ಭೈರತಿ ರಣಗಲ್ ಟ್ರೈಲರ್‌ ರಿಲೀಸ್; ಶಿವರಾಜ್‌ಕುಮಾರ್‌ ಯಮಹಾ ಆರ್‌ಎಕ್ಸ್‌ ಇದ್ದಂಗೆ ಈಗಲೂ ಅಷ್ಟೇ ಪವರ್‌, ಅದೇ ಖದರ್‌ ಎಂದ ಫ್ಯಾನ್ಸ್‌
ನರ್ತನ್‌ ಕಥೆ ಬರೆದು ನಿರ್ದೇಶನ ಮಾಡಿರುವ ಶಿವರಾಜ್‌ಕುಮಾರ್‌ ಅಭಿನಯದ ಭೈರತಿ ರಣಗಲ್ ಸಿನಿಮಾ ಟ್ರೈಲರ್‌ ರಿಲೀಸ್ ಆಗಿದೆ. ಚಿತ್ರವನ್ನು ಗೀತಾ ಶಿವರಾಜ್‌ಕುಮಾರ್‌ ಗೀತಾ ಪಿಕ್ಚರ್ಸ್‌ ಬ್ಯಾನರ್‌ ಅಡಿ ನಿರ್ಮಿಸಲಾಗಿದೆ. ಭೈರತಿ ರಣಗಲ್ ಆಗಿ ಶಿವರಾಜ್‌ಕುಮಾರ್‌ ಅಬ್ಬರಿಸಿದ್ದಾರೆ. ಸಿನಿಮಾ ನವೆಂಬರ್‌ 15ಕ್ಕೆ ರಿಲೀಸ್ ಆಗಲಿದೆ.
ಕರುನಾಡ ಚಕ್ರವರ್ತಿ ಸೆಂಚುರಿ ಸ್ಟಾರ್‌ ಶಿವರಾಜ್‌ಕುಮಾರ್‌ ನಟಿಸಿರುವ ಭೈರತಿ ರಣಗಲ್ ಸಿನಿಮಾ ಟ್ರೈಲರ್‌ ರಿಲೀಸ್ ಆಗಿದೆ. ಮಂಗಳವಾರ ಬೆಳಗ್ಗೆ 11.12ಕ್ಕೆ ಟ್ರೈಲರ್‌ ರಿಲೀಸ್ ಮಾಡುವುದಾಗಿ ಗೀತಾ ಪಿಕ್ಚರ್ಸ್‌ ಅಧಿಕೃತ ವೆಬ್‌ಸೈಟ್‌ನಲ್ಲಿ ಮಾಹಿತಿ ನೀಡಲಾಗಿತ್ತು. ಆದರೆ ಕಾರಣಾಂತರಗಳಿಂದ ಟೀಸರ್‌ ರಿಲೀಸ್ ತಡವಾಯ್ತು.
ಅಕ್ಟೋಬರ್‌ 25 ರಂದು ಭೈರತಿ ರಣಗಲ್ ಚಿತ್ರತಂಡ 2ನೇ ಟೀಸರ್‌ ರಿಲೀಸ್ ಮಾಡಿತ್ತು. ಈ ಟೀಸರ್‌ನಲ್ಲಿ ಶಿವರಾಜ್‌ಕುಮಾರ್‌ ಡೈಲಾಗ್‌ ಹೇಳದೆ ಅಬ್ಬರಿಸಿದ್ದರು. ಜನರಿಗೆ ನ್ಯಾಯ ಕೊಡಿಸುವ ಲಾಯರ್‌ ಆಗಿ, ದುಷ್ಟರನ್ನು ಶಿಕ್ಷಿಸುವ ನಾಯಕನಾಗಿ ಕಾಣಿಸಿಕೊಂಡಿದ್ದರು. ಜನರ ನೋವು, ರಾಜಕೀಯ, ಕಷ್ಟದಲ್ಲಿರುವವರಿಗೆ ಭೈರತಿ ರಣಗಲ್ ಮಿಡಿಯುವ ದೃಶ್ಯ, ಮಾಫಿಯಾ, ಆಕ್ಷನ್‌ ಎಲ್ಲವೂ ಈ ಟೀಸರ್‌ನಲ್ಲಿತ್ತು. ಟೀಸರ್‌ ನೋಡಿದವರು ಟ್ರೈಲರ್‌ಗಾಗಿ ಕಾಯತ್ತಿದ್ದರು. ಇದೀಗ ಆ ಕ್ಷಣವೂ ಬಂದಿದೆ.
