ಬಾಕ್ಸ್‌ ಆಫೀಸ್‌ನಲ್ಲಿ ಅಂದುಕೊಂಡಂತೆ ಸದ್ದು ಮಾಡದ ಕಂಗುವಾ; ವೇಟ್ಟೈಯನ್‌ಗೂ ಕಡಿಮೆ ಕಲೆಕ್ಷನ್‌ ಮಾಡಿದ ಸೂರ್ಯ ಸಿನಿಮಾ
Nov 15, 2024 08:38 PM IST
Share
Sacnilk ವರದಿ ಪ್ರಕಾರ ಸೂರ್ಯ ಅಭಿನಯದ ಕಂಗುವಾ ಮೊದಲ ದಿನ 40 ಕೋಟಿ ರೂ. ಕಲೆಕ್ಷನ್‌ ಮಾಡಿದೆ
Kanguva Box office collection Day 1: ಶಿವ ನಿರ್ದೇಶನದಲ್ಲಿ ಸೂರ್ಯ ದ್ವಿಪಾತ್ರದಲ್ಲಿ ನಟಿಸಿರುವ ಕಂಗುವಾ ಸಿನಿಮಾ ಮೊದಲ ದಿನ ನಿರೀಕ್ಷಿಸಿದಷ್ಟು ಕಲೆಕ್ಷನ್‌ ಮಾಡಿಲ್ಲ. ವೇಟ್ಟೈಯನ್‌ಗೂ ಮೀರಿ ಸಿನಿಮಾ ಗಳಿಕೆ ಮಾಡಬಹುದು ಎಂಬ ನಿರೀಕ್ಷೆ ಸುಳ್ಳಾಗಿದೆ. ಸಿನಿಮಾ ಮೊದಲ ದಿನ ವಿಶ್ವಾದ್ಯಂತ 40 ಕೋಟಿ ರೂ. ಸಂಗ್ರಹಿಸಿದೆ.
Kanguva Box office collection Day 1: ಸೂರ್ಯ ಅಭಿನಯ ಬಹುನಿರೀಕ್ಷಿತ ಕಂಗುವಾ ಸಿನಿಮಾ ನವೆಂಬರ್‌ 14 ರಂದು ಬಿಡುಗಡೆಯಾಗಿದೆ. ಸಿನಿಮಾ ಕನ್ನಡ, ತಮಿಳು, ತೆಲುಗು, ಮಲಯಾಳಂ, ಹಿಂದಿ, ಇಂಗ್ಲೀಷ್‌, ಸ್ಪಾನಿಷ್‌ ಹಾಗೂ ಫ್ರೆಂಚ್‌ ಭಾಷೆಗಳಲ್ಲಿ ಸಿನಿಮಾ ಬಿಡುಗಡೆ ಆಗಿದೆ. ಸಿನಿಮಾದಲ್ಲಿ ಸೂರ್ಯ ದ್ವಿಪಾತ್ರದಲ್ಲಿ ನಟಿಸಿದ್ದಾರೆ. ಫ್ಯಾಂಟಸಿ ಆಕ್ಷನ್‌ ಸಿನಿಮಾವನ್ನು ಸಿನಿಪ್ರಿಯರು ಒಪ್ಪಿ ಅಪ್ಪಿದ್ದಾರೆ. ಆದರೆ ಸಿನಿಮಾ ಮೊದಲ ದಿನದ ಬಾಕ್ಸ್‌ ಆಫೀಸ್‌ ಕಲೆಕ್ಷನ್‌ ಅಂದುಕೊಂಡಿದ್ದಕ್ಕಿಂತ ಕಡಿಮೆ ಆಗಿದೆ.
