ಜ್ಯೋತಿಷ್ಯ ಶಾಸ್ತ್ರದಲ್ಲಿ ಬರುವ ಹೋರಾ ಎಂದರೇನು? ಇದರ ಪ್ರಕಾರ ನಿಮ್ಮ ಕೆಲಸ ಪ್ರಾರಂಭಿಸಿ, ಜೀವನ ಸುಲಭವಾಗುವುದು

ಒಂದು ದಿನವನ್ನು 24 ಹೋರಾಗಳನ್ನಾಗಿ ಮಾಡುತ್ತೇವೆ. ಆದರೆ ಇದರಲ್ಲಿ ರಾಹು ಮತ್ತು ಕೇತುಗಳ ಪರಿಗಣನೆ ಇರುವುದಿಲ್ಲ. ಉಳಿದ ಏಳು ಗ್ರಹಗಳು ಹಗಲು ಮತ್ತು ರಾತ್ರಿಯ ವೇಳೆ ಒಂದು ಗಂಟೆಗೆ ಒಮ್ಮೆ ಬದಲಾಗುತ್ತದೆ. ಈ ಲೆಕ್ಕಾಚಾರವು ಸೂರ್ಯೋದಯವನ್ನು ಆಧರಿಸಿದೆ. ಪ್ರಸಕ್ತ ನಡೆಯುತ್ತಿರುವ ಹೋರಾವನ್ನು ತಿಳಿಯಲು ಚಿಕ್ಕದಾದ ಶ್ಲೋಕವಿದೆ. “ಅರ್ಕ ಶುಕ್ರ ಬುಧ ಚಂದ್ರ ಮಂದಜೀವ ಧರಾಸುತ”. ಅರ್ಕ ಎಂದರೆ ಸೂರ್ಯ. ಮಂದಜೀವ ಎಂದರೆ ಶನಿ. ಧರಾಸುತ ಎಂದರೆ ಕುಜ.

ಉದಾಹರಣೆಗೆ ಜುಲೈ 28 ಭಾನುವಾರವಾಗುತ್ತದೆ. ಅಂದಿನ ಸೂರ್ಯೋದಯವು 6.08 ಆಗುತ್ತದೆ. ಮೇಲಿನ ಶ್ಲೋಕದ ಪ್ರಕಾರ ಆರಂಭದಲ್ಲಿ ರವಿಹೋರಾ ಇರುತ್ತದೆ. ಅಂದರೆ ರವಿಹೋರಾ 7.08 ರವರೆಗೂ ಇರುತ್ತದೆ. ಆನಂತರ ಶುಕ್ರಹೋರಾ ಆರಂಭವಾಗಿ 8.08 ರವರೆಗೂ ಇರುತ್ತದೆ. ಆನಂತರ ಶ್ಲೋಕದ ಅನ್ವಯ ಹೋರಾಗಳು ಬದಲಾಗುತ್ತವೆ. ಇದರ ಅನ್ವಯ

