ಕೃಷ್ಣನ್ ಶ್ರೀಜಿತ್ ಸ್ಫೋಟಕ 150, ಮುಂಬೈ ವಿರುದ್ಧ 383 ರನ್ ಗುರಿ ಬೆನ್ನಟ್ಟಿ ಗೆದ್ದ ಕರ್ನಾಟಕ; ಅಯ್ಯರ್ ವೇಗದ ಶತಕ ವ್ಯರ್ಥ

ಇಂದಿನಿಂದ (ಡಿಸೆಂಬರ್​ 21) ಆರಂಭಗೊಂಡ ವಿಜಯ್ ಹಜಾರೆ ಟ್ರೋಫಿಯಲ್ಲಿ ತನ್ನ ಆರಂಭಿಕ ಪಂದ್ಯದಲ್ಲಿ ಮುಂಬೈ ವಿರುದ್ಧ ಕರ್ನಾಟಕ 7 ವಿಕೆಟ್​ಗಳ ಭರ್ಜರಿ ಗೆಲುವು ದಾಖಲಿಸಿದೆ. ಕೃಷ್ಣನ್ ಶ್ರೀಜಿತ್ (150) ಅಬ್ಬರಕ್ಕೆ ಮಂಡಿಯೂರಿದ ಮುಂಬೈ ಹೀನಾಯ ಸೋಲಿಗೆ ಶರಣಾಗಿದೆ. ಶ್ರೇಯಸ್ ಅಯ್ಯರ್ ನಾಯಕತ್ವದ ತಂಡವು ಪೇರಿಸಿದ್ದ 383 ರನ್​ಗಳ ಗುರಿ ಬೆನ್ನಟ್ಟಿದ ಕರ್ನಾಟಕ, ಇನ್ನೂ 22 ಎಸೆತಗಳನ್ನು ಬಾಕಿ ಉಳಿಸಿ ಗೆಲುವಿನ ನಗೆ ಬೀರಿ ಟೂರ್ನಿಯಲ್ಲಿ ಶುಭಾರಂಭ ಕಂಡಿದೆ. ಇದರೊಂದಿಗೆ ಬೃಹತ್ ಟಾರ್ಗೆಟ್​ ಅನ್ನು ಚೇಸ್ ಮಾಡುವ ಮೂಲಕ ದಾಖಲೆ ಕೂಡ ಬರೆದಿದೆ.

ಅಹ್ಮದಾಬಾದ್​ನ ನರೇಂದ್ರ ಮೋದಿ ಕ್ರಿಕೆಟ್ ಸೇಡಿಯಂ ಬಿ ಗ್ರೌಂಡ್​ನಲ್ಲಿ ನಡೆದ ಸಿ ಗುಂಪಿನ ಪಂದ್ಯದಲ್ಲಿ ಟಾಸ್ ಜಯಿಸಿದ ಕರ್ನಾಟಕ ಬೌಲಿಂಗ್ ಆಯ್ಕೆ ಮಾಡಿಕೊಂಡಿತು. ಅದರಂತೆ ಮೊದಲು ಬ್ಯಾಟಿಂಗ್ ನಡೆಸಿದ ಮುಂಬೈ, ನಿಗದಿತ 50 ಓವರ್​​ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 382 ರನ್​ಗಳ ಬೃಹತ್ ಮೊತ್ತ​ ಪೇರಿಸಿತು. ಶ್ರೇಯಸ್ ಅಯ್ಯರ್ ವೇಗದ ಶತಕ (114 ರನ್) ಸಿಡಿಸಿದರೆ, ಹಾರ್ದಿಕ್ ತಮೋರ್ 84, ಶಿವಂ ದುಬೆ 63 ರನ್ ಚಚ್ಚಿದರು. ಗುರಿ ಬೆನ್ನಟ್ಟಿದ ಕರ್ನಾಟಕ 46.2 ಓವರ್​ಗಳಲ್ಲಿ 383 ರನ್ ಬಾರಿಸಿ ಗೆದ್ದು ಬೀಗಿತು. ಶ್ರೀಜಿತ್ ಕೃಷ್ಣನ್ 150* ರನ್ ಸಿಡಿಸಿದರು.

