ಗೋವಾದ ಲೋಕಲ್‌ ವೈನ್‌ಶಾಪ್‌ನಲ್ಲಿ ಮದ್ಯ ಖರೀದಿಸಿದ ಅಲ್ಲು ಅರ್ಜುನ್; ವೈರಲ್ ವಿಡಿಯೋದಲ್ಲಿರುವುದು ನಾನೇ ಎಂದ ಒಪ್ಪಿಕೊಂಡ ಪುಷ್ಪ ನಟ
ಪುಷ್ಪ 2 ನಟ ಅಲ್ಲು ಅರ್ಜುನ್ ಹಳೆಯ ವೈರಲ್ ವಿಡಿಯೋವೊಂದಕ್ಕೆ ಸ್ಪಷ್ಟನೆ ನೀಡಿದ್ದಾರೆ. ಗೋವಾದ ಲೋಕಲ್‌ ಮದ್ಯದಂಗಡಿಯಲ್ಲಿ ಆಲ್ಕೋಹಾಲ್‌ ಖರೀದಿಸುತ್ತಿರುವ ವಿಡಿಯೋ ದೃಶ್ಯದಲ್ಲಿ ಇರುವುದು ನಾನೇ, ಅದು ನನ್ನ ಗೆಳೆಯನಿಗಾಗಿ ಖರೀದಿಸಲು ಹೋಗಿದ್ದೆ ಎಂದು ಸ್ಪಷ್ಟನೆ ನೀಡಿದ್ದಾರೆ.
ಬೆಂಗಳೂರು: ಸೆಲೆಬ್ರಿಟಿಗಳಿಗೆ ಹಣ ಆಸ್ತಿ ಅಂತಸ್ತು ಎಲ್ಲವೂ ಇದ್ದರೂ ಕೆಲವೊಮ್ಮೆ ಸಾಮಾನ್ಯ ಜನರಂತೆ ಬದುಕನ್ನು ಅನುಭವಿಸುವ ಅವಕಾಶವನ್ನು ಕಳೆದುಕೊಳ್ಳುತ್ತಾರೆ. ಜನಪ್ರಿಯತೆ ಇಲ್ಲದ ಸಾಮಾನ್ಯ ಜನರು ಬಾರ್‌ಗ ಹೋದರೆ ಯಾರೂ ಗುರುತಿಸುವುದಿಲ್ಲ. ಆದರೆ, ಜನಪ್ರಿಯ ವ್ಯಕ್ತಿ ಲೋಕಲ್‌ ಬಾರ್‌ಗೆ ಹೋದರೆ "ದೊಡ್ಡ ಕುಡುಕ" ಅನ್ನೋ ಲೆವೆಲ್‌ಗೆ ಸುದ್ದಿಯಾಗಬಹುದು. ಅಲ್ಲು ಅರ್ಜುನ್ ಕುರಿತೂ ಇದೇ ರೀತಿ ಊಹಾಪೋಹ ಹರಿದಾಡುತ್ತಿತ್ತು. 2017ರಲ್ಲಿ ವೈರಲ್ ವಿಡಿಯೋವೊಂದರಲ್ಲಿ ಅಲ್ಲು ಅರ್ಜುನ್ ಗೋವಾದ ವೈನ್‌ ಶಾಪ್‌ನಲ್ಲಿರುವುದು ಕಾಣಿಸಿತ್ತು. ಅಲ್ಲಿ ಅವರು ಮದ್ಯ ಖರೀದಿಸುತ್ತಿರುವುದರ ವಿಡಿಯೋ ನಾನಾ ಚರ್ಚೆಗೆ ಕಾರಣವಾಗಿತ್ತು. "ಆ ವಿಡಿಯೋದಲ್ಲಿ ಇರುವುದು ಅಲ್ಲು ಅರ್ಜುನ್ ಅಲ್ಲ" ಎಂದು ಕೆಲವರು ವಾದಿಸಿದ್ದರು. ಆದರೆ ಇದೀಗ "ಆ ವಿಡಿಯೋದಲ್ಲಿರುವ ವ್ಯಕ್ತಿ ನಾನೇ" ಎಂದು ಅಲ್ಲು ಅರ್ಜುನ್ ಒಪ್ಪಿಕೊಂಡಿದ್ದಾರೆ.
