ಅನುಷ್ಕಾ ಶೆಟ್ಟಿ ಹುಟ್ಟುಹಬ್ಬದಂದು ಅಭಿಮಾನಿಗಳಿಗೆ ಸಿಗಲಿದೆ ಗುಡ್‌ ನ್ಯೂಸ್‌! ‘ಘಾಟಿ’ ಚಿತ್ರದ ಬಗ್ಗೆ ಬಿಗ್‌ ಅಪ್ಡೇಟ್‌ ನೀಡಿದೆ ಚಿತ್ರತಂಡ
Ghaati Glimpse: ಅನುಷ್ಕಾ ಶೆಟ್ಟಿ 'ಘಾಟಿ' ಸಿನಿಮಾ ಮೂಲಕ ನಿಮ್ಮ ಮುಂದೆ ಬರಲಿದ್ದಾರೆ. ಈ ಬಾರಿ ಅವರ ಹುಟ್ಟು ಹಬ್ಬದ ದಿನದಂದೇ ಅಂದರೆ ಇದೇ ನವೆಂಬರ್ 7ರಂದು ನಿಮಗೆ ಈ ಚಿತ್ರದ ಮೊದಲ ನೋಟ ಕಾಣಸಿಗಲಿದೆ.
ಅನುಷ್ಕಾ ಶೆಟ್ಟಿ ಹಲವು ದಿನಗಳ ನಂತರ ಮತ್ತೆ ಸಿನಿಮಾ ಮಾಡುತ್ತಿದ್ದಾರೆ. ಇದೀಗ ಮತ್ತೊಂದು ಸಿನಿಮಾ ಘಾಟಿ ಮೂಲಕ ನಿಮ್ಮ ಮುಂದೆ ಬರಲಿದ್ದಾರೆ. ಘಾಟಿ ಸಿನಿಮಾ ಇನ್ನೇನು ಕೆಲವೇ ದಿನಗಳಲ್ಲಿ ರಿಲೀಸ್‌ ಆಗಲಿದೆ. ನವೆಂಬರ್ 7ರಂದು ಈ ಸಿನಿಮಾದ ಮೊದಲ ನೋಟ ಬಿಡುಗಡೆಯಾಗಲಿದೆ ಎಂದು ಚಿತ್ರತಂಡ ಮಾಹಿತಿ ನೀಡಿದೆ. ನಿರ್ಮಾಪಕರಾದ ವಂಶಿ ಕೃಷ್ಣಾ ರೆಡ್ಡಿ, ಪ್ರಮೋದ್ ಉಪ್ಪಲಪತಿ, ವೈ ರಾಜೀವ್ ರೆಡ್ಡಿ ಮತ್ತು ಜೆ ಸಾಯಿ ಬಾಬು ಯುವಿ ಕ್ರಿಯೇಷನ್ಸ್ ಮತ್ತು ಫಸ್ಟ್ ಫ್ರೇಮ್ ಎಂಟರ್‌ಟೈನ್‌ಮೆಂಟ್‌ಗಳ ಲೇಬಲ್‌ಗಳ ಅಡಿಯಲ್ಲಿ ಈ ಚಿತ್ರ ನಿರ್ಮಾಣ ಮಾಡಿದ್ದಾರೆ.
