ಶುಕ್ರವಾರ ತೆರೆಗೆ ಬರ್ತಿದೆ ಅಪ್ಪುಡೋ ಇಪ್ಪುಡೋ ಎಪ್ಪುಡೋ ಸಿನಿಮಾ; ತೆಲುಗು ಸಿನಿರಸಿಕರ ಹೃದಯಕ್ಕೆ ಲಗ್ಗೆ ಇಡ್ತಾರಾ ರುಕ್ಮಿಣಿ ವಸಂತ್‌?
Nov 07, 2024 02:21 PM IST
Share
ನಿಖಿಲ್‌ ಸಿದ್ದಾರ್ಥ್‌ ಜೊತೆ ರುಕ್ಮಿಣಿ ವಸಂತ್‌ ನಟಿಸಿರುವ ಅಪ್ಪುಡೋ ಇಪ್ಪುಡೋ ಎಪ್ಪುಡೋ ತೆಲುಗು ಸಿನಿಮಾ ನವೆಂಬರ್‌ 8 ಶುಕ್ರವಾರ ರಿಲೀಸ್‌ ಆಗುತ್ತಿದೆ
ನಿಖಿಲ್‌ ಸಿದ್ದಾರ್ಥ್‌ ಜೊತೆ ನಾಯಕಿಯಾಗಿ ನಟಿಸಿರುವ ರುಕ್ಮಿಣಿ ವಸಂತ್‌ ಮೊದಲ ತೆಲುಗು ಸಿನಿಮಾ ಅಪ್ಪುಡೋ ಇಪ್ಪುಡೋ ಎಪ್ಪುಡೋ ಸಿನಿಮಾ ನವೆಂಬರ್‌ 8 ಶುಕ್ರವಾರ ರಿಲೀಸ್‌ಗೆ ಸಿದ್ದವಾಗಿದೆ. ಚಿತ್ರವನ್ನು ಬಿವಿಎಸ್‌ಎನ್‌ ಪ್ರಸಾದ್‌ ನಿರ್ಮಿಸಿದ್ದು ಸುಧೀರ್‌ ವರ್ಮಾ ನಿರ್ದೇಶನ ಮಾಡಿದ್ದಾರೆ.
ಕನ್ನಡ ಚಿತ್ರರಂಗದಿಂದ ಕೆರಿಯರ್‌ ಅರಂಭಿಸಿದ ಅನೇಕ ಕನ್ನಡ ತಾರೆಯರು ಈಗ ಪರಭಾಷೆಯಲ್ಲಿ ಮಿಂಚುತ್ತಿದ್ದಾರೆ. ಆಶಿಕಾ ರಂಗನಾಥ್‌, ರಶ್ಮಿಕಾ ಮಂದಣ್ಣ, ಶ್ರೀಲೀಲಾ ಸೇರಿದಂತೆ ಅನೇಕ ನಟಿಯರು ಈಗ ತೆಲುಗು, ತಮಿಳಿನಲ್ಲಿ ಬ್ಯುಸಿ ಇದ್ದಾರೆ. ಇದೀಗ ಈ ರೇಸ್‌ನಲ್ಲಿ ರುಕ್ಮಿಣಿ ವಸಂತ್‌ ಸೇರಿದ್ದಾರೆ. ರುಕ್ಮಿಣಿ ವಸಂತ್‌ ನಟನೆಯ ಮೊದಲ ತೆಲುಗು ಸಿನಿಮಾ ನವೆಂಬರ್‌ 8, ಶುಕ್ರವಾರ ರಿಲೀಸ್‌ ಆಗುತ್ತಿದೆ.
