ಇನ್ನುಂದೆ ಜಿಯೋ ಸೇರಿದಂತೆ ಈ ಫೋನ್‌ಗಳಲ್ಲಿ ವಾಟ್ಸ್​ಆ್ಯಪ್ ಬಂದ್; ಮೆಟಾದಿಂದ ದೊಡ್ಡ ಅಪ್ಡೇಟ್

ಮೆಟಾದ ಜನಪ್ರಿಯ ಅಪ್ಲಿಕೇಶನ್ ವಾಟ್ಸ್​ಆ್ಯಪ್​ ಬಗ್ಗೆ ಸಂಸ್ಥೆ ಮಹತ್ವದ ನಿರ್ಧಾರ ತೆಗೆದುಕೊಂಡಿದೆ. ಶೀಘ್ರದಲ್ಲೇ ಹೊಸ ಅಪ್‌ಡೇಟ್ ಬರಲಿದ್ದು, 2025ರ ವೇಳೆಗೆ KaiOS ಸಾಧನಗಳಲ್ಲಿ ವಾಟ್ಸ್​ಆ್ಯಪ್ ಕಾರ್ಯನಿರ್ವಹಿಸುವುದನ್ನು ನಿಲ್ಲಿಸುತ್ತದಂತೆ. ಅಂದರೆ ಇದು ಜಿಯೋ ಫೋನ್, ಜಿಯೋ ಫೋನ್ 2 ಮತ್ತು ಇತರ ಹಲವು ಫೀಚರ್ ಫೋನ್‌ಗಳು ಮತ್ತು ಕೀಪ್ಯಾಡ್ ಫೋನ್‌ಗಳಲ್ಲಿ ವಾಟ್ಸ್​ಆ್ಯಪ್ ಕಾರ್ಯನಿರ್ವಹಿಸುವುದಿಲ್ಲ. KaiOSನಲ್ಲಿ ಅಪ್ಲಿಕೇಶನ್ ಡೌನ್‌ಲೋಡ್ ಮಾಡುವುದನ್ನು ವಾಟ್ಸ್​​ಆ್ಯಪ್ ನಿಲ್ಲಿಸಿದೆ.

ಮೆಟಾ ಇಂತಹ ನಿರ್ಧಾರ ತೆಗೆದುಕೊಂಡಿರುವುದು ಇದೇ ಮೊದಲಲ್ಲ. ಇದಕ್ಕೂ ಮೊದಲು, ನವೆಂಬರ್ 2021ರಲ್ಲಿ, ವಾಟ್ಸ್​ಆ್ಯಪ್ ಆಂಡ್ರಾಯ್ಡ್ 4.0.3, ಐಒಎಸ್ 9 ಮತ್ತು KaiOS 2.5.0 ನಲ್ಲಿ ಕಾರ್ಯನಿರ್ವಹಿಸುವುದನ್ನು ನಿಲ್ಲಿಸಿತ್ತು. ಅಂದರೆ, ಕೆಲವು ಓಎಸ್ ಬಗ್ಗೆ ಈ ಹಿಂದೆಯೂ ಇಂತಹ ನಿರ್ಧಾರ ತೆಗೆದುಕೊಂಡಿದೆ.

ಇದೀಗ KaiOS 2.5.4 ಅಥವಾ ನಂತರದ ಆವೃತ್ತಿಗಳಲ್ಲಿ ವಾಟ್ಸ್​ಆ್ಯಪ್ ಕಾರ್ಯನಿರ್ವಹಿಸುವುದಿಲ್ಲ ಎಂದು ಹೇಳಲಾಗಿದೆ. ಇದು ಜಿಯೋ ಫೋನ್ ಸೇರಿದಂತೆ ನೋಕಿಯಾ 6300 4G ಫೋನ್‌ಗಳಲ್ಲಿ ಕಾರ್ಯನಿರ್ವಹಿಸುವುದಿಲ್ಲ. ಈ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಬಳಕೆದಾರರೊಬ್ಬರು ಮಾಹಿತಿ ನೀಡಿದ್ದಾರೆ.

