ನಾನು ನಿನಗಿಂತ ಫಾಸ್ಟ್ ಹಾಕ್ತೀನಿ; ಹರ್ಷಿತ್ ರಾಣಾ ಕೆಣಕಿದ್ದ ಮಿಚೆಲ್ ಸ್ಟಾರ್ಕ್​ಗೆ ಯಶಸ್ವಿ ಜೈಸ್ವಾಲ್ ತಿರುಗೇಟು, ವಿಡಿಯೋ

ಬಾರ್ಡರ್ ಗವಾಸ್ಕರ್ ಟ್ರೋಫಿಯಲ್ಲಿ ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ ಮೊದಲ ಟೆಸ್ಟ್​ ಪಂದ್ಯದ ಎರಡನೇ ದಿನದಂದು ಸ್ಲೆಡ್ಜಿಂಗ್ ನಡೆದಿದೆ. ಪರ್ತ್​ನ ಆಪ್ಟಸ್ ಕ್ರಿಕೆಟ್ ಮೈದಾನದಲ್ಲಿ ನಡೆಯುತ್ತಿರುವ ಈ ಟೆಸ್ಟ್​​ನಲ್ಲಿ ಆಸೀಸ್ ಫಾಸ್ಟ್​ ಬೌಲರ್​ ಮಿಚೆಲ್ ಸ್ಟಾರ್ಕ್​ ಅವರು ಬ್ಯಾಟಿಂಗ್ ನಡೆಸುವ ವೇಳೆ, ಭಾರತೀಯ ಬೌಲರ್​ ಹರ್ಷಿತ್ ರಾಣಾ ಅವರನ್ನು ಕೆಣಕಿದ್ದರು. ಆದರೆ ಇದಕ್ಕೆ ಆರಂಭಿಕ ಬ್ಯಾಟರ್​ ಯಶಸ್ವಿ ಜೈಸ್ವಾಲ್ ಸರಿಯಾಗಿಯೇ ತಿರುಗೇಟು ನೀಡಿದ್ದಾರೆ. ಇದರ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಹಲ್​ಚಲ್ ಸೃಷ್ಟಿಸುತ್ತಿದೆ. ವಿರಾಟ್ ಕೊಹ್ಲಿಯಂತೆಯೇ ನೀನು ಎಂದು ನೆಟ್ಟಿಗರು ಪ್ರತಿಕ್ರಿಯಿಸುತ್ತಿದ್ದಾರೆ.

ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿದ ಟೀಮ್ ಇಂಡಿಯಾ, ಬ್ಯಾಟರ್​ಗಳ ವೈಫಲ್ಯದಿಂದ 150 ರನ್​ಗಳ ಸಾಧಾರಣ ಮೊತ್ತಕ್ಕೆ ಕುಸಿಯಿತು. ಆಸೀಸ್ ವೇಗಿಗಳು ಮಾರಕ ದಾಳಿ ನಡೆಸುವ ಮೂಲಕ ಪ್ರವಾಸಿಗರನ್ನು ಅಲ್ಪಮೊತ್ತಕ್ಕೆ ಕಟ್ಟಿ ಹಾಕಿದರು. ಸ್ಕೋರ್​​ಗೆ ಪ್ರತ್ಯುತ್ತರ ನೀಡಲು ಹೊರಟ ಆಸ್ಟ್ರೇಲಿಯಾ ಬ್ಯಾಟರ್​​ಗಳು ಸಹ ತೀವ್ರ ವೈಫಲ್ಯ ಅನುಭವಿಸಿದರು. ಜಸ್ಪ್ರೀತ್ ಬುಮ್ರಾ ದಾಳಿಗೆ ಕಾಂಗರೂ ಪಡೆ ತತ್ತರಿಸಿತು. ಪರಿಣಾಮ ಮೊದಲ ಇನ್ನಿಂಗ್ಸ್​​ನಲ್ಲಿ 104 ರನ್​ಗಳಿಗೆ ಆಲೌಟ್ ಆಯಿತು. ಅಲ್ಲದೆ, ಭಾರತ ಅಲ್ಪ ಮೊತ್ತವನ್ನು ಗಳಿಸಿಯೂ 46 ರನ್​ಗಳ ಮುನ್ನಡೆ ಪಡೆಯುವ ಮೂಲಕ ಗಮನ ಸೆಳೆಯಿತು.

