ಭಾನುವಾರದ ಸಂಜೆಗೆ ಕಾಫಿ ಜೊತೆ ಬೆಸ್ಟ್‌ ಕಾಂಬಿನೇಷನ್ ಆಗುತ್ತೆ ಮಿಶ್ರ ಬೇಳೆ ವಡಾ, ಇದನ್ನು ಮಾಡೋದು ಸುಲಭ, ರೆಸಿಪಿ ಇಲ್ಲಿದೆ

ಸಂಜೆ ಕಾಫಿ ಜೊತೆ ಏನಾದ್ರೂ ತಿನ್ನೋಕೆ ಇದ್ರೆ ಎಷ್ಟು ಚೆನ್ನಾಗಿರುತ್ತದೆ ಅನ್ನಿಸೋದು ಸಹಜ. ಅದರಲ್ಲೂ ಭಾನುವಾರದ ಹೊತ್ತು ಮನೆಯಲ್ಲೇ ಕೂತಿದ್ದಾಗ ನಾಲಿಗೆ ತಿಂಡಿಗಳನ್ನು ಬಯಸೋದು ಸಹಜ. ನಿಮಗೂ ಏನಾದ್ರೂ ಕರಿದ ತಿಂಡಿ ತಿನ್ನಬೇಕು ಅನ್ನಿಸಿದ್ರೆ ಮಿಶ್ರ ಬೇಳೆಗಳ ವಡೆ ಮಾಡಿ, ಇದನ್ನ ಸುಲಭವಾಗಿ ಕೆಲವೇ ಸಾಮಗ್ರಿ ಬಳಸಿ ಮಾಡಬಹುದು.

ಮಿಶ್ರ ಬೇಳೆಗಳ ವಡಾ ಸಂಜೆಯ ಕಾಫಿ ಜೊತೆಗೆ ಮಸ್ತ್ ಕಾಂಬಿನೇಷನ್ ಆಗುತ್ತೆ. ಇದು ಮಕ್ಕಳಿಂದ ಹಿಡಿದು ದೊಡ್ಡವರವರೆಗೆ ಎಲ್ಲರಿಗೂ ಇಷ್ಟವಾಗುವ ರೆಸಿಪಿ. ಇದನ್ನ ಮಾಡಲು ಏನೆಲ್ಲಾ ಬೇಕು, ಮಾಡುವ ಕ್ರಮ ಹೇಗೆ ಎಂಬ ವಿವರ ಇಲ್ಲಿದೆ.

ಇದನ್ನೂ ಓದಿ: ಭಾನುವಾರದ ಸಂಜೆಗೆ ಬಾಯಲ್ಲಿ ನೀರೂರಿಸುವ ಆಲೂ ಮಂಚೂರಿಯನ್‌ ಮಾಡಿ, ಮಕ್ಕಳಿಗಂತೂ ಈ ರೆಸಿಪಿ ಸಖತ್ ಇಷ್ಟ ಆಗುತ್ತೆ

ಮಿಶ್ರ ಬೇಳೆ ವಡಾಕ್ಕೆ ಬೇಕಾಗುವ ಸಾಮಗ್ರಿಗಳು

ಉದ್ದಿನಬೇಳೆ – ಅರ್ಧ ಕಪ್, ಕಡಲೆಬೇಳೆ – ಅರ್ಧ ಕಪ್‌, ಹೆಸರುಬೇಳೆ – ಅರ್ಧ ಕಪ್‌ ಗೋಧಿಹಿಟ್ಟು – ಅರ್ಧ ಕಪ್‌, ಅಕ್ಕಿಹಿಟ್ಟು – ಅರ್ಧ ಕಪ್‌, ಶುಂಠಿ – ಸಣ್ಣ ತುಂಡು, ನೀರು – ಹದಕ್ಕೆ, ಎಣ್ಣೆ – ಕರಿಯಲು, ಕೊತ್ತಂಬರಿ ಸೊಪ್ಪು – ಸ್ವಲ್ಪ, ಹಸಿಮೆಣಸು – ಐದಾರು, ಕರಿಬೇವು – ಒಂದು ಮುಷ್ಟಿ, ಉಪ್ಪು – ರುಚಿಗೆ,