ಅಭಿಮಾನಿಗಳಿಗೆ ಥ್ರಿಲ್‌ ನೀಡುವ ಶಿವಣ್ಣ ಡೈಲಾಗ್‌
ಒಂದು ಬಿಳಿ ಹಾಳೆ ಮೇಲೆ ನೀರು ಬೇಕು ಅಂತ ಬರೆದುಕೊಟ್ಟರೆ ನೀರು ಕೊಡ್ತಾರಪ್ಪ ಎಂಬ ಬಾಲಕನ ದನಿಯೊಂದಿಗೆ ಟ್ರೈಲರ್‌ ಆರಂಭವಾಗುತ್ತದೆ. ಜನರಿಗೋಸ್ಕರ ನಾನು ಯಾರನ್ನು ಬೇಕಾದರೂ ಕಳೆದುಕೊಳ್ಳುತ್ತೇನೆ. ಆದರೆ ಈ ಜನರನ್ನೆ ಕಳೆದುಕೊಳ್ಳೋಕೆ ಇಷ್ಟ ಪಡೊಲ್ಲ. ಇನ್ಮೇಲಿಂದ ರೋಣಾಪುರದಲ್ಲಿರೋದು ಸರ್ವೇ ಕಲ್ಲುಗಳಲ್ಲ, ರಣಗಲ್ ಸಾಮ್ರಾಜ್ಯದ ಮೈಲಿಗಲ್ಲುಗಳು ಎಂದು ಶಿವಣ್ಣ ಹೇಳುವ ಡೈಲಾಗ್‌ ಅಭಿಮಾನಿಗಳಿಗಂತೂ ಹುಚ್ಚು ಹಿಡಿಸಿದಂತೆ ಆಗುತ್ತಿದೆ. ನೀರಿಗಾಗಿ ಹಾಹಾಕಾರ ಮಾಡುತ್ತಿರುವ ಜನರು, ಕಾರ್ಪೋರೇಟ್‌ ಸಾಮ್ರಾಜ್ಯದ ದೃಶ್ಯಗಳು ಟ್ರೇಲರ್‌ನಲ್ಲಿವೆ. ದೇವರಾಜ್‌, ರುಕ್ಮಿಣಿ ವಸಂತ್‌, ಛಾಯಾ ಸಿಂಗ್‌, ಅವಿನಾಶ್‌ ಎಲ್ಲರೂ ಟ್ರೈಲರ್‌ನಲ್ಲಿ ಬಂದು ಹೋಗುತ್ತಾರೆ. ಟ್ರೇಲರ್‌ ರಿಲೀಸ್ ಆಗಿ ಅರ್ಧ ಗಂಟೆಯಲ್ಲಿ 50 ಸಾವಿರಕ್ಕೂ ಹೆಚ್ಚು ಮಂದಿ ವೀಕ್ಷಣೆ ಮಾಡಿದ್ದಾರೆ.
ಒಟ್ಟಿನಲ್ಲಿ ಶಿವಣ್ಣನ ಡೈಲಾಗ್‌, ಆಕ್ಷನ್‌, ಮೇಕಿಂಗ್‌ ಎಲ್ಲವೂ ನೋಡುಗರಿಗೆ ಗೂಸ್‌ ಬಂಪ್ಸ್‌ ಬರುವಂತೆ ಮಾಡುತ್ತಿದೆ. ನೆತ್ತಿಯ ಸುಡುವ ಸೂರ್ಯನ ಮೇಲಾಣೆ.... ಅಬ್ಬರಿಸುವ ಈ ನಮ್ಮ ಭೈರತ್ತಿ ರಣಗಲ್, ಶಿವಣ್ಣ, ಸಿನಿಮಾ 100 ದಿನಗಳು ಓಡೋದು ಪಕ್ಕಾ, ಟ್ರೇಲರ್‌ ಅಮೇಜಿಂಗ್‌ ಆಗಿದೆ ಮತ್ತೆ ಮತ್ತೆ ನೋಡಬೇಕೆನಿಸುತ್ತಿದೆ. ಶಿವಣ್ಣ ಲುಕ್‌ ಆಸಮ್‌, ಶಿವಣ್ಣ ಅವ್ರು ಲಾಂಗ್ ಹಿಡಿಯೋದು ನೋಡೋಕೆ ಕಣ್ಣಿಗೆ ಒಂದು ಹಬ್ಬ , ಶಿವಣ್ಣ yamaha rx ಇದ್ದಂಗೆ ಇಬ್ಬರು ಮಾರ್ಕೆಟ್‌ಗೆ ಹೆಚ್ಚುಕಮ್ಮಿ ಒಂದೇ ಸಲ ಬಂದವರು ಇಬ್ಬರಿಗೂ ಈಗಲೂ ಇವಾಗ್ಲು ಅದೇ ಕ್ರೇಜು ,ಅದೇ ಡಿಮ್ಯಾಂಡು, ಅದೆ ಪವರು,ಅದೆ ಗತ್ತು, ಸೌಂಡ್‌ ಅಂತೂ ಹೆಳೋದೇ ಬೇಡ ಶಿವಣ್ಣ ಲವ್‌ ಯು ಎಂದು ಅಭಿಮಾನಿಗಳು ಕಾಮೆಂಟ್‌ ಮಾಡುತ್ತಿದ್ದಾರೆ.
