ಹೋ ಬೆಳಕು...ಇದು ಬರೀ ಬೆಳಕಲ್ಲ, ದರ್ಶನ! ಬೆಳಕಿನ ಹಬ್ಬ ದೀಪಾವಳಿಗೆ ಕಾಂತಾರ ಝಲಕ್ ನೀಡುವರೇ ರಿಷಬ್‌ ಶೆಟ್ಟಿ
Oct 26, 2024 09:46 AM IST
Share
ಬೆಳಕಿನ ಹಬ್ಬ ದೀಪಾವಳಿಗೆ ಕಾಂತಾರ ಝಲಕ್ ನೀಡುವರೇ ರಿಷಬ್‌ ಶೆಟ್ಟಿ
- ಬೆಳಕಿನ ಹಬ್ಬ ದೀಪಾವಳಿಯ ಸಮಯದಲ್ಲಿ ಕಾಂತಾರ ಚಾಪ್ಟರ್‌ 1ರ ಗ್ಲಿಂಪ್ಸ್‌ ಅಥವಾ ಝಳಕು ನೀಡುವರೇ ರಿಷಬ್‌ ಶೆಟ್ಟಿ? ಕಾಂತಾರ ಫ್ರೀಕ್ವೆಲ್‌ನ ಮೊದಲ ಫಸ್ಟ್‌ ಲುಕ್‌ ನೀಡಿ ಒಂದು ವರ್ಷವಾಗುತ್ತ ಬಂತು. ಈ ಸಮಯದಲ್ಲಿ ಸಿನಿಮಾ ಅಭಿಮಾನಿಗಳಿಗೆ ರಿಷಬ್‌ ಶೆಟ್ಟಿ ಕಡೆಯಿಂದ ಏನಾದರೂ ಶುಭ ಸುದ್ದಿ ಇರಬಹುದೇ? ಎಂಬ ಕುತೂಹಲವಿದೆ.
ಕಾಂತಾರ ಸಿನಿಮಾದ ಮೂಲಕ ರಿಷಬ್‌ ಶೆಟ್ಟಿ ಕರ್ನಾಟಕ ಮಾತ್ರವಲ್ಲದೆ ದೇಶ-ವಿದೇಶದ ಪ್ರೇಕ್ಷಕರನ್ನು ರಿಷಬ್‌ ಶೆಟ್ಟಿ ಸೆಳೆದಿದ್ದರು. ಇದೇ ಯಶಸ್ಸಿನಿಂದ ಕಾಂತಾರ ಚಾಪ್ಟರ್‌ 1 ಘೋಷಿಸಲಾಗಿತ್ತು. ಅಂದರೆ, ಕಾಂತಾರ ಸಿನಿಮಾದ ಹಿಂದಿನ ಅಧ್ಯಾಯದ ಶೂಟಿಂಗ್‌ ಇದೀಗ ಭರದಿಂದ ಸಾಗಿದೆ. ಕಳೆದ ವರ್ಷ ನವೆಂಬರ್‌ 27ರಂದು ಕಾಂತಾರದ ಮುಂದಿನ ಅಧ್ಯಾಯದ ಫಸ್ಟ್‌ ಲುಕ್‌ ಬಿಡುಗಡೆಯಾಗಿತ್ತು. ಅಂದರೆ, ಶೆಟ್ರು ಕಾಂತಾರ ಅಪ್‌ಡೇಟ್‌ ನೀಡಿ ಹನ್ನೊಂದು ತಿಂಗಳಾಯ್ತು. ಈ ಬೆಳಕಿನ ಹಬ್ಬ ದೀಪಾವಳಿ ಸಮಯದಲ್ಲ "ಹೋ ಬೆಳಕು...ಇದು ಬರೀ ಬೆಳಕಲ್ಲ ಬೆಳಕಲ್ಲ, ದರ್ಶನ!" ಎಂದು ಕಾಂತಾರದ ಸೆಕೆಂಡ್ ಲುಕ್‌ ಬರಬಹುದೇ?
ದೀಪಾವಳಿ ಹಬ್ಬದ ಸಮಯದಲ್ಲಿ ಕಾಂತಾರ ಗ್ಲಿಂಪ್ಸ್‌ ಬಿಡುಗಡೆಯಾಗುವ ಕುರಿತು ಚಿತ್ರತಂಡದ ಕಡೆಯಿಂದ ಯಾವುದೇ ಅಪ್‌ಡೇಟ್‌ ಬಂದಿಲ್ಲ. ಕಳೆದ ಕೆಲವು ತಿಂಗಳಿನಿಂದ ಕಾಂತಾರದ ಕುರಿತು ಅಪ್‌ಡೇಟ್‌ಗಳ ಹೊರಬಿದ್ದಿಲ್ಲ. ಹೀಗಾಗಿ, ಜನರಿಗೆ ಕಾಂತಾರದ ಮೊದಲ ಅಧ್ಯಾಯದ ಕುರಿತು ಮತ್ತೊಂದು ಪುಳಕ ಹುಟ್ಟಿಸುವ ಸಲುವಾಗಿ ಈ ದೀಪಾವಳಿ ವೇಳೆಗೆ ಅಥವಾ ಕಳೆದ ವರ್ಷದಂತೆ ಮುಂದಿನ ತಿಂಗಳು ನವೆಂಬರ್‌ 27ಕ್ಕೆ ಏನಾದರೂ ಕಾಂತಾರದ ಝಲಕ್ ಹೊರಬೀಳುವ ನಿರೀಕ್ಷೆಯಿದೆ.
