2021-2024ರ ನಡುವೆ ಫ್ಯಾಬ್-4 ಆಟಗಾರರ ಸೆಂಚುರಿಗಳ ವ್ಯತ್ಯಾಸ; 4ನೇ ಸ್ಥಾನಕ್ಕೆ ಕುಸಿದ ವಿರಾಟ್ ಕೊಹ್ಲಿ, ಜೋ ರೂಟ್ ಟಾಪ್

ವಿರಾಟ್ ಕೊಹ್ಲಿ.. ಟೀಮ್ ಇಂಡಿಯಾದ ಸೂಪರ್ ಸ್ಟಾರ್ ಬ್ಯಾಟರ್ ನಾಲ್ಕೈದು ವರ್ಷಗಳ ಹಿಂದೆ ಶತಕ ಸಿಡಿಸುವುದನ್ನೇ ಚಟ ಮಾಡಿಕೊಂಡಿದ್ದರು. ಪ್ರತಿ ಪಂದ್ಯದಲ್ಲೂ ರನ್ ಗಳಿಸುತ್ತಿದ್ದರು. ಬೌಲರ್​​​ಗಳೇ ಸುಸ್ತಾಗುವಂತೆ ಮಾಡುತ್ತಿದ್ದರು. ಅಸಾಧ್ಯ ಎನ್ನುತ್ತಿದ್ದ ದಾಖಲೆಗಳನ್ನೂ ಮುರಿಯುತ್ತಿದ್ದರು. ನೂತನ ಮೈಲಿಗಲ್ಲುಗಳನ್ನು ಸ್ಥಾಪಿಸುತ್ತಿದ್ದರು. ಆದರೆ, ಕಳೆದ ಮೂರ್ನಾಲ್ಕು ವರ್ಷಗಳಿಂದ ಈಚೆಗೆ ಕೊಹ್ಲಿ ಆಟದ ವಿಧಾನ ಬದಲಾಗಿದೆ. ಬ್ಯಾಟಿಂಗ್ ಮರೆತವರಂತೆ ಆಡುತ್ತಿದ್ದಾರೆ. ಒಂದೇ ರೀತಿಯ ಎಸೆತಗಳಿಗೆ ಔಟ್ ಆಗುತ್ತಿದ್ದಾರೆ. ಅನಾನುಭವಿ ಬೌಲರ್​ಗಳ ಎದುರೇ ರನ್​ಗಳಿಸಲು ಪರದಾಡುತ್ತಿದ್ದಾರೆ. ಅದಕ್ಕೆ ಸಾಕ್ಷಿ ಈ ಅಂಕಿ ಅಂಶಗಳು.

ಹೌದು, ವಿರಾಟ್ ಕೊಹ್ಲಿ ಪ್ರಸ್ತುತ ಕೆಟ್ಟ ದಿನಗಳನ್ನು ಎದುರಿಸುತ್ತಿದ್ದಾರೆ. ಸಕ್ರಿಯ ಆಟಗಾರರ ಪೈಕಿ ಅತ್ಯಧಿಕ ಶತಕಗಳನ್ನು ಸಿಡಿಸಿದ್ದ ಟಾಪ್​ನಲ್ಲಿ ವಿರಾಟ್​, 4ನೇ ಸ್ಥಾನಕ್ಕೆ ಕುಸಿದಿದ್ದಾರೆ. ಮೂರೇ ವರ್ಷಗಳಲ್ಲಿ ಎಂದು ಎಂಬುದು ಅಚ್ಚರಿ. ಅಂತಾರಾಷ್ಟ್ರೀಯ ಕ್ರಿಕೆಟ್​​ನಲ್ಲಿ ಫ್ಯಾಬ್​ 4 ಎಂದು ವಿರಾಟ್ ಕೊಹ್ಲಿ, ಜೋ ರೂಟ್, ಕೇನ್ ವಿಲಿಯಮ್ಸನ್, ಸ್ಟೀವ್ ಸ್ಮಿತ್ ಅವರನ್ನು ಕರೆಯಲಾಗುತ್ತದೆ. ಏಕೆಂದರೆ ಸಕ್ರಿಯ ಆಟಗಾರರಲ್ಲಿ ಅತಿ ಹೆಚ್ಚು ಟೆಸ್ಟ್​ ಶತಕ, ಟೆಸ್ಟ್​ನಲ್ಲಿ ಅದ್ಭುತ ಪ್ರದರ್ಶನ ನೀಡುತ್ತಿದ್ದಾರೆ ಇವರು. ಆದರೆ 2021-2024ರ ನಡುವೆ ಫ್ಯಾಬ್-4 ಆಟಗಾರರ ಸೆಂಚುರಿಗಳಲ್ಲಿ ತುಂಬಾ ವ್ಯತ್ಯಾಸವಾಗಿದೆ. 3 ವರ್ಷದೊಳಗೆ ವಿರಾಟ್ ಕೊಹ್ಲಿ 4ನೇ ಸ್ಥಾನಕ್ಕೆ ಕುಸಿದರೆ, 19 ಶತಕ ಸಿಡಿಸಿದ ಜೋ ರೂಟ್ ಅಗ್ರಸ್ಥಾನಕ್ಕೇರಿದ್ದಾರೆ.

