IND vs WI Day 2: ಚೊಚ್ಚಲ ಪಂದ್ಯದಲ್ಲೇ ಜೈಸ್ವಾಲ್ ದಾಖಲೆಯ ಶತಕ, ರೋಹಿತ್ ಕ್ಲಾಸಿಕ್ ಸೆಂಚುರಿ; ವಿಂಡೀಸ್ ಪರದಾಟ, ಬೃಹತ್ ಮೊತ್ತದತ್ತ ಭಾರತ

ಮೊದಲ ದಿನದಾಟದಲ್ಲಿ ಬೊಂಬಾಟ್ ಬೌಲಿಂಗ್​-ಭರ್ಜರಿ ಬ್ಯಾಟಿಂಗ್​ ನಡೆಸಿದ್ದ ಟೀಮ್​ ಇಂಡಿಯಾ (Team India), 2ನೇ ದಿನದಾಟದಲ್ಲೂ ಅದೇ ಪ್ರದರ್ಶನ ಮುಂದುವರೆಸಿದೆ. ಆರಂಭಿಕರಾದ ರೋಹಿತ್​ ಶರ್ಮಾ (Rohit Sharma) ಮತ್ತು ಯಶಸ್ವಿ ಜೈಸ್ವಾಲ್ (Yashasvi Jaiswal) ತಲಾ ಭರ್ಜರಿ ಶತಕ ಸಿಡಿಸಿ ದಾಖಲೆಯ ಜೊತೆಯಾಟದ ನೆರವಿನಿಂದ ಭಾರತ, ಬೃಹತ್​ ಮೊತ್ತದ ಲೆಕ್ಕಾಚಾರ ಹಾಕಿಕೊಂಡಿದೆ. ಪರಿಣಾಮ 162 ರನ್​​​ಗಳ ಮುನ್ನಡೆ ಪಡೆದಿದೆ. ಇವರ ಅದ್ಭುತ ಆಟಕ್ಕೆ ಬೆಕ್ಕಸ ಬೆರಗಾದ ವಿಂಡೀಸ್, ವಿಕೆಟ್​ಗಾಗಿ ಪರದಾಡಿತು.

23 ಓವರ್​​​ಗಳಲ್ಲಿ ವಿಕೆಟ್ ನಷ್ಟವಿಲ್ಲದೆ 80 ರನ್ ಗಳಿಂದ 2ನೇ ದಿನದಾಟ ಪ್ರಾರಂಭಿಸಿದ ಭಾರತ, ಮತ್ತೆ ಆರಂಭವನ್ನೇ ಪಡೆಯಿತು. ಯಶಸ್ವಿ ಜೈಸ್ವಾಲ್ ಮತ್ತು ರೋಹಿತ್ ಶರ್ಮಾ​, ತಮ್ಮ ಜವಾಬ್ದಾರಿಯುತ ಆಟದ ಮೂಲಕ ವೆಸ್ಟ್​ ಇಂಡೀಸ್​ ಬೌಲರ್​ಗಳಿಗೆ ಸವಾಲಾಗಿ ಕಾಡಿದರು. ಅದರಲ್ಲೂ ಚೊಚ್ಚಲ ಟೆಸ್ಟ್​ ಪಂದ್ಯದಲ್ಲೇ ನಿರ್ಭೀತವಾಗಿ ಬ್ಯಾಟ್ ಬೀಸಿದ ಯಶಸ್ವಿ ಜೈಸ್ವಾಲ್, ಮನಮೋಹಕ ಇನ್ನಿಂಗ್ಸ್​ ಕಟ್ಟಿದರು. ಜೈಸ್ವಾಲ್ 40 ಮತ್ತು ರೋಹಿತ್​ 30 ರನ್​ಗಳಿಂದ 2ನೇ ದಿನದಾಟ ಮುಂದುವರೆಸಿದರು.

