Eclipse 2024: ಮುಂದಿನ ವರ್ಷ ಎರಡು ಬಾರಿ ಸಂಭವಿಸಲಿದೆ ಸೂರ್ಯಗ್ರಹಣ-ಚಂದ್ರಗ್ರಹಣ; ಯಾವಾಗ, ಎಲ್ಲೆಲ್ಲಿ ಗೋಚರ; ಇಲ್ಲಿದೆ ವಿವರ

2024ನೇ ಹೊಸ ವರ್ಷಕ್ಕೆ ಕಾಲಿಡಲು ನಾವೆಲ್ಲರೂ ಸಜ್ಜಾಗಿದ್ದೇವೆ. ಈ ನಡುವೆ 2024ರಲ್ಲಿ ಏನೆಲ್ಲಾ ಸಂಭವಿಸಬಹುದು ಎಂಬ ಕುತೂಹಲ ನಮ್ಮೆಲ್ಲರಲ್ಲೂ ಇರುವುದು ಸಹಜ. ಹಾಗಾದರೆ 2024ರಲ್ಲಿ ನಡೆಯುವ ಗ್ರಹಣಗಳ ಬಗ್ಗೆ ಇಂದು ತಿಳಿಯೋಣ.

ಜ್ಯೋತಿಷ್ಯ ಹಾಗೂ ಖಗೋಳಶಾಸ್ತ್ರ ಎರಡಲ್ಲೂ ಗ್ರಹಣಕ್ಕೆ ಬಹಳ ಮಹತ್ವವಿದೆ. ಖಗೋಳಪ್ರೇಮಿಗಳು ಗ್ರಹಣ ಬಗ್ಗೆ ಕೌತುಕ ಇರಿಸಿಕೊಂಡಿರುವುದು ಸಹಜ. ಈ ವರ್ಷ (2023) ಎರಡು ಬಾರಿ ಸೂರ್ಯಗ್ರಹಣ ಹಾಗೂ ಎರಡು ಬಾರಿ ಚಂದ್ರಗ್ರಹಣವಾಗಿತ್ತು, ಮುಂದಿನ ವರ್ಷ ಅಂದರೆ 2024ರಲ್ಲೂ 2 ಬಾರಿ ಸೂರ್ಯಗ್ರಹಣ ಹಾಗೂ 2 ಬಾರಿ ಚಂದ್ರಗ್ರಹಣ ಬರಲಿದೆ.

ಸೂರ್ಯ ಮತ್ತು ಭೂಮಿಯ ನಡುವೆ ಚಂದ್ರ ಹಾದುಹೋದಾಗ ಸೂರ್ಯಗ್ರಹಣ ಸಂಭವಿಸಿದರೆ, ಸೂರ್ಯ ಹಾಗೂ ಚಂದ್ರ ನಡುವೆ ಭೂಮಿ ಬಂದಾಗ ಚಂದ್ರಗ್ರಹಣ ಸಂಭವಿಸುತ್ತದೆ. ಚಂದ್ರಗ್ರಹಣದ ಸಮಯದಲ್ಲಿ ಈ ಮೂರು ಗ್ರಹಗಳು ಒಂದೇ ನೇರದಲ್ಲಿ ಇರುತ್ತವೆ. ಪ್ರಪಂಚದಾದ್ಯಂತ ಸೂರ್ಯ ಹಾಗೂ ಚಂದ್ರಗ್ರಹಣಕ್ಕೆ ಬಹಳಷ್ಟು ಪ್ರಾಮುಖ್ಯವಿದೆ. ಮುಂದಿನ ವರ್ಷ ಗ್ರಹಣ ಯಾವಾಗ ನಡೆಯುತ್ತದೆ, ಎಲೆಲ್ಲಾ ಗೋಚರವಾಗಬಹುದು ಎಂಬ ವಿವರ ಇಲ್ಲಿದೆ.

