ನಾಯಕನಾಗಿದ್ದಾಗ ಕನಸು ಈಡೇರಲಿಲ್ಲ; ಕೋಚ್ ಆಗಿ ವಿಶ್ವ ಕಿರೀಟಕ್ಕೆ ಮುತ್ತಿಕ್ಕಲು ಹೊರಟ ದ್ರಾವಿಡ್!

ಟೀಮ್ ಇಂಡಿಯಾ 140 ಭಾರತೀಯ ಕನಸು ನನಸು ಮಾಡಲು ಇನ್ನೊಂದು ಹೆಜ್ಜೆ ಹಿಂದಿದೆ. 2011ರ ಬಳಿಕ ಐಸಿಸಿ ಏಕದಿನ ವಿಶ್ವಕಪ್ ಟೂರ್ನಿಯ (ICC Cricket World Cup 2023) ಫೈನಲ್​ಗೇರಿದ ರೋಹಿತ್ ಸೇನೆ (India vs Australia, Final) ಚಾಂಪಿಯನ್ ಪಟ್ಟ ಅಲಂಕರಿಸುವ ವಿಶ್ವಾಸದಲ್ಲಿದೆ. ಅಹ್ಮದಾಬಾದ್​ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿರುವ (Narendra Modi Stadium, Ahmedabad) ಆಸ್ಟ್ರೇಲಿಯಾ ವಿರುದ್ಧದ ಫೈನಲ್​ನಲ್ಲಿ ಗೆದ್ದು 2003ರ ಸೇಡು ತೀರಿಸಿಕೊಂಡು ಇದರೊಂದಿಗೆ ಭಾರತ 3ನೇ ಏಕದಿನ ವಿಶ್ವಕಪ್​ ಗೆಲ್ಲಲಿ ಎಂಬುದು ಕ್ರಿಕೆಟ್ ಅಭಿಮಾನಿಗಳ ಆಶಯ.

ಇದನ್ನೂ ಓದಿ: ಇಂದಿನ ಕ್ರಿಕೆಟ್ ನಿಯಮಗಳು ಅಂದು ಇದ್ದಿದ್ದರೆ ಸಚಿನ್​ 200 ಶತಕ ಸಿಡಿಸುತ್ತಿದ್ರು; ಸನತ್ ಜಯಸೂರ್ಯ

ಟೂರ್ನಿಯುದ್ದಕ್ಕೂ ಟೀಮ್ ಇಂಡಿಯಾ ಭರ್ಜರಿ ಪ್ರದರ್ಶನ ನೀಡಿದ್ದಾರೆ. ರೋಹಿತ್ ಶರ್ಮಾ, ವಿರಾಟ್ ಕೊಹ್ಲಿ, ಮೊಹ್ಮಮ್ಮದ್ ಶಮಿ ಹೀಗೆ ಒಬ್ಬರಲ್ಲ, 11 ಆಟಗಾರರೂ ಮೈದಾನದಲ್ಲಿ ಖಡಕ್ ಪ್ರದರ್ಶನ ತೋರಿದ್ದಾರೆ. ತಂಡದ ಯಶಸ್ಸಿನಲ್ಲಿ ಪ್ರತಿಯೊಬ್ಬರೂ ತಮ್ಮದೇಯಾದ ಪಾತ್ರವಹಿಸಿದ್ದಾರೆ. ಆದರೆ ಈ ಆಟಗಾರರ ಯಶಸ್ಸಿಗೆ ಶಿಲ್ಪಿ ಹೆಡ್​ಕೋಚ್ ರಾಹುಲ್ ದ್ರಾವಿಡ್ ಎಂಬುದನ್ನು ಮರೆಯುವಂತಿಲ್ಲ. ಹಾಗೆಯೇ ಆಸ್ಟ್ರೇಲಿಯಾ ವಿರುದ್ಧ ಸೇಡು ತೀರಿಸಿಕೊಳ್ಳಬೇಕೆಂದು ಅಭಿಮಾನಿಗಳು ಹೇಗೆ ರೀತಿ ಕಾಯುತ್ತಿದ್ದಾರೋ, ಅದೇ ರೀತಿ ದ್ರಾವಿಡ್ ಕೂಡ ಅದೇ ಸಮಯಕ್ಕೆ ಕಾಯುತ್ತಿದ್ದಾರೆ.

