ನನ್ನ ಸಿನಿಮಾಗೆ ಪ್ರಚಾರ ಸಿಗುತ್ತೆ ನೀನು ಸೂಸೈಡ್‌ ಮಾಡ್ಕೊ ಅಂತ ಡಾಲಿ ಧನಂಜಯ್‌ಗೆ ಹೇಳಿದ ಆ ನಿರ್ದೇಶಕ ಯಾರು? ಹಳೆ ವಿಡಿಯೋ ವೈರಲ್
Nov 09, 2024 03:19 PM IST
Share
ಡಾಲಿ ಧನಂಜಯ್‌ ಹಳೆಯ ವಿಡಿಯೋ ವೈರಲ್
ಡೈರೆಕ್ಟರ್‌ ಸ್ಪೆಷಲ್‌ ಸಿನಿಮಾ ಸಮಯದಲ್ಲಿ ತಮಗೆ ಆದ ಕಹಿ ಘಟನೆಯನ್ನು ಧನಂಜಯ್‌ ಹೇಳಿಕೊಂಡಿರುವ ಹಳೆ ವಿಡಿಯೋವೊಂದು ವೈರಲ್ ಆಗುತ್ತಿದೆ. ನೀನು ಸೂಸೈಡ್‌ ಮಾಡಿಕೋ ಇದರಿಂದ ನಮ್ಮ ಸಿನಿಮಾಗೆ ಪ್ರಚಾರ ದೊರೆಯುತ್ತದೆ ಎಂದು ಒಬ್ಬರು ಹೇಳಿದ್ದಾಗಿ ಡಾಲಿ ಹೇಳಿದ್ದಾರೆ. ಹಾಗೆ ಹೇಳಿದ್ದು ನಿರ್ದೇಶಕ ಗುರುಪ್ರಸಾದ್ ಎಂದು ನೆಟಿಜನ್ಸ್ ಹೇಳುತ್ತಿದ್ದಾರೆ.
ಮಠ ಸಿನಿಮಾ ಖ್ಯಾತಿಯ ಗುರುಪ್ರಸಾದ್ ಅಗಲಿ 6 ದಿನಗಳು ಕಳೆದಿವೆ. ಕಳೆದ ಭಾನುವಾರ ಗುರುಪ್ರಸಾದ್ ಮೃತದೇಹ ಅವರ ಅಪಾರ್ಟ್‌ಮೆಂಟ್‌ನಲ್ಲಿ ನೇಣುಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿತ್ತು. ನವೆಂಬರ್‌ 2 ರಂದು ಅವರ ಬರ್ತ್‌ಡೇ ಆದ್ದರಿಂದ ಎಲ್ಲರೂ ಅವರಿಗೆ ವಿಶ್‌ ಮಾಡಲು ಸಂಪರ್ಕ ಮಾಡಿದರೂ ಅವರು ಯಾರ ಕರೆಯನ್ನೂ ಸ್ವೀಕರಿಸಿರಲಿಲ್ಲ. ಅಪಾರ್ಟ್‌ಮೆಂಟ್‌ನಲ್ಲಿ ವಾಸನೆ ಬರುತ್ತಿದ್ದರಿಂದ ಅನುಮಾನ ಬಂದು ನೋಡಿದಾಗ ಅವರು ನೇಣು ಬಿಗಿದುಕೊಂಡಿರುವುದು ಬೆಳಕಿಗೆ ಬಂದಿದೆ.
ಡೈರೆಕ್ಟರ್‌ ಸ್ಪೆಷಲ್‌ ಸಿನಿಮಾ ಸಮಯದಲ್ಲಿ ನಡೆದ ಘಟನೆ
ಗುರುಪ್ರಸಾದ್ ಅವರಂಥ ನಿರ್ದೇಶಕ ಈ ರೀತಿ ಬದುಕನ್ನು ಅಂತ್ಯಗೊಳಿಸಿಕೊಂಡಿದ್ದು ನಿಜಕ್ಕೂ ಬೇಸರದ ಸಂಗತಿ. ಗುರುಪ್ರಸಾದ್ ಬಗ್ಗೆ ನಟ ಜಗ್ಗೇಶ್‌ ಆಡಿದ ಮಾತುಗಳು ಟ್ರೋಲ್‌ ಆಗುತ್ತಿದೆ. ಈ ನಡುವೆ ಡಾಲಿ ಧನಂಜಯ್‌ ಡೈರೆಕ್ಟರ್‌ ಸ್ಪೆಷಲ್‌ ಸಿನಿಮಾ ಬಗ್ಗೆ ಮಾತನಾಡಿ ಬೇಸರ ವ್ಯಕ್ತಪಡಿಸಿರುವ ಹಳೆಯ ವಿಡಿಯೋವೊಂದು ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್ ಆಗುತ್ತಿದೆ.
