ಪುಸ್ತಕ ಹಬ್ಬದಲ್ಲಿ ಇದುವರೆಗೆ ಏನೇನಾಯಿತು</h2>ಕಳೆದ ನಾಲ್ಕು ವಾರಗಳಲ್ಲಿ ಪುಸ್ತಕ ಹಬ್ಬದಲ್ಲಿ ವಿವಿಧ ರೀತಿಯ ಚಟುವಟಿಕೆಗಳು ನಡೆದಿವೆ. ನವೆಂಬರ್ 1ರಂದು ಪ್ರಸಿದ್ಧ ನಟ, ಕಲಾವಿದ ಸುಚೇಂದ್ರಪ್ರಸಾದ್ ಅವರು ಪುಸ್ತಕ ಹಬ್ಬವನ್ನು ಉದ್ಘಾಟಿಸಿದರು. ವಿಜಯ ಕರ್ನಾಟಕದ ಸಂಪಾದಕ ಸುದರ್ಶನ್ ಚನ್ನಂಗಿಹಳ್ಳಿ ಮತ್ತು ‘ಪ್ರಜ್ಞಾಪ್ರವಾಹ’ದ ರಾಷ್ಟ್ರೀಯ ಸಹ-ಸಂಯೋಜಕ ರಘುನಂದನ್ ಮುಖ್ಯ ಅತಿಥಿಗಳಾಗಿದ್ದರು. ಅಂದು ಸಂಜೆ ಪ್ರಸಿದ್ಧ ಶಿಕ್ಷಣ ತಜ್ಞ ಡಾ. ಗುರುರಾಜ ಕರಜಗಿ ಅವರು ‘ಸಂಸ್ಕೃತಿ’ ಪುಸ್ತಕವನ್ನು ಲೋಕಾರ್ಪಣೆ ಮಾಡಿದರು; ‘ಕನ್ನಡಪ್ರಭ’ ಮತ್ತು ‘ಸುವರ್ಣ ಸುದ್ದಿವಾಹಿನಿ’ಯ ಪ್ರಧಾನ ಸಂಪಾದಕ ರವಿ ಹೆಗಡೆ ಮುಖ್ಯ ಅತಿಥಿಗಳಾಗಿದ್ದರು.

ಪ್ರತೀ ಶನಿವಾರ ಭಾನುವಾರಗಳಂದು ಸಾಹಿತ್ಯ-ಸಂಸ್ಕೃತಿ-ರಾಷ್ಟ್ರೀಯತೆ-ಮಾಧ್ಯಮ ಮೊದಲಾದ ವಿಷಯಗಳ ಕುರಿತು ಕಾರ್ಯಕ್ರಮಗಳು ನಡೆದಿದ್ದು, ನವೆಂಬರ್ 4 ರಂದು ‘ಕನ್ನಡ ರಂಗಭೂಮಿ ಮತ್ತು ರಾಷ್ಟ್ರೀಯತೆ’ ವಿಷಯವಾಗಿ ಅಡ್ಡಂಡ ಕಾರ್ಯಪ್ಪ ‘ಭಾರತೀಯತೆಯ ಸತ್ತ್ವ’ ಕುರಿತು ಡಾ. ಅಜಕ್ಕಳ ಗಿರೀಶ್ ಭಟ್ ಮಾತನಾಡಿದರು. ನವೆಂಬರ್ 5 ರಂದು ನಿವೃತ್ತ ಭೂವಿಜ್ಞಾನಿ, ಪ್ರಸಿದ್ಧ ವಿಜ್ಞಾನ ಲೇಖಕ ಡಾ. ಟಿ. ಆರ್. ಅನಂತರಾಮು ಜತೆಗೆ ಸಂಸ್ಕೃತಿ ಚಿಂತಕಿ, ಅಂಕಣಕಾರ್ತಿ ಡಾ. ಆರತಿ ವಿ. ಬಿ. ಸಂವಾದ ನಡೆಸಿದರು.

ನವೆಂಬರ್ 11ರಂದು ಅಜಿತ್ ಹನಮಕ್ಕನವರ್ ಅವರು ‘ಪುಟ್ಟ ಇಸ್ರೇಲ್ ಕಲಿಸುವ ದಿಟ್ಟತನದ ಪಾಠಗಳು’ ವಿಷಯವಾಗಿ ಮಾತನಾಡಿದರೆ, ಐವರು ಯುವ ಮಿತ್ರರು (ಪ್ರೊ. ಚೇತನ್, ಸುದೀಪ್, ಸ್ಫೂರ್ತಿ ಮುರಳೀಧರ್, ಚಂದನಾ ವೆಂಕಟೇಶ್, ಕಿರಣಕುಮಾರ್ ವಿವೇಕವಂಶಿ) ‘ನಾನೇಕೆ ಓದುತ್ತೇನೆ?’ ಎಂಬ ಕುರಿತು ಚರ್ಚೆಯನ್ನು ನಡೆಸಿಕೊಟ್ಟರು. ನವೆಂಬರ್ 12ರಂದು ಬೆಂಗಳೂರಿನ ರಾಮಕೃಷ್ಣ ಮಠದ ಅಧ್ಯಕ್ಷ ಪೂ. ಸ್ವಾಮಿ ನಿತ್ಯಸ್ಥಾನಂದಜಿ ಮಹಾರಾಜ್ ‘ಸಾಹಿತ್ಯ ಸಾನ್ನಿಹಿತ್ಯ’ ಪುಸ್ತಕ ಲೋಕಾರ್ಪಣೆ ಮಾಡಿದರು. ದಿವಾಕರ ಹೆಗಡೆ ಪುಸ್ತಕವನ್ನು ಪರಿಚಯಿಸಿದರು. ಅದೇ ದಿನ ಸಂಜೆ 'ಕನ್ನಡ ಕವಿಗಳು ಕಂಡ ಭಾರತ' ವಿಷಯವಾಗಿ ಡಾ. ಬಿ. ವಿ. ವಸಂತಕುಮಾರ್ ವಿಶೇಷ ಉಪನ್ಯಾಸ ನೀಡಿದರು; ವಿಜಯವಾಣಿ ಪತ್ರಿಕೆಯ ಸಂಪಾದಕ ಕೆ. ಎನ್. ಚನ್ನೇಗೌಡ ಮುಖ್ಯ ಅತಿಥಿಯಾಗಿದ್ದರು.

ನವೆಂಬರ್ 18 ರಂದು ‘ಏಕರೂಪ ನಾಗರಿಕ ಸಂಹಿತೆ: ಸಾಧ್ಯತೆ-ಸವಾಲುಗಳು’ ವಿಷಯವಾಗಿ ಪ್ರೊ. ಎ. ಷಣ್ಮುಖ ವಿಶೇಷ ಉಪನ್ಯಾಸ ನೀಡಿದರು. ಬಹುಶ್ರುತ ವಿದ್ವಾಂಸ ಡಾ. ಶತಾವಧಾನಿ ಆರ್. ಗಣೇಶ್ ಅವರೊಂದಿಗೆ ‘ವ್ಯಾಸಂಗದ ಹವ್ಯಾಸ’ ವಿಷಯವಾಗಿ ಸಂವಾದ ನಡೆಯಿತು. ನವೆಂಬರ್ 19ರಂದು ‘ಕನ್ನಡ ಚಳವಳಿ: ನಡೆದುಬಂದ ದಾರಿ’ ವಿಷಯವಾಗಿ ಚಲುವಾದಿ ಜಗನ್ನಾಥ ಅವರಿಂದ ವಿಶೇಷ ಉಪನ್ಯಾಸ ನಡೆಯಿತು.

ನವೆಂಬರ್ 24, 25 - ಎರಡು ದಿಗಳ ಕಾಲ ನಾಲ್ಕು ವಿಶೇಷ ಉಪನ್ಯಾಸಗಳು ನಡೆದಿದ್ದು, ಪೂಜ್ಯ ಸಿದ್ಧೇಶ್ವರ ಸ್ವಾಮಿಗಳನ್ನು ಕುರಿತು ಸಂಗಮೇಶ್ ಪೂಜಾರ್, ಸ್ವ. ರಂಗಾ ಹರಿ ಅವರನ್ನು ಕುರಿತು ವಿ. ನಾಗರಾಜ್, ‘ಕನ್ನಡದ ವಿಶಿಷ್ಟ ಕೃತಿ - ಶಾಸನ ಪದ್ಯಮಂಜರಿ’ ಕುರಿತು ಡಾ. ಕೆ. ಆರ್. ಗಣೇಶ್, ‘ಕುವೆಂಪು ಕನ್ನಡಕ್ಕೆ ಒಲಿದು ಒಂದು ಶತಮಾನ’ ಕುರಿತು ಡಾ. ಜಿ. ಬಿ. ಹರೀಶ್ ಮಾತನಾಡಿದರು.

ವಾರದ ದಿನಗಳಲ್ಲಿ, ಹಲವು ಸಾಂಸ್ಕೃತಿಕ ಕಾರ್ಯಕ್ರಮಗಳೂ ನಡೆದಿದ್ದು, ಬೆಂಗಳೂರಿನಲ್ಲಿರುವ ಮೂರು ರಾಷ್ಟ್ರೋತ್ಥಾನ ವಿದ್ಯಾಕೇಂದ್ರಗಳ ವಿದ್ಯಾರ್ಥಿಗಳು ಮತ್ತು ರಾಷ್ಟ್ರೋತ್ಥಾನ ಸಂಗೀತ ನೃತ್ಯ ಕಲಾಕೇಂದ್ರದ ವಿದ್ಯಾರ್ಥಿಗಳು ಈ ಕಾರ್ಯಕ್ರಮಗಳನ್ನು ನಡೆಸಿಕೊಟ್ಟರು. ಕೆಂಪೇಗೌಡ ನಗರದಲ್ಲಿರುವ ಸದ್ಗುರು ಸಂಗೀತ ಶಾಲೆಯ ವಿದ್ಯಾರ್ಥಿಗಳಿಂದಲೂ ‘ದಾಸರಪದ ಗಾಯನ’ ಕಾರ್ಯಕ್ರಮ ನಡೆದಿದೆ.

ಪ್ರತಿದಿನ ಪುಸ್ತಕ ಹಬ್ಬಕ್ಕೆ ಭೇಟಿ ನೀಡುವವರಿಗಾಗಿ ‘ಲಕ್ಕಿ ಡ್ರಾ’ದ ವ್ಯವಸ್ಥೆ ಮಾಡಿದ್ದು, ವಿಜೇತರಿಗೆ ‘ಪುಸ್ತಕ ಬಹುಮಾನ’ ನೀಡಲಾಗುತ್ತಿದೆ. ಪುಸ್ತಕ ಹಬ್ಬದ ಪ್ರಯುಕ್ತ ಮಕ್ಕಳಿಗೆ ಗಾಯನ ಸ್ಪರ್ಧೆಯನ್ನೂ ಮಹಿಳೆಯರಿಗೆ ರಂಗೋಲಿ ಸ್ಪರ್ಧೆಯನ್ನು ನಡೆಸಲಾಗಿದೆ.

<h2>ಡಿ.2 ರಂದು ಹೊಸಕಾಲದ ಮಾಧ್ಯಮಗಳು : ಸಾಧ್ಯತೆ-ಸವಾಲು ಕುರಿತು ಡಿ. ಎಂ. ಘನಶ್ಯಾಮ ಮತ್ತು ರಮೇಶ ದೊಡ್ಡಪುರ ಸಂವಾದ</h2>ಡಿಸೆಂಬರ್ 2 ರಂದು ‘ನವೋತ್ಥಾನದ ಅಧ್ವರ್ಯು: ಸ್ವಾಮಿ ದಯಾನಂದ ಸರಸ್ವತಿ’ ವಿಷಯವಾಗಿ ಡಾ. ರೋಹಿಣಾಕ್ಷ ಶಿರ್ಲಾಲು ಮಾತನಾಡಲಿದ್ದಾರೆ. ಅದೇ ದಿನ ‘ಹೊಸಕಾಲದ ಮಾಧ್ಯಮಗಳು : ಸಾಧ್ಯತೆ-ಸವಾಲುಗಳು’ ವಿಷಯವಾಗಿ ಹಿಂದೂಸ್ತಾನ್ ಟೈಮ್ಸ್ ಕನ್ನಡದ ಸಂಪಾದಕ ಡಿ. ಎಂ. ಘನಶ್ಯಾಮ ಮತ್ತು ವಿಕ್ರಮ ವಾರಪತ್ರಿಕೆಯ ಸಂಪಾದಕ ರಮೇಶ ದೊಡ್ಡಪುರ ಸಂವಾದ ನಡೆಸಲಿದ್ದಾರೆ. ಡಿಸೆಂಬರ್ 3ರಂದು ಬೆಳಗ್ಗೆ, ‘ಸನಾತನ ಧರ್ಮ ಮತ್ತು ವಚನ ಸಾಹಿತ್ಯ’ ವಿಷಯವಾಗಿ ಡಾ. ಜ್ಯೋತಿ ಶಂಕರ್ ವಿಶೇಷ ಉಪನ್ಯಾಸ ನೀಡಲಿದ್ದಾರೆ.

<h2>ಇದೇ ಭಾನುವಾರ ಡಿಸೆಂಬರ್ 3ರಂದು ಸಮಾರೋಪ</h2>ಮೂವತ್ತಮೂರು ದಿನಗಳ ಈ ಪುಸ್ತಕ ಹಬ್ಬದಲ್ಲಿ ಈಗಾಗಲೇ ಇಪ್ಪತ್ತೇಳು ದಿನಗಳು ಕಳೆದಿದ್ದು, ಡಿಸೆಂಬರ್ 3, ಭಾನುವಾರ ಸಾಯಂಕಾಲ ಕನ್ನಡ ಪುಸ್ತಕ ಹಬ್ಬ ಮುಕ್ತಾಯಗೊಳ್ಳಲಿದೆ. ಸಮಾರೋಪ ಸಮಾರಂಭದಲ್ಲಿ ರಾಷ್ಟ್ರೋತ್ಥಾನ ಪರಿಷತ್ತಿನ ಅಧ್ಯಕ್ಷ ಎಂ. ಪಿ. ಕುಮಾರ್ ಅಧ್ಯಕ್ಷತೆ ವಹಿಸಲಿದ್ದು, ಕನ್ನಡ ವಿಶ್ವವಿದ್ಯಾಲಯದ ಕುಲಪತಿ ಡಾ. ಡಿ. ವಿ. ಪರಶಿವಮೂರ್ತಿ ಮುಖ್ಯ ಅತಿಥಿಗಳಾಗಿ ಆಗಮಿಸಲಿದ್ದಾರೆ. ಅಂದು ಕಾರ್ಯಕ್ರಮದಲ್ಲಿ, ದಾವಣಗೆರೆಯ ಸಾಹಿತ್ಯ ಪರಿಚಾರಕ ಉಮೇಶ್ ಅವರನ್ನು ಗೌರವಿಸಲಾಗುವುದು; ಕನ್ನಡ ಪುಸ್ತಕ ಹಬ್ಬದ ನಿಮಿತ್ತ ನಡೆಸಲಾದ ಸ್ಪರ್ಧೆಗಳಲ್ಲಿ ವಿಜೇತರಿಗೆ ಬಹುಮಾನ ನೀಡಲಾಗುವುದು; ಆಯ್ದ ಶಾಲೆಗಳಿಗೆ ಉಚಿತವಾಗಿ ಪುಸ್ತಕಗಳನ್ನು ವಿತರಿಸಲಾಗುವುದು ಎಂದು ಸಂಘಟಕರು ತಿಳಿಸಿದ್ದಾರೆ.