ಕೊಹ್ಲಿ ಟಾಪರ್​, ರೂಟ್ ಲಾಸ್ಟ್​

2021ರ ಜನವರಿ 1ಕ್ಕೆ ಫ್ಯಾಬ್ 4 ಆಟಗಾರರ ಶತಕಗಳ ಪಟ್ಟಿಯನ್ನು ನೋಡುವುದಾದರೆ ಕೊಹ್ಲಿ ನಂಬರ್​ 1 ಆಗಿದ್ದರು. ಕಡಿಮೆ ಇನ್ನಿಂಗ್ಸ್​ಗಳಲ್ಲಿ 27 ಶತಕಗಳಲ್ಲಿ ಚಚ್ಚಿದ್ದರು. ಆದರೆ ಅಂದು ರೂಟ್ (17) ಶತಕಗಳ ಸಂಖ್ಯೆ ಕೊಹ್ಲಿಗಿಂತ 10 ಕಡಿಮೆ ಇತ್ತು. ಹಾಗೆಯೇ ಸ್ಮಿತ್, ವಿಲಿಯಮ್ಸನ್ ಅವರೂ ಕ್ರಮವಾಗಿ 1, 4 ಸೆಂಚುರಿ ಕಡಿಮೆ ಹೊಂದಿದ್ದರು. ಯಾರು ಎಷ್ಟು ಇನ್ನಿಂಗ್ಸ್​​​ಗಳಲ್ಲಿ ಎಷ್ಟು ಶತಕ ಸಿಡಿಸಿದ್ದರು? ಫ್ಯಾಬ್ 4 ಆಟಗಾರರ ಶತಕಗಳ ವ್ಯತ್ಯಾಸ ಇಲ್ಲಿದೆ.

ಇದನ್ನೂ ಓದಿ: ಬಾರ್ಡರ್-ಗವಾಸ್ಕರ್ ಟ್ರೋಫಿ ತಂಡದಿಂದ ಮೂವರನ್ನು ಬಿಡುಗಡೆ ಮಾಡಿದ ಬಿಸಿಸಿಐ; ಆರ್‌ಸಿಬಿ ಆಟಗಾರ ವಾಪಸ್

ಜನವರಿ 01, 2021ಕ್ಕೆ ಫ್ಯಾಬ್-4 ಆಟಗಾರರ ಶತಕಗಳ ಅಂಕಿ ಅಂಶ

• ವಿರಾಟ್ ಕೊಹ್ಲಿ - 27 ಶತಕ (147 ಇನ್ನಿಂಗ್ಸ್​)
• ಸ್ಟೀವ್ ಸ್ಮಿತ್ - 26 ಶತಕ (136 ಇನ್ನಿಂಗ್ಸ್)
• ಕೇನ್ ವಿಲಿಯಮ್ಸನ್ - 23 ಶತಕ (143 ಇನ್ನಿಂಗ್ಸ್)
• ಜೋ ರೂಟ್​ - 17 ಶತಕ (177 ಇನ್ನಿಂಗ್ಸ್)