ಕಾಂತಾರ ಚಾಪ್ಟರ್‌ 1 ಶೂಟಿಂಗ್‌ ಎಲ್ಲಿಯವರೆಗೆ ಬಂತು?
ಎರಡು ವಾರದ ಹಿಂದೆ ಕಾಂತಾರದ ನಿರ್ಮಾಪಕರಾದ ಹೊಂಬಾಳೆ ಫಿಲ್ಮ್ಸ್‌ನ ವಿಜಯ್ ಕಿರಗಂದೂರು ಅವರು ಕಾಂತಾರ 2 ಮತ್ತು ಕೆಜಿಎಫ್‌ 3 ಕುರಿತು ತುಸು ಮಾಹಿತಿ ನೀಡಿದ್ದರು. "ಕಾಂತಾರ ಸಿನಿಮಾದ ಶೂಟಿಂಗ್‌ ಉತ್ತಮವಾಗಿ ಸಾಗುತ್ತಿದೆ. ನಾವು ಈಗಾಗಲೇ ಶೇಕಡ 30ರಷ್ಟು ಶೂಟಿಂಗ್‌ ಪೂರ್ಣಗೊಳಿಸಿದ್ದೇವೆ. ಸೆಪ್ಟೆಂಬರ್‌ ತಿಂಗಳಲ್ಲಿ ಎರಡನೇ ಶೆಡ್ಯೂಲ್‌. ಆಗಸ್ಟ್‌ 2025ರ ವೇಳೆಗೆ ಈ ಸಿನಿಮಾ ಚಿತ್ರಮಂದಿರಕ್ಕೆ ಬರುವ ನಿರೀಕ್ಷೆಯಲ್ಲಿ ಅಭಿಮಾನಿಗಳು ಇರಬಹುದು" ಎಂದು ವಿಜಯ್ ಕಿರಗಂದೂರು ಮಾಹಿತಿ ನೀಡಿದ್ದರು. ಹಾಗಾದರೆ, ಈ ಸಿನಿಮಾ ಮುಂದಿನ ವರ್ಷ ಆಗಸ್ಟ್‌ ಸ್ವಾತಂತ್ರ್ರ್ಯ ದಿನಾಚರಣೆ ಸಮಯದಲ್ಲಿ ಚಿತ್ರಮಂದಿರಕ್ಕೆ ಬರಲಿದೆ. ಕಾಂತಾರ ಸಿನಿಮಾದ ಶೂಟಿಂಗ್‌ ಅನ್ನು ಈಗ ಕುಂದಾಪುರದಲ್ಲಿ ಮಾಡಲಾಗುತ್ತಿದೆ. ಜಗತ್ತಿನಾದ್ಯಂತ ಇರುವ ಸಿನಿಮಾ ಪ್ರೇಕ್ಷಕರಿಗೆ ಕಾಂತಾರದ ಮೊದಲ ಅಧ್ಯಾಯದ ಮೂಲಕ ಹೊಸ ದರ್ಶನ ನೀಡಲು ಚಿತ್ರತಂಡ ಶ್ರಮವಹಿಸುತ್ತಿದೆ.
ಕಾಂತಾರ ಚಾಪ್ಟರ್‌ 1 ಪಾತ್ರವರ್ಗ
ರಿಷಬ್‌ ಶೆಟ್ಟಿ ಮುಖ್ಯಪಾತ್ರದಲ್ಲಿ ಕಾಂತಾರ ಮೊದಲ ಅಧ್ಯಾಯದಲ್ಲಿ ನಟಿಸುತ್ತಿದ್ದಾರೆ. ಇವರು ಈ ಚಿತ್ರದಲ್ಲಿ ದ್ವಿಪಾತ್ರ ಮಾಡುವ ಸಾಧ್ಯತೆ ಇದೆ. ಇದೇ ಸಮಯದಲ್ಲಿ ಚಿತ್ರದ ನಾಯಕಿ ಸಪ್ತಮಿ ಗೌಡ ಎಂದು ಈಗಾಗಲೇ ಸುದ್ದಿಯಾಗಿದೆ. ಕಾಂತಾರ ಸಿನಿಮಾದಲ್ಲಿದ್ದ ಬಹುತೇಕ ಹಳೆಯ ಕಲಾವಿದರಿಗೆ ಮೊದಲ ಅಧ್ಯಾಯದಲ್ಲೂ ಅವಕಾಶ ನೀಡಿರುವ ಸೂಚನೆಯಿದೆ. ಅಂದರೆ, ಅಚ್ಯುತ್‌ ಕುಮಾರ್‌, ಕಿಶೋರ್‌ ಕುಮಾರ್‌, ಶೈನ್‌ ಶೆಟ್ಟಿ, ಮಾನಸಿ ಸುಧೀರ್‌ ಮುಂತಾದವರು ಹೊಸ ಅವತಾರದಲ್ಲಿ ಕಾಣಿಸಿಕೊಳ್ಳುತ್ತಿರಬಹುದು.