ಕಾಟೇರ ನಾಯಕಿ ಮಾಲಾಶ್ರಿ ಪುತ್ರಿ ಆರಾಧನಾ ರಾಮ್‌ ವಯಸ್ಸೆಷ್ಟು? ದರ್ಶನ್‌ಗಿಂತ ಈಕೆ 24 ವರ್ಷ ಕಿರಿಯ ನಟಿ
Aradhana Ram Age: ತರುಣ್‌ ಸುಧೀರ್‌ ನಿರ್ದೇಶನದ ಕಾಟೇರ ಸಿನಿಮಾದಲ್ಲಿ ನಾಯಕಿಯಾಗಿ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿರುವ ಮಾಲಾಶ್ರೀ ಪುತ್ರಿ ಆರಾಧನಾ ರಾಮ್‌ಗೆ ಈಗ 22 ವರ್ಷ ವಯಸ್ಸು. ಸ್ಯಾಂಡಲ್‌ವುಡ್‌ನ ಜನಪ್ರಿಯ ನಟ ದರ್ಶನ್‌ಗೆ (Darshan Age) ಈಗ 46 ವರ್ಷ ವಯಸ್ಸು.
ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ಅಭಿನಯದ ಕಾಟೇರ ಸಿನಿಮಾದ ಕ್ರೇಜ್‌ ಸ್ಯಾಂಡಲ್ವುಡ್ ಸಿನಿಪ್ರೇಕ್ಷಕರಲ್ಲಿ ಹೆಚ್ಚಾಗಿದೆ. ನಿನ್ನೆ ಬಿಡುಗಡೆಯಾದ ಈ ಚಿತ್ರ ಬಾಕ್ಸ್‌ ಆಫೀಸ್‌ನಲ್ಲಿ ಈಗಾಗಲೇ 19 ಕೋಟಿ ರೂ.ಗೂ ಹೆಚ್ಚು ಗಳಿಕೆ ಮಾಡಿದೆ. ಈ ಚಿತ್ರದಲ್ಲಿ ನಟಿಸಿರುವ ಮಾಲಾಶ್ರಿ ಪುತ್ರಿ ಆರಾಧನಾ ರಾಮ್‌ ನಟನೆಯೂ ಪ್ರೇಕ್ಷಕರ ಮೆಚ್ಚುಗೆಗೆ ಪಾತ್ರವಾಗಿದೆ. ಇದು ಆರಾಧನಾ ರಾಮ್‌ಗೆ ಮೊದಲ ಸಿನಿಮಾ. ಚೊಚ್ಚಲ ಸಿನಿಮಾದಲ್ಲಿಯೇ ದರ್ಶನ್‌ರಂತಹ ಪ್ರಮುಖ ನಟನ ಜತೆ ನಾಯಕಿಯಾಗಿ ನಟಿಸುವ ಅದೃಷ್ಟ ಪಡೆದಿದ್ದಾರೆ. ಇದೇ ಸಮಯದಲ್ಲಿ ಸ್ಯಾಂಡಲ್‌ವುಡ್‌ಗೆ ಎಂಟ್ರಿ ನೀಡಿರುವ ಮಾಲಾಶ್ರಿ ಪುತ್ರಿಯ ವಯಸ್ಸೆಷ್ಟು ಎಂಬ ಸಂದೇಹವೂ ಹಲವು ಜನರಲ್ಲಿದೆ.
ಮಾಲಾಶ್ರಿ ಮಗಳು ಆರಾಧನಾ ರಾಮ್‌ ಜನ್ಮದಿನಾಂಕ ಮತ್ತು ವಯಸ್ಸು
ಇಂಟರ್‌ನೆಟ್‌ನಲ್ಲಿ ಲಭ್ಯವಿರುವ ಮಾಹಿತಿಗಳ ಪ್ರಕಾರ ಮಾಲಾಶ್ರಿ ಮಗಳು ಆರಾಧನಾ ರಾಮ್‌ ಅವರು ಫೆಬ್ರವರಿ 2, 2002ರಂದು ಜನಿಸಿದರು. ಅಂದರೆ, ಈಗ ಇವರ ವಯಸ್ಸು 22 ನಡೆಯುತ್ತಿದೆ. ದರ್ಶನ್‌ ಅವರ 56ನೇ ಸಿನಿಮಾದಲ್ಲಿ ನಟಿಸುವ ಅವಕಾಶ ಪಡೆದುಕೊಂಡ ಇವರು ತನ್ನ ಮೊದಲ ಪ್ರಯತ್ನದಲ್ಲಿಯೇ ಗಮನ ಸೆಳೆಯುವಂತೆ ನಟಿಸಿ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದ್ದಾರೆ.
ದರ್ಶನ್‌ ಜನ್ಮದಿನಾಂಕ ಮತ್ತು ವಯಸ್ಸು
ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ಕೂಡ ಫೆಬ್ರವರಿ ತಿಂಗಳಲ್ಲಿ ಜನಿಸಿದರು. ಇವರು ಫೆಬ್ರವರಿ 16, 1977ರಲ್ಲಿ ಜನಿಸಿದರು. ಅಂದರೆ ಈಗ ಇವರ ವಯಸ್ಸು 46 ವರ್ಷ. ಕನ್ನಡ ನಟ ಸುದೀಪ್‌ಗೆ ಈಗ 52 ವರ್ಷ ವಯಸ್ಸು. ಕೆಜಿಎಫ್‌ ನಟ ಯಶ್‌ಗೆ 37 ವರ್ಷ ವಯಸ್ಸು. ಶಿವರಾಜ್‌ ಕುಮಾರ್‌ಗೆ 61 ವರ್ಷ ವಯಸ್ಸು.