ರವಿಯ ಹೋರಾ 6.08 ರಿಂದ 07.08

ಶುಕ್ರ ಹೋರಾ 07.08 ರಿಂದ 08.08

ಬುಧಹೋರಾ 08.08 ರಿಂದ 09.08

ಚಂದ್ರ ಹೋರಾ 09.08 ರಿಂದ 10.08

ಹೀಗೆ ಮುಂದುವರೆಯುತ್ತದೆ

ರವಿ ಹೋರಾದಲ್ಲಿ ಕುಟುಂಬದ ಹಿರಿಯರಿಗೆ ಸಂಬಂಧಿಸಿದ ಅಥವಾ ಕಾನೂನಿಗೆ ಸಂಬಂಧಿಸಿದ ಕೆಲಸ ಕಾರ್ಯಗಳನ್ನು ಆರಂಭಿಸಿದರೆ ಸುಲಭವಾಗಿ ಜಯ ಲಭಿಸುತ್ತದೆ. ಹೃದಯ ಸಂಬಂಧಿತ ತೊಂದರೆ ಇದ್ದವರು ಈ ವೇಳೆಯಲ್ಲಿ ಔಷಧಿಯನ್ನು ಸೇವಿಸಬಹುದಾಗಿದೆ. ಕುಟುಂಬದ ಹಿರಿಯರು ಮಾಡುತ್ತಿದ್ದ ವ್ಯಾಪಾರ ವ್ಯವಹಾರವನ್ನು ಈ ಹೋರಾದಲ್ಲಿ ಆರಂಭಿಸಿದರೆ ಯಶಸ್ಸು ಸಿಗುತ್ತದೆ.

ಚಂದ್ರನ ಹೋರಾದಲ್ಲಿ ಪ್ರವಾಸದ ಬಗ್ಗೆ ಚಿಂತನೆ ಮಾಡಬಹುದು. ಈ ಹೋರಾದಲ್ಲಿ ಪ್ರವಾಸಕ್ಕೆ ತೆರಳಿದರೆ ಯಾವುದೇ ರೀತಿಯ ತೊಂದರೆ ಉಂಟಾಗುವುದಿಲ್ಲ. ಹಣಕಾಸಿನ ವಿಚಾರದಲ್ಲಿ ಈ ಹೋರಾದಲ್ಲಿ ಯಾರಿಂದಲೂ ಮೋಸ ಹೋಗುವುದಿಲ್ಲ. ಒಂದು ವೇಳೆ ಕುಟುಂಬದಲ್ಲಿ ಅನಾವಶ್ಯಕ ಮನಸ್ತಾಪಗಳು ಇದ್ದಲ್ಲಿ ಈ ಹೋರಾದಲ್ಲಿ ಸುಖ ಸಂತೋಷ ಮರಳುತ್ತದೆ. ಕಲಾವಿದರಿಗೆ ಮತ್ತು ಕ್ರೀಡಾಪಟುಗಳಿಗೆ ಈ ಹೋರಾವು ಅತಿ ಮುಖ್ಯವಾಗುತ್ತದೆ.

ಕುಜನ ಹೋರಾದಲ್ಲಿ ಕುಟುಂಬದ ಆಸ್ತಿಯ ವಿವಾದವು ಪರಿಹಾರಗೊಳ್ಳುತ್ತದೆ. ಸೋದರ ಅಥವಾ ಸೋದರಿಯರ ನಡುವೆ ಇರುವ ಅನವಶ್ಯಕ ಮನಸ್ತಾಪವು ಮರೆಯಾಗುತ್ತದೆ. ನಿಮ್ಮ ವಿರೋಧಿಗಳ ಕಾರ್ಯತಂತ್ರದ ಬಗ್ಗೆ ಈ ಹೋರಾದಲ್ಲಿ ಅರಿತುಕೊಳ್ಳಬಹುದು. ಇದಲ್ಲದೆ ದಂಪತಿಗಳ ನಡುವೆ ಮನಸ್ತಾಪವಿದ್ದಲ್ಲಿ ಪತಿ ಅಥವಾ ಪತ್ನಿಯ ಪ್ರೀತಿಯನ್ನು ಪುನಃ ಪಡೆಯಲು ಈ ಹೋರಾವು ಅತಿ ಮುಖ್ಯವಾಗುತ್ತದೆ. ಭೂ ಸಂಬಂಧಿತ ವಿಚಾರಗಳಿಗೆ ಇದು ಉಪಯುಕ್ತವಾಗಿದೆ.

