Christmas 2025: ಏಸುಕ್ರಿಸ್ತನ ಜನ್ಮದಿನಾಚರಣೆಯಿಂದ ಶಾಂತಿ ಸಂದೇಶ ಸಾರುವವರೆಗೆ; ಕ್ರಿಸ್ಮಸ್ ಆಚರಣೆಯ ಹಿಂದಿನ 5 ಪ್ರಮುಖ ಉದ್ದೇಶಗಳಿವು
Dec 16, 2024 05:52 PM IST
Share
ಕ್ರಿಸ್ಮಸ್ ಆಚರಿಸುವ ಉದ್ದೇಶ
- 2024ರ ಕ್ರಿಸ್‌ಮಸ್‌ಗೆ ಕ್ಷಣಗಣನೆ ಆರಂಭವಾಗಿದ್ದು, ಎಲ್ಲೆಲ್ಲೂ ಸಡಗರ ಶುರುವಾಗಿದೆ. ಕ್ರಿಸ್ಮಸ್ ಎಂದರೆ ಏಸು ಕ್ರಿಸ್ತನ ಹುಟ್ಟುಹಬ್ಬ ಮಾತ್ರವಲ್ಲ, ಅದಕ್ಕೂ ಮೀರಿದ ಕೆಲವು ಅಂಶಗಳು ಈ ಆಚರಣೆಯ ಹಿಂದಿದೆ. ಕ್ರಿಸ್ಮಸ್ ಆಚರಿಸುವ ಹಿಂದಿನ 5 ಪ್ರಮುಖ ಉದ್ದೇಶಗಳು ಇಲ್ಲಿವೆ ನೋಡಿ.
ಕ್ರಿಸ್ಮಸ್ ಪ್ರಪಂಚದಾದ್ಯಂತ ಸಂಭ್ರಮದಿಂದ ಆಚರಿಸುವ ಹಬ್ಬ. ಈ ಹಬ್ಬವು ಕ್ರಿಶ್ಚಿಯನ್ನರಿಗೆ ಮಾತ್ರವಲ್ಲ, ಸರ್ವಧರ್ಮದವರಿಗೂ ಖುಷಿಯ ಆಚರಣೆ. ಪ್ರತಿಯೊಬ್ಬರು ಕ್ರಿಸ್ಮಸ್ ಆಚರಿಸಲು ಇಷ್ಟಪಡುತ್ತಾರೆ. ಕ್ರಿಸ್ಮಸ್ ಎಂದರೆ ಎಲ್ಲೆಲ್ಲೂ ಕ್ರಿಸ್ಮಸ್ ಟ್ರೀಗಳು, ಗೋದಲಿಗಳು, ಕೇಕ್ ಹೀಗೆ ಸಂಭ್ರಮವೋ ಸಂಭ್ರಮವೋ.
ಸಂಟಾಕ್ಲಾಸ್‌, ಪ್ಲಮ್‌ ಕೇಕ್, ಕ್ಯಾಂಡಿ ಕ್ಯಾನ್‌, ಬಬಲ್‌ ಹೀಗೆ ಈ ಸಂದರ್ಭದಲ್ಲಿ ಸಂಭ್ರಮ ಹೆಚ್ಚಿಸಲು ಹಲವು ದಾರಿಗಳನ್ನು ಅನುಸರಿಸಲಾಗುತ್ತದೆ. ಕ್ರಿಸ್ಮಸ್ ಆಚರಣೆಯ ಹಿಂದಿನ 5 ಪ್ರಮುಖ ಉದ್ದೇಶಗಳ ಬಗ್ಗೆ ಇಲ್ಲಿದೆ ಮಾಹಿತಿ.
