ಮಹಿಳೆಯರಿಗಾಗಿ ಮಿಸ್‌ ಶೆಟ್ಟಿ ಮಿಸ್ಟರ್‌ ಪೋಲಿಶೆಟ್ಟಿ ಸ್ಪೆಷಲ್‌ ಶೋ; ಅನುಷ್ಕಾ ಶೆಟ್ಟಿ ಸಂದೇಶ
ಸಿನಿಮಾ ಆಂಧ್ರ, ತೆಲಂಗಾಣ, ವಿದೇಶಗಳಲ್ಲಿ ಉತ್ತಮ ಪ್ರತಿಕ್ರಿಯೆ ಪಡೆದುಕೊಂಡಿದೆ. ಇದೀಗ ಸಿನಿಮಾಗೆ ಸಂಬಂಧಿಸಿದಂತೆ ಅನುಷ್ಕಾ ಶೆಟ್ಟಿ ತಮ್ಮ ಇನ್‌ಸ್ಟಾಗ್ರಾಮ್‌ನಲ್ಲಿ ವಿಶೇಷ ಅನೌನ್ಸ್‌ಮೆಂಟ್‌ ಮಾಡಿದ್ದಾರೆ.
ಅನುಷ್ಕಾ ಶೆಟ್ಟಿ ಹಾಗೂ ನವೀನ್‌ ಪೋಲಿಶೆಟ್ಟಿ ಅಭಿನಯದ 'ಮಿಸ್‌ ಶೆಟ್ಟಿ ಮಿಸ್ಟರ್‌ ಪೋಲಿಶೆಟ್ಟಿ' ಸಿನಿಮಾಗೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಇತ್ತೀಚೆಗೆ ಸಮಂತಾ ಕೂಡಾ ಈ ಸಿನಿಮಾ ನೋಡಿ, ನಾನು ನಕ್ಕು ಬಹಳ ದಿನಗಳಾಗಿತ್ತು ಎಂದು ಹೇಳಿಕೊಂಡಿದ್ದರು. ಇದೀಗ ನಟಿ ಅನುಷ್ಕಾ ಶೆಟ್ಟಿ ಚಿತ್ರದ ಕುರಿತಾಗಿ ವಿಶೇಷ ಅನೌನ್ಸ್‌ಮೆಂಟ್‌ ಮಾಡಿದ್ದಾರೆ.
ಗೆದ್ದ ಮಿಸ್‌ ಶೆಟ್ಟಿ, ಮಿಸ್ಟರ್‌ ಪೋಲಿಶೆಟ್ಟಿ
ಬಾಹುಬಲಿ ಸಿನಿಮಾ ನಂತರ ಅನುಷ್ಕಾ ಶೆಟ್ಟಿ ಯಾವ ಸಿನಿಮಾಗಳನ್ನೂ ಒಪ್ಪಿಕೊಂಡಿರಲಿಲ್ಲ. ಅದಕ್ಕೂ ಮನ್ನ ಆಕೆ ನಟಿಸಿದ್ದ ಭಾಗಮತಿ, ನಿಶ್ಯಬ್ಧಂ ಸಿನಿಮಾಗಳು ಬಾಹುಬಲಿ ನಂತರ ರಿಲೀಸ್‌ ಆಗಿದ್ದವು. ಚಿರಂಜೀವಿ ಅಭಿನಯದ ಸೈ ರಾ ನರಸಿಂಹ ರೆಡ್ಡಿ ಚಿತ್ರದಲ್ಲಿ ಅನುಷ್ಕಾ ರಾಣಿ ಲಕ್ಷ್ಮಿ ಬಾಯಿ ಪಾತ್ರದಲ್ಲಿ ಅತಿಥಿ ಪಾತ್ರದಲ್ಲಿ ಅಭಿನಯಿಸಿದ್ದರು. ಆದರೆ ನಂತರ ಅನುಷ್ಕಾ ಅಭಿನಯದ ಯಾವ ಸಿನಿಮಾಗಳೂ ರಿಲೀಸ್‌ ಆಗಿರಲಿಲ್ಲ. ಮಿಸ್‌ ಶೆಟ್ಟಿ ಮಿಸ್ಟರ್‌ ಪೋಲಿಶೆಟ್ಟಿ ಸಿನಿಮಾದಲ್ಲಿ ಆಕೆ ನಟಿಸುತ್ತಿದ್ದಾರೆ ಎಂಬ ಅಪ್‌ಡೇಟ್‌ ದೊರೆತರೂ ಅದು ಕನ್ಫರ್ಮ್‌ ಆಗಿರಲಿಲ್ಲ. ಕೊನೆಗೂ ಸಿನಿಮಾ ರಿಲೀಸ್‌ ಆಗಿದ್ದು ಅನುಷ್ಕಾ, ನವೀನ್‌ ಕಾಂಬಿನೇಶನ್‌ಗೆ ಸಿನಿಪ್ರಿಯರು ಚಪ್ಪಾಳೆ ತಟ್ಟಿದ್ದಾರೆ.