ಬುಧನ ಹೋರಾದಲ್ಲಿ ಹಣಕಾಸಿನ ವ್ಯವಹಾರದಲ್ಲಿನ ಲಾಭ ನಷ್ಟವನ್ನು ಸರಿಪಡಿಸಬಹುದು. ಆತ್ಮೀಯ ಸ್ನೇಹಿತರ ಮನದ ಆಶಯದ ಬಗ್ಗೆ ತಿಳಿಯಲು ಈ ಹೋರಾವು ಅನುಕೂಲಕರವಾಗಿದೆ. ವಿದ್ಯಾರ್ಥಿಗಳು ಬುಧನ ಹೋರಾದಲ್ಲಿ ಅಭ್ಯಾಸ ನಡೆಸಲು ಆರಂಭಿಸಿದಲ್ಲಿ ನಿರೀಕ್ಷಿತ ಯಶಸ್ಸನ್ನು ಪಡೆಯಬಹುದು. ಗದ್ದೆ ತೋಟಗಳ ಬಗ್ಗೆ ಅರಿತುಕೊಳ್ಳಲು ಅಥವಾ ಕೊಳ್ಳಲು ಈ ಹೋರೆಯು ಬಹುಮುಖ್ಯ. ತಾಯಿಯ ಕಡೆಯ ಸಂಬಂಧದಲ್ಲಿ ಇರುವ ಅಡಚಣೆಗಳು ದೂರವಾಗುತ್ತವೆ. ಮುಖ್ಯವಾಗಿ ಸೋದರಮಾವನ ಸಹಾಯವು ದೊರೆಯುತ್ತದೆ.

ಇದನ್ನೂ ಓದಿ: 12 ವರ್ಷಗಳ ನಂತರ ರೋಹಿಣಿ ನಕ್ಷತ್ರದಲ್ಲಿ ಗುರು ಸಂಚಾರ; ಈ 3 ರಾಶಿಯವರಿಗೆ ಸಂಪತ್ತು ಹೆಚ್ಚಾಗುತ್ತೆ

ಗುರುವಿನ ಹೋರಾದಲ್ಲಿ ಒಳ್ಳೆಯ ಸಂತಾನದ ಬಗ್ಗೆ ಚಿಂತನೆ ನಡೆಸಬಹುದು. ಹಾಗೆಯೇ ಮನೆಯಲ್ಲಿರುವ ಚಿಕ್ಕ ಮಕ್ಕಳ ಆರೋಗ್ಯದ ಬಗ್ಗೆಯೂ ತಿಳಿಯುತ್ತದೆ. ಈ ಹೋರಾದಲ್ಲಿ ಮಕ್ಕಳಿಗೆ ನೀಡುವ ಔಷಧಿಯಿಂದ ಅವರ ಆರೋಗ್ಯದಲ್ಲಿ ಸ್ಥಿರತೆ ಕಂಡು ಬರುತ್ತದೆ. ಚಿನ್ನ ಬೆಳ್ಳಿಯ ಪದಾರ್ಥಗಳನ್ನು ತೆಗೆದುಕೊಳ್ಳುವ ಆಸೆ ಇದ್ದಲ್ಲಿ ಇದು ಒಳ್ಳೆಯ ಕಾಲವೆನಿಸುತ್ತದೆ. ಗುರುಗಳ ಭೇಟಿಗೆ ಈ ಹೋರಾದಲ್ಲಿ ವಿಶೇಷ ಅನುಕೂಲತೆ ಮತ್ತು ಉತ್ತಮ ಫಲಗಳು ದೊರೆಯುತ್ತವೆ.

ಶುಕ್ರವಾರದಲ್ಲಿ ದಂಪತಿಗಳ ನಡುವೆ ಇರುವ ವೈಮನಸ್ಸು ದೂರವಾಗುತ್ತದೆ. ಹೆಣ್ಣುಮಕ್ಕಳ ವಿಚಾರದಲ್ಲಿ ಯೋಚಿಸಲು ಇದು ಒಳ್ಳೆಯ ಕಾಲವಾಗುತ್ತದೆ. ದುಬಾರಿ ಬೆಲೆಯ ವಾಹನಗಳು ಅಥವಾ ಒಡವೆ ವಸ್ತ್ರಗಳು ಈ ಹೋರೆಯಲ್ಲಿ ದೊರೆಯುತ್ತದೆ. ನಿತ್ಯ ಜೀವನದಲ್ಲಿ ಉಂಟಾಗುವ ಬದಲಾವಣೆಗಳನ್ನು ಶುಕ್ರನ ಹೋರಾದಲ್ಲಿ ತಿಳಿದುಕೊಳ್ಳಬಹುದು. ಹಣವನ್ನು ಉಳಿಸುವ ಯೋಜನೆಗಳನ್ನು ರೂಪಿಸಲು ಇದು ಉತ್ತಮ ಕಾಲ ಎನಿಸುತ್ತದೆ.

