ಬೆಂಗಳೂರಲ್ಲಿ ಕೂಡಲೀ ಶೃಂಗೇರಿ ಮಠದ ಶ್ರೀ ಅಭಿನವ ಶಂಕರ ಭಾರತೀ ಸ್ವಾಮೀಜಿ, ಡಿ 20 ರಿಂದ 31 ರ ತನಕ ವಿವಿಧ ಕಾರ್ಯಕ್ರಮ, ಇಲ್ಲಿದೆ ವಿವರ

ಬೆಂಗಳೂರು: ಕೂಡಲೀ ಶೃಂಗೇರಿ ಮಹಾ ಸಂಸ್ಥಾನದ ಪೀಠಾಧಿಪತಿ ಶ್ರೀ ಅಭಿನವ ಶಂಕರ ಭಾರತೀ ಸ್ವಾಮೀಜಿಯವರು ಡಿ.19ಕ್ಕೆ ಇದೇ ಮೊದಲ ಬಾರಿಗೆ ಬೆಂಗಳೂರಿಗೆ ಆಗಮಿಸುತ್ತಿದ್ದು, ರಾಗಿಗುಡ್ಡದ ಹನುಮಜ್ಜಯಂತಿ ಉತ್ಸವ ಸೇರಿ ಹಲವು ಕಾರ್ಯಕ್ರಮಗಳಲ್ಲಿ ಭಾಗವಹಿಸುತ್ತಿದ್ದಾರೆ.

ಕೂಡಲೀ ಶೃಂಗೇರಿ ಮಹಾ ಸಂಸ್ಥಾನದ 72ನೇ ಪೀಠಾಧಿಪತಿಯಾಗಿರುವ ಶ್ರೀ ಅಭಿನವ ಶಂಕರ ಭಾರತೀ ಸ್ವಾಮೀಜಿ ಡಿ.20 ರಿಂದ 31ರ ತನಕ ಬೆಂಗಳೂರು ನಗರದಲ್ಲಿ ವಿವಿಧ ಕಾರ್ಯಕ್ರಮಗಳಲ್ಲಿ ಭಾಗವಹಿಸಲಿದ್ದಾರೆ ಹಾಗೂ ಕೂಡಲಿ ಮಠದ ಅನುಯಾಯಿಗಳ ಮನೆಗಳಿಗೆ ಭೇಟಿ ಕೊಡಲಿದ್ದಾರೆ ಎಂದು ಶ್ರೀಮಠ ತಿಳಿಸಿದೆ.

ಇದನ್ನೂ ಓದಿ| ಹತ್ತಿರವೇ ಇದೆ ವೈಕುಂಠ ಏಕಾದಶಿ; ಸ್ವರ್ಗದ ಬಾಗಿಲು ತೆಗೆಯುವ ಈ ದಿನದ ಮಹತ್ವ, ಉಪವಾಸ ವಿಧಿ, ಪೂಜಾ ವಿಧಾನಗಳ ಮಾಹಿತಿ

ಸ್ವಾಮೀಜಿಯವರ ಈ ಪ್ರವಾಸಕ್ಕೆ ಐತಿಹಾಸಿಕ ಮಹತ್ವ ಇದ್ದು, ಕರ್ನಾಟಕ, ಮಹಾರಾಷ್ಟ್ರ, ತಮಿಳುನಾಡು, ಆಂಧ್ರ ಹಾಗೂ ಹಾಗೂ ತೆಲಂಗಾಣದಿಂದ ಬೆಂಗಳೂರಿಗೆ ವಲಸೆ ಬಂದು ನೆಲೆಸಿರುವ ಕೂಡಲಿ ಮಠದ ಅನುಯಾಯಿ ಕುಟುಂಬಗಳ ದಶಕಗಳ ಪ್ರತೀಕ್ಷೆ ಮತ್ತು ನಿರೀಕ್ಷೆ ಕೈಗೂಡಲಿದೆ.

ಸ್ವಾಮೀಜಿಯವರು ಡಿ.19ರಂದು ಸಂಜೆ ರಾಗಿಗುಡ್ಡ ಆಂಜನೇಯ ದೇವಸ್ಥಾನದ ಬಳಿ ಪುರಪ್ರವೇಶ ಮಾಡಲಿದ್ದಾರೆ. ಅಲ್ಲಿ ಅವರಿಗೆ ಪೂರ್ಣಕುಂಭ ಸ್ವಾಗತ, ಧೂಳಿಪಾದ ಪೂಜೆ ನೆರವೇರಲಿದೆ.

