Wimbledon 2023: ಸೋಮವಾರದಿಂದ ವಿಂಬಲ್ಡನ್ ಟೂರ್ನಿ; ದಾಖಲೆಯ ಗೆಲುವಿಗೆ ನೊವಾಕ್ ಜೊಕೊವಿಕ್ ಹೋರಾಟ
Jan 09, 2024 08:01 PM IST
Share
ವಿಂಬಲ್ಡನ್ 2023 ಲೈವ್ ಸ್ಟ್ರೀಮಿಂಗ್
- Wimbledon 2023 Live Streaming: 2023 ವಿಂಬಲ್ಡನ್ ಟೂರ್ನಿಯು ಜುಲೈ 3ರ ಸೋಮವಾರ ಪ್ರಾರಂಭವಾಗುತ್ತದೆ. ಜುಲೈ 16ರ ಭಾನುವಾರದಂದು ಮುಕ್ತಾಯಗೊಳ್ಳುತ್ತದೆ.
ಪ್ರಸಕ್ತ ವರ್ಷದ (2023) ವಿಂಬಲ್ಡನ್ ಟೆನ್ನಿಸ್ (2023 Wimbledon) ಪಂದ್ಯಾವಳಿಯು ಇಂದಿನಿಂದ (ಸೋಮವಾರ) ಆರಂಭವಾಗುತ್ತಿದೆ. ಇಂಗ್ಲೆಂಡ್‌ನ ರಾಜಧಾನಿ ಲಂಡನ್‌ನಲ್ಲಿ ಟೆನ್ನಿಸ್‌ನ ಪ್ರಮುಖ ಕ್ರೀಡಾಕೂಟ ನಡೆಯುತ್ತಿದ್ದು, ಇದು ಈ ವರ್ಷದ ಮೂರನೇ ಗ್ರ್ಯಾಂಡ್ ಸ್ಲಾಮ್ ಈವೆಂಟ್‌ ಆಗಿದೆ.
ಟೆನ್ನಿಸ್ ದಿಗ್ಗಜ ನೊವಾಕ್ ಜೊಕೊವಿಕ್ ಅವರು ರೋಜರ್ ಫೆಡರರ್ ಅವರ ದಾಖಲೆಯನ್ನು ಸರಿಗಟ್ಟಲು ವಿಂಬಲ್ಡನ್‌ನಲ್ಲಿ ಸತತ ಐದನೇ ಟ್ರೋಫಿಗಾಗಿ ಎದುರು ನೋಡುತ್ತಿದ್ದಾರೆ. ಅಲ್ಲದೆ ಒಟ್ಟಾರೆ ಎಂಟನೇ ಪ್ರಶಸ್ತಿಗಾಗಿ ಕಣಕ್ಕಿಳಿಯಲಿದ್ದಾರೆ. 1969ರಲ್ಲಿ ರಾಡ್ ಲೇವರ್ ಒಂದೇ ವರ್ಷದಲ್ಲಿ ಎಲ್ಲಾ ನಾಲ್ಕು ಮೇಜರ್‌ ಗ್ರಾಂಡ್‌ ಸ್ಲ್ಯಾಮ್‌ಗಳನ್ನು ಗೆದ್ದಿದ್ದರು. ಒಂದು ವೇಳೆ ನೊವಾಕ್ ಜೊಕೊವಿಕ್ ಈ ವಿಂಬಲ್ಡನ್‌ನಲ್ಲಿ ಗೆಲುವು ಸಾಧಿಸಿದರೆ, ಪುರುಷರ ಟೆನಿಸ್‌ನಲ್ಲಿ ಒಂದೇ ಕ್ಯಾಲೆಂಡರ್ ವರ್ಷದ ಎಲ್ಲಾ ನಾಲ್ಕು ಪ್ರಮುಖ ಗೆಲುವಿನ ಹಾದಿಯನ್ನು ಸುಗಮಗೊಳಿಸುತ್ತದೆ. ಮುಖ್ಯವಾಗಿ ಪಂದ್ಯಾವಳಿಯಲ್ಲಿ ವಿಶ್ವದ ನಂಬರ್‌ ವನ್‌ ಹಾಗೂ ಅಗ್ರ ಶ್ರೇಯಾಂಕದ ಆಟಗಾರ ಕಾರ್ಲೋಸ್ ಅಲ್ಕಾರಾಜ್ ಕೂಡ ಇದ್ದಾರೆ. ಇವರಿಬ್ಬರೂ ಫೈನಲ್‌ಗೆ ಲಗ್ಗೆ ಇಟ್ಟರೆ ರೋಚಕ ಹೋರಾಟವನ್ನು ನಿರೀಕ್ಷಿಸಬಹುದು.
