ಸೂಪರ್‌ ಸ್ಟಾರ್‌ ರಜನಿಕಾಂತ್‌ಗೆ ವಿಶೇಷ ಶೋ ಏರ್ಪಡಿಸಿದ್ದ ಅಮರನ್‌ ಚಿತ್ರತಂಡ; ಸಿನಿಮಾ ಸೂಪರ್‌ ಎಂದ ತಲೈವಾ
ರಾಜ್‌ಕುಮಾರ್‌ ಪೆರಿಯಸಾಮಿ ನಿರ್ದೇಶನದಲ್ಲಿ ಶಿವಕಾರ್ತಿಕೇಯನ್‌ ಹಾಗೂ ಸಾಯಿ ಪಲ್ಲವಿ ನಟಿಸಿರುವ ಮೇಜರ್‌ ಮುಕುಂದ್‌ ವರದರಾಜನ್‌ ಸಿನಿಮಾ ಅಮರನ್‌ ಸಿನಿಮಾ ನೋಡಿ ರಜನಿಕಾಂತ್‌ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಚಿತ್ರತಂಡ ರಜನಿಕಾಂತ್‌ಗಾಗಿ ವಿಶೇಷ ಶೋ ಏರ್ಪಡಿಸಿತ್ತು.
ಅಮರನ್‌ ಸಿನಿಮಾ ಸಕ್ಸಸ್‌ ಆಗಿದೆ. ಮೇಜರ್‌ ಮುಕುಂದ್‌ ವರದರಾಜನ್‌ ಜೀವನ ಚರಿತ್ರೆ ಆಧಾರಿತ ಸಿನಿಮಾ ಸಿನಿಪ್ರಿಯರಿಗೆ ಇಷ್ಟವಾಗಿದೆ. ಚಿತ್ರದಲ್ಲಿ ಶಿವಕಾರ್ತಿಕೇಯನ್‌ ಹಾಗೂ ಸಾಯಿಪಲ್ಲವಿ, ಮೇಜರ್‌ ಮುಕುಂದ್‌ ವರದರಾಜನ್‌ ಹಾಗೂ ಅವರ ಪತ್ನಿ ಇಂದು ರೆಬೆಕಾ ವರ್ಗೀಸ್‌ ಪಾತ್ರಕ್ಕೆ ಜೀವ ತುಂಬಿದ್ದಾರೆ. ಸಿನಿಮಾ ರಿಲೀಗೆ ಮುನ್ನ ಸೈನಿಕರಿಗೆ ವಿಶೇಷ ಪ್ರೀಮಿಯರ್‌ ಶೋ ಏರ್ಪಡಿಸಿದ್ದು ಅವರೂ ಸಿನಿಮಾವನ್ನು ಮೆಚ್ಚಿದ್ದಾರೆ.
ಚಿತ್ರತಂಡಕ್ಕೆ ಕಂಗ್ರಾಜುಲೇಷನ್ಸ್‌ ಹೇಳಿದ ರಜನಿಕಾಂತ್‌
ಸಿನಿಮಾ ತಂಡ ಇತ್ತೀಚೆಗೆ ಸಕ್ಸಸ್‌ ಪಾರ್ಟಿ ಆಯೋಜಿಸಿ ಸಂತೋಷ ಹಂಚಿಕೊಂಡಿದೆ. ಸಿನಿಮಾ ಗೆಲ್ಲಿಸಿದ ಜನರಿಗೆ ಧನ್ಯವಾದ ಅರ್ಪಿಸಿದ್ದಾರೆ. ಸೂಪರ್‌ ಸ್ಟಾರ್‌ ರಜನಿಕಾಂತ್‌ ಕೂಡಾ ಚಿತ್ರತಂಡವನ್ನು ಭೇಟಿ ಮಾಡಿ ಕಂಗ್ರಾಜುಲೇಷನ್ಸ್‌ ಹೇಳಿದ್ದಾರೆ. ನಟ ರಜನಿಕಾಂತ್‌ ಮೊದಲಿನಿಂದಲೂ ಹೊಸಬರಿಗೆ ಪ್ರೋತ್ಸಾಹ ನೀಡುತ್ತಾ ಬರುತ್ತಿದ್ದಾರೆ. ಯಾವುದೇ ಸಿನಿಮಾಗಳಾದರೂ ನೋಡಬೇಕು ಎನಿಸಿದರೆ ಅದನ್ನು ನೋಡಿ ಪ್ರಾಮಾಣಿಕವಾಗಿ ರಿವ್ಯೂ ನೀಡುತ್ತಾ ಬಂದಿದ್ದಾರೆ. ಇದೀಗ ಅಮರನ್‌ ಸಿನಿಮಾಗೆ ಕೂಡಾ ರಜನಿಕಾಂತ್‌ ಬೆಸ್ಟ್‌ ರಿವ್ಯೂ ನೋಡಿದ್ದಾರೆ. ಸಿನಿಮಾ ನೋಡಿ ಮೆಚ್ಚಿದ್ದಾರೆ, ಶಿವಕಾರ್ತಿಕೇಯನ್‌, ಸಾಯಿ ಪಲ್ಲವಿ ಹಾಗೂ ಇತರ ಕಲಾವಿದರ ನಟನೆಯನ್ನು ಹೊಗಳಿದ್ದಾರೆ. ರಾಜ್‌ಕುಮಾರ್‌ ಪೆರಿಯಸ್ವಾಮಿ, ತಂತ್ರಜ್ಞರು ಹಾಗೂ ಸಿನಿಮಾಗಾಗಿ ಕೆಲಸ ಮಾಡಿದವರ ಬೆನ್ನು ತಟ್ಟಿದ್ದಾರೆ.
