Ticket Scam: ವರ್ಷಾಂತ್ಯಕ್ಕೆ ದೂರದೂರಿಗೆ ಪ್ರವಾಸಕ್ಕೆ ಹೋಗುತ್ತಿದ್ದೀರಾ? ಫ್ಲೈಟ್​ ಟಿಕೆಟ್ ಬುಕ್​ ಮಾಡುವ ಮುನ್ನ ಈ ವಿಚಾರ ಗಮನದಲ್ಲಿರಲಿ

ಹೊಸ ವರ್ಷವನ್ನು ಸ್ವಾಗತಿಸೋಕೆ ಇನ್ನು ಹೆಚ್ಚು ಕಮ್ಮಿ 2 ವಾರಗಳು ಮಾತ್ರ ಬಾಕಿ ಉಳಿದಿದೆ. ವರ್ಷಾಂತ್ಯವನ್ನು ವೆಕೇಷನ್​ ಮೂಡ್​ನಲ್ಲಿ ಕಳೆಯಬೇಕು ಎಂದುಕೊಂಡಿದ್ದರೆ ನಿಮಗೆ ಒಂದಷ್ಟು ಏರ್​ಲೈನ್​ ಟಿಕೆಟ್​ ಸಂಬಂಧಿ ಸಲಹೆಗಳನ್ನು ನಾವು ನೀಡುತ್ತೇವೆ. ರಜಾ ದಿನಗಳಲ್ಲಿ ಪ್ರವಾಸದ ಬಗ್ಗೆ ಪ್ಲಾನ್ ಮಾಡುವ ಮುನ್ನ ನೀವು ಕೆಲವು ಅಂಶಗಳನ್ನು ಅವಶ್ಯವಾಗಿ ತಿಳಿದಿರಲೇಬೇಕು.

ವರ್ಷಾಂತ್ಯದಲ್ಲಿ ಪ್ರವಾಸಕ್ಕೆ ತೆರಳಲು ಅನೇಕರು ಪ್ಲಾನ್​ ಮಾಡುತ್ತಿರುತ್ತಾರೆ. ಹೀಗಾಗಿ ನೀವು ಗಡಿಬಿಡಿ ಮಾಡಿಕೊಳ್ಳಬೇಡಿ. ಏರ್​ಲೈನ್​ ಟಿಕೆಟ್​ ವಂಚನೆಗಳಿಗೆ ಬಲಿಪಶುಗಳಾಗಬೇಡಿ. ವಿಮಾನಗಳ ದರವನ್ನು ತಿಳಿದುಕೊಳ್ಳಲು ನೀವು ವಿವಿಧ ವೆಬ್​ಸೈಟ್​ಗಳಿಗೆ ಸೈನಪ್​ ಆಗಿ . ಏರ್​ಲೈನ್​ಗಳು ತಿಳಿಸುವ ಹೊಸ ಹೊಸ ಮಾರ್ಗಗಳ ಬಗ್ಗೆ ಚೆನ್ನಾಗಿ ಅರಿತುಕೊಳ್ಳಿ .

ಯಾವೆಲ್ಲ ರೀತಿಯಲ್ಲಿ ಏರ್​ಲೈನ್​ ಟಿಕೆಟ್​ ವಂಚನೆ ನಡೆಯುತ್ತದೆ..?

ನಕಲಿ ಟ್ರಾವೆಲ್ಲಿಂಗ್​ ವೆಬ್​ಸೈಟ್​ಗಳನ್ನು ಹೊಂದಿರುವವರು ಕದ್ದ ಅಥವಾ ಹ್ಯಾಕ್​ ಮಾಡಿದ ಯಾವುದಾದರೂ ಕ್ರೆಡಿಟ್​ ಕಾರ್ಡ್​ಗಳಿಂದ ಏರ್​ಲೈನ್​ ಟಿಕೆಟ್​ಗಳನ್ನು ಬುಕ್​ ಮಾಡಿರುತ್ತಾರೆ.

