ವಿರಾಟ್ ಕೊಹ್ಲಿ ಬೆಂಬಲಿಸಲು ಪರ್ತ್ ಸ್ಟೇಡಿಯಂಗೆ ಬಂದ ಅನುಷ್ಕಾ ಶರ್ಮಾ; ರಾಜನ ಬೆಂಬಲಕ್ಕೆ ರಾಣಿ ಬಂದ್ರು ಎಂದ ಫ್ಯಾನ್ಸ್

ಭಾರತ ಮತ್ತು ಆಸ್ಟ್ರೇಲಿಯಾ ತಂಡಗಳ ನಡುವಿನ ಮೊದಲ ಟೆಸ್ಟ್ ಪಂದ್ಯವು ಪರ್ತ್‌ನ ಆಪ್ಟಸ್ ಕ್ರೀಡಾಂಗಣದಲ್ಲಿ ನಡೆಯುತ್ತಿದೆ. ಎರಡನೇ ದಿನದಾಟ ಅಂತ್ಯಗೊಂಡಿದ್ದು, ಟೀಮ್‌ ಇಂಡಿಯಾ ಮುನ್ನಡೆ ಕಾಯ್ದುಕೊಂಡಿದೆ. ಮೊದಲ ದಿನದಾಟದಲ್ಲಿ ಬ್ಯಾಟಿಂಗ್‌ನಲ್ಲಿ ಭಾರತ ತಂಡದ ಆಟಗಾರರು ಕಳಪೆ ಪ್ರದರ್ಶನ ನೀಡಿದ್ದರು. ಮಾಜಿ ನಾಯಕ ವಿರಾಟ್‌ ಕೊಹ್ಲಿ, ಮತ್ತೊಮ್ಮೆ ವೈಫಲ್ಯ ಅನುಭವಿಸಿ ಒಂದಂಕಿ ಮೊತ್ತಕ್ಕೆ ವಿಕೆಟ್‌ ಚೆಲ್ಲಿದರು. ಹೀಗಾಗಿ ಸೋಷಿಯಲ್‌ ಮೀಡಿಯಾದಲ್ಲಿ ಕೊಹ್ಲಿ ವಿರುದ್ಧ ವ್ಯಾಪಕ ಟೀಕೆಗಳು ವ್ಯಕ್ತವಾದವು. ಅದರ ಬೆನ್ನಲ್ಲೇ ಎರಡನೇ ದಿನದಾಟದ ವೇಳೆ ಪರ್ತ್‌ ಸ್ಟೇಡಿಯಂನಲ್ಲಿ ಕೊಹ್ಲಿ ಪತ್ನಿ ಅನುಷ್ಕಾ ಶರ್ಮಾ ಕಾಣಿಸಿಕೊಂಡಿದ್ದಾರೆ.

ಪತಿ ವಿರಾಟ್ ಕೊಹ್ಲಿ ಮತ್ತು ಟೀಮ್ ಇಂಡಿಯಾಗೆ ಬೆಂಬಲಿಸಲು ಸ್ಟೇಡಿಯಂಗೆ ಬಂದಿದ್ದ ಅನುಷ್ಕಾ ಶರ್ಮಾ, ಫುಲ್ ಚಿಯರಿಂಗ್ ಮೋಡ್‌ನಲ್ಲಿದ್ದರು. ಸ್ಟ್ಯಾಂಡ್‌ನಲ್ಲಿ ಕುಳಿತು ಉತ್ಸಾಹದಿಂದ ಆಟಗಾರರತ್ತ ಹುರಿದುಂಬಿಸಿದರು. ಇದನ್ನು ಗುರುತಿಸಿದ ಅಭಿಮಾನಿಗಳು ಕೂಡಾ ಖುಷಿಯಿಂದ ಕುಣಿದಾಡಿದ್ದಾರೆ.

ಸಿಂಪಲ್ ಆಗಿ ಬಿಳಿ ಟಿ-ಶರ್ಟ್ ಧರಿಸಿ ಅನುಷ್ಕಾ ಕ್ರೀಡಾಂಗಣಕ್ಕೆ ಬಂದಿದ್ದಾರೆ. ಸರಳವಾಗಿ ಕಾಣಿಸಿಕೊಂಡು ಆಟಗಾರರಿಗೆ ಬೆಂಬಲ ಸೂಚಿಸಿದ್ದಾರೆ. ಸ್ಟೇಡಿಯಂನಲ್ಲಿ ನಟಿ ಕಾಣಿಸಕೊಂಡಿರುವ ಹಲವಾರು ಫೋಟೋ ಹಾಗೂ ವಿಡಿಯೋಗಳು ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್‌ ಆಗಿವೆ.