Elephant in Dakshin Kannada: ಬೆಳ್ತಂಗಡಿ ಸುತ್ತಮುತ್ತ ಒಂಟಿಸಲಗದ ಪುಂಡಾಟ, ಜನರಿಗೆ ಪ್ರಾಣಸಂಕಟ

<ul><li>Elephant trouble in DK ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಕಾಡಾನೆ ಹಾವಳಿ ಮಿತಿ ಮೀರಿದೆ. ಬೆಳ್ತಂಗಡಿ ತಾಲ್ಲೂಕಿನಲ್ಲಿ ಕಾಡಾನೆಯೊಂದು ಮೂರು ದಿನದಿಂದ ತೊಂದರೆ ನೀಡುತ್ತಿದೆ. ಆನೆ ಓಡಿಸಲು ಇಲ್ಲವೇ ಸೆರೆಗೆ ಕರ್ನಾಟಕ ಅರಣ್ಯ ಇಲಾಖೆ( Karnataka Forest Department) &nbsp;ಮುಂದಾಗಿದೆ.</li></ul>

Bangalore Cyber crime:ಬಾಯ್‌ಫ್ರೆಂಡ್‌ ಮೊಬೈಲ್‌ನಲ್ಲಿತ್ತು ತನ್ನದೂ ಸೇರಿ 13 ಸಾವಿರ ಬೆತ್ತಲೆ ಫೋಟೋ: ಬೆಂಗಳೂರಲ್ಲಿ ಸೈಬರ್‌ ದೂರು

<ul><li>Bangalore cyber crime ಸ್ನೇಹಿತನೊಬ್ಬನ ಜತೆಗೆ ಸಲುಗೆಯಿಂದ ಇದ್ದ ಯುವತಿ ತನ್ನದೇ ಬೆತ್ತಲೆ ಫೋಟೋಗಳನ್ನು ಮೊಬೈಲ್‌ನಲ್ಲಿ ನೋಡಿದ್ದಾರೆ. ಈ ಕುರಿತು ಯುವತಿ ಕೆಲಸ ಮಾಡುವ ಬೆಂಗಳೂರಿನ ಕಂಪೆನಿ ಕಾನೂನು ಅಧಿಕಾರಿ ಸೈಬರ್‌ ಠಾಣೆಯಲ್ಲಿ( Bangalore cyber police) ದೂರು ದಾಖಲಿಸಿದ್ದಾರೆ.</li></ul>

Kalburgi Crime: ಕಲಬುರಗಿ ಜಿಲ್ಲೆಯಲ್ಲಿ ತಾಯಿ ನಿಂದಿಸಿದ್ದಕ್ಕೆ ಅಜ್ಜನನ್ನೆ ಕೊಂದ ಮೊಮ್ಮಗ

<ul><li>Kalburgi Crime news ಕಲಬುರಗಿ ಜಿಲ್ಲೆಯಲ್ಲಿ ತಾಯಿಗೆ ನಿಂದಿಸಿದ ಸಿಟ್ಟಿಗೆ ಅಜ್ಜನನ್ನೇ ಮೊಮ್ಮಗ ಇರಿದು ಕೊಂದು ಪೊಲೀಸರ ಅತಿಥಿಯಾಗಿರುವ ಘಟನೆ ನಡೆದಿದೆ.&nbsp;</li></ul>

Vijayapura News: ವಿಜಯಪುರದಲ್ಲಿ ಬೀದಿ ನಾಯಿಗಳ ದಾಳಿಗೆ 6 ಮಕ್ಕಳಿಗೆ ಗಾಯ: ಸ್ಥಳಾಂತರಕ್ಕೆ ಹೆಚ್ಚಿದ ಒತ್ತಡ

<ul><li>Street dogs attack in Vijayapura ಬೆಂಗಳೂರಿನಲ್ಲಿ ಚಿಕ್ಕಮಕ್ಕಳ ಮೇಲೆ ತೀವ್ರ ದಾಳಿ ನಡೆಸಿ ಗಾಯಗೊಳಿಸಿದಂತಹ ಬೆಳವಣಿಗೆಗಳು ವಿಜಯಪುರದಲ್ಲೂ ನಡೆಯುತ್ತಿವೆ.ವಿಜಯಪುರ ನಗರದ ಅನೇಕ ಬಡಾವಣೆಗಳಲ್ಲಿ ಬೀದಿನಾಯಿಗಳ ಹಾವಳಿ ಅಧಿಕವಾಗಿದೆ.</li></ul>

ಕರ್ನಾಟಕ ರಾಜ್ಯೋತ್ಸವ ನಿಮಿತ್ತ ರಾಷ್ಟ್ರೋತ್ಥಾನ ಸಾಹಿತ್ಯ ಆಯೋಜಿಸಿದ 33 ದಿನಗಳ 3ನೇ ಕನ್ನಡ ಪುಸ್ತಕ ಹಬ್ಬಕ್ಕೆ ಪುಸ್ತಕ ಪ್ರಿಯರಿಂದ ಭಾರಿ ಸ್ಪಂದನೆ ಸಿಕ್ಕಿದೆ. ನಿತ್ಯವೂ ಒಂದಿಲ್ಲೊಂದು ಕಾರ್ಯಕ್ರಮ, ಉಪನ್ಯಾಸಗಳ ಮೂಲಕ ಗಮನಸೆಳೆದಿರುವ ಹಬ್ಬದ ಪುಸ್ತಕ ಲೋಕ ವಿದ್ಯಾರ್ಥಿ ಯುವಜನರನ್ನು ಬೆರಗುಗೊಳಿಸಿದೆ. ಈ ಹಬ್ಬ ಡಿಸೆಂಬರ್ 3ರಂದು ಸಂಪನ್ನಗೊಳ್ಳಲಿದೆ.

ತೆಲಂಗಾಣ ಚುನಾವಣೆ ರಾಜಕಾರಣಿಗಳಿಗೆ ಮಾತ್ರವಲ್ಲ, 20ಕ್ಕೂ ಹೆಚ್ಚು ಚುನಾವಣಾ ತಂತ್ರಗಾರರಿಗೂ ಸವಾಲು. ಮುಖ್ಯಮಂತ್ರಿ ಕೆ. ಚಂದ್ರಶೇಖರ ರಾವ್ ನೇತೃತ್ವದ ಬಿಆರ್‌ಎಸ್ ಪಕ್ಷ ಮೂರನೇ ಅವಧಿಗೆ ಅಧಿಕಾರ ಹಿಡಿಯಲು ಪ್ರಯತ್ನಿಸಿದೆ. ಹೀಗಾಗಿ ಅದು ಕೂಡ ಚುನಾವಣಾ ತಂತ್ರಗಾರರ ಮೊರೆ ಹೋಗಿದೆ.

ತೆಲಂಗಾಣ ರಾಜ್ಯ ರಚನೆಯಲ್ಲಿ ಪ್ರಮುಖ ಪಾತ್ರವಹಿಸಿದ್ದ ಕೆಸಿಆರ್‌ಗೆ ಈ ಬಾರಿ ಕಾಂಗ್ರೆಸ್ ಪಕ್ಷ ಮತ್ತು ಬಿಜೆಪಿಯಿಂದ ಪ್ರಬಲ ಸ್ಪರ್ಧೆ ಎದುರಾಗಿದೆ. ಆಡಳಿತ ವಿರೋಧಿ ಅಲೆ ಕಾಣಿಸಿಕೊಂಡಿರುವ ಕಾರಣ, ಗೆಲ್ಲಬೇಕಾದ ಅನಿವಾರ್ಯತೆ ಅವರದ್ದು. ಹೀಗಾಗಿ ಚುನಾವಣಾ ತಂತ್ರಗಾರಿಕೆ ಸಂಸ್ಥೆಯ ಉದ್ಯೋಗಿಯೊಬ್ಬರು ಮಾಧ್ಯಮಕ್ಕೆ ನೀಡಿದ ಮಾಹಿತಿ ಪ್ರಕಾರ, ಭಾರತ ರಾಷ್ಟ್ರ ಸಮಿತಿ (ಬಿಆರ್‌ಎಸ್‌)ಗೆ ಗ್ರಾಮ ಪಂಚಾಯತ್ ಸ್ತರದ ತನಕವೂ ಜಾರಿಗೊಳಿಸಬಲ್ಲ ಅಂಶಗಳನ್ನು ಒದಗಿಸುವ ಕೆಲಸ ಮಾಡುತ್ತಿದೆ. ಅದು ರಾಜಕೀಯ ಮತ್ತು ಆಡಳಿತಕ್ಕೆ ಸಂಬಂಧಿಸಿದ ವಿಚಾರಗಳು.

ಇದನ್ನೂ ಓದಿ| <a class="manualbacklink" target="_blank" href="https://kannada.hindustantimes.com/nation-and-world/political-analysis-poll-strategist-the-king-makers-of-elections-are-in-high-demand-in-5-state-assembly-elections-uks-181701167192607.html" rel="dofollow">ಐದು ರಾಜ್ಯ ಚುನಾವಣೆಗಳಲ್ಲಿ ‘ಚುನಾವಣಾ ತಂತ್ರಗಾರ’ರೆಂಬ ಕಿಂಗ್‌ಮೇಕರ್‌ಗಳಿಗೇ ಹೆಚ್ಚು ಬೇಡಿಕೆ, ಯಾರಿವರು, ಏನಿವರ ಕೆಲಸ</a>

ಒಂದು ಚುನಾವಣಾ ತಂತ್ರಗಾರಿಕೆ ಸಂಸ್ಥೆಯು 50 ವಿಧಾನ ಸಭಾ ಕ್ಷೇತ್ರಗಳಲ್ಲಿ ಬಿಆರ್‌ಎಸ್‌ಗೆ ನೆರವಾಗುತ್ತಿರುವ ಅಂಶ ಬಹಿರಂಗವಾಗಿದೆ. ಈ 50 ಕ್ಷೇತ್ರಗಳಲ್ಲಿ ಪಕ್ಷದ ಸೋಲು ಗೆಲುವು ಶೇಕಡ 10ರ ಆಸುಪಾಸಿನಲ್ಲಿದೆ. ಇಲ್ಲಿ 300ಕ್ಕೂ ಹೆಚ್ಚು ಪರಿಣತರು ಪಕ್ಷದ ಗೆಲುವಿಗಾಗಿ ಕೆಲಸ ಮಾಡುತ್ತಿದ್ದಾರೆ.

ಇದಕ್ಕೂ ಮೊದಲು ಪ್ರಶಾಂತ್ ಕಿಶೋರ್ ಅವರ ಐ- ಪಿಎಸಿ ತಂಡವು ಬಿಆರ್‌ಎಸ್ ಜತೆಗೆ ಕೈ ಜೋಡಿಸಿತ್ತು. ಅಭ್ಯರ್ಥಿಗಳ ಆಯ್ಕೆಯಲ್ಲಿ ಅದು ನೆರವು ನೀಡಿತ್ತು. ಅಲ್ಲದೆ, ಗೆಲುವಿಗೆ ಬೇಕಾದ ನೀಲ ನಕಾಶೆಯನ್ನು ಸಿದ್ಧಪಡಿಸಿತ್ತು. ಆದರೆ, ಬಳಿಕ ಈ ಸಂಸ್ಥೆ ಜತೆಗಿನ ಒಪ್ಪಂದ ರದ್ದುಗೊಳಿಸಿ ಪಕ್ಷದ ಹಿಡಿತವನ್ನು ಐ-ಪಿಎಸಿ ಬಯಸಿತ್ತು ಎಂದು ಬಿಆರ್‌ಎಸ್ ಆರೋಪಿಸಿತ್ತು.

<h2>ಕಾಂಗ್ರೆಸ್ ಪಕ್ಷಕ್ಕೆ ತೀನ್ ಬಂದರ್‌ ನೆರವು</h2>ರಾಹುಲ್ ಗಾಂಧಿಯ ಪ್ರಚಾರ ತಂಡದ ಸದಸ್ಯರೊಬ್ಬರು ನೀಡಿದ ಮಾಹಿತಿ ಪ್ರಕಾರ, ಕಾಂಗ್ರೆಸ್ ಪಕ್ಷಕ್ಕೆ ತೀನ್ ಬಂದರ್ ಕಂಪನಿ ನೆರವು ನೀಡುತ್ತಿದೆ. ಇದು ರಾಹುಲ್ ಗಾಂಧಿ ಅವರಿಗೆ ಎಲ್ಲ ರೀತಿಯ ಮಾಹಿತಿ ಒದಗಿಸುತ್ತಿದೆ. ಪ್ರಚಾರ ಅಭಿಯಾನದ ಸಾಮಗ್ರಿಗಳನ್ನು ಪೂರೈಸುತ್ತಿದೆ. ಪ್ರಚಾರ ಅಭಿಯಾನದ ರೂಪುರೇಷೆ ಸಿದ್ಧಪಡಿಸುವುದು ಇದರ ಹೊಣೆಗಾರಿಕೆ.

ಇದನ್ನೂ ಓದಿ | <a class="manualbacklink" target="_blank" href="https://kannada.hindustantimes.com/nation-and-world/education-news-how-to-become-political-consultants-poll-strategists-career-as-a-strategist-in-political-consultancy-uks-181701175219182.html" rel="dofollow">ರಾಜಕೀಯ ಸಲಹೆಗಾರರು, ಚುನಾವಣಾ ತಂತ್ರಗಾರರಾಗುವುದು ಹೇಗೆ, ಅರ್ಹತೆ ಏನಿರಬೇಕು</a>

ಬಹುತೇಕ ಅಭ್ಯರ್ಥಿಗಳಿಗೆ ವೃತ್ತಿಪರರ ನೆರವು ಲಭ್ಯವಾಗಿದೆ. ಇವರು ಬಹುತೇಕ ರಾಜಕೀಯ ನಾಯಕರ ಪರ್ಸನಲ್ ಅಸಿಸ್ಟೆಂಟ್‌ಗಳು. ಸೋಷಿಯಲ್ ಮೀಡಿಯಾ ಮ್ಯಾನೇಜರ್‌ಗಳು. ಇವರು ನಿಷ್ಪಕ್ಷಪಾತವಾಗಿ ಕೆಲಸ ಮಾಡುವ ಕಾರಣ ಇವರ ತೀರ್ಮಾನಗಳು, ಸಲಹೆಗಳು ಕೂಡ ಅದೇ ರೀತಿ ಇರುತ್ತವೆ ಎಂಬ ನಂಬಿಕೆ ಅವರದ್ದು.