ಶ್ರೇಯಸ್ ಅಯ್ಯರ್​, ಶಿವಂ ದುವೆ ಅಬ್ಬರ

ಮೊದಲು ಬ್ಯಾಟಿಂಗ್ ನಡೆಸಿದ ಮುಂಬೈ, ಆಂಗ್ಕ್ರಿಶ್ ರಘುವಂಶಿ (6) ಅವರನ್ನು ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು. ವಿದ್ಯಾದರ್ ಪಾಟೀಲ್ ಆರಂಭಿಕ ಆಘಾತ ನೀಡಿದರು. ಆದರೆ, ಆಯುಷ್ ಮ್ಹಾತ್ರೆ ಮತ್ತು ಹಾರ್ದಿಕ್​ ತಮೋರ್​ ಅದ್ಭುತ ಜೊತೆಯಾಟವಾಡಿದರು. ಇಬ್ಬರು ಸಹ ಅರ್ಧಶತಕ ಬಾರಿಸಿದರು. ಎರಡನೇ ವಿಕೆಟ್​ಗೆ 141 ರನ್​ಗಳ ಪಾಲುದಾರಿಕೆ ಒದಗಿಸಿದರು. ಆಯುಷ್ 82 ಎಸೆತಗಳಲ್ಲಿ 6 ಬೌಂಡರಿ, 2 ಸಿಕ್ಸರ್ ಸಹಿತ 78 ರನ್ ಗಳಿಸಿ ಪ್ರವೀಣ್ ದುಬೆ ಬೌಲಿಂಗ್​ನಲ್ಲಿ ಔಟಾದರು. ಬಳಿಕ ಹಾರ್ದಿಕ್ 94 ಎಸೆತಗಳಲ್ಲಿ 7 ಬೌಂಡರಿ, 3 ಸಿಕ್ಸರ್ ಸಹಿತ 84 ರನ್ ಪೇರಿಸಿದರು. ಶ್ರೇಯಸ್ ಗೋಪಾಲ್ ವಿಕೆಟ್ ಪಡೆದರು.

ಇದನ್ನೂ ಓದಿ: ಧೀರೂಭಾಯಿ ಅಂಬಾನಿ ಸ್ಕೂಲ್‌ನಲ್ಲಿ ರೋಹಿತ್ ಶರ್ಮಾ ಪುತ್ರಿ ಸಮೈರಾ ಕ್ಯೂಟ್ ಡ್ಯಾನ್ಸ್, ಚೆಂದದ ವಿಡಿಯೋ ಇಲ್ಲಿದೆ

ನಾಲ್ಕನೇ ಕಣಕ್ಕಿಳಿದ ಶ್ರೇಯಸ್ ಅಯ್ಯರ್ ಬೆಂಕಿ ಬಿರುಗಾಳಿ ಬ್ಯಾಟಿಂಗ್ ನಡೆಸಿದರು. ಅಯ್ಯರ್ ಬರುವುದಕ್ಕೂ ಮುನ್ನ ತಂಡ ಸುಸ್ಥಿತಿಯಲ್ಲಿತ್ತು. ಆರಂಭದಿಂದಲೇ ವೇಗದ ಬ್ಯಾಟಿಂಗ್​ಗೆ ಕೈ ಹಾಕಿದ ಅಯ್ಯರ್, ಬೌಂಡರಿ ಸಿಕ್ಸರ್​ಗಳ ಸುರಿಮಳೆಗೈದರು. ಇದರ ಮಧ್ಯೆ ಸೂರ್ಯಕುಮಾರ್​ 20 ರನ್ ಸಿಡಿಸಿ ಔಟಾದರು. ಬಳಿಕ ಅಯ್ಯರ್​ಗೆ ಶಿವಂ ದುವೆ ಜೋಡಿಯಾದರು. ಇಬ್ಬರ ಜುಗಲ್ಬಂದಿ ಕರ್ನಾಟಕಕ್ಕೆ ತಲೆನೋವು ತರಿಸಿತು. 5ನೇ ವಿಕೆಟ್​ಗೆ ಅಜೇಯ 148 ರನ್​ಗಳ ಜೊತೆಯಾಟ ಬಂತು. ಅಯ್ಯರ್​ 55 ಎಸೆತಗಳಲ್ಲಿ 114 ರನ್ ಬಾರಿಸಿದರೆ, ದುಬೆ 36 ಎಸೆತಗಳಲ್ಲಿ ತಲಾ 5 ಸಿಕ್ಸರ್, ಬೌಂಡರಿ ಸಹಿತ 63 ರನ್ ಚಚ್ಚಿದರು.