ಇದನ್ನೂ ಓದಿ: 19** ರಲ್ಲಿ ಜನಿಸಿದವರಿಗೆ 2024 ಅತ್ಯಂತ ಶುಭಪ್ರದ: ನೀವು ಜನಿಸಿದ ವರ್ಷಕ್ಕೆ 2024 ಹೇಗಿದೆ? ಜ್ಯೋತಿಷಿ ಸುರಭಿ ನೀಡುವ ಉತ್ತರ ಇದು

ಸೂರ್ಯ ಗ್ರಹಣ 2024

2024ರ ಮೊದಲ ಸೂರ್ಯಗ್ರಹಣ ಏಪ್ರಿಲ್‌ 8 ರಂದು ನಡೆಯಲಿದೆ. ಇದು ಸಂಪೂರ್ಣ ಸೂರ್ಯಗ್ರಹಣವಾಗಿರುತ್ತದೆ. ಇದು ಸೌತ್‌ ಪೆಸಿಫಕ್‌ ಮಹಾಸಾಗರದಿಂದ ಆರಂಭವಾಗಿ ಉತ್ತರ ಅಮೆರಿಕವನ್ನು ದಾಟುತ್ತದೆ. ನಂತರ ಮೆಕ್ಸಿಕೊ, ಅಮೆರಿಕ ಮತ್ತು ಕೆನಡಾವನ್ನು ಹಾದು ಹೋಗುತ್ತದೆ. ಈ ನಡುವೆ ಕೋಸ್ಟರಿಕಾ, ಕ್ಯೂಬಾ, ಅರುಬಾ, ಕೇಮನ್‌ ದ್ವೀಪಗಳು, ಡೊಮಿನಿಕಾ, ರೆಂಚ್ ಪಾಲಿನೇಷ್ಯಾ ಮತ್ತು ಜಮೈಕಾದಲ್ಲಿ ಭಾಗಶಃ ಸೂರ್ಯಗ್ರಹಣ ಸಂಭವಿಸುತ್ತದೆ.

ದೃಕ್‌ ಪಂಚಾಗದ ಪ್ರಕಾರ ಈ ಸೂರ್ಯಗ್ರಹಣದ ಅವಧಿ.

ಗ್ರಹಣ ಆರಂಭ ಸಮಯ: ಮಧ್ಯಾಹ್ನ 3.42 (UTC- Coordinated Universal Time)

ಗ್ರಹಣ ಮುಕ್ತಾಯ: ಸಂಜೆ 4.30 (UTC)

2024ರ ಎರಡನೇ ಸೂರ್ಯಗ್ರಹಣ ಅಕ್ಟೋಬರ್‌ 2 ರಂದು ಸಂಭವಿಸಲಿದೆ. ಇದು ಆನ್ಯುಲರ್‌ ಸೂರ್ಯಗ್ರಹಣವಾಗಿರುತ್ತದೆ. ಚಂದ್ರನು ಸೂರ್ಯನ ಮುಂದೆ ಚಲಿಸುವಾಗ ಆನ್ಯುಲರ್‌ ಸೂರ್ಯಗ್ರಹಣ ಅಥವಾ ಸೂರ್ಯನ ಸುತ್ತಲೂ ಅಗ್ನಿಜ್ವಾಲೆಯಂತಹ ರಿಂಗ್‌ ಆಕಾರ ಗೋಚರವಾಗುತ್ತದೆ. ಇದು ಸೂರ್ಯನನ್ನು ಸಂಪೂರ್ಣವಾಗಿ ಆವರಿಸುವುದಿಲ್ಲ. ಈ ಗ್ರಹಣವು ದಕ್ಷಿಣ ಅಮೆರಿಕದಲ್ಲಿ ಗೋಚರಿಸುತ್ತದೆ. ಭಾಗಶಃ ಸೂರ್ಯಗ್ರಹಣ ಅಂತಲೂ ಕರೆಯುವ ಅನ್ಯೂಲರ್‌ ಸೂರ್ಯಗ್ರಹಣವು ದಕ್ಷಿಣ ಅಮೆರಿಕ, ಅಂಟಾರ್ಟಿಕಾ, ಪೆಸಿಫಿಕ್‌ ಮಹಾಸಾಗರ, ಅಟ್ಲಾಂಟಿಕ್‌ ಸಾಗರ ಮತ್ತು ಉತ್ತರ ಅಮೆರಿಕದಲ್ಲಿ ಗೋಚರಿಸುತ್ತದೆ.