ಈ ಚಿತ್ರವು ಅನುಷ್ಕಾ ವೃತ್ತಿಜೀವನದಲ್ಲಿ ಒಂದು ಹೆಗ್ಗುರುತಾಗಲಿದೆ ಎಂಬ ವಿಶ್ವಾಸವನ್ನು ನಾವು ಹೊಂದಿದ್ದೇವೆ ಎಂದು ಚಿತ್ರ ನಿರ್ಮಾಪಕ ವಂಶಿ ಹೇಳಿದ್ದಾರೆ. ಚಿತ್ರೀಕರಣ ಮುಕ್ತಾಯ ಹಂತದಲ್ಲಿದೆ ಎಂದಿದ್ದಾರೆ. ಮಹಿಳಾ ಕೇಂದ್ರಿತ ಸಿನಿಮಾದಲ್ಲಿ ಅನುಷ್ಕಾ ಮುಖ್ಯ ಪಾತ್ರದಲ್ಲಿ ನಟಿಸಿದ್ದು ಬಹಳ ನಿರೀಕ್ಷೆಯನ್ನು ಹುಟ್ಟು ಹಾಕಿದೆ. ನವೆಂಬರ್ 7 ರಂದು ಅನುಷ್ಕಾ ಶೆಟ್ಟಿ ಅವರ ಹುಟ್ಟುಹಬ್ಬದ ದಿನದಂದೇ ಫಸ್ಟ್ ಲುಕ್ ಬಿಡುಗಡೆಯಾಗಲಿದೆ.
ಈ ಚಿತ್ರ ಹೇಗಿರಲಿದೆ ಎಂಬ ಕುತೂಹಲ ಈಗ ಎಲ್ಲರಲ್ಲೂ ಮನೆ ಮಾಡಿದೆ. ಅದೂ ಅಲ್ಲದೆ ಅನುಷ್ಕಾ ಅವರ ಅಭಿನಯದ ಬಗ್ಗೆ ಜನರು ಹೆಚ್ಚಿನ ಆಸಕ್ತಿ ಹೊಂದಿದ್ದಾರೆ. ಬಾಹುಬಲಿ 2, ಮಿಸ್ ಶೆಟ್ಟಿ ಮಿಸ್ಟರ್ ಪೋಲಿಶೆಟ್ಟಿ ಈ ಸಿನಿಮಾಗಳನ್ನು ನೋಡಿದ ನಂತರ ಜನರು ಅವರನ್ನು ಇನ್ನಷ್ಟು ಚಿತ್ರಗಳಲ್ಲಿ ನೋಡಲು ಬಯಸುತ್ತಿದ್ದಾರೆ. ಅನುಷ್ಕಾ ಮತ್ತೆ ಇನ್ನೊಂದಷ್ಟು ಸಿನಿಮಾಗಳನ್ನು ಮಾಡಲು ಒಪ್ಪಿಕೊಂಡಿರುವುದೇ ಒಂದು ಖುಷಿ ಎಂದು ಫ್ಯಾನ್ಸ್‌ ಹೇಳುತ್ತಿದ್ದಾರೆ.
ದ ಕ್ವೀನ್ ಇಸ್ ಕಮಿಂಗ್‌ ಬ್ಯಾಕ್‌ ಎಂದು ಯುವಿ ಕ್ರಿಯೇಶನ್ಸ್‌ ತನ್ನ X ಖಾತೆಯಲ್ಲಿ ಭರ್ಜರಿ ಅಪ್ಡೇಟ್‌ ನೀಡಿದೆ.
ನಿಮ್ಮ ಕ್ಯಾಲೆಂಡರ್‌ನಲ್ಲಿ ಮಾರ್ಕ್‌ ಮಾಡಿಕೊಳ್ಳಿ ನವೆಂಬರ್ 7ರಂದು ನಾವು ಘಾಟಿ ಸಿನಿಮಾದ ಬಗ್ಗೆ ವಿಶೇಷವಾದ ವಿಚಾರ ಹಂಚಿಕೊಳ್ಳಲಿದ್ದೇವೆ ಎಂದು ತಿಳಿಸಿದ್ದಾರೆ. ಮಹಿಳಾ ಕೇಂದ್ರಿತ ಸಿನಿಮಾಗಳ ಮೂಲಕ ತಮ್ಮದೇ ಛಾಪು ಮೂಡಿಸಿರುವ ಅನುಷ್ಕಾ ಶೆಟ್ಟಿ ಘಾಟಿ ಸಿನಿಮಾದಲ್ಲಿ ಯಾವ ರೀತಿಯ ಮ್ಯಾಜಿಕ್ ಮಾಡುತ್ತಾರೋ ಕಾದು ನೋಡೋಣ.