ಈ ಬಗ್ಗೆ KaiOS ನ ವೆಬ್‌ಸೈಟ್‌ನಲ್ಲಿ ಕೂಡ ಮಾಹಿತಿ ನೀಡಲಾಗಿದೆ. ಜೂನ್ 25, 2024ರಿಂದ ವಾಟ್ಸ್​ಆ್ಯಪ್ ಅನ್ನು ಸ್ಥಗಿತಗೊಳಿಸುವ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದೆ ಎಂದು ಹೇಳಿದ್ದಾರೆ. ಯಾವುದೇ ಹೊಸ ಬಳಕೆದಾರರಿಗೆ ಡೌನ್‌ಲೋಡ್ ಮಾಡಲು ಮತ್ತು ಲಾಗಿನ್ ಮಾಡಲು ಸಾಧ್ಯವಾಗುವುದಿಲ್ಲ. ಸದ್ಯ ವಾಟ್ಸ್​ಆ್ಯಪ್ ಉಪಯೋಗಿಸುತ್ತಿರುವ ಬಳಕೆದಾರರು 2025ರ ಆರಂಭದವರೆಗೆ ಈ ಅಪ್ಲಿಕೇಶನ್ ಅನ್ನು ಬಳಸಲು ಸಾಧ್ಯವಾಗುತ್ತದೆ.

ಇದನ್ನೂ ಓದಿ | 50MP ಕ್ಯಾಮೆರಾ, 5000mAh ಬ್ಯಾಟರಿ, ಬೆಲೆ ಕೇವಲ 10,499 ರೂ; ಮಾರುಕಟ್ಟೆಗೆ ಬಂತು ಅಗ್ಗದ ಫೋನ್

KaiOS ಅನ್ನು ಕೀಪ್ಯಾಡ್ ಫೋನ್‌ಗಳಲ್ಲಿ ಬಳಸಲಾಗುತ್ತದೆ. ಈ ಫೋನ್‌ನಲ್ಲಿ ಯೂಟ್ಯೂಬ್, ಫೇಸ್‌ಬುಕ್‌ನಂತಹ ಅಪ್ಲಿಕೇಶನ್‌ಗಳನ್ನು ಸಹ ಬಳಸಬಹುದು.

ಈ ಫೋನ್‌ಗಳಲ್ಲಿ Whatsapp ಕಾರ್ಯನಿರ್ವಹಿಸುವುದಿಲ್ಲ

• ಜಿಯೋ ಫೋನ್
• ಜಿಯೋ ಫೋನ್ 2
• ನೋಕಿಯಾ 2720 ಫ್ಲಿಪ್
• ನೋಕಿಯಾ 6300 4G
• ಐಟೆಲ್ ಮತ್ತು ಕಾರ್ಬನ್ ಫೋನ್‌ಗಳು

KaiOSನಲ್ಲಿ ಬಂದ್ ಆದ ನಂತರ ಮೆಟಾ-ಮಾಲೀಕತ್ವದ ಸಂದೇಶ ಕಳುಹಿಸುವಿಕೆ ಅಪ್ಲಿಕೇಶನ್ ಆಂಡ್ರಾಯ್ಡ್, ಐಒಎಸ್ ಮತ್ತು ಡೆಸ್ಕ್‌ಟಾಪ್ ಪ್ಲಾಟ್‌ಫಾರ್ಮ್‌ಗಳಲ್ಲಿ ಮಾತ್ರ ಲಭ್ಯವಿರುತ್ತದೆ. ಸದ್ಯ ವಾಟ್ಸ್​ಆ್ಯಪ್ ಅನೇಕ ಹೊಸ ವೈಶಿಷ್ಟ್ಯಗಳು ಮತ್ತು ಎಐ ಏಕೀಕರಣಕ್ಕೆ ಒತ್ತು ನೀಡುತ್ತಿದೆ. ವಾಟ್ಸ್​ಆ್ಯಪ್ ಇತ್ತೀಚೆಗೆ ಭಾರತದಲ್ಲಿ ಮೆಟಾ AI ಬೆಂಬಲವನ್ನು ಕೂಡ ಪ್ರಾರಂಭಿಸಿತು. ಬಳಕೆದಾರರಿಗೆ ಪ್ರತ್ಯೇಕ ಚಾಟ್ ಮೂಲಕ AI ಚಾಟ್‌ಬಾಟ್‌ನೊಂದಿಗೆ ಸಂವಹನ ನಡೆಸಲು ಇದು ಅನುವು ಮಾಡಿಕೊಡುತ್ತದೆ.

ವರದಿ: ವಿನಯ್ ಭಟ್.

ಇನ್ನಷ್ಟು ಟೆಕ್ನಾಲಜಿ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್‌ ಮಾಡಿ

ಇದನ್ನೂ ಓದಿ | ಸ್ಮಾರ್ಟ್‌ಫೋನ್​ ಕೆಳಭಾಗದಲ್ಲಿ ಈ ರಂಧ್ರ ಯಾಕಿದೆ ಗೊತ್ತೇ, ಇದರ ಉಪಯೋಗವೇನು? ಇಲ್ಲಿದೆ ಕುತೂಹಲಕಾರಿ ಮಾಹಿತಿ