Badam Halwa: ಆಹಾ! ಬಾದಾಮಿ ಹಲ್ವಾ ಬಲುರುಚಿ; ಮಾಡೋಕೂ ಸುಲಭ, ಬೇಕಾಗುವ ಸಾಮಾಗ್ರಿಗಳೂ ಕಡಿಮೆ.. ಇಲ್ಲಿದೆ ರೆಸಿಪಿ

ಹಲ್ವಾಗಳಲ್ಲಿ ಕೇಸರಿ ಹಲ್ವಾ, ಕ್ಯಾರೆಟ್​ ಹಲ್ವಾ, ಬಾದಾಮಿ ಹಲ್ವಾ ಹೀಗೆ ನಾನಾ ವಿಧಗಳಿವೆ. ಈ ಪೈಕಿ ಬಾದಾಮಿ ಹಲ್ವಾ ಕೂಡ ಬಹಳ ರುಚಿಕರವಾದ ಖಾದ್ಯ. ಸುಲಭವಾಗಿ ಹಾಗೂ ಕಡಿಮೆ ಸಾಮಾಗ್ರಿಗಳಲ್ಲಿ ಮಾಡಬಹುದಾದ ತಿನಿಸು ಕೂಡ ಇದಾಗಿದೆ. ನಿಮ್ಮ ಮನೆಯಲ್ಲಿ ವಿಶೇಷ ದಿನಗಳಲ್ಲಿ ಇದನ್ನು ಮಾಡಿ ಸವಿಯಿರಿ.

ಬೇಕಾಗುವ ಸಾಮಾಗ್ರಿಗಳು:

1. ಕೇಸರಿ (ಚಿಟಿಕೆ)

2. ಅರ್ಧ ಕಪ್​ ಬಾದಾಮಿ

3. ಅರ್ಧ ಕಪ್​ ಹಾಲು

4. ಅರ್ಧ ಕಪ್​ ಸಕ್ಕರೆ

5. ಮೂರು ಟೇಬಲ್​ ಸ್ಪೂನ್​ ತುಪ್ಪ

6. ಏಲಕ್ಕಿ ಪುಡಿ (ಚಿಟಿಕೆ)

ಬಾದಾಮಿ ಹಲ್ವಾ ಮಾಡುವ ವಿಧಾನ:

- ಮೊದಲು ಚಿಟಿಕೆ ಕೇಸರಿಯನ್ನು ಎರಡು ಟೇಬಲ್​ ಸ್ಪೂನ್​ ಹಾಲಿನಲ್ಲಿ ನೆನೆಸಿಟಿ.

- ಅರ್ಧ ಕಪ್​ ಬಾದಾಮಿಯನ್ನು ಬಿಸಿ ನೀರಿನಲ್ಲಿ ನೆನೆಸಿಡಬೇಕು.

- ಬಳಿಕ ಬಾದಾಮಿಯ ಸಿಪ್ಪೆ ತೆಗೆದು ಮಿಕ್ಸಿ ಜಾರ್​ಗೆ ಹಾಕಿ. ಅದಕ್ಕೆ ಅರ್ಧ ಕಪ್​ ಹಾಲಿನ ಜೊತೆ ರುಬ್ಬಿ. ತುಂಬಾ ನೈಸ್​ ಆಗಬಾರದು ತರಿತರಿಯಾಗಿ ಇರಬೇಕು.

- ನಂತರ ಒಂದು ಬಾಣಲೆಗೆ ಒಂದು ಟೇಬಲ್​ ಸ್ಪೂನ್​ ತುಪ್ಪ ಹಾಕಿ ಅರೆದುಕೊಂಡಿರುವ ಬಾದಾಮಿ ಮತ್ತು ಹಾಲಿನ ಮಿಶ್ರಣವನ್ನ ಹಾಕಿ ಕಲಕಬೇಕು.

- ಹೀಗೆ ಕಲಕುತ್ತಿರುವಾಗಲೇ ಅರ್ಧ ಕಪ್​ ಸಕ್ಕರೆ ಹಾಕಿ ಕಲಕುವುದನ್ನು ಮುಂದುವರೆಸಿ.

- ನಂತರ ಇದಕ್ಕೆ ನೆನೆಸಿಟ್ಟ ಕೇಸರಿ ಹಾಲನ್ನು ಹಾಕಿ ಕಲಕುವುದನ್ನು ಮುಂದುವರೆಸಿ.

- ಈ ಮಿಶ್ರಣ ಸ್ವಲ್ಪ ಗಟ್ಟಿಯಾದ ಮೇಲೆ 2 ಟೇಬಲ್​ ಸ್ಪೂನ್​ ತುಪ್ಪ ಹಾಕಿ ಮತ್ತೆ ಕಲಕಿ.

- ಮತ್ತೆ ಸ್ವಲ್ಪ ಗಟ್ಟಿಯಾದ ಮೇಲೆ ಚಿಟಿಕೆ ಏಲಕ್ಕಿ ಪುಡಿ ಸೇರಿಸಿ. ಇದಕ್ಕೆ ಬೇಕಾದರೆ ಕೊನೆಯಲ್ಲಿ ಗೋಡಂಬಿ ಮತ್ತು ಪಿಸ್ತಾ ತುಂಡುಗಳನ್ನು ಹಾಕಿಕೊಳ್ಳಬಹುದು.

- ಈಗ ಬಿಸಿಬಿಸಿಯಾದ ಬಾದಾಮಿ ಹಲ್ವಾ ರೆಡಿ. ಇದನ್ನು ಸ್ವಲ್ಪ ಸಣ್ಣಗಾದ ಮೇಲೆ ಸವಿಯಿರಿ.

ಇದನ್ನೂ ಓದಿ: Chutney Recipe: 5 ನಿಮಿಷದಲ್ಲಿ ರೆಡಿ ಆಗುವ ಸೂಪರ್‌ ಟೇಸ್ಟಿ ಚಟ್ನಿ ರೆಸಿಪಿ ಇಲ್ಲಿದೆ; ಅನ್ನ, ದೋಸೆ, ಚಪಾತಿಗೆ ಇದು ಬೆಸ್ಟ್‌ ಕಾಂಬಿನೇಷನ್