ಏಸುಕ್ರಿಸ್ತನ ಹುಟ್ಟುಹಬ್ಬ
ಕ್ರಿಸ್ಮಸ್ ಆಚರಣೆಯ ಮುಖ್ಯ ಉದ್ದೇಶ ಏಸುಕ್ರಿಸ್ತನ ಜನ್ಮವನ್ನು ಸ್ಮರಿಸುವುದು. ಬೈಬಲ್ ಪ್ರಕಾರ, ದೇವರ ಮಗನಾದ ಯೇಸು ಕ್ರಿಸ್ತನು ಡಿಸೆಂಬರ್ 25 ರಂದು ಬೆಥ್ ಲೆಹೆಮ್‌ನಲ್ಲಿ ಜನಿಸಿದನು. ಕ್ರಿಸ್ಮಸ್ ಯೇಸುವಿನ ಬೋಧನೆಗಳು ಮತ್ತು ಅವರ ಪ್ರೀತಿ, ಸಹಾನುಭೂತಿ ಮತ್ತು ಕ್ಷಮೆಯ ಸಂದೇಶವನ್ನು ಪ್ರತಿಬಿಂಬಿಸುವ ಸಮಯವಾಗಿದೆ. ಅವರ ಜನ್ಮವನ್ನು ದೈವಿಕ ಮತ್ತು ಪವಿತ್ರ ಘಟನೆಯಾಗಿ ನೋಡಲಾಗುತ್ತದೆ. ಈ ಹಿನ್ನೆಲೆಯಲ್ಲಿ ಡಿಸೆಂಬರ್ 25ಕ್ಕೆ ಕ್ರಿಸ್ಮಸ್ ಆಚರಿಸಲಾಗುತ್ತದೆ.
ಪ್ರೀತಿ, ಸಹಾನುಭೂತಿಯ ಸಂದೇಶ ಹಂಚಿಕೊಳ್ಳುವುದು
ಕ್ರಿಸ್ಮಸ್ ಪ್ರತಿಯೊಬ್ಬರ ಜೀವನದಲ್ಲಿ ಸಂತೋಷವನ್ನು ನೀಡುವ ಮತ್ತು ತರುವ ಆಚರಣೆಯಾಗಿದೆ. ಕೆಲವರು ಈ ಹಬ್ಬದ ಸಂದರ್ಭದಲ್ಲಿ ದಾನ ಮಾಡುವ ಮೂಲಕ ದೇವರ ಕೃಪೆಗೆ ಪಾತ್ರರಾಗುತ್ತಾರೆ. ಕ್ರಿಸ್ಮಸ್ ಎನ್ನುವುದು ದಯೆ ಹಾಗೂ ಇತರರಿಗೆ ಸಹಾಯ ಮಾಡುವ ಮಹತ್ವವನ್ನು ನೆನಪಿಸುತ್ತದೆ. ಉಡುಗೊರೆಗಳು, ಸಮಯ ಅಥವಾ ಸಂಪನ್ಮೂಲಗಳ ಮೂಲಕ ನೀಡುವ ಸಂತೋಷವು ಸಮುದಾಯದ ಪ್ರಜ್ಞೆಯನ್ನು ಹುಟ್ಟುಹಾಕುತ್ತದೆ ಮತ್ತು ಒಗ್ಗಟ್ಟಿನ ಮನೋಭಾವವನ್ನು ಬಲಪಡಿಸುತ್ತದೆ. ಇದು ಆತ್ಮಾವಲೋಕನ ಮತ್ತು ಕೃತಜ್ಞತೆಯ ಅವಧಿಯೂ ಆಗಿದೆ.
ಕುಟುಂಬ, ಸ್ನೇಹಿತರೊಂದಿಗೆ ನೆನಪುಗಳು ಮತ್ತು ಬಾಂಧವ್ಯ ಹೆಚ್ಚಿಸುತ್ತದೆ
ಕ್ರಿಸ್ಮಸ್ ಎಂದರೆ ಕುಟುಂಬದೊಂದಿಗೆ ಒಗ್ಗೂಡುವ ಸಮಯ. ಇದು ಕ್ರಿಸ್ಮಸ್ ವೃಕ್ಷವನ್ನು ಅಲಂಕರಿಸುವುದು ಅಥವಾ ಎಲ್ಲರೂ ಒಟ್ಟಿಗೆ ಸೇರಿ ಕೇಕ್ ಮಾಡುವುದು, ಮುಂತಾದ ಸಂಪ್ರದಾಯಗಳನ್ನು ಆಚರಿಸುವ ಹಬ್ಬವಾಗಿದೆ. ಇದು ಕುಟುಂಬ ಹಾಗೂ ಸ್ನೇಹಿತರ ನಡುವೆ ಸುಮಧುರ ಸಂಬಂಧವನ್ನು ಒಗ್ಗೂಡಿಸುವ ಆಚರಣೆಯಾಗಿದೆ.
