ಸಂಗೀತಾ ಶೃಂಗೇರಿ ದೀದಿ ಜೊತೆ ಮೈಸೂರು ಸುತ್ತಾಡಿದ ಡ್ರೋನ್‌ ಪ್ರತಾಪ್; ಇಗ್ವಾನ ಅನಕೊಂಡ ಹಿಡಿದು ಖುಷಿ ಪಟ್ಟ ಬಿಗ್‌ಬಾಸ್‌ ಮಾಜಿ ಸ್ಪರ್ಧಿಗಳು
ಸಂಗೀತ ಶೃಂಗೇರಿ ಹಾಗೂ ಡ್ರೋನ್‌ ಪ್ರತಾಪ್ ಮೈಸೂರು ಪ್ಲಾನೆಟ್‌ ಅರ್ತ್‌ ಅಕ್ವೇರಿಯಂ ಹಾಗೂ ಚಾಮುಂಡಿ ಬೆಟ್ಟಕ್ಕೆ ಭೇಟಿ ನೀಡಿದ್ದಾರೆ. ಅಕ್ವೇರಿಯಂನಲ್ಲಿ ಇಗ್ವಾನ ಅನಕೊಂಡ ಹಿಡಿದು ಫೋಟೋಗೆ ಪೋಸ್‌ ಕೊಟ್ಟಿದ್ದಾರೆ. ಈ ವಿಡಿಯೋವನ್ನು ಪ್ರತಾಪ್ ತಮ್ಮ ಯೂಟ್ಯೂಬ್‌ನಲ್ಲಿ ಹಂಚಿಕೊಂಡಿದ್ದಾರೆ.
ಬಿಗ್‌ಬಾಸ್‌ ಸೀಸನ್‌ 10 ಸ್ಪರ್ಧಿಗಳು ಮನೆಯಿಂದ ಹೊರ ಬಂದ ನಂತರವೂ ಒಬ್ಬರಿಗೊಬ್ಬರು ಆಗ್ಗಾಗ್ಗೆ ಭೇಟಿಯಾಗುತ್ತಲೇ ಇರುತ್ತಾರೆ. ತನಿಷಾ ಕುಪ್ಪಂಡ ತಾವು ಹೊಸದಾಗಿ ಆರಂಭಿಸಿದ್ದ ಜ್ಯುವೆಲರಿ ಶಾಪ್‌ ಓಪನಿಂಗ್‌ ಕಾರ್ಯಕ್ರಮಕ್ಕೆ ಎಲ್ಲಾ ಸ್ಪರ್ಧಿಗಳು ಜೊತೆ ಸೇರಿದ್ದರು. ಇದೀಗ ಸಂಗೀತ ಶೃಂಗೇರಿ ಹಾಗೂ ಡ್ರೋಣ್‌ ಪ್ರತಾಪ್ ಮೈಸೂರಿನಲ್ಲಿ ಭೇಟಿ ಆಗಿದ್ದಾರೆ.
ಮೈಸೂರಿನ ಪ್ಲಾನೆಟ್‌ ಅರ್ತ್‌ ಅಕ್ವೇರಿಯಂ ಭೇಟಿ
ಸಂಗೀತ ಹಾಗೂ ಪ್ರತಾಪ್ ಇಬ್ಬರೂ ಮೈಸೂರಿನ ಬಸ್ತಿಪುರ ಗ್ರಾಮದ ಬಳಿ ಇರುವ ಪ್ಲಾನೆಟ್‌ ಅರ್ತ್‌ ಅಕ್ವೇರಿಯಂಗೆ ಒಟ್ಟಿಗೆ ಭೇಟಿ ಕೊಟ್ಟಿದ್ದಾರೆ. ಇದಕ್ಕೂ ಮುನ್ನ ಸಂಗೀತ ಶೃಂಗೇರಿ ಈ ಸ್ಥಳಕ್ಕೆ ಭೇಟಿ ಕೊಟ್ಟಿದ್ದರು. ಇದೀಗ ಅವರು ಪ್ರತಾಪ್ ಅವರನ್ನು ಈ ಜಾಗಕ್ಕೆ ಕರೆ ತಂದಿದ್ದಾರೆ. ಈ ಅಕ್ವೇರಿಯಂನಲ್ಲಿ ವಿಧ ವಿಧವಾದ ಮೀನುಗಳನ್ನು ನೋಡಬಹುದು. ಇಷ್ಟ ಪಟ್ಟಲ್ಲಿ ಅನಕೊಂಡ, ಇಗ್ವಾನ, ಅಂಬ್ರೆಲಾ ಕೊಕಟೊ ಹಿಡಿದು ಫೋಟೋ ತೆಗೆಸಿಕೊಳ್ಳಬಹುದು. ಜೊತೆಗೆ ಇಲ್ಲಿ ಪೆನ್ಸಿಲ್‌ ಆರ್ಟ್‌ ಕೂಡಾ ನೋಡಬಹುದು. ಸುಮಾರು 3 ವರ್ಷಗಳ ಹಿಂದೆ ಆರಂಭವಾದ ಈ ಅಕ್ವೇರಿಯಂಗೆ ಪ್ರತಿದಿನ ನೂರಾರು ಪ್ರವಾಸಿಗರು ಭೇಟಿ ನೀಡುತ್ತಾರೆ.