ಒಂದು ಕ್ಲಿಪ್‌ನಲ್ಲಿ ಅವರು ಚಪ್ಪಾಳೆ ತಟ್ಟಿ ಆಟಗಾರರನ್ನು ಹುರಿದುಂಬಿಸುತ್ತಿದ್ದರೆ, ಮತ್ತೊಂದು ಕಡೆ ತಿನ್ನಲ್ಲು ತಟ್ಟೆ ಹಿಡಿದು ನಿಂತಿದ್ದಾರೆ. ಇದೇ ವೇಳೆ ಮಿಚೆಲ್ ಸ್ಟಾರ್ಕ್ ಅವರನ್ನು ಔಟ್ ಮಾಡಲು ವಿರಾಟ್ ಕೊಹ್ಲಿಯಿಂದ ಹರ್ಷಿತ್ ರಾಣಾ ಸಲಹೆ ಪಡೆಯುವಾಗ ಆಂಕರ್‌ ಸಂಜನಾ ಗಣೇಶನ್ ಅವರೊಂದಿಗೆ ಅನುಷ್ಕಾ ಸಂಭ್ರಮಿಸುತ್ತಿರುವುದು ಕಂಡುಬಂದಿದೆ.

ಇದನ್ನೂ ಓದಿ | ರಾಹುಲ್ ದ್ರಾವಿಡ್ ಐಪಿಎಲ್ ಹರಾಜು ತಂತ್ರಕ್ಕೆ ಬ್ರೇಕ್ ಹಾಕಿದ ಬುಮ್ರಾ- ಸಿರಾಜ್‌; ವಿಡಿಯೋ ಹಂಚಿಕೊಂಡ ರಾಜಸ್ಥಾನ್ ರಾಯಲ್ಸ್

ತಮ್ಮ ಪತಿಯನ್ನು ಬೆಂಬಲಿಸಲು ಅನುಷ್ಕಾ ಮುಂದೆ ಬರುವುದನ್ನು ನೋಡಿ ಅಭಿಮಾನಿಗಳು ಪುಳಕಿತರಾಗಿದ್ದಾರೆ. “ಅವರು ಕೊಹ್ಲಿಯ ದೊಡ್ಡ ಸಪೋರ್ಟ್,” ಎಂದು ಒಬ್ಬ ಬಳಕೆದಾರರು ಬರೆದಿದ್ದಾರೆ. ಇನ್ನೊಬ್ಬರು “ರಾಣಿ ರಾಜನನ್ನು ಬೆಂಬಲಿಸುತ್ತಾರೆ” ಎಂದು ಬರೆದಿದ್ದಾರೆ.

ಅನುಷ್ಕಾ ಮತ್ತು ವಿರಾಟ್ ದಂಪತಿ 2021ರ ಜನವರಿ 11ರಂದು ಮೊದಲ ಮಗಳು ವಮಿಕಾ ಅವರನ್ನು ಸ್ವಾಗತಿಸಿದರು. 2024ರ ಫೆಬ್ರವರಿ 15ರಂದು ಕಿರಿಯ ಮಗ ಅಕಾಯ್‌ಗೆ ಅನುಷ್ಕಾ ಲಂಡನ್‌ನಲ್ಲಿ ಜನ್ಮವಿತ್ತರು. ಮಗುವಿನ ಫೋಟೋ ಇನ್ನೂ ರಿವೀಲ್‌ ಮಾಡಿಲ್ಲ.

ಅನುಷ್ಕಾ ಶರ್ಮಾ ಮತ್ತು ವಿರಾಟ್ ಕೊಹ್ಲಿ ಸಾಮಾನ್ಯವಾಗಿ ಲಂಡನ್ ಅಥವಾ ಮುಂಬೈನಲ್ಲಿ ನೆಲೆಸುತ್ತಾರೆ. ಸ್ಟಾರ್‌ ಜೋಡಿಗೆ ಎರಡೂ ನಗರಗಳಲ್ಲಿ ಮನೆಗಳಿವೆ. ಅನುಷ್ಕಾ 2018ರಲ್ಲಿ ಬಿಡುಗಡೆಯಾದ ಕೊನೆಯ ಚಿತ್ರ ಝೀರೋ ನಂತರ ಚಿತ್ರರಂಗದಿಂದ ದೂರವಿದ್ದಾರೆ. 2022ರಲ್ಲಿ ಜೂಲನ್ ಗೋಸ್ವಾಮಿ ಅವರ ಜೀವನಚರಿತ್ರೆ ಆಧಾರಿತ ಚಕ್ಡಾ ಎಕ್ಸ್‌ಪ್ರೆಸ್ ಕೆಲಸ ಮುಗಿಸಿದ್ದಾರೆ. ಆದರೆ, ಚಿತ್ರವು ಇನ್ನೂ ಬಿಡುಗಡೆಯಾಗಿಲ್ಲ.

ಇದನ್ನೂ ಓದಿ | ಬಂಡೆಗಲ್ಲಿನಂತೆ ನಿಂತು ಆಸ್ಟ್ರೇಲಿಯಾ ಬೌಲಿಂಗ್ ಎದುರಿಸಿದ ರಾಹುಲ್-ಜೈಸ್ವಾಲ್; ಅಜೇಯ 172 ರನ್ ಜೊತೆಯಾಟ, ಭರ್ಜರಿ ಮುನ್ನಡೆ