ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ಮಂಜು ಪಾವಗಡ: ಶುಭಾ ಪೂಂಜಾ ಸೇರಿದಂತೆ ನವ ಜೋಡಿಗೆ ಶುಭ ಹಾರೈಸಿದ ಸೆಲೆಬ್ರಿಟಿಗಳು
ಬಿಗ್‌ಬಾಸ್‌ ಕನ್ನಡ ಸೀಸನ್‌ 8ರ ವಿನ್ನರ್ ಮಂಜು ಪಾವಗಡ ಇಂದು (ನ.14) ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ. ಮಂಜು ತಮ್ಮ ಜಿಲ್ಲೆಯವರೇ ಆದ ನಂದಿನಿ ಎಂಬುವರ ಕೈ ಹಿಡಿದಿದ್ದಾರೆ. ಶುಭಾ ಪೂಂಜಾ ಸೇರಿದಂತೆ ಇನ್ನಿತರ ಸೆಲೆಬ್ರಿಟಿಗಳು ನವ ದಂಪತಿಗೆ ಶುಭ ಹಾರೈಸಿದ್ದಾರೆ.
ಬಿಗ್‌ಬಾಸ್‌ ಖ್ಯಾತಿಯ ಮಂಜು ಪಾವಗಡ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ. ಅಕ್ಟೋಬರ್‌ನಲ್ಲಿ ನಿಶ್ಚಿತಾರ್ಥ ಮಾಡಿಕೊಂಡಿದ್ದ ಮಂಜು, ನವೆಂಬರ್‌ 14, ಮಕ್ಳಳಲ ದಿನಾಚರಣೆಯಂದು ತುಮಕೂರಿನ ಪಾವಗಡದಲ್ಲೆ ಮದುವೆ ನೆರವೇರಿದೆ. ಮಂಜು ಮದುವೆ ಸಮಾರಂಭಕ್ಕೆ ಕಿರುತೆರೆ, ಸ್ಯಾಂಡಲ್ವುಡ್ ಸೆಲೆಬ್ರಿಟಿಗಳು ಭೇಟಿ ನೀಡಿ ನವಜೋಡಿಗೆ ಹಾರೈಸಿದ್ದಾರೆ.
ನಂದಿನಿ ಜೊತೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ಮಂಜು ಪಾವಗಡ
ಮಂಜು ಪಾವಗಡ ನಂದಿನಿ ಎಂಬುವರ ಕೈ ಹಿಡಿದಿದ್ದಾರೆ. ಅಪ್ಪ ಅಮ್ಮ ನೋಡಿದ ಹುಡುಗಿ ನಂದಿನಿ ಬೆಂಗಳೂರಿನಲ್ಲೇ ಕೆಲಸ ಮಾಡುತ್ತಿದ್ದಾರಂತೆ. ಮಂಜು ಹಾಗೂ ನಂದಿನಿ ಮದುವೆಗೆ ನಟಿ ಶುಭಾ ಪೂಜಾ, ಸುಷ್ಮಿತಾ, ಜಗ್ಗಪ್ಪ, ನಯನಾ ಶರತ್‌, ಮಜಾಭಾರತ ಖ್ಯಾತಿಯ ರೇಷ್ಮಾ ಸೇರಿದಂತೆ ಕಿರುತೆರೆ ಹಾಗೂ ಬೆಳ್ಳಿತೆರೆಯ ಸೆಲೆಬ್ರಿಟಿಗಳು ಹಾಜರಾಗಿ ಹೊಸ ಜೋಡಿಗೆ ಶುಭ ಕೋರಿ ಬಂದಿದ್ದಾರೆ. ಮದುವೆ ವಿಡಿಯೋವನ್ನು ಶುಭ ಪೂಂಜಾ ತಮ್ಮ ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿದ್ದಾರೆ. ಧಾರೆ ಎರೆದ ನಂತರ ಶುಭಾ ಪೂಂಜಾ, ಮಂಜು ಕೆನ್ನೆಗಳನ್ನು ಹಿಡಿದು ಗಿಲ್ಲುವ ವಿಡಿಯೋ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿದೆ. ಕಿರುತೆರೆ ವೀಕ್ಷಕರು ಕೂಡಾ ಮಂಜು ಹಾಗೂ ನಂದಿನಿಗೆ ಶುಭ ಕೋರುತ್ತಿದ್ದಾರೆ.
