ಪುಷ್ಪ 2 ದಿ ರೂಲ್‌ ಬಿಡುಗಡೆ ದಿನಾಂಕ ಬದಲಾವಣೆ: ಬೇಗ ರಿಲೀಸ್‌ ಆಗ್ತಿದೆ ಅಲ್ಲು ಅರ್ಜುನ್‌, ರಶ್ಮಿಕಾ ಮಂದಣ್ಣ ನಟನೆಯ ಸಿನಿಮಾ

Pushpa 2: The Rule release date: ಈ ವರ್ಷದ ಬಹುನಿರೀಕ್ಷಿತ ಸಿನಿಮಾಗಳಲ್ಲಿ ಒಂದಾದ ಪುಷ್ಪ 2 ದಿ ರೂಲ್‌ ಬಿಡುಗಡೆ ದಿನಾಂಕ ಅಧಿಕೃತಗೊಂಡಿದೆ. ಡಿಸೆಂಬರ್‌ 5, 2024ರಂದು ಈ ಸಿನಿಮಾ ಚಿತ್ರಮಂದಿರಗಳಲ್ಲಿ ರಿಲೀಸ್‌ ಆಗಲಿದೆ. ಈ ಸಿನಿಮಾ ಬಿಡುಗಡೆ ದಿನಾಂಕ ಒಂದು ದಿನ ಹಿಂದಕ್ಕೆ ಬಂದಿದೆ. ಈ ಚಿತ್ರ ಡಿಸೆಂಬರ್‌ 6ರಂದು ಬಿಡುಗಡೆಯಾಗಲಿದೆ ಎನ್ನಲಾಗಿತ್ತು. ಆದರೆ, ಡಿಸೆಂಬರ್‌ 5ಕ್ಕೆ ರಿಲೀಸ್‌ ಆಗಲಿದೆ. ಇದಕ್ಕೆ ಏನು ಕಾರಣ ಎಂದು ತಿಳಿಯೋಣ.

ಪುಷ್ಪ 2: ದಿ ರೂಲ್‌ ಬಿಡುಗಡೆ ದಿನಾಂಕ

ಪುಷ್ಪ 2 ದಿ ರೂಲ್‌ ಸಿನಿಮಾದ ನಿರ್ಮಾಪಕರಾದ ನವೀನ್‌ ಯೆರ್‌ನೇನಿ ಮತ್ತು ಯಲಮಂಚಿಲ್‌ ರವಿ ಶಂಕರ್‌ ಅವರು ಹೈದರಾಬಾದ್‌ನಲ್ಲಿ ಈ ಸಿನಿಮಾದ ಬಿಡುಗಡೆ ದಿನಾಂಕದ ಕುರಿತು ಪತ್ರಿಕಾಗೋಷ್ಠಿ ಏರ್ಪಡಿಸಿದ್ದರು. ಈ ಸಂದರ್ಭದಲ್ಲಿ ಸಿನಿಮಾ ವಿತರಕರು ಕೂಡ ಹಾಜರಿದ್ದರು. ಅಮೆರಿಕದಲ್ಲಿ ದೀರ್ಘಕಾಲದ ವೀಕೆಂಡ್‌ ಇರುವ ಕಾರಣ ಅಮೆರಿಕದಲ್ಲಿ ಡಿಸೆಂಬರ್‌ 4ರಂದು ಈ ಚಿತ್ರ ರಿಲೀಸ್‌ ಆಗಲಿದೆ. ಭಾರತದ ಕ್ಯಾಲೆಂಡರ್‌ ಪ್ರಕಾರ ಡಿಸೆಂಬರ್‌ 5ರಂದು ರಿಲೀಸ್‌ ಆಗಲಿದೆ ಎಂದು ಪತ್ರಿಕಾಗೋಷ್ಠಿಯಲ್ಲಿ ಮಾಹಿತಿ ನೀಡಿದ್ದಾರೆ.

"ತೆಲುಗು ಸಿನಿ ಇಂಡಸ್ಟ್ರಿಯಲ್ಲಿ ಡಿಸೆಂಬರ್‌ ಡ್ರೈ ತಿಂಗಳು ಎಂಬ ಮಾತಿದೆ. ಬಹುತೇಕರು ಸಂಕ್ರಾಂತಿ ಸಮಯದಲ್ಲಿ ಚಿತ್ರ ಬಿಡುಗಡೆ ಮಾಡುತ್ತಾರೆ. "ಡಿಸೆಂಬರ್‌ ತಿಂಗಳಲ್ಲಿಯೂ ಚಿತ್ರಗಳು ಉತ್ತಮ ಗಳಿಕೆ ಮಾಡಬಹುದು ಎನ್ನುವುದಕ್ಕೆ ಅಖಂಡ ಮತ್ತು ಅನಿಮಲ್‌ ಸಿನಿಮಾಗಳು ಉತ್ತಮ ಉದಾಹರಣೆಗಳು. ಉತ್ತಮ ಸಂಖ್ಯೆಯಲ್ಲಿ ಐಮ್ಯಾಕ್ಸ್‌ ಪರದೆಗಳು ದೊರಕುವ ನಿರೀಕ್ಷೆಯಲ್ಲಿದ್ದೇವೆ. ಈ ಸಿನಿಮಾ ಹೊಸ ದಾಖಲೆ ಬರೆಯುವ ನಿರೀಕ್ಷೆಯಿದೆ" ಎಂದು ನಿರ್ಮಾಪಕರು ಮಾಹಿತಿ ನೀಡಿದ್ದಾರೆ.

