ಡಾಲಿ ಧನಂಜಯ್, ಸತ್ಯದೇವ್ ಕಂಚರಾನ ಜೀಬ್ರಾ ಸಿನಿಮಾಗೆ ಚಿರಂಜೀವಿ ಸಾಥ್‌; ಟ್ರೈಲರ್‌ ರಿಲೀಸ್‌ ಮಾಡಿ ಶುಭ ಹಾರೈಸಿದ ಮೆಗಾಸ್ಟಾರ್‌
ನವೆಂಬರ್‌ 22 ರಂದು ರಿಲೀಸ್‌ ಆಗುತ್ತಿರುವ ಜೀಬ್ರಾ ಸಿನಿಮಾ ಟ್ರೈಲರ್‌ ಸೋಮವಾರ ಸಂಜೆ ರಿಲೀಸ್‌ ಆಗಿದೆ. ಹೈದರಾಬಾದ್‌ನಲ್ಲಿ ನಡೆದ ಪ್ರೀ ರಿಲೀಸ್‌ ಇವೆಂಟ್‌ ಕಾರ್ಯಕ್ರಮದಲ್ಲಿ ಮೆಗಾಸ್ಟಾರ್‌ ಚಿರಂಜೀವಿ ಟ್ರೈಲರ್‌ ರಿಲೀಸ್‌ ಮಾಡಿ ಡಾಲಿ ಧನಂಜಯ್, ಸತ್ಯದೇವ್ ಕಂಚರಾನ ಸಿನಿಮಾಗೆ ಶುಭ ಹಾರೈಸಿದ್ದಾರೆ.
ಡಾಲಿ ಧನಂಜಯ್ ಹಾಗೂ ಸತ್ಯದೇವ್ ಕಂಚರಾನ ಅಭಿನಯದ ಬಹುನಿರೀಕ್ಷಿತ ಜೀಬ್ರಾ ಸಿನಿಮಾ ನವೆಂಬರ್‌ 22ಕ್ಕೆ ರಿಲೀಸ್‌ ಆಗುತ್ತಿದೆ. ಚಿತ್ರತಂಡ ಈಗಾಗಲೇ ಪ್ರಮೋಷನ್‌ ಕೆಲಸಗಳಲ್ಲಿ ಬ್ಯುಸಿಯಾಗಿದೆ. ಅದರ ಭಾಗವಾಗಿ ಸೋಮವಾರ ಸಂಜೆ ಹೈದರಾಬಾದ್‌ನಲ್ಲಿ ಜೀಬ್ರಾ ಸಿನಿಮಾ ಪ್ರೀ ರಿಲೀಸ್‌ ಇವೆಂಟ್‌ ಕಾರ್ಯಕ್ರಮ ನೆರವೇರಿದೆ.
ಜೀಬ್ರಾ ಪ್ರೀ ರಿಲೀಸ್‌ ಕಾರ್ಯಕ್ರಮದಲ್ಲಿ ಮೆಗಾಸ್ಟಾರ್‌ ಚಿರಂಜೀವಿ ಭಾಗವಹಿಸಿ ಟ್ರೈಲರ್‌ ರಿಲೀಸ್‌ ಮಾಡಿ ಇಡೀ ಚಿತ್ರತಂಡಕ್ಕೆ ಶುಭಾಶಯ ತಿಳಿಸಿದ್ದಾರೆ. ಅಲ್ಲದೆ ಕನ್ನಡಿಗ ಡಾಲಿ ಧನಂಜಯ್ ಅವರನ್ನು ಹೊಗಳಿದ್ದಾರೆ. ಸಿನಿಮಾ ಸೂಪರ್‌ ಹಿಟ್‌ ಆಗಲಿ ಎಂದು ಹಾರೈಸಿದ್ದಾರೆ. ಚಿರಂಜೀವಿ ಅವರ ಪ್ರೀತಿಗೆ ಅಭಿನಂದನೆ ತಿಳಿಸಿದ ಡಾಲಿ ವೇದಿಕೆ ಮೇಲೆ ಬಂದು ತೆಲುಗಿನಲ್ಲಿ ಮಾತು ಆರಂಭಿಸಿದರು. ಸಾಮಾನ್ಯವಾಗಿ ನಾನು ವೇದಿಕೆಯಲ್ಲಿ ಮಾತನಾಡುವಾಗ ಹೆದರುವುದಿಲ್ಲ. ಆದರೆ ಇವತ್ತು ಸ್ವಲ್ಪ ಟೆನ್ಷನ್‌ ಆಗ್ತಿದೆ ಎಂದರು.
