ಡ್ರಾನಲ್ಲಿ ಮುಗಿಯಬೇಕಿದ್ದ ಪಂದ್ಯ ಗೆದ್ದುಕೊಂಡ ಟೀಮ್ ಇಂಡಿಯಾ; ಬಾಂಗ್ಲಾದೇಶ ವಿರುದ್ಧ ಜಯಿಸಿ ದಾಖಲೆ ಬರೆದ ಭಾರತ

ಕಾನ್ಪುರದಲ್ಲಿ ನಡೆದ ಎರಡನೇ ಹಾಗೂ ಅಂತಿಮ ಟೆಸ್ಟ್ ಪಂದ್ಯದಲ್ಲಿ ಬಾಂಗ್ಲಾದೇಶ ವಿರುದ್ಧ 7 ವಿಕೆಟ್‌ಗಳ ಭರ್ಜರಿ ಜಯ ಸಾಧಿಸಿದ ಭಾರತ ತಂಡ, 2-0 ಅಂತರದಲ್ಲಿ ಸರಣಿ ಗೆದ್ದು ಸಂಭ್ರಮಿಸಿತು. ಡ್ರಾ ಮಾಡುವ ಅವಕಾಶ ತನ್ನ ಮುಂದಿದ್ದರೂ ಬ್ಯಾಟರ್​​ಗಳ ವೈಫಲ್ಯದಿಂದ ದಿನದಾಟ ಮುಗಿಯುವ ಮುನ್ನವೇ ಶರಣಾಯಿತು. ಮೊದಲ ದಿನದಾಟದಂದು 35 ಓವರ್​ಗಳು ನಡೆದ ನಂತರ ಮಳೆ ಅಡ್ಡಿಪಡಿಸಿತು. ಎರಡು ಮತ್ತು 3ನೇ ದಿನವೂ ಪಂದ್ಯವು ಮಳೆಗೆ ಆಹುತಿಯಾಗಿತ್ತು. ಹೀಗಾಗಿ ಉಳಿದ ಎರಡು ದಿನಗಳಲ್ಲಿ ಪಂದ್ಯ ಡ್ರಾ ಆಗುತ್ತದೆಂದೇ ಎಲ್ಲರೂ ಭಾವಿಸಿದ್ದರು. ಆದರೆ, ಭಾರತ ತಂಡವು ಆಕ್ರಮಣಕಾರಿ ಆಟ ಮೂಲಕ ಪಂದ್ಯದ ಗತಿಯನ್ನೇ ಬದಲಿಸಿತು. ಆ ಮೂಲಕ ಡ್ರಾನಲ್ಲಿ ಮುಗಿಯಬೇಕಿದ್ದ ಪಂದ್ಯವನ್ನು ಟೀಮ್ ಇಂಡಿಯಾ ಗೆದ್ದು ಬೀಗಿತು. ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್​ಶಿಪ್ ಪಾಯಿಂಟ್ಸ್ ಟೇಬಲ್​ನಲ್ಲಿ ಅಗ್ರಸ್ಥಾನದಲ್ಲೇ ಮುಂದುವರೆಯಿತು.

ಎರಡನೇ ಟೆಸ್ಟ್​ ಪಂದ್ಯವನ್ನು ಗೆಲ್ಲಲೇಬೇಕೆಂಬ ಪಣತೊಟ್ಟು ಟೆಸ್ಟ್ ಕ್ರಿಕೆಟ್​ನಲ್ಲಿ ಟಿ20 ಶೈಲಿಯ ಬ್ಯಾಟಿಂಗ್ ನಡೆಸಿದ ಭಾರತ, ಬಾಂಗ್ಲಾದೇಶ ಬೌಲರ್​ಗಳಿಗೆ ಹಿಗ್ಗಾಮುಗ್ಗಾ ಬೆಂಡೆತ್ತಿತ್ತು. ಎರಡು ದಿನಗಳಲ್ಲಿ ರಿಸಲ್ಟ್ ಬರುತ್ತದೆ ಎಂದು ಯಾರೂ ಕೂಡ ನಿರೀಕ್ಷಿಸಿರಲಿಲ್ಲ. ಗ್ರೀನ್ ಪಾರ್ಕ್ ಸ್ಟೇಡಿಯಂನಲ್ಲಿ ಮಳೆ, ಒದ್ದೆಯಾದ ಔಟ್‌ಫೀಲ್ಡ್, ಕಳಪೆ ಒಳಚರಂಡಿ ವ್ಯವಸ್ಥೆ ಕಾರಣ 235 ಓವರ್ಸ್ ಕಳೆದುಹೋದರೂ ಭಾರತದ ಸ್ಫೋಟಕ ಬ್ಯಾಟಿಂಗ್​ನೊಂದಿಗೆ ಮತ್ತು ಬೊಂಬಾಟ್ ಬೌಲಿಂಗ್​ನೊಂದಿಗೆ ಟೆಸ್ಟ್​ ಕ್ರಿಕೆಟ್​ನ ಲೆಕ್ಕಾಚಾರಗಳನ್ನೇ ತಲೆಕೆಳಗೆ ಮಾಡಿಬಿಟ್ಟಿತು. ಮಳೆ ನಿಂತ ನಂತರ ಬ್ಯಾಟಿಂಗ್ ಮುಂದುವರೆಸಿದ್ದ ಬಾಂಗ್ಲಾ, ಪ್ರಥಮ ಇನ್ನಿಂಗ್ಸ್​​ನಲ್ಲಿ 233 ರನ್​ಗಳಿಗೆ ಆಲೌಟ್ ಆಯಿತು. ಆದರೆ, ಜಯಿಸಲೇಬೇಕು ಎಂದು ಪಣತೊಟ್ಟು ಮೊದಲ ಇನ್ನಿಂಗ್ಸ್​ ಪ್ರಾರಂಭಿಸಿದ ಭಾರತಕ್ಕೆ ರೋಹಿತ್​ ಮತ್ತು ಜೈಸ್ವಾಲ್ ವಿನಾಶಕಾರಿ ಆರಂಭ ಒದಗಿಸಿದರು.