ಸ್ಟೈಲಿಶ್ ಸ್ಟಾರ್ ಅಲ್ಲು ಅರ್ಜುನ್ ಮತ್ತು ನಿರ್ದೇಶಕ ಸುಕುಮಾರ್ ನಿರ್ದೇಶನದ ಪುಷ್ಪ ಸಿನಿಮಾವು 2021ರಲ್ಲಿ ಬಿಡುಗಡೆಯಾಗಿತ್ತು. ಅಕ್ರಮ ಕೆಂಪು ಚಂದನದ ಸಾಗಾಟದ ಹಿನ್ನೆಲೆಯೂ ಈ ಚಿತ್ರಕ್ಕಿದೆ. ಪುಷ್ಪರಾಜ್ ಪಾತ್ರದಲ್ಲಿ ಬನ್ನಿ ನಟನೆ ಮತ್ತು ಮ್ಯಾನರಿಸಂ ಎಲ್ಲರ ಗಮನ ಸೆಳೆದಿತ್ತು. ಅಲ್ಲು ಅರ್ಜುನ್ ಅಭಿಮಾನಿಗಳು ಈ ಸೀಕ್ವೆಲ್ ಬಿಡುಗಡೆಗಾಗಿ ಬಹಳ ದಿನಗಳಿಂದ ಕಾಯುತ್ತಿದ್ದರು. ಇದೀಗ ಬಿಡುಗಡೆ ದಿನಾಂಕ ಒಂದು ದಿನ ಹಿಂದಕ್ಕೆ ಬಂದಿರುವುದರಿಂದ ಅಭಿಮಾನಿಗಳು ಖುಷಿಯಾಗಿದೆ.

ಪುಷ್ಪ ಸಿನಿಮಾ ಬಿಡುಗಡೆ ಆಗುವ ಮುನ್ನವೇ 1,065 ಕೋಟಿ ರೂ. ಬಿಸ್ನೆಸ್‌ ಮಾಡಿದೆ ಎಂಬ ಮಾತು ಕೇಳಿ ಬರುತ್ತಿದೆ. ಥಿಯಟ್ರಿಕಲ್‌, ಒಟಿಟಿ ಡಿಜಿಟಲ್‌ ಸ್ಟ್ರೀಮಿಂಗ್‌, ಆಡಿಯೋ, ಸಾಟಲೈಟ್‌ ಎಲ್ಲಾ ಸೇರಿ ಸಿನಿಮಾ ಭಾರೀ ಲಾಭ ಮಾಡಿದೆ ಎಂಬ ಮಾತು ಟಾಲಿವುಡ್‌ ವಲಯದಲ್ಲಿ ಕೇಳಿ ಬರುತ್ತಿದೆ. ಈ ಕುರಿತ ವಿಶೇಷ ವರದಿ ಇಲ್ಲಿದೆ.

ಡಿಸೆಂಬರ್‌ 5ರಂದು ತೆಲುಗು ಸೇರಿ ಕನ್ನಡ, ತಮಿಳು, ಹಿಂದಿ, ಮಲಯಾಳಂ ಭಾಷೆಗಳಲ್ಲಿ ಪುಷ್ಪ 2 ದಿ ರೂಲ್‌ ರಿಲೀಸ್‌ ಆಗುತ್ತಿದೆ. ಶೀಘ್ರದಲ್ಲೇ ಪ್ರಮೋಷನ್‌ ಕೆಲಸಗಳು ಕೂಡಾ ಶುರುವಾಗುತ್ತಿದೆ. ಮೈತ್ರಿ ಮೂವಿ ಮೇಕರ್ಸ್‌ ಹಾಗೂ ಸುಕುಮಾರ್‌ ರೈಟಿಂಗ್ಸ್‌ ಬ್ಯಾನರ್‌ ಅಡಿ ಪುಷ್ಪ ಚಿತ್ರವನ್ನು ಸುಕುಮಾರ್‌ ಕಥೆ ಬರೆದು ಆಕ್ಷನ್‌ ಕಟ್‌ ಹೇಳಿದ್ದಾರೆ. ಪುಷ್ಪಾ ಸೀಕ್ವೆಲ್‌ ಹಾಡುಗಳಿಗೆ ದೇವಿ ಶ್ರೀ ಪ್ರಸಾದ್‌ ಸಂಗೀತ ನೀಡಿದ್ದಾರೆ. ಚಿತ್ರದಲ್ಲಿ ಅಲ್ಲು ಅರ್ಜುನ್‌, ಫಹಾದ್‌ ಫಾಸಿಲ್‌, ಡಾಲಿ ಧನಂಜಯ್‌, ಪ್ರಕಾಶ್‌ ರಾಜ್‌, ಸುನಿಲ್‌, ಅನಸೂಯ ಹಾಗೂ ಇನ್ನಿತರರು ಸಿನಿಮಾದಲ್ಲಿ ನಟಿಸಿದ್ದಾರೆ.