ಆಟಗಾರ, ನಾಯಕನಾಗಿ 3, ಕೋಚ್​ ಆಗಿ 1 ವಿಶ್ವಕಪ್​

ಹೌದು, ಆಟಗಾರನಾಗಿ ಮತ್ತು ನಾಯಕನಾಗಿ ಮೂರು ವಿಶ್ವಕಪ್​​ಗಳಲ್ಲಿ ಕಣಕ್ಕಿಳಿದಿದ್ದಾರೆ. ಈಗ ಹೆಡ್​​ಕೋಚ್​ ಆಗಿ ಪ್ರತಿಷ್ಠಿತ ಟೂರ್ನಿಯನ್ನು ಆಡುತ್ತಿದ್ದಾರೆ. ಈ ಹಿಂದೆ ಅವರು 1999, 2003 ಮತ್ತು 2007ರ ವಿಶ್ವಕಪ್​​ಗಳಲ್ಲಿ​ ತಂಡದ ಭಾಗವಾಗಿದ್ದರು. ಅಂದು ಆಟಗಾರ ಮತ್ತು ನಾಯಕನಾಗಿ ಸಾಧಿಸದ ಚಾಂಪಿಯನ್ ಪಟ್ಟವನ್ನು ಒಂದು ಸಾಧಿಸಲು ಹೊರಟಿದ್ದಾರೆ. ತಮ್ಮ ಕನಸು ಈಡೇರಿಸಿಕೊಳ್ಳಲು ಇನ್ನೊಂದೇ ಹೆಜ್ಜೆ ಬಾಕಿದೆ. ಆದರೆ ಆಟಗಾರರಿಗೆ ಎಷ್ಟು ಒತ್ತಡ ಇದೆಯೋ ಅಷ್ಟೇ ಒತ್ತಡ ದ್ರಾವಿಡ್ ಮೇಲೂ ಅಷ್ಟೇ ಇದೆ.

ವಿಶ್ವಕಪ್​ನಲ್ಲಿ ದ್ರಾವಿಡ್ ಪ್ರದರ್ಶನ

1999ರಲ್ಲಿ ಏಕದಿನ ವಿಶ್ವಕಪ್​ಗೆ ದ್ರಾವಿಡ್​ ಡೆಬ್ಯೂ ಮಾಡಿದ್ದರು. ಇಂಗ್ಲೆಂಡ್​​ನಲ್ಲಿ ನಡೆದ ಈ ವಿಶ್ವಕಪ್​​​ನಲ್ಲಿ 8 ಪಂದ್ಯಗಳನ್ನಾಡಿ 65ರ ಸರಾಸರಿಯಲ್ಲಿ 461 ರನ್​ ಗಳಿಸಿದ್ದರು. ಆ ಮೂಲಕ ಟೂರ್ನಿಯಲ್ಲಿ ಅಧಿಕ ರನ್ ಗಳಿಸಿದ ಆಟಗಾರನಾಗಿ ಹೊರಹೊಮ್ಮಿದ್ದರು. 2003ರ ವಿಶ್ವಕಪ್​ನಲ್ಲಿ ಭಾರತ ಫೈನಲ್ ಪ್ರವೇಶಿಸಲು ದ್ರಾವಿಡ್ ತಮ್ಮದೇಯಾದ ಕೊಡುಗೆ ನೀಡಿದ್ದರು. ಆ ಟೂರ್ನಿಯಲ್ಲಿ ಭಾರತ ಪರ 318 ರನ್ ಕಲೆ ಹಾಕಿದ್ದರು. ಆದರೆ, ಫೈನಲ್​​ನಲ್ಲಿ ಕಾಣಿಕೆ ನೀಡಲು ವಿಫಲರಾದರು.

ಅಂದು ಆಸ್ಟ್ರೇಲಿಯಾ ವಿರುದ್ಧ ಫೈನಲ್​ನಲ್ಲಿ ಸೋತು ರನ್ನರ್​ಅಪ್​ಗೆ ತೃಪ್ತಿಪಟ್ಟುಕೊಂಡಿತ್ತು. ಈಗ ಭಾರತ-ಆಸ್ಟ್ರೇಲಿಯಾ ತಂಡಗಳೇ ಮತ್ತೆ ಫೈನಲ್​​ನಲ್ಲಿ ಮುಖಾಮುಖಿಯಾಗಿವೆ. ಅಂದು ಆಟಗಾರನಾಗಿ ಆಸೀಸ್ ವಿರುದ್ಧ ಗೆಲ್ಲಲಾಗದ ದ್ರಾವಿಡ್, ಈಗ ಕೋಚ್​ ಆಗಿ ಸೇಡು ತೀರಿಸಿಕೊಳ್ಳಲು ಇದೇ ಸರಿಯಾದ ಸಮಯ.