ಚಳಿಗಾಲದ ಕತ್ತಲೆಯನ್ನು ಓಡಿಸುವುದು
ಚಳಿಗಾಲದಲ್ಲಿ ಹಗಲಿನ ಅವಧಿ ಕಡಿಮೆ, ಬೇಗ ಕತ್ತಲಾಗುತ್ತದೆ. ಈ ಸಮಯದಲ್ಲಿ ನಮ್ಮ ಮನಸ್ಥಿತಿಯು ಮಂದವಾಗಿರುತ್ತದೆ. ಈ ಸಮಯದಲ್ಲಿ ಬೆಳಕಿನ ದೀಪಗಳು, ಕ್ಯಾಂಡಲ್‌ಗಳು ಮನೆ, ಮನವನ್ನು ಬೆಳಗಿಸುತ್ತದೆ. ಇದು ಕತ್ತಲೆಯ ಮೇಲೆ ಬೆಳಕಿನ ವಿಜಯವನ್ನು ಸಾರುವ ಹಬ್ಬವಾಗಿದೆ. ಹೊಸ ವರ್ಷಕ್ಕೆ ಧನಾತ್ಮಕ ಪರಿವರ್ತನೆಯನ್ನು ರಚಿಸಲು ಸಹಾಯ ಮಾಡುತ್ತದೆ.
ಶಾಂತಿಯನ್ನು ಉತ್ತೇಜಿಸುವುದು
ಸಂಘರ್ಷದಿಂದ ಕೂಡಿದ ಜಗತ್ತಿನಲ್ಲಿ, ಆತಂಕದ ಧ್ವನಿಗಳು, ರಾಜಕೀಯ ವಿವಾದಗಳು ಅಥವಾ ದೈನಂದಿನ ಹಿಂಸಾಚಾರದೊಂದಿಗೆ ದೀರ್ಘಕಾಲದ ಆಂತರಿಕ ಗಲಭೆಗಳು ನಡೆಯುತ್ತಿರುತ್ತವೆ. ಈ ಹಬ್ಬದ ಸಮಯವು ಜಗತ್ತಿನಾದ್ಯಂತ ಶಾಂತಿ ಸ್ಥಾಪನೆಯನ್ನು ಉತ್ತೇಜಿಸುತ್ತದೆ. ಇದು ಸಾಮರಸ್ಯ ಹಾಗೂ ತಿಳುವಳಿಕೆಯನ್ನು ಉತ್ತೇಜಿಸುತ್ತದೆ. ಕ್ರಿಸ್ಮಸ್ ಗೀತೆಗಳು, ಕ್ಯಾರೋಲ್ಗಳು ಮತ್ತು ಕಥೆಗಳು ಶಾಂತಿ ಮತ್ತು ಏಕತೆಯನ್ನು ಉತ್ತೇಜಿಸುತ್ತವೆ.
ಕ್ರಿಸ್ಮಸ್ ಆಚರಣೆಯು ಏಸುಕ್ರಿಸ್ತನ ಜನ್ಮದಿನದೊಂದಿಗೆ ಈ ಎಲ್ಲಾ ಉದ್ದೇಶಗಳನ್ನ ಇರಿಸಿಕೊಂಡ ಆಚರಣೆಯಾಗಿದೆ. ಕ್ರಿಸ್ಮಸ್ ಸಂಭ್ರಮವು ಈ ಎಲ್ಲದರ ಪ್ರತೀಕವಾಗಿದೆ. ಈ ವರ್ಷದ ಕ್ರಿಸ್ಮಸ್ ಹಬ್ಬವೂ ಈ ಎಲ್ಲ ಅಂಶಗಳನ್ನು ಒಳಗೊಂಡಿರಲಿ.