ಮನು ಭಾಕರ್ ಮತ್ತು ತಾಯಿ ಭೇಟಿಯಾದ ನೀರಜ್ ಚೋಪ್ರಾ; ಇಂಟರ್ನೆಟ್‌ನಲ್ಲಿ ಧೂಳೆಬ್ಬಿಸಿದ ವಿಡಿಯೋ, ನೆಟ್ಟಿಗರ ತುಂಟ ಪ್ರಶ್ನೆ

ಪ್ಯಾರಿಸ್‌ ಒಲಿಂಪಿಕ್ಸ್‌ನಲ್ಲಿ ಬೆಳ್ಳಿ ಗೆದ್ದ ನೀರಜ್‌ ಚೋಪ್ರಾ ಹಾಗೂ ಎರಡು ಕಂಚಿನ ಪದಕಗಳನ್ನು ಗೆದ್ದ ಮನು ಭಾಕರ್‌ ಪರಸ್ಪರ ಮಾತನಾಡುತ್ತಿರುವ ವಿಡಿಯೋ ಸೋಷಿಯಲ್‌ ಮೀಡಿಯಾದಲ್ಲಿ ಸದ್ದು ಮಾಡುತ್ತಿದೆ. ಇದೇ ವೇಳೆ ನೀರಜ್ ಹಾಗೂ ಮನು ಅವರ ತಾಯಿ ಆತ್ಮೀಯವಾಗಿ ಮಾತನಾಡುತ್ತಿರುವ ವಿಡಿಯೋ ಕೂಡಾ ಇಂಟರ್ನೆಟ್‌ನಲ್ಲಿ ಧೂಳೆಬ್ಬಿಸಿದೆ. ಭಾರತದಲ್ಲಿ ಇತ್ತೀಚೆಗೆ ಹೆಚ್ಚು ಸುದ್ದಿಯಲ್ಲಿರುವ ಇಬ್ಬರು ಐಕಾನ್‌ಗಳ ಭೇಟಿಯನ್ನು ನೋಡಿ ನೆಟ್ಟಿಗರು ತಲೆಗೆ ಹುಳ ಬಿಟ್ಟುಕೊಂಡಿದ್ದಾರೆ. ಅದರಲ್ಲೂ ನೀರಜ್‌ ಮತ್ತು ಮನು ಪರಸ್ಪರ ಮಾತನಾಡುತ್ತಿದ್ದರೂ, ಒಬ್ಬರು ಇನ್ನೊಬ್ಬರ ಮುಖ ಅಥವಾ ಕಣ್ಣು ನೋಡುತ್ತಿಲ್ಲ. ಹೀಗಾಗಿ ಇಬ್ಬರ ನಡುವೆ ಕ್ರಷ್‌ ಆಗಿದೆ ಎಂದೇ ಚರ್ಚೆಗಳಾಗುತ್ತಿವೆ.

ಇಷ್ಟೇ ಆಗಿದ್ದರೆ, ನೆಟ್ಟಿಗರ ಗೊಂದಲ ತಣ್ಣಗಾಗಬಹುದಿತ್ತು. ಆದರೆ ಮನು ಭಾಕರ್ ಅವರ ತಾಯಿ ಸುಮೇಧಾ ಭಾಕರ್ ಅವರು ನೀರಜ್ ಚೋಪ್ರಾರನ್ನು ಭೇಟಿಯಾದ ವಿಡಿಯೊ ಸಾಮಾಜಿಕ ಮಾಧ್ಯಮದಲ್ಲಿ ಮತ್ತೆ ಸದ್ದು ಮಾಡುತ್ತಿದೆ. ಪ್ಯಾರಿಸ್‌ನಲ್ಲಿ ಇಬ್ಬರೂ ಭೇಟಿಯಾಗಿದ್ದು, ಇದರ ತುಣುಕುಗಳು ವೈರಲ್ ಆಗಿವೆ.

ಒಲಿಂಪಿಕ್ ಕ್ರೀಡಾಕೂಟದ ಒಂದೇ ಆವೃತ್ತಿಯಲ್ಲಿ ಎರಡು ಪದಕಗಳನ್ನು ಗೆಲ್ಲುವ ಮೂಲಕ ಶೂಟರ್ ಮನು ಭಾಕರ್ ಇತಿಹಾಸ ಬರೆದರು. ಮಹಿಳೆಯರ 10 ಮೀಟರ್ ಏರ್ ಪಿಸ್ತೂಲ್‌ ಮತ್ತು 10 ಮೀಟರ್ ಏರ್ ಪಿಸ್ತೂಲ್ ಮಿಶ್ರ ತಂಡ ಸ್ಪರ್ಧೆಯಲ್ಲಿ ಸರಬ್ಜೋತ್ ಸಿಂಗ್ ಅವರೊಂದಿಗೂ ಸತತ ಎರಡು ಕಂಚಿನ ಪದಕ ಗೆದ್ದಿದ್ದಾರೆ. ಅತ್ತ, ಟೋಕಿಯೊ ಒಲಿಂಪಿಕ್ಸ್‌ನಲ್ಲಿ ಚಿನ್ನ ಗೆದ್ದಿದ್ದ ನೀರಜ್‌, ಈ ಬಾರಿ ಪ್ಯಾರಿಸ್‌ನಲ್ಲಿ ಬೆಳ್ಳಿ ಪದಕ ಗೆದ್ದಿದ್ದಾರೆ.

