ಆಸ್ಟ್ರೇಲಿಯಾ ವಿರುದ್ಧ ಮೊದಲ ಟೆಸ್ಟ್​ನಲ್ಲಿ ಬಿದ್ದಲ್ಲೇ ಪರಿಹಾರ ಕಂಡುಕೊಂಡ ಭಾರತ ತಂಡಕ್ಕೆ 295 ರನ್​ಗಳ ದಾಖಲೆ ಗೆಲುವು

ಪ್ರತಿಷ್ಠಿತ ಬಾರ್ಡರ್ ಗವಾಸ್ಕರ್ ಟ್ರೋಫಿಯಲ್ಲಿ ಆಸ್ಟ್ರೇಲಿಯಾ ತಂಡದ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಟೀಮ್ ಇಂಡಿಯಾ 295 ರನ್​ಗಳ ಅಂತರದಿಂದ ದೊಡ್ಡ ಗೆಲುವು ಸಾಧಿಸಿದೆ. ಪರ್ತ್​ನ ಆಪ್ಟಸ್​ ಮೈದಾನದಲ್ಲಿ ಜರುಗಿದ ಹೈವೋಲ್ಟೇಜ್ ಟೆಸ್ಟ್​​ನಲ್ಲಿ ಜಸ್ಪ್ರೀತ್ ಬುಮ್ರಾ ನಾಯಕತ್ವದ ಭಾರತ ತಂಡ ಬೌಲಿಂಗ್-ಬ್ಯಾಟಿಂಗ್ ಎರಡರಲ್ಲೂ ಅದ್ಭುತ ಪ್ರದರ್ಶನ ನೀಡಿದ ಹಿನ್ನೆಲೆ ದಾಖಲೆಯ ಗೆಲುವಿಗೆ ಸಾಕ್ಷಿಯಾಗಿದೆ.47 ವರ್ಷಗಳ ಬಳಿಕ ಆಸೀಸ್ ನೆಲದಲ್ಲಿ ದೊಡ್ಡ ಜಯ ಸಾಧಿಸಿದೆ. ಇದಕ್ಕೂ ಮುನ್ನ ಇದಕ್ಕೂ ಮುನ್ನ 1977ರಲ್ಲಿ ಮೆಲ್ಬೋರ್ನ್​ ಟೆಸ್ಟ್​ನಲ್ಲಿ ಭಾರತ 222 ರನ್​ಗಳಿಂದ ಜಯಿಸಿತ್ತು. ಆಸೀಸ್​ ತನ್ನ ತವರಿನ ಪ್ರೇಕ್ಷಕರ ಎದುರೇ ಹೀನಾಯ ಸೋಲಿನೊಂದಿಗೆ ಮುಖಭಂಗಕ್ಕೆ ಒಳಗಾಗಿದೆ. 5 ಪಂದ್ಯಗಳ ಸರಣಿಯಲ್ಲಿ ಭಾರತ 1-0 ಅಂತರದಿಂದ ಮುನ್ನಡೆ ಸಾಧಿಸಿದೆ. ಇದರೊಂದಿಗೆ ಡಬ್ಲ್ಯುಟಿಸಿ ಫೈನಲ್​ ಆಸೆಯೂ ಜೀವಂತವಾಗಿರಿಸಿದೆ.