ಮಜಾಭಾರತ ಶೋ ಮೂಲಕ ಪರಿಚಯವಾದ ಮಂಜು
ಮಂಜು ಪಾವಗಡ ಕಲರ್ಸ್‌ ಕನ್ನಡದ ಮಜಾಭಾರತ, ಗಿಚ್ಚಿಗಿಲಿಗಿಲಿ ರಿಯಾಲಿಟಿ ಶೋ ಮೂಲಕ ಪರಿಯವಾದವರು. ಇದಾದ ನಂತರ ಮಂಜು ಕೆಲವೊಂದು ಸಿನಿಮಾ, ಧಾರಾವಾಹಿಗಳಲ್ಲಿ ನಟಿಸಿದ್ದಾರೆ. ಮಂಜು ನಟಿಸಿರುವ ಸಿನಿಮಾಗಳು ಬಿಡುಗಡೆಗೆ ಸಿದ್ಧವಾಗಿದೆ. ಇತ್ತೀಚೆಗೆ ಮುಕ್ತಾಯವಾದ ಅಂತರಪಟ ಧಾರಾವಾಹಿಯಲ್ಲಿ ಮಂಜು ಪಾವಗಡ ನಾಯಕಿಯ ಮಲತಂದೆ ಪಾತ್ರದಲ್ಲಿ ನಟಿಸಿದ್ದರು. ಈ ಧಾರಾವಾಹಿನಿಯಲ್ಲಿ ಅವರದ್ದು ನೆಗೆಟಿವ್‌ ಪಾತ್ರವಾಗಿದ್ದು ಮಂಜು ನಟನೆಯನ್ನು ಎಲ್ಲರೂ ಹೊಗಳಿದ್ದರು. ಭಾಗ್ಯಲಕ್ಷ್ಮಿ ಧಾರಾವಾಹಿಯಲ್ಲಿ ತಾಂಡವ್‌ ಬಾಡಿಗೆ ತಂದೆ ಮಹೇಶನ ಪಾತ್ರದಲ್ಲಿ ಮಂಜು ನಟಿಸಿದ್ದರು. ಇತ್ತೀಚೆಗೆ ಆ ಪಾತ್ರ ಕೂಡಾ ಕೊನೆಯಾಗಿತ್ತು.
ಬಿಗ್‌ಬಾಸ್‌ ಕನ್ನಡ ಸೀಸನ್‌ 8 ವಿನ್ನರ್
ಬಿಗ್‌ಬಾಸ್‌ ಕನ್ನಡ 8 ಸೀಸನ್‌ನಲ್ಲೂ ಮಂಜು ಸ್ಪರ್ಧಿಯಾಗಿ ಭಾಗವಹಿಸಿ ಆ ಸೀಸನ್‌ ವಿಜೇತರಾಗಿದ್ದರು. ಬಿಗ್‌ಬಾಸ್‌ನಲ್ಲಿದ್ದಾಗ ಮಂಜು ಹಾಗೂ ದಿವ್ಯ ಸುರೇಶ್‌ ಬಹಳ ಆಪ್ತರಾಗಿದ್ದರು. ಇವರಿಬ್ಬರ ನಡುವೆ ಏನೋ ಇದೆ ಎಂದು ಎಲ್ಲರೂ ಅಂದುಕೊಂಡಿದ್ದರು. ಆದರೆ ಹೊರಗೆ ಬಂದ ನಂತರ ಇಬ್ಬರೂ ಆ ಚರ್ಚೆಗೆ ಅವಕಾಶ ಕೊಡದೆ ಗಾಸಿಪ್‌ಗೆ ಬ್ರೇಕ್‌ ಬಿದ್ದಿತ್ತು. ಶುಭಾ ಪೂಂಜಾ ಕೂಡಾ ಬಿಗ್‌ಬಾಸ್‌ 8ರ ಸ್ಪರ್ಧಿಯಾಗಿದ್ದರಿಂದ ಮಂಜು ಮದುವೆಗೆ ಬಂದು ಶುಭ ಕೋರಿದ್ದಾರೆ.
