ರಾಮಾಯಣ: ರಾಮನನ್ನು ರಕ್ಷಣೆಗಾಗಿ ಕಾಡಿಗೆ ಕಳುಹಿಸುವಂತೆ ಕೇಳಿದ ವಿಶ್ವಾಮಿತ್ರ; ವಿಷಯ ಕೇಳಿ ಸಿಂಹಾಸನದಿಂದ ಕೆಳಗೆ ಬಿದ್ದ ದಶರಥ

ದಶರಥನ ಮನದ ಇಂಗಿತವನ್ನು ಅರಿತ ವಿಶ್ವಾಮಿತ್ರರು ರಾಮನನ್ನು ನನ್ನೊಡನೆ ಕಳುಹಿಸಿ ಧರ್ಮವನ್ನು ಉಳಿಸಿಕೊ. ಈ ಕಾರ್ಯದಲ್ಲಿ ನನ್ನ ಯಜ್ಞವು ಸುಸೂತವಾಗಿ ನಡೆಯುವುದು ಮಾತ್ರವಲ್ಲದೆ ರಾಮನೊಂದಿಗೆ ನಿನ್ನ ಹೆಸರು ಸಹ ಬಹುಕಾಲ ಉಳಿಯುತ್ತದೆ. ಅನಾವಶ್ಯಕವಾಗಿ ತಡ ಮಾಡುವುದು ಬೇಡ ಎಂದು ವಿಶ್ವಾಮಿತ್ರ ತಿಳಿಸುತ್ತಾರೆ. ನಾನು ಆರಂಭಿಸಬೇಕಾದ ಯಜ್ಞವು ಸರಿಯಾದ ಮೂಹುರ್ತದಲ್ಲಿ ಆರಂಭವಾಗಬೇಕಾಗುತ್ತದೆ. ಪರೋಕ್ಷವಾಗಿ ನಿನ್ನಿಂದ ನನಗೆ ತೊಂದರೆಯಾಗುತ್ತದೆ. ವಿಶ್ವಾಮಿತ್ರರ ಈ ಮಾತುಗಳನ್ನು ಕೇಳಿ ದುಃಖ ಮತ್ತು ಒತ್ತಡವನ್ನು ತಾಳಲಾರದೆ ದಶರಥನು ಸಿಂಹಾಸನದಿಂದ ಕೆಳಗೆ ಬೀಳುತ್ತಾನೆ. ಮೂರ್ಚೆ ಹೋದ ದಶರಥನಿಗೆ ಸ್ವಲ್ಪ ಸಮಯದ ನಂತರ ಪ್ರಜ್ಞೆ ಮರಳುತ್ತದೆ.

ಎಚ್ಚರ ಬಂದು ಎದ್ದವನೇ ವಿಶ್ವಾಮಿತ್ರರನ್ನು ಉದ್ದೇಶಿಸಿ ಮಹರ್ಷಿಗಳೇ, ನನ್ನ ಮಗ ಶ್ರೀರಾಮನು ಇನ್ನೂ ಬಾಲಕ. ಆದ್ದರಿಂದ ಅವನು ರಾಕ್ಷಸರನ್ನು ಸದೆಬಡಿಯುವಲ್ಲಿ ಯಶಸ್ವಿಯಾಗಲಾರ. ಆದರೆ ನಿಮ್ಮ ಯಜ್ಞ ಯಾಗಾದಿಗಳನ್ನು ಕಾಪಾಡುವ ಹೊಣೆ ನನ್ನದು. ಅನಾವಶ್ಯಕವಾಗಿ ಯೋಚನೆ ಮಾಡದಿರಿ. ನಿಮ್ಮೊಡನೆ ನನ್ನ ಸೈನ್ಯವನ್ನೇ ಕಳುಹಿಸುತ್ತೇನೆ. ನನ್ನ ಸೈನ್ಯದ ಸೈನ್ಯವನ್ನು ಸುಲಭವಾಗಿ ಎದುರಿಸಲು ಮೂರು ಲೋಕದಲ್ಲಿಯೂ ಯಾರಿಗೂ ಸಾಧ್ಯವಾಗುವುದಿಲ್ಲ. ಸೈನ್ಯದ ನಾಯಕತ್ವವನ್ನು ಸ್ವತಹ ನಾನೇ ನಿರ್ವಹಿಸಿ ರಾಕ್ಷಸರ ಸಂಹಾರ ಮಾಡುತ್ತೇನೆ. ಒಂದೇ ಮನಸ್ಸಿನಲ್ಲಿ ಆಶ್ರಮಕ್ಕೆ ಹಿಂತಿರುಗಿ, ಯಜ್ಞವನ್ನು ಆರಂಭಿಸಲು ಬೇಕಾದ ಏರ್ಪಡುಗಳನ್ನು ಮಾಡಿಕೊಳ್ಳಿ ಎಂದು ಹೇಳುತ್ತಾನೆ.