ಭಾರತ vs ಆಸ್ಟ್ರೇಲಿಯಾ ಸಂಕ್ಷಿಪ್ತ ಸ್ಕೋರ್​

ಮೊದಲ ಇನ್ನಿಂಗ್ಸ್​​ನಲ್ಲಿ ಭಾರತ ತಂಡ - 150/10

ಮೊದಲ ಇನ್ನಿಂಗ್ಸ್​ ಆಸ್ಟ್ರೇಲಿಯಾ ತಂಡ - 104/10

ಎರಡನೇ ಇನ್ನಿಂಗ್ಸ್​ನಲ್ಲಿ ಭಾರತ ತಂಡ - 487/6 ಡಿಕ್ಲೇರ್​

ಎರಡನೇ ಇನ್ನಿಂಗ್ಸ್​ ಆಸ್ಟ್ರೇಲಿಯಾ ತಂಡ - 238/10

ಬುಮ್ರಾ, ರಾಹುಲ್, ಜೈಸ್ವಾಲ್ ಕೊಹ್ಲಿ, ಸಿರಾಜ್ ಅಬ್ಬರ

ಮೊದಲ ಇನ್ನಿಂಗ್ಸ್​​ನಲ್ಲಿ ಭಾರತ ಬ್ಯಾಟಿಂಗ್ ವೈಫಲ್ಯ ಅನುಭವಿಸಿದರೂ ಬೌಲಿಂಗ್​ನಲ್ಲಿ ತಂಡವನ್ನು ರಕ್ಷಿಸಿದ್ದು ಜಸ್ಪ್ರೀತ್ ಬುಮ್ರಾ ಮತ್ತು ಮೊಹಮ್ಮದ್ ಸಿರಾಜ್. ಮಾರಕ ದಾಳಿ ನಡೆಸಿ ಎದುರಾಳಿಗೆ ನಡುಕ ಹುಟ್ಟಿಸಿ 46 ರನ್​ಗಳ ಮುನ್ನಡೆಯನ್ನೂ ತಂದುಕೊಟ್ಟರು. ಹರ್ಷಿತ್ ರಾಣಾ ಕೂಡ ಸಾಥ್ ಕೊಟ್ಟರು. ಎರಡನೇ ಇನ್ನಿಂಗ್ಸ್​​ನಲ್ಲೂ ಈ ಮೂವರು ಮತ್ತೆ ಮಿಂಚಿದರು. 2ನೇ ಇನ್ನಿಂಗ್ಸ್​ನಲ್ಲಿ ಯಶಸ್ವಿ ಜೈಸ್ವಾಲ್ ಮತ್ತು ವಿರಾಟ್ ಕೊಹ್ಲಿ ಭರ್ಜರಿ ಶತಕಗಳೊಂದಿಗೆ ಆಸೀಸ್​ಗೆ ಬೃಹತ್ ಗುರಿ ನೀಡಲು ಪ್ರಮುಖ ಪಾತ್ರವಹಿಸಿದರು. ರಾಹುಲ್ ಎರಡೂ ಇನ್ನಿಂಗ್ಸ್​ನಲ್ಲಿ ರಕ್ಷಣಾತ್ಮಕ ಆಟದ ಮೂಲಕ ಗಮನ ಸೆಳೆದರು.

ಬಿದ್ದಲ್ಲೆ ಪರಿಹಾರ ಕಂಡುಕೊಂಡ ಭಾರತ

ಭಾರತ ತಂಡವು ಬಿದ್ದಲ್ಲೇ ಪರಿಹಾರ ಕಂಡುಕೊಂಡು ಭರ್ಜರಿ ಗೆಲುವು ಸಾಧಿಸಿತು. ಬ್ಯಾಟಿಂಗ್​ನಲ್ಲಿ ವೈಫಲ್ಯ ಅನುಭವಿಸಿದ್ದ ಭಾರತ ಸಂಕಷ್ಟಕ್ಕೆ ಸಿಲುಕಿತು. ಆದರೆ ಬ್ಯಾಟಿಂಗ್​ನಲ್ಲಿ ಮಾಡಿದ ತಪ್ಪುಗಳನ್ನು ತಿದ್ದಿಕೊಂಡು ಪುಟಿದೆದ್ದು ಬಂದ ಭಾರತ 2ನೇ ಇನ್ನಿಂಗ್ಸ್​ನಲ್ಲಿ 487 ರನ್​ಗಳ ಬೃಹತ್ ಮೊತ್ತ ಪೇರಿಸಿತು. ಇದರೊಂದಿಗೆ ಆತಿಥೇಯರ ಹೆಡೆಮುರಿ ಕಟ್ಟಲು ನೆರವಾಯಿತು. ಬಿದ್ದಲ್ಲೇ ಪರಿಹಾರ ಕಂಡುಕೊಂಡ ಭಾರತ ಗೆಲುವಿನ ನಗೆ ಬೀರಿದ್ದು, ಸರಣಿಯಲ್ಲಿ ಮುನ್ನಡೆಯನ್ನು ಪಡೆದುಕೊಂಡಿದೆ. ವಿಶೇಷ ಏನೆಂದರೆ ಟೀಮ್ ಇಂಡಿಯಾ ವಿರಾಟ್ ಕೊಹ್ಲಿ ಫಾರ್ಮ್​​ ಮರಳಿದ್ದಾರೆ.

