ಅಮೆಜಾನ್‌ ಪ್ರೈಂ ಅಲ್ಲ, ನೀವ್ಯಾರೂ ಊಹಿಸದ ಈ ಒಟಿಟಿಗೆ ಬರಲಿದೆ ಕೃಷ್ಣಂ ಪ್ರಣಯ ಸಖಿ ಸಿನಿಮಾ; ಶೀಘ್ರದಲ್ಲಿ ಶತದಿನೋತ್ಸವದ ಸಂಭ್ರಮ
Krishnam Pranaya Sakhi: ಗೋಲ್ಡನ್ ಸ್ಟಾರ್ ಗಣೇಶ್ ನಟನೆಯ ಕೃಷ್ಣಂ ಪ್ರಣಯ ಸಖಿ ಸಿನಿಮಾ ಇತ್ತೀಚೆಗಷ್ಟೇ 75 ದಿನಗಳನ್ನು ಪೂರೈಸಿ, ಇದೀಗ ಶತ ದಿನೋತ್ಸವದ ಸನಿಹದಲ್ಲಿದೆ. ಈ ನಡುವೆ ಒಟಿಟಿ ಪ್ರಸಾರದ ಬಗ್ಗೆಯೂ ಹೊಸ ಅಪ್‌ಡೇಟ್‌ ಸಿಕ್ಕಿದೆ.
Krishnam Pranaya sakhi OTT: ಗೋಲ್ಡನ್ ಸ್ಟಾರ್ ಗಣೇಶ್ ನಾಯಕನಾಗಿ ನಟಿಸಿರುವ ಕೃಷ್ಣಂ ಪ್ರಣಯ ಸಖಿ ಚಿತ್ರ ಯಶಸ್ವಿ ಎಪ್ಪತ್ತೈದು ದಿನಗಳನ್ನು ಪೂರೈಸಿ, ಶತದಿನೋತ್ಸವದತ್ತ ಹೆಜ್ಜೆ ಇರಿಸಿದೆ. ಈಗಲೂ ಕರ್ನಾಟಕದ ಹಲವು ಚಿತ್ರಮಂದಿರಗಳಲ್ಲಿ ಚಿತ್ರ ಯಶಸ್ವಿಯಾಗಿ ಪ್ರದರ್ಶನವಾಗುತ್ತಿದೆ. ಫ್ಯಾಮಿಲಿ ಆಡಿಯೆನ್ಸ್‌ ಮನಸ್ಸು ಗೆದ್ದ ಈ ಸಿನಿಮಾ, ಒಂದೊಳ್ಳೆ ಕೌಟುಂಬಿಕ ಚಿತ್ರ ಎಂಬ ಕಾಂಪ್ಲಿಮೆಂಟ್‌ ಸಹ ಪಡೆದುಕೊಂಡಿತ್ತು. ಅರ್ಜುನ್ ಜನ್ಯ ಸಂಗೀತ ನಿರ್ದೇಶನದಲ್ಲಿ ಮೂಡಿಬಂದ ಹಾಡುಗಳಿಂದಲೂ ಈ ಸಿನಿಮಾ ಮೋಡಿ ಮಾಡಿತ್ತು. ಆದರೆ, ಈ ವರೆಗೂ ಈ ಸಿನಿಮಾ ಯಾಕೆ ಒಟಿಟಿಗೆ ಬಂದಿಲ್ಲ ಎಂದು ವೀಕ್ಷಕ ಕಾಯುತ್ತಿದ್ದಾನೆ.