<h2>ಈ ಚುನಾವಣಾ ತಂತ್ರಗಾರರ ಕೆಲಸಗಳೇನು</h2>ಕಾಂಗ್ರೆಸ್ ಮತ್ತು ಪಕ್ಷದ ಅಭ್ಯರ್ಥಿಗಳ ಜತೆಗೆ ಕೆಲಸ ಮಾಡುವ ರಾಜಕೀಯ ಸಲಹೆಗಾರರೊಬ್ಬರು ನೀಡಿದ ಮಾಹತಿ ಪ್ರಕಾರ,

1. ಅಭ್ಯರ್ಥಿ ಅಥವಾ ಪಕ್ಷದ ಸಂದೇಶವನ್ನು ತಳಮಟ್ಟಕ್ಕೆ ಮತ್ತು ಡಿಜಿಟಲ್ ಮಾಧ್ಯಮಗಳ ಮೂಲಕ ಅವರ ಮತದಾರರ ನೆಲೆಯನ್ನು ಮೀರಿ ವಿಸ್ತರಿಸುವುದನ್ನು ಖಚಿತಪಡಿಸಿಕೊಳ್ಳುವುದು ರಾಜಕೀಯ ಸಮಾಲೋಚನೆಯ ಪ್ರಾಥಮಿಕ ಕೆಲಸ.

2. ಪಕ್ಷ ಅಥವಾ ಅಭ್ಯರ್ಥಿಯು ಒಂದು ತಮ್ಮ ಪ್ರಚಾರಕ್ಕೆ ಒಂದು ನಿರೂಪಣೆಯನ್ನು ಹೊಂದಬೇಕು. ಅದನ್ನು ಪಕ್ಷದ ಸಿದ್ಧಾಂತಕ್ಕೆ ತಕ್ಕಂತೆ ರೂಪಿಸುವ ಹೊಣೆಗಾರಿಕೆ

3. ಮತದಾರರೊಂದಿಗೆ ವೈಯಕ್ತಿಕ ಸಂಪರ್ಕ ಸಾಧಿಸುವುದು. ಆ ಮೂಲಕ ಚುನಾವಣೆ ಗೆಲ್ಲುವ ಅವಕಾಶ ಹೆಚ್ಚಿಸುವುದು

4. ರಾಜಕೀಯ ವಿದ್ಯಮಾನಗಳ ಕಡೆಗೊಂದು ಪಕ್ಷಿ ನೋಟ ಹೊಂದಿರುವುದು, ಅದರಿಂದ ತಮಗೆ ಬೇಕಾದುದನ್ನು ಬಳಸಿಕೊಂಡು ಅಭ್ಯರ್ಥಿಗೆ, ಪಕ್ಷಕ್ಕೆ ನೆರವಾಗುವುದು.

5. ಪಕ್ಷದ ಬ್ರಾಂಡಿಂಗ್ ಮತ್ತು ಅಭ್ಯರ್ಥಿಯ ವೈಯಕ್ತಿಕ ಬ್ರಾಂಡಿಂಗ್ ಕಡೆಗೆ ಗಮನಹರಿಸುವುದು

ಹದಿನೇಳು ದಿನಗಳ ನಿರಂತರ ಕಾರ್ಯಾಚರಣೆ ಬಳಿಕ ಉತ್ತರಕಾಶಿ ಸುರಂಗ ಕುಸಿತ ಪ್ರಕರಣದಲ್ಲಿ ಸಿಲ್ಕ್‌ಯಾರಾ ಸುರಂಗದೊಳಗೆ ಸಿಲುಕಿದ್ದ 41 ಕಾರ್ಮಿಕರ ರಕ್ಷಣೆ ಇಂದು (ನ.28) ಸಾಧ್ಯವಾಗಿದೆ. ಭೂಕುಸಿತಕ್ಕೆ ಒಳಗಾದ ಸಿಲ್ಕ್‌ಯಾರಾ ಸುರಂಗದೊಳಗೆ 60 ಮೀಟರ್ ವ್ಯಾಸದ ಸುರಂಗ ಕೊರೆದು ಅವರನ್ನು ರಕ್ಷಿಸಲಾಯಿತು.

ಬಹಳಷ್ಟು ಕಡೆ ಅಮೆರಿಕದ ಆಗರ್ ಯಂತ್ರದ ಮೂಲಕ ರಕ್ಷಣಾ ಕಾರ್ಯಾಚರಣೆ ನಡೆಯಿತಾದರೂ, ಕೊನೆಯ ಹಂತದಲ್ಲಿ ನೆರವಿಗೆ ಬಂದದ್ದು ನಿಷೇಧಿತ ಇಲಿ ಬಿಲ ಗಣಿಗಾರಿಕೆ ( Rat Mining) ವಿಧಾನ. ಈ ಗಣಿಗಾರಿಕೆಯಲ್ಲಿ ಪರಿಣತರಾದವರು ಕೊನೆಯ ಹಂತದ ಕಾರ್ಯಾಚರಣೆಯಲ್ಲಿ ಎಲ್ಲರ ಮನಗೆದ್ದರು.

<h2>ಏನಿದು ಇಲಿ ಬಿಲ ಗಣಿಗಾರಿಕೆ</h2>ಇಲಿ ಬಿಲ ಗಣಿಗಾರಿಕೆ (Rat-hole mining) ಅಥವಾ ಇಲಿ ಗಣಿಗಾರಿಕೆ ( Rat Mining) ಎಂಬುದು ಕೈಯಿಂದಲೇ ಬಿಲ ಕೊರೆಯುವ ವಿಧಾನ. ಮೇಘಾಲಯ ಭಾಗದಲ್ಲಿ ಈ ಕೆಲಸ ಮಾಡುವ ಕುಶಲ ಕರ್ಮಿಗಳಿದ್ದಾರೆ. ಬಹಳ ಸಪೂರ ಬಿಲ ಕೊರೆಯುತ್ತಾರೆ. ಈ ಬಿಲದ ಮೂಲಕ ಒಬ್ಬ ಮನುಷ್ಯ ತೂರಿಕೊಂಡು ಹೋಗುವುದು ಸಾಧ್ಯವಿದೆ.

ಸಪೂರ ರಂಧ್ರವಾದ ಕಾರಣ ಇದಕ್ಕೆ ಇಲಿ ಬಿಲ ಎಂಬ ಪದ ಬಳಕೆಯಾಗಿದೆ. ಬಿಲ ಪೂರ್ಣವಾದ ಬಳಿಕ ಗಣಿಗಾರಿಕೆ ಮಾಡುವವರು ಹಗ್ಗ ಮತ್ತು ಬಿದುರಿನ ಏಣಿ ಇಳಿಬಿಟ್ಟು ಕೆಳಕ್ಕೆ ಇಳಿಯುತ್ತಾರೆ. ಸಾಮಾನ್ಯವಾಗಿ ಕಲ್ಲಿದ್ದಲು ಗಣಿಗಾರಿಕೆಗೆ ಇಂತಹ ಬಿಲಗಳ ಬಳಕೆಯಾಗುತ್ತದೆ. ಗಾಳಿಯ ಕೊರತೆಯಿಂದ ಗಣಿಗಾರಿಕೆಗೆ ಹೋಗುವವರು ಮೃತರಾಗುವುದು ಸಾಮಾನ್ಯ. ಹೀಗಾಗಿ ಇದನ್ನು ಅಪಾಯಕಾರಿ ಎಂದು ಪರಿಗಣಿಸಲಾಗಿದೆ.

ಇದನ್ನೂ ಓದಿ| <a class="manualbacklink" target="_blank" href="https://kannada.hindustantimes.com/nation-and-world/india-news-uttarkashi-rescue-workers-evacuated-from-silkyara-tunnel-rescue-operation-underway-uks-181701182030990.html" rel="dofollow">ಉತ್ತರಕಾಶಿ ಸುರಂಗ ಕುಸಿತ, 17 ದಿನಗಳ ಬಳಿಕ 41 ಕಾರ್ಮಿಕರ ರಕ್ಷಣೆ, ನ.12ರಿಂದ ಇಲ್ಲಿತನಕ ಏನೇನಾಯಿತು ಇಲ್ಲಿದೆ ವಿವರ</a>

ಈ ವಿಧಾನದಲ್ಲಿ ಇನ್ನೂ ಒಂದು ವಿಧಾನ ಇದೆ. ಅದು ವೃತ್ತಾಕಾರದ ಬದಲು ಆಯತಾಕಾರದಲ್ಲಿರುತ್ತದೆ. ಅದು 10 ಚದರ ಮೀಟರ್‌ನಿಂದ 100 ಚದರ ಮೀಟರ್ ವ್ಯಾಪ್ತಿಯಲ್ಲಿದ್ದು, ಲಂಬವಾಗಿ 100ರಿಂದ 400 ಅಡಿ ತನಕ ಅಗೆಯಲಾಗುತ್ತದೆ. ಒಮ್ಮೆ ಕಲ್ಲಿದ್ದಲು ನಿಕ್ಷೇಪ ಸಿಕ್ಕರೆ ಇಲಿ ಬಿಲದ ಮಾದರಿಯ ರಂಧ್ರ ಕೊರೆಯಲಾಗುತ್ತದೆ.

<h2>ಇಲಿ ಗಣಿಗಾರಿಕೆ ನಿಷೇಧ ಯಾಕೆ</h2>ಈ ಇಲಿ-ಗಣಿಗಾರಿಕೆ ವಿಧಾನವು ಅದರ ಅಪಾಯಕಾರಿ ಕೆಲಸದ ವಾತಾವರಣ, ಪರಿಸರ ಹಾನಿ, ಕಾರ್ಮಿಕರ ಗಾಯ ಮತ್ತು ಸಾವುಗಳಿಗೆ ಕಾರಣವಾಗುವ ಹಲವಾರು ಅಪಘಾತಗಳಿಂದಾಗಿ ತೀವ್ರ ಟೀಕೆಗಳನ್ನು ಎದುರಿಸಿದೆ.

ಗಣಿಗಳು ಸಾಮಾನ್ಯವಾಗಿ ಅನಿಯಂತ್ರಿತ. ಅಲ್ಲಿ ಸರಿಯಾದ ಗಾಳಿ, ರಚನಾತ್ಮಕ ಕೆಲಸದ ವಾತಾವರಣ ಅಥವಾ ಕಾರ್ಮಿಕರಿಗೆ ಸುರಕ್ಷತಾ ವ್ಯವಸ್ಥೆ ಇರುವುದಿಲ್ಲ. ಇನ್ನು ಇಲಿ ಬಿಲ ಗಣಿಗಾರಿಕೆ ನಡೆಸುವವರಿಗೆ ಆ ವ್ಯವಸ್ಥೆ, ಪರಿಸರ ಅತ್ಯಂತ ಅಪಾಯಕಾರಿ ಎಂಬುದು ತಜ್ಞರ ಅಭಿಪ್ರಾಯ. ಇದಲ್ಲದೆ, ಗಣಿಗಾರಿಕೆಯು ಭೂ ಸವಕಳಿ, ಅರಣ್ಯ ನಾಶ ಮತ್ತು ಜಲ ಮಾಲಿನ್ಯವನ್ನು ಉಂಟುಮಾಡುತ್ತದೆ.

ಇದೇ ಕಾರಣಕ್ಕೆ ರಾಷ್ಟ್ರೀಯ ಹಸಿರು ನ್ಯಾಯಾಧಿಕರಣ (ಎನ್‌ಜಿಟಿ) ಇಲಿ ಬಿಲ ಗಣಿಗಾರಿಕೆಯನ್ನು 2014ರಲ್ಲಿ ನಿಷೇಧಿಸಿತು. 2015ರಲ್ಲಿ ಆ ನಿಷೇಧವನ್ನು ಮುಂದುವರಿಸಿತು.

<h2>ಸಿಲ್ಕ್‌ಯಾರಾ ಸುರಂಗ ಕುಸಿತದಲ್ಲಿ ಸಿಲುಕಿದ ಕಾರ್ಮಿಕರ ರಕ್ಷಣೆಗೆ ಬಳಕೆಯಾದ ಇತರೆ ವಿಧಾನಗಳು</h2>ಲಂಬ ಕೊರೆಯುವಿಕೆ: ಬೋರ್ ಕೊರೆಯುವ ಯಂತ್ರ ಬಳಸಿಕೊಂಡು ಲಂಬ ಕೊರೆಯುವಿಕೆಯನ್ನು ಮಾಡಲಾಗುತ್ತದೆ. ವಿದ್ಯುತ್ ಉಪಕರಣಗಳು ಮತ್ತು ಉಪಕರಣಗಳನ್ನು ಬಳಸಿ ನೆಲದಿಂದ ನೇರವಾಗಿ ಅಗೆಯಲಾಗುತ್ತದೆ. ಉತ್ತರಾಖಂಡದ ಸುರಂಗದ ಕುಸಿತದ ಸಂದರ್ಭದಲ್ಲಿ, ಲಂಬವಾಗಿ ಸುರಂಗ ಕೊರೆದು ಸಿಕ್ಕಿಬಿದ್ದ ಕಾರ್ಮಿಕರನ್ನು ಹೊರತರಲು 800-ಎಂಎಂ ಪೈಪ್ ಅನ್ನು ಅಳವಡಿಸಲಾಗಿದೆ.

ಆಗರ್ ಮೈನಿಂಗ್ (ಸಮತಲ ಕೊರೆಯುವಿಕೆ): ಅಮೇರಿಕ ನಿರ್ಮಿತ ಆಗರ್ ಯಂತ್ರ ಬಳಸಿಕೊಂಡು ಸಮತಲವಾಗಿ ನೆಲ ಕೊರೆಯಲಾಗುತ್ತದೆ. ಈ ಯಂತ್ರವನ್ನು ಸುರಂಗ ರಚನೆಗೆ ಬೇಕಾದಂತೆ ವಿನ್ಯಾಸಗೊಳಿಸಲಾಗಿದೆ. ನೀರಿನ ಕೊಳವೆ, ಅನಿಲ ಕೊಳವೆ ಹಾಕಲು, ಸುರಂಗ ನಿರ್ಮಿಸಲು ಈ ಯಂತ್ರವನ್ನು ಬಳಸಲಾಗುತ್ತದೆ.

Political Consultants: ರಾಜಕೀಯ ಸಲಹೆಗಾರರು, ಚುನಾವಣಾ ತಂತ್ರಗಾರರಾಗುವುದು ಹೇಗೆ, ಅರ್ಹತೆ ಏನಿರಬೇಕು

ಚುನಾವಣಾ ತಂತ್ರಗಾರ, ರಾಜಕೀಯ ತಂತ್ರಗಾರ, ರಾಜಕೀಯದ ಚಾಣಕ್ಯ ಎಂಬಿತ್ಯಾದಿ ಪದಗಳನ್ನು ಕೇಳುತ್ತಿದ್ದರೆ ಬಹುತೇಕ ಯುವ ರಾಜಕಾರಣಿಗಳ ಕಂಗಳಲ್ಲಿ ಕನಸುಗಳು ಕಂಗೊಳಿಸತೊಡಗುತ್ತವೆ. ಹಳೆತಲೆಮಾರಿನವರಿಗಾದರೆ ರಾಜಕಾರಣಿಗಳ ಹೆಸರುಗಳು ನೆನಪಾಗಬಹುದು. ಆದರೆ ಹೊಸ ತಲೆಮಾರಿನವರು ಚುನಾವಣಾ ತಂತ್ರಗಾರ, ರಾಜಕೀಯ ತಂತ್ರಗಾರ ಎಂದ ಕೂಡಲೇ ಪ್ರಶಾಂತ್ ಕಿಶೋರ್, ಸುನೀಲ್ ಕನುಗೋಲು ಮತ್ತಿತರರ ಹೆಸರು ಹೇಳಬಹುದು.