ಹರ್ಷಿತ್ ಕೆಣಕಿದ ಸ್ಟಾರ್ಕ್​ಗೆ ಜೈಸ್ವಾಲ್ ತಿರುಗೇಟು

ಎರಡನೇ ದಿನದಂದು ಮಿಚೆಲ್ ಸ್ಟಾರ್ಕ್​ ಭಾರತ ತಂಡವನ್ನು ಸರಿಯಾಗಿ ಕಾಡಿದರು. ರಕ್ಷಣಾತ್ಮಕ ಆಟವಾಡುವ ಮೂಲಕ ವಿಕೆಟ್​ ಕಾಪಾಡಿದರು. 112 ಎಸೆತಗಳನ್ನು ಎದುರಿಸಿದ ಸ್ಟಾರ್ಕ್​, 26 ರನ್​ಗಳಿಸಿದರು. 127 ನಿಮಿಷಗಳ ಕಾಲ ಕ್ರೀಸ್​ನಲ್ಲಿ ಉಳಿದಿದ್ದ ಸ್ಟಾರ್ಕ್​, ಭಾರತೀಯ ಬೌಲರ್​​ಗಳಿಗೆ ಕಾಡಿದರು. ಈ ವೇಳೆ ಹರ್ಷಿತ್ ಬೌಲಿಂಗ್ ಮಾಡುವಾಗ, ನಾನು ನಿನಗಿಂತ ತುಂಬಾ ಫಾಸ್ಟ್​ ಆಗಿ ಬೌಲಿಂಗ್ ಮಾಡಿತ್ತೇನೆ ಎಂದು ಕೆಣಕಿದ್ದರು. ಆದರೆ ಹರ್ಷಿತ್ ಯಾವುದೇ ಉತ್ತರ ನೀಡದೆ ಬೌಲಿಂಗ್​ಗೆ ಮರಳಿದರು. ಇನ್ನಿಂಗ್ಸ್ ಮುಕ್ತಾಯದ ನಂತರ ಭಾರತ ಎರಡನೇ ಇನ್ನಿಂಗ್ಸ್​​ ಆರಂಭಿಸಿತು.

ಮೊದಲ ಇನ್ನಿಂಗ್ಸ್​ನಲ್ಲಿ ಕಳಪೆ ಪ್ರದರ್ಶನ ನೀಡಿದರೂ ಎರಡನೇ ಇನ್ನಿಂಗ್ಸ್​ನಲ್ಲಿ ಟೀಮ್ ಇಂಡಿಯಾ ಅತ್ಯುತ್ತಮ ಪ್ರದರ್ಶನ ನೀಡಿತು. ಆರಂಭಿಕರಾಗಿ ಕಣಕ್ಕಿಳಿದ ಯಶಸ್ವಿ ಜೈಸ್ವಾಲ್ ಮತ್ತು ಕೆಎಲ್ ರಾಹುಲ್ ಆಸೀಸ್ ಬೌಲರ್​​ಗಳಿಗೆ ಬೆಂಡೆತ್ತಿದರು. ವಿಕೆಟ್ ಕಳೆದುಕೊಳ್ಳದೆ, 172 ರನ್ ಗಳಿಸಿ ಎರಡನೇ ದಿನದಾಟವನ್ನು ಮುಗಿಸಿದರು. ಇಬ್ಬರೂ ಸಹ ಅರ್ಧಶತಕ ಸಿಡಿಸಿದರು. ಇಬ್ಬರ ಅಬ್ಬರಕ್ಕೆ ಬ್ರೇಕ್ ಹಾಕಲು ಆಸೀಸ್ ವೇಗಿಗಳು ಪರದಾಡುತ್ತಿದ್ದರು. ಆದರೆ ಟೀ ಬ್ರೇಕ್​ಗೂ ಮುನ್ನ ಬೌಲಿಂಗ್ ಮಾಡುತ್ತಿದ್ದ ಮಿಚೆಲ್ ಸ್ಟಾರ್ಕ್​ಗೆ ಯಶಸ್ವಿ ಜೈಸ್ವಾಲ್ ತಿರುಗೇಟು ನೀಡಿದ್ದು, ನೀವು ನಿಧಾನವಾಗಿ ಬಂದು ಬೌಲಿಂಗ್ ಮಾಡುತ್ತಿದ್ದೀರಿ ಎಂದು ಹೇಳಿದ್ದಾರೆ.