ಅನಕೊಂಡ ಹಿಡಿದ ಸಂಗೀತ ಬಳಿ ಹೋಗಲೂ ಹೆದರಿದ ಪ್ರತಾಪ್
ಅಕೇರಿಯಂಗೆ ಬಂದ ಸಂಗೀತಾ ಶೃಂಗೇರಿ ಹಾಗೂ ಪ್ರತಾಪ್ ಜೊತೆ ಜನರು ಫೋಟೋ ತೆಗೆಸಿಕೊಂಡರು. ಸಂಗೀತ ಧೈರ್ಯವಾಗಿ ಅನಕೊಂಡ, ಇಗ್ವಾನ ಹಿಡಿದು ಫೋಟೋಗೆ ಪೋಸ್‌ ಕೊಟ್ಟರೆ ಪ್ರತಾಪ್ ಮಾತ್ರ ಭಯದಿಂದ ದೂರವೇ ನಿಂತಿದ್ದರು. ಏನೂ ಆಗುವುದಿಲ್ಲ ಬಾ, ಹಿಡಿದು ಕೋ ನಾನಿದ್ದೀನಿ, ಭಯ ಪಡಬೇಡ ಎಂದು ಸಂಗೀತ ಎಷ್ಟು ಹೇಳಿದರೂ ಪ್ರತಾಪ್ ಅನಕೊಂಡ ಬಳಿ ಕೂಡಾ ಹೋಗಲೇ ಇಲ್ಲ. ಅಂಬ್ರೆಲಾ ಕೊಕಟೊವನ್ನು ಮಾತ್ರ ಧೈರ್ಯದಿಂದ ಹಿಡಿದಿದ್ದರು. ಬಾತುಕೋಳಿಗಳಿಗೆ ತಿಂಡಿ ಕೊಟ್ಟು ಖುಷಿ ಪಟ್ಟರು. ಹಸುಕರುವನ್ನು ನೋಡಿ ಮುದ್ದಾಡಿದರು. ಇದಾದ ನಂತರ ಇಬ್ಬರೂ ಚಾಮುಂಡಿ ಬೆಟ್ಟಕ್ಕೆ ಭೇಟಿ ನೀಡಿ ದೇವಿ ದರ್ಶನ ಪಡೆದರು. ಈ ವಿಡಿಯೋವನ್ನು ಪ್ರತಾಪ್ ತಮ್ಮ ಯೂಟ್ಯೂಬ್‌ ಚಾನೆಲ್‌ನಲ್ಲಿ ಹಂಚಿಕೊಂಡಿದ್ದಾರೆ.
ಕಿರುತೆರೆಯಿಂದ ವೃತ್ತಿ ಆರಂಭಿಸಿದ್ದ ಸಂಗೀತ ಶೃಂಗೇರಿ
ಸಿನಿಮಾಗೆ ಬರುವ ಮುನ್ನ ಸಂಗೀತ ಕಿರುತೆರೆಯಲ್ಲಿ ಸಕ್ರಿಯರಾಗಿದ್ದರು. 2016 ರಲ್ಲಿ ಸ್ಟಾರ್‌ ಸುವರ್ಣದಲ್ಲಿ ಪ್ರಸಾರವಾಗುತ್ತಿದ್ದ ಹರ ಹರ ಮಹಾದೇವ ಧಾರಾವಾಹಿಯಲ್ಲಿ ಸಂಗೀತಾ ಸತಿಯಾಗಿ ನಟಿಸಿದ್ದರು. ಸಂಗೀತ ಶೃಂಗೇರಿ 2018ರಲ್ಲಿ ತೆರೆ ಕಂಡ ಎ+ ಸಿನಿಮಾ ಮೂಲಕ ಚಿತ್ರರಂಗಕ್ಕೆ ಬಂದರು. 2022ರಲ್ಲಿ ತೆರೆ ಕಂಡ 777 ಚಾರ್ಲಿ ಚಿತ್ರದಲ್ಲಿ ರಕ್ಷಿತ್‌ ಶೆಟ್ಟಿ ಜೊತೆ ನಟಿಸಿದ್ದರು. ಕಳೆದ ವರ್ಷ ತೆರೆ ಕಂಡ ಶಿವಾಜಿ ಸುರತ್ಕಲ್‌ ಸಿನಿಮಾದಲ್ಲಿ ಕೂಡಾ ಸಂಗೀತ ನಟಿಸಿದ್ದಾರೆ. ಇತ್ತೀಚೆಗೆ ಸಂಗೀತ ಅಭಿನಯದ ಮಾರಿಗೋಲ್ಡ್‌ ಸಿನಿಮಾ ತೆರೆ ಕಂಡಿತ್ತು.
ಇನ್ನು ಡ್ರೋನ್‌ ಪ್ರತಾಪ್ ತಮ್ಮದೇ ಸ್ವಂತ ಕಂಪನಿ ಹೊಂದಿದ್ದಾರೆ. ಡ್ರೋನ್‌ ವಿಚಾರದಲ್ಲಿ ಬಹಳ ಟ್ರೋಲ್‌ ಆಗಿದ್ದ ಪ್ರತಾಪ್ ಇತ್ತೀಚೆಗೆಷ್ಟೇ ಡ್ರೋನ್‌ ತಯಾರಿಸಿ ಎಲ್ಲರಿಂದ ಮೆಚ್ಚುಗೆ ಗಳಿಸಿದ್ದರು.