ಅಗ್ರಸ್ಥಾನಕ್ಕೇರಿದ ಜೋ ರೂಟ್, ಕೊಹ್ಲಿ 4ನೇ ಸ್ಥಾನ

2024ರ ಡಿಸೆಂಬರ್ 16ರ ತನಕ ಇದೇ ಫ್ಯಾಬ್​-4 ಆಟಗಾರರ ಶ್ರೇಯಾಂಕಾ ಉಲ್ಟಾ ಆಗಿದೆ. ಜೋರೂಟ್ ನಾಲ್ಕರಿಂದ ಅಗ್ರಸ್ಥಾನಕ್ಕೇರಿದರೆ, ಕೊಹ್ಲಿ ಒಂದರಿಂದ ನಾಲ್ಕಕ್ಕೆ ಕುಸಿದಿದ್ದಾರೆ. ಅಲ್ಲದೆ, ಶತಕಗಳ ಸಂಖ್ಯೆಯಲ್ಲೂ ಭಾರೀ ಬದಲಾವಣೆಯಾಗಿದೆ. ರೂಟ್ ಈ ಮೂರು ವರ್ಷಗಳಲ್ಲಿ ಬರೋಬ್ಬರಿ 19 ಶತಕ ಬಾರಿಸಿದ್ದಾರೆ. ಆದರೆ ಕೊಹ್ಲಿ ಸಿಡಿಸಿರೋದು ಮೂರೇ ಮೂರು. ಇನ್ನು ಕೇನ್ ವಿಲಿಯಮ್ಸನ್ 10, ಸ್ಮಿತ್ 7 ಶತಕ ಸಿಡಿಸಿದ್ದಾರೆ. ಮೂರನೇ ಸ್ಥಾನದಲ್ಲಿದ್ದ ಕೇನ್, 2ಕ್ಕೇರಿದ್ದಾರೆ.

ಡಿಸೆಂಬರ್ 16, 2024ಕ್ಕೆ ಫ್ಯಾಬ್-4 ಆಟಗಾರರ ಶತಕಗಳ ಅಂಕಿ ಅಂಶ

• ಜೋ ರೂಟ್​ - 36 ಶತಕ (177 ಇನ್ನಿಂಗ್ಸ್)
• ಕೇನ್ ವಿಲಿಯಮ್ಸನ್ - 33 ಶತಕ (186 ಇನ್ನಿಂಗ್ಸ್)
• ಸ್ಟೀವ್ ಸ್ಮಿತ್ - 33 ಶತಕ (199 ಇನ್ನಿಂಗ್ಸ್)
• ವಿರಾಟ್ ಕೊಹ್ಲಿ - 30 ಶತಕ (206 ಇನ್ನಿಂಗ್ಸ್​)

ಇದನ್ನೂ ಓದಿ: ಕಾಮೆಂಟರಿ ವೇಳೆ ಜಸ್ಪ್ರೀತ್ ಬುಮ್ರಾ ನಿಂದಿಸಿದ ಇಸಾ ಗುಹಾ; ವ್ಯಾಪಕ ಖಂಡನೆ ಬೆನ್ನಲ್ಲೇ ಕ್ಷಮೆಯಾಚನೆ, ಮೆಚ್ಚಿದ ರವಿಶಾಸ್ತ್ರಿ

2021 ಮತ್ತು 2024ರ ಕ್ಯಾಲೆಂಡರ್ ವರ್ಷಗಳ ನಡುವೆ ರೂಟ್ 100 ಟೆಸ್ಟ್ ಇನ್ನಿಂಗ್ಸ್​ ಆಡಿದ್ದು, ಒಟ್ಟು 19 ಶತಕ ಸಿಡಿಸಿದ್ದಾರೆ. ವಿಲಿಯಮ್ಸನ್ 43 ಇನ್ನಿಂಗ್ಸ್​​ಗಳಲ್ಲಿ 10 ಶತಕ, ಸ್ಮಿತ್ 63 ಇನ್ನಿಂಗ್ಸ್​ಗಳಲ್ಲಿ 7 ಶತಕ, ಕೊಹ್ಲಿ 59 ಇನ್ನಿಂಗ್ಸ್​ಗಳಲ್ಲಿ ಕೇವಲ 3 ಶತಕ ಬಾರಿಸಿದ್ದಾರೆ. ಕಳೆದ ಮೂರು ವರ್ಷಗಳಲ್ಲಿ ಕೊಹ್ಲಿ ಫಾರ್ಮ್​ ಹೇಗಿದೆ ಎನ್ನುವುದಕ್ಕೆ ಇದಕ್ಕಿಂತ ಉತ್ತಮ ಉದಾಹರಣೆ ಮತ್ತೊಂದಿಲ್ಲ.

ಕೊಹ್ಲಿ ಈ ವರ್ಷ ಟೆಸ್ಟ್​ ಬ್ಯಾಟಿಂಗ್ ಸರಾಸರಿ (2024ರಲ್ಲಿ)

ಪಂದ್ಯ - 09

ಇನ್ನಿಂಗ್ಸ್ - 17

ರನ್ - 376

ಸರಾಸರಿ - 25.06

50/100 - 01/01

4s/6s - 39/05

ಇದನ್ನೂ ಓದಿ: RCB Full Squad: ಡಬ್ಲ್ಯುಪಿಎಲ್ ಮಿನಿ ಹರಾಜಿನ ಬಳಿಕ ಆರ್‌​ಸಿಬಿ ತಂಡ ಮತ್ತಷ್ಟು ಬಲಿಷ್ಠ; ಸತತ 2ನೇ ಟ್ರೋಫಿ ಲೋಡಿಂಗ್