ನಕಲಿ ವೆಬ್​ಸೈಟ್​​ಗಳಲ್ಲಿ ಈ ರೀತಿ ಯಾರದ್ದೋ ಕ್ರೆಡಿಟ್​ ಕಾರ್ಡ್​ಗಳಲ್ಲಿ ಟಿಕೆಟ್​ಗಳನ್ನು ಬುಕ್​ ಮಾಡಿ ಬಳಿಕ ಈ ಟಿಕೆಟ್​ ದರವನ್ನು ಆಫರ್​ ಎಂದು ಬಣ್ಣಿಸುತ್ತಾ ಅತೀ ಕಡಿಮೆ ದರಕ್ಕೆ ಮಾರಾಟ ಮಾಡುತ್ತಾರೆ. ಕಡಿಮೆ ಹಣಕ್ಕೆ ಟಿಕೆಟ್​ ಸಿಗುತ್ತಿದೆ ಅಂತಾ ನೀವು ಹಿಂದೆ ಮುಂದೆ ಯೋಚಿಸದೇ ನಕಲಿ ಟ್ರಾವೆಲ್​ ವೆಬ್​ಸೈಟ್​ಗಳಲ್ಲಿ ಟಿಕೆಟ್​ ಬುಕ್​ ಮಾಡುತ್ತೀರಿ.

ಕ್ರಿಮಿನಲ್​​ಗಳು ನೀವು ಕೇಳಿದ ದರಕ್ಕೆ ಟಿಕೆಟ್​ ಮಾರಾಟ ಮಾಡಲು ರೆಡಿ ಇರುತ್ತಾರೆ. ಇವರು ನಿಮ್ಮ ಬಳಿ ಕೂಡಲೇ ಪೇಮೆಂಟ್​ ಮಾಡಲು ಹೇಳುತ್ತಾರೆ. ಹಾಗೂ ಕಡಿಮೆ ದರಕ್ಕೆ ಟಿಕೆಟ್​ ಸಿಗ್ತಿದೆ ಎಂಬ ಖುಷಿಗೆ ನೀವು ಕೂಡ ಹಿಂದೆ ಮುಂದೆ ಯೋಚಿಸದೇ ಟಿಕೆಟ್​ ಬುಕ್​ ಮಾಡುತ್ತೀರಿ.

ನಿಜವಾದ ಕ್ರೆಡಿಟ್​ ಕಾರ್ಡ್ ಮಾಲೀಕನಿಗೆ ಈ ವಂಚನೆಯ ಬಗ್ಗೆ ಅರಿವಾಗುತ್ತಿದ್ದಂತೆಯೇ ಆತ ತನ್ನ ಕ್ರೆಡಿಟ್​ ಕಾರ್ಡ್​ನಿಂದ ಬುಕ್​ ಆಗಿರುವ ಟಿಕೆಟ್​ಗಳನ್ನು ಬ್ಲಾಕ್​ ಮಾಡಿಸುತ್ತಾನೆ ಎಂಬ ಅರಿವು ಸೈಬರ್​ ವಂಚಕರಿಗೂ ಇರುತ್ತದೆ. ಹೀಗಾಗಿ ಅವರು ಕೇವಲ ಒಂದು ದಿನ ಮುಂಚಿತವಾಗಿ ಅಥವಾ ಅಂದೇ ತೆರಳುವ ವಿಮಾನಗಳ ಟಿಕೆಟ್​ಗಳನ್ನು ಮಾತ್ರ ಬುಕ್​ ಮಾಡುತ್ತಾರೆ. ಹೀಗಾಗಿ ಇಂದೇ ಹೋಗುವ ವಿಮಾನಗಳ ಟಿಕೆಟ್​ಗಳು ನಿಮಗೆ ಎಲ್ಲಾದರೂ ಕಡಿಮೆ ದರದಲ್ಲಿ ಸಿಗುತ್ತಿದ್ದರೆ ನೀವು ಸರಿಯಾಗಿ ವಿಚಾರಿಸಿ ಟಿಕೆಟ್​ ಖರೀದಿಸುವುದು ಒಳ್ಳೆಯದು. ಏಕೆಂದರೆ ಒಮ್ಮೆ ನಿಜವಾದ ಕ್ರೆಡಿಟ್​ ಕಾರ್ಡ್ ಮಾಲೀಕ ಟಿಕೆಟ್​ ಕ್ಯಾನ್ಸಲ್​ ಮಾಡಿಸಿದರೆ ಬಳಿಕ ನಿಮಗೆ ವಿಮಾನಯಾನ ಕೂಡ ಇರುವುದಿಲ್ಲ ಹಾಗೂ ವಿಮಾನದ ಟಿಕೆಟ್​ಗೆಂದು ಕೊಟ್ಟ ಹಣವೂ ಇಲ್ಲವಾಗುತ್ತದೆ.