ದಶರಥನ ಪ್ರಯತ್ನ

ಪೂರ್ವ ಯೋಜನೆಯಂತೆ ನಿಮ್ಮ ಕಾರ್ಯಕ್ರಮಗಳನ್ನು ನಡೆಸಿಕೊಡುವ ಜವಾಬ್ದಾರಿ ನನ್ನದು. ರಾಮನ ಯುದ್ಧಭ್ಯಾಸವು ಇನ್ನೂ ಸಂಪೂರ್ಣವಾಗಿಲ್ಲ. ಕಪಟ ಏನೆಂದು ತಿಳಿಯದ ರಾಮನಿಗೆ ರಾಕ್ಷಸರ ಮಾಯಾ ವಿದ್ಯದ ಬಗ್ಗೆ ಅರಿವು ಇರುವುದಿಲ್ಲ. ನಿಮಗೆ ನನ್ನ ಮಾತು ಇಷ್ಟವಿಲ್ಲದೆ ಹೋದಲ್ಲಿ ರಾಮನನ್ನು ಕರೆದೊಯ್ಯಿರಿ. ಆದರೆ ರಾಮನ ಜೊತೆಯಲ್ಲಿ ನನ್ನ ಸೈನ್ಯದೊಂದಿಗೆ ನಾನು ಬರುತ್ತೇನೆ ಎಂದು ಹೇಳುತ್ತಾನೆ. ಸಾಮಾನ್ಯವಾಗಿ ರಾಕ್ಷಸರು ದೇವಾನುದೇವತೆಗಳವರವನ್ನು ಪಡೆದಿರುತ್ತಾರೆ. ನನಗದರ ಭಯವಿದೆ ಎಂದು ದಶರಥನು ತಿಳಿಸುತ್ತಾನೆ.

ಇದನ್ನೂ ಓದಿ: ರಾಮಾಯಣ ಉತ್ತರಕಾಂಡ: ಆಗ ಅಪಹರಣ, ಈಗ ಪರಿತ್ಯಾಗ; ಸೀತಾ-ರಾಮರ ವಿಯೋಗ, ಭೂತಾಯಿಯ ಮಡಿಲು ಸೇರಿದ ಜಗನ್ಮಾತೆ -ಶ್ರೀರಾಮನವಮಿ ವಿಶೇಷ

ಮಾರೀಚ ಮತ್ತು ಸುಭಾಹುಗಳೆಂಬ ರಾಕ್ಷಸರ ಕಾಟ

ಮಹಾರಾಜ ಬ್ರಹ್ಮನಿಂದ ವರವನ್ನು ಪಡೆದ ರಾವಣನು ರಾಕ್ಷಸ ಕುಲದ ಒಡೆಯನಾಗಿದ್ದಾನೆ. ಇವನು ಮೂರು ಲೋಕಗಳನ್ನು ಹಿಂಸಿಸಿ ಕಷ್ಟಕ್ಕೆ ಒಳಪಡಿಸುತ್ತಿದ್ದಾನೆ. ಇವನ ಹಿಂಬಾಲಕರೇ ನನಗೆ ತೊಂದರೆ ನೀಡುತ್ತಿರುವವರು. ಇವನು ಕುಬೇರನ ಸೋದರ ಹೌದು. ಅವನಿಂದ ಪ್ರಭಾವಕ್ಕೆ ಒಳಗಾಗಿ ಮಾರೀಚ ಮತ್ತು ಸುಭಾಹುಗಳೆಂಬ ರಾಕ್ಷಸರು ನನ್ನ ಯಜ್ಞ ಯಾಗಾದಿಗಳಿಗೆ ತೊಂದರೆ ನೀಡುತ್ತಿದ್ದಾರೆ ಎಂದು ವಿಶ್ವಾಮಿತ್ರರು ತಿಳಿಸುತ್ತಾರೆ.