ಬೀರಬಲ್‌ ಸಿನಿಮಾ ಮೂಲಕ ಎಂಟ್ರಿ ಕೊಟ್ಟ ರುಕ್ಮಿಣಿ ವಸಂತ್‌
ರುಕ್ಮಿಣಿ ವಸಂತ್‌ 2019ರಲ್ಲಿ ತೆರೆ ಕಂಡ ಬೀರಬಲ್‌ ಚಿತ್ರದ ಮೂಲಕ ನಟಿಯಾಗಿ ಸಿನಿಮಾರಂಗಕ್ಕೆ ಎಂಟ್ರಿ ಕೊಟ್ಟರು. ಎಂಜಿ ಶ್ರೀನಿವಾಸ್‌ಗೆ ಜೋಡಿಯಾಗಿ ನಟಿಸಿದ್ದರು. ನಂತರ ರಕ್ಷಿತ್‌ ಶೆಟ್ಟಿ ಅಭಿನಯದ ಸಪ್ತ ಸಾಗರದಾಚೆ ಎಲ್ಲೋ ಸಿನಿಮಾ ಮೂಲಕ ಗಮನ ಸೆಳೆದರು. ಗಣೇಶ್‌ ಜೊತೆ ಬಾನ ದಾರಿಯಲ್ಲಿ ಸಿನಿಮಾ ರಿಲೀಸ್‌ ಬಳಿಕ ಶ್ರೀಮುರಳಿ ಜೊತೆ ಬಘೀರ ಸಿನಿಮಾದಲ್ಲಿ ರೋರಿಂಗ್‌ ಸ್ಟಾರ್‌ಗೆ ನಾಯಕಿಯಾಗಿ ಎಂಟ್ರಿ ಕೊಟ್ಟರು. ಬ್ಯಾಕ್‌ ಟು ಬ್ಯಾಕ್‌ ಸಿನಿಮಾಗಳಲ್ಲಿ ಬ್ಯುಸಿ ಇರುವ ರುಕ್ಮಿಣಿ ವಸಂತ್‌ ಶಿವರಾಜ್‌ಕುಮಾರ್‌ ಜೊತೆ ಭೈರತಿ ರಣಗಲ್‌ ಸಿನಿಮಾದಲ್ಲಿ ಕೂಡಾ ನಟಿಸಿದ್ದಾರೆ. ಕನ್ನಡದ ಜೊತೆ ಈ ಚೆಲುವೆ ತಮಿಳ, ತೆಲುಗು ಸಿನಿಮಾಗಳಲ್ಲಿ ಕೂಡಾ ಬ್ಯುಸಿಯಾಗಿದ್ದಾರೆ.
ರುಕ್ಮಿಣಿ ವಸಂತ್‌ ಅಭಿನಯದ ಮೂರು ಸಿನಿಮಾಗಳು ಬ್ಯಾಕ್‌ ಟು ಬ್ಯಾಕ್‌ ರಿಲೀಸ್‌ ಆಗುತ್ತಿವೆ. ಅಕ್ಟೋಬರ್‌ 31ಕ್ಕೆ ಬಘೀರ ರಿಲೀಸ್‌ ಆಗಿತ್ತು. ನವೆಂಬರ್‌ 8 ರಂದು ತೆಲುಗು ಸಿನಿಮಾ ಅಪ್ಪುಡೋ ಇಪ್ಪುಡೋ ಎಪ್ಪುಡೋ ರಿಲೀಸ್‌ ಆಗುತ್ತಿದ್ದರೆ, ಮುಂದಿನ ವಾರ ನವೆಂಬರ್‌ 15ಕ್ಕೆ ಭೈರತಿ ರಣಗಲ್‌ ರಿಲೀಸ್‌ ಆಗುತ್ತಿದೆ. ಈ ಮೂಲಕ ರುಕ್ಮಿಣಿ ವಸಂತ್‌ ಹ್ಯಾಟ್ರಿಕ್‌ ಹೀರೋಯಿನ್‌ ಎನಿಸಿಕೊಂಡಿದ್ದಾರೆ. ಸತತ ಮೂರು ವಾರಗಳು ಒಂದರ ಹಿಂದೆ ಒಂದರಂತೆ ರುಕ್ಮಿಣಿ ವಸಂತ್‌ ಸಿನಿಮಾಗಳು ರಿಲೀಸ್‌ ಆಗುತ್ತಿವೆ.