ಇದನ್ನೂ ಓದಿ: ಸಂಜೆ ಸ್ನ್ಯಾಕ್ಸ್‌ಗೆ ವಿಶೇಷವಾದ ತಿಂಡಿ ಮಾಡ್ಬೇಕು ಅಂತಿದ್ರೆ ಬ್ರೆಡ್ ವಡಾ ಟ್ರೈ ಮಾಡಿ, ಮಕ್ಕಳಿಗಷ್ಟೇ ಅಲ್ಲ ಮನೆಯವರಿಗೂ ಇಷ್ಟವಾಗುತ್ತೆ

ಮಿಶ್ರ ಬೇಳೆ ವಡೆ ಮಾಡುವ ವಿಧಾನ

ಉದ್ದಿನಬೇಳೆ, ಕಡಲೆಬೇಳೆ, ಹೆಸರುಬೇಳೆಯನ್ನು ಮೊದಲೇ ನೆನೆಸಿಟ್ಟಿರಬೇಕು. ಇವುಗಳನ್ನು ಕನಿಷ್ಠ 5 ಗಂಟೆಗಳ ಕಾಲ ನೆನೆಸಿ ಇಡಬೇಕು. ನಂತರ ಚೆನ್ನಾಗಿ ತೊಳೆದು ಮಿಕ್ಸಿ ಜಾರಿಗೆ ಹಾಕಿ. ಅದೇ ಜಾರಿಗೆ ಶುಂಠಿ, ಹಸಿಮೆಣಸು ಹಾಗೂ ಸ್ವಲ್ಪ ನೀರು ಸೇರಿಸಿ ರುಬ್ಬಿಕೊಳ್ಳಿ. ಈ ಮಿಶ್ರಣವನ್ನು ಒಂದು ಪಾತ್ರೆಯಲ್ಲಿ ಹಾಕಿ. ಆ ಪಾತ್ರೆಗೆ ಗೋಧಿಹಿಟ್ಟು, ಅಕ್ಕಿಹಿಟ್ಟು, ಕೊತ್ತಂಬರಿ ಸೊಪ್ಪು, ಕರಿಬೇವು ಹಾಗೂ ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ. ಈ ಎಲ್ಲವನ್ನೂ ಚೆನ್ನಾಗಿ ಮಿಶ್ರಣ ಮಾಡಿ. ಈ ಹಿಟ್ಟನ್ನು ವಡೆಯ ಆಕಾರಕ್ಕೆ ತಟ್ಟಿ, ಇದನ್ನು ಎಣ್ಣೆಯಲ್ಲಿ ಕರಿಯಿರಿ. ಈಗ ನಿಮ್ಮ ಮುಂದೆ ರುಚಿಯಾದ ಮಿಶ್ರಬೇಳೆಯ ವಡಾ ತಿನ್ನಲು ಸಿದ್ಧ.

ಈ ರೀತಿಯ ವಡಾವನ್ನು ಮನೆಯಲ್ಲಿ ಮಾಡಿ ತಿನ್ನುವುದು ಆರೋಗ್ಯದ ದೃಷ್ಟಿಯಿಂದಲೂ ಉತ್ತಮ. ಮಾತ್ರವಲ್ಲ ಮಿಶ್ರಬೇಳೆಗಳು ಕೂಡ ಆರೋಗ್ಯಕ್ಕೆ ಉತ್ತಮವಾಗಿರುವ ಕಾರಣ ಈ ವಡಾ ರುಚಿಯ ಜೊತೆಗೆ ಆರೋಗ್ಯಕ್ಕೂ ಬೆಸ್ಟ್ ಎನ್ನಿಸುತ್ತದೆ.

ಇದನ್ನೂ ಓದಿ: ಸಂಜೆ ಕಾಫಿಗೆ ಸಖತ್ ಕಾಂಬಿನೇಷನ್ ಸ್ವೀಟ್‌ ಕಾರ್ನ್ ಪಕೋಡ; ಮಕ್ಕಳಿಗೂ ಇಷ್ಟವಾಗುವ ಈ ತಿಂಡಿ ಮಾಡೋದು ಸುಲಭ, ರೆಸಿಪಿ ಇಲ್ಲಿದೆ