ನವೆಂಬರ್‌ 15 ರಂದು ತೆರೆ ಕಾಣುತ್ತಿರುವ ಸಿನಿಮಾ
2017ರಲ್ಲಿ ತೆರೆ ಕಂಡಿದ್ದ ಮಫ್ತಿ ಚಿತ್ರದಲ್ಲಿ ಶಿವರಾಜ್‌ಕುಮಾರ್‌ ಭೈರತಿ ರಣಗಲ್ ಪಾತ್ರದಲ್ಲಿ ನಟಿಸಿದ್ದರು. ಈ ಸಿನಿಮಾ ಹಾಗೂ ಪಾತ್ರಕ್ಕೆ ದೊರೆತ ಮನ್ನಣೆಯಿಂದ ನಿರ್ದೇಶಕ ನರ್ತನ್‌ ಭೈರತಿ ರಣಗಲ್ ಹೆಸರಿನಲ್ಲೇ ಸಿನಿಮಾ ಮಾಡಲು ನಿರ್ಧರಿಸಿ ಈಗ ಚಿತ್ರವನ್ನು ಪ್ರೇಕ್ಷಕರ ಮುಂದೆ ಇಡಲು ಹೊರಟಿದ್ದಾರೆ. ಮಫ್ತಿ ಚಿತ್ರದಲ್ಲಿ ಶಿವಣ್ಣ ಧರಿಸಿದ್ದ ಕಾಸ್ಟ್ಯೂಮ್‌ ಇಲ್ಲೂ ಮುಂದುವರೆದಿದೆ.
ಭೈರತಿ ರಣಗಲ್ ಚಿತ್ರವನ್ನು ಗೀತಾ ಪಿಕ್ಚರ್ಸ್‌ ಬ್ಯಾನರ್‌ ಅಡಿಯಲ್ಲಿ ಶಿವಣ್ಣ ಪತ್ನಿ ಗೀತಾ ಶಿವರಾಜ್‌ಕುಮಾರ್‌ ನಿರ್ಮಾಣ ಮಾಡಿದ್ದಾರೆ. ಮಫ್ತಿ ಚಿತ್ರವನ್ನು ನಿರ್ದೇಶಿಸಿದ್ದ ನರ್ತನ್‌, ಈ ಚಿತ್ರಕ್ಕೆ ಕಥೆ ಬರೆದು ನಿರ್ದೇಶನ ಮಾಡಿದ್ದಾರೆ. ಚಿತ್ರದ ಹಾಡುಗಳಿಗೆ ರವಿ ಬಸ್ರೂರ್‌ ಸಂಗೀತ ನೀಡಿದ್ದಾರೆ. ಚಿತ್ರದಲ್ಲಿ ಶಿವರಾಜ್‌ಕುಮಾರ್‌, ಶ್ರೀಮುರಳಿ, ರುಕ್ಮಿಣಿ ವಸಂತ್‌, ರಾಹುಲ್‌ ಬೋಸ್‌, ನಾನಾ ಪಾಟೇಕರ್‌, ಯೋಗಿಬಾಬು, ಛಾಯಾಸಿಂಗ್‌, ದೇವರಾಜ್‌, ವಸಿಷ್ಠ ಸಿಂಹ ಹಾಗೂ ಇನ್ನಿತರರು ನಟಿಸಿದ್ದಾರೆ. ಸಿನಿಮಾ ನವೆಂಬರ್‌ 15ರಂದು ಬಿಡುಗಡೆ ಆಗುತ್ತಿದೆ.