ಇದಾಗಿ, ಡಿ.20ರಂದು ರಾಗಿಗುಡ್ಡದ ಹನುಮಜ್ಜಯಂತಿ ಉತ್ಸವ ಹಾಗೂ ಸಹಸ್ರ ಕುಂಭಾಭಿಷೇಕ ಕಾರ್ಯಕ್ರಮವನ್ನು ಸ್ವಾಮಿಗಳು ಉದ್ಘಾಟಿಸಿ, ಅನೇಕ ವಿದ್ವಾಂಸರನ್ನು ಸನ್ಮಾನಿಸಲಿದ್ದಾರೆ.

ಇದನ್ನೂ ಓದಿ| ಕುಕ್ಕೆ ಸುಬ್ರಹ್ಮಣ್ಯದಲ್ಲಿ ಅದ್ಧೂರಿ ಬ್ರಹ್ಮರಥೋತ್ಸವ ಕಣ್ತುಂಬಿಕೊಂಡ ಸಾವಿರಾರು ಭಕ್ತರು; ಫೋಟೋಸ್

ವಿಶ್ವ ಹಿಂದೂ ಪರಿಷತ್‌ ಸಹಯೋಗದಲ್ಲಿ ಡಿ.22ರಂದು ಗೀತಾ ಜಯಂತಿ ಪ್ರಯುಕ್ತ ಎನ್‌ ಆರ್‌ ಕಾಲೋನಿ ರಾಮಮಂದಿರದಲ್ಲಿ ಸಾಮೂಹಿಕ ಭಗವದ್ಗೀತಾ ಪಾರಾಯಣ ಯಜ್ಞವನ್ನು ಆಯೋಜಿಸಲಾಗಿದೆ. ಈ ಕಾರ್ಯಕ್ರಮದಲ್ಲಿ ಕೂಡ ಸ್ವಾಮೀಜಿಯವರು ಸಾನ್ನಿಧ್ಯವಹಿಸಲಿದ್ದಾರೆ.

ಮಿಥಿಕ್ ಸೊಸೈಟಿಯಲ್ಲಿ ಡಿ.24ರಂದು ಬೆಳಗ್ಗೆ ಸ್ವಾಮೀಜಿಯವರ ವಿಶೇಷ ಉಪನ್ಯಾಸ ಆಯೋಜನೆಯಾಗಿದೆ.

ಬೆಂಗಳೂರಿನ ಎಜಿಎಸ್ ಲೇಔಟ್‌ನ ಸಿದ್ಧೇಶ್ವರಿ ರಾಜರಾಜೇಶ್ವರಿ ದೇವಸ್ಥಾನದಲ್ಲಿ ಡಿ.25ರ ಮುಂಜಾನೆ ಸಂಸ್ಥಾನದ ಪೂಜೆ ನೆರವೇರಲಿದೆ.

ಇದನ್ನೂ ಓದಿ| ಪಂದಳಕಂದ ಶಬರಿಮಲೆಯಲ್ಲಿ ನೆಲೆಸಲು ಕಾರಣವೇನು, ಅಯ್ಯಪ್ಪಸ್ವಾಮಿ ಜನನದ ಉದ್ದೇಶವೇನು; ಇಲ್ಲಿದೆ ಮಣಿಕಂಠನ ಕಥೆ

ಕಳೆದ ಮೇ ತಿಂಗಳಲ್ಲಿ ಶ್ರೀ ಅಭಿನವ ಶಂಕರ ಭಾರತೀ ಸ್ವಾಮೀಜಿ ಕೂಡಲೀ ಶೃಂಗೇರಿ ಮಹಾ ಸಂಸ್ಥಾನದ 72ನೇ ಪೀಠಾಧಿಪತಿಯಾಗಿ ಹೊಣೆಗಾರಿಕೆ ವಹಿಸಿದ್ದು, ಆರೇಳು ತಿಂಗಳ ಅವಧಿಯಲ್ಲಿ ಶ್ರೀಮಠದ ವತಿಯಿಂದ ಹೊಸ ಗುರುಕುಲದ ಸ್ಥಾಪನೆ, ಅದ್ದೂರಿ ದಸರಾ ಆಚರಣೆ ಮೊದಲಾದ ಚಟುವಟಿಕೆಗಳನ್ನು ಆಯೋಜಿಸಿ ಗಮನಸೆಳೆದಿದ್ದಾರೆ.