ಸತತ ನಾಲ್ಕನೇ ಗೆಲುವಿಗೆ ಮುತ್ತಿಕ್ಕಿದ ಆರ್​ಸಿಬಿ; ಫಾಫ್ ಪಡೆ ಪ್ಲೇಆಫ್ ಆಸೆ ಜೀವಂತ, ಪಂಜಾಬ್ ಕಿಂಗ್ಸ್ ಎಲಿಮಿನೇಟ್

ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಸತತ 4ನೇ ಗೆಲುವು ದಾಖಲಿಸಿದೆ. ಪಂಜಾಬ್ ಕಿಂಗ್ಸ್ ವಿರುದ್ಧ 60 ರನ್​ಗಳ ಅಂತರದಿಂದ ಅದ್ಭುತ ಜಯ ಸಾಧಿಸಿದ ಆರ್​​ಸಿಬಿ (RCB vs PBKS), ಪ್ಲೇಆಫ್​ ಆಸೆ ಜೀವಂತವಾಗಿದೆ. ಅತ್ತ ಸೋತ ಪಿಬಿಕೆಎಸ್, ಮುಂಬೈ ಇಂಡಿಯನ್ಸ್​ ನಂತರ​ ಪ್ಲೇಆಫ್ ರೇಸ್​ನಿಂದ ಅಧಿಕೃತವಾಗಿ ಹೊರಬಿತ್ತು. ಟೂರ್ನಿಯಲ್ಲಿ 5ನೇ ದಿಗ್ವಿಜಯ ಸಾಧಿಸಿದ ಫಾಫ್ ಪಡೆ, ತನ್ನ ಮುಂದಿನ ಎರಡು ಪಂದ್ಯಗಳಲ್ಲಿ ಗೆದ್ದರೆ 14 ಅಂಕ ಪಡೆದು ಪ್ಲೇಆಫ್​ ಪ್ರವೇಶಿಸುವ ಅವಕಾಶ ಇದೆ. ಆದರೆ ಸಿಎಸ್​ಕೆ, ಡೆಲ್ಲಿ, ಲಕ್ನೋ ತಂಡಗಳು ಎಲ್ಲಾ ಪಂದ್ಯಗಳನ್ನು ಸೋಲಬೇಕು. ಹೀಗಿದ್ದಾಗ ಮಾತ್ರ ಆರ್​ಸಿಬಿ ಪ್ಲೇಆಫ್ ಪ್ರವೇಶಿಸಲು ಸುಲಭವಾಗುತ್ತದೆ.

ಧರ್ಮಶಾಲಾದ ಹಿಮಾಚಲ ಪ್ರದೇಶ ಕ್ರಿಕೆಟ್ ಅಸೋಸಿಯೇಷನ್ ಮೈದಾನದಲ್ಲಿ ನಡೆದ ಮಹತ್ವದ ಪಂದ್ಯದಲ್ಲಿ ಆರ್​ಸಿಬಿ ಮೊದಲು ಬ್ಯಾಟಿಂಗ್ ನಡೆಸಿತು. ವಿರಾಟ್ ಕೊಹ್ಲಿ (92) ಮತ್ತು ರಜತ್ ಪಾಟೀದಾರ್ (55) ಅಬ್ಬರದ ಪ್ರದರ್ಶನ ನೀಡಿದ ಪರಿಣಾಮ ಬೆಂಗಳೂರು 20 ಓವರ್​​ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 241 ರನ್​​ಗಳ ಬೃಹತ್ ಮೊತ್ತ ಪೇರಿಸಿತು. ಬೃಹತ್ ಗುರಿಯನ್ನು ಹಿಂಬಾಲಿಸಿದ ಪಂಜಾಬ್ ಕಿಂಗ್ಸ್ 17 ಓವರ್​ಗಳಲ್ಲಿ ಎಲ್ಲಾ ವಿಕೆಟ್ ಕಳೆದುಕೊಂಡು 181 ರನ್ ಗಳಿಸಿತು.

ರೈಲಿ ರೊಸೊ ಅಬ್ಬರ ವ್ಯರ್ಥ

242 ರನ್​ಗಳ ಟಾರ್ಗೆಟ್​ ಬೆನ್ನಟ್ಟಿದ ಪಿಬಿಕೆಎಸ್​, ಮೊದಲ ಓವರ್​​ನಲ್ಲೇ ವಿಕೆಟ್ ಕಳೆದುಕೊಂಡಿತು. ಪ್ರಭುಸಿಮ್ರಾನ್ ಸಿಂಗ್ ಬೌಂಡರಿ ಸಿಡಿಸಿ ಸ್ವಪ್ನಿಲ್ ಸಿಂಗ್​ ಬೌಲಿಂಗ್​ನಲ್ಲಿ ಹೊರ ನಡೆದರು. ಜಾನಿ ಬೈರ್​ಸ್ಟೋ (27) ಕೆಲ ಹೊತ್ತು ಅಬ್ಬರಿಸಿ ಹೊರ ನಡೆದರೆ, ರೈಲಿ ರೊಸೊ ಸ್ಫೋಟಕ ಅರ್ಧಶತಕ (61) ಸಿಡಿಸಿ ಮಿಂಚಿದರು. ಆರ್​ಸಿಬಿ ಬೌಲರ್​​ಗಳಿಗೆ ಸರಿಯಾಗಿ ದಂಡಿಸಿದರು. ಶಶಾಂಕ್ ಸಿಂಗ್ 37 ರನ್ ಗಳಿಸಿ ರನೌಟ್ ಆದರು. ಇದರೊಂದಿಗೆ ಪಂಜಾಬ್ ಸೋಲುವುದು ಖಚಿತವಾಯಿತು.

