ಲಿಫ್ಟ್​ನಲ್ಲೇ ಸಿಲುಕಿದ ಥರ್ಡ್ ಅಂಪೈರ್; ಕ್ರಿಕೆಟರ್ಸ್, ಮೈದಾನದ ಅಂಪೈರ್ಸ್, ಪ್ರೇಕ್ಷಕರಿಗೆ ನಗುವೋ ನಗು

ಮೆಲ್ಬರ್ನ್​ ಕ್ರಿಕೆಟ್ ಮೈದಾನದಲ್ಲಿ (Melbourne Cricket Ground) ಆಸ್ಟ್ರೇಲಿಯಾ ಮತ್ತು ಪಾಕಿಸ್ತಾನ (Australia vs Pakistan, 2nd Test) ನಡುವಿನ ಬಾಕ್ಸಿಂಗ್ ಡೇ ಟೆಸ್ಟ್​ (Boxing Day Test) 3ನೇ ದಿನದಾಟದ ಎರಡನೇ ಸೆಷನ್​ಗೂ ಮುನ್ನ ತಾಂತ್ರಿಕ ದೋಷದಿಂದ ಮೂರನೇ ಅಂಪೈರ್ ಲಿಫ್ಟ್‌ನಲ್ಲಿ ಸಿಲುಕಿಕೊಂಡ ಫನ್ನಿ ಸನ್ನಿವೇಶ ನಡೆಯಿತು. ಅನಿರೀಕ್ಷಿತ ಟ್ವಿಸ್ಟ್​​ನಿಂದ ಪಂದ್ಯ ಕೆಲ ನಿಮಿಷಗಳ ಕಾಲ ತಡವಾಗಿ ಆರಂಭಗೊಂಡಿತು.

ಲಿಫ್ಟ್​ನಲ್ಲಿ ಸಿಲುಕಿಕೊಂಡ ಥರ್ಡ್ ಅಂಪೈರ್ಸ್

ಅಸಮರ್ಪಕವಾದ ಲಿಫ್ಟ್​​ನಿಂದ ಪಂದ್ಯದ ಮೂರನೇ ಅಂಪೈರ್ ರಿಚರ್ಡ್ ಇಲ್ಲಿಂಗ್ವರ್ತ್ (Richard Illingworth) ಲಿಫ್ಟ್​ನಲ್ಲಿ ಸಿಕ್ಕಿ ಹಾಕಿಕೊಂಡಿದ್ದರು. ಪಂದ್ಯದ ಎರಡನೇ ಸೆಷನ್​​ಗೂ ಮುನ್ನ ಮೂರನೇ ಅಂಪೈರ್​ ಕಡೆಗೆ ಆನ್​ಫೀಲ್ಡ್​ ಅಂಪೈರ್​​ಗಳು ಕಣ್ಣಾಡಿಸಿ ನೋಡಿದಾಗ ಈ ದೃಶ್ಯ ಬೆಳಕಿಗೆ ಬಂತು. ಅವರು ಬರುವವರೆಗೂ ನಿಮಿಷಗಳ ಕಾಲ ವಿಳಂಬ ಮಾಡಲಾಯಿತು.

ಇದನ್ನೂ ಓದಿ : 99 ರನ್ನಿಂದ ಶತಕ ವಂಚಿತರಾದ ಬಾಬರ್ ಅಜಮ್; 1 ರನ್ ಗಳಿಸಿ ಔಟಾದ ಪಾಕ್ ಮಾಜಿ ನಾಯಕ ಫುಲ್ ಟ್ರೋಲ್

ಎರಡನೇ ಸೆಷನ್​ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಪಾಕಿಸ್ತಾನ ಬೌಲಿಂಗ್​ ಆರಂಭಿಸಲು ಆಟಗಾರರು ಮೈದಾನಕ್ಕೆ ಮರಳಿದ್ದರು. ಆದರೆ ಬೌಲರ್ ಇನ್ನೇನು ಬೌಲ್​ ಮಾಡಬೇಕು ಎನ್ನುವಷ್ಟರಲ್ಲಿ ಇಲಿಂಗ್ವರ್ತ್‌ ಕಾಣಲಿಲ್ಲ. ಹಾಗಾಗಿ ಹಠಾತ್ ವಿರಾಮ ಘೋಷಿಸಲಾಯಿತು. ಇದು ಗೊಂದಲ ಮತ್ತು ಫನ್ನಿ ಘಟನೆಗೆ ಕಾರಣವಾಯಿತು.

ನಗುವಿನ ಅಲೆಯಲ್ಲಿ ತೇಲಿದ ಮೈದಾನ

ಆದರೆ ಈ ದೃಶ್ಯ ಸಂಪೂರ್ಣ ಹಾಸ್ಯಮಯಕ್ಕೆ ತಿರುಗಿತ್ತು. ಮೈದಾನದಲ್ಲಿ ಜಮಾಯಿಸಿದ್ದ ಆಟಗಾರರು ಮತ್ತು ಆನ್​ಫೀಲ್ಡ್​ ಅಂಪೈರ್​​ಗಳೇ ನಕ್ಕು ನಕ್ಕು ಸಾಕಾದರು. ಅದರಲ್ಲೂ ಡೇವಿಡ್ ವಾರ್ನರ್ ಅಂತೂ ಬಿದ್ದೂ ಬಿದ್ದೂ ನಕ್ಕರು. ಪ್ರೇಕ್ಷಕರ ಸ್ಟ್ಯಾಂಡ್‌ಗಳಲ್ಲಿ ನಗುವಿನ ಅಲೆಗಳ ಸುರಿಮಳೆಯಾಯಿತು.