ಚೊಚ್ಚಲ ಪಂದ್ಯ, ಚೊಚ್ಚಲ ಶತಕ

ವೆಸ್ಟ್​​ ಇಂಡೀಸ್​ ವಿರುದ್ಧ ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ಪದಾರ್ಪಣೆ ಮಾಡಿದ ಯಶಸ್ವಿ ಜೈಸ್ವಾಲ್​, ಚೊಚ್ಚಲ ಪಂದ್ಯದಲ್ಲೇ ಶತಕ ಸಿಡಿಸಿದರು. ಪದಾರ್ಪಣೆ ಪಂದ್ಯದಲ್ಲೇ ಶತಕ ಬಾರಿಸಿದ ಭಾರತದ 17ನೇ ಆಟಗಾರ ಎಂಬ ದಾಖಲೆ ಬರೆದರು. ತಾಳ್ಮೆಯುತ ಬ್ಯಾಟಿಂಗ್ ನಡೆಸುವ ಮೂಲಕ ಬರೋಬ್ಬರಿ 350 ಎಸೆತಗಳನ್ನು ಎದುರಿಸಿರುವ ಜೈಸ್ವಾಲ್, 14 ಬೌಂಡರಿಗಳ ಸಹಾಯದಿಂದ ಅಜೇಯ 143 ರನ್​ ಚಚ್ಚಿದ್ದಾರೆ. 3ನೇ ದಿನದಾಟಕ್ಕೂ ಕ್ರೀಸ್ ಕಾಯ್ದುಕೊಂಡಿದ್ದು ದ್ವಿಶತಕ ಸಿಡಿಸುವ ಲೆಕ್ಕಾಚಾರದಲ್ಲಿದ್ದಾರೆ. ಪದಾರ್ಪಣೆ ಪಂದ್ಯದಲ್ಲೇ ಶತಕ ಸಿಡಿಸಿದ ಭಾರತದ 3ನೇ ಕಿರಿಯ ಆಟಗಾರ. 1959ರ ಬಳಿಕ ವಿದೇಶದಲ್ಲಿ ಡೆಬ್ಯೂ ಪಂದ್ಯದಲ್ಲಿ 100 ಬಾರಿಸಿದ ಭಾರತದ 5ನೇ ಆಟಗಾರ.

ರೋಹಿತ್​ ಶರ್ಮಾ ಸೆಂಚುರಿ

ಹಿಟ್​​ಮ್ಯಾನ್​ ರೋಹಿತ್​ ಶರ್ಮಾ ಕೂಡ ಭರ್ಜರಿ ಶತಕ ಸಿಡಿಸಿದರು. ಇದೇ ವರ್ಷ ಬಾರ್ಡರ್​ ಗವಾಸ್ಕರ್ ಟ್ರೋಫಿಯಲ್ಲಿ ಆಸ್ಟ್ರೇಲಿಯಾ ವಿರುದ್ಧ ನಡೆದ ಮೊದಲ ಟೆಸ್ಟ್​ ಪಂದ್ಯದಲ್ಲಿ ಶತಕ ಬಾರಿಸಿದ್ದ ನಾಯಕ, ಇದೀಗ ಮತ್ತೆ ಮೂರಂಕಿ ದಾಟಿದ್ದಾರೆ. ಇದು ಅವರ 10ನೇ ಟೆಸ್ಟ್​ ಶತಕವಾಗಿದೆ. 224 ಎಸೆತಗಳನ್ನು ಎದುರಿಸಿದ ರೋಹಿತ್ 10 ಬೌಂಡರಿ, 2 ಸಿಕ್ಸರ್​ ಸಹಿತ​ 104 ರನ್​ ಗಳಿಸಿ ವಿಕೆಟ್​ ಒಪ್ಪಿಸಿದರು. ವಿದೇಶಿ ನೆಲದಲ್ಲಿ ರೋಹಿತ್​​ರ 2ನೇ ಶತಕ ಇದಾಗಿದೆ. ಇದಕ್ಕೂ ಮೊದಲು ಇಂಗ್ಲೆಂಡ್​​ನಲ್ಲಿ 100ರ ಗಡಿ ದಾಟಿದ್ದರು. ಹಾಗೆಯೇ 44ನೇ ಅಂತಾರಾಷ್ಟ್ರೀಯ ಶತಕವೂ ಹೌದು.