ಹರ್ಷಿತ್ ರಾಣಾ ಕೆಣಕಿದ್ದ ಸ್ಟಾರ್ಕ್​ಗೆ ಜೈಸ್ವಾಲ್ ತಿರುಗೇಟು ಕೊಟ್ಟ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ. ಫ್ಯಾನ್ಸ್​ ಇದನ್ನೇ ಮತ್ತಷ್ಟು ರೋಸ್ಟ್ ಮಾಡುತ್ತಿದ್ದಾರೆ. ರಾಣಾಗೆ ಸ್ಟಾರ್ಕ್‌ನ ಸ್ಲೆಡ್ಜ್‌ಗೆ ಜೈಸ್ವಾಲ್ ಅವರು ಮುಟ್ಟಿನೋಡಿಕೊಳ್ಳುವಂತೆ ಹೇಳಿದ್ದಾರೆ. ವಿರಾಟ್ ಕೊಹ್ಲಿ, ಮೊಹಮ್ಮದ್ ಸಿರಾಜ್ ಅವರ ಕ್ಲಬ್​ಗೆ ನೀವು ಸೇರ್ಪಡೆ ಆಗಿದ್ದೀರಿ ಎಂದು ಜೈಸ್ವಾಲ್​ಗೆ ಅಭಿಮಾನಿಗಳು ಪ್ರತಿಕ್ರಿಯಿಸುತ್ತಿದ್ದಾರೆ. ಆಸೀಸ್ ಆಟಗಾರರು ಕೆಣಕುವುದಕ್ಕೆ ಇರುವುದು, ಅಂತಹವರಿಗೆ ನೀವು ಸರಿಯಾಗಿ ಮಾಂಜ ಕೊಟ್ಟಿದ್ದೀರಿ ಎಂದು ಹೇಳುತ್ತಿದ್ದಾರೆ. ಅತ್ತ ಬ್ಯಾಟ್ ಮೂಲಕವೂ, ಇತ್ತ ಬಾಯಿಯ ಮೂಲಕವೂ ಸರಿಯಾಗಿ ಉತ್ತರ ನೀಡಿದ್ದೀರಿ ಎಂದು ಕಾಮೆಂಟ್ ಮಾಡುತ್ತಿದ್ದಾರೆ.

ರಾಹುಲ್-ಜೈಸ್ವಾಲ್ ಜುಗಲ್ಬಂದಿ

ಎರಡನೇ ಇನ್ನಿಂಗ್ಸ್​​ನಲ್ಲಿ ಕೆಎಲ್ ರಾಹುಲ್ ಮತ್ತು ಯಶಸ್ವಿ ಜೈಸ್ವಾಲ್ ಅತ್ಯುದ್ಭುತ ಪ್ರದರ್ಶನ ನೀಡಿದರು. ಆಸೀಸ್ ಬೌಲರ್​ಗಳನ್ನು ಸಿಕ್ಕಾಪಟ್ಟೆ ಕಾಡಿದರು. ಆತಿಥೇಯರು ವಿಕೆಟ್ ಪಡೆಯಲು ಪರದಾಟ ನಡೆಸಿದರು. ವಿಕೆಟ್ ನೀಡದೆ ದಿನದಾಟ ಮುಗಿಸಿರುವ ಟೀಮ್ ಇಂಡಿಯಾ 2ನೇ ದಿನದ ಅಂತ್ಯಕ್ಕೆ 172 ರನ್ ಗಳಿಸಿದೆ. ರಾಹುಲ್ 153 ಎಸೆತಗಳಲ್ಲಿ 4 ಬೌಂಡರಿ ಸಹಿತ 62 ರನ್ ಗಳಿಸಿದ್ದಾರೆ. ಜೈಸ್ವಾಲ್ 193 ಎಸೆತಗಳಲ್ಲಿ 7 ಬೌಂಡರಿ, 2 ಸಿಕ್ಸರ್ ಸಹಿತ 90 ರನ್ ಬಾರಿಸಿ ಶತಕದ ಅಂಚಿನಲ್ಲಿದ್ದಾರೆ. ಇಬ್ಬರು ಅಜೇಯರಾಗಿದ್ದಾರೆ. ಭಾರತ ತಂಡದ ಒಟ್ಟು 218 ರನ್​ಗಳ ಮುನ್ನಡೆಯಲ್ಲಿದ್ದು, ಮೂರನೇ ದಿನದಂದು ಬೃಹತ್ ಮೊತ್ತ ಕಲೆ ಹಾಕುವ ಲೆಕ್ಕಾಚಾರದಲ್ಲಿದೆ.