ಮೌನ ಮುರಿದ ಅಲ್ಲು ಅರ್ಜುನ್
ಶೀಘ್ರದಲ್ಲೇ ತನ್ನ ಮುಂಬರುವ ಚಿತ್ರ ಪುಷ್ಪ 2: ದಿ ರೂಲ್‌ ಸಿನಿಮಾದ ಪ್ರಚಾರವನ್ನು ಅಲ್ಲು ಅರ್ಜುನ್ ಆರಂಭಿಸಲಿದ್ದಾರೆ. ಅದಕ್ಕೂ ಮುನ್ನ, ಎನ್‌ಬಿಕೆ ಸೀಸನ್ 4 ಅನ್‌ಸ್ಟಾಪಬಲ್ ಟಾಕ್ ಶೋನಲ್ಲಿ ಮೊದಲ ಬಾರಿಗೆ ಈ ವಿಡಿಯೋ ಕ್ಲಿಪ್ ಕುರಿತು ಮಾತನಾಡಿದ್ದಾರೆ. ಇನ್ನೂ ಬಿಡುಗಡೆಯಾಗಬೇಕಿರುವ ಈ ಟಾಕ್‌ಶೋನಲ್ಲಿ ಅಲ್ಲು ಅರ್ಜುನ್ ಮತ್ತು ಎನ್‌ಬಿಕೆ ವೈರಲ್ ವೀಡಿಯೊವನ್ನು ಚರ್ಚಿಸಿದ್ದಾರೆ. ವಿಡಿಯೋ ಬಗ್ಗೆ ಕೇಳಿದಾಗ ಅಲ್ಲು ವಿಡಿಯೋದಲ್ಲಿ ಇರುವುದು ನಾನೇ ಎಂದು ದೃಢಪಡಿಸಿದ್ದಾರೆ ನಾನೇ ಮದ್ಯ ಖರೀದಿಸುತ್ತಿದ್ದೆ. ನನ್ನ ಸ್ನೇಹಿತನಿಗಾಗಿ ಖರೀದಿಸುತ್ತಿದ್ದೆ. ಆತನೂ ಈ ಚಾಟ್‌ ಶೋನಲ್ಲಿ ಭಾಗವಹಿಸಲಿದ್ದಾರೆ ಎಂದು ಹೇಳಿದ್ದಾರೆ. ಈ ಶೋ ಇಂದು ಅಂದರೆ, ನವೆಂಬರ್ 14 ರಂದು ಪ್ರಸಾರವಾಗಲಿದೆ.
ವೈರಲ್ ವಿಡಿಯೋದ ಕುರಿತು
ಈ ವಿಡಿಯೋವು ಸುಮಾರು 2017ರ ಹಿಂದಿನದ್ದು ಎನ್ನಲಾಗಿದೆ. ಆ ವಿಡಿಯೋ ಕ್ಲಿಪ್ ಅನ್ನು ಗೋವಾದಲ್ಲಿ ಶೂಟ್‌ಮಾಡಲಾಗಿತ್ತು. ಅಲ್ಲಿನ ಲೋಕಲ್‌ ಮದ್ಯದಂಗಡಿಯಲ್ಲಿ ಅಲ್ಲು ಅರ್ಜುನ್ ಬಾಟಲ್‌ ಖರೀದಿಸುತ್ತಿರುವ ದೃಶ್ಯ ಅದರಲ್ಲಿತ್ತು. ಇದು ಅಲ್ಲಿನ ಸೆಕ್ಯುರಿಟಿ ಕ್ಯಾಮೆರಾದಲ್ಲಿ ಕಾಣಿಸಿದ ದೃಶ್ಯವಾಗಿತ್ತು. ಅದೇ ವಿಡಿಯೋ ವೈರಲ್ ಆಗಿತ್ತು. ಎಲ್ಲರಿಗೂ ರೋಲ್‌ ಮಾಡೆಲ್‌ ಆಗಬೇಕಿದ್ದ ಇವರು ಈ ರೀತಿ ಮದ್ಯದಂಗಡಿಗೆ ಹೋಗುವುದು ಸರಿಯೇ ಎಂಬ ಚರ್ಚೆಗೆ ಈ ವಿಡಿಯೋ ಕಾರಣವಾಗಿತ್ತು.
ಅಲ್ಲು ಅರ್ಜುನ್ ಪ್ರಾಜೆಕ್ಟ್‌ಗಳು
ಮುಂದಿನ ತಿಂಗಳು ಅಲ್ಲು ಅರ್ಜುನ್ ನಟಿಸಿರುವ ಪುಷ್ಪ 2 ದಿ ರೂಲ್‌ ಸಿನಿಮಾ ಬಿಡುಗಡೆಯಾಗಲಿದೆ. ಇದು ಸುಕುಮಾರ್‌ ನಿರ್ದೇಶನದ 2021ರ ಪುಷ್ಪ ದಿ ರೈಸ್‌ ಸಿನಿಮಾದ ಮುಂದುವೆದ ಭಾಗ. ದಿನಗೂಲಿ ಕಾರ್ಮಿಕನೊಬ್ಬ ರಕ್ತಚಂದನ ಲೋಕದ ಡಾನ್‌ ಆಗುವಂತಹ ಕಥೆಯನ್ನು ಇದು ಹೊಂದಿದೆ. ಈ ಸಿನಿಮಾದಲ್ಲಿ ರಶ್ಮಿಕಾ ಮಂದಣ್ಣ ಕೂಡ ನಟಿಸಿದ್ದಾರೆ. ಪುಷ್ಪರಾಜ್ ಪಾತ್ರದಲ್ಲಿ ಬನ್ನಿ ನಟನೆ ಮತ್ತು ಮ್ಯಾನರಿಸಂ ಎಲ್ಲರ ಗಮನ ಸೆಳೆದಿತ್ತು. ಅಲ್ಲು ಅರ್ಜುನ್ ಅಭಿಮಾನಿಗಳು ಈ ಸೀಕ್ವೆಲ್ ಬಿಡುಗಡೆಗಾಗಿ ಬಹಳ ದಿನಗಳಿಂದ ಕಾಯುತ್ತಿದ್ದಾರೆ. ಡಿಸೆಂಬರ್‌ 5ರಂದು, ಕನ್ನಡ ತಮಿಳು, ತೆಲುಗು, ಹಿಂದಿ, ಮಲಯಾಳಂ ಮತ್ತು ಬಂಗಾಳಿ ಭಾಷೆಗಳಲ್ಲಿ ಈ ಸಿನಿಮಾ ರಿಲೀಸ್‌ ಆಗಲಿದೆ.