ಆಂಧ್ರ , ತೆಲಂಗಾಣದಲ್ಲಿ ಮಹಿಳೆಯರಿಗಾಗಿ ವಿಶೇಷ ಶೋ
ಸಿನಿಮಾ ಆಂಧ್ರ, ತೆಲಂಗಾಣ, ವಿದೇಶಗಳಲ್ಲಿ ಉತ್ತಮ ಪ್ರತಿಕ್ರಿಯೆ ಪಡೆದುಕೊಂಡಿದೆ. ಇದೀಗ ಸಿನಿಮಾಗೆ ಸಂಬಂಧಿಸಿದಂತೆ ಅನುಷ್ಕಾ ಶೆಟ್ಟಿ ತಮ್ಮ ಇನ್‌ಸ್ಟಾಗ್ರಾಮ್‌ನಲ್ಲಿ ವಿಶೇಷ ಅನೌನ್ಸ್‌ಮೆಂಟ್‌ ಮಾಡಿದ್ದಾರೆ. ''ನಮ್ಮ ಮಿಸ್‌ ಶೆಟ್ಟಿ ಮಿಸ್ಟರ್‌ ಪೋಲಿಶೆಟ್ಟಿ ಸಿನಿಮಾವನ್ನು ಒಪ್ಪಿ ಸ್ವೀಕರಿಸಿರುವುದಕ್ಕೆ ನಿಮ್ಮೆಲ್ಲರಿಗೂ ಅಭಿನಂದನೆಗಳು. ಚಿತ್ರದ ಕುರಿತಾಗಿ ನಿಮ್ಮ ಮೆಸೇಜ್‌, ಟ್ವೀಟ್‌ ನೋಡುತ್ತಿದ್ದರೆ ನಮಗೆ ಬಹಳ ಸಂತೋಷವಾಗುತ್ತಿದೆ. ಈ ಗುರುವಾರ ಆಂಧ್ರ ಹಾಗೂ ತೆಲಂಗಾಣದಲ್ಲಿ ಮಹಿಳೆಯರಿಗಾಗಿ ಮಾರ್ನಿಂಗ್‌ ಸ್ಪೆಷಲ್‌ ಶೋ ಏರ್ಪಡಿಸಲಾಗಿದೆ. ನಿಮ್ಮ ಮನೆವರನೆಲ್ಲಾ ಸಿನಿಮಾ ನೋಡಲು ಕರೆದುಕೊಂಡು ಹೋಗಿ, ನಿಮ್ಮ ಮೆಸೇಜ್‌ಗಾಗಿ ಕಾಯುತ್ತಿರುತ್ತೇನೆ'' ಎಂದು ಅನುಷ್ಕಾ ಶೆಟ್ಟಿ ಅಭಿಮಾನಿಗಳಿಗಾಗಿ ವಿಶೇಷ ಸಂದೇಶ ನೀಡಿದ್ದಾರೆ.
ಮಹೇಶ್‌ ಬಾಬು ಪಚಿಕೊಲ್ಲ ನಿರ್ದೇಶನದ ಸಿನಿಮಾ
ಮಿಸ್‌ ಶೆಟ್ಟಿ ಮಿಸ್ಟರ್‌ ಪೋಲಿಶೆಟ್ಟಿ ಸಿನಿಮಾವನ್ನು ಯುವಿ ಕ್ರಿಯೇಷನ್ಸ್‌ ಬ್ಯಾನರ್‌ ಅಡಿ ವಂಶಿ ಕೃಷ್ಣ ರೆಡ್ಡಿ, ಪ್ರಮೋದ್‌ ಉಪ್ಪಳಪತಿ ಜೊತೆ ಸೇರಿ ನಿರ್ಮಿಸಿದ್ದಾರೆ. ಚಿತ್ರವನ್ನು ಮಹೇಶ್‌ ಬಾಬು ಪಚಿಕೊಲ್ಲ ಕಥೆ ಬರೆದು ನಿರ್ದೇಶನ ಮಾಡಿದ್ದಾರೆ. ಚಿತ್ರದ ಹಾಡುಗಳಿಗೆ ರಾಧನ್‌ ಸಂಗೀತ ನೀಡಿದ್ದು, ಗೋಪಿ ಸುಂದರ್‌ ಹಿನ್ನೆಲೆ ಸಂಗೀತ ಒದಗಿಸಿದ್ದಾರೆ. ಚಿತ್ರದಲ್ಲಿ ಅನುಷ್ಕಾ ಶೆಟ್ಟಿ ಅನ್ವಿತಾ ಶೆಟ್ಟಿ ಆಗಿ ನವೀನ್‌ ಪೋಲಿಶೆಟ್ಟಿ ಸಿದ್ದು ಆಗಿ ನಟಿಸಿದ್ದಾರೆ. ಉಳಿದಂತೆ ಜಯಸುಧಾ, ಮುರಳಿ ಶರ್ಮ, ತುಳಸಿ, ನಾಸರ್‌ ಹಾಗೂ ಇನ್ನಿತರರು ನಟಿಸಿದ್ದಾರೆ. ಸಿನಿಮಾ ಶೀಘ್ರದಲ್ಲೇ ಒಟಿಟಿಯಲ್ಲಿ ತೆರೆ ಕಾಣುವ ಸಾಧ್ಯತೆ ಇದೆ.