ಇದನ್ನೂ ಓದಿ | ಗೆದ್ದಿದ್ದು 6, ಕಳೆದುಕೊಂಡಿದ್ದು 7 ಪದಕ; ಪ್ಯಾರಿಸ್ ಒಲಿಂಪಿಕ್ಸ್‌ನಲ್ಲಿ ಕೂದಲೆಳೆ ಅಂತರದಿಂದ 4ನೇ ಸ್ಥಾನ ಪಡೆದ ಭಾರತೀಯರು

ಸದ್ಯ, ಚಿನ್ನದ ಹುಡುಗ ಮನು ಭಾಕರ್ ಅವರೊಂದಿಗಿನ ಮಾತನಾಡುವ ತುಣುಕು ಮತ್ತು ಸುಮೇಧಾ ಭಾಕರ್ ಅವರೊಂದಿಗೆ ಮಾತನಾಡುತ್ತಿರುವ ದೃಶ್ಯಗಳು ಅಂತರ್ಜಾಲದಲ್ಲಿ ಬಿರುಗಾಳಿ ಎಬ್ಬಿಸಿದೆ.

ಮದುವೆ ಪಕ್ಕಾ?

ಮನು ಭಾಕರ್ ಅವರ ತಾಯಿ ಸುಮೇಧಾ ಭಾಕರ್, ನೀರಜ್ ಕೈಯನ್ನು ಹಿಡಿದುಕೊಂಡು ಆತ್ಮೀಯವಾಗಿ ಮಾತನಾಡುವುದನ್ನು ನೋಡಬಹುದು. ಎಕ್ಸ್‌ನಲ್ಲಿ ಲಕ್ಷಾಂತರ ಮಂದಿ ಈ ದೃಶ್ಯವನ್ನು ವೀಕ್ಷಿಸಿದ್ದಾರೆ. ನೀರಜ್‌ ಕೈ ಹಿಡಿದು ತಮ್ಮ ತಲೆಯ ಮೇಲೆ ಇರಿಸುವುದನ್ನು ದೃಶ್ಯದಲ್ಲಿ ನೋಡಬಹುದು. ಈ ಆತ್ಮೀಯತೆಗೆ ನೆಟ್ಟಿಗರು ತಮಾಷೆ ಆರರಂಭಿಸಿದ್ದಾರೆ. ಮನು ಅವರು ತಾಯಿ ಚೋಪ್ರಾ ಅವರನ್ನು ತಮ್ಮ ಮಗಳಿಗೆ ಸೂಕ್ತವಾದ ಜೋಡಿ ಎಂದು ಆಯ್ಕೆ ಮಾಡುತ್ತಿದ್ದಾರೆ ಎಂದು ಹಲವರು ಕಾಮೆಂಟ್ ಮಾಡಿದ್ದಾರೆ.

"ಮದುವೆಯ ಮಾತುಕತೆ ನಡೀತಿದೆ" ಎಂದು ಎಕ್ಸ್ ಬಳಕೆದಾರರೊಬ್ಬರು ಕಾಮೆಂಟ್ ಮಾಡಿದ್ದಾರೆ. "ಭಾರತೀಯ ತಾಯಿ ತನ್ನ ಮಗಳ ಮದುವೆಯ ಬಗ್ಗೆ ಯಶಸ್ವಿ ಹುಡುಗನೊಂದಿಗೆ ಮಾತನಾಡುತ್ತಿದ್ದಾರೆ" ಎಂದು ಇನ್ನೊಬ್ಬರು ದನಿಗೂಡಿಸಿದ್ದಾರೆ.

ಅತ್ತ ಪ್ಯಾರಿಸ್‌ನಲ್ಲಿ ಇಬ್ಬರು ಕ್ರೀಡಾಪಟುಗಳು ಕೂಡಾ ಪರಸ್ಪರ ಮಾತನಾಡುತ್ತಿರುವ ವಿಡಿಯೊ ಎಕ್ಸ್‌ನಲ್ಲಿ ವೈರಲ್‌ ಆಗಿದೆ. ಇಬ್ಬರೂ ಮುಖ ಕೊಟ್ಟು ಅಥವಾ ಕಣ್ಣು ನೋಡಿಕೊಂಡು ಮಾತನಾಡುತ್ತಿಲ್ಲ. ಇಬ್ಬರ ನಡುವೆ ಏನೋ ಒಂದು ಕಂಪನವಿದೆ. ಕ್ರಷ್‌ ಆಗಿರಬಹುದು ಎಂದು ನೆಟ್ಟಿಗರು ಮಾತನಾಡುತ್ತಿದ್ದಾರೆ.

ಒಲಿಂಪಿಕ್ಸ್‌ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್‌ ಮಾಡಿ

ಇದನ್ನೂ ಓದಿ | ನೀರಜ್ ಚೋಪ್ರಾ ಐಷಾರಾಮಿ ಬಂಗಲೆ ಮೇಲೆ ತ್ರಿವರ್ಣ ಧ್ವಜ; ಚಿನ್ನದ ಹುಡುಗ ದುಬಾರಿ ಕಾರು-ಬೈಕ್‌ಗಳ ಒಡೆಯ -Watch