ಮೀಮ್ಸ್​ ಸೃಷ್ಟಿ

ಅಷ್ಟೇ ಅಲ್ಲದೆ, ಸಾಮಾಜಿಕ ಮಾಧ್ಯಮದಲ್ಲಿ ವಿವಿಧ ಮೀಮ್‌ಗಳ ಸೃಷ್ಟಿಗೂ ಕಾರಣವಾಯಿತು. ಬಗೆ ಬಗೆಯ ಮೀಮ್ಸ್​ಗಳು ಸಖತ್ ವೈರಲ್ ಆಗುತ್ತಿದ್ದು, ನೆಟ್ಟಿಗರನ್ನು ನಗಿಸುತ್ತಿವೆ. ಮೈದಾನದಲ್ಲಿ ನೆರೆದಿದ್ದ ಪ್ರತಿಯೊಬ್ಬರು ಸಹ ನಗುವಿನ ಅಲೆಯಲ್ಲಿ ತೇಲಿದ್ದಾರೆ. ಕ್ರಿಕೆಟ್ ಆಸ್ಟ್ರೇಲಿಯ ಕೂಡ ಟ್ವಿಟ್ಟರ್‌ನಲ್ಲಿ ಕಿಚಾಯಿಸಿದೆ.

ಇದನ್ನೂ ಓದಿ : KBC 15: ಸಚಿನ್​ ಕುರಿತ ಪ್ರಶ್ನೆಗೆ ತಡಬಡಾಯಿಸಿ ತಪ್ಪು ಉತ್ತರ ಕೊಟ್ಟ ಸ್ಮೃತಿ ಮಂಧಾನ-ಇಶಾನ್ ಕಿಶನ್; ಯಾವುದು ಆ ಪ್ರಶ್ನೆ?

ಕೆಲ ಸಮಯದ ನಂತರ ಇಲ್ಲಿಂಗ್‌ವರ್ತ್ ಹೊರಬಂದರು. ಪ್ರೇಕ್ಷಕರು ಹರ್ಷೋದ್ಗಾರಗಳು ಮತ್ತು ಚಪ್ಪಾಳೆಗಳಿಂದ ಅವರನ್ನು ಸ್ವಾಗತಿಸಿದರು. ಆಸ್ಟ್ರೇಲಿಯಾ ಎರಡನೇ ಇನ್ನಿಂಗ್ಸ್​ನಲ್ಲಿ ಬ್ಯಾಟಿಂಗ್ ನಡೆಸುತ್ತಿತ್ತು. ಮಿಚೆಲ್ ಮಾರ್ಷ್​ ಉತ್ತಮವಾಗಿ ಬ್ಯಾಟಿಂಗ್ ನಡೆಸುವ ಮೂಲಕ ಗಮನ ಸೆಳೆದರು.

ಮೂರನೇ ದಿನದಾಟ ಮುಕ್ತಾಯ

ಸದ್ಯ 3ನೇ ದಿನದಾಟ ಮುಕ್ತಾಯಗೊಂಡಿದೆ. ಮೆಲ್ಬರ್ನ್​ ಕ್ರಿಕೆಟ್ ಮೈದಾನದಲ್ಲಿ ಟಾಸ್ ಗೆದ್ದು ಮೊದಲು ಬೌಲಿಂಗ್ ಆಯ್ಕೆ ಮಾಡಿಕೊಂಡ ಪಾಕ್​, ಉತ್ತಮ ಬೌಲಿಂಗ್ ಪ್ರದರ್ಶನ ನೀಡಿತು. ಪರಿಣಾಮ ಮೊದಲ ಇನ್ನಿಂಗ್ಸ್​​ನಲ್ಲಿ ಆಸ್ಟ್ರೇಲಿಯಾ 314 ರನ್ ಗಳಿಗೆ ಆಲೌಟ್​ ಆಯಿತು.

ಇದಕ್ಕೆ ಪ್ರತ್ಯುತ್ತರವಾಗಿ ಬ್ಯಾಟಿಂಗ್ ನಡೆಸಿದ ಪಾಕ್​, ಮತ್ತೆ ಕಳಪೆ ನಿರಾಸೆ ಮೂಡಿಸಿತು. 264 ರನ್​​ಗೆ ಸರ್ವಪತನ ಕಂಡು 54 ರನ್​ಗಳ ಹಿನ್ನಡೆ ಅನುಭವಿಸಿತು. ಈಗ ಆಸೀಸ್​​ 2ನೇ ಇನ್ನಿಂಗ್ಸ್​​​ನಲ್ಲಿ 54 ರನ್​ಗಳ ಮುನ್ನಡೆಯಿಂದ 6 ವಿಕೆಟ್​ಗೆ 241 ರನ್ ಗಳಿಸಿದೆ. ನಾಲ್ಕನೇ ದಿನವೂ ಬ್ಯಾಟಿಂಗ್​ ಮುಂದುವರೆಸಲಿದೆ.