ಇದನ್ನೂ ಓದಿ: ಅತಿ ವೇಗದ ಅರ್ಧಶತಕ, ಅತಿ ವೇಗದ ಶತಕ; ಒಂದೇ ಪಂದ್ಯದಲ್ಲಿ ಭಾರತದ ಬ್ಯಾಟಿಂಗ್ ಅಬ್ಬರಕ್ಕೆ 2 ವಿಶ್ವದಾಖಲೆಗಳು ಉಡೀಸ್

ಈ ಪರಿಣಾಮ ವೇಗ ಅರ್ಧಶತಕ, ವೇಗದ ಶತಕ, ವೇಗದ 150, ವೇಗದ 200, ವೇಗದ 250 ರನ್ ಗಳಿಸಿದ ವಿಶ್ವದ ಏಕೈಕ ತಂಡ ಎಂಬ ಹೆಗ್ಗಳಿಕೆಗೆ ಭಾರತ ಪಾತ್ರವಾಯಿತು. ಜೈಸ್ವಾಲ್-ಕೆಎಲ್ ರಾಹುಲ್ ಅರ್ಧಶತಕ ಸಿಡಿಸಿದರೆ, ಕೊಹ್ಲಿ ಅರ್ಧಶತಕದ ಅಂಚಿನಲ್ಲಿ ಎಡವಿದರು. ಪರಿಣಾಮ ಭಾರತ ಕೇವಲ 34.4 ಓವರ್​​ಗಳಲ್ಲಿ 9 ವಿಕೆಟ್​ ನಷ್ಟಕ್ಕೆ 285 ರನ್ ಗಳಿಸಿ ಡಿಕ್ಲೇರ್​ ಘೋಷಿಸಿತ್ತು. ಇದರೊಂದಿಗೆ 52 ರನ್​ಗಳ ಮುನ್ನಡೆ ಪಡೆಯಿತು. 52 ರನ್​ಗಳ ಹಿನ್ನಡೆಯೊಂದಿಗೆ 2ನೇ ಇನ್ನಿಂಗ್ಸ್ ಆರಂಭಿಸಿದ ಬಾಂಗ್ಲಾದೇಶ, ಡ್ರಾ ಸಾಧಿಸುವ ಲೆಕ್ಕಾಚಾರ ಹಾಕಿತ್ತು. ಆದರೆ ಟೀಮ್ ಇಂಡಿಯಾ ಬೌಲರ್​ಗಳ ಅಬ್ಬರಕ್ಕೆ ಕೇವಲ 147 ರನ್​ಗಳಿಗೆ ಆಲೌಟ್​ ಆಗಿ 95 ರನ್​ಗಳ ಗುರಿ ನೀಡಿತು. ಆದರೆ, ಭಾರತ ಟೀ ವಿರಾಮಕ್ಕೂ ಮುನ್ನವೇ 7 ವಿಕೆಟ್​ಗಳಿಂದ ಗೆದ್ದು ಬೀಗಿತು. 17.2 ಓವರ್​ಗಳಲ್ಲಿ ಜಯದ ನಗೆ ಬೀರಿತು.