ಕಳೆದ ವರ್ಷ ಆಲ್ ಇಂಗ್ಲೆಂಡ್ ಕ್ಲಬ್‌ನಲ್ಲಿ ತನ್ನ ಮೊದಲ ಸ್ಲಾಮ್ ಟ್ರೋಫಿ ಗೆದ್ದ ಹಾಲಿ ಮಹಿಳಾ ಚಾಂಪಿಯನ್ ಎಲೆನಾ ರೈಬಾಕಿನಾ, ಮಂಗಳವಾರ ಅಮೆರಿಕದ ಶೆಲ್ಬಿ ರೋಜರ್ಸ್ ವಿರುದ್ಧ ಆರಂಭಿಕ ಪಂದ್ಯವನ್ನು ಆಡಲಿದ್ದಾರೆ. ಈ ನಡುವೆ ಫ್ರೆಂಚ್ ಓಪನ್‌ನಲ್ಲಿ ನಾಲ್ಕನೇ ಪ್ರಮುಖ ಚಾಂಪಿಯನ್‌ಶಿಪ್ ಗೆದ್ದ ಅಗ್ರ ಶ್ರೇಯಾಂಕದ ಇಗಾ ಸ್ವಿಯಾಟೆಕ್ ಸೋಮವಾರ ಝು ಲಿನ್ ವಿರುದ್ಧ ಪದಾರ್ಪಣೆ ಮಾಡುತ್ತಿದ್ದಾರೆ.
ಈ ವರ್ಷದ ವಿಂಬಲ್ಡನ್‌ನಲ್ಲಿ ಒಂದು ಮಹತ್ವದ ಬದಲಾವಣೆ ನಡೆಯಲಿದೆ. ರಷ್ಯಾ ಮತ್ತು ಬೆಲಾರಸ್‌ನ ಆಟಗಾರರು ಪಂದ್ಯಾವಳಿಗೆ ಮರಳುತ್ತಿದ್ದಾರೆ. 2022ರ ಫೆಬ್ರವರಿಯಲ್ಲಿ ಬೆಲಾರಸ್ ಸಹಾಯದಿಂದ ರಷ್ಯಾ ಉಕ್ರೇನ್ ಮೇಲೆ ದಾಳಿ ನಡೆಸಿದ ಕಾರಣ ಅವರನ್ನು ಆಲ್ ಇಂಗ್ಲೆಂಡ್ ಕ್ಲಬ್ ಒಂದು ವರ್ಷದ ಹಿಂದೆ ನಿಷೇಧಿಸಿತ್ತು.
ಲೈವ್ ಸ್ಟ್ರೀಮಿಂಗ್ ವಿವರ
2023 ವಿಂಬಲ್ಡನ್ ಯಾವಾಗ ನಡೆಯಲಿದೆ?
2023 ವಿಂಬಲ್ಡನ್ ಟೂರ್ನಿಯು ಜುಲೈ 3ರ ಸೋಮವಾರ ಪ್ರಾರಂಭವಾಗುತ್ತದೆ. ಜುಲೈ 16ರ ಭಾನುವಾರದಂದು ಮುಕ್ತಾಯಗೊಳ್ಳುತ್ತದೆ.
ವಿಂಬಲ್ಡನ್ 2023 ಎಲ್ಲಿ ನಡೆಯುತ್ತದೆ?
ವಿಂಬಲ್ಡನ್ 2023 ಆಲ್ ಇಂಗ್ಲೆಂಡ್ ಕ್ಲಬ್, ಲಂಡನ್‌ನಲ್ಲಿ ನಡೆಯಲಿದೆ.
ವಿಂಬಲ್ಡನ್ 2023ರ ಪಂದ್ಯಗಳು ಯಾವ ಸಮಯದಲ್ಲಿ ಪ್ರಸಾರವಾಗಲಿದೆ?
ವಿಂಬಲ್ಡನ್ 2023ರ ನೇರ ಪ್ರಸಾರವು ಭಾರತೀಯ ಕಾಲಮಾನದ ಪ್ರಕಾರ ಮಧ್ಯಾಹ್ನ 3:30 ಕ್ಕೆ ಪ್ರಾರಂಭವಾಗುತ್ತದೆ.
ಭಾರತದಲ್ಲಿ ವಿಂಬಲ್ಡನ್ 2023ಅನ್ನು ಯಾವ ಟಿವಿ ಚಾನೆಲ್‌ಗಳು ಪ್ರಸಾರ ಮಾಡುತ್ತವೆ?
ವಿಂಬಲ್ಡನ್ 2023ಅನ್ನು ಸ್ಟಾರ್ ಸ್ಪೋರ್ಟ್ಸ್ ನೆಟ್‌ವರ್ಕ್‌ನಲ್ಲಿ ಪ್ರಸಾರ ಮಾಡಲಾಗುತ್ತದೆ.
ಭಾರತದಲ್ಲಿ ವಿಂಬಲ್ಡನ್ ಪಂದ್ಯಗಳ ಲೈವ್ ಸ್ಟ್ರೀಮಿಂಗ್ ಅನ್ನುಎಲ್ಲಿ ವೀಕ್ಷಿಸಬಹುದು?
ವಿಂಬಲ್ಡನ್ 2023ರ ಲೈವ್ ಸ್ಟ್ರೀಮಿಂಗ್ ಭಾರತದಲ್ಲಿ Hotstar ಅಪ್ಲಿಕೇಶನ್‌ನಲ್ಲಿ ಲಭ್ಯವಿರುತ್ತದೆ.