ಶನಿಯ ಹೋರಾದಲ್ಲಿ ವೃತ್ತಿ ಜೀವನದ ಆಗುಹೋಗುಗಳ ಬಗ್ಗೆ ತಿಳಿಯಬಹುದು. ವೃತ್ತಿಕ್ಷೇತ್ರದಲ್ಲಿ ಇರುವ ತೊಂದರೆಗಳ ಬಗ್ಗೆ ಪರಿಹಾರವನ್ನು ಕಂಡು ಹಿಡಿಯಬಹುದು. ಈ ಅವಧಿಯಲ್ಲಿ ಮಾತುಕತೆಯಿಂದ ಅಧಿಕಾರಿಗಳು ಮತ್ತು ನಿಮ್ಮ ಸಹೋದ್ಯೋಗಿಗಳ ಜೊತೆಯಲ್ಲಿ ಇರುವ ಮನಸ್ತಾಪವು ಕೊನೆಯಾಗುತ್ತದೆ. ಲೋಹಕ್ಕೆ ಸಂಬಂಧಿಸಿದ ವ್ಯಾಪಾರದ ಬಗ್ಗೆಯೂ ಈ ಅವಧಿಯಲ್ಲಿ ತಿಳಿದುಕೊಳ್ಳಬಹುದು. ಹಾಗೆ ಲೋಹ ಸಂಬಂಧಿತ ವ್ಯಾಪಾರ ವ್ಯವಹಾರಗಳನ್ನು ಆರಂಭಿಸಲು ಇದು ಶ್ರೇಷ್ಠಕರ.

ಇದೇ ರೀತಿ ಸೋಮವಾರ ಚಂದ್ರ ಹೋರಾ, ಮಂಗಳವಾರ ಕುಜನ ಹೋರಾ, ಬುಧವಾರ ಬುಧಹೋರಾ, ಗುರುವಾರ ಗುರುಹೋರಾ, ಶುಕ್ರವಾರ ಶುಕ್ರಹೋರಾ ಮತ್ತು ಶನಿವಾರ ಶನಿಹೋರಾಗಳು ದಿನದ ಆರಂಭದಲ್ಲಿ ಇರುತ್ತದೆ.

(ಗಮನಿಸಿ: ಇದು ನಂಬಿಕೆ ಮತ್ತು ಶಾಸ್ತ್ರವನ್ನು ಆಧರಿಸಿದ ಬರಹ. ಇದರಲ್ಲಿರುವ ಎಲ್ಲ ಅಂಶಗಳನ್ನೂ "ಹಿಂದೂಸ್ತಾನ್ ಟೈಮ್ಸ್ ಕನ್ನಡ" ಪುಷ್ಟೀಕರಿಸುವುದಿಲ್ಲ. ನಿಮ್ಮ ಸ್ವಂತ ವಿವೇಚನೆ ಬಳಸಿ ನಿರ್ಧಾರಗಳನ್ನು ತೆಗೆದುಕೊಳ್ಳಿ.)

(ಬರಹ: ಎಚ್‌. ಸತೀಶ್)

ಇದನ್ನೂ ಓದಿ: ವಿವಾಹ ಭಾಗ್ಯ, ಆರೋಗ್ಯ, ಧನ ಕರುಣಿಸುವ ಈಶ್ವರ; ಗೌಹಾಟಿಯ ಶಕ್ತಿಶಾಲಿ ರುದ್ರೇಶ್ವರ ದೇವಾಲಯದ ಇತಿಹಾಸ ಹೀಗಿದೆ