ವಿಶ್ವಾದ್ಯಂತ 40 ಕೋಟಿ ರೂ ಗಳಿಸಿದ ಕಂಗುವಾ
ರಜನಿಕಾಂತ್‌ ಅಭಿನಯದ ವೇಟ್ಟೈಯನ್‌ ಸಿನಿಮಾ ಮೊದಲ ದಿನ ವಿಶ್ವಾದ್ಯಂತ 70 ಕೋಟಿ ರೂ ಕಲೆಕ್ಷನ್‌ ಮಾಡಿತ್ತು. ಕಂಗುವಾ ಸಿನಿಮಾ ಅದಕ್ಕಿಂತ ಹೆಚ್ಚು ಕಲೆಕ್ಷನ್‌ ಮಾಡಿ ರಜನಿಕಾಂತ್‌ ಸಿನಿಮಾವನ್ನು ಹಿಂದಿಕ್ಕಬಹುದು ಎಂದು ಅಂದಾಜಿಸಲಾಗಿತ್ತು. ಆದರೆ ಸಿನಿಮಾ ಮೊದಲ ದಿನ ವೇಟ್ಟೈಯನ್‌ಗೂ ಕಡಿಮೆ ಸಂಗ್ರಹಿಸಿದೆ. ಕಂಗುವಾ ಮೊದಲ ದಿನ ದೇಶಾದ್ಯಂತ 28.50 ಕೋಟಿ ರೂ. ಗ್ರಾಸ್‌ ಕಲೆಕ್ಷನ್‌ ಹಾಗೂ ಓವರ್‌ಸೀಸ್‌ 11.50 ಕೋಟಿ ರೂ. ಸೇರಿ ಒಟ್ಟು ವರ್ಲ್ಡ್‌ ವೈಡ್‌ 40 ಕೋಟಿ ರೂ ಗಳಿಸಿರುವುದಾಗಿ Sacnilk ವರದಿ ಮಾಡಿದೆ. ಅದರಲ್ಲಿ ತಮಿಳುನಾಡಿನ ಪಾಲು ಹೆಚ್ಚಾಗಿದೆ. ಅಂದುಕೊಂಡಿದ್ದಕ್ಕಿಂದ ಕಡಿಮೆ ಕಲೆಕ್ಷನ್‌ ಮಾಡಿರುವುದು ಸೂರ್ಯ ಅಭಿಮಾನಿಗಳಿಗೆ ನಿರಾಸೆ ಉಂಟು ಮಾಡಿದೆ. ಆದರೆ ಚಿತ್ರತಂಡ ಮೊದಲ ದಿನ 58 ಕೋಟಿ ರೂ ಗಳಿಸಿರುವುದಾಗಿ ಹೇಳಿಕೊಂಡಿದೆ.
ಮೊದಲ ದಿನ ಬೆಂಗಳೂರಿನಲ್ಲಿ 15 ಶೋ
ಕಂಗುವಾಗೆ ಮೊದಲ ದಿನ ತಮಿಳುನಾಡಿನಲ್ಲಿ 37.25% ಆಕ್ಯುಪೆನ್ಸಿ ಇತ್ತು. ಅದರಲ್ಲಿ ಮಾರ್ನಿಂಗ್‌ ಶೋ 35.04%, ಮಧ್ಯಾಹ್ನದ ಶೋ 33.11%, ಸಂಜೆ ಶೋಗೆ 30.74% ಹಾಗೂ ನೈಟ್‌ ಶೋಗೆ 50.09% ಆಕ್ಯುಪೆನ್ಸಿ ಇತ್ತು. ಕರ್ನಾಟಕದಲ್ಲಿ ಮೈಸೂರಿನಲ್ಲಿ ಹೆಚ್ಚು ಮಂದಿ ಕಂಗುವಾ ಸಿನಿಮಾ ನೋಡಿದ್ಧಾರೆ. ನಂತರ ಹುಬ್ಬಳ್ಳಿ ಹಾಗೂ ಬೆಂಗಳೂರಿನಲ್ಲಿ ಕಂಗುವಾ ಸಿನಿಮಾವನ್ನು ಸಿನಿಪ್ರಿಯರು ನೋಡಿದ್ದಾರೆ. ಬೆಂಗಳೂರಿನಲ್ಲಿ ಮೊದಲ ದಿನ 15 ಶೋ ಇತ್ತು. ಕುಂದಾಪುರದಲ್ಲಿ 5 ಹಾಗೂ ಮೈಸೂರಿನಲ್ಲಿ 3 ಶೋಗಳಿತ್ತು. ಮುಂದಿನ ದಿನಗಳಲ್ಲಿ ಸಿನಿಮಾ ಯಾವ ರೀತಿ ಕಲೆಕ್ಷನ್‌ ಮಾಡಲಿದೆ ಕಾದು ನೋಡಬೇಕು.