ಪ್ರಶಾಂತ್ ಕಿಶೋರ್, ಸುನೀಲ್ ಕನುಗೋಲು ಮುಂತಾದವರ ಹಾಗೆ ಚುನಾವಣಾ ತಂತ್ರಗಾರರು ಅಥವಾ ರಾಜಕೀಯ ತಂತ್ರಗಾರರು ಆಗುವುದು ಹೇಗೆ? ಅದಕ್ಕೇನಾದರೂ ಶೈಕ್ಷಣಿಕ ಅರ್ಹತೆ ಬೇಕಾ? ಯಾವೆಲ್ಲ ರೀತಿಯ ಕೌಶಲಗಳು ಬೇಕು ಎಂಬ ಪ್ರಶ್ನೆಗಳು ಸಹಜ. ದೇಶದ ರಾಜಕೀಯ ರಂಗದಲ್ಲಿ ಪೊಲಿಟಿಕಲ್ ಕನ್ಸಲ್ಟೆನ್ಸಿ ಅಥವಾ ರಾಜಕೀಯ ತಂತ್ರಗಾರ, ಚುನಾವಣಾ ತಂತ್ರಗಾರರಾಗಿ ವೃತ್ತಿ ಆರಂಭಿಸುವುದಕ್ಕೆ ಈಗ ಅವಕಾಶಗಳು ಹೆಚ್ಚು.

<h2>ರಾಜಕೀಯ ರಂಗದಲ್ಲಿ ಪರಿಣತರಿಗೆ ಏನೇನು ಕೆಲಸಗಳಿವೆ…</h2>ಬದಲಾದ ರಾಜಕೀಯ ಸನ್ನಿವೇಶದಲ್ಲಿ, ಲಕ್ಷಾಂತರ ಜನರ ಹೃದಯಗಳನ್ನು ಗೆಲ್ಲುವುದಕ್ಕೆ ನಾಯಕರಿಗೆ ಸಹಾಯ ಮಾಡುವಲ್ಲಿ ರಾಜಕೀಯ ಸಲಹೆಗಾರರು/ ರಾಜಕೀಯ ತಂತ್ರಗಾರರು ಪ್ರಮುಖ ಪಾತ್ರವಹಿಸುತ್ತಾರೆ.

ಇದನ್ನೂ ಓದಿ| <a class="manualbacklink" target="_blank" href="https://kannada.hindustantimes.com/nation-and-world/political-analysis-poll-strategist-the-king-makers-of-elections-are-in-high-demand-in-5-state-assembly-elections-uks-181701167192607.html" rel="dofollow">ಐದು ರಾಜ್ಯ ಚುನಾವಣೆಗಳಲ್ಲಿ ‘ಚುನಾವಣಾ ತಂತ್ರಗಾರ’ರೆಂಬ ಕಿಂಗ್‌ಮೇಕರ್‌ಗಳಿಗೇ ಹೆಚ್ಚು ಬೇಡಿಕೆ, ಯಾರಿವರು, ಏನಿವರ ಕೆಲಸ</a>

ನಮ್ಮ ದೇಶದಲ್ಲಿ ಚುನಾವಣೆ ಇಲ್ಲದ ವರ್ಷವೇ ಇಲ್ಲ. ಹೀಗಾಗಿ ರಾಜಕೀಯ ಸಲಹೆಗಾರರು (Political Advisers), ರಾಜಕೀಯ ತಂತ್ರಗಾರರು (Political strategists) ಮುಂತಾದವರಿಗೆ ಕೆಲಸಕ್ಕೆ, ಸಂಭಾವನೆಗೆ ಕೊರತೆ ಇಲ್ಲ.

1. ಚುನಾವಣಾ ಸಂಶೋಧನೆ (ಅಗತ್ಯ ಮಾಹಿತಿ ಸಂಗ್ರಹ)

2. ಡಿಜಿಟಲ್ ಮೀಡಿಯಾ ಅಭಿಯಾನ

3. ಸಾರ್ವಜನಿಕ ಸಂಪರ್ಕ

4. ನಿಧಿ ಸಂಗ್ರಹ

5. ಭಾಷಣ ಬರೆಹ

ರಾಜಕೀಯ ನಾಯಕರೊಬ್ಬರು ಭಾಷಣಕ್ಕೆ ಬರುತ್ತಾರೆ ಎಂದರೆ ಕನಿಷ್ಠ ಈ ಐದು ತಂಡ ಕೆಲಸ ನಿರತವಾಗಿರುತ್ತದೆ. ಅವರು ಹೋಗುವ ಪ್ರದೇಶದ ರಾಜಕೀಯ, ಭೌಗೋಳಿಕ, ಸಾಮಾಜಿಕ, ಐತಿಹಾಸಿಕ, ಜಾತಿ ಸಮೀಕರಣ ಎಲ್ಲ ಮಾಹಿತಿಗಳನ್ನೂ ಸಂಗ್ರಹಿಸಬೇಕು. ಸೋಷಿಯಲ್ ಮೀಡಿಯಾದಲ್ಲಿ ಅಭಿಯಾನ ನಡೆಸಿ ಪ್ರಚಾರ ಮಾಡಬೇಕು. ಸಾರ್ವಜನಿಕ ಸಂಪರ್ಕ ಸಾಧಿಸಿ, ಒಂದು ಛಾಪು ಮೂಡಿಸಬೇಕು. ನಾಯಕನಿಗೆ ಭಾಷಣ ಬರೆದುಕೊಡಬೇಕು.

<h2>ರಾಜಕೀಯ ರಂಗದಲ್ಲಿ ಕೆಲಸ ಮಾಡಲು ಇಚ್ಛಿಸುವ ಪರಿಣತರಿಗೆ ಇರಬೇಕಾದ ಅರ್ಹತೆಗಳೇನು</h2>ನಿಖರವಾಗಿ ಇಂಥದ್ದೇ ಅರ್ಹತೆ ಬೇಕು ಎಂದು ಈ ಕೆಲಸಗಳು ಬಯಸುವುದಿಲ್ಲ. ಆದರೆ, ರಾಜಕೀಯಕ್ಕೆ ಸಂಬಂಧಿಸಿದ ತಿಳಿವಳಿಕೆ, ಪ್ರಾಥಮಿಕ ಜ್ಞಾನ, ತಿಳಿದುಕೊಳ್ಳುವ ಕುತೂಹಲ ಬೇಕೇ ಬೇಕು. ಪ್ರಸ್ತುತ ರಾಜಕೀಯ ಸನ್ನಿವೇಶ, ಇತಿಹಾಸದ ಅರಿವು, ರಾಜಕಾರಣಿಗಳ ಕುರಿತಾದ ಮಾಹಿತಿ, ಕ್ಷೇತ್ರದ ಮಾಹಿತಿ ಇರಬೇಕಾದ್ದು ಅವಶ್ಯ.

ರಾಜಕೀಯ ವಿಜ್ಞಾನ, ಪತ್ರಿಕೋದ್ಯಮ, ಇಂಗ್ಲಿಷ್, ಸಾರ್ವಜನಿಕ ನೀತಿ, ಸಾರ್ವಜನಿಕ ಆಡಳಿತ, ದತ್ತಾಂಶ ವಿಜ್ಞಾನಿ (ಡೇಟಾ ಸೈಂಟಿಸ್ಟ್ ), ಸಮಾಜಶಾಸ್ತ್ರಜ್ಞರು, ಮನಶ್ಶಾಸ್ತ್ರಜ್ಞರು ಅಥವಾ ವ್ಯವಹಾರ ನಿರ್ವಹಣೆ ಹಿನ್ನೆಲೆ ಹೊಂದಿರುವವರು ಮೇಲುಗೈ ಹೊಂದುತ್ತಾರೆ. ಇಂಥವರಿಗೆ ರಾಜಕೀಯ ವಿಶ್ಲೇಷಣೆಯ ಪರಿಣತಿಯೂ ಇರುತ್ತದೆ. ಇದು ಇವರನ್ನು ಯಶಸ್ಸಿನತ್ತ ಕರೆದೊಯ್ಯುತ್ತದೆ.

ಇದನ್ನೂ ಓದಿ| <a class="manualbacklink" target="_blank" href="https://kannada.hindustantimes.com/entertainment/sandalwood-news-actress-pooja-gandhi-marriage-with-vijay-gossip-november-29-mungaru-male-heroine-marrage-reports-pcp-181701088317785.html" rel="dofollow">ಪೂಜಾ ಗಾಂಧಿಗೆ ನಾಡಿದ್ದು ಮದುವೆ; ಕನ್ನಡ ಕಲಿಸಿದ ಗುರುವಿನ ಕೈಹಿಡಿಯಲಿದ್ದಾರಂತೆ ಮುಂಗಾರು ಮಳೆ ಚೆಲುವೆ</a>

ಭಾರತದ ಮತದಾರರನ್ನು ಗಮನಿಸಿದರೆ ಅಂದಾಜು 47 ಕೋಟಿ ಮತದಾರರ ವಯಸ್ಸು 43 ವಯಸ್ಸಿನೊಳಗೇ ಇದೆ. ಇವರು ಚುನಾವಣಾ ರಾಜಕೀಯಲ್ಲಿ ನಾಯಕರ ಭವಿಷ್ಯ ನಿರ್ಧರಿಸುವವರು. ಹೀಗಾಗಿ ಯುವಜನರ ನಾಡಿಮಿಡಿತ ಅರಿತವರೇ ರಾಜಕೀಯ ರಂಗದಲ್ಲಿ ಮಿಂಚಲು ಸಾಧ್ಯ.

<h2>ರಾಜಕೀಯ ಸಲಹೆಗಾರ/ ರಾಜಕೀಯ ತಂತ್ರಗಾರರ ಕೆಲಸದ ಅವಧಿ, ವೇತನ ಮತ್ತು ಇತರೆ ವಿವರ</h2>ರಾಜಕೀಯ ಸಲಹೆಗಾರ/ ರಾಜಕೀಯ ತಂತ್ರಗಾರರ ಹುದ್ದೆ ಎನ್ನುವುದು ಪೂರ್ಣಕಾಲಿಕ ಕೆಲಸ ಇರುವಂಥದ್ದು. ಇತರೆ ಕಂಪನಿಗಳಲ್ಲಿರುವಂತೆಯೇ ಇಲ್ಲೂ ಉದ್ಯೋಗಿಗಳಿಗೆ ಉತ್ತಮ ವೇತನ, ಸವಲತ್ತುಗಳು ಇದ್ದೇ ಇದೆ.

ಹೆಚ್ಚುವರಿ ಪ್ರಯೋಜನ ಏನು ಎಂದರೆ, ಈ ಉದ್ಯೋಗಿಗಳಿಗೆ ರಾಜಕೀಯ ನಾಯಕರ ನೆರಳಿನಲ್ಲಿ ಕೆಲಸ ಮಾಡುವುದಕ್ಕೆ ಅವಕಾಶವಿದೆ. ಚುನಾವಣಾ ಗೆಲುವು ಸಿಕ್ಕರೆ ಈ ಉದ್ಯೋಗಿಗಳ ಮೇಲೆ ಅವರ ಗೌರವ ಕೂಡ ಹೆಚ್ಚಾಗುವುದು.

ಅಗತ್ಯಕ್ಕೆ ತಕ್ಕಂತೆ ಹಗಲು ರಾತ್ರಿ ಎನ್ನದೆ ಕೆಲಸ ಮಾಡುವ ಸಾಮರ್ಥ್ಯ ಹೊಂದಿರಬೇಕು. ಚುನಾವಣಾ ಪ್ರಚಾರದಿಂದ ಹಿಡಿದು ಗೆಲುವಿನ ತನಕ ಯಾವ್ಯಾವ ಸಂದರ್ಭದಲ್ಲಿ ಯಾವ ರೀತಿ ತಂತ್ರಗಾರಿಕೆ ಬಳಸಬೇಕು ಎಂಬುದನ್ನು ನಿರ್ಧರಿಸಬೇಕು.

ಇದಕ್ಕೆ ಕೊನೆ ಎಂಬುದಿಲ್ಲ. ರಾಜಕೀಯ ಪರಿಣತಿ, ಅನುಭವ ದಕ್ಕಿದರೆ ಈ ಉದ್ಯೋಗ ನಿರಂತರವಾಗಿರುತ್ತದೆ. ಸ್ವತಂತ್ರವಾಗಿ ಕೂಡ ರಾಜಕೀಯ ನಾಯಕರಿಗೆ ಅಗತ್ಯ ಸೇವೆಗಳನ್ನು ಒದಗಿಸಬಹುದು.

<h2>ರಾಜಕೀಯ ಸಲಹೆಗಾರ/ ರಾಜಕೀಯ ತಂತ್ರಗಾರರಿಂದ ನಾಯಕರು ಬಯಸುವುದೇನು</h2>ರಾಜಕೀಯವಾಗಿ ಮುಂದುವರಿಯಲು ಬಯಸುವ ರಾಜಕೀಯ ಕಾರ್ಯಕರ್ತ ತನ್ನನ್ನು ನಾಯಕನ ಮಟ್ಟಕ್ಕೆ, ಅಲ್ಲಿಂದ ಸಚಿವರ ಮಟ್ಟಕ್ಕೆ, ಮುಖ್ಯಮಂತ್ರಿ ಮಟ್ಟಕ್ಕೆ ತನ್ನ ಪ್ರೊಫೈಲ್ ಬಿಲ್ಡ್ ಮಾಡಬೇಕು ಎಂದರೆ ಅದಕ್ಕೆ ಪರ್ಸನಲ್ ಬ್ರಾಂಡಿಂಗ್ ಅಗತ್ಯ. ಆಗ ನೆರವಿಗೆ ಬರುವವರೇ ರಾಜಕೀಯ ಸಲಹೆಗಾರ/ ರಾಜಕೀಯ ತಂತ್ರಗಾರರು. ಬಿಕ್ಕಟ್ಟಿನ ಸನ್ನಿವೇಶದಲ್ಲಿ ಅದನ್ನು ಬಗೆಹರಿಸಿ ಇಮೇಜ್ ಕಾಪಾಡುವ ಕೆಲಸಕ್ಕೂ ರಾಜಕೀಯ ಸಲಹೆಗಾರ/ ರಾಜಕೀಯ ತಂತ್ರಗಾರರ ನೆರವು ಕೋರುತ್ತಾರೆ.

ಭಾರತದಲ್ಲಿ ರಾಜಕೀಯ ಕ್ಷೇತ್ರದ ಕಡೆಗೆ ಯುವಜನರ ಸೆಳೆತ ಹೆಚ್ಚಾಗಿದೆ. ಅದರಲ್ಲೂ ವಿಶೇಷವಾಗಿ ವಿದ್ಯಾವಂತರು ಈಗ ಆಕರ್ಷಿತರಾಗಿದ್ದಾರೆ. ಅಧಿಕಾರದಲ್ಲಿದ್ದಾಗ ಎಲ್ಲರಿಂದಲೂ ಸಲಾಂ ಹೊಡೆಸಿಕೊಳ್ಳುವ ರಾಜಕಾರಣಿಗಳೇ, ಇದೊಂದು ಸಲ ನಮ್ಮನ್ನು ಗೆಲ್ಲಿಸಿಬಿಡಿ.. ಎಂದು ಸಲಾಂ ಹೊಡೆಯುವ ಉದ್ಯೋಗ ಇದು. ರಾಜಕೀಯ ತಂತ್ರಗಾರರಾಗುವುದು ಹೇಗೆ? ಅರ್ಹತೆ ಏನು- ಇಲ್ಲಿದೆ ವಿವರ.