ರಾಮನು ರಾಕ್ಷಸರ ಸಂಹಾರ ಮಾಡಬೇಕು

ನಿಮ್ಮ ಈ ವಿವರಣೆಯಿಂದ ಬಾಲಕನಾದ ರಾಮನು ರಾಕ್ಷಸರ ಸಂಹಾರ ಮಾಡಲು ಸಾಧ್ಯವೇ ಎಂಬ ಅನುಮಾನ ಉಂಟಾಗಿದೆ. ನೀವೇ ನನ್ನ ಪಾಲಿನ ದೇವರಂತಾಗಿರುವಿರಿ. ದಯಮಾಡಿ ಬಾಲರಾಮನ ಮೇಲೆ ಕರುಣೆಯನ್ನು ತೋರಿಸಿ. ಮೂರು ಲೋಕದಲ್ಲಿ ಯಾರೊಬ್ಬರೂ ರಾವಣನನ್ನು ಎದುರಿಸಲು ಸಾಧ್ಯವಿಲ್ಲ ಎಂದಾಗ ರಾಮನಿಗೆ ಹೇಗೆ ಸಾಧ್ಯವಾದಿತು ಎಂದು ದಶರಥನು ಕೇಳುತ್ತಾನೆ.

ದಶರಥನ ಮೇಲೆ ವಿಶ್ವಾಮಿತ್ರರ ಕೋಪ

ದಶರಥನ ಮಾತುಗಳನ್ನು ಕೇಳಿ ವಿಶ್ವಾಮಿತ್ರರಿಗೆ ಸಹನಯು ಮರೆಯಾಗಿ ಅಸಾಧ್ಯವಾದ ಕೋಪ ಬರುತ್ತದೆ. ಅವರ ಮುಖವನ್ನು ಕಂಡರೆ ಎಂತಹವರಿಗಾದರೂ ಭಯ ಉಂಟಾಗುವಂತಿತ್ತು. ದಶರಥನಿಗೆ ಮಗನ ಮೇಲೆ ವಿಶೇಷವಾದ ವಾತ್ಸಲ್ಯ, ಮಗನನ್ನು ಬಿಡಲಾರ. ವಿಶ್ವಾಮಿತ್ರ ಕೋಪಕ್ಕೆ ಒಳಗಾಗಿ ಶಾಪಕ್ಕೆ ತುತ್ತಾಗುವ ಭಯ ಮತ್ತೊಂದು ಕಡೆ. ಅವನ ಸ್ಥಿತಿಯು ಕತ್ತಿಯ ಅಲಗಿನ ಮೇಲೆ ನಡೆಯುವಂತಿತ್ತು. ಪರಿಸ್ಥಿತಿಯನ್ನು ಎದುರಿಸಲಾಗದ ಮಾತೆ ಬರೆದಂತಾಯಿತು.

ಕೆಲಸ ಕಾರ್ಯಗಳಲ್ಲಿ ಇನ್ನು ಮುಂದೆ ಅಪಜಯದ ಶಾಪ

ದಶರಥನ ವಾದದಿಂದ ಕೋಪಗೊಂಡ ವಿಶ್ವಾಮಿತ್ರರು ಮಹಾರಾಜನೇ, ನಿನ್ನ ಅರಮನೆಗೆ ಬಂದಾಕ್ಷಣ ಒಮ್ಮೆಯೂ ಯೋಚಿಸದೆ ನನ್ನ ಕೆಲಸವನ್ನು ಮಾಡಿಕೊಡುವೆ ಎಂದು ವಾಗ್ದಾನ ಮಾಡುವೆ. ಆದರೆ ಈಗ ನಿನ್ನ ಸ್ವಾರ್ಥಕ್ಕಾಗಿ ಅದನ್ನು ಮರೆಯುತ್ತಿರುವೆ. ಇದರ ಫಲವಾಗಿ ನಿನ್ನ ಕೆಲಸ ಕಾರ್ಯಗಳಲ್ಲಿ ಇನ್ನು ಮುಂದೆ ಅಪಜಯವನ್ನು ಅನುಭವಿಸುವೆ. ನಿನ್ನೊಡನೆ ಮಾತನಾಡಲು ನನಗಿನ್ನು ಮನಸ್ಸಿಲ್ಲ. ಬಂದ ದಾರಿಗೆ ಸುಂಕವಿಲ್ಲವೆಂಬಂತೆ ನನ್ನ ಆಶ್ರಮಕ್ಕೆ ನಾನು ಮರಳುವೆ ಎಂದು ಹೊರಡಲು ಅನುವಾದರು.

ಇದನ್ನೂ ಓದಿ: ರಾಮಾಯಣ: ಅರಮನೆಗೆ ಬಂದು ರಾಮನನ್ನು ತನ್ನ ಜೊತೆ ಕಳಿಸು ಎಂದ ವಿಶ್ವಾಮಿತ್ರ; ದಶರಥನಾಗ ಚಿಂತಾಕ್ರಾಂತ