ಶತದಿನೋತ್ಸವದತ್ತ ಗಣೇಶ್ ಸಿನಿಮಾ
ಈ ವರ್ಷ ತೆರೆಕಂಡ ಸಿನಿಮಾಗಳ ಪೈಕಿ ಪಾಸಿಟಿವ್‌ ಪ್ರತಿಕ್ರಿಯೆ ಗಿಟ್ಟಿಸಿಕೊಂಡು, ನೋಡುಗರ ಮನಗೆದ್ದು, ಬಾಕ್ಸ್‌ ಆಫೀಸ್‌ನಲ್ಲೂ ಮೋಡಿ ಮಾಡಿದೆ ಕೃಷ್ಣಂ ಪ್ರಣಯ ಸಖಿ ಸಿನಿಮಾ. ಆಗಸ್ಟ್‌ 15ರಂದು ತೆರೆಕಂಡಿದ್ದ ಈ ಸಿನಿಮಾ ಈಗಾಗಲೇ 75 ದಿನಗಳನ್ನು ಪೂರೈಸಿ ಶತದಿನೋತ್ಸವದತ್ತ ಹೆಜ್ಜೆ ಹಾಕಿದೆ. ಇತ್ತೀಚಿನ ಕೆಲ ವರ್ಷಗಳಲ್ಲಿ ನಟ ಗಣೇಶ್ ಅವರಿಗೆ ನಿರೀಕ್ಷಿತ ಪ್ರಮಾಣದ ಸಿನಿಮಾ ಗೆಲುವು ದಕ್ಕಿರಲಿಲ್ಲ. ಸೋಲುಗಳೇ ಹೆಚ್ಚಾಗಿದ್ದವು. ಹೀಗಿರುವಾಗಲೇ ಬಂದ ಕೃಷ್ಣಂ ಪ್ರಣಯ ಸಖಿ ಸಿನಿಮಾ ಗೆಲುವಿನ ನಗೆ ಬೀರಿತು. ನಿರ್ದೇಶಕ ಶ್ರೀನಿವಾಸರಾಜು ಅವರೂ ಗೆಲುವು ಕಂಡರು. ಇದೀಗ ಇದೇ ಸಿನಿಮಾದ ಒಟಿಟಿ ವಿಚಾರ ಮತ್ತೆ ಸುದ್ದಿಯಲ್ಲಿದೆ.
ಒಟಿಟಿ ವೇದಿಕೆ ಬದಲು..
ಸಹಜವಾಗಿ ಒಂದು ಸಿನಿಮಾ ಚಿತ್ರಮಂದಿರದಲ್ಲಿ ಬಿಡುಗಡೆಯಾದ 40 ದಿನದ ಬಳಿಕ ಒಟಿಟಿ ಅಂಗಳ ತಲುಪುತ್ತದೆ. ಆದರೆ, ಕೃಷ್ಣಂ ಪ್ರಣಯ ಸಖಿ ಸಿನಿಮಾ 100 ದಿನದ ಹತ್ತಿರ ಬಂದರೂ ಒಟಿಟಿಯ ಸುಳಿವಿಲ್ಲ. ಈ ನಡುವೆ ಇನ್ನೇನು ಈಗ ಬರಲಿದೆ, ಆಗ ಬರಲಿದೆ ಎಂಬ ಟಾಕ್‌ ಮಾತ್ರ ಹರಿದಾಡುತ್ತಲೇ ಇತ್ತು. ಆದರೆ, ವೀಕ್ಷಕನಿಗೆ ಮಾತ್ರ ನಿರಾಸೆಯಾಗುತ್ತಲೇ ಹೋಯಿತು. ಈ ನಡುವೆ ದೀಪಾವಳಿಗೆ ಈ ಸಿನಿಮಾ ಒಟಿಟಿ ಅಂಗಳ ತಲುಪಲಿದೆ ಎಂದೇ ಹೇಳಲಾಗಿತ್ತಾದರೂ, ಆವತ್ತೂ ಸ್ಟ್ರೀಮಿಂಗ್‌ ಆರಂಭಿಸಲಿಲ್ಲ. ಅಮೆಜಾನ್‌ ಪ್ರೈಂನಲ್ಲಿ ಈ ಸಿನಿಮಾ ಪ್ರಸಾರವಾಗಲಿದೆ ಎಂಬ ಸುದ್ದಿ ಸದ್ದು ಮಾಡಿತ್ತು. ಇದೀಗ ಅಮೆಜಾನ್‌ ಬದಲಿಗೆ ಬೇರೆ ಒಟಿಟಿಯಲ್ಲಿ ಈ ಸಿನಿಮಾ ಸ್ಟ್ರೀಮಿಂಗ್‌ ಆರಂಭಿಸಲಿದೆ ಎಂಬ ಸುದ್ದಿ ಮುನ್ನೆಲೆಗೆ ಬಂದಿದೆ.