ಬಾಲ್ಯದಿಂದಲೇ ಆರಾಧನಾ ರಾಮ್‌ಗೆ ನಟನೆಯತ್ತ ಆಸಕ್ತಿ
ಸ್ಯಾಂಡಲ್‌ವುಡ್‌ನ ಕನಸಿನ ರಾಣಿ ಎಂದೇ ಖ್ಯಾತಿ ಪಡೆದಿದ್ದ ಮಾಲಾಶ್ರಿ ಮತ್ತು ಕೋಟಿ ನಿರ್ಮಾಪಕರೆಂದೇ ಖ್ಯಾತಿ ಪಡೆದ ರಾಮು ಅವರ ಮುದ್ದಿನ ಮಗಳು ಈ ಆರಾಧನಾ ರಾಮ್‌. ಇವರ ಮೊದಲ ಹೆಸರು ಅನನ್ಯ ರಾಮು ಎಂದಿತ್ತು. ಬಳಿಕ ರಾಧನಾ ರಾಮ್‌ ಎಂದು ಬದಲಾಯಿಸಿಕೊಂಡಿದ್ದರು. ಯಾಕೋ ರಾಧನಾ ಹೆಸರೂ ಇಷ್ಟವಾಗದೆ ಆರಾಧನಾ ರಾಮ್‌ ಹೆಸರಿನಲ್ಲಿ ಕಾಟೇರ ಸಿನೆಮಾಕ್ಕೆ ಎಂಟ್ರಿ ನೀಡಿದ್ದರು.
ಆರಾಧನಾ ರಾಮ್‌ಗೆ ಹದಿಮೂರು ವರ್ಷವಾಗಿದ್ದಾಗಲೇ ಸಿನಿಮಾರಂಗದ ಕುರಿತು ಆಸಕ್ತಿ ಇತ್ತು. ಮಗಳ ಸಿನಿ ಪ್ರೀತಿಗೆ ಹೆತ್ತವರು ನಿರೇರೆದಿದ್ದಾರೆ. ಮುಂಬೈನಲ್ಲಿ ಎರಡು ವರ್ಷ ನಟನಾ ತರಬೇತಿ ಪಡೆದು ಕನ್ನಡ ಚಿತ್ರರಂಗಕ್ಕೆ ಎಂಟ್ರಿ ನೀಡಿದ್ದಾರೆ ಆರಾಧನಾ.
ಅಮ್ಮನಂತೆ ಮಗಳು
ಮಾಲಾಶ್ರಿ ಅವರು ತನ್ನ ಹದಿನೈದನೇ ವಯಸ್ಸಿನಲ್ಲಿಯೇ ನಂಜುಡಿ ಕಲ್ಯಾಣ ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ಗೆ ನಾಯಕಿಯಾಗಿ ಪ್ರವೇಶಿಸಿದ್ದರು. ನಂಜುಡಿ ಕಲ್ಯಾಣಕ್ಕೂ ಮೊದಲು ತಮಿಳು ಮತ್ತು ತೆಲುಗು ಸಿನಿಮಾಗಳಲ್ಲಿ ಮಾಲಾಶ್ರಿ ಸಣ್ಣಪುಟ್ಟ ಪಾತ್ರ ಮಾಡಿದ್ದರು. ಅಂದಹಾಗೆ, ಮಾಲಾಶ್ರಿ ಅವರ ಮೊದಲ ಚಿತ್ರವನ್ನು ರಾಕ್‌ಲೈನ್‌ ಪ್ರೊಡಕ್ಷನ್‌ ಮಾಡಿತ್ತು. ಕಾಟೇರ ಸಿನಿಮಾವು ಇದೇ ಪ್ರೊಡಕ್ಷನ್‌ನಡಿ ನಿರ್ಮಾಣವಾಗಿರುವುದು ವಿಶೇಷ.
ದರ್ಶನ್‌ ಮತ್ತು ರಾಕ್‌ಲೈನ್‌ ಜತೆ ಸಿನಿಮಾ ಮಾಡುವ ಅವಕಾಶ ದೊರಕಿದಾಗ ಆರಾಧನಾ ರಾಮ್‌ಗೆ ಶಾಕ್‌ ಆಗಿತ್ತು. ಈ ಸುದ್ದಿ ಕೇಳಿದಂದು ರಾತ್ರಿ ನಿದ್ದೆಯೇ ಬಂದಿರಲಿಲ್ಲ. ಈ ಸಿನಿಮಾದಲ್ಲಿ ನಟಿಸಲು ಸರಿಯಾದ ತರಬೇತಿ ಪಡೆದು ಬಂದಿದ್ದರು. ಕಾಟೇರ ಸಿನಿಮಾದ ಮೂಲಕ ಈಗ ಸ್ಯಾಂಡಲ್‌ವುಡ್‌ಗೆ ಎಂಟ್ರಿ ನೀಡಿರುವ ಈ ನಟಿಗೆ ಮುಂದಿನ ದಿನಗಳಲ್ಲಿಯೂ ಹೆಚ್ಚಿನ ಅವಕಾಶಗಳು ದೊರಕುವ ನಿರೀಕ್ಷೆಯಿದೆ.