100 ಕೋಟಿ ರೂ.ಗೆ ಡಿಜಿಟಲ್‌ ರೈಟ್ಸ್‌ ಮಾರಾಟ
ಕಂಗುವಾ ಚಿತ್ರವನ್ನು ಸ್ಟುಡಿಯೋ ಗ್ರೀನ್‌ ಹಾಗೂ ಯುವಿ ಕ್ರಿಯೇಷನ್ಸ್‌ ಬ್ಯಾನರ್‌ ಅಡಿ ಕೆಇ ಜ್ಞಾನವೇಲ್‌ ರಾಜ, ವಂಶಿ ಕೃಷ್ಣ ರೆಡ್ಡಿ ಹಾಗೂ ಪ್ರಮೋದ್‌ ಉಪ್ಪಾಲಪತಿ ಜೊತೆ ಸೇರಿ ನಿರ್ಮಿಸಿದ್ದಾರೆ. ಚಿತ್ರಕ್ಕೆ ಶಿವ, ಕಥೆ ಬರೆದು ನಿರ್ದೇಶನ ಮಾಡಿದ್ದಾರೆ. ಸಿನಿಮಾ ಹಾಡುಗಳಿಗೆ ತೆಲುಗಿನಲ್ಲಿ ಅನೇಕ ಹಿಟ್‌ ಹಾಡುಗಳನ್ನು ನೀಡಿರುವ ದೇವಿಶ್ರೀ ಪ್ರಸಾದ್‌ ಸಂಗೀತ ನೀಡಿದ್ದಾರೆ. ಕೆವಿಎನ್‌ ಪ್ರೊಡಕ್ಷನ್ಸ್‌ , ಕರ್ನಾಟಕದಲ್ಲಿ ಕಂಗುವಾ ಚಿತ್ರವನ್ನು ಹಂಚಿಕೆ ಮಾಡಿದೆ. ಚಿತ್ರದಲ್ಲಿ ಸೂರ್ಯ ವಿರುದ್ಧ ಬಾಬಿ ಡಿಯೋಲ್‌ ನಟಿಸಿದ್ದಾರೆ. ಉಳಿದಂತೆ ದಿಶಾ ಪಟಾನಿ, ರವಿಕುಮಾರ್‌, ಯೋಗಿಬಾಬು, ಕೋವೈ ಸರಳ, ಬೋಸ್‌ ವೆಂಕಟ್‌ ಹಾಗೂ ಇನ್ನಿತರರು ಚಿತ್ರದಲ್ಲಿ ನಟಿಸಿದ್ದಾರೆ. ಸಿನಿಮಾ ಒಟಿಟಿ ರೈಟ್ಸ್‌ ಅಮೆಜಾನ್‌ ಪ್ರೈಮ್‌ ವಿಡಿಯೋಗೆ 100 ಕೋಟಿ ರೂ. ಸೇಲ್‌ ಆಗಿದ್ದು ಡಿಸೆಂಬರ್‌ 3ನೇ ವಾರ ಸ್ಟ್ರೀಮ್‌ ಆಗುವ ಸಾಧ್ಯತೆ ಇದೆ.