ಪರ್ತ್‌ನಲ್ಲಿ ಟೆಸ್ಟ್ ಗೆದ್ದ ಏಷ್ಯಾದ ನಾಯಕರು

ಅನಿಲ್ ಕುಂಬ್ಳೆ 2008ರಲ್ಲಿ ಪರ್ತ್​ನ ಡಬ್ಲ್ಯುಎಸಿಎ ಮೈದಾನದಲ್ಲಿ ಗೆದ್ದಿದ್ದರು.

ಜಸ್ಪ್ರೀತ್ ಬುಮ್ರಾ 2024ರಲ್ಲಿ ಪರ್ತ್​ನ ಆಪ್ಟಸ್ ಮೈದಾನದಲ್ಲಿ ಜಯಿಸಿದ್ದಾರೆ.

ಇದನ್ನೂ ಓದಿ: WTC Point Table: ಪರ್ತ್ ಟೆಸ್ಟ್ ಗೆಲುವಿನ ಬಳಿಕ ಡಬ್ಲ್ಯುಟಿಸಿ ಅಂಕಪಟ್ಟಿ ಹೇಗಿದೆ; ಭಾರತಕ್ಕೆ ಬಡ್ತಿ, ಎರಡನೇ ಸ್ಥಾನಕ್ಕೆ ಕುಸಿದ ಆಸೀಸ್

ಏಷ್ಯಾದ ಹೊರಗೆ ಭಾರತದ ಅತಿದೊಡ್ಡ ಗೆಲುವುಗಳು (ಟೆಸ್ಟ್​)

ವೆಸ್ಟ್ ಇಂಡೀಸ್ ವಿರುದ್ಧ 318 ರನ್‌ಗಳ ಗೆಲುವು, ನಾರ್ತ್ ಸೌಂಡ್, 2019

ಆಸ್ಟ್ರೇಲಿಯಾ ವಿರುದ್ಧ 295 ರನ್‌ಗಳ ಜಯ, ಪರ್ತ್, 2024 (ಇಂದು)

ಇಂಗ್ಲೆಂಡ್ ವಿರುದ್ಧ 279 ರನ್‌ಗಳ ದಿಗ್ವಿಜಯ, ಹೆಡಿಂಗ್ಲಿ, 1986

ನ್ಯೂಜಿಲೆಂಡ್ ವಿರುದ್ಧ 272 ರನ್​ಗಳ ಗೆಲುವು, ಆಕ್ಲೆಂಡ್, 1968

ವೆಸ್ಟ್ ಇಂಡೀಸ್ ವಿರುದ್ಧ 257 ರನ್​ಗಳ ಜಯ, ಕಿಂಗ್​ಸ್ಟನ್, 2019

ಆಸ್ಟ್ರೇಲಿಯಾ ವಿರುದ್ಧ ಭಾರತದ ದೊಡ್ಡ ಗೆಲುವುಗಳು

320 ರನ್‌ಗಳ ಗೆಲುವು - ಮೊಹಾಲಿ, 2008

295 ರನ್‌ಗಳ ಜಯ - ಪರ್ತ್, 2024 (47 ವರ್ಷಗಳ ನಂತರ)

222 ರನ್‌ಗಳ ಜಯ - ಮೆಲ್ಬೋರ್ನ್, 1977

179 ರನ್‌ಗಳ ಗೆಲುವು - ಚೆನ್ನೈ, 1998

172 ರನ್‌ಗಳ ಜಯ - ನಾಗ್ಪುರ, 2008

ಇದನ್ನೂ ಓದಿ: ಹೊಸ ತಂಡ ಕಟ್ಟಿದ ಸನ್‌ರೈಸರ್ಸ್‌ ಹೈದರಾಬಾದ್; ಹರಾಜಿನಲ್ಲಿ ಯಾರಿಗೆ ಎಷ್ಟು, ಹೊಸದಾಗಿ ಸೇರಿದ ಆಟಗಾರರ ವಿವರ ಇಲ್ಲಿದೆ