ಯಾವುದೇ ಟ್ರಾವೆಲ್​ ವೆಬ್​ಸೈಟ್​ಗಳಲ್ಲಿ ಟಿಕೆಟ್​ ಬುಕ್ ಮಾಡುವ ಮುನ್ನ ಅವರು ತಮ್ಮ ವಿವರಗಳನ್ನು ಸೂಕ್ತವಾಗಿ ನೀಡಿದ್ದಾರೆಯೇ ಎಂದು ಗಮನಿಸುವುದು ತುಂಬಾನೇ ಮುಖ್ಯವಾಗುತ್ತದೆ. ಅವರು ಮೊಬೈಲ್​ ನಂಬರ್​ಗಳನ್ನು ಸರಿಯಾಗಿ ನೀಡಿದ್ದಾರೆಯೇ..? ಅವರ ಬಳಿ ಲ್ಯಾಂಡ್​ಲೈನ್​ ನಂಬರ್​ ಇದೆಯೇ..? ಈ ಎಲ್ಲದರ ಬಗ್ಗೆಯೂ ನೀವು ವಿಚಾರಿಸಬೇಕು. ಏಕೆಂದರೆ ಅಪ್ಪಿತಪ್ಪಿ ನೀವು ವಿಮಾನದಲ್ಲಿ ಪ್ರಯಾಣಿಸುತ್ತಿರುವಾಗ ನೀವು ಬುಕ್​ ಮಾಡಿದ ಟಿಕೆಟ್​ ಯಾರದ್ದೋ ಕದ್ದ ಕ್ರೆಡಿಟ್​ ಕಾರ್ಡ್​ನದ್ದು ಎಂದು ತಿಳಿದರೆ ಬಳಿಕ ನೀವು ಏರ್​ಪೋರ್ಟ್​ನಿಂದ ಸೀದಾ ಪೊಲೀಸ್​ ಠಾಣೆ ಮೆಟ್ಟಿಲೇರಬೇಕಾಗಬಹುದು. ಹೀಗಾಗಿ ನೀವು ಪ್ರವಾಸಕ್ಕೆ ತೆರಳುವ ಸಂದರ್ಭದಲ್ಲಿ ಅಧಿಕೃತ ಟ್ರಾವೆಲ್ ವೆಬ್​ಸೈಟ್​ಗಳಲ್ಲೇ ನಿಮ್ಮ ಟಿಕೆಟ್​ ಬುಕ್​ ಮಾಡಿಸಬೇಕು.

ಇದನ್ನೂ ಓದಿ: Thalapathy Vijay: "ಕಷ್ಟದ ಸಮಯಗಳು ಉಳಿಯುವುದಿಲ್ಲ, ಕಷ್ಟಪಡುವ ಜನರು ಉಳಿಯುತ್ತಾರೆ" - ದಳಪತಿ ವಿಜಯ್‌ ಅವರ 17 ಸ್ಫೂರ್ತಿದಾಯಕ ನುಡಿಗಳು