ಈ ಒಟಿಟಿಯಲ್ಲಿ ಕೃಷ್ಣಂ ಪ್ರಣಯ ಸಖಿ..
ಕೃಷ್ಣಂ ಪ್ರಣಯ ಸಖಿ ಚಿತ್ರದ ಸ್ಯಾಟಲೈಟ್‌ ಹಕ್ಕನ್ನು ಉದಯ ಟಿವಿ ಪಡೆದುಕೊಂಡಿದೆ. ಹಾಗಾಗಿ ಈ ಸಿನಿಮಾ ಸನ್‌ ನೆಕ್ಸ್ಟ್‌‌‌‌ನಲ್ಲಿ ಸ್ಟ್ರೀಮಿಂಗ್‌ ಆಗಲಿದೆ ಎಂದೇ ಹೇಳಲಾಗುತ್ತಿದೆ. ಸ್ಯಾಟಲೈಟ್‌ ಜತೆಗೆ ಸನ್‌ ನೆಕ್ಸ್ಟ್‌ ಒಟಿಟಿ ಈ ಚಿತ್ರವನ್ನು ಒಳ್ಳೆಯ ಮೊತ್ತ ಕೊಟ್ಟು ಡಿಜಿಟಲ್‌ ಪ್ರಸಾರದ ಹಕ್ಕನ್ನು ಖರೀದಿಸಿದೆ ಎಂದೇ ಹೇಳಲಾಗುತ್ತಿದೆ. ಈ ಬಗ್ಗೆ ಇನ್ನಷ್ಟೇ ಅಧಿಕೃತ ಘೋಷಣೆ ಆಗಬೇಕಿದೆ. ಪ್ರಶಾಂತ್ ಜಿ ರುದ್ರಪ್ಪ ನಿರ್ಮಾಣದ ಕೃಷ್ಣಂ ಪ್ರಣಯ ಸಖಿ ಸಿನಿಮಾವನ್ನು ಶ್ರೀನಿವಾಸರಾಜು ನಿರ್ದೇಶನ ಮಾಡಿದ್ದಾರೆ. ಈ ಚಿತ್ರದಲ್ಲಿ ಗಣೇಶ್ ಜೋಡಿಯಾಗಿ ಮಾಳವಿಕಾ ನಾಯರ್ ಹಾಗೂ ಶರಣ್ಯ ಶೆಟ್ಟಿ ನಟಿಸಿದ್ದಾರೆ. ಇನ್ನುಳಿದಂತೆ ರಂಗಾಯಣ ರಘು, ಶಶಿಕುಮಾರ್, ಸಾಧು ಕೋಕಿಲ, ಅವಿನಾಶ್, ಶ್ರುತಿ ಸೇರಿ ದೊಡ್ಡ ತಾರಾಗಣವೇ ಈ ಸಿನಿಮಾದಲ್ಲಿದೆ.
ಕೃಷ್ಣಂ ಪ್ರಣಯ ಸಖಿ ಚಿತ್ರಕ್ಕೆ ಅರ್ಜುನ್ ಜನ್ಯ ಅವರ ಸಂಗೀತ ಈ ಚಿತ್ರಕ್ಕಿದೆ. ವೆಂಕಟ್‌ ರಾಮ್‌ ಪ್ರಸಾದ್‌ ಛಾಯಾಗ್ರಹಣ, ಸಂಕಲನ ಕೆ.ಎಂ. ಪ್ರಕಾಶ್‌, ವಿಜ್‌ ಈಶ್ವರ್‌ ಸಂಭಾಷಣೆ, ಮೋಹನ್‌ ಬಿ ಕೆರೆ ಅವರ ಕಲಾ ನಿರ್ದೇಶನ ಈ ಚಿತ್ರಕ್ಕಿದೆ.