ಕಾರಿನಲ್ಲಿ ಕುಳಿತು ಸೆಲ್ಫಿ ವಿಡಿಯೋ ಮಾಡಿರುವ ಧನಂಜಯ್‌, ನಾನು ಪ್ರತಿಯೊಂದು ವಿಚಾರವನ್ನ ಹೇಳಲು ಇಷ್ಟಪಡುವುದಿಲ್ಲ. ನಿಮ್ಮಿಂದ ಆದ ಒಂದೇ ಒಂದು ಕೆಟ್ಟ ಅನುಭವವನ್ನು ಇಲ್ಲಿ ಹೇಳಿಕೊಳ್ಳಲು ಬಯಸುತ್ತೇನೆ. ಕನ್ನಡದ ಕೋಟ್ಯಧಿಪತಿ ಕಾರ್ಯಕ್ರಮಕ್ಕಾಗಿ ನೀವು ಚೆನ್ನೈಗೆ ಹೋಗುತ್ತಿದ್ದೀರಿ. ಆಗ ಡೈರೆಕ್ಟರ್‌ ಸ್ಪೆಷಲ್‌ ಚಿತ್ರದ ಒಂದೇ ಒಂದು ಹಾಡಿನ ಒಂದು ಶಾಟ್‌ನಲ್ಲಿ ನಾನು ನಟಿಸಬೇಕಿತ್ತು. ಅದೊಂದು ಶಾಟ್‌ಗಾಗಿ ಗಡ್ಡ, ಮೀಸೆ ಬಿಟ್ಟುಕೊಂಡು 8 ತಿಂಗಳು ಕಾದಿದ್ದೆ. ನೀವು ಚೆನ್ನೈನಿಂದ ವಾಪಸ್‌ ಆದ ನಂತರ ನಿಮ್ಮ ಬಳಿ ಬಂದು ಗುರುಗಳೇ ನನಗೆ ಬಹಳ ಹಿಂಸೆ ಆಗುತ್ತಿದೆ, ಗಡ್ಡ ಕೂದಲು ಬಿಟ್ಟು 4-5 ವರ್ಷ ಆಯ್ತು , ದಯವಿಟ್ಟು ಅದೊಂದು ಹಾಡಿನ ಶೂಟಿಂಗ್‌ ಮುಗಿಸಿಕೊಡಿ ಎಂದು ಕೇಳಿದ್ದಕ್ಕೆ ಹಿಂಸೆ ಆಗ್ತಿದ್ಯಾ ಧನಂಜಯ್‌, ಹಾಗಾದ್ರೆ ಸೂಸೈಡ್‌ ಮಾಡ್ಕೊಳಿ ನನ್ನ ಸಿನಿಮಾಗೆ ಪ್ರಚಾರ ಸಿಗುತ್ತೆ ಎಂದು ಹೇಳಿದ್ರಿ.
ಆ ನಿರ್ದೇಶನ ಗುರುಪ್ರಸಾದ್ ಎಂದ ನೆಟಿಜನ್ಸ್
ಅವತ್ತು ನಾನು ನಕ್ಕು ನಿಮ್ಮ ಆಫೀನಿಂದ ಹೊರ ಬಂದವನು ಮತ್ತೆ ನಿಮ್ಮ ಆಫೀಸ್‌ ಕಡೆ ಬರಲೇ ಇಲ್ಲ. ಅದಾದ ನಂತರ ಮತ್ತೆ ನಾನು ಆಫೀಸಿಗೆ ಬಂದಿದ್ದು ನೀವಾಗಿ ನೀವೇ ಎರಡನೇ ಸಲ ಕರೆದ ನಂತರ. ಅವತ್ತು ನಿಮ್ಮ ಮಾತು ಕೇಳಿ ಹೊರ ಹೋದ ನಂತರ ಜಯನಗರ 4th ಬ್ಲಾಕ್‌ ಸಿನಿಮಾ ಮಾಡಿದೆ. ಅದು ಆಗಿದ್ದು ನಿಮ್ಮಿಂದಲೇ. ಅದಕ್ಕೆ ನಿಮಗೆ ಥ್ಯಾಂಕ್ಸ್‌ ಹೇಳಬೇಕು ಎಂದು ಧನಂಜಯ್‌ ಹೇಳಿದ್ದಾರೆ. ಈ ವಿಡಿಯೋದಲ್ಲಿ ಧನಂಜಯ್‌ ಗುರುಪ್ರಸಾದ್ ಹೆಸರನ್ನು ಹೇಳದಿದ್ದರೂ, ನೆಟಿಜನ್ಸ್ ಮಾತ್ರ ಆ ನಿರ್ದೇಶಕ ಗುರುಪ್ರಸಾದ್ ಎನ್ನುತ್ತಿದ್ದಾರೆ.
ಧನಂಜಯ್‌ ಗುರುಪ್ರಸಾದ್ ನಿರ್ದೇಶನದ ಡೈರೆಕ್ಟರ್‌ ಸ್ಪೆಷಲ್‌ ಸಿನಿಮಾ ಮೂಲಕ ಕರಿಯರ್‌ ಆರಂಭಿಸಿದರು. ಧನಂಜಯ್‌ ನಿರ್ಮಾಣದ ಬಡವ ರಾಸ್ಕಲ್‌ ಸಿನಿಮಾದಲ್ಲಿ ಗುರುಪ್ರಸಾದ್ ಅತಿಥಿ ಪಾತ್ರದಲ್ಲಿ ನಟಿಸಿದ್ದರು. ಗುರುಪ್ರಸಾದ್ ನಿಧನರಾದಾಗ ಅವರ ಅಂತ್ಯಸಂಸ್ಕಾರದಲ್ಲಿ ಪಾಲ್ಗೊಂಡು ಧನಂಜಯ್‌ ಬೇಸರ ವ್ಯಕ್ತಪಡಿಸಿದ್ದರು.