ಜೈಸ್ವಾಲ್ ಎರಡು ಅರ್ಧಶತಕ, ಬೌಲರ್​ಗಳು ಅಬ್ಬರ

ಮೊದಲ ಇನ್ನಿಂಗ್ಸ್​​ನಲ್ಲಿ 31 ಎಸೆತಗಳಲ್ಲಿ ಅರ್ಧಶತಕ ಸಿಡಿಸಿದ ಯಶಸ್ವಿ ಜೈಸ್ವಾಲ್, ಎರಡನೇ ಇನ್ನಿಂಗ್ಸ್​​ನಲ್ಲೂ ಫಿಫ್ಟಿ ಬಾರಿಸಿದರು. ಕ್ರಮವಾಗಿ 72 ಮತ್ತು 51 ರನ್ ಸಿಡಿಸಿದರು. ಆ ಮೂಲಕ ದಾಖಲೆ ಬರೆದರು. ಮತ್ತೊಂದೆಡೆ ಬೌಲರ್​​ಗಳು ಸಹ ಈ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು. ಬುಮ್ರಾ 3 ವಿಕೆಟ್ ಪಡೆದರೆ, ಸಿರಾಜ್, ಅಶ್ವಿನ್, ಆಕಾಶ್ ದೀಪ್ ತಲಾ 2 ವಿಕೆಟ್ ಪಡೆದರು. ಎರಡನೇ ಇನ್ನಿಂಗ್ಸ್​​ನಲ್ಲಿ ಬುಮ್ರಾ, ಅಶ್ವಿನ್, ರವೀಂದ್ರ ಜಡೇಜಾ ತಲಾ 3 ವಿಕೆಟ್ ಪಡೆದರು. ಮೊದಲ ಟೆಸ್ಟ್​​ನಲ್ಲಿ 280 ರನ್​ಗಳಿಂದ ಗೆದ್ದಿದ್ದ ಭಾರತ, 2ನೇ ಟೆಸ್ಟ್​ನಲ್ಲಿ 7 ವಿಕೆಟ್​ಗಳ ಗೆಲುವು ಸಾಧಿಸಿತು. ಜೈಸ್ವಾಲ್ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದರೆ, ರವಿಚಂದ್ರನ್ ಅಶ್ವಿನ್ ಸರಣಿಶ್ರೇಷ್ಠ ಪ್ರಶಸ್ತಿ ಗೆದ್ದರು.

ಭಾರತ ತಂಡ ದಾಖಲೆ

ಈ ಗೆಲುವಿನೊಂದಿಗೆ ಭಾರತ ದಾಖಲೆ ಬರೆಯಿತು. ತವರಿನಲ್ಲಿ ಸತತ18 ಟೆಸ್ಟ್ ಸರಣಿಗೆ ಮುತ್ತಿಕ್ಕಿತು. ಅಲ್ಲದೆ, ಭಾರತಕ್ಕೆ ಇದು 180ನೇ ಟೆಸ್ಟ್ ಪಂದ್ಯದ ಗೆಲುವಾಗಿದೆ. 2013ರಿಂದ ಭಾರತ ತವರಿನಲ್ಲಿ ಟೆಸ್ಟ್ ಸರಣಿ ಸೋತೇ ಇಲ್ಲ. ಆ ಮೂಲಕ ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲಿ ಅತ್ಯಧಿಕ ಪಂದ್ಯ ಗೆದ್ದ ತಂಡ ಎನಿಸಿದೆ. ಈ ಪಟ್ಟಿಯಲ್ಲಿ ದಕ್ಷಿಣ ಆಫ್ರಿಕಾ 179 ಗೆಲುವು ಸಾಧಿಸಿ ಎರಡನೇ ಸ್ಥಾನದಲ್ಲಿದೆ. ಇದು ಬಾಂಗ್ಲಾದೇಶದ ವಿರುದ್ಧ ಆಡಿದ್ದ 15 ಪಂದ್ಯಗಳಲ್ಲಿ ಭಾರತಕ್ಕೆ 13ನೇ ಗೆಲುವಾಗಿದೆ. ಉಳಿದ ಎರಡು ಪಂದ್ಯಗಳು ಡ್ರಾಗೊಂಡಿವೆ. 

ಇದನ್ನೂ ಓದಿ: MS Dhoni: ಆರ್‌ಸಿಬಿ ವಿರುದ್ಧ ಸೋತಿದ್ದಕ್ಕೆ ಟಿವಿ ಒಡೆದು ಹಾಕಿದ್ದ ಧೋನಿ: ಶಾಕಿಂಗ್ ವಿಚಾರ ಬಹಿರಂಗ