ಚಿರಂಜೀವಿ ಜೊತೆ ಕನ್ನಡದಲ್ಲೇ ಮಾತನಾಡಿದ ಧನಂಜಯ್
ಚಿರಂಜೀವಿಯನ್ನು ಕುರಿತು ಕನ್ನಡದಲ್ಲೇ ಸಿಪಾಯಿ ಚಿತ್ರದ ನಾನು ಸ್ನೇಹಜೀವಿ ನೀನು ಸ್ನೇಹಜೀವಿ ಎಂದು ಹಾಡಿ ಚಿರಂಜೀವಿಗೆ ನಮಸ್ಕಾರ ಮಾಡಿದರು. ಇಂದು ನಮ್ಮ ಚಿತ್ರರಂಗದಲ್ಲಿ ಡಾ. ರಾಜ್‌ಕುಮಾರ್‌, ವಿಷ್ಣುವರ್ಧನ್‌, ಅಂಬರೀಶ್‌ ಅವರನ್ನು ನಾವು ಕಳೆದುಕೊಂಡಿದ್ದೇವೆ. ಆದರೆ ಅವರನ್ನು ನಿಮ್ಮಲ್ಲಿ ನೋಡುತ್ತಿದ್ದೇವೆ. ನಾನು ಸಾಮಾನ್ಯ ಕುಟುಂಬದಿಂದ ಚಿತ್ರರಂಗಕ್ಕೆ ಬಂದವನು, ನನ್ನಂಥವನಿಗೆ ನೀವೇ ದೊಡ್ಡ ಸ್ಪೂರ್ತಿ ಎಂದು ಡಾಲಿ, ಚಿರಂಜೀವಿಯನ್ನು ಹೊಗಳಿದರು. ನಂತರ ಚಿತ್ರದ ಬಗ್ಗೆ ಮಾತನಾಡಿದ ಧನಂಜಯ್, ಜೀಬ್ರಾ ಸಿನಿಮಾವನ್ನು ಡೇರ್‌ ಡೆವಿಲ್‌ ಮುಸ್ತಫಾ ತಂಡ ಕನ್ನಡಕ್ಕೆ ಬಹಳ ಚೆನ್ನಾಗಿ ಡಬ್‌ ಮಾಡಿದ್ದಾರೆ. ಸಿನಿಮಾ ನವೆಂಬರ್‌ 22ಕ್ಕೆ ರಿಲೀಸ್‌ ಆಗುತ್ತಿದೆ. ನಮ್ಮ ಚಿತ್ರಕ್ಕೆ ನಿಮ್ಮ ಬೆಂಬಲವಿರಲಿ ಎಂದಿದ್ದಾರೆ.
ಈಶ್ವರ್ ಕಾರ್ತಿಕ್ ನಿರ್ದೇಶನದ ಸಿನಿಮಾ
'ಜೀಬ್ರಾ' ಕ್ರೈಂ ಥ್ರಿಲ್ಲರ್ ಸಿನಿಮಾ. ನೈಜ ಘಟನೆಗಳಿಂದ ಪ್ರೇರಣೆಗೊಂಡು ಕತೆ ಹೆಣೆಯಲಾಗಿದೆ. ಬ್ಯಾಂಕ್ ಫ್ರಾಡ್ ಸುತ್ತಲೂ ಚಿತ್ರದ ಕತೆ ಸುತ್ತಲಿದೆ. ಈಶ್ವರ್ ಕಾರ್ತಿಕ್ ನಿರ್ದೇಶನದ ಚಿತ್ರದಲ್ಲಿ ಸತ್ಯದೇವ್ ಹೀರೊ ಆಗಿ ನಟಿಸಿದ್ದಾರೆ. ಆದಿ ಎಂಬ ಖಡಕ್ ರೋಲ್‌ನಲ್ಲಿ ಧನಂಜಯ್ ಅಬ್ಬರಿಸಿದ್ದಾರೆ. ಇದು ಸತ್ಯದೇವ್ ಹಾಗೂ ಧನಂಜಯ್ ಇಬ್ಬರಿಗೂ 26ನೇ ಸಿನಿಮಾ ಎನ್ನುವುದು ವಿಶೇಷ. ಸಿನಿಮಾಗೆ ರವಿ ಬಸ್ರೂರು ಚಿತ್ರಕ್ಕೆ ಸಂಗೀತ ನೀಡಿದ್ದಾರೆ. ಪ್ರಿಯಾ ಭವಾನಿ ಶಂಕರ್ ಹಾಗೂ ಜೆನ್ನಿಫರ್ ಪಿಕ್ಕಿನಾಟೊ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಸತ್ಯ ಅಕಾಲ್, ಸುನಿಲ್ ಹಾಗೂ ಇನ್ನಿತರರು ತಾರಾಬಳಗದಲ್ಲಿದ್ದಾರೆ.
ಜೀಬ್ರಾ ಚಿತ್ರವನ್ನು ಎಸ್‌ಎನ್‌. ರೆಡ್ಡಿ, ಎಸ್. ಪದ್ಮಜಾ, ಬಾಲ ಸುಂದರಂ ಮತ್ತು ದಿನೇಶ್‌ ಸುಂದರಂ ನಿರ್ಮಾಣ ಮಾಡಿದ್ದಾರೆ. ತೆಲುಗು, ಕನ್ನಡ, ತಮಿಳು, ಮಲಯಾಳಂ ಭಾಷೆಗಳಲ್ಲಿ ಸಿನಿಮಾ ತೆರೆಗೆ ಬರಲಿದೆ. ಚಿತ್ರಕ್ಕೆ ಸತ್ಯ ಪೊನ್ಮಾರ್ ಅವರ ಛಾಯಾಗ್ರಹಣವಿದೆ. ಎಸ್ ಶ್ರೀಲಕ್ಷ್ಮಿ ರೆಡ್ಡಿ ಸಹ ಚಿತ್ರದ ನಿರ್ಮಾಪಕಿಯಾಗಿದ್ದಾರೆ. ಅನಿಲ್ ಕ್ರಿಶ್ ಸಂಕಲನ, ಮೀರಾಖ್ ಸಂಭಾಷಣೆ ಸಿನಿಮಾಗಿದೆ.