ವಿಶ್ವಕಪ್​​ನಲ್ಲಿ ನಾಯಕನಾಗಿ ದ್ರಾವಿಡ್​​​

ಬದಲಾದ ಕಾಲಮಾನದಲ್ಲಿ ತಂಡದಲ್ಲಿ ಆಟಗಾರನಾಗಿದ್ದ ರಾಹುಲ್ ದ್ರಾವಿಡ್, 2007ರ ವಿಶ್ವಕಪ್​ಗೆ ನಾಯಕನಾಗಿ ಬಡ್ತಿ ಪಡೆದರು. ದುರಾದೃಷ್ಟವೆಂಬಂತೆ ಅವರ ನಾಯಕತ್ವದಲ್ಲಿ ಟೀಮ್ ಇಂಡಿಯಾ, ಲೀಗ್​ ಹಂತದಿಂದಲೇ ಹೊರಬಿತ್ತು. ವಿಶ್ವಕಪ್ ಮುಗಿದ ಕೆಲವೇ ತಿಂಗಳ ನಂತರ ನಾಯಕತ್ವದಿಂದಲೂ ಕೆಳಗಿಳಿದರು. ಬಳಿಕ 2011ರ ವಿಶ್ವಕಪ್ ತಂಡದ ಭಾಗವಾಗಿರಲಿಲ್ಲ. ಈಗ 16 ವರ್ಷಗಳ ನಂತರ ಕೋಚ್​ ಆಗಿ ಏಕದಿನ ವಿಶ್ವಕಪ್​​ನಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಹಾಗಾಗಿ ತನ್ನ ಕನಸು ನನಸು ಮಾಡಿಕೊಳ್ಳಲು ಹೊರಟಿದ್ದಾರೆ.

ಕೋಚ್​ ಆಗಿ ವಿಶ್ವಕಪ್​ ಗೆಲ್ಲುತ್ತಾರಾ?

2021ರ ಟಿ20 ವಿಶ್ವಕಪ್​ ಮುಕ್ತಾಯದ ನಂತರ ಅದೇ ವರ್ಷ ನವೆಂಬರ್​​ನಲ್ಲಿ ರಾಹುಲ್ ದ್ರಾವಿಡ್ ಭಾರತದ ಹೆಡ್​ಕೋಚ್ ಆಗಿ ಚುಕ್ಕಾಣಿ ಹಿಡಿದರು. 2022ರಲ್ಲಿ ನಡೆದ ಟಿ20 ವಿಶ್ವಕಪ್​​ನಲ್ಲಿ ಅವರ ಮಾರ್ಗದರ್ಶನದಲ್ಲಿ ಭಾರತ ತಂಡವು ಸೆಮಿಫೈನಲ್​ನಲ್ಲಿ ಹೊರ ಬಿದ್ದಿತು. 2023ರ ಐಸಿಸಿ ಟೆಸ್ಟ್​ ಚಾಂಪಿಯನ್​ಶಿಪ್​ ಫೈನಲ್​​ನಲ್ಲೂ ಭಾರತ ಸೋತು ರನ್ನರ್​ಅಪ್​ ಸ್ಥಾನಕ್ಕೆ ತೃಪ್ತಿಯಾಗಿತ್ತು. ಇದೀಗ ದ್ರಾವಿಡ್ ಕೋಚ್​ ಆಗಿ ಏಕದಿನ ವಿಶ್ವಕಪ್​ ಗೆಲ್ಲುತ್ತಾರಾ? ಮತ್ತೊಂದೆಡೆ ದ್ರಾವಿಡ್ ಭವಿಷ್ಯವು ಈ ಗೆಲುವಿನ ಮೇಲೆ ನಿಂತಿದೆ ಎಂಬುದು ವಿಶೇಷ.

ದ್ರಾವಿಡ್​ ಕೋಚಿಂಗ್ ಅಡಿ ಅಂಡರ್​-19 ಚಾಂಪಿಯನ್

ಕ್ರಿಕೆಟ್​​ಗೆ ನಿವೃತ್ತಿ ಘೋಷಿಸಿದ ನಂತರ ಬೆಂಗಳೂರಿನ ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿಯ ನಿರ್ದೇಶಕರಾಗಿದ್ದರು. 2016 ಮತ್ತು 2018ರ ಅಂಡರ್​-19 ವಿಶ್ವಕಪ್​​ಗಳಲ್ಲಿ ಭಾರತ ತಂಡದ ಕೋಚ್​ ಆಗಿದ್ದರು. ಪೃಥ್ವಿ ಶಾ ನೇತೃತ್ವದ ತಂಡವು 2018ರಲ್ಲಿ ಚಾಂಪಿಯನ್ ಪಟ್ಟ ಅಲಂಕರಿಸಿತು. ಇಶಾನ್ ಕಿಶನ್ ನೇತೃತ್ವದ 2016ರ ಅಂಡರ್​​​-19 ವಿಶ್ವಕಪ್​​ ಫೈನಲ್​​ನಲ್ಲಿ ಭಾರತ ಸೋತಿತ್ತು. ಆದರೀಗ ದ್ರಾವಿಡ್ ಮೇಲೆ ನಿರೀಕ್ಷೆ ಹೆಚ್ಚಿದೆ. ದ್ರಾವಿಡ್ ಮಾರ್ಗದರ್ಶನದಲ್ಲಿ ಮೆನ್ ಇನ್ ಬ್ಲೂ ವಿಶ್ವಕಿರೀಟಕ್ಕೆ ಮುತ್ತಿಕ್ಕಲಿ, ಭಾರತ ವಿಶ್ವ ಚಾಂಪಿಯನ್ ಆಗಲಿ ಎಂಬುದೇ ನಮ್ಮ ನಿಮ್ಮೆಲ್ಲರ ಆಶಯ.