ಶ್ರೀಜಿತ್, ಅನೀಶ್, ಪ್ರವೀಣ್ ಆಟಕ್ಕೆ ಮುಂಬೈ ಕಂಗಾಲು

ಬೃಹತ್ ಗುರಿಯನ್ನು ಹಿಂಬಾಲಿಸಿದ ಕರ್ನಾಟಕ ಉತ್ತಮ ಆರಂಭ ಪಡೆಯುವ ಮುನ್ಸೂಚನೆ ನೀಡಿತು. ಆದರೆ, ತಂಡದ ಮೊತ್ತ 36 ರನ್​ ಆಗಿದ್ದಾಗ ನಿಕಿನ್ ಜೋನ್ಸ್ (21), ಜುನೇದ್ ಖಾನ್ ಬೌಲಿಂಗ್​ನಲ್ಲಿ ಹೊರ ನಡೆದರು. ಉತ್ತಮ ಲಯದಲ್ಲಿದ್ದ ಮಯಾಂಕ್ ಅಗರ್ವಾಲ್ 47 ರನ್ ಸಿಡಿಸಿ ಅರ್ಧಶತಕದ ಅಂಚಿನಲ್ಲಿ ಎಡವಿದರು. ಬಳಿಕ ಒಂದಾದ ಅನೀಶ್ ಕೆವಿ ಮತ್ತು ಕೃಷ್ಣನ್ ಶ್ರೀಜಿತ್ ಅವರು ಬೌಲರ್​ಗಳ ವಿರುದ್ಧ ದಂಡಯಾತ್ರೆ ನಡೆಸಿದರು. ಈ ಜೋಡಿ ಮೂರನೇ ವಿಕೆಟ್​ಗೆ 94 ರನ್ ಪೇರಿಸಿತು. ವೇಗವಾಗಿ ಬ್ಯಾಟಿಂಗ್ ನಡೆಸಿದ ಪರಿಣಾಮ ಗುರಿ ಕಡಿಮೆ ಆಗುತ್ತಾ ಹೋಯಿತು. ಇದು ಒತ್ತಡವನ್ನೂ ಕಡಿಮೆ ಮಾಡಿತು.

ಇದನ್ನೂ ಓದಿ: ಗಿಲ್ ಜತೆಗೆ ಜಡೇಜಾ, ಸಿರಾಜ್ ಔಟ್, ಮೂವರು ಇನ್; ಬಾಕ್ಸಿಂಗ್ ಡೇ ಟೆಸ್ಟ್​ಗೆ ಭಾರತದ ಸಂಭಾವ್ಯ ಪ್ಲೇಯಿಂಗ್ 11

ಅನೀಶ್ 66 ಎಸೆತಗಳಲ್ಲಿ 9 ಬೌಂಡರಿ, 3 ಸಿಕ್ಸರ್​ಗಳ ಸಹಿತ 82 ರನ್ ಗಳಿಸಿದರು. ಬಳಿಕ ಶ್ರೀಜಿತ್​ಗೆ ಜೊತೆಯಾದ ಪ್ರವೀಣ್ ದುಬೆ 4ನೇ ವಿಕೆಟ್​ಗೆ 183 ರನ್​ ಪೇರಿಸಲು ನೆರವಾದರು. ಇದೇ ವೇಳೆ ಶ್ರೀಜಿತ್​ 101 ಎಸೆತಗಳಲ್ಲಿ 20 ಬೌಂಡರಿ, 4 ಸಿಕ್ಸರ್ ಸಹಿತ ಅಜೇಯ 150 ರನ್ ಪೇರಿಸಿದರು. ಪ್ರವೀಣ್ ದುಬೆ 50 ಎಸೆತಗಳಲ್ಲಿ 5 ಬೌಂಡರಿ, 1 ಸಿಕ್ಸರ್ ಸಹಿತ 65 ರನ್ ಬಾರಿಸಿ ಔಟಾಗದೆ ಉಳಿದರು. ಇವರಿಬ್ಬರ ಹೋರಾಟಕ್ಕೆ ಮುಂಬೈ ಬೌಲರ್​​ಗಳು ಪರದಾಡಿದರು. ಬೃಹತ್ ಗುರಿಯನ್ನು ಡಿಪೆಂಡ್ ಮಾಡಿಕೊಳ್ಳುವ ಲೆಕ್ಕಚಾರ ಹಾಕಿಕೊಂಡಿದ್ದ ಮುಂಬೈಗೆ ಈ ಜೋಡಿ ಆಘಾತ ನೀಡಿತು.

ಇದನ್ನೂ ಓದಿ: ಭಾರತ ತಂಡವನ್ನು ಮತ್ತೆ ಟಾರ್ಗೆಟ್ ಮಾಡಿದ ಆಸ್ಟ್ರೇಲಿಯನ್ ಮೀಡಿಯಾ: ರವೀಂದ್ರ ಜಡೇಜಾ ಪತ್ರಿಕಾಗೋಷ್ಠಿಯಲ್ಲಿ ವಿವಾದ