ಇದನ್ನೂ ಓದಿ: ಕೆಎಲ್ ರಾಹುಲ್ ಮೇಲೆ ಕೂಗಾಡಿದ ಸಂಜೀವ್ ಗೋಯೆಂಕಾ; ಹಣ ಶಿಷ್ಟಾಚಾರ ಕಲಿಸಲ್ಲ ಎಂಬುದಕ್ಕೆ ಈ ವಿಡಿಯೋ ಸಾಕ್ಷಿ

ಜಿತೇಶ್ ಶರ್ಮಾ (5), ಲಿಯಾಮ್ ಲಿವಿಂಗ್​ಸ್ಟೋನ್ (0), ಸ್ಯಾಮ್ ಕರನ್ (22), ಅಶುತೋಷ್ ಶರ್ಮಾ (8), ನಿರಾಸೆ ಮೂಡಿಸಿದರು. ಹರ್ಷಲ್ ಪಟೇಲ್ (0), ರಾಹುಲ್ ಚಹರ್ (5), ಅರ್ಷದೀಪ್ ಸಿಂಗ್ (4) ಕೊನೆಯಲ್ಲಿ ಹೆಚ್ಚು ಹೊತ್ತು ಇರಲಿಲ್ಲ. ಮೊಹಮ್ಮದ್ ಸಿರಾಜ್ 3 ವಿಕೆಟ್, ಸ್ವಪ್ನಿಲ್ ಸಿಂಗ್, ಲಾಕಿ ಫರ್ಗ್ಯುಸನ್, ಕರಣ್ ಶರ್ಮಾ ತಲಾ 2 ವಿಕೆಟ್ ಪಡೆದು ಮಿಂಚಿದರು.

ಕೊಹ್ಲಿ-ರಜತ್ ಮಿಂಚು

ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿದ ಆರ್​ಸಿಬಿ ಆರಂಭಿಕ ಡಬಲ್ ಆಘಾತಕ್ಕೆ ಒಳಗಾಯಿತು. ಫಾಫ್ ಡು ಪ್ಲೆಸಿಸ್ 9, ವಿಲ್ ಜಾಕ್ಸ್ 12 ರನ್ ಗಳಿಸಿ ವಿದ್ವತ್ ಕಾವೇರಪ್ಪ ಬೌಲಿಂಗ್​ನಲ್ಲಿ ಹೊರನಡೆದರು. ಆರಂಭದಲ್ಲಿ ತಡಬಡಾಯಿಸಿದರೂ ಆಮೇಲೆ ಅಬ್ಬರಿಸಿದ ವಿರಾಟ್ ಕೊಹ್ಲಿ ಪಂಜಾಬ್ ಬೌಲರ್​​ಗಳಿಗೆ ದಂಡಿಸಿದರು. ಕೊಹ್ಲಿಗೆ ರಜತ್ ಪಾಟೀದಾರ್ ಸಖತ್ ಸಾಥ್ ನೀಡಿದರು. ಆದರೆ ಈ ಇಬ್ಬರ ತಲಾ 2 ಕ್ಯಾಚ್​​ಗಳನ್ನು ಪಿಬಿಕೆಎಸ್ ಫೀಲ್ಡರ್ಸ್ ಕೈಬಿಟ್ಟು ಕೆಟ್ಟರು.

ಎರಡೆರಡು ಜೀವದಾನ ಪಡೆದ ವಿರಾಟ್ ಕೊಹ್ಲಿ ಮತ್ತು ರಜತ್ ಪಾಟೀದಾರ್​ ಸಖತ್ ಅರ್ಧಶತಕ ಸಿಡಿಸಿದರು. ಪಾಟೀದಾರ್​ 23 ಎಸೆತಗಳಲ್ಲಿ 3 ಬೌಂಡರಿ, 6 ಸಿಕ್ಸರ್​​ಗಳ ನೆರವಿನಿಂದ ಭರ್ಜರಿ 55 ರನ್ ಗಳಿಸಿದರೆ, ವಿರಾಟ್ ಕೊಹ್ಲಿ 47 ಎಸೆತಗಳಲ್ಲಿ 7 ಬೌಂಡರಿ, 6 ಸಿಕ್ಸರ್​ಗಳೊಂದಿಗೆ ಅಮೋಘ 92 ರನ್ ಗಳಿಸಿ 8 ರನ್​ಗಳಿಂದ ಶತಕ ವಂಚಿತರಾದರು. ಇವರಿಬ್ಬರ ಅದ್ಭುತ ಆಟದ ನೆರವಿನಿಂದ ತಂಡದ ಮೊತ್ತ 200ರ ಗಡಿ ದಾಟಿತು. ಕೊನೆಯಲ್ಲಿ ಕ್ಯಾಮರೂನ್ ಗ್ರೀನ್ 46, ದಿನೇಶ್ ಕಾರ್ತಿಕ್ 18 ರನ್​ಗಳ ಕಾಣಿಕೆ ನೀಡಿದರು.

ಇದನ್ನೂ ಓದಿ: 600 ರನ್, 400 ಸಿಕ್ಸರ್, 3 ತಂಡಗಳ ವಿರುದ್ಧ 1000 ರನ್; ಶತಕ ವಂಚಿತನಾದರೂ ಹಲವು ಮೈಲಿಗಲ್ಲು ತಲುಪಿದ ವಿರಾಟ್ ಕೊಹ್ಲಿ