ನಿಖಿಲ್‌ ಸಿದ್ದಾರ್ಥ್‌ಗೆ ಜೋಡಿಯಾದ ರುಕ್ಮಿಣಿ
ಅಪ್ಪುಡೋ ಇಪ್ಪುಡೋ ಎಪ್ಪುಡೋ ಸಿನಿಮಾ ಟ್ರೇಲರ್‌ 2 ದಿನಗಳ ಹಿಂದೆ ರಿಲೀಸ್‌ ಆಗಿತ್ತು. ಈ ಚಿತ್ರದಲ್ಲಿ ರುಕ್ಮಿಣಿ ವಸಂತ್‌, ನಿಖಿಲ್‌ ಸಿದ್ದಾರ್ಥ್‌ ಜೋಡಿಯಾಗಿ ನಟಿಸಿದ್ದಾರೆ. ಚಿತ್ರವನ್ನು ಬಿವಿಎಸ್‌ಎನ್‌ ಪ್ರಸಾದ್‌ ನಿರ್ಮಿಸಿದ್ದು ಸುಧೀರ್‌ ವರ್ಮಾ ನಿರ್ದೇಶನ ಮಾಡಿದ್ದಾರೆ. ಚಿತ್ರದ ಹಾಡುಗಳಿಗೆ ಕಾರ್ತಿಕ್‌ ಸಂಗೀತ ನೀಡಿದ್ದಾರೆ. ಈ ಸಿನಿಮಾ ಬಹುತೇಕ ವಿದೇಶದಲ್ಲಿ ಶೂಟಿಂಗ್‌ ಆಗಿದ್ದು ರುಕ್ಮಿಣಿ ವಸಂತ್‌, ತಾರಾ ಹೆಸರಿನ ಪಾತ್ರದಲ್ಲಿ ನಟಿಸಿದ್ದಾರೆ. ಸದ್ಯಕ್ಕೆ ರುಕ್ಮಿಣಿ ಹೈದರಾಬಾದ್‌ನಲ್ಲಿದ್ದು ಸಿನಿಮಾ ಪ್ರಚಾರ ಕಾರ್ಯದಲ್ಲಿ ಬ್ಯುಸಿಯಾಗಿದ್ದಾರೆ. ಅಪ್ಪುಡೋ ಇಪ್ಪುಡೋ ಎಪ್ಪುಡೋ ಸಿನಿಮಾದಲ್ಲಿ ನಿಖಿಲ್‌, ರುಕ್ಮಿಣಿ ಜೊತೆ ವಿವಾ ಹರ್ಷ, ದಿವ್ಯಾನ್ಷ ಕೌಶಿಕ್‌ ಹಾಗೂ ಇನ್ನಿತರರು ನಟಿಸಿದ್ದಾರೆ.
ರೇಸರ್‌ ಆಗಬೇಕೆಂಬ ಕನಸು ಕಾಣುವ ನಾಯಕ ಅದಕ್ಕಾಗಿ ದುಡ್ಡು ಸಂಪಾದಿಸಲು ಏನೆಲ್ಲಾ ಕೆಲಸ ಮಾಡುತ್ತಾನೆ, ಅದರಿಂದ ಅವನು ಎದುರಿಸುವ ಸಮಸ್ಯೆಗಳೇನು? ಕೊನೆಗೆ ಆ ಸಮಸ್ಯೆಯಿಂದ ಹೇಗೆ ಹೊರ ಬರುತ್ತಾನೆ ಅನ್ನೋದು ಸಿನಿಮಾ ಕಥೆ. ಇದನ್ನು ಹೊರತುಪಡಿಸಿ ರುಕ್ಮಿಣಿ ವಸಂತ್‌ ಏಸ್‌ , ಶಿವಕಾರ್ತಿಕೇಯನ್‌ ಜೊತೆ 2 ತಮಿಳು ಸಿನಿಮಾಗಳಲ್ಲಿ ಬ್ಯುಸಿ ಇದ್ದಾರೆ. ತೆಲುಗು ಸಿನಿಮಾ ಪ್ರೇಕ್ಷಕರನ್ನು ರುಕ್ಮಿಣಿ ವಸಂತ್‌ ಹೇಗೆ ಮೋಡಿ ಮಾಡಲಿದ್ದಾರೆ ಕಾದು ನೋಡಬೇಕು.