Poll Strategist: ಐದು ರಾಜ್ಯ ಚುನಾವಣೆಗಳಲ್ಲಿ ‘ಚುನಾವಣಾ ತಂತ್ರಗಾರ’ರೆಂಬ ಕಿಂಗ್‌ಮೇಕರ್‌ಗಳಿಗೇ ಹೆಚ್ಚು ಬೇಡಿಕೆ, ಯಾರಿವರು, ಏನಿವರ ಕೆಲಸ

ದೇಶದ ರಾಜಕಾರಣವನ್ನು ಗಮನಿಸಿದರೆ 2010 ರ ಮೊದಲು ಪರಿಣತ ರಾಜಕಾರಣಿಗಳು ತಮ್ಮ ಜೀವಿತಾವಧಿಯ ರಾಜಕೀಯ ಅನುಭವವನ್ನು ಧಾರೆ ಎರೆದು ಪಕ್ಷ ಸಂಘಟನೆ ಮಾಡಿ, ಪಕ್ಷದ ಕಾರ್ಯಕರ್ತರನ್ನು ಹುರಿದುಂಬಿಸುತ್ತ ಪಕ್ಷವನ್ನು ಅಧಿಕಾರಕ್ಕೆ ತರಲು ಪ್ರಯತ್ನಿಸುತ್ತಿದ್ದರು. ಆಗೆಲ್ಲ ಮಾಸ್‌ ಲೀಡರ್ ಎಂದು ಗುರುತಿಸುವುದಕ್ಕೆ ಸಾಧ್ಯವಾಗಬಲ್ಲ ನಾಯಕತ್ವ ಕಾಣಸಿಗುತ್ತಿತ್ತು. ರಾಜಕಾರಣಿಗಳನ್ನೇ ಕಿಂಗ್ ಮೇಕರ್‌ಗಳು ಎಂದು ಗುರುತಿಸುತ್ತಿದ್ದ ಕಾಲವದು. ಅವರ ಕಾರ್ಯವೈಖರಿಯೇ, ಕಾರ್ಯ ವಿಧಾನ ಬೇರೆಯದೇ ರೀತಿಯದ್ದು. ಅದೇನೂ ನಿಶ್ಚಿತ ರೂಪದಲ್ಲಿರುತ್ತಿರಲಿಲ್ಲ. ಹಾಗೆಂದು ಈಗ ನಿಶ್ಚಿತ ರೂಪದಲ್ಲಿದೆ ಎಂದಲ್ಲ.

ಆದರೆ, ಕಳೆದ 10 ವರ್ಷದ ಚುನಾವಣಾ ರಾಜಕಾರಣವನ್ನು ಒಮ್ಮೆ ಗಮನಿಸಿ ನೋಡಿ. ತಂತ್ರಜ್ಞಾನವನ್ನು ಬಳಸಿಕೊಂಡು ಚುನಾವಣಾ ರಾಜಕಾರಣ ಬದಲಾದ ಬಗೆ ನಿಜಕ್ಕೂ ಬೆರಗು ಹುಟ್ಟಿಸುವಂಥದ್ದು. ಯುವತಲೆಮಾರು ರಾಜಕಾರಣದಿಂದ ದೂರ ಉಳಿದಿದೆ ಎಂಬ ಆರೋಪದಲ್ಲಿ ಈಗ ಹುರುಳು ಇಲ್ಲ ಎಂಬ ರೀತಿಯಲ್ಲಿ ಯುವಜನರು ರಾಜಕೀಯದಲ್ಲಿ ತೊಡಗಿಸಿಕೊಂಡಿದ್ದಾರೆ.

ಅದರಲ್ಲೂ ವಿಶೇಷವಾಗಿ ಉನ್ನತ ಶಿಕ್ಷಣ ಪಡೆದವರು ರಾಜಕೀಯ ಪಟ್ಟುಗಳನ್ನು ಕರಗತ ಮಾಡಿಕೊಂಡು ರಾಜಕಾರಣಿಗಳ ಕಾರ್ಯಗಳನ್ನು ನಿರ್ವಹಿಸುವ ಮಟ್ಟಿಗೆ ಬೆಳೆದಿದ್ದಾರೆ. ಐಐಟಿ, ಐಐಎಂಗಳಂತ ಭಾರತದ ಅತ್ಯುನ್ನತ ಶಿಕ್ಷಣ ಸಂಸ್ಥೆಗಳಲ್ಲಿ ಎಂಬಿಎ ಮತ್ತು ಇತರೆ ಪದವಿ ಪಡೆದವರು ಈ ರೀತಿ ಕೆಲಸಗಳನ್ನು ಮಾಡುವ ಕಂಪನಿಗಳನ್ನು ಹುಟ್ಟುಹಾಕಿ ರಾಜಕಾರಣದಲ್ಲಿ ತಮ್ಮ ಛಾಪನ್ನು ಉದ್ಯಮಿಗಳಾಗಿ ಗುರುತಿಸಿಕೊಂಡಿದ್ಧಾರೆ. ಇವರನ್ನು ಚುನಾವಣಾ ತಂತ್ರಗಾರರು (Poll Strategist) ಎಂದು ಗುರುತಿಸುತ್ತಾರೆ. ಇವರೇ ಸದ್ಯ ‘ಕಿಂಗ್‌ ಮೇಕರ್‌’.

ಇದನ್ನೂ ಓದಿ| <a class="manualbacklink" target="_blank" href="https://kannada.hindustantimes.com/entertainment/sandalwood-news-actress-pooja-gandhi-marriage-with-vijay-gossip-november-29-mungaru-male-heroine-marrage-reports-pcp-181701088317785.html" rel="dofollow">ಪೂಜಾ ಗಾಂಧಿಗೆ ನಾಡಿದ್ದು ಮದುವೆ; ಕನ್ನಡ ಕಲಿಸಿದ ಗುರುವಿನ ಕೈಹಿಡಿಯಲಿದ್ದಾರಂತೆ ಮುಂಗಾರು ಮಳೆ ಚೆಲುವೆ</a>

ಈ ಚುನಾವಣಾ ತಂತ್ರಗಾರರ ವಿಚಾರಕ್ಕೆ ಬಂದರೆ ಮೊದಲು ಗಮನ ಸೆಳೆಯುವುದು 2012ರ ಗುಜರಾತ್ ವಿಧಾನಸಭಾ ಚುನಾವಣೆ. ಅಂದು ನರೇಂದ್ರ ಮೋದಿ ಅವರು ಮುಖ್ಯಮಂತ್ರಿಯಾಗಿ ಚುನಾವಣೆ ಎದುರಿಸಿದ್ದರು. ನರೇಂದ್ರ ಮೋದಿ ಎಂಬ ಬ್ರ್ಯಾಂಡ್ ಅನ್ನು ರೂಪಿಸುವಲ್ಲಿ ನೆರವಿಗೆ ಬಂದದ್ದು ಈಗ ಇಂಡಿಯನ್ ಪೊಲಿಟಿಕಲ್ ಆಕ್ಷನ್‌ ಕಮಿಟಿ (ಐ-ಪಿಎಸಿ) ಎಂಬ ಕಂಪನಿ ಮುನ್ನಡೆಸುತ್ತಿರುವ ಪ್ರಶಾಂತ್ ಕಿಶೋರ್.

ಪ್ರಶಾಂತ್ ಕಿಶೋರ್ ಅವರು ಬಿಹಾರ ಮೂಲದವರು. ಆಫ್ರಿಕಾದಲ್ಲಿ ವಿಶ್ವಸಂಸ್ಥೆಯ ಆರೋಗ್ಯ ತಜ್ಞರಾಗಿ ಕೆಲಸ ಮಾಡುತ್ತಿದ್ದರು. 2011ರಲ್ಲಿ ಆ ಉದ್ಯೋಗ ಬಿಟ್ಟು ಭಾರತಕ್ಕೆ ಬಂದರು. ಅದಕ್ಕೆ ಕಾರಣ ಇಲ್ಲದಿಲ್ಲ. ನರೇಂದ್ರ ಮೋದಿ ಅವರನ್ನು 2012ರ ಗುಜರಾತ್ ಚುನಾವಣೆಯಲ್ಲಿ ಉತ್ತಮ ಆಡಳಿತದ ಮುಖವಾಗಿ ಬಿಂಬಿಸುವ ಬಹುದೊಡ್ಡ ಯೋಜನೆ ಅವರ ಹೆಗಲೇರಿತ್ತು. ಆಗ ಅವರು ಬಿಜೆಪಿಯದ್ದೇ ಆದ ಆಂತರಿಕ ವ್ಯವಸ್ಥೆಯ ಭಾಗವಾಗಿ ಕೆಲಸ ಮಾಡಿದ್ದರು.

ಬಿಜೆಪಿ ಜತೆಗೆ ಕೆಲಸ ಮಾಡಿಕೊಂಡೇ 2013ರಲ್ಲಿ ಸಿಟಿಜನ್ಸ್ ಫಾರ್ ಅಕೌಂಟೆಬಲ್ ಗವರ್ನೆನ್ಸ್ (ಸಿಎಜಿ) ಎಂಬ ಕಂಪನಿಯ ಸಹ ಸಂಸ್ಥಾಪಕರಾದರು ಪ್ರಶಾಂತ್ ಕಿಶೋರ್. ಇದೇ ಸಂಸ್ಥೆ 2014ರ ಲೋಕಸಭಾ ಚುನಾವಣೆಯಲ್ಲಿ ನರೇಂದ್ರ ಮೋದಿ ಅವರ ಬ್ರ್ಯಾಡಿಂಗ್‌ಗೆ ಕೆಲಸ ಮಾಡಿತ್ತು. ಆ ಚುನಾವಣೆಯಲ್ಲಿ ನರೇಂದ್ರ ಮೋದಿ ಅವರನ್ನು ಮೊದಲ ಬಾರಿಗೆ ಪ್ರಧಾನಿ ಅಭ್ಯರ್ಥಿ ಎಂದು ಚುನಾವಣೆಗೆ ಮೊದಲೇ ಘೋಷಿಸುವ ಪ್ರಯೋಗ ನಡೆಯಿತು. ಅದು ಯಶಸ್ವಿಯಾಯಿತು ಕೂಡ.

ಆದರೆ, 2019ರ ಲೋಕಸಭೆ ಚುನಾವಣೆ ಹೊತ್ತಿಗೆ ಪ್ರಶಾಂತ್ ಕಿಶೋರ್ ಬಿಜೆಪಿಯಿಂದ ದೂರ ಸರಿದರು. 2018ರಲ್ಲಿ ಬಿಹಾರದಲ್ಲಿ ನಿತೀಶ್ ಕುಮಾರ್ ಜತೆಗೂಡಿ ಕೆಲಸ ಮಾಡಿದರು. ಜೆಡಿಯು ಬಿಹಾರದಲ್ಲಿ ಹೆಚ್ಚಿನ ಸಾಧನೆ ಮಾಡುವುದಕ್ಕೆ ಅಗತ್ಯ ತಂತ್ರಗಾರಿಕೆ ರೂಪಿಸಿ ಯಶಸ್ವಿಯಾದರು. ಇದೇ ವೇಳೆ, ಪ್ರಶಾಂತ್ ಕಿಶೋರ್ ಜತೆಗೆ ಕೆಲಸ ಮಾಡಿದವರು ಹಲವರು ತಮ್ಮದೇ ಆದ ಕಂಪನಿಗಳನ್ನು ಹುಟ್ಟುಹಾಕಿಕೊಂಡರು. ಇನ್ನು ಕೆಲವು ಹೊಸಬರು ಕೂಡ ಚುನಾವಣಾ ತಂತ್ರಗಾರಿಕೆಯ ಕನ್ಸಲ್ಟೆನ್ಸಿ ಶುರುಮಾಡಿಕೊಂಡರು.

<h2>ಚುನಾವಣಾ ತಂತ್ರಗಾರಿಕೆಯ ಉದ್ಯಮದ ಹಾದಿ…</h2>ಚುನಾವಣಾ ತಂತ್ರಗಾರಿಕೆ ಒಂದು ಉದ್ಯಮವಾಗಿ ಬೆಳೆಯುತ್ತಿದ್ದು, ಪ್ರತಿ ಚುನಾವಣೆಯಲ್ಲಿ ಗೆಲ್ಲುವುದಕ್ಕಾಗಿ ಪಕ್ಷ, ರಾಜಕೀಯ ನಾಯಕರು ತಮ್ಮ ಛಾಪನ್ನು ಮತದಾರರ ಮೇಲೆ ಬೀರಲು ತಂತ್ರಗಾರರ ನೆರವು ಪಡೆಯತೊಡಗಿದ್ದಾರೆ.

ಪ್ರಶಾಂತ್ ಕಿಶೋರ್ ಜತೆಗೆ ಕೆಲಸ ಮಾಡಿದ್ದ ಅಬ್ಬಿನ್ ಥೀಪುರ ಮತ್ತು ತಂಡ ಪೊಲಿಟಿಕ್ ಮಾರ್ಕರ್‌ (Politique Marquer) 2019 ರಿಂದ ಚುನಾವಣಾ ತಂತ್ರಗಾರಿಕೆ ಕನ್ಸೆಲ್ಟೆನ್ಸಿ ಕೆಲಸ ಶುರುಮಾಡಿದೆ. ಕರ್ನಾಟಕವೂ ಸೇರಿ ಹಲವು ರಾಜ್ಯಗಳ ರಾಜಕಾರಣಿಗಳು ಈ ಸಂಸ್ಥೆಯ ನೆರವು ಪಡೆಯುತ್ತಿದ್ದಾರೆ.

ಇದೇ ರೀತಿ ರಾಜಕೀಯ ತಂತ್ರಗಾರ, ಮಾಜಿ ಆಮ್‌ ಆದ್ಮಿ ಪಾರ್ಟಿ ನಾಯಕ ಅಂಕಿತ್ ಲಾಲ್‌ 2020ರಲ್ಲಿ ಪೊಲಿಟಿಕ್ ಅಡ್ವೈಸರ್ಸ್‌ (Politique Advisors) ಎಂಬ ಕಂಪನಿ ಶುರುಮಾಡಿದರು. ಈ ಕಂಪನಿ ಬಿಹಾರದಲ್ಲಿ ನಿತೀಶ್ ಕುಮಾರ್ ಜತೆಗೆ ಒಪ್ಪಂದ ಮಾಡಿಕೊಂಡು ಕೆಲಸ ಮಾಡಿದೆ.

ಇದನ್ನೂ ಓದಿ| <a class="manualbacklink" target="_blank" href="https://kannada.hindustantimes.com/photos/india-news-in-pics-diyas-illuminate-varanasi-as-the-city-celebrates-dev-deepavali-2023-photos-uks-181701101730332.html" rel="dofollow">ವಾರಾಣಸಿಯಲ್ಲಿ ದೇವ ದೀಪಾವಳಿ, ದೀಪಗಳ ಹಬ್ಬದ ಚಿತ್ತಾಕರ್ಷಕ ಫೋಟೋಸ್ ಕಣ್ತುಂಬಿಕೊಳ್ಳಿ</a>

ನರೇಶ್ ಅರೋರಾ ಅವರ ಡಿಸೈನ್‌ಬಾಕ್ಸ್ಡ್ (DesignBoxed) ಕಳೆದ ಕೆಲವು ವರ್ಷಗಳಿಂದ ಕಾಂಗ್ರೆಸ್ ಪಕ್ಷದ ಚುನಾವಣಾ ತಂತ್ರಗಾರಿಕೆಯನ್ನು ರೂಪಿಸುತ್ತಿದೆ. ಪೇಸಿಎಂ, ‘ಕಿವಿ ಮೇಲೆ ಹೂವು’ ಮುಂತಾದ ಅಭಿಯಾನವನ್ನು ರೂಪಿಸಿ ಗಮನಸೆಳೆದಿದೆ.

ಪ್ರಶಾಂತ್ ಕಿಶೋರ್ ಜತೆಗೆ ಕೆಲಸ ಮಾಡಿದ ಸುನಿಲ್ ಕನುಗೋಲು ಅವರು 2023ರ ಕರ್ನಾಟಕ ವಿಧಾನಸಭಾ ಚುನಾವಣೆಯಲ್ಲಿ ಕಾಂಗ್ರೆಸ್ ಪಕ್ಷ ಗೆಲ್ಲುವುದಕ್ಕೆ ಬೇಕಾದ ತಂತ್ರಗಾರಿಕೆ ರೂಪಿಸಿದವರು.

ಹೀಗೆ ಯಶಸ್ವಿಯಾದವರ ಪಟ್ಟಿ ಬೆಳೆಯುತ್ತ ಸಾಗುತ್ತದೆ. ಆದರೆ, ಈ ಚುನಾವಣಾ ಗೆಲುವಿನ ಯಶಸ್ಸಿನ ಜತೆಗೆ ಅವರಿಗೆ ಸವಾಲುಗಳು ಮತ್ತು ಸೋಲುಗಳೂ ಎದುರಾಗುತ್ತವೆ ಎಂಬುದು ಸುಳ್ಳಲ್ಲ. ಪ್ರಶಾಂತ್ ಕಿಶೋರ್ ಅವರ ತಂತ್ರಗಾರಿಕೆ, ಗುಜರಾತ್‌, ಬಿಹಾರ, ಪಶ್ಚಿಮ ಬಂಗಾಳದಲ್ಲಿ ಗೆದ್ದರೂ, ಗೋವಾದಲ್ಲಿ ವಿಫಲವಾಗಿದೆ. ಈ ರೀತಿ ಸೋಲು, ಸವಾಲು ಪ್ರತಿಯೊಬ್ಬ ತಂತ್ರಗಾರನಿಗೂ ಆಗಿರುವಂಥದ್ದು, ಆಗುವಂಥದ್ದು. ವಿಶೇಷ ಎಂದರೆ ಇವರಲ್ಲಿ ಬಹುತೇಕ ಚುನಾವಣಾ ತಂತ್ರಗಾರರು ಬಿಜೆಪಿಯ ಚುನಾವಣಾ ಪ್ರಚಾರ ಮತ್ತು ತಂತ್ರಗಾರಿಕೆಗೆ ಕೆಲಸ ಮಾಡಿದ ಅನುಭವಿಗಳು.

<h2>ರಾಜಕಾರಣಿಗಳಿಗೆ ಪಕ್ಷ, ಕಾರ್ಯಕರ್ತರ ಮೇಲಿನ ಹಿಡಿತ ತಪ್ಪಿ ಹೋಗುವ ಭಯ</h2>ಚುನಾವಣಾ ತಂತ್ರಗಾರರ ಕಾರ್ಯವೈಖರಿ ಹೇಗಿರುತ್ತದೆ ಎಂದರೆ ಅವರು ಪಕ್ಷದ ನೀತಿ, ನಿರೂಪಣೆಗಳ ಮೇಲೆ ಪ್ರಭಾವ ಬೀರಬಲ್ಲರು. ಅವರು ಹೇಳಿದಂತೆ ಎಲ್ಲರೂ ಕೇಳಬೇಕಾಗುತ್ತದೆ. ಒಂದು ಯೋಜನೆ ರೂಪಿಸಿಕೊಂಡ ಬಳಿಕ ಅದರ ಯಶಸ್ಸಿಗಾಗಿ ಅವರು ಹೇಳಿದ ಚೌಕಟ್ಟಿನಲ್ಲಿ ಪ್ರತಿಯೊಬ್ಬ ರಾಜಕಾರಣಿಯೂ ಕೆಲಸ ಮಾಡಬೇಕು.

ಆಗ ಪಕ್ಷ ಸಂಘಟನೆಯ ಸಿದ್ಧಾಂತ, ನೀತಿಗಳ ವಿರುದ್ಧವಾಗಿ ಅಥವಾ ಅದನ್ನು ಮೀರಿದ ಪ್ರಭಾವ ಬೀರುವ ಸಾಧ್ಯತೆ ಇದೆ. ಆ ರೀತಿ ಆದರೆ, ಪಕ್ಷದ ಮೇಲಿನ ಹಿಡಿತ ಈ ಚುನಾವಣಾ ತಂತ್ರಗಾರಿಕೆಯ ಕಂಪನಿ ಕೈಗೆ ಹೋಗಿಬಿಡಬಹುದು ಎಂಬ ಆತಂಕ ರಾಜಕಾರಣಿಗಳದ್ದು.

ಇಂತಹ ಆತಂಕಕ್ಕೆ ಇತ್ತೀಚಿನ ನಿದರ್ಶನ ಭಾರತ ರಾಷ್ಟ್ರ ಸಮಿತಿ (ಬಿಆರ್‌ಎಸ್‌)ನದ್ದು. ಅದು ಪ್ರಶಾಂತ್ ಕಿಶೋರ್ ಅವರ ಐ-ಪಿಎಸಿ ಜತೆಗಿನ ಒಪ್ಪಂದವನ್ನು ಇತ್ತೀಚೆಗೆ ರದ್ದುಗೊಳಿಸಿತು. ಬಳಿಕ ಕೆಟಿ ರಾಮ ರಾವ್, ಅವರಿಗೆ ಪಕ್ಷದ ಕಾರ್ಯನಿರ್ವಹಣೆಯ ನಿಯಂತ್ರಣ ಬಿಟ್ಟುಕೊಡಬೇಕಂತೆ. ಅವರು ನಮಗೆ ಪಾಠ ಹೇಳಲಿ. ಆದರೆ ನಿಯಂತ್ರಣ ಕೇಳಿದರೆ ಕೊಡಲಾಗದು ಎಂದು ಹೇಳಿದ್ದರು.

ಚುನಾವಣಾ ತಂತ್ರಗಾರರು ಯಾವುದೇ ವಿಷಯಗಳ ನಿರೂಪಣೆಯನ್ನು ಬದಲಾಯಿಸಬಲ್ಲರೇ ಹೊರತು, ಸ್ವತಃ ವಿವೇಚನೆ ಬಳಸಿ ನಿರ್ಧಾರ ತೆಗೆದುಕೊಳ್ಳುವ ಮತದಾರರ ಮೇಲೆ ಪರಿಣಾಮ ಬೀರಲಾರರು. ಅದೇ ರೀತಿ ನಿರ್ಧಾರ ತೆಗೆದುಕೊಳ್ಳಲು ಸಮಯ ತೆಗೆದುಕೊಳ್ಳುವ ಮತದಾರರ ಮೇಲೆ ಪ್ರಭಾವ ಬೀರುವುದಕ್ಕೆ ಪ್ರಯತ್ನಿಸಬಹುದು. ಇಡೀ ರಾಜಕೀಯ ಪಕ್ಷದ ಕಾರ್ಯಾಚರಣೆಯ ಹಿಡಿತ ಬಯಸಿದಾಗ ರಾಜಕಾರಣಿಗಳಿಗೆ, ರಾಜಕೀಯ ಪಕ್ಷಗಳಿಗೆ ನಡುಕ ಉಂಟಾಗುವುದು ಸಹಜ. ಆದಾಗ್ಯೂ, ಗೆಲ್ಲಬೇಕು ಎಂಬ ಕಾರಣಕ್ಕೆ ರಾಜಕಾರಣಿಗಳು, ರಾಜಕೀಯ ಪಕ್ಷಗಳು ಈಗ ಚುನಾವಣಾ ತಂತ್ರಗಾರರ ಮೊರೆ ಹೋಗುತ್ತಿರುವುದು ವಾಸ್ತವ.

ಕಳೆದ 10 ವರ್ಷಗಳ ಚುನಾವಣೆಯಲ್ಲಿ ಚುನಾವಣಾ ತಂತ್ರಗಾರರದ್ದೇ ಕಾರುಬಾರು. ಬಹುತೇಕ ಗೆಲುವುಗಳಲ್ಲಿ ಇವರ ಚುನಾವಣಾ ತಂತ್ರಗಾರಿಕೆ ಕೆಲಸ ಮಾಡಿರುವುದನ್ನು ರಾಜಕಾರಣಿಗಳು ಗುರುತಿಸಿದ್ದಾರೆ. ಪೂರ್ಣ ನಂಬಿಕೆಯೊಂದಿಗೆ ಇವರನ್ನು ರಾಜಕಾರಣದಲ್ಲಿ ತೊಡಗಿಸಿಕೊಳ್ಳಲು ರಾಜಕಾರಣಿಗಳು ಇನ್ನೂ ತಯಾರಾಗಿಲ್ಲ. ಗೆಲ್ಲಬೇಕು ಎಂಬ ಕಾರಣಕ್ಕೆ ಇವರ ಮೊರೆ ಹೋಗುತ್ತಿರುವುದು ಕಂಡುಬಂದಿದೆ.&nbsp;

DK Shivakumar: ಕರ್ನಾಟಕ ಡಿಸಿಎಂ ಡಿಕೆ ಶಿವಕುಮಾರ್‌ಗೆ ದುಬೈ ತೆರಳಲು ದೆಹಲಿ ಕೋರ್ಟ್ ಅನುಮತಿ, ಷರತ್ತು ಅನ್ವಯ

DK Shivakumar (PTI)

ನವದೆಹಲಿ: ಕರ್ನಾಟಕ ಉಪಮುಖ್ಯಮಂತ್ರಿ <a class="manualbacklink" target="_blank" href="https://kannada.hindustantimes.com/topic/dk-Shivakumar" rel="dofollow">ಡಿಕೆ ಶಿವಕುಮಾರ್</a> (DK Shivakumar) ಅವರಿಗೆ ಅಕ್ರಮ ಹಣ ವರ್ಗಾವಣೆ ಪ್ರಕರಣದಲ್ಲಿ ದೊಡ್ಡ ರಿಲೀಫ್ ಸಿಕ್ಕಿದ್ದು, ಅವರ ವಿದೇಶ ಪ್ರವಾಸಕ್ಕೆ ದೆಹಲಿ ಕೋರ್ಟ್ (Delhi court) ಅನುಮತಿ ನೀಡಿದೆ.

ವಿಶೇಷ ನ್ಯಾಯಮೂರ್ತಿ ವಿಕಾಸ್ ಧುಲ್‌ ಅವರು <a class="manualbacklink" target="_blank" href="https://kannada.hindustantimes.com/topic/dk-Shivakumar" rel="dofollow">ಡಿಕೆ ಶಿವಕುಮಾರ್</a> ಸಲ್ಲಿಸಿದ್ದ ಅರ್ಜಿ ಪರಿಶೀಲಿಸಿದ ಬಳಿಕ ಈ ತೀರ್ಪು ನೀಡಿದ್ದಾರೆ. ಡಿಕೆ ಶಿವಕುಮಾರ್ ಅವರು, ದುಬೈನಲ್ಲಿ ನವೆಂಬರ್ 29ರಿಂದ ಡಿಸೆಂಬರ್ 3ರ ತನಕ ಹವಾಮಾನ ಕುರಿತ ಶೃಂಗಕ್ಕೆ ತೆರಳಬೇಕಾಗಿದೆ. ಅದಕ್ಕೆ ಅನುಮತಿ ನೀಡಬೇಕು ಎಂದು ಅರ್ಜಿಯಲ್ಲಿ ಮನವಿ ಮಾಡಿದ್ದರು.

ದುಬೈನಲ್ಲಿ ನಡೆಯಲಿರುವ ಸಿಇಒಪಿ28 ಸ್ಥಳೀಯ ಹವಾಮಾನ ಕ್ರಿಯಾ ಶೃಂಗಸಭೆಯಲ್ಲಿ ಪಾಲ್ಗೊಳ್ಳಲು ಅವರನ್ನು ಸಿಇಪಿ 28ರ ನಿಯೋಜಿತ ಅಧ್ಯಕ್ಷ ಡಾ ಸುಲ್ತಾನ್ ಅಹ್ಮದ್ ಅಲ್ ಜಾಬರ್ ಮತ್ತು ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿಯ ಹವಾಮಾನ ಮಹತ್ವಾಕಾಂಕ್ಷೆ ಮತ್ತು ಪರಿಹಾರದ ಕುರಿತ ವಿಶೇಷ ಪ್ರತಿನಿಧಿ ಮೈಕೆಲ್ ಆರ್ ಬ್ಲೂಮ್‌ಬರ್ಗ್ ಅವರು ಆಹ್ವಾನಿಸಿದ್ದಾರೆ. ಇದು ವಿಶ್ವಸಂಸ್ಥೆಯು ಆಯೋಜಿಸುವ ವಾರ್ಷಿಕ ಅಂತರಾಷ್ಟ್ರೀಯ ಹವಾಮಾನ ಶೃಂಗಸಭೆ ಎಂದು ಅರ್ಜಿಯಲ್ಲಿ ಅವರು ತಿಳಿಸಿದ್ದಾರೆ.

<h2>ತೀರ್ಪಿನಲ್ಲಿ ಜಡ್ಜ್ ಏನು ಹೇಳಿದ್ರು..</h2>“ಭಾರತದ ಸಂವಿಧಾನದ 21 ನೇ ವಿಧಿಯ ಪ್ರಕಾರ ವಿದೇಶಕ್ಕೆ ಪ್ರಯಾಣಿಸುವ ಹಕ್ಕು ವೈಯಕ್ತಿಕ ಸ್ವಾತಂತ್ರ್ಯದ ಭಾಗವಾಗಿದೆ. ಆದಾಗ್ಯೂ, ಅಂತಹ ಹಕ್ಕು ಅನಿಯಂತ್ರಿತವಾಗಿಲ್ಲ. ಸಮಂಜಸ ನಿರ್ಬಂಧವನ್ನು ಅದರ ಮೇಲೆ ವಿಧಿಸಬಹುದು. ಆರೋಪಿಯು ತಲೆಮರೆಸಿಕೊಳ್ಳುವ ಸಾಧ್ಯತೆ ಮತ್ತು ವಿಚಾರಣೆಗೆ ಹಾಜರಾಗದೇ ಇರಬಹುದು ಎಂಬ ಸಂದೇಹ ಇರುವಲ್ಲಿ ನಿರ್ಬಂಧ ವಿಧಿಸುವುದಕ್ಕೆ ಅವಕಾಶ ಇದೆ” ಎಂದು ನ್ಯಾಯಮೂರ್ತಿಗಳು ನವೆಂಬರ್ 25 ರಂದು ನೀಡಿದ ಆದೇಶದಲ್ಲಿ ಹೇಳಿದರು.

ಇದನ್ನೂ ಓದಿ|<a class="manualbacklink" target="_blank" href="https://kannada.hindustantimes.com/entertainment/sandalwood-news-actress-pooja-gandhi-marriage-with-vijay-gossip-november-29-mungaru-male-heroine-marrage-reports-pcp-181701088317785.html" rel="dofollow"> ಪೂಜಾ ಗಾಂಧಿಗೆ ನಾಡಿದ್ದು ಮದುವೆ; ಕನ್ನಡ ಕಲಿಸಿದ ಗುರುವಿನ ಕೈಹಿಡಿಯಲಿದ್ದಾರಂತೆ ಮುಂಗಾರು ಮಳೆ ಚೆಲುವೆ</a>

“ಸದ್ಯದ ಸನ್ನಿವೇಶ ಮತ್ತು ವಾಸ್ತವಾಂಶಗಳನ್ನು ಪರಿಗಣಿಸಿಕೊಂಡು ಅರ್ಜಿದಾರರ ಅರ್ಜಿಯ ಮನವಿಯನ್ನು ಪುರಸ್ಕರಿಸುವುದಕ್ಕೆ ಅಡ್ಡಿ ಇಲ್ಲ. ಹೀಗಾಗಿ ಡಿಕೆ ಶಿವಕುಮಾರ್ ಸಲ್ಲಿಸಿದ ಅರ್ಜಿಯಂತೆ ಅವರ ವಿದೇಶ ಪ್ರಯಾಣಕ್ಕೆ ಅನುಮತಿ ನೀಡಲಾಗತ್ತದೆ. ಇದರಂತೆ ಅವರು 2023ರ ನವೆಂಬರ್ 29ಕ್ಕೆ ದುಬೈಗೆ ತೆರಳಿ ಅಲ್ಲಿಂದ ಡಿಸೆಂಬರ್ 3ಕ್ಕೆ ಭಾರತಕ್ಕೆ ಬರವ ತನಕ ಈ ಅನುಮತಿ ಜಾರಿಯಲ್ಲಿರುತ್ತದೆ” ಎಂದು ನ್ಯಾಯಪೀಠ ಹೇಳಿದೆ.

<h2>ಬೇಷರತ್ ಅನುಮತಿ ಅಲ್ಲ, ಕೆಲವು ಷರತ್ತುಗಳಿವೆ..</h2>ಕರ್ನಾಟಕದ ಉಪಮುಖ್ಯಮಂತ್ರಿ, ಎಂಟು ಸಲ ಶಾಸಕರಾಗಿರುವ ಡಿಕೆ ಶಿವಕುಮಾರ್, ಅವರು ಭಾರತದಿಂದ ಪರಾರಿಯಾಗುವ ಸಾಧ್ಯತೆ ಕಡಿಮೆ ಇರುವ ಕಾರಣ ಅವರಿಗೆ ವಿದೇಶ ಪ್ರವಾಸಕ್ಕೆ ಅನುಮತಿ ನೀಡಲಾಗಿದೆ. ಆದರೆ ಕೆಲವು ಷರತ್ತುಗಳನ್ನು ನ್ಯಾಯಪೀಠ ವಿಧಿಸಿದೆ.

<ul><li>ದುಬೈಗೆ ತೆರಳುವ ಮೊದಲು ಅವರು 5 ಲಕ್ಷ ರೂಪಾಯಿ ಠೇವಣಿಯನ್ನು ಕೋರ್ಟ್‌ಗೆ ಕಟ್ಟಬೇಕು.</li><li>ಪ್ರಯಾಣದ ಸಂಪೂರ್ಣ ಮಾಹಿತಿಯನ್ನು ಕೋರ್ಟ್‌ಗೆ ಒಪ್ಪಿಸಬೇಕು.</li><li>ಸಂಪರ್ಕ ಸಂಖ್ಯೆ ದೂರವಾಣಿ ಅಥವಾ ಮೊಬೈಲ್‌ ನಂಬರ್ ಒದಗಿಸಬೇಕು.</li><li>ಅಕ್ರಮ ಹಣ ವರ್ಗಾವಣೆ ಕೇಸಿಗೆ ಸಂಬಂಧಿಸಿದ ಯಾವುದೇ ಸಾಕ್ಷ್ಯಗಳನ್ನು ಸಂಪರ್ಕಿಸುವುದು, ಅವರಿಗೆ ಬೆದರಿಕೆ ಒಡ್ಡುವುದು, ಪ್ರಭಾವ ಬೀರುವುದು ಮುಂತಾದ ಕೆಲಸ ಮಾಡಬಾರದು.</li></ul><h2>ಅಕ್ರಮ ಹಣ ವರ್ಗಾವಣೆ ಸಂಬಂಧಿಸಿದ ಕೇಸ್</h2>ಡಿಕೆ ಶಿವಕುಮಾರ್ ಅವರಿಗೆ 2019 ರ ಅಕ್ಟೋಬರ್ 23 ರಂದು ದೆಹಲಿ ಹೈಕೋರ್ಟ್, ನ್ಯಾಯಾಲಯದ ಅನುಮತಿಯಿಲ್ಲದೆ ಅವರು ದೇಶವನ್ನು ತೊರೆಯಬಾರದು ಎಂಬ ಷರತ್ತಿನೊಂದಿಗೆ ಜಾಮೀನು ನೀಡಿತ್ತು.

ಅವರು ಕೋರ್ಟ್‌ಗೆ ಸಲ್ಲಿಸಿದ್ದ ಅರ್ಜಿಯಲ್ಲಿ ಇದಕ್ಕೂ ಮೊದಲು ಡಿಕೆ ಶಿವಕುಮಾರ್ ಅನೇಕ ಸಲ ವಿದೇಶ ಪ್ರವಾಸ ಮಾಡಿದ್ದಾರೆ. ಭಾರತಕ್ಕೆ ವಾಪಸಾಗಿದ್ದಾರೆ. ಅವರು ಆ ರೀತಿಯಲ್ಲಿ ಅಪಾಯಕಾರಿ ಅಲ್ಲ ಎಂದು ಪ್ರತಿಪಾದಿಸಲಾಗಿದೆ. ಅವರಿಗೆ ಅಪರಾಧ ಚರಿತ್ರೆ ಕೂಡ ಇಲ್ಲ ಎಂದು ಹೇಳಲಾಗಿದೆ.

ಇದನ್ನೂ ಓದಿ| <a class="manualbacklink" target="_blank" href="https://kannada.hindustantimes.com/photos/india-news-in-pics-diyas-illuminate-varanasi-as-the-city-celebrates-dev-deepavali-2023-photos-uks-181701101730332.html" rel="dofollow">ವಾರಾಣಸಿಯಲ್ಲಿ ದೇವ ದೀಪಾವಳಿ, ದೀಪಗಳ ಹಬ್ಬದ ಚಿತ್ತಾಕರ್ಷಕ ಫೋಟೋಸ್ ಕಣ್ತುಂಬಿಕೊಳ್ಳಿ</a>

ಆದಾಗ್ಯೂ, ವಿದೇಶ ಪ್ರವಾಸಕ್ಕೆ ಅನುಮತಿ ಕೋರಿ ಡಿಕೆ ಶಿವಕುಮಾರ್ ಸಲ್ಲಿಸಿದ್ದ ಅರ್ಜಿಗೆ ಜಾರಿ ನಿರ್ದೇಶನಾಲಯ ಆಕ್ಷೇಪಣೆ ವ್ಯಕ್ತಪಡಿಸಿತ್ತು.

ಆದಾಯ ತೆರಿಗೆ ಇಲಾಖೆಯು 2018 ರಲ್ಲಿ ಬೆಂಗಳೂರಿನ ವಿಶೇಷ ನ್ಯಾಯಾಲಯದಲ್ಲಿ ಕೋಟ್ಯಂತರ ರೂಪಾಯಿ ಮೌಲ್ಯದ ತೆರಿಗೆ ವಂಚನೆ ಮತ್ತು 'ಹವಾಲಾ' ವಹಿವಾಟಿನ ಆರೋಪದ ಮೇಲೆ ಸಲ್ಲಿಸಿದ ಚಾರ್ಜ್ ಶೀಟ್ ಆಧರಿಸಿದ ಕೇಸ್ ಇದು.

ಆದಾಯ ತೆರಿಗೆ ಇಲಾಖೆಯು ಶಿವಕುಮಾರ್ ಮತ್ತು ಅವರ ಸಹವರ್ತಿ ಎಸ್ ಕೆ ಶರ್ಮಾ ವಿರುದ್ಧ ಅಕ್ರಮ ಹಣ ವರ್ಗಾವಣೆಯ ಆರೋಪ ಹೊರಿಸಿದ್ದು, ವಿಚಾರಣೆ ಪ್ರಗತಿಯಲ್ಲಿದೆ.

ಕರ್ನಾಟಕದ ಉಪಮುಖ್ಯಮಂತ್ರಿ ಡಿಕೆ ಶಿವಕುಮಾರ್ ಅವರಿಗೆ ಅಕ್ರಮ ಹಣ ವರ್ಗಾವಣೆ ಕೇಸ್‌ನಲ್ಲಿ ಬಹುದೊಡ್ಡ ರಿಲೀಫ್‌ ಸಿಕ್ಕಿದೆ. ಅವರ ವಿದೇಶ ಪ್ರವಾಸಕ್ಕೆ ಕೋರ್ಟ್ ಅನುಮತಿ ನೀಡಿದೆ.

Dev Deepavali: ವಾರಾಣಸಿಯಲ್ಲಿ ದೇವ ದೀಪಾವಳಿ, ದೀಪಗಳ ಹಬ್ಬದ ಚಿತ್ತಾಕರ್ಷಕ ಫೋಟೋಸ್ ಕಣ್ತುಂಬಿಕೊಳ್ಳಿ

India News In pics Diyas illuminate Varanasi as the city celebrates Dev Deepavali 2023 Photos UKS

ದೀಪಾವಳಿ ಹಬ್ಬ ಕಳೆದು 15 ದಿನದ ಬಳಿಕ ಬರುವ ಹಬ್ಬವೇ ದೇವ ದೀಪಾವಳಿ. ವಾರಾಣಸಿಯಲ್ಲಿ ಈ ಹಬ್ಬವನ್ನು ಬಹಳ ಅದ್ದೂರಿಯಾಗಿ ಆಚರಿಸುತ್ತಿರುವುದು ವಾಡಿಕೆ. ಇದರ ಕೆಲವು ಆಕರ್ಷಕ ಫೋಟೋಸ್ ಇಲ್ಲಿವೆ ನೋಡಿ.

Explained: ತೆಲಂಗಾಣದಲ್ಲಿ ನ.30ಕ್ಕೆ ಮತದಾನ, ನೀವು ತಿಳಿದಿರಬೇಕಾದ 5 ಅಂಶಗಳು ಹೀಗಿವೆ ನೋಡಿ

ತೆಲಂಗಾಣ ವಿಧಾನಸಭಾ ಚುನಾವಣೆ ಪ್ರಕ್ರಿಯೆ ಚಾಲ್ತಿಯಲ್ಲಿದೆ. ಇದೇ ನವೆಂಬರ್ 30ರಂದು ಅಲ್ಲಿ ಮತದಾನ ನಡೆಯಲಿದೆ. ಪ್ರಸ್ತುತ ಕೆ.ಚಂದ್ರಶೇಖರ್ ರಾವ್ (ಕೆಸಿಆರ್‌) ಅವರ ಭಾರತ್ ರಾಷ್ಟ್ರ ಸಮಿತಿ (ಬಿಆರ್‌ಎಸ್‌) ಆಡಳಿತ ಚುಕ್ಕಾಣಿ ಹಿಡಿದಿದೆ. ಇದು ಮೂರನೇ ಬಾರಿ ಈ ರಾಜ್ಯದಲ್ಲಿ ವಿಧಾನಸಭಾ ಚುನಾವಣೆ ನಡೆಯುತ್ತಿದೆ.

ಕಳೆದ ಎರಡೂ ಚುನಾವಣೆಯಲ್ಲಿ ಕೆಸಿಆರ್ ನಾಯಕತ್ವದ ಟಿಆರ್‌ಎಸ್‌ (ತೆಲಂಗಾಣ ರಾಷ್ಟ್ರಸಮಿತಿ) ಆಡಳಿತ ಚುಕ್ಕಾಣಿ ಹಿಡಿದಿದೆ. ಆದರೆ ಈ ಬಾರಿ ಈ ರಾಜ್ಯದಲ್ಲಿ ತ್ರಿಕೋನ ಸ್ಪರ್ಧೆಯ ಲಕ್ಷಣ ಗೋಚರಿಸಿದೆ. ಬಿಆರ್‌ಎಸ್, ಕಾಂಗ್ರೆಸ್ ಮತ್ತು ಬಿಜೆಪಿ ನಡುವೆ ಸ್ಪರ್ಧೆ ಏರ್ಪಡುವ ಲಕ್ಷಣಗಳು ಗೋಚರಿಸಿವೆ. ಸದ್ಯ ಅಂತಿಮ ಹಂತದ ಪ್ರಚಾರ ತೀವ್ರಗೊಂಡಿದ್ದು, ಮೆಗಾ ರಾಜಕೀಯ ರ‍್ಯಾಲಿಗಳು ನಡೆಯುತ್ತಿವೆ.

<h3>1. <a class="manualbacklink" target="_blank" href="https://kannada.hindustantimes.com/topic/telangana-assembly- elections-2023 " rel="dofollow">ತೆಲಂಗಾಣ ವಿಧಾನಸಭಾ ಚುನಾವಣಾ</a> ಕ್ಷೇತ್ರಗಳು ಎಷ್ಟು</h3>ತೆಲಂಗಾಣದಲ್ಲಿರುವ ವಿಧಾನಸಭಾ ಚುನಾವಣಾ ಕ್ಷೇತ್ರಗಳ ಸಂಖ್ಯೆ 119. ಈ ಪೈಕಿ ಅರ್ಧಕ್ಕಿಂತ ಹೆಚ್ಚು ಅಂದರೆ 60 ಸ್ಥಾನ ಗೆದ್ದ ಪಕ್ಷ ಅಧಿಕಾರ ಗದ್ದುಗೆ ಏರಬಹುದು.