ರಜನಿಕಾಂತ್‌ಗಾಗಿ ವಿಶೇಷ ಪ್ರೀಮಿಯರ್‌ ಶೋ
ಅಂದ ಹಾಗೆ ಶುಕ್ರವಾರ ಅಮರನ್‌ ಸಿನಿಮಾ ತಂಡ ರಜನಿಕಾಂತ್‌ ಅವರಿಗಾಗಿ ವಿಶೇಷ ಶೋ ಏರ್ಪಡಿಸಿತ್ತು. ಸಿನಿಮಾ ನೋಡಿದ ನಂತರ ರಜನಿಕಾಂತ್‌ ಚಿತ್ರತಂಡವನ್ನು ಆಹ್ವಾನಿಸಿ ಅವರ ಕೆಲಸವನ್ನು ಶ್ಲಾಘಿಸಿದ್ದಾರೆ. ಇಂಥ ಅದ್ಭುತ ಸಿನಿಮಾ ಮಾಡಿದ್ದಕ್ಕಾಗಿ ಕಮಲ್ ಹಾಸನ್‌ ಅವರನ್ನೂ ರಜನಿಕಾಂತ್‌ ಹೊಗಳಿದ್ದಾರೆ. ನಾಯಕ ಶಿವಕಾರ್ತಿಕೇಯನ್‌, ನಿರ್ದೇಶಕ ರಾಜ್‌ಕುಮಾರ್‌ ಪೆರಿಯಸಾಮಿ, ಮತ್ತೊಬ್ಬ ನಿರ್ಮಾಪಕರಾದ ಆರ್‌. ಮಹೇಂದ್ರನ್‌, ಸಿನಿಮಾಟೋಗ್ರಾಫರ್‌ ಸಾಯಿ ಎಲ್ಲರನ್ನೂ ಪ್ರತ್ಯೇಕವಾಗಿ ಕರೆಸಿ ರಜನಿಕಾಂತ್‌ ಮಾತನಾಡಿದ್ದಾರೆ. ರಜನಿಕಾಂತ್‌ ಜೊತೆಗಿನ ಫೋಟೋವನ್ನು ಚಿತ್ರತಂಡ ಸೋಷಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದೆ.
ಸಿನಿಮಾ ನೋಡಿದ ತಮಿಳುನಾಡು ಸಿಎಂ ಎಂಕೆ ಸ್ಟಾಲಿನ್
ರಜನಿಕಾಂತ್‌ ಮಾತ್ರವಲ್ಲದೆ ಚಿತ್ರತಂಡ ತಮಿಳುನಾಡು ಮುಖ್ಯಮಂತ್ರಿ ಎಂಕೆ ಸ್ಟಾಲಿನ್ ಹಾಗೂ ಉಪ ಮುಖ್ಯಮಂತ್ರಿ ಉದಯನಿಧಿ ಸ್ಟಾಲಿನ್ ಅವರಿಗೂ ವಿಶೇಷ ಪ್ರೀಮಿಯರ್‌ ಶೋ ಏರ್ಪಡಿಸಿತ್ತು. ಸಿನಿಮಾ ನೋಡಿದ ರಾಜಕೀಯ ನಾಯಕರು ಕಮಲ್ ಹಾಸನ್‌ ಜೊತೆ ಫೋನಿನಲ್ಲಿ ಮಾತನಾಡಿ ಚಿತ್ರವನ್ನು ಹೊಗಳಿದ್ದಾರೆ. ಅಮರನ್‌ ಚಿತ್ರವನ್ನು ಕಮಲ್ ಹಾಸನ್‌ ಒಡೆತನದ ರಾಜ್ ಕಮಲ್ ಫಿಲ್ಮ್ಸ್ ಇಂಟರ್‌ನ್ಯಾಷನಲ್‌, ಸೋನಿ ಪಿಕ್ಚರ್ಸ್ ಫಿಲ್ಮ್ಸ್ ಜಂಟಿಯಾಗಿ ಸೇರಿ ನಿರ್ಮಾಣ ಮಾಡಿದೆ. ಚಿತ್ರಕ್ಕೆ ಜಿವಿ ಪ್ರಕಾಶ್ ಕುಮಾರ್ ಸಂಗೀತ ಸಂಯೋಜನೆ ಮಾಡಿದ್ದಾರೆ. 130 ಕೋಟಿ ರೂ ಬಂಡವಾಳ ಹಾಕಿ ಸಿನಿಮಾ ಮಾಡಲಾಗಿದ್ದು ಇದುವರೆಗೂ ಸಿನಿಮಾ 95.60 ಕೋಟಿ ರೂ. ಲಾಭ ಮಾಡಿದೆ.