ದ್ವಿಶತಕದ ಜೊತೆಯಾಟ, ಸೃಷ್ಟಿಯಾದ ದಾಖಲೆಗಳು

ವೆಸ್ಟ್​ ಇಂಡೀಸ್ ಬೌಲರ್​​ಗಳಿಗೆ ಪಂದ್ಯದ ಆರಂಭದಿಂದಲೂ ಕಾಡಿದ ಭಾರತ ಆರಂಭಿಕರು ತಲಾ ಶತಕ ಸಿಡಿಸಿ ಗಮನ ಸೆಳೆದರು. ಮೊದಲ ವಿಕೆಟ್​ಗೆ 229 ರನ್​ಗಳ ಭರ್ಜರಿ ಜೊತೆಯಾಟದ ಮೂಲಕ ಇತಿಹಾಸ ನಿರ್ಮಿಸಿದರು. 17 ವರ್ಷಗಳ ಬಳಿಕ ಕೆರಿಬಿಯನ್ನರ ನಾಡಿನಲ್ಲಿ ಆರಂಭಿಕ ಶತಕದ ಜೊತೆಯಾಟವಾಡಿದೆ. 2006ರಲ್ಲಿ ಟೀಮ್ ಇಂಡಿಯಾ ಓಪನರ್ಸ್ ವಾಸಿಂ ಜಾಫರ್ ಹಾಗೂ ವೀರೇಂದ್ರ ಸೆಹ್ವಾಗ್ ಕೊನೆಯ ಬಾರಿ ವೆಸ್ಟ್ ಇಂಡೀಸ್​ನಲ್ಲಿ ಸೆಂಚುರಿ ಪಾಲುದಾರಿಕೆ ನೀಡಿದ್ದರು.

163 ರನ್​ಗಳ ಜೊತೆಯಾಟವಾಡಿದ್ದ ಈ ಜೋಡಿಯ ದಾಖಲೆಯನ್ನು ರೋಹಿತ್​-ಯಶಸ್ವಿ ಸೇರಿ ಮುರಿದಿದ್ದಾರೆ. ಮತ್ತೊಂದು ದಾಖಲೆಯ ಅಂದರೆ, 2021ರ ಬಳಿಕ ಇದೇ ಮೊದಲ ಬಾರಿಗೆ ಶತಕಕ್ಕೂ ಹೆಚ್ಚು ಜೊತೆಯಾಟವಾಡಿದೆ. ವಿಂಡೀಸ್​​ ನಾಡಲ್ಲಿ 229 ರನ್​ಗಳ ಜೊತೆಯಾಟ ಆಡಿ ದಾಖಲೆ ಬರೆದಿದ್ದಾರೆ ರೋಹಿತ್​​-ಯಶಸ್ವಿ. ಅಲ್ಲದೆ, ಯಾವುದೇ ವಿಕೆಟ್​ ಇಲ್ಲದೆ ಮೊದಲ ಇನ್ನಿಂಗ್ಸ್​​​ನಲ್ಲಿ ಲೀಡ್​ ಪಡೆದಿದ್ದು ಟೆಸ್ಟ್​​ ಇತಿಹಾಸದಲ್ಲೇ ಮೊದಲು.

ಗಿಲ್ ನಿರಾಸೆ, ಕ್ರೀಸ್​​​ನಲ್ಲಿ ಕೊಹ್ಲಿ

ರೋಹಿತ್​ ಶರ್ಮಾ ಔಟಾದ ಬಳಿಕ ಚೇತೇಶ್ವರ್ ಪೂಜಾರ ಸ್ಥಾನದಲ್ಲಿ ಕಣಕ್ಕಿಳಿದ ಶುಭ್ಮನ್​ ಗಿಲ್​, ತಮ್ಮ ಮೇಲಿದ್ದ ನಿರೀಕ್ಷೆಯನ್ನು ಹುಸಿಗೊಳಿಸಿದರು. 6 ರನ್​ ಗಳಿಸಿ ಹೊರ ನಡೆದರು. ಆ ನಂತರ ಕ್ರೀಸ್​​ಗೆ ಬಂದ ಕೊಹ್ಲಿ, ತಾಳ್ಮೆಯುತವಾಡಿ ಅಚ್ಚುಕಟ್ಟಾದ ಇನ್ನಿಂಗ್ಸ್​ ಕಟ್ಟಿದರು. 96 ಎಸೆತಗಳನ್ನು ಎದುರಿಸಿರುವ ಕೊಹ್ಲಿ, 36 ರನ್​ ಬಾರಿಸಿ 3ನೇ ದಿನದಾಟಕ್ಕೆ ಕ್ರೀಸ್​​ ಕಾಯ್ದುಕೊಂಡಿದ್ದಾರೆ. ಇದೇ ವೇಳೆ ಟೆಸ್ಟ್​ ಕ್ರಿಕೆಟ್​ನಲ್ಲಿ 8500 ರನ್​ಗಳ ಗಡಿ ದಾಟಿದರು. ಅಂತಿಮವಾಗಿ ಭಾರತ 2 ವಿಕೆಟ್ ನಷ್ಟಕ್ಕೆ 312 ರನ್​ ಗಳಿಸಿದ್ದು, 162 ರನ್​ಗಳ ಮುನ್ನಡೆ ಸಾಧಿಸಿದೆ.