ಗ್ರಹಣದ ಸಮಯ: ಗ್ರಹಣ ಆರಂಭ: ಮಧ್ಯಾಹ್ನ 3.42

ಗ್ರಹಣ ಅಂತ್ಯ ಸಮಯ: ಸಂಜೆ 4.50

ಈ ಎರಡೂ ಗ್ರಹಣಗಳು ಭಾರತದಲ್ಲಿ ಗೋಚರವಾಗುವುದಿಲ್ಲ. ಆ ಕಾರಣಕ್ಕೆ ಸೂತಕ ಛಾಯೆ ಭಾರತೀಯರಿಗೆ ಇರುವುದಿಲ್ಲ.

ಚಂದ್ರಗ್ರಹಣ

2024ರ ಮೊದಲ ಚಂದ್ರಗ್ರಹಣವು ಮಾರ್ಚ್‌ 25 ರಂದು ಸಂಭವಿಸಲಿದೆ. ಇದು ಪೆನಂಬ್ರಲ್‌ ಚಂದ್ರಗ್ರಹಣವಾಗಿರುತ್ತದೆ. ಪೆನಂಬ್ರಲ್‌ ಸೂರ್ಯಗ್ರಹಣದ ಸಮಯದಲ್ಲಿ ಚಂದ್ರನು ಭೂಮಿಯ ಹೊರ ಭಾಗದ ನೆರಳಿನ ಮೇಲೆ ಹಾದು ಹೋಗುತ್ತಾನೆ. ಇದನ್ನು ಪೆನಂಬ್ರಾ ಎಂದು ಕರೆಯುತ್ತಾರೆ. ಇದು ಯುರೋಪ್, ಆಸ್ಟ್ರೇಲಿಯಾ ಮತ್ತು ಆಫ್ರಿಕಾ, ಉತ್ತರ/ಪೂರ್ವ ಏಷ್ಯಾ, ಉತ್ತರ ಅಮೇರಿಕಾ, ದಕ್ಷಿಣ ಅಮೆರಿಕಾ, ಪೆಸಿಫಿಕ್, ಅಟ್ಲಾಂಟಿಕ್, ಆರ್ಕ್ಟಿಕ್ ಮತ್ತು ಅಂಟಾರ್ಕ್ಟಿಕಾದಲ್ಲಿ ಗೋಚರಿಸುತ್ತದೆ.

ಗ್ರಹಣ ಆರಂಭ: ಬೆಳಗಿನ ಜಾವ 4.53

ಗ್ರಹಣ ಮುಕ್ತಾಯ: ಬೆಳಿಗ್ಗೆ 7.12

ಎರಡನೇ ಚಂದ್ರಗ್ರಹಣವು ಸೆಪ್ಟೆಂಬರ್‌ 18 ರಂದು ಸಂಭವಿಸಲಿದೆ. ಇದು ಭಾಗಶಃ ಚಂದ್ರಗ್ರಹಣವಾಗಿರುತ್ತದೆ. ಇದು ಯುರೋಪ್‌, ಏಷ್ಯಾ, ಆಸ್ಟ್ರೇಲಿಯಾ, ಆಫ್ರಿಕಾ, ಉತ್ತರ/ಪಶ್ಚಿಮ ಉತ್ತರ ಅಮೆರಿಕ, ಉತ್ತರ/ಪೂರ್ವ ದಕ್ಷಿಣ ಅಮೆರಿಕ, ಪೆಸಿಫಿಕ್, ಅಟ್ಲಾಂಟಿಕ್, ಹಿಂದೂ ಮಹಾಸಾಗರ, ಆರ್ಕ್ಟಿಕ್ ಮತ್ತು ಅಂಟಾರ್ಟಿಕಾ ಭಾಗದಲ್ಲಿ ಗೋಚರಿಸುತ್ತದೆ.

ಈ ಬಾರಿ ಸೂರ್ಯ ಹಾಗೂ ಚಂದ್ರಗ್ರಹಣಗಳೆರಡೂ ಭಾರತದಲ್ಲಿ ಗೋಚರವಾಗುವುದಿಲ್ಲ.

ಇದನ್ನೂ ಓದಿ: New Year 2024: ಸಂಖ್ಯಾಶಾಸ್ತ್ರದ ಪ್ರಕಾರ 2024ರ ಅರ್ಥವೇನು; ಹೊಸ ವರ್ಷದ ಭವಿಷ್ಯದ ಬಗ್ಗೆ ಸಂಖ್ಯಾಶಾಸ್ತ್ರದ ವಿವರ