<h3>2. <a class="manualbacklink" target="_blank" href="https://kannada.hindustantimes.com/topic/telangana-assembly- elections-2023 " rel="dofollow">ತೆಲಂಗಾಣ ಚುನಾವಣಾ</a> ವೇಳಾಪಟ್ಟಿ</h3>

ಚುನಾವಣಾ ಅಧಿಸೂಚನೆ ಪ್ರಕಟ - 03.11.2023

ನಾಮಪತ್ರ ಸಲ್ಲಿಕೆಗೆ ಕೊನೇ ದಿನ 10.11.2023

ನಾಮಪತ್ರ ಪರಿಶೀಲನೆ ದಿನ 13.11.2023

ನಾಮಪತ್ರ ಹಿಂಪಡೆಯಲು ಕೊನೇ ದಿನ 15.11.2023

ಮತದಾನದ ದಿನ 30.11.2023

ಮತ ಎಣಿಕೆ ದಿನ - 03.12.2023

<h2>3. ಪ್ರಮುಖ ಪಕ್ಷಗಳು ಕೊಟ್ಟಿರುವ ಮುಖ್ಯ ಭರವಸೆಗಳು</h2><h3>ಬಿಆರ್‌ಎಸ್ ಭರವಸೆಗಳು ಹೀಗಿವೆ</h3><ul><li>ರೈತು ಬಂಧು ಸಹಾಯಧನ ಹಂತ ಹಂತವಾಗಿ ಎಕರೆಗೆ 16,000 ರೂಪಾಯಿಗೆ ಏರಿಕೆ</li><li>ತೆಲಂಗಾಣ ಅನ್ನಪೂರ್ಣ ಯೋಜನೆ - ಎಲ್ಲ ಪಡಿತರ ಚೀಟಿದಾರರಿಗೆ ಉತ್ತಮ ಅಕ್ಕಿ</li><li>ಆಸರಾ ಪಿಂಚಣಿ ಹೆಚ್ಚಳ. 5,016 ರೂಪಾಯಿಗೆ ಮತ್ತು ವಿಕಲಚೇತನರ ಪಿಂಚಣಿಗಳನ್ನು 6,016 ರೂಪಾಯಿಗೆ ಹೆಚ್ಚಳ ಮಾಡುವ ಭರವಸೆ</li><li>ಹೈದರಾಬಾದ್‌ನಲ್ಲಿ ಇನ್ನೂ 1 ಲಕ್ಷ 2BHK ಮನೆಗಳ ನಿರ್ಮಾಣ. ಗೃಹ ಲಕ್ಷ್ಮಿ ಯೋಜನೆಯೊಂದಿಗೆ, ಭೂರಹಿತರಿಗೆ ವಸತಿ ಪ್ಲಾಟ್‌ಗಳು ಒದಗಿಸುವುದು</li><li>ಕೆಸಿಆರ್ ಬಿಮಾ ಯೋಜನೆ - ಪಡಿತರ ಚೀಟಿ ಹೊಂದಿರುವ ಎಲ್ಲಾ ಕುಟುಂಬಗಳಿಗೆ 5 ಲಕ್ಷ ರೂಪಾಯಿ ವಿಮೆ</li><li>ಮಹಿಳಾ ಸ್ವಸಹಾಯ ಗುಂಪುಗಳಿಗೆ ಸ್ವಂತ ಕಟ್ಟಡ</li><li>ಎಲ್ಲಾ ಅರ್ಹ ಬಡ ಮಹಿಳೆಯರಿಗೆ 400 ರೂಪಾಯಿಗೆ ಸಬ್ಸಿಡಿ ಎಲ್ಪಿಜಿ ಸಿಲಿಂಡರ್</li><li>ಸೌಭಾಗ್ಯ ಲಕ್ಷ್ಮಿ ಯೋಜನೆಯಂತೆ, ಎಲ್ಲಾ ಅರ್ಹ ಬಡ ಮಹಿಳೆಯರಿಗೆ ತಿಂಗಳಿಗೆ 3,000 ರೂಪಾಯಿ</li><li>ನಗದು ರಹಿತ ಚಿಕಿತ್ಸೆಗಾಗಿ ಕೆಸಿಆರ್ ಆರೋಗ್ಯ ರಕ್ಷಾ ವೈದ್ಯಕೀಯ ಕವರೇಜ್ ಅನ್ನು 15 ಲಕ್ಷ ರೂಪಾಯಿಗೆ ಹೆಚ್ಚಿಸಲಾಗಿದೆ</li></ul><h3>ಕಾಂಗ್ರೆಸ್ ಪಕ್ಷದ ಭರವಸೆಗಳು</h3><ul><li>ಮಹಾಲಕ್ಷ್ಮಿ ಯೋಜನೆ ಪ್ರಕಾರ, ಮಹಿಳೆಯರಿಗೆ 2,500 ರೂಪಾಯಿ ತಿಂಗಳಿಗೆ ಪಾವತಿ.</li><li>500 ರೂಪಾಯಿಗೆ ಗ್ಯಾಸ್ ಸಿಲಿಂಡರ್‌</li><li>ರಾಜ್ಯಾದ್ಯಂತ ಟಿಎಸ್‌ಆರ್‌ಸಿ ಬಸ್‌ಗಳಲ್ಲಿ ಮಹಿಳೆಯರಿಗೆ ಉಚಿತ ಪ್ರಯಾಣ</li><li>ಗೃಹಜ್ಯೋತಿ - ಪ್ರತಿ ಮನೆಗೆ 200 ಯೂನಿಟ್ ಕರೆಂಟ್ ಫ್ರೀ</li><li>ಇಂದಿರಮ್ಮ ಮನೆ ಯೋಜನೆ ಪ್ರಕಾರ, ಮನೆ ನಿವೇಶನ ಹಂಚಿಕೆ ಮತ್ತು ಸ್ವಂತ ಮನೆ ಇಲ್ಲದವರಿಗೆ 5 ಲಕ್ಷ ರೂ.</li><li>ಇಂದಿರಮ್ಮ ಮನೆ ಯೋಜನೆ ಪ್ರಕಾರ, ತೆಲಂಗಾಣ ಚಳವಳಿ ಹೋರಾಟಗಾರರಿಗೆ 250 ಚದರ ಗಜ ಜಮೀನು</li><li>ಯುವ ವಿಕಾಸ ಯೋಜನೆ ಪ್ರಕಾರ, 5 ಲಕ್ಷ ರೂಪಾಯಿ ಗ್ಯಾರೆಂಟಿಯ ವಿದ್ಯಾ ಭರೋಸಾ ಕಾರ್ಡ್ಸ್‌</li></ul><h2>4 ತೆಲಂಗಾಣ ಚುನಾವಣೆ ಕಣದಲ್ಲಿರುವ ಮುಖ್ಯ ಉಮೇದುವಾರರು ಇವರು </h2>ಕೆ ಚಂದ್ರಶೇಖರ್ ರಾವ್ (ಬಿಆರ್‌ಎಸ್ ಮುಖ್ಯಸ್ಥ): ತೆಲಂಗಾಣದ ಮುಖ್ಯಮಮಂತ್ರಿ ಕೆ ಚಂದ್ರಶೇಖರ ರಾವ್ ಅವರು ಈ ಬಾರಿ ಗಜ್ವೇಲ್ ಮತ್ತು ಕಾಮರೆಡ್ಡಿ ಎಂಬ ಎರಡು ಸ್ಥಾನಗಳಿಂದ ಚುನಾವಣೆಗೆ ಸ್ಪರ್ಧಿಸುತ್ತಿದ್ದಾರೆ. ಗಜ್ವೇಲ್ ಅವರ ತವರು ಕ್ಷೇತ್ರ. ಅಲ್ಲಿ ಅವರು ಮೂರನೇ ಬಾರಿಗೆ ಸ್ಪರ್ಧಿಸುತ್ತಿದ್ದಾರೆ.

ಎ ರೇವಂತ್ ರೆಡ್ಡಿ (ತೆಲಂಗಾಣ ಕಾಂಗ್ರೆಸ್ ಅಧ್ಯಕ್ಷ): ಕೆಸಿಆರ್ ಸ್ಪರ್ಧಿಸುತ್ತಿರುವ ಕಾಮರೆಡ್ಡಿ ಕ್ಷೇತ್ರದಿಂದ ರೇವಂತ್ ರೆಡ್ಡಿ ಸ್ಪರ್ಧಿಸುತ್ತಿದ್ದಾರೆ. ರೆಡ್ಡಿ ಕಾಂಗ್ರೆಸ್‌ನ ಫೈರ್‌ಬ್ರಾಂಡ್ ನಾಯಕರಾಗಿದ್ದು, ತವರು ಕ್ಷೇತ್ರ ಕೊಡಂಗಲ್‌ನಿಂದಲೂ ಸ್ಪರ್ಧಿಸುತ್ತಿದ್ದಾರೆ. ತೆಲಂಗಾಣದಲ್ಲಿ ಕಾಂಗ್ರೆಸ್ ಅನ್ನು ಮೊದಲ ಬಾರಿಗೆ ಅಧಿಕಾರಕ್ಕೆ ತರಲು ಪ್ರಯತ್ನಿಸುತ್ತಿದ್ದಾರೆ.

ಬಂಡಿ ಸಂಜಯ್ ಕುಮಾರ್ (ತೆಲಂಗಾಣ ಬಿಜೆಪಿ ಅಧ್ಯಕ್ಷ) : ಕರೀಂನಗರ ವಿಧಾನಸಭಾ ಕ್ಷೇತ್ರದಿಂದ ಬಂಡಿ ಸಂಜಯ್ ಕುಮಾರ್ ಅವರನ್ನು ಕಣಕ್ಕಿಳಿಸಿದೆ. 2018 ಮತ್ತು 2014 ರ ವಿಧಾನಸಭಾ ಚುನಾವಣೆಯಲ್ಲಿ ತಮ್ಮನ್ನು ಸೋಲಿಸಿದ ಪ್ರಬಲ ಪ್ರತಿಸ್ಪರ್ಧಿ ತೆಲಂಗಾಣ ಹಿಂದುಳಿದ ವರ್ಗಗಳ ಕಲ್ಯಾಣ ಸಚಿವ ಗಂಗುಲಾ ಕಮಲಾಕರ್ ಅವರನ್ನು ಎದುರಿಸುತ್ತಾರೆ.

<h2>5 ತೆಲಂಗಾಣದಲ್ಲಿ ಹಿಂದಿನ 2 ಚುನಾವಣೆ ಮತ್ತು ಫಲಿತಾಂಶ</h2><h3>1. ತೆಲಂಗಾಣದಲ್ಲಿ 2018ರ ಚುನಾವಣೆಯ ಕಿರುನೋಟ</h3>ತೆಲಂಗಾಣದಲ್ಲಿ 2018ರ ಚುನಾವಣೆಯಲ್ಲಿ ವಿಧಾನಸಭೆಯ 119 ಸ್ಥಾನಗಳ ಪೈಕಿ ಟಿಆರ್‌ಎಸ್‌ 87 ಗೆದ್ದುಕೊಂಡಿತ್ತು. ಎರಡನೇ ಬಾರಿಗೆ ಕೆಸಿಆರ್ ಅವಿರೋಧವಾಗಿ ಶಾಸಕಾಂಗ ಪಕ್ಷದ ನಾಯಕರಾದರು. ಶೇಕಡ 47 ಮತದಾನವೂ ಟಿಆರ್‌ಎಸ್‌ಗೆ ಲಭಿಸಿತ್ತು. ಕೆಸಿಆರ್‌ ಅವರ ಟಿಆರ್‌ಎಸ್‌ಗೆ ಪರ್ಯಾಯವಾಗಿ ಪ್ರಜಾ ಕೂಟಮಿ ಎಂಬ ಮೈತ್ರಿ ಎದುರಾಳಿಯಾಗಿತ್ತು. ಇದರಲ್ಲಿ ಕಾಂಗ್ರೆಸ್ ಪಕ್ಷ, ತೆಲುಗು ದೇಶಂ ಪಾರ್ಟಿ (ಟಿಡಿಪಿ), ತೆಲಂಗಾಣ ಜನ ಸಮಿತಿ, ಸಿಬಿಐ ಗಳಿದ್ದು, 22 ಸ್ಥಾನಗಳಲ್ಲಿ ಗೆಲುವು ಸಾಧಿಸಿದವು. ಇನ್ನುಳಿದಂತೆ ಎಐಎಂಐಎಂ 7, ಬಿಜೆಪಿ 1, ಪಕ್ಷೇತರ 2 ಸ್ಥಾನಗಳಲ್ಲಿ ಗೆಲುವು ದಾಖಲಿಸಿದ್ದವು.

<h3>2. 2014ರಲ್ಲಿ ತೆಲಂಗಾಣ ಚುನಾವಣೆ ಮತ್ತು ಫಲಿತಾಂಶದ ವಿವರ</h3>ಭಾರತದ 29ನೇ ರಾಜ್ಯವಾಗಿ 2014ರಲ್ಲಿ ತೆಲಂಗಾಣ ರಾಜ್ಯ ರಚನೆ ಆಯಿತು. 2014ರ ಜೂನ್‌ನಲ್ಲಿ ಚುನಾವಣೆಯಲ್ಲಿ 119 ಸ್ಥಾನಗಳ ಪೈಕಿ 63 ಸ್ಥಾನ ಗೆದ್ದು ತೆಲಂಗಾಣದ ಮೊದಲ ಮುಖ್ಯಮಂತ್ರಿಯಾಗಿ ಕೆಸಿಆರ್ ಪ್ರಮಾಣ ಸ್ವೀಕರಿಸಿದರು. ಕಾಂಗ್ರೆಸ್‌ 21, ಟಿಡಿಪಿ 15, ಎಐಎಂಐಎಂ 7, ಬಿಜೆಪಿ 5, ಇತರೆ 8 ಸ್ಥಾನಗಳನ್ನು ಗೆದ್ದುಕೊಂಡಿದ್ದವು.

ತೆಲಂಗಾಣ ವಿಧಾನಸಭಾ ಚುನಾವಣೆ ಅಂತಿಮ ಘಟ್ಟಕ್ಕೆ ಬಂದಿದೆ. ನವೆಂಬರ್ 30ಕ್ಕೆ ಮತದಾನ ನಡೆಯಲಿದೆ. ಈ ರಾಜ್ಯದ ವಿಧಾನ ಸಭಾ ಚುನಾವಣೆ ಕುರಿತ ಮುಖ್ಯ ಅಂಶಗಳ ವಿವರ ಇಲ್ಲಿದೆ. ಗಮನಿಸಿ. &nbsp;

Lava Blaze 2: ಲಾವಾ ಬ್ಲೇಜ್‌ 2 5G ಮೊದಲ ನೋಟಕ್ಕೆ ಸಿಕ್ಕ ಫ್ಯೂಚರಿಸ್ಟಿಕ್ ಡಿಸೈನ್, ಬಜೆಟ್ ಫೋನ್‌ನ ಫೀಚರ್ಸ್‌ ವಿವರ ಹೀಗಿದೆ ನೋಡಿ

Lava Blaze 2

Technology News Lava Blaze 2 5G first impressions Futuristic design on a budget Business News UKS

ಲಾವಾ ಬ್ಲೇಜ್‌ 2 5G ಸ್ಮಾರ್ಟ್‌ಫೋನ್ ತನ್ನ ವೃತ್ತಾಕಾರದ ಕ್ಯಾಮೆರಾ ಸೆಟಪ್ ಮತ್ತು ರಿಂಗ್ ಲೈಟ್‌ನೊಂದಿಗೆ ಗಮನ ಸೆಳೆಯುತ್ತದೆ. ನಮ್ಮ ಲಾವಾ ಬ್ಲೇಜ್‌ 2 5G ಮೊದಲ ಇಂಪ್ರೆಶನ್‌ನಲ್ಲಿ ಕಂಡ ವಿವರ ಹೀಗಿದೆ.. &nbsp;

Umesh Kumar S