ಹಾಲಿವುಡ್‌ನ ಖ್ಯಾತ ನಟ ಬ್ರಾಡ್‌ ಪಿಟ್‌ ಜತೆ ನಟಿಸುವ ಮಹಾನ್‌ ಅವಕಾಶ ಬೇಡವೆಂದ ಐಶ್ವರ್ಯಾ ರೈ ಬಚ್ಚನ್‌
ಬಾಲಿವುಡ್‌ನ ಜನಪ್ರಿಯ ನಟಿ, ಮಾಜಿ ವಿಶ್ವಸುಂದರಿ ಐಶ್ವರ್ಯಾ ರೈ ಅವರು ಹಿಂದೊಮ್ಮೆ ಹಾಲಿವುಡ್‌ನ ಜನಪ್ರಿಯ ನಟ ಬ್ರಾಡ್‌ ಪಿಟ್‌ ಜತೆ ಟ್ರಾಯ್‌ ಸಿನಿಮಾದಲ್ಲಿ ನಟಿಸಬೇಕಿತ್ತು. ಆದರೆ, ಈ ಸಿನಿಮಾದ ಆಫರ್‌ ಅನ್ನು ಯಾಕೆ ನಿರಾಕರಿಸಿದೆ ಎಂದು ಐಶ್ವರ್ಯಾ ಹೇಳಿದ್ದಾರೆ.
ಮಾಜಿ ವಿಶ್ವ ಸುಂದರಿ ಐಶ್ವರ್ಯಾ ರೈ ಅವರು ಬಾಲಿವುಡ್‌ನ ಜನಪ್ರಿಯ ನಟಿ. ಇವರನ್ನು ಭಾರತ ಮಾತ್ರವಲ್ಲದೆ ಜಗತ್ತಿನಾದ್ಯಂತ ಇರುವ ಸಿನಿಮಾ ಜಗತ್ತು ಕೈಬೀಸಿ ಕರೆಯುತ್ತಿದ್ದ ಕಾಲವದು. ವಿಶೇಷವಾಗಿ ಇವರಿಗೆ ಹಾಲಿವುಡ್‌ನಿಂದ ಹಲವು ಆಫರ್‌ಗಳು ದೊರಕುತ್ತಿತ್ತು. ಕೇನ್ಸ್‌ ಫಿಲ್ಮ್‌ ಫೆಸ್ಟಿವಲ್‌ನಲ್ಲಿ ದೇವದಾಸ್‌ ಸಿನಿಮಾ ಪ್ರದರ್ಶನಗೊಂಡ ಬಳಿಕ ಈ ರೀತಿ ಅವಕಾಶ ಹೆಚ್ಚಾಗಿದ್ದವು. ಇದೇ ಸಮಯದಲ್ಲಿ ಹಾಲಿವುಡ್‌ನ ಜನಪ್ರಿಯ ನಟ ಬ್ರಾಡ್‌ ಪಿಟ್‌ ನಟಿಸಿರುವ ಟ್ರಾಯ್‌ ಸಿನಿಮಾದಲ್ಲೂ ನಟಿಸುವಂತಹ ಮಹಾನ್‌ ಅವಕಾಶ ಐಶ್ವರ್ಯಾ ರೈಗೆ ಬಂದಿತ್ತು. ಈ ಸಿನಿಮಾದ ಪ್ರಮುಖ ಪಾತ್ರದಲ್ಲಿ ಇವರು ನಟಿಸಬೇಕಿತ್ತು. ಆದರೆ, ಈ ಸಿನಿಮಾದಲ್ಲಿ ನಟಿಸಲು ಐಶ್ವರ್ಯಾ ರೈ ಬಚ್ಚನ್‌ ಒಪ್ಪಿರಲಿಲ್ಲ. ಇದಕ್ಕೆ ಕಾರಣವೇನೆಂದು ಇತ್ತೀಚೆಗೆ ಮಂಗಳೂರು ಮೂಲದ ಐಶ್ವರ್ಯಾ ರೈ ಹೇಳಿದ್ದಾರೆ.
ಟ್ರಾಯ್‌ ಸಿನಿಮಾದಲ್ಲಿ ನಟಿಸಬೇಕಿದ್ದರೆ ಐಶ್ವರ್ಯಾ ರೈ ಅವರು ತನ್ನ ಕ್ಯಾಲೆಂಡರ್‌ನ 6-9 ತಿಂಗಳನ್ನು ಆ ಸಿನಿಮಾಕ್ಕೆ ಬ್ಲಾಕ್‌ ಮಾಡಬೇಕಿತ್ತು. ಆದರೆ, ಈಕೆಗೆ ಅಷ್ಟು ತಿಂಗಳು ನಟಿಸುವಂತಹ ಪಾತ್ರ ಇರಲಿಲ್ಲ. ಇವರ ಕ್ಯಾರೆಕ್ಟರ್‌ಗೆ ಅಷ್ಟು ದಿನವೂ ಶೂಟಿಂಗ್‌ ಇಲ್ಲದೆ ಇದ್ದರೂ ಪ್ರಾಜೆಕ್ಟ್‌ನ ಅವಶ್ಯಕತೆಗಾಗಿ ಅಷ್ಟು ತಿಂಗಳು ಇವರು ಈ ಸಿನಿಮಾಕ್ಕೆ ಸಮಯ ಮೀಸಲಿರಿಸಬೇಕೆಂದು ಚಿತ್ರತಂಡ ಬಯಸಿತ್ತು. "ನನಗೆ ಹಾಲಿವುಡ್ ಈ ರೀತಿ ಕಾರ್ಯನಿರ್ವಹಿಸುತ್ತದೆ ಎಂಬ ಐಡಿಯಾ ಇರಲಿಲ್ಲ. ಆ ಪ್ರಾಜೆಕ್ಟ್‌ಗೆ ಅಷ್ಟು ಸಮಯ ನೀಡಲು ಸಾಧ್ಯವಿರಲಿಲ್ಲ. ಅದು ದೊಡ್ಡ ಸಿನಿಮಾವಾಗಿತ್ತು. ಆದರೆ, ನನ್ನ ಪಾತ್ರಕ್ಕೆ ಅಷ್ಟು ಶೂಟಿಂಗ್‌ನ ಅವಶ್ಯಕತೆ ಇರದೆ ಇದ್ದರೂ ನಾನು ಅಷ್ಟು ಸಮಯ ನೀಡಬೇಕಿತ್ತು" ಎಂದು ಐಶ್ವರ್ಯಾ ರೈ ಹೇಳಿದ್ದಾರೆ.
"ಹಾಲಿವುಡ್‌ನ ಅವಕಾಶವನ್ನು ನಿರಾಕರಿಸುವುದು ಸುಲಭವಲ್ಲ. ಆದರೆ, ನನ್ನ ಪಾತ್ರ ತುಂಬಾ ದೊಡ್ಡದಾಗಿರಲಿಲ್ಲ. ನನಗೆ ಭಾರತಕ್ಕೆ ವಾಪಸ್‌ ಬರಬೇಕಿತ್ತು. ಭಾರತದಲ್ಲಿ ಸಾಕಷ್ಟು ಕಮಿಟ್‌ಮೆಂಟ್‌ಗಳಿದ್ದವು. ಇಷ್ಟು ಸಮಯವನ್ನು ಹಾಲಿವುಡ್‌ನ ಒಂದು ಸಿನಿಮಾಕ್ಕೆ ಲಾಕ್‌ ಮಾಡುವುದು ಸಾಧ್ಯವಿರಲಿಲ್ಲ. ಏಕೆಂದರೆ, ನಾನು ಭಾರತದಲ್ಲಿ ಹಲವು ಸಣ್ಣ ಸಿನಿಮಾಗಳಲ್ಲಿ ನಟಿಸಬೇಕಿತ್ತು. ನಾನು ಭಾರತದಲ್ಲಿ ಹಲವು ಜನರಿಗೆ ಮಾತು ಕೊಟ್ಟಿದ್ದೆ. ಇದು ದೊಡ್ಡ ಅವಕಾಶವೆಂದು ಭಾರತದ ಸಿನಿಮಾ ತಂಡಗಳಿಗೆ ನೀಡಿದ ಮಾತನ್ನು ತಪ್ಪಿಸುವುದು ಸೂಕ್ತವಲ್ಲ" ಎಂದು ಐಶ್ವರ್ಯಾ ರೈ ಹೇಳಿದ್ದಾರೆ.
2000ರ ಆರಂಭದಲ್ಲಿ ಐಶ್ವರ್ಯಾ ರೈ ಹಲವು ಅಂತಾರಾಷ್ಟ್ರೀಯ ಪ್ರಾಜೆಕ್ಟ್‌ಗಳಲ್ಲಿ ಕೆಲಸ ಮಾಡಿದ್ದರು. ಐಶ್ವರ್ಯಾ ರೈ ನಟಿಸಬೇಕಿದ್ದ ಸಿನಿಮಾದ ಕುರಿತು ನಟ ಬ್ರಾಡ್‌ ಪಿಟ್‌ ಅವರು ಮಾತನಾಡಿದ್ದರು. "ಟ್ರಾಯ್‌ ಸಿನಿಮಾದಲ್ಲಿ ಐಶ್ವರ್ಯಾ ರೈ ನಟಿಸುವಂತಹ ಅವಕಾಶವನ್ನು ನಾವು ಕಳೆದುಕೊಂಡೆವು. ನನಗೆ ಅವಕಾಶ ದೊರಕಿದರೆ ಖಂಡಿತ ನಾನು ಐಶ್ವರ್ಯಾ ರೈ ಬಚ್ಚನ್‌ ಜತೆ ನಟಿಸಲು ಬಯಸುವೆ. ಏಕೆಂದರೆ, ಅವರು ಬಹುಮುಖ ಪ್ರತಿಭೆಯ ನಟಿ. ಟ್ರಾಯ್‌ ಜೆ ಟಿಸುವ ಅವಕಾಶ ನಾವು ಕಳೆದುಕೊಂಡೆವು" ಎಂದು ಐಎಎನ್‌ಎಸ್‌ಗೆ ನೀಡಿದ ಸಂದರ್ಶನದಲ್ಲಿ ಬ್ರಾಡ್‌ ಪಿಟ್